Corona

ಕೊರೊನಾ ಸೋಂಕುದ ಪೋಡಿಗೆಡ್ ಗಂಡನಿ-ಬೊಡೆದಿ ಜೀವದೆತೊಂಡೆರು

ಕುಡ್ಲ ಆ. 17: ಒಂಜಿ ಕಡೆಟು ಜೋಕುಲಿಜ್ಜಂದಿನ ಮಂಡೆಬೆಚ್ಚ, ಅಂಚನೇ ಅನಾರೋಗ್ಯ ಬೊಕ್ಕ ಕೋವಿಡ್ – 19 ಸೋಂಕುದ ಪೋಡಿಗೆಡ್ ಗಂಡನಿ-ಬೊಡೆದಿ ಇರ್ವೇರು ಬಲ್ ದೊತೊಂಡಿನ ಘಟನೆ ಕುಡ್ಲದ ಬೈಕಂಪಾಡಿ ಚಿತ್ರಾಪುರಡ್ ನಡತುಂಡು.

ತೀರಿನಾಕುಲ್ ರಮೇಶ್ ಸುವರ್ಣ ಬೊಕ್ಕ ಗುಣವತಿ ಸುವರ್ಣ. ಗುಣವತಿ ಸುವರ್ಣ ಸೈಪುನೆಡ್ದು ದುಂಬು ಕಾಕಜಿ ಬರೆದಿಂಡ, ಅರೆನ ಕಂಡನಿ ವಾಟ್ಸಾಪ್ ವಾಯ್ಸ್ ಮೇಸಜ್ ಮೂಲಕ ಅವೆನ್ ಕುಡ್ಲದ ನಗರ ಪೋಲೀಸ್ ಆಯುಕ್ತೆರೆಗು ಅಂಚನೇ ತನ್ನ ಬೊಡೆದಿನ ಮಗ್ಯೆ, ಸಂಬಂಧದಕುಲೆಗು ಕಂಡಪರ‍್ದೆರು.

ಗುಣವತಿ ಸುವರ್ಣ ಬರೆಯಿನ ಡೆತ್ ನೋಟ್ ಇಂಚ ಉಂಡು :

“ಯಾನ್ ಸುಗರ್ ಕಾಯಿಲೆ ಸೀಕುಡು ಉಲ್ಲೆ. ದಿನಕ್ಕು ರಡ್ಡು ಇನ್ಸುಲಿನ್ ಇಂಜೆಕ್ಷನ್ ದೆತೊಂಡಲ ಸೀಕ್ ಮಾತ್ರ ಕಮ್ಮಿ ಆವೊಂದಿಚ್ಚಿ. ರಡ್ಡು ಸಲಿ ಪ್ರೇಗ್ನನ್ಟ್ ಆಡಂಲ ಜೋಕುಲಾವೊಂದಿಜ್ಜಾAಡು. ಅಂಚನೇ ಯಂಕು ಬೊಕ್ಕ ಯನ್ನ ಕಂಡನೀಗು ಕೋವಿಡ್ ಲಕ್ಷಣೊಲು ತೊಜಿದು ಬರೊಂದುಂಡು . ಬ್ಲ್ಯಾಕ್ ಫಂಗಸ್ ಸೀಕ್‌ಡು ಕಣ್ಣು ಅಂಚನೇ ಬೇತೆ ಭಾಗಲೇನು ಕಳತೊಂದ. ಜೀವನ ಬೊಡ್ಚಿ ಪಂದು ಆತುಂಡು ಪಂದು ಪತ್ರ ಬರೆದೆರು.

ಕಡೆತ ಶಾಸ್ತ್ರ ಮಂಪರೆ ಒಂಜಿ ಲಕ್ಷದಾತು ಕಾಸ್ ದೀತ. ಅವೆನು ಕಡೆತ ಶಾಸ್ತ್ರ ಮಲ್ಪರೆ ಬಳಸುಲೆ. ಶರಣ್ ಪಂಪೈಲ್ ಬೊಕ್ಕ ಸತ್ಯಜಿತ್ ಸುರತ್ಕಲ್ ಅಂಚನೇ ಪೊಲೀಸ್ ಆಯುಕ್ತೆರಾಯಿ ಶಶಿಕುಮಾರ್ ಯಂಕುಲ್ನ ಕಡೆತ ಶಾಸ್ತ್ರ ಮಲ್ಪರೆ ಸಹಕರಿಸಾವೊಡು ಪಂಡುದು ಬರೆತೆರು.

ಜೀವ ದೆತೊಂನೆಡ್ದು ದುಂಬು ಕಂಡನಿ ರಮೇಶ್ ಸುವರ್ಣೆರ್ ಕುಡ್ಲ ಪೊಲೀಸ್ ಆಯುಕ್ತೆರ್ ಶಶಿಕುಮಾರ್ ಇಂಬೆರೆಗು ಸೈಪುನ ನಿರ್ಧಾರದ ವಾಯ್ಸ್ ಮೇಸೆಜ್ ಕಡಪುದ್ದಿತ್ತೆರು. ಶಶಿಕುಮಾರ್ ಅಪಗನೇ ಕಾರ್ಯಪ್ರವೃತ್ತೆರಾದ್ ಅಮಸರದ ನಿರ್ಧಾರ ದೆತೊನಂದಿಲೆಕ ಮನವಿ ಮಲ್ತಿತ್ತೆರ್. ಅಪಗನೆ ಪೊಲೀಸ್ ಕೂಟನು ಗಂಡನಿ ಬೊಡೆದಿ ಇತ್ತೀನ ಪ್ಲಾಟ್ ಗು ಕಂಡಪುನಗ ದಂಪತಿಲು ಜೀವ ದೆತೊಂದು ಆದಿತ್ತ್ಂಡು.

ಒಂಜಿ ಜೀವ ಪೋನಾಗ ಊರುದ ಪೊಲೀಸ್ ಆಯುಕ್ತರ‍್ನ ಪುದರ್ ಪಂಡುದು, ಆ ಪೊಲೀಸ್ ಆಯುಕ್ತೆರು ತನ್ನ ಅಂತ್ಯ ಸಂಸ್ಕಾರ ಮಲ್ತು ಕೊರೊಡು ಪಂಡುದು ಆರೆಗು ಮಾರ್ಯದೆ ಕೊರ್ದು ಈ ಕುಟುಂಬ ಜೀವ ದೆತುನುಡಾಂಡ, ಕುಡ್ಲದ ಪೊಲೀಸ್ ಆಯುಕ್ತೆರ್ ಆಯಿನ ಶಶಿಕುಮಾರ್ ಇಂಬೆರೆನು ಕುಡ್ಲದ ಜನಕುಲು ಯೇತು ಪ್ರೀತಿ, ಗೌರವಡು ತುವೊಂದುಲ್ಲೆರ್ ಪನ್ಪಿನವು ಈ ಮರಣ ತೋಜಾದು ಕೊರುಂಡು.