ಶೋಭಾ ಕರಂದ್ಲಾಜೆನೊಟ್ಟುಗು ಸೆಲ್ಫೀ ದೆಪ್ಪುಲೆ, 5 ಸಾರ ಇನಾಮು ಗೆಂದ್ ಲೆ ; ಮಿಥುನ್ ರೈ
ಒಡಿಪು: ಒಡಿಪು, ಕಾಪು, ಕುಂದಾಪುರ ವ್ಯಾಪ್ತಿಡ್ ಅಕ್ಟೋಬರ್ 7-11 ತ್ತ ಉಲಾಯಿ ಸಂಸದೆರ್ ಶೋಭಾ ಕರಂದ್ಲಾಜೆ ತೋಜಿಂಡ ಅರೆನೊಟ್ಟುಗು ಸೆಲ್ಫೀ ದೆತ್ತ್ದ್ ಕಡಪಾದ್ ಕೊರ್ಲೆ. ಗೆಂದಿನಕ್ಲೆಗ್ 5 ಸಾರ ರೂ. ಇನಾಮು ಕೊರಿಯರೆ ಉಂಡು ಪಂದ್ ಕಾಂಗ್ರೆಸ್ ಯುವ ಮುಖಂಡೆರ್ ಮಿಥುನ್ ರೈ ಲೆತ್ತ್ ಪಂಡೆರ್.
ರಾಷ್ಟ್ರೀಯ ಮಾರ್ಗ ಬೊಕ್ಕ ಒಡಿಪು ಪ್ರಮುಖ ಮಾರ್ಗನ್ ಸರಿಮಲ್ಪರೆ ಬೋಡಾದ್ ಒಡಿಪು ಬ್ಲಾಕ್ ಕಾಂಗ್ರೆಸ್ ಸಮಿತಿ ಮುತಾಲಿಕೆಡ್ ಕೇಂದ್ರ, ರಾಜ್ಯ ಸರಕಾರ ಅಂಚನೆ ಒಡಿಪು ನಗೆಸಭೆತ್ತ ವಿರುದ್ಧ ಕಲ್ಮಾಡಿ ಜಂಕ್ಷನ್ ರ್ದ್ ಕರಾವಳಿ ಬೈಪಾಸ್ ಮುಟ್ಟ ಅಂಗಾರೆ ನಡತಿನ ಪಾದಯಾತ್ರೆದ ಮಾಮಲ್ಲ ಪ್ರತಿಭಟನಾ ಸಭೆಟ್ ಆರ್ ಪಾತೆರಿಯೆರ್.
ಮಾರ್ನೆಮಿ ಆಯಿಬೊಕ್ಕ ಶೋಭಾ ಕರಂದ್ಲಾಜೆ ಮಿನಿ ಕ್ಷೇತ್ರಡ್ ತೋಜಿದ್ ಬತ್ತ್ಂಡ ಅರೆನೊಟ್ಟುಗು ಸೆಲ್ಫೀ ದೆತ್ತ್ದ್ ಕಡಪಾಲೆ. ಅಕ್ಟೋಬರ್ 14 ರ್ದ್ ಬೊಕ್ಕಲ ಕ್ಷೇತ್ರಡ್ ಸಂಸದೆರ್ ತೋಜಿಜಿಂಡ ಮಾತ ಪೊಲೀಸ್ ಠಾಣೆಲೆಡ್ ನಾಪತ್ತೆ ಆಯಿನ ದೂರು ದಾಖಲ್ ಮಲ್ಪುವ ಪಂದ್ ಪಂಡೆರ್.
ಈ ಪೊರ್ತುಡು ಒಡಿಪು ಬ್ಲಾಕ್ ಕಾಂಗ್ರೆಸ್ ಅಧ್ಯಕ್ಷೆರ್ ರಮೇಶ್ ಕಾಂಚನ್, ಮುಖಂಡೆರ್ ಆಯಿನ ಅಮೃತ್ ಶೆಣೈ, ಬಿ. ನರಸಿಂಹ ಮೂರ್ತಿ, ಯತೀಶ್ ಕರ್ಕೇರ, ಉದ್ಯಾವರ ನಾಗೇಶ್ ಕುಮಾರ್, ಆನಂದಿ, ಅಣ್ಣಯ್ಯ ಶೇರಿಗಾರ್, ಪ್ರಶಾಂತ್ ಜತ್ತನ್ನ, ಮೀನಾಕ್ಷಿ ಮಾಧವ ಬನ್ನಂಜೆ, ಫಾ. ವಿಲಿಯಂ ಮಾರ್ಟಿಸ್, ಗಣೇಶ್ ನೆರ್ಗಿ, ವೆರೊನಿಕಾ ಕರ್ನೇಲಿಯೋ, ಡಾ. ಸುನೀತಾ ಶೆಟ್ಟಿ, ರೋಶನಿ ಒಲಿವೆರಾ, ದಿನೇಶ್ ಪುತ್ರನ್, ಬಿ. ಕುಶಲ ಶೆಟ್ಟಿ, ಸುರಯ್ಯ ಅಂಜಮ್, ಲೂವಿಸ್ ಲೋಬೊ, ಸುಂದರ್ ಮಾಸ್ಟರ್, ನಾರಾಯಣ ಕುಂದರ್ ಮೊಕುಲು ಮಾತ ಇತ್ತೆರ್.
