Belthangady

ಕಾರ್ಲ ವಿಧಾನ ಸಭಾ ಕ್ಷೇತ್ರದ ಪರವಾದ್ ಸಚಿವೆರ್ ಸುನೀಲ್‌ ಕುಮಾರ್‌ ಮೆರೆರ್ದ್ ಧರ್ಮಾಧಿಕಾರಿ ಡಿ. ವೀರೇಂದ್ರ ಹೆಗ್ಗಡೆರೆಗ್ ಅಭಿನಂದನೆ

ಉಜಿರೆ: ಧರ್ಮಕ್ಷೇತ್ರಲು ಧರ್ಮ ಪ್ರಭಾವನೆ, ಆಧ್ಯಾತ್ಮಿಕ ಜಾಗೃತಿ ಅಂಚೆನೆ ಸಾಮಾಜಿಕ ಸಂಘಟನೆದೊಟ್ಟುಗು ಜನ ಮಂಗಳ ಕಾರ್ಯಲೆಗ್ ಪ್ರೇರಣೆ ಕೊರ್ಪುಂಡು ಪಂದ್ ಧರ್ಮಸ್ಥಳದ ಧರ್ಮಾಧಿಕಾರಿ ಡಿ. ವೀರೇಂದ್ರ ಹೆಗ್ಗಡೆರ್ ಪಂಡೆರ್.

ರಾಜ್ಯಸಭಾ ಸದಸ್ಯೆರಾದ್ ನಾಮನಿರ್ದೇಶನ ಆಯಿನ ಹೆಗ್ಗಡೆರೆಗ್ ಅಂಗಾರೆ ಧರ್ಮಸ್ಥಳದ ಅರೆನ ಬೂಡುಡು ಕಾರ್ಲ ವಿಧಾನ ಸಭಾಕ್ಷೇತ್ರದ ಜನಕ್ಲೆನ ಪರವಾದ್ ಸಚಿವೆರ್ ಸುನೀಲ್‌ ಕುಮಾರ್‌ ಅಭಿಮಾನಿಲೆನ ಒಟ್ಟುಗು ಅಭಿನಂದನೆ ಮಲ್ತಿನ ಪೊರ್ತುಡು ಹೆಗ್ಗಡೆರ್ ಪಾತೆರಿಯೆರ್.

೧೯೮೨ರಲ್ಲಿ ಧರ್ಮಸ್ಥಳಟ್ಟ್ ನಡದಿನ ಭಗವಾನ್ ಬಾಹುಬಲಿ ಸ್ವಾಮಿನ ಸುರೂತ್ತ ಮಹಾಮಸ್ತಕಾಭಿಷೇಕದ ನೆಂಪುಗಾದ್ ಶ್ರೀ ಕ್ಷೇತ್ರ ಧರ್ಮಸ್ಥಳ ಗ್ರಾಮಾಭಿವೃದ್ಧಿ ಯೋಜನೆ ಬೊಕ್ಕ ಉಜಿರೆಡ್ ಗ್ರಾಮಾಭಿವೃದ್ಧಿ ಮತ್ತು ಸ್ವ-ಉದ್ಯೋಗ ತರಬೇತಿ ಕೇಂದ್ರ ಸುರು ಮಲ್ತ್ ದಿತ್ತ.

ಗ್ರಾಮಾಭಿವೃದ್ಧಿ ಯೋಜನೆ ನೆಲ, ಜಲ ಪ್ರಾಕೃತಿಕ ಸಂಪನ್ಮೂಲನ್ ಗಲಸ್ ದ್ ಸ್ವಾವಲಂಬಿ ಜೀವನೊಗು ಪ್ರೋತ್ಸಾಹ, ಪ್ರೇರಣೆ ಬೊಕ್ಕ ಮಾರ್ಗದರ್ಶನದ ಒಟ್ಟುಗು ಗ್ರಾಮರಾಜ್ಯದ ಮುಕೇನ ರಾಮರಾಜ್ಯ ನಿರ್ಮಾಣಗ್ ಪ್ರಯತ್ನ ಆವೊಂದುಂಡು.ರಾಜ್ಯಮಟ್ಟದ ಯೋಜನೆದ ೪೫,೦೦೦ ಕಾರ್ಯಕರ್ತೆರ್ ಸೇವೆ ಮಲ್ತೊಂದುಲ್ಲೆರ್. ಗ್ರಾಮಾಭಿವೃದ್ಧಿ ಬೊಕ್ಕ ಸ್ವ-ಉದ್ಯೋಗ ತರಬೇತಿ ಕೇಂದ್ರದ ೫೮೮ ಶಾಖೆಲು ದೇಶದ ಇಡೀಯ ಸೇವೆ ಮಲ್ತೊಂದು ನಿರುದ್ಯೋಗ ಸಮಸ್ಯೆ ನಿವಾರಣೆಗ್ ಮಲ್ಲ ಕೊಡುಗೆ ಕೊರೊಂದುಂಡು.

ಧರ್ಮಸ್ಥಳಡ್ ಅನ್ನದಾನ, ವಿದ್ಯಾದಾನ, ಔಷಧಿದಾನ ಬೊಕ್ಕ ನ್ಯಾಯದಾನ ಪನ್ಪಿನ ಚತುರ್ವಿಧ ದಾನ ನಿರಂತರ ನಡತೊಂದುಂಡು. ಅಭಯದಾನದ ಮುಕೇನ ಜನಕ್ಲೆನ ಬೇನೆ, ಬೆಸರ್, ಪೋಡಿಗೆ, ಗೊಂದಲ ದೆತ್ತ್ ದ್ ಧೈರ್ಯ ಬೊಕ್ಕ ಆತ್ಮವಿಶ್ವಾಸ ದಿಂಜಾವೊಂದುಂಡು.ಉಂದು ಧರ್ಮಸ್ಥಳ ಕ್ಷೇತ್ರದ ಮಹಾತ್ಮೆಯಾದುಂಡು.

ಬಾಹುಬಲಿ ಮಹಾಮಸ್ತಕಾಭಿಷೇಕ, ಭಜನಾ ತರಬೇತಿ ಕಮ್ಮಟ, ಸತ್ಯನಾರಾಯಣ ಪೂಜೆ, ದೇವಾಲ್ಯದ ಜೀರ್ಣೋದ್ಧಾರ ಬೊಕ್ಕ ಬ್ರಹ್ಮಕಲಶೋತ್ಸವ ಇಂಚಿನ ಧಾರ್ಮಿಕ ಕಾರ್ಯಲೆನ್ ಸಾಮಾಜಿಕ ಸಂಘಟನೆದ ಜತೆಟ್ಟ್ ಜನಕ್ಲೆಡ ಧರ್ಮಜಾಗೃತಿ, ಶಿಸ್ತು, ಸಂಯಮ, ಸ್ವಚ್ಛತೆ, ಪರೋಪಕಾರ, ಸೇವಾ ಮನೋಭಾವ ಇಂಚಿನ ಮಾನವೀಯ ಮೌಲ್ಯನ್ ಮಾತಾ ಪುಟ್ಟಾವೊಂದುಂಡು ಪಂದ್ ಪಂಡಿನ ಹೆಗ್ಗಡೆರ್ , ಧರ್ಮಸ್ಥಳದ ಅಭಿಮಾನಿಲು ಅಂಚೆನೆ ಮಾತೆರ್ನಲ ಪ್ರೀತಿ-ವಿಶ್ವಾಸ ಬೊಕ್ಕ ನಿರೀಕ್ಷೆ ಪ್ರಕಾರ ರಾಷ್ಟ್ರಮಟ್ಟದ ಸೇವೆ ಮಲ್ಪುನ ಆಶಯ ತೋಜಪಾಯೆರ್.

ಕಾರ್ಲ ಗ್ ಲ ಧರ್ಮಸ್ಥಳಗ್ ಲ ಅವಿನಾಭಾವ ಸಂಬಂಧ ಉಂಡು, ಕಾರ್ಲದ ಮಂಗಳಪಾದೆಡ್ ರೆಂಜಾಳ ಗೋಪಾಲ ಶೆಣೈ ಬಾಹುಬಲಿ ಮೂರ್ತಿ ನ್ ಕೆತ್ತ್ ದ್ ಧರ್ಮಸ್ಥಳಕ್ಕ್ ಕನತ್ ದ್ ಪ್ರತಿಷ್ಠಾಪನೆ ಮಲ್ದ್ಂಡ್ ಪಂಡೆರ್.

ಸಚಿವೆರ್ನೊಟ್ಟುಗು ಕಾರ್ಲರ್ದ್ ಸುಮಾರು ಮುನ್ನೂದು ಜನ ಹೆಗ್ಗಡೆರ್ನ ಅಭಿಮಾನಿಲು ಬತ್ತ್ ದ್ ಗೌರವ ಸಂದಾಯೆರ್.