ಜೀರ್ಣೋದ್ಧಾರೊಗ್ ಕಾತೊಂದುಂಡು ಯರುಕೋಣೆ ಬ್ರಹ್ಮಬೈದರ್ಕಳ ಕೋಟಿ ಚೆನ್ನಯ ಬೊಕ್ಕ ಪಂಜುರ್ಲಿ ಗರೋಡಿ
ಮಣ್ಣ್ ದ ಗೋಡೆದ ಗರೋಡಿಗ್ ನವೀಕರಣದ ಯೋಗ
ನಮ್ಮ ತುಳುನಾಡ ದೈವಾರಾಧನೆಲೆಡ್ ಗರೋಡಿ ಒಂಜಿ ಪ್ರಧಾನವಾಯಿನ ಪಾತ್ರನ್ ವಹಿಸೊಂದ್ಂಡ್. ಇಂಚಿನ ಮಸ್ತ್ ಗರೋಡಿಲು ಉಂಡು. ಅಂಚಿನ ಪಿರಾಕ್ ದ ಗರೋಡಿಲೆಡ್ ಒಡಿಪು ಜಿಲ್ಲೆ ಬೈಂದೂರ್ ತಾಲೂಕ್ ದ ಹೇರೂರು ಗ್ರಾಮದ ಯರುಕೋಣೆದ ಪೂಜಾರಿ ಇಲ್ಲ್ ಕೈತಲ್ ಇಪ್ಪುನ ಗರೋಡಿಲ ಒಂಜಿ. ಈ ಗರೋಡಿ ಪಿರಾಕ್ ದ ಅಂಚನೆ ಮಸ್ತ್ ಶಕ್ತಿಯುತವಾದ್ಂಡ್. ಈ ಪಿರವು ನಮ್ಮ ಪೆರಿಯೆರ್ ಮಣ್ಣ್ ದ ಗೋಡೆ, ಸುಂದರವಾಯಿನ ಓಡು, ಮಲ್ಲ ಮಲ್ಲ ಬಿಂಬಲು, ಆಕರ್ಷಣೀಯವಾದ್ ಇಪ್ಪುನ ಶಿಲೆತ್ತ ವೆಂಕಟರಮಣ ಮೂರ್ತಿ, ಇಂಚ 50ರ್ದ್ ಲ ಮಿತ್ತ್ ಸಾನಿಧ್ಯಲು ಇಪ್ಪುನ ಗರೋಡಿನ್ ನಿರ್ಮಿಸಾದ್, ಪೂಜೆ ಪುನಸ್ಕಾರನ್ ಮಲ್ತೊಂದ್ ಬೈದೆರ್. ಪೂರ್ವ ದಿಕ್ಕ್ ಡ್ ಇಪ್ಪುನ ಗರೋಡಿ ಉಂದಾದಿತ್ತ್ ದ್, ಸುಮಾರ್ ರಡ್ದರೇ ಶತಮಾನದ ಇತಿಹಾಸ ಇಪ್ಪುನ ಗರೋಡಿ ಉಂದಾತ್ಂಡ್. ಕಾಲ ಪೋಯಿಲೆಕ್ಕನೇ ಮಣ್ಣ್ ದ ಗೋಡೆಲು ಅಂಚನೆ ಓಡು ಪೂರ ಹಾಳಾದಿತ್ತ್ ದ್, ಪುಂಚ ಬುಲೆದ್, ಕೆಲವು ಬಿಂಬಲು ಮುಚ್ಚಿದ್ ಪೋತ್ಂಡು. ಇತ್ತೆ ಗರೋಡಿ ಪೂರ ಹಾಳಾದಿತ್ತ್ ದ್, ಪೂಜೆ, ಪುನಸ್ಕಾರ ಮಲ್ಪರೆ ಪೋಡಿಗೆ ಆಪಿಲೆಕ್ಕ ಆತ್ಂಡ್. ಅಂಚಾದ್ ಈ ಗರೋಡಿನ್ ನವೀಕರಣ ಮಲ್ಪರೆ ನಿಶ್ಚಯ ಮಲ್ತೆದೆರ್.
ಈ ಪಿರವು ಒವ್ ಸಂಪ್ರದಾಯಡ್ ಸೇವೆಲು ನಡತ್ತೊಂದ್ ಇತ್ತ್ಂಡೊ ಕಾಲಕ್ರಮೇಣ ಕೆಲ ಪೂಜೆಲು ಉಂತುನ್ಡಲ ಮುಖ್ಯವಾಯಿನ ಸೇವೆಲು ಸರಳವಾದ್ ವಿಧಿಪೂರ್ವಕವಾದ್ ಅನುಷ್ಠಾನ ಆವೊಂದ್ ಬೈದ್ಂಡ್. ಈ ಗರೋಡಿನ್ ನಂಬಿನ ಕುಟುಂಬಲು ಕೆಲವೆರ್ ಮಾತ್ರ ಇಪ್ಪುನಿ. ಬೊಕ್ಕ ಅಕುಲ್ ಮಾತ ಆರ್ಥಿಕವಾದ್ ದುಂಬು ಇಪ್ಪಂದಿನ ಕಾರಣ ಜೀರ್ಣೋದ್ಧಾರ ಕಾರ್ಯಗ್ ದುಂಬು ಪೋಯರೆ ಧೈರ್ಯ ಯಾರಿಜಿ. ದಾದಾಂಡಲ ಪ್ರಯತ್ನ ಮಲ್ತ್ ದ್, ಜೀರ್ಣೋದ್ಧಾರ ಮಲ್ಪೊಡ್ ಪನ್ಪಿನ ದೃಢ ಸಂಕಲ್ಪರ್ದ್ ಭಕ್ತೆರ್ ಸಾಕಾಯ ಕೊರ್ದ್ ದೇವತಾ ಕಾರ್ಯನ್ ಪೂರ್ಣ ಮಲ್ಪಿನ ಬಗೆಟ್ಟ್ ನಿಕ್ಲೆಡ ಸಕಾಯನ್ ಕೆನೊಂದುಲ್ಲ.
ಜೀರ್ಣೋದ್ಧಾರದ ಸುರುತ್ತ ಹಂತವಾಯಿನ ಗರೋಡಿದ ಬೇಲೆನ್ ಎಂಚ ಮಲ್ಪೊಡು ಪಂದ್ ಮಸ್ತ್ ಗರೋಡಿಲೆನ್ ತೂದ್ ಬೊಕ್ಕ ಧಾರ್ಮಿಕ ಮುಖಂಡೆರ್ನ ಸಲಹೆ ಸೂಚನೆನ್ ದೆತೊಂದ್, 2019ನೇ ಫೆಬ್ರವರಿ 2 ತಾರೀಕ್ ಗ್ ಆರೂಢ ಪ್ರಶ್ನೆ ದಿಯರೇ ಚಿಂತನೆ ಮಲ್ತೆರ್. ಪ್ರಶ್ನೆಡ್ ತೆರಿದ್ ಬತ್ತಿಲೆಕ್ಕ 2020 ನೆ ಇಸ್ವಿ ಮೇ 11ಕ್ಕ್ ನಾಗನ ಆರಾಧನೆ, ಮಹಾಗಣಪತಿ ಹೋಮ, ಮೃತ್ಯುಂಜಯ ಹೋಮ ಇಂಚಿತ್ತಿನ ಪೂಜೆ, ಹೋಮ ದೇವೆರ್ನ ಆರಾಧನೆನ್ ಮಲ್ತೆರ್.
ಜಗತ್ತ್ ಗ್ ಬತ್ತಿನ ಕೋವಿಡ್ 19 ಸೀಕ್ ರ್ದ್ ಮಸ್ತ್ ತೊಂದರೆ ಆಂಡಲಾ ಸರ್ಕಾರದ ನಿಯಮನ್ ಪಾಲಿಸಾವೊಂದ್, ದೈವಶಕ್ತಿದ ಅನುಗ್ರಹಟ್ಟ್ ಸರಳವಾದ್ ಮಾತ ಕಾರ್ಯಕ್ರಮನ್ ವಿಧಿ ವಿಧಾನರ್ದ್ ಮಲ್ತೆರ್. ಎಡ್ಡೆ ಇಂಜಿನಿಯರ್ ನೀಲನಕ್ಷೆ ಬೊಕ್ಕ ಅಂದಾಜು ಕರ್ಚಿದ ಪಟ್ಟಿ ತಯಾರ್ ಮಲ್ತೆರ್. ಪೊಸ ಗರೋಡಿ ಕಟ್ಟಾವರೆ ಸುಮಾರ್ 1 ಕೋಟಿ 50 ಲಕ್ಷ ಕಾಸ್ ಬೋಡಿತ್ತ್ ದ್, ಮಾತ ಭಕ್ತಾಭಿಮಾನಿಲು ತನು-ಮನ-ಧನತ್ತ ಸಾಕಾರನ್ ಕೊರ್ದ್, ಎಂಕ್ಲೆಗ್ ಮಾತ ಕ್ಷೇತ್ರಾದಿ ಶಕ್ತಿಲು ಆಯುಷ್ಯ, ಆರೋಗ್ಯ, ಸಂಪತ್ತ್ ಕೊರಡ್ ಪಂದ್ ಯರುಕೊಣೆ ಶ್ರೀ ಬ್ರಹ್ಮಬೈದರ್ಕಳ ಕೋಟಿ ಚೆನ್ನಯ ಬೊಕ್ಕ ಪಂಜುರ್ಲಿ ಗರೋಡಿದ ಜೀರ್ಣೋದ್ಧಾರ ಸಮಿತಿದ ಸೇವಾಕರ್ತೆರ್ ದೇವೆರ್ಡ ಪ್ರಾರ್ಥನೆ ಮಲ್ತೊಂದೆರ್.
