Times of kudla

Two persons die when a tree uproots due to heavy rains in Kaup and falls on a auto ಕಾಪು: ರಿಕ್ಷಾದ ಮಿತ್ತ್ ಮರ ಬೂರ್ದು 2 ಜನ ತೀರ್ ಪೋಯೆರ್

ಒಡಿಪು: ಭಾರಿ ತೆಡಿಲ್ ಬರ್ಸಗ್ ಒಡಿಪು ಜಿಲ್ಲೆದ ಕಾಪು ಕೈತಲ್ ದ ಮಜೂರುಡ್ ಪೋವೊಂದು ಇತ್ತಿನ ರಿಕ್ಷಾದ ಮಿತ್ತ್ ಮರ ಬೂರ್ದು ರಡ್ಡ್ ಜನ ತೀರ್ ಪೋಯಿನ ಘಟನೆ ಗುರುವಾರ ರಾತ್ರೆ ನಡತ್ಂಡ್.

ಕಾಪು ಕಡೆರ್ದ್ ಶಿರ್ವ ಕಡೆಕ್ಕ್ ಬೊಕ್ಕ ಶಿರ್ವರ್ದ್ ಕಾಪುದಂಚಿ ಪ್ರಯಾಣ ಮಲ್ತೊಂದು ಇತ್ತಿನ ರಡ್ಡ್ ರಿಕ್ಷಾದ ಮಿತ್ತ್ ಮರ ಬೂರ್ದು ಕಾಪುರ್ದ್ ಶಿರ್ವದಂಚಿ ಪೋವೊಂದು ಇತ್ತಿನ ಪುಷ್ಪಾ (45) ಬೊಕ್ಕ ಅರೆನ ಮೈತಿನೆ ತೀರ್ ಪೋತೆರ್.

ಶರೀಫ್ ಬೊಕ್ಕ ದಿನೇಶ್ ಪನ್ಪುನಕ್ಲೆನ ರಿಕ್ಷಾದ ಮಿತ್ತ್ ಲ ಮರ ಬೂರ್ದುಂಡು. ರಡ್ಡ್ ರಿಕ್ಷಾದ ಡೈವರ್ ಬೊಕ್ಕ ಬೇತೆ ಪ್ರಯಾಣಿಕೆರ್ ತೊಂದರೆರ್ದ್ ಪಾರಾತೆರ್. ರಿಕ್ಷಾ ಪೂರ ನಕ್ಕೆ ಆತ್ಂಡ್.

Manglore experiences rainfall at last; roads clogged with water ಕುಡ್ಲ ಪೇಂಟೆಡ್ ತೆಡಿಲ್ ಬರ್ಸ, ಮಾರ್ಗ ನಿಲಿಕೆ ನೀರ್

ಕುಡ್ಲ: ದಕ್ಷಿಣ ಕನ್ನಡ ಜಿಲ್ಲೆದ ಕುಡ್ಲ ಪೇಂಟೆ ಬೊಕ್ಕ ಬೇತೆ ಬೇತೆ ತಾಲೂಕ್ ದ ಸುಮಾರ್ ಕಡೆಟ್ ತೆಡಿಲ್, ಮೆಂಚ್ ದ ಬರ್ಸ ಕೋಡೆ ರಾತ್ರೆ ಬೈದ್ಂಡ್.

ವಾಯುಭಾರ ಕುಸಿತರ್ದ್ ಮುಂಗಾರುರ್ದು ದುಂಬುದ ಬರ್ಸ, ತೆಡಿಲ್, ಮೆಂಚ್ ದೊಟ್ಟಿಗೆ ಬೈದ್ಂಡ್. ಪೇಂಟೆದ ಸ್ಮಾರ್ಟ್ ಸಿಟಿ ಕಾಮಗಾರಿದ ಅವಾಂತರಗ್ ಈ ಬರ್ಸ ಸಾಕ್ಷಿ ಆತ್ಂಡ್. ಸುಮಾರ್ ಕಡೆಟ್ ಬರ್ಸದ ನೀರ್ ಪೋವೆರೆ ಅವಂದೆ, ಮಾರ್ಗಡ್ ಉಂತುದುಂಡು. ನೇರ್ದಾವೆರ ಸಾರ್ವಜನಿಕೆರೆಗ್, ಗಾಡಿದಕ್ಲೆಗ್ ಸರಿಯಾಯಿನ ಸಮಯಗ್ ಇಲ್ಲಡೇ ಪೊವೆರೆ ಅವಂದೆ ತೊಂದರೆ, ಆತ್ಂಡ್. ಅತ್ತಂದೆ ಕರೆಂಟ್ಲಾ ದೈದೆರ್ ಪಂದ್ ತೆರಿದ್ ಬೈದ್ಂಡ್.

Person dies due to thunder strike while speaking on the mobile phone ಫೋನ್ ಡ್ ಪಾತೆರೊಂದು ಇತ್ತಿನ ಜವನೆ ತೆಡಿಲ್ ಹಾಕ್ ದ್ ತೀರ್ ಪೋಯೆರ್

ಮಂಡ್ಯ: ಮೊಬೈಲ್‌ಡ್ ಪಾತೆರೊಂದು ಬರ್ಸಗ್ ಬೈಕ್‌ಡ್ ಪೋವೊಂದು ಇಪ್ಪುನಗ ತೆಡಿಲ್ ಹಾಕ್ ದ್ ಒರಿ ತೀರ್ ಪೋಯಿನ ಘಟನೆ ಮಂಡ್ಯಡ್ ನಡತ್ಂಡ್.

ಮದ್ದೂರುದ ವೈದ್ಯನಾಥಪುರ ನಿವಾಸಿ ಮಧು (35) ತೀರ್ ಪೋಯಿನಾರ್ ಪಂದ್ ತೆರಿದ್ ಬೈದ್ಂಡ್. ಆರ್ ಒಂತೆ ತೆಡಿಲ್ ಬರ್ಸ ದ ನಡುಟ್ಟು ಬೈಕ್ ಡ್ ಪೋವೊಂದಿತ್ತೆರ್.

Girl creates a record by drawing an art of Lord Sri Rama and Sita in mehendi on cloth ಮದಿರೆಂಗಿಡ್ ಕುಂಟುದ ಮಿತ್ತ್ ಶ್ರೀರಾಮ ಸೀತೆನ ವಿನ್ಯಾಸ ಮಲ್ತ್ ದ್ ದಾಖಲೆ ಮಲ್ತಿನ ಪೊಣ್ಣು

ಜಬಲ್ಪುರ್: ಮಧ್ಯಪ್ರದೇಶದ ಜಬಲ್‌ಪುರದ ಅನುಶ್ರೀ ವಿಶ್ವಕರ್ಮ ಮೇರ್ 6 ಮೀಟರ್ ಉದ್ದದ ಕುಂಟುದ ಮಿತ್ತ್ ಶ್ರೀರಾಮ ಬೊಕ್ಕ ಸೀತೆನ ಚಿತ್ರನ್ 6 ಗಂಟೆದ ಪೊರ್ತುಡು ಮದಿರೆಂಗಿಡ್ ವಿನ್ಯಾಸ ಮಲ್ತ್ ದ್ ದಾಖಲೆ ಸೃಷ್ಟಿಸಾದೆರ್ ಪಂದ್ ಇಂಡಿಯಾ ಬುಕ್ ಆಫ್ ರೆಕಾರ್ಡ್ ಪಂತ್ಂಡ್.

ಮೇರ್ ಮಾರ್ಚ್ 30, 2023 ಕ್ಕ್ ಮದಿರೆಂಗಿ ಕೋನ್‌ಲೆನ್ ಗಲಸೊಂದು ಉದ್ದದ ಕುಂಟುದ ಮಿತ್ತ್ (19 ಅಡಿ ಬೊಕ್ಕ 6 ಇಂಚ್, 1 ಅಡಿ ಬೊಕ್ಕ 8 ಇಂಚ್ ಅಳತೆ) ಮದಿರೆಂಗಿ ವಿನ್ಯಾಸ ಮಲ್ದೆರ್ ಪಂದ್ ತೆರಿದ್ ಬೈದ್ಂಡ್.

ಈ ಮದಿರೆಂಗಿ ಚಿತ್ರಕಲೆ ಮಸ್ತ್ ಮೆಚ್ಚುಗೆ ಪಡೆತ್ಂಡ್. ಅತ್ತಂದೆ ಪೊಣ್ಣನ ಈ ಅಪರೂಪದ ಕಲೆ ಇಂಡಿಯಾ ಬುಕ್ ಆಫ್ ರೆಕಾರ್ಡ್ಸ್‌ಡ್ ಪುದರ್ ಪಡೆತ್ಂಡ್.

ಅನುಶ್ರೀ ಮೇರ್ ಸಾಫ್ಟ್‌ವೇರ್ ಇಂಜಿನಿಯರ್ ಆದ್ ಹೈದರಾಬಾದ್ ಮೂಲದ ಬಹುರಾಷ್ಟ್ರೀಯ ಕಂಪನಿಡ್ ಬೇಲೆ ಮಲ್ತೊಂದು ಉಲ್ಲೆರ್. ಕೊರೊನಾರ್ದ್ ಬೊಕ್ಕ ಜಬಲ್ಪುರದ ತನ್ನ ಇಲ್ಲಲ್ ರ್ದೆ ಬೇಲೆ ಮಲ್ಪುನ ಮೇರ್ ಬೇಲೆ ಆಯಿ ಬೊಕ್ಕ ಮದಿರೆಂಗಿಡ್ ಬೇತೆ ಬೇತೆ ರೀತಿದ ಚಿತ್ರ ಬುಡ್ಪಾವುನೆನ್ ಕಲ್ತೊಂದು ಇತ್ತೆರ್.‌

ಮೆರೆನ ಏಪಲದ ಈ ಪ್ರಯತ್ನರ್ದ್, ತನ್ನ ಆಸಕ್ತಿದ ಕ್ಷೇತ್ರಡ್ ದಾಖಲೆ ಬರೆತೆರ್. ಎಲ್ಯೆರ್ದೆ ಮದಿರೆಂಗಿ ಚಿತ್ರದ ಬಗ್ಗೆ ಮೋಕೆ ಇತ್ತಿನ ಮೇರ್ ತನ್ನ ಅಮ್ಮನ ಮುಕೇನ ಈ ಕಲೆನ್ ಕಲ್ತ್ ದೆರ್.

May 13th Vote counting day: Prohibtionary orders in DK district ಮೇ13 ಕ್ಕ್ ವೋಟು ಗೆನ್ಪರೆ: ದಕ್ಷಿಣ ಕನ್ನಡ ಜಿಲ್ಲೆಡ್ ನಿಷೇಧಾಜ್ಞೆ

ಕುಡ್ಲ: ಸುರತ್ಕಲ್ ಎನ್.ಐ.ಟಿ.ಕೆಡ್ ಮೇ13 ಕ್ಕ್ ವೋಟುದ ಲೆಕ್ಕ ನಡಪರೆ ಉಂಡು. ಈ ಬಗೆಟ್ ದಕ್ಷಿಣ ಕನ್ನಡ ಜಿಲ್ಲೆ ಇಡೀ ನಿಷೇಧಾಜ್ಞೆ ಜಾರಿ ಆಪುಂಡು ಪಂದ್ ಜಿಲ್ಲಾಧಿಕಾರಿ ಆದೇಶ ಕೊರ್ತೆರ್.

ಸಾರ್ವತ್ರಿಕ ವೋಟುದ ಲೆಕ್ಕದ ಪೊರ್ತುಡು ದಾಲ ತೊಂದರೆ ಆವಂದಿಲೆಕ ಬೊಕ್ಕ ಜಿಲ್ಲೆಡ್ ಕಾನೂನು ಸುವ್ಯವಸ್ಥೆ ಕಾಪಾಡುನ ಉದ್ದೇಶರ್ದ್ ಮುಂಜಾಗ್ರತೆ ಕ್ರಮವಾದ್ ಮೇ13 ಕ್ಕ್ ಬೊಲ್ಪುಗು 5 ಗಂಟೆರ್ದ್ ನಡುರಾತ್ರೆ 12 ಗಂಟೆ ಮುಟ್ಟ ಜಿಲ್ಲೆ ಇಡೀ ನಿಷೇಧಾಜ್ಞೆ ಪಾಡ್ದ್ ಜಿಲ್ಲಾಧಿಕಾರಿ ರವಿಕುಮಾರ್ ಎಂ.ಆರ್. ಮೇರ್ ಆದೇಶ ಮಲ್ದೆರ್.

Murder at Gantalkatte in Moodbidri ಬೆದ್ರದ ಗಂಟಲ್ ಕಟ್ಟೆಡ್ ಮರ್ಡರ್

ಬೆದ್ರ: ರಡ್ಡ್ ಜನತ್ತ ನಡುಟ್ ಜೋಕುಲೆನ ಇಸಯಗ್ ಪಾತೆರಕತೆಯಾದ್ ಬಿಸತ್ತಿ ಪಾರ್ದ್, ಕೆರಿನ ಘಟನೆ ಬೆದ್ರದ ಗಂಟಲ್ ಕಟ್ಟೆಡ್ ನಡತ್ಂಡ್.

ಈ ಘಟನೆಡ್ ಜಮಾಲ್ ತೀರ್ ಪೋಯಿನಾರ್. ಮೆರೆನ ಭಾವ ಸುಹೈಲ್ ಬಿಸತ್ತಿ ಪಾಡ್ದ್ ಕೆರಿನ ಆರೋಪಿ. ಮೆರೆನ್ ಬೆದ್ರ ಪೊಲೀಸೆರ್ ವಶಕ್ಕ್ ಪಡೆತೆರ್.

ದಕ್ಷಿಣ ಕನ್ನಡ ಜಿಲ್ಲೆಡ್ ಶೇ.76.15%,ವೋಟು

ಕುಡ್ಲ: ರಾಜ್ಯದ 224 ವಿಧಾನಸಭೆ ಕ್ಷೇತ್ರಡ್ ಕೋಡೆ ವೋಟು ನಡತ್ಂಡ್.

ದಕ್ಷಿಣಕನ್ನಡಡ್ ಕೋಡೆ 76.15% ದಾತ್ ವೋಟು ಪಾಡ್ದೆರ್ ಪಂದ್ ಚುನಾವಣಾ ಆಯೋಗ ಪೊಲಬು ಕೊರ್ತುಂಡು.

ಬೊಲ್ತೇರ್-80.80%,

ಕುಡ್ಲ-77.60%,

ಕುಡ್ಲ ಉತ್ತರ- 72.32%,

ಕುಡ್ಲ ದಕ್ಷಿಣ 65.10%,

ಬೆದ್ರ-76.11%,

ಬಂಟ್ವಾಳ-80.17%,

ಸುಳ್ಯ-78.94%,

ಪುತ್ತೂರ್-80.02% ದಾತ್ ಮತದಾನ ಆತ್ಂಡ್.

ಎಲ್ಲೆ 37 ದೇಶಡ್ ದಿ ಕೇರಳ ಸ್ಟೋರಿ ಪಿಕ್ಚರ್ ಬುಡುಗಡೆ

ಐಸಿಸ್ ಉಗ್ರೆರೆನ ಕತೆತ್ತ ದಿ ಕೇರಳ ಸ್ಟೋರಿ ಪಿಕ್ಚರ್ ಎಲ್ಲೆ 37 ದೇಶಡ್ ಬುಡುಗಡೆ ಆವರೆ ಉಂಡು.ಈ ಬಗೆಟ್ ಪೊಲಬು ಕೊರ್ನ ಚಿತ್ರದ ಪ್ರಮುಖ ಪಾತ್ರಧಾರಿ ನಟಿ ಅದಾ ಶರ್ಮಾ, ಎಕ್ಲೆನ ಪಿಕ್ಚರ್ ತೂದು, ಆಯಿನ್ ಟ್ರೆಂಡ್ ಮಲ್ತೊಂದು ಇಪ್ಪುನ ಬೊಕ್ಕ ಎನ್ನ ನಟನೆನ್ ಮೆಚ್ಚಿನ ಮಾತೆರೆಗ್ಲಾ ಸೊಲ್ಮೆಲು. ಉಂದುವೇ 12 ತಾರೀಕ್ ಗ್ ದಿ ಕೇರಳ ಸ್ಟೋರಿ 37 ಬೇತೆ ಬೇತೆ ದೇಶಡ್ ಅಂತರಾಷ್ಟ್ರೀಯ ಮಟ್ಟಡ್ ಬುಡುಗಡೆ ಆಪುಂಡು ಪಂದ್ ಪಂಡೆರ್.

ಆಸ್ಕರ್ ಪ್ರಶಸ್ತಿ ಗೆಂದಿನಕ್ಲೆಗ್ ತಮ್ಮನ ಮಲ್ತಿನ ಧೋನಿ

ಡೆಲ್ಲಿ: ಚೆನ್ನೈದ ಚಿದಂಬರಂ ಸ್ಟೇಡಿಯಂಡ್ ದಿ ಎಲಿಫೆಂಟ್​ ವಿಸ್ಪರರ್ಸ್​ ಸಾಕ್ಷ್ಯಚಿತ್ರಡ್ ನಟನೆ ಮಲ್ತಿನ ದಂಪತಿ ಬೊಮ್ಮನ್‌ ಬೊಕ್ಕ ಬೆಳ್ಳಿ, ನಿರ್ಮಾಪಕಿ ಕಾರ್ತಿಕಿ ಗೊನ್ಸಾಲ್ವಿಸ್ ಮೆರೆಗ್ ತನ್ನ ಸಿಎಸ್​ಕೆ ಜೆರ್ಸಿನ್ ನಾಯಕೆ ಧೋನಿ ಉಡುಗೊರೆಯಾದ್ ಕೊರ್ತೆರ್.‌

7ನೇ ನಂಬರ್​ದ ಜೆರ್ಸಿನ್ ಉಡುಗೊರೆಯಾದ್ ಕೊರ್ದು ಮಾನಾದಿಗೆ ಮಲ್ತೆರ್. ಈ ಪೊರ್ತುಡು, ಮೆರೆಗ್ ಚೆನ್ನೈ ಸೂಪರ್ ಕಿಂಗ್ಸ್ ಪರವಾದ್ ನೆಂಪಯ ಕಾಣಿಕೆ ಕೊರ್ಪುನೆತ್ತೊಟ್ಟಿಗೆ ಆನೆದ ಆರೈಕೆಗಾದ್ ಮುದುಮಲೈ ಪಿಲಿ ಸಂರಕ್ಷಣಾ ಪ್ರತಿಷ್ಠಾನಗ್ ದೇಣಿಗ್ ಕೊರಿಯೆರ್.

ದೇಶಡೇ ಬೆಂಗ್ಲೂರ್ ದ ಎಂ.ಜಿ ರೋಡ್ ಗ್ ನಂ.1 ತಾನ

ರಿಯಲ್ ಎಸ್ಟೇಟ್ ಕನ್ಸಲ್ಟಂಟ್ ನೈಟ್ ಫ್ರ್ಯಾಂಕ್ ಇಂಡಿಯಾ ಬುಡುಗಡೆ ಮಲ್ತಿನ, ಥಿಂಕ್ ಇಂಡಿಯಾ ಥಿಂಕ್ ರೀಟೇಲ್ 2023- ಹೈ ಸ್ಟ್ರೀಟ್ ರಿಯಲ್ ಎಸ್ಟೇಟ್ ಔಟ್ ಲುಕ್ ಸಮೀಕ್ಷಾ ವರದಿದ ಪ್ರಕಾರ ದೇಶದ 8 ಮಲ್ಲ ಪೇಂಟೆಡ್ 30 ಪ್ರಮುಖ, ಎಡ್ಡೆ ಗುಣಮಟ್ಟದ ಮಾರ್ಗಲೆಡ್ ಬೆಂಗ್ಲೂರ್ ದ ಮಹಾತ್ಮ ಗಾಂಧಿ ಮಾರ್ಗ ಸುರುತ್ತ ತಾನಡ್ ಉಂಡು.

ಟಾಪ್ 10 ಮಾರ್ಗಡ್ ಬೆಂಗ್ಲೂರ್ ದ 4 ಮಾರ್ಗ ಉಂಡು. ನೆಟ್ಟ್ ಕಮರ್ಷಿಯಲ್ ಮಾರ್ಗ 7, ಬ್ರಿಗೇಡ್ ಮಾರ್ಗ 9, ಬೊಕ್ಕ ಚರ್ಚ್ ಮಾರ್ಗ 10 ನೇ ತಾನಡ್ ಉಂಡು.