Times of kudla

Three persons from the Billava community must be given the Congress ticket -Billava leaders ಮೂಜಿ ಜನ ಬಿಲ್ಲವ ಅಭ್ಯರ್ಥಿಲೆಗ್ ಕಾಂಗ್ರೆಸ್ ಟಿಕೆಟ್ ಕೊರೊಡು: ಬಿಲ್ಲವ ಮುಖಂಡೆರ್

ವಿಧಾನಸಭೆ ವೋಟ್ ಗ್ ಉಂತರೆ ದಕ್ಷಿಣ ಕನ್ನಡ ಜಿಲ್ಲೆದ ಕನಿಷ್ಠ 3 ಬಿಲ್ಲವ ಅಭ್ಯರ್ಥಿಲೆಗ್ ಕಾಂಗ್ರೆಸ್ ಪಕ್ಷರ್ದ್ ಅವಕಾಶ ಕೊರೊಡು ಪಂದ್ ಕಾಂಗ್ರೆಸ್ ಪಕ್ಷದ ಬಿಲ್ಲವ ಮುಖಂಡೆರ್ ಕೇನ್ ದೆರ್.

ಕುಡ್ಲ ಪೇಂಟೆದ ಪ್ರೆಸ್ ಕ್ಲಬ್ ಡ್ ನಡತಿನ ಪತ್ರಿಕಾಗೋಷ್ಠಿಡ್ ಪಾತೆರಿನ ದಕ್ಷಿಣ ಕನ್ನಡ ಜಿಲ್ಲಾ ಕಾಂಗ್ರೆಸ್ ಹಿಂದುಳಿದ ವರ್ಗಲೆನ ಉಪಾಧ್ಯಕ್ಷೆರ್ ಗಣೇಶ್ ಪೂಜಾರಿ ಗಂಜಿಮಠ, ಕಾಂಗ್ರೆಸ್ ಮುಖಂಡೆರ್ ಉಲ್ಲಾಸ್ ಕೋಟ್ಯಾನ್ ಪುತ್ತೂರ್ ಮೊಕುಲು, ದ.ಕ. ಜಿಲ್ಲೆಡ್ ಎಚ್ಚ ಸಂಖ್ಯೆಡ್ ಇಪ್ಪುನ ಬಿಲ್ಲವೆರ್ ಸುಳ್ಯ ಬುಡ್ದು ಒರಿನ 7 ವಿಧಾನಸಭೆ ಕ್ಷೇತ್ರಡ್ ನಿರ್ಣಾಯಕೆರಾತೆರ್ ಪಂದ್ ಪಂಡೆರ್. ಬಿಲ್ಲವ ಸಮುದಾಯದ ಜನಾರ್ದನ ಪೂಜಾರಿ ಮೆರೆನ ನಾಯಕತ್ವಗ್ ಗೌರವ, ಬೆಂಬಲ ಕೊರೊಂದು ಉಂಡು. ಆಂಡ ಅರೆಗ್ ಹುಷಾರ್ ಇಜ್ಜಂದೆ ಆಯಿ ಬೊಕ್ಕ ಕರಿನ ವಿಧಾನಸಭೆ ವೋಟ್ ಡ್ ಒರಿ ಬಿಲ್ಲವ ಅಭ್ಯರ್ಥಿಗ್ ಅವಕಾಶ ಕೊರ್ತುಂಡು. ಬಿಲ್ಲವ ಸಮುದಾಯಗ್ ಸಮರ್ಪಕ ನಾಯಕತ್ವ ಇಜ್ಜಂದೆ ಬಿಲ್ಲವ ಮತದಾರೆರ್ ಕಾಂಗ್ರೆಸ್ ಬುರ್ದು ಬೇತೆ ಪಕ್ಷದ ಬಗ್ಗೆ ಗಮನ ಕೊರೊಂದು ಉಲ್ಲೆರ್. ನೆನ್ ಪಕ್ಷದ ವರಿಷ್ಠರೆನ ಗಮನಗ್ ಕನದ್ಂಡ್. ಆರ್ ಸಕಾರಾತ್ಮಕವಾದ್ ಸ್ಪಂದಿಸಾದೆರ್ ಪಂದ್ ತೆರಿಪಾದೆರ್.

Tickets of the play Shivadoothe Gulige released in Dubai ದುಬೈಡ್ ಬುಡುಗಡೆ ಆಂಡ್ ಶಿವದೂತೆ ಗುಳಿಗೆ ನಾಟಕದ ಟಿಕೆಟ್

ದುಬೈ: ಕಲಾ ಸಂಗಮ ಕುಡ್ಲ ಕಲಾವಿದೆರ್ದ್, ವಿಜಯಕುಮಾರ್ ಕೊಡಿಯಲ್ ಬೈಲ್ ರಚನೆ ಬೊಕ್ಕ ನಿರ್ದೇಶನದ “ಶಿವದೂತೆ ಗುಳಿಗೆ” ನಾಟಕ ಮಾ.19 ಕ್ಕ್ ದುಬೈಡ್ ಪ್ರದರ್ಶನ ಆವರೆ ಉಂಡು. ಈ ನಾಟಕದ ಟಿಕೆಟ್ ಬುಡುಗಡೆ ಲೇಸ್ ಫೆ.19 ಕ್ ಗಿಸೇಸ್ ದ ಫಾರ್ಚೂನ್ ಪ್ಲಾಝದ ಚಾವಡಿಡ್ ನಡತ್ಂಡ್.

ಅಬುಧಾಬಿ ಕರ್ನಾಟಕ ಸಂಘದ ಅಧ್ಯಕ್ಷೆರ್ ಸರ್ವೋತ್ತಮ ಶೆಟ್ಟಿ, ಫಾರ್ಚೂನ್ ಗ್ರೂಪ್ ಆಫ್ ಹೋಟೆಲ್‌ ದ ಮಾಲಕೆರ್ ವಕ್ವಾಡಿ ಪ್ರವೀಣ್ ಕುಮಾರ್ ಶೆಟ್ಟಿ, ಬಿಲ್ಲವಾಸ್ ದುಬೈದ ಅಧ್ಯಕ್ಷೆರ್ ಪ್ರಭಾಕರ ಸುವರ್ಣ, ಬಿಲ್ಲವಾಸ್ ದ ಸತೀಶ್ ಪೂಜಾರಿ, ಕನ್ನಡ ಪಾಠ ಶಾಲೆ ದುಬೈದ ಶಶಿಧರ್ ನಾಗರಂಜಪ್ಪ, ಮೊಗವೀರ್ಸ್ ಸಮಾಜದ ಬಾಲಕೃಷ್ಣ ಸಾಲಿಯಾನ್, ಉದ್ಯಮಿಲಾಯಿನ ಗುಣಶೀಲ್ ಶೆಟ್ಟಿ, ಪ್ರೇಮನಾಥ ಶೆಟ್ಟಿ, ಹರೀಶ್ ಬಂಗೆರ, ಪದ್ಮಶಾಲಿ ಸಮಾಜದ ಧನಂಜಯ ಶೆಟ್ಟಿಗಾರ್, ಅಲ್ ಫರ್ದಾನ್ ಎಕ್ಸ್ ಚೇಂಜ್ ದ ಸಿಇಓ ತಾರಾನಾಥ ರೈ, ಚಿತ್ರ ನಿರ್ಮಾಪಕೆರ್ ಆತ್ಮಾನಂದ ರೈ, ಸಂಘಟಕೆರ್ ನೊವೆಲ್ ಅಲ್ಮೇಡಾ, ದಯಾ ಕಿರೋಡಿಯನ್ ತುಡರ್ ಅರ್ಲಾದ್ ಲೇಸ್ ದ ಉದಿಪನ ಮಲ್ತೆರ್.

ಮಾ.19 ಕ್ಕ್ ಪೇಂಟೆದ ಉದುಮೇತದ ಅಲ್ ನಸರ್ ಲ್ಯಾಂಡ್ ದ ಐಸ್ ಲಿಂಕ್ ಡ್ ಮಧ್ಯಾಹ್ನ 2.30 ಗು ಬೊಕ್ಕ ಬಯ್ಯ 6 ಗಂಟೆಗ್ ನಾಟಕ ಪ್ರದರ್ಶನ ಆಪುಂಡು. ಈ ನಾಟಕದ ಟಿಕೆಟ್ ಲೆನ್ ಗಣ್ಯೆರ್ ಬುಡುಗಡೆ ಮಲ್ತೆರ್. ‌

ತುಳುನಾಡ್ ದ ದೈವ ದೇವೆರೆನ ಕಥೆ ಇಪ್ಪುನ ಈ ನಾಟಕನ್ ಯುಎಇಡ್ ಇಪ್ಪುನ ಮಾತ ತುಳು ಕನ್ನಡಿಗೆರ್ ತೂವೊಡು. ಇಸೇಸವಾದ್ ಈ ನಾಟಕನ್ ನಮ್ಮ ಜೋಕುಲೆಗ್ ತೊಜಪಾದ್ ನಮ್ಮ ತುಳುವ ಸಂಸ್ಕೃತಿನ್ ಒರಿಪುನಂಚಿನ ಪ್ರಯತ್ನ ಈ ನಾಟಕದ ಮುಖೇನ ಆವು. ಇತ್ತೆ ಕರ್ನಾಟಕ ಬೊಕ್ಕ ಕೇರಳದ ಗಡಿನಾಡ್ ಡ್ 400 ರ್ದ್ ಎಚ್ಚ ಪ್ರದರ್ಶನ ಆಯಿನ ಈ ನಾಟಕನ್ ದುಬೈಡ್ ಹೌಸ್ ಫುಲ್ ಪ್ರದರ್ಶನ ಮಲ್ಪುನವು ಎಂಕ್ಲೆನ, ನಿಕ್ಲೆನ ಮಾತೆರ್ನಲ ಜಬದಾರಿ ಪಂದ್ ಪಾತೆರ್ದ್, ನಾಟಕಗ್ ಎಡ್ಡೆಪ್ಪು ಬಯಕಿಯೆರ್.

ನಾಟಕದ ಸಂಚಾಲಕೆರ್ ಹರೀಶ್ ಬಂಗೇರ, ದಿನೇಶ್ ಶೆಟ್ಟಿ ಕೊಟ್ಟಿಂಜ, ರಾಜೇಶ್ ಕುತ್ತಾರ್, ಗಿರೀಶ್ ನಾರಾಯಣ್, ಪ್ರಕಾಶ್ ಪಕಳ, ಶಾನ್ ಪೂಜಾರಿ ಬತ್ತಿನ ಬಿನ್ನೆರೆಗ್ ಪುರ್ಪದ ಗೊಂಚಿಲ್ ಕೊರ್ದು ಎದ್ಕೊನಿಯೆರ್. ಗಿರೀಶ್ ನಾರಾಯಣ್ ಶಿವದೂತೆ ಗುಳಿಗೆ ನಾಟಕ ಒಲ್ಪೊಲ್ಪ ಪ್ರದರ್ಶನ ಆತ್ಂಡ್ ಪನ್ಪುನ ಪೊಲಬುನ್ ಕೊರಿಯೆರ್. ರಾಜೇಶ್ ಕುತ್ತಾರ್ ಲೇಸ್ ದ ಸುಧಾರಿಕೆ ಮಲ್ತ್ ದ್ ಸೊಲ್ಮೆ ಸಂದಾಯೆರ್.

2,500 ಸೀಟ್ ಇಪ್ಪುನ ಈ ಸಭಾಂಗಣಡ್ ರಡ್ಡ್ ಪ್ರದರ್ಶನಡ್ 5,000 ಜನ ತುಳು – ಕನ್ನಡಿಗೆರ್ ಈ ನಾಟಕನ್ ತೂವೆರೆ ಉಲ್ಲೆರ್. ಇತ್ತೆ ನಾಟಕದ ಟಿಕೆಟ್ ಗಾದ್ ಸಾರರ್ದ್ ಎಚ್ಚ ಫೋನ್ ಬೈದ್ಂಡ್. ಟಿಕೆಟ್ ಲೆನ್ ಇನಿರ್ದ್ ನಿಕುಲೆನ ಮಲ್ತೊಂಡ ನಾಟಕ ತೂಪುನ ಅವಕಾಶ ತಿಕ್ಕು ಪಂದ್ ಸಂಚಾಲಕೆರ್ ಬಿನ್ನಾಪು ಮಲ್ದೆರ್.

ವರದಿ: ವಿಜಯಕುಮಾರ್ ಶೆಟ್ಟಿ ಗಾಣದಮೂಲೆ ಮಜಿಬೈಲ್ (ದುಬೈ)
ಚಿತ್ರ : ವಿವೇಕ್ ಆನಂದ್ ದುಬೈ

Tickets of the play Shivadoota Guliga released in Dubai

Dubai: The play Shivadoota Guliga played under Kala Sangama , Mangalore and written by Vijay Kumar Kodialbail will be played on March 19 th at Dubai.
The tickets for the same was released on February 19 th.Two shows of the Play will be held.

Litterateur Shantha Kuntini gets the Sahitya Rathna Award ಸಾಹೆತಿ ಶಾಂತಾ ಕುಂಟಿನಿ ಮೆರೆಗ್ ಸಾಹಿತ್ಯ ರತ್ನ ಪ್ರಶಸ್ತಿ

ಪುತ್ತೂರ್: ಪೆರ್ಲದ ಪಡ್ರೆ ಚಂದು ಸ್ಮಾರಕ ಯಕ್ಷಗಾನ ನಾಟ್ಯ ತರಬೇತಿ ಕೇಂದ್ರದ 18 ನೇ ವಾರ್ಷಿಕ ಉಚ್ಚಯದ ಲೆಕ್ಕೊಡು ಫೆ.25 ಕ್ ನಡಪುನ ರಂಗವೇದಿಕೆ ಉದಿಪನ ಬೊಕ್ಕ ನಾಟ್ಯ ಗುರುಕುಲೆನ ಷಷ್ಟ್ಯಬ್ಧಿದ ಲೇಸ್ ಡ್ ಪುತ್ತೂರುದ ಸಾಹಿತಿ, ಸಂಘಟಕಿ ಶಾಂತಾ ಕುಂಟಿನಿ ಮೆರೆಗ್ ಸಾಹಿತ್ಯ ರತ್ನ ಪ್ರಶಸ್ತಿ ಪ್ರದಾನ ಮಲ್ಪೆರೆ ಉಂಡು.

ಎಡನೀರು ಮಠದ ಶ್ರೀ ಸಚ್ಚಿದಾನಂದ ಭಾರತಿ ಸ್ವಾಮೀಜಿ, ಕರ್ನಾಟಕ ಲೋಕಸೇವಾ ಆಯೋಗದ ಮಾಜಿ ಅಧ್ಯಕ್ಷೆರ್ ಡಾ. ಟಿ. ಶಾಮ ಭಟ್, ಪಡ್ರೆ ಚಂದು ಸ್ಮಾರಕದ ಸ್ಥಾಪಕಾಧ್ಯಕ್ಷೆರ್ ಯಕ್ಷನಾಟ್ಯ ಗುರು ಸಬ್ಬಣಕೋಡಿ ರಾಮ್ ಭಟ್, ದಿಗ್ವಿಜಯ ಗ್ರೂಪ್ ಆಫ್ ಕಂಪೆನಿಸ್ ಚೇರ್ಮೆನ್ ಮಾವೆ ದಿನಕರ ಭಟ್, ಯಕ್ಷಪ್ರಭಾ ಮಾಸ ಪತ್ರಿಕೆ ಸಂಪಾದಕೆರ್ ಯಕ್ಷಗಾನ ಕಲಾವಿದೆ ಕೆ.ಎಲ್. ಕುಂಡಂತಾಯ, ಎಡನೀರು ಮಠದ ಪ್ರಬಂಧಕೆರ್ ರಾಜೇಂದ್ರ ಕಲ್ಲೂರಾಯ, ಪಡ್ರೆ ಚಂದು ಸ್ಮಾರಕ ಯಕ್ಷಗಾನ ನಾಟ್ಯ ತರಬೇತಿ ಕೇಂದ್ರದ ಗೌರವಾಧ್ಯಕ್ಷೆರ್ ಎನ್.ಕೆ. ರಾಮಚಂದ್ರ ಭಟ್, ಭಾಗವತೆರ್ ಸತ್ಯನಾರಾಯಣ ಪುಣಿಂಚಿತ್ತಾಯ ಪೆರ್ಲ, ನಿವೃತ್ತ ಅಧ್ಯಾಪಕೆರ್ ಯಕ್ಷಗಾನ ಕಲಾವಿದೆ ಮಂಗೇಶ್ ವಿಟ್ಲ ಮೊಕ್ಲೆನ ಉಪಸ್ಥಿತಿಡ್ ಪ್ರಶಸ್ತಿ ಪ್ರದಾನ ಲೇಸ್ ನಡಪರೆ ಉಂಡು ಪಂದ್ ಪ್ರಕಟಣೆ ತೆರಿಪಾದ್ಂಡ್. ಸಾಹಿತ್ಯ ಕ್ಷೇತ್ರಡ್ ಸಕ್ರಿಯವಾದ್ ಇಪ್ಪುನ ಶಾಂತಾ ಕುಂಟಿನಿ ಮೇರ್ ಉಬಾರ್ ದ ನೆಕ್ಕಿಲಾಡಿಡ್ ಇಪ್ಪುನ ಶಾಂತಾ ಸಭಾಭವನದ ಮಾಲಕೆರ್ ಆದುಲ್ಲೆರ್.

Litterateur Shantha Kuntini gets the Sahitya Rathna Award

Puttur: At the 18 th annual program of Padre Chandu memorial Yakshagana Tarabathy Kendra , Perla, to be held on the 25thof February,author, litterateur,organiser Shanta Kuntini will be presented with the Sahitya Rathna Award.

A host of dignitaries including Sri Sachidanand Bharati Swamiji of Edneer mutt, Dr Shyam Bhat former president of Karnataka Lok Seva Ayoga , Yakshanatya Guru Sabannakodi Ram Bhat Mave Dinakar bhat of Digvijaya group are expected to participate in the function.

Radio Manipal to air program to give information on benifits of Jal Jeevan Mission ರೇಡಿಯೊ ಮಣಿಪಾಲ್ ಡ್ ಜಲ್ ಜೀವನ್ ಮಿಷನ್ ಯೋಜನೆದ ಪ್ರಯೋಜನಲು ಬಗೆಟ್ ಪೊಲಬು

ಮಣಿಪಾಲ: ರೇಡಿಯೊ ಮಣಿಪಾಲ್ 90.4 Mhz,ಡ್ ಗ್ರಾಮೀಣ ಪರ್ಪಿನ ನೀರ್ ಬೊಕ್ಕ ನೈರ್ಮಲ್ಯ ಇಲಾಖೆ ಬೆಂಗ್ಲೂರ್ ನೆತ್ತ ಮುತಾಲಿಕೆಡ್ ಶುದ್ಧ ಜಲ, ಸ್ವಚ್ಛ ನೆಲ, ಆರೋಗ್ಯವಾಗಿರಲಿ ಜೀವಸಂಕುಲ ಸರಣಿ ಲೇಸ್ ಫೆ.21 ಕ್ ಅಂಗಾರೆ ಬಯ್ಯಗ್ 6 ಗಂಟೆಗ್ ಜಲ್ ಜೀವನ್ ಮಿಷನ್ ಯೋಜನೆದ ಪ್ರಯೋಜನ ಪನ್ಪಿನ ವಿಚಾರ ಪ್ರಸಾರ ಆಪುಂಡು.

ಈ ಲೇಸ್ ಡ್ ಕಾಡೂರು ಗ್ರಾಮ ಪಂಚಾಯತ್ ದ ಪಂಚಾಯತ್ ಅಭಿವೃದ್ಧಿ ಅಧಿಕಾರಿ ಮಹೇಶ್ ಪಾಲ್ ಪಡೆಯೆರೆ ಉಲ್ಲೆರ್. ಫೆ.22 ಕ್ ಮಧ್ಯಾಹ್ನ 2 ಗಂಟೆಗ್ ಮರುಪ್ರಸಾರ ಆಪುಂಡು.

Free bus pass for students from April 1st- CM Basavaraj Bommai ಏ.1 ರ್ದ್ ಧರ್ಮೊಗು ಬಸ್ ಪಾಸ್: ಸಿಎಂ ಬೊಮ್ಮಾಯಿ

ಬೆನ್ಪುನ ಪೊಣ್ಣು ಜೋಕುಲೆಗ್ ಬೊಕ್ಕ ಕಲ್ಪಾರ್ಥಿಲೆಗ್ ಏ.1 ರ್ದ್ ಧರ್ಮೊಗು ಬಸ್ ಪಾಸ್ ವ್ಯವಸ್ಥೆ ಮಲ್ಪೆರೆ ಮಾತ ಕ್ರಮಲ ದೆತೊನೊಂದುಲ್ಲ ಪಂದ್ ಸಿಎಂ ಬೊಮ್ಮಾಯಿ ಪಂಡೆರ್.

ಬೆಂಗ್ಲೂರ್ ಡ್ ಸಾರಿಗೆ ಸಂಸ್ಥೆದ ಬಸ್ ಲೆನ್ ಬುಡುಗಡೆ ಮಲ್ತ್ ದ್ ಪಾತೆರ್ದ್ ಮೇರ್, ಪೊಂಜೋವ್ ನಕುಲು ಆರ್ಥಿಕವಾದ್ ಸ್ವಾವಲಂಬಿ ಆವರೆ ಈ ಯೋಜನೆನ್ ಮಲ್ದ್ಂಡ್. ಮಿನಿ ಸ್ಕೂಲ್ ಬಸ್ ಲೆನ್ ಕನವೊಡು. ಶಾಲೆ ಸುರು ಆಪುನ ಪೊರ್ತುಡು ಪ್ರತಿ ತಾಲೂಕ್ ಡ್ ಕನಿಷ್ಠ ಐನ್ ಬಸ್ ಸಂಚಾರ ಸುರು ಮಲ್ಪೊಡು ಪಂದ್ ಪಂಡೆರ್.

Free bus pass for students from April 1st- CM Basavaraj Bommai

Free bus pass for working women and students will start from April 1st announced CM Basavaraj Bommai while speaking at the inauguration of KSRTC buses in Bangalore today.It aimed at helping women to be self reliant.

Feb 22-28: Shri Chandika Parameshwari Devi temple: Chandika Nagara- Asthabanda, Brahmakalashotsava ಫೆ.22-28: ಚಂಡಿಕಾ ನಗರ ಶ್ರೀ ಚಂಡಿಕಾ ಪರಮೇಶ್ವರಿ ದೇವಿ ದೇವಲ್ಯಡ್ ಅಷ್ಟಬಂಧ, ಬ್ರಹ್ಮಕಲಶಾಭಿಷೇಕ, ಜಾತ್ರೆ

ಬಂಟ್ವಾಳ: ಚಂಡಿಕಾನಗರ ಶ್ರೀ ಚಂಡಿಕಾಪರಮೇಶ್ವರಿ ದೇವಿ ದೇವಲ್ಯಡ್ ಅಷ್ಟಬಂಧ, ಬ್ರಹ್ಮಕಲಶಾಭಿಷೇಕ ಬೊಕ್ಕ ಜಾತ್ರೆ ಫೆ.22-28 ಮುಟ್ಟ ನಡಪರೆ ಉಂಡು.

ನೀಲೇಶ್ವರ ಉಚ್ಚಿಲತ್ತಾಯ ಪದ್ಮನಾಭ ತಂತ್ರಿಲೆನ ಮುತಾಲಿಕೆಡ್, ಕ್ಷೇತ್ರದ ವ್ಯವಸ್ಥಾಪನಾ ಸಮಿತಿ, ಜೀರ್ಣೋದ್ಧಾರ ಸಮಿತಿ, ಬ್ರಹ್ಮಕಲಶ ಉಚ್ಚಯ ಸಮಿತಿ ಬೊಕ್ಕ ಊರುದ ಕೂಡುಕಟ್ಟ್ ದ ಯಜಮಾನತ್ವಡ್ ಈ ಲೇಸ್ ನಡಪರೆ ಉಂಡು. ಅಂಚೆನೆ ಪ್ರತಿದಿನಲ ಬೇತೆ ಬೇತೆ ವೈದಿಕ, ಧಾರ್ಮಿಕ, ಸಾಂಸ್ಕೃತಿಕ ಲೇಸ್ ನಡಪರೆ ಉಂಡು. ಈ ಲೇಸ್ ಗ್ ಮಾತೆರ್ಲಾ ಬತ್ತ್ ದ್ ಅಪ್ಪೆ ಶ್ರೀ ಚಂಡಿಕಾಪರಮೇಶ್ವರೀ ಬೊಕ್ಕ ಪರಿವಾರ ದೇವೆರೆನ ಕೃಪೆಗ್ ಪಾತ್ರರಾವೊಡು ಪಂದ್ ವ್ಯವಸ್ಥಾಪನಾ ಸಮಿತಿದ ಅಧ್ಯಕ್ಷೆರ್ ಲಯನ್ ಲೋಕನಾಥ ಶೆಟ್ಟಿ MJF, ಗೌರವಾಧ್ಯಕ್ಷೆರ್ ತಿಮ್ಮಪ್ಪ ರೈ ಏರಿಮಾರ್, ಜೀರ್ಣೋದ್ಧಾರ ಬೊಕ್ಕ ಬ್ರಹ್ಮಕಲಶ ಉಚ್ಚಯ ಸಮಿತಿದ ಅಧ್ಯಕ್ಷೆರ್ ರಾಕೇಶ್ ಮಲ್ಲಿ, ಗೌರವಾಧ್ಯಕ್ಷೆರ್ ಬಂಟ್ವಾಳ ಶಾಸಕೆರ್ ಯು. ರಾಜೇಶ್ ನಾಯ್ಕ್, ಕುಡ್ಲ ಸಂಸದೆರ್ ನಳಿನ್ ಕುಮಾರ್ ಕಟೀಲ್, ಮಾಜಿ ಸಚಿವೆರ್ ಬಿ. ರಮಾನಾಥ ರೈ ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.

February 27 th: ” Tulu Bellitereya Suvarna Yana” book launched; Tulu Chitramala movie show ಫೆ.27: ತುಳು ಬೆಳ್ಳಿತೆರೆಯ ಸುವರ್ಣ ಯಾನ ಬೂಕು ಬುಡುಗಡೆ, ತುಳು ಚಿತ್ರಮಾಲಾ ಪಿಕ್ಚರ್ ಪ್ರದರ್ಶನ

ದೃಶ್ಯಾಲಯ ಸಂಚಯನ ಸಮಿತಿ ಕುಡ್ಲ ನೆತ್ತ 50 ನೇ ವರ್ಷೊದ ಸಿನೆಮಾ ರಂಗದ ಚರಿತ್ರೆದ ಬಗೆಟ್ಟ್ ತಮ್ಮ ಲಕ್ಷ್ಮಣೆರ್ ಬರೆಯಿನ “ತುಳು ಬೆಳ್ಳಿತೆರೆಯ ಸುವರ್ಣ ಯಾನ ಕೃತಿ” ಬುಡುಗಡೆ ಲೇಸ್ ಫೆ.27 ಸೋಮಾರ ಬಯ್ಯಗ್ 4:30 ಗು ಕುಡ್ಲದ ಪುರಭವನಡ್ ನಡಪರೆ ಉಂಡು.

ಬಯ್ಯಗ್ 5 ಗಂಟೆಗ್ ತುಳು ಚಿತ್ರಮಾಲಾ ಪಿಚ್ಚರ್ ಪ್ರದರ್ಶನ ಆಪುಂಡು. ಬೊಕ್ಕ ತುಳು ಚಿತ್ರರಂಗದ ಸುರುತ ಪೆರಿಯೆರೆಗ್ ಗೌರವ ಪ್ರಧಾನ ಮಲ್ಪೆರೆ ಉಂಡು.

February 27 th: ” Tulu Bellitayreya Suvarna Yana” book launched;
Tulu Chitramala movie show

” Tulu Bellitayreya Suvarna Yana” book written by Lakshman will be launched on Monday , February 27 th at Town Hall, Manglore.
There will be a show of Tulu Chitramala in the evening followed by a program honouring the seniors of the Tulu film industry.

February 22 -28th: Anekallu Sri Santana Gopal Krishna temple – Punaha Pratistapaney and Brahmakalash Abhishek celebration ಫೆ.22-28 ಮುಟ್ಟ ಆನೆಕಲ್ಲು ಶ್ರೀ ಸಂತಾನ ಗೋಪಾಲಕೃಷ್ಣ ದೇವಲ್ಯಡ್ ಪುನಃ ಪ್ರತಿಷ್ಠಾ ಅಷ್ಟಬಂಧ ಬ್ರಹ್ಮಕಲಶಾಭಿಷೇಕ ಉಚ್ಚಯ

ಮಂಜೇಶ್ವರ ತಾಲೂಕ್‌ದ ಛತ್ರ ಆನೆಕಲ್ಲು ಶ್ರೀ ಸಂತಾನ ಗೋಪಾಲಕೃಷ್ಣ ದೇವಲ್ಯಡ್ ಫೆ.22-28 ಮುಟ್ಟ ಪುನಃ ಪ್ರತಿಷ್ಠಾ ಅಷ್ಟಬಂಧ ಬ್ರಹ್ಮಕಲಶಾಭಿಷೇಕ ಉಚ್ಚಯ ಭಾರೀ ಗೌಜಿಡ್ ನಡಪರೆ ಉಂಡು.

ಅಂಚಾದ್ ಈ ಬಗೆಟ್ ನಡತಿನ ಪತ್ರಿಕಾಗೋಷ್ಠಿಡ್ ಬ್ರಹ್ಮಕಲಶೋಚ್ಚಯ ಸಮಿತಿದ ಕಾರ್ಯಂತೆರ್ ಶಿವಪ್ರಸಾದ್ ಶೆಟ್ಟಿ ಪಾತೆರ್ದ್, ಮಂಜೇಶ್ವರ ಬೊಕ್ಕ ಸುಬ್ರಹ್ಮಣ್ಯ ರಾಜ್ಯ ಮಾರ್ಗದ ಬರಿಟ್ಟ್ ಆನೆಕಲ್ಲು ಛತ್ರ ಪನ್ಪಿನ ಜಾಗೆಡ್ ಪರಿಸರದ ನಡುಟ್ಟ್ ಈ ದೇವಲ್ಯ ಉಂಡು. ಈ ದೇವಲ್ಯದ ಪುದರ್‌ರೇ ಪನ್ಪಿಲೆಕ್ಕ ಈ ಜಾಗೆಗ್ ಜೋಕುಲ್ ಆವಾಂದಿನಕ್ಲೆಗ್ ಜೋಕುಲ್ ಆಯರೆ ಪರಕೆ ಪನ್ಪೆರ್. ಅಂಚನೆ ಪರಕೆ ಪಂದ್ ಪೋತಿನಕ್ಲೆಗ್ ಜೋಕುಲು ಆತಿನಲ ಮಸ್ತ್ ನಿದರ್ಶನಲು ಉಂಡು ಪಂದ್ ಪಂಡೆರ್.

ಸುಮಾರ್ 125 ವರ್ಷದ ಪಿರವು ಈ ದೇವಲ್ಯನ್ ಸಂತಾನ ಪ್ರಾಪ್ತಿಗಾದ್ ಪಂತಿನ ಪರಕೆ ಫಲ ಕೊರ್ತಿನೆಡ್ದಾವರ ಊರುದ ಪುಗರ್ತೆದ ಜನ ಆಯಿನ ದಿ. ಕೊಣಿಬೈಲ್ ವೆಂಕ ಶೆಟ್ಟಿ ಮೇರ್ ನಿರ್ಮಾಣ ಮಲ್ತ್‌ದೆರ್ ಪಂದ್ ಊರುದ ಹಿರಿಯೆರ್ ಬೊಕ್ಕ ಶಿಲಾ ಶಾಸನರ್ದ್ ತೆರಿದ್ ಬೈದ್ಂಡ್. ದೇವಲ್ಯದ ಪುದರ್‌ಡ್ 3.93 ಎಕ್ರೆ ಜಾಗೆ ಉಂಡು. ಈ ದೇವಲ್ಯಡ್ ವರ್ಕಾಡಿ ದಿನೇಶಕೃಷ್ಣ ತಂತ್ರಿಲೆನ ಮುತಾಲಿಕೆಡ್ ಚಿಂತನೆ ಮಲ್ಪುನಗ ದೇವೆರೆನ ಗರ್ಭಗುಡಿ ಸೀಳ್ ಆತಿನವು ತೋಜಿದ್ ಬೈದ್ಂಡ್. ಅಯಿರ್ದ್ ಬೊಕ್ಕ ಊರುದ ಮಾತ ಭಕ್ತಾಧಿಲೆನ್ ಲೆತ್ತ್‌ದ್ ದೇವಲ್ಯನ್ ಜೀರ್ಣೋದ್ಧಾರ ಮಲ್ಪರೆ ಜೀರ್ಣೋದ್ಧಾರ ಕಮಿಟಿನ್ ರಚನೆ ಮಲ್ತ್‌ದೆರ್.

2019 ನೇ ನವೆಂಬರ್ 22 ತಾರೀಕ್‌ಗ್ ಪ್ರಶ್ನೆ ಚಿಂತನೆ ಮಲ್ತ್‌ದ್ ಅವೆಟ್ಟ್ ತೋಜಿದ್ ಬತ್ತಿಲೆಕ್ಕನೆ ಗ್ರಾಮದ ಬೊಕ್ಕ ಸೀಮೆದ ದೈವ ದೇವಸ್ಥಾನಗ್ ಸೇವೆನ್ ಸಂದಾದ್ ಆಶ್ಲೇಷ ಪೂಜೆ ಬೊಕ್ಕ ಸರ್ಪ ಸಂಸ್ಕಾರ ಸೇವೆನ್ ಮಲ್ತ್‌ದೆರ್.

ಈ ದೇವಲ್ಯದ ಜೀರ್ಣೋದ್ಧಾರದ ಒಟ್ಟು ಕರ್ಚಿ ಸುಮಾರ್ 1 ಕೋಟಿ 25 ಲಕ್ಷ ರೂಪಾಯಿ ಆವು ಪನ್ಪಿನ ಅಂದಾಜಿ ಇತ್ತ್ಂಡ್. ಆಂಡ ಇತ್ತೆ 1 ಕೋಟಿ 50 ಸಾರ ರೂಪಾಯಿ ಕರ್ಚಿ ಆತ್ಂಡ್. ನನಲ ಕೆಲ ಬೇಲೆಲು ಬಾಕಿ ಉಂಡು. ಊರುದ ಜನಕ್ಲೆನ ಸಕಾರರ್ದ್ ಇಡೇ ಮುಟ್ಟ ದೇವಲ್ಯದ ಬೇಲೆ ಎಡ್ಡೆ ರೀತಿಡ್ ಆತ್ಂಡ್. 7 ದಿನ ನಡಪುನ ಈ ಪುನಃಪ್ರತಿಷ್ಠಾ ಅಷ್ಟಬಂಧ ಬ್ರಹ್ಮಕಲಶೋಚ್ಚಯ ಬೇತೆ ಬೇತೆ ವೈಧಿಕ, ಧಾರ್ಮಿಕ ಬೊಕ್ಕ ಸಾಂಸ್ಕೃತಿಕ ಕಾರ್ಯಕ್ರಮದೊಟ್ಟುಗು ಭಾರೀ ಗೌಜಿಡ್ ನಡಪರೆ ಉಂಡು.

ಪತ್ರಿಕಾಗೋಷ್ಠಿಡ್ ಜೀಣೋದ್ಧಾರ ಸಮಿತಿದ ಅಧ್ಯಕ್ಷೆರ್ ಆಯಿನ ನಡಿಮಾರು ವಿಶ್ವನಾಥ ಶೆಟ್ಟಿ, ಗೌರಾವಾಧ್ಯಕ್ಷೆರ್ ಬಿ. ಸುಬ್ಬಯ್ಯ ಶೆಟ್ಟಿ ಕೊಡ್ಲಮೊಗರು, ಪ್ರಧಾನ ಕಾರ್ಯದರ್ಶಿ ಸತ್ಯನಾರಾಯಣ ಭಟ್, ಬ್ರಹ್ಮಕಲಶೋಚ್ಚಯ ಸಮಿತಿದ ಪ್ರಧಾನ ಕಾರ್ಯದರ್ಶಿ ಎನ್.ತಿಮ್ಮಪ್ಪ ರೈ, ಟ್ರಸ್ಟಿಲು ಆಯಿನ ವೆಂಕಟ್ರಾಜ್ ರೈ ನಾಣಿಲ್ತಡಿ, ಲೋಕಯ್ಯ ನಾಯ್ಕ ಕತ್ತೆರಿಕೋಡಿ, ಕಾರ್ತಿಕ್ ಎನ್ ನಾಣಿಲ್ತಡಿ, ಚಂದ್ರಶೇಖರ ರೈ ನಾಣಿಲ್ತಡಿ, ಮಾಧ್ಯಮ ಸಮಿತಿದ ಸಂಚಾಲಕೆರ್ ಮನೋಜ್ ಶೆಟ್ಟಿ ಕೊಡ್ಲಮೊಗರು ಇತ್ತೆರ್.

February 27- March 3rd: Annual Jatra at Moodbidri Shri Gurumata Kalikambha temple ಫೆ.27-ಮಾ.3: ಬೆದ್ರ ಶ್ರೀ ಗುರುಮಠ ಕಾಳಿಕಾಂಬಾ ದೇವಲ್ಯಡ್ ವರ್ಷಾಧಿದ ಜಾತ್ರೆ

ಬೆದ್ರ ಶ್ರೀ ಗುರುಮಠ ಕಾಳಿಕಾಂಬಾ ದೇವಲ್ಯಡ್ ವರ್ಷಾಧಿದ ಜಾತ್ರೆ ಫೆ.27 ರ್ದ್ ಮಾ.3 ಮುಟ್ಟ ನಡಪರೆ ಉಂಡು.

ಶ್ರೀ ಅಯ್ಯ ಗುರುಕುಲೆನ ಅನುಗ್ರಹ ಅಂಚೆನೆ ಆನೆಗುಂದಿ ಸಂಸ್ಥಾನ ಸರಸ್ವತೀ ಪೀಠಾಧೀಶ್ವರ ಅನಂತಶ್ರೀ ವಿಭೂಷಿತ ಕಾಳಹಸ್ತೇಂದ್ರ ಸರಸ್ವತೀ ಮಹಾಸ್ವಾಮಿಲೆನ ಉಪಸ್ಥಿತಿಡ್ ಈ ಲೇಸ್ ನಡಪರೆ ಉಂಡು. ಅಂಚನೆ ಪ್ರತಿದಿನಲ ಬೇತೆ ಬೇತೆ ವೈದಿಕ, ಧಾರ್ಮಿಕ ಸಾಂಸ್ಕೃತಿಕ ಲೇಸ್ ನಡಪರೆ ಉಂಡು. ಈ ಲೇಸ್ ಗ್ ಮಾತೆರ್ಲಾ ಬತ್ತ್ ದ್ ಪ್ರಸಾದ ದೆತೊಂದು ಶ್ರೀ ದೇವಿನ ಕೃಪೆಗ್ ಪಾತ್ರರಾವೊಡು ಪಂದ್ ತಂತ್ರಿಲು ಪುರೋಹಿತೆರ್ ಎನ್ ಕೇಶವ ಆಚಾರ್ಯ, ಆಡಳಿತ ಮೊಕ್ತೇಸರೆರ್, ಪುರೋಹಿತೆರ್ ಎನ್ ಜಯಕರ ಆಚಾರ್ಯ ಅಂಕಸಾಲೆ, 2ನೇ ಮೊಕ್ತೇಸರೆರ್ ಎಂ. ಕೆ ಬಾಲಕೃಷ್ಣ ಆಚಾರ್ಯ ಉಳಿಯ, 3 ನೇ ಮೊಕ್ತೇಸರೆರ್ ಶಿವರಾಮ ಆಚಾರ್ಯ ಉಳಿಯ ಬೊಕ್ಕ ಸದಸ್ಯೆರ್ ಅಂಚೆನೆ ಪೊಸ ಸಭಾಭವನ ನಿರ್ಮಾಣ ಸಮಿತಿದ ಅಧ್ಯಕ್ಷೆರ್, ಸರ್ವಸದಸ್ಯೆರ್ ಬೊಕ್ಕ ಶ್ರೀ ಕಾಳಿಕಾಂಬಾ ಸೇವಾ ಸಮಿತಿ, ಮಹಿಳಾ ಸಮಿತಿದ ಅಧ್ಯಕ್ಷೆರ್ ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.

An one day entertainment program arranged in Dubai ದುಬೈಡ್ ನಡತ್ಂಡ್ ಒಂಜಿ ದಿನತ್ತ ತಿರ್ಗಾಟ ಕೂಟ, ಗೊಬ್ಬುದ ಪಂತ

ದುಬೈ: ತೀಯಾ ಫ್ಯಾಮಿಲಿ ದುಬೈದ ಮುತಾಲಿಕೆಡ್ ಇಂಚಿಪ್ಪ ದುಬೈಡ್ ಒಂಜಿ ದಿನತ್ತ ತಿರ್ಗಾಟ(ವಿಹಾರ)ಕೂಟ ನಡತ್ಂಡ್.

ಈ ಲೇಸ್ ಬ್ರಾಹ್ಮಿ ಶ್ರೀನಿವಾಸ್ ಮೆರೆನ ಪ್ರಾರ್ತನೆದೊಟ್ಟಿಗೆ ಸುರು ಆಂಡ್. ಸಂಘದ ಅಧ್ಯಕ್ಷೆರ್ ರಾಜೇಶ್ ಪಳ್ಳಿಕೆರೆ ಮೇರ್ ಮಾತೆರೆನ್ಲ ಎದ್ಕೊಂದು ವಿಹಾರ ಕೂಟದ ಪೊಲಬು ಬೊಕ್ಕ ಸಮುದಾಯನ್ ಗಟ್ಟಿ ಮಲ್ಪರೆ ಪ್ರತಿಯೊರಿ ಸದಸ್ಯೆರೆನ ಬೆಂಬಲ ಬೋಡು ಪಂದ್ ಬಿನ್ನಾಪು ಮಲ್ತೆರ್.

ಜಸ್ಮಿತಾ ವಿವೇಕ್ ಬೊಕ್ಕ ಅಮರ್ ಉಮೇಶ್ ಮೊಕುಲು ಬೇತೆ ಬೇತೆ ಗೊಬ್ಬುದ ಪಂತೊನೊ ನಡಪಾದ್ ಕೊರಿಯೆರ್. ಜೋಕುಲು ಬೊಕ್ಕ ಪೆರಿಯಕ್ಲೆನ 4 ಕೂಟ ಮಲ್ತ್ ದ್ ಗೊಬ್ಬುದ ಪಂತೊಲೆನ್ ನಡಪಾಯೆರ್.

ಜೋಕುಲೆಗ್ ರನ್ನಿಂಗ್ ರೇಸ್, ಲಿಂಬು ಚಮಚ ದ ಓಟ, ನುಂಗುದಿನ ಪಜಿರ್ ದ ಅಲಂಕಾರ, ಡ್ರೆಸಿಂಗ್ ಚಾಲೆಂಜ್, ಅಮೇರಿಕನ್ ಬಿಂಗೊ ಬೊಕ್ಕ ಬೇತೆ ಬೇತೆ ಸುಮಾರ್ ಗೊಬ್ಬುಲು ಇತ್ತ್ಂಡ್. ಬೊಕ್ಕ ನಾಲ್ ಕೂಟದ ನಡುಟ್ಟು ಬಲ್ಲ್ ಒಯಿಪುನ ಪಂತೊ ಇತ್ತ್ಂಡ್‌.

ಬೊಕ್ಕ ತೀಯಾ ಸಮಾಜದ ಪೆರಿಯ ಸಂಸ್ಥಾಪಕೆರ್ ಸದಸ್ಯೆರ್ ಎಂ.ಪಿ.ಬಿಸಜಾಕ್ಷಿ ಮೇರ್ ಮಾತ ಸದಸ್ಯೆರೆನ ಪೊಲಬುನ್ ಮಲ್ತೆರ್. ಅಕೇರಿಗ್ ಗೆಂದಿನಕ್ಲೆಗ್ ಇನಾಮು ಪಟ್ಟಿಯೆರ್. ಮಧ್ಯಾಹ್ನ ವನಸ್ ಬೊಕ್ಕ ಬಯ್ಯಗ್ ತಿಂಡಿದ ವ್ಯವಸ್ಥೆ ಇತ್ತ್ಂಡ್. ಜಸ್ಮಿತಾ ವಿವೇಕ್ ಸೊಲ್ಮೆ ಸಂದಾಯೆರ್.

ವರದಿ: ವಿಜಯಕುಮಾರ್ ಶೆಟ್ಟಿ ಗಾಣದಮೂಲೆ ಮಜಿಬೈಲ್ (ದುಬೈ)
ಚಿತ್ರ: ವಿವೇಕ್ ಆನಂದ್

An one day entertainment program arranged in Dubai

Dubai: The Tiya family in Dubai had arranged an one day entertainment program with cultural activities and games arranged for the whole day.
The day was began with a prayer song by Brahmi Sri ivas.The president of the Sangha Sri Rajesh Pallikere welcomed the guests and said that these programs were arranged to bring the community closer.
Jasmitha Vivek and Amar Umesh conducted various sports activities for the members.Prizes were distributed to the winners.Cultural program followed. Lunch and Dinner was arranged for the guests.