ದುರ್ಗಾಪೂಜೆದ ಪೆಂಡಾಲ್ಗ್ ತೂ ಪೊತ್ ದ್ ಐನ್ ಜನ ತೀರ್ ಪೋಯೆರ್
ಭದೋಹಿ(ಉತ್ತರ ಪ್ರದೇಶ) : ದುರ್ಗಾಪೂಜೆದ ಪೆಂಡಾಲ್ ಗ್ ತೂ ಪೊತ್ ದ್ ಐನ್ ಜನ ತೀರ್ ಪೋಯಿನ ಘಟನೆ ಉತ್ತರ ಪ್ರದೇಶದ ಭದೋಹಿಡ್ ಐತಾರ ರಾತ್ರೆ ನಡತ್ಂಡ್. ಈ ಘಟನೆಡ್ 50ರ್ದ್ ಲ ಎಚ್ಚ ಜನಕ್ಕ್ ಪೆಟ್ಟಾತ್ಂಡ್.
ಅಂಚನೆ ಮೂಜಿ ಜೋಕುಲು ಬೊಕ್ಕ ರಡ್ಡ್ ಪೊಂಜೊವು ತೀರ್ ಪೋತೆರ್ ಪಂದ್ ಭದೋಹಿ ಡಿಎಂ ಗೌರಂಗ್ ರಾಠಿ ತೆರಿಪಾದೆರ್.
ದುರ್ಗಾಪೂಜೆ ಆರತಿದ ಪೊರ್ತುಡು ಸುಮಾರ್ 150 ಜನ ಇತ್ತೆರ್. ಆರತಿ ನಡತೊಂದು ಇಪ್ಪುನ ಪೊರ್ತುಡು ಪೆಂಡಾಲ್ಡ್ ಡಿಜಿಟಲ್ ಶೋ ನಡತೊಂದು ಇತ್ಂಡ್. ಈ ಪೊರ್ತುಡು ಶಾರ್ಟ್ ಸರ್ಕ್ಯೂಟ್ ಆದ್ ತೂ ಪೊತ್ ದ್ಂಡ್. ಜನಕುಲು ಜೂವ ಒರಿಪಾಯೆರೆ ತಿಕ್ಕಿನಡೆಗ್ ಬಲಿತೆರ್. ಆಂಡಲ ಜನಕುಲೆನ ನುರ್ಕಾಟಿಕೆರ್ದ್ ಪಿದಯಿ ಬರ್ಪುನ ಪೊರ್ತುಡು ಐನ್ ಜನ ಜೂವಪ್ಪ ತೀರ್ ಪೋಯೆರ್. ಇಡೀ ಪೆಂಡಾಲ್ ಪೊತ್ ದ್ ಬೊಂಞ ಆತ್ಂಡ್. ಈ ವಿಷಯ ತೆರಿನ ಕೂಡ್ಲೆ ಜಾಗೆಗ್ ಬತ್ತಿನ ಅಗ್ನಿಶಾಮಕ ದಳ ಬೊಕ್ಕ ಬೇತೆ ಬೇತೆ ಅಧಿಕಾರಿಲು ತೂ ತೆಕ್ಕಾವುನ ಬೇಲೆ ಮಲ್ತೆರ್, ನೆಟ್ಟ್ ಪೆಟ್ಟಾಯಿನ 33 ಜನನ್ ಬಿಎಚ್ಯು ಆಸ್ಪತ್ರೆಗ್ ದಾಖಲ್ ಮಲ್ತೆರ್. ಈ ಘಟನೆರ್ದ್ ಶೇ. 30-40 ಜನಕ್ ಪೆಟ್ಟತ್ಂಡ್ ಪಂದ್ ಭದೋಹಿ ಡಿಎಂ ಗೌರಂಗ್ ರಾಠಿ ತೆರಿಪಾಯೆರ್.