ವತಿರ್ದ್

ವೀರಕಂಬ ಗ್ರಾಮ ಪಂಚಾಯತ್ ವತಿರ್ದ್ ಇಲ್ಲ ಇಲ್ಲಗ್ ಫಾಗಿಂಗ್

ಕಲ್ಲಡ್ಕ ಮೇ 29, ಬಂಟ್ವಾಳ ತಾಲೂಕು ವೀರಕಂಭ ಗ್ರಾಮದ ಗೊಳಿಮಾರ್ ಪನ್ಪಿನ ಜಾಗೆಡ್ ಡೆಂಗ್ಯೂ ಜ್ವರ ತೋಜಿನ ನೆಲೆಟ್ಟ್ ವೀರಕಂಭ ಗ್ರಾಮ ಪಂಚಾಯತ್ ವತಿರ್ದ್ ಡೆಂಗ್ಯೂ ಜ್ವರ ಉಪ್ಪುನ ಇಲ್ಲ್ ಅಂಚನೆ ಕೈತಲ್ ದ ಇಲ್ಲಗ್ ಫಾಗಿಂಗ ಮಲ್ತೆರ್ ಈ ಪೊರ್ತುಡು ಗ್ರಾಮ ಪಂಚಾಯತ್ ಗುರ್ಕಾರ್ಲಾಯಿನ ಶ್ರೀಯುತ ದಿನೇಶ್ ಅಂಚನೆ ಗ್ರಾಮ ವ್ಯಾಪ್ತಿದ ಕಿರಿಯ ಆರೋಗ್ಯ ಸಹಾಯಕಿ ಶ್ರೀಮತಿ ಜ್ಯೋತಿ ಕೆ ಪಾಲ್ ಪಡೆದಿತ್ತೆರ್.

ಜೈ ತುಳುನಾಡ್ (ರಿ) ಕಾಸರಗೋಡು ಸಂಘಟನೆದ ವತಿರ್ದ್ ಆನ್ ಲೈನ್ಡೇ ಪತ್ತನಾಜೆ ಕೂಟ ಅಟ್ಟನೆ

ಕಾಸ್ರೋಡು, ಮೇ 25 : ಜೈ ತುಳುನಾಡ್ (ರಿ) ಸಂಘಟನೆದ ಕಾಸರಗೋಡು ಘಟಕದ ಮುತಾಲಿಕೆಡ್ ಪತ್ತನಾಜೆದ ಪತ್ತೆರಿ ಕೂಟ ಲಾಕ್ ಡೌನ್ ದ ನಡುಟುಲಾ ಆನ್‌ಲೈನ್ ಡೇ ನಡತುಂಡು.

ತುಳುನಾಡ್ ದ ಆಚಾರ ಇಚಾರ, ಲಿಪಿ, ಸಂಸ್ಕೃತಿ ಬೊಕ್ಕ  ಒರಿಪಾದ್ ಬುಲೆಪಾವುನ ಜವಾಬ್ದಾರಿಯುತ ಬೇಲೆನ್ ನಿಸ್ವಾರ್ಥವಾದ್ ಜವಣ್ಯೇರ್ನ ಅಂಚನೆ ಪೆರಿಯೇರ್ನ ಕೂಟ ಬಾರಿ ಒಗ್ಗಟ್ ಡ್ ಮಲ್ತೊಂದು ಉಲ್ಲೆರ್.ಐತ ಒಟ್ಟುಗು ತುಳುನಾಡ್ ಡ್ ಮಾಜೊಂದು ಉಪ್ಪುನ ಪರ್ಬಲೆನ್ ಯುವ ಪೀಳಿಗೆಗ್ ಗೊತ್ತು ಮಲ್ಪಾವುನ ಪ್ರಯತ್ನನ್ ಸಾರ್ವಜನಿಕವಾದ್ ಮಲ್ತೊಂದು ಉಲ್ಲೆರ್ . ಅಂಚನೆ ತುಳುನಾಡ್ ದ ವಿಶೇಷ ದಿನಟ್ ಒಂಜಾಯಿನ ಪತ್ತನಾಜೆನ್ಲ ಗಣ್ಯರ ಸಮ್ಮುಖಡ್ , ಲಾಕ್ ಡೌನ್ ನಡುಟುಲಾ ಗೂಗಲ್ ಮೀಟ್ ಪನ್ಪಿನ ಆನ್‌ಲೈನ್ ವೇದಿಕೆಡ್ ಬಾರಿ ಗೌಜಿ ಡ್ ಪತ್ತನಾಜೆದ ಪತ್ತೆರಿ ಕೂಟನ್ ಆಚರಣೆ ಮಲ್ತೆರ್ . ಲೇಸ್ ದ ಗುರ್ಕಾರ್ಮೆನ್ ಘಟಕದ ಗುರ್ಕಾರ್ಲಾಯಿನ ಹರಿಕಾಂತ್ ಕಾಸರಗೋಡು ವಯಿಸ್ದ್ ಇತ್ತೆರ್ .

ಪೆರಿಯ ಪತ್ರಕರ್ತ, ಸಹಕಾರಿ ದುರೀಣೆರ್ ತುಳು ಸಾಹಿತಿಲೂ ಆಯಿನ ಬಿ.ಪಿ. ಶೇಣಿ ಮೆರ್ ಪತ್ತನಾಜೆದ ಬಗ್ಗೆ ಮಾಹಿತಿ ಕೊರಿಯೆರ್ . ಘಟಕದ ಗೌರವಾಧ್ಯಕ್ಷೇರಾಯಿನ ಉಮೇಶ್ ಸಾಲಿಯಾನ್, ಘಟಕದ ಜೊತೆಕಾರ್ಯದರ್ಶಿ, ತುಳು ಸಾಹಿತಿ ಶ್ರೀನಿವಾಸ ಆಳ್ವ ಕಳತ್ತೂರು, ವಿಕಿಪೀಡಿಯ ಸಂಪಾದಕಿ ಬೊಕ್ಕ ಘಟಕದ ಉಪಾಧ್ಯಕ್ಷೆ ವಿನೋದ ಪ್ರಸಾದ್ ರೈ ಕಾರಿಂಜೆ ಅಂಚನೆ ತುಳು ಸಾಹಿತಿ, ಘಟಕದ ಸದಸ್ಯೆ ರಾಜಶ್ರೀ ಟಿ ರೈ ಪೆರ್ಲ ಪಾಲ್ ಪಡೆದಿತ್ತೆರ್.

ಊರು ಪರವೂರುರ್ದು ಆನ್ ಲೈನ್ ಮುಖೇನ ಪಾಲ್ ಪಡೆಯಿನ ಗಣ್ಯೆರ್ , ಅಭಿಮಾನಿಲು ಇಂಚಿನ ಲೇಸುಲು ನನಾತ್ ಸಂಘಟನೆ ಮುಖೇನ ನಡಪಾವಡ್ ಪಂದ್ ಎಡ್ಡೆಪ್ಪುನು ಬಯಕಿಯೆರ್.

ಲೇಸ್ ದ ನಿರೂಪಣೆನ್ ಘಟಕದ ಕಾರ್ಯದರ್ಶಿ ಕಾರ್ತಿಕ್ ಮಲ್ತೆರ್ ಅಂಚನೆ ಸದಸ್ಯೆ ಕುಶಾಲಾಕ್ಷಿ ವಿ ಕುಲಾಲ್ ಕಣ್ವತೀರ್ಥ ಸೊಲ್ಮೆ ಸಂದೈತ ಮಲ್ತೆರ್.

ಹೋಪ್ ಫೌಂಡೇಶನ್ ವತಿರ್ದ್ ವನಸ್

ಕುಡ್ಲ, ಮೇ 19: ಹೋಪ್ ಫೌಂಡೇಶನ್ ಕುಡ್ಲ ನೆತ್ತ ವತಿರ್ದ್ ಲಾಕ್ ಡೌನ್ ಪೊರ್ತುಡು ಕುಡ್ಲ ನಗರ ವ್ಯಾಪ್ತಿದ ಉಲಯಿದ ಆಸ್ಪತ್ರೆಡ್ ಉಪ್ಪುನ ರೋಗಿಲು ಬೊಕ್ಕ ಅಕ್ಲೆನ ಒಟ್ಟುಗು ಉಪ್ಪುನಕ್ಲೆಗ್ ಮಧ್ಯಾಹ್ನ, ರಾತ್ರಿದ ವನಸ್ ದ ವ್ಯವಸ್ಥೆ ಮಲ್ದೆರ್ .

ಮಧ್ಯಾಹ್ನದ ವನಸ್ ಗಾದ್ ಜಾಗೆ ಬೊಕ್ಕ ಜನಕ್ಲೆನ ಲೆಕ್ಕನ್ ಕಾಂಡೆ 10 ಗಂಟೆದುಲಯಿ ಅಂಚನೆ ರಾತ್ರಿದ ವನಸ್ ಗಾದ್ ಬೈಯ್ಯಗ್ 4 ಗಂಟೆದ ಉಲಯಿ ತೆರಿಪಾವೊಡು ಪಂದ್ ಸಂಘಟಕೆರ್ ಮನವಿ ಮಲ್ದೆರ್ .

ಪುದರ್ ನೋಂದಾವಣೆ ಮಲ್ಪರೆ ಹಬೀಬ್: 8151061234, ಮುನಾಫಿಲ್: 9743434326 ಮೆಕ್ಲೆಗ್ ಲೆಪ್ಪು ಕೊರಿಯರೆ ಹೋಪ್ ಫೌಂಡೇಶನ್ ನೆತ್ತ ಸೈಫ್ ಸುಲ್ತಾನ್ ತೆರಿಪಾದೆರ್ .

ಪಾದೂರು ಐಎಸ್‌ಪಿಆರ್‌ಎಲ್ ಯೋಜನೆ ಖಾಸಗೀಕರಣ : ಕಾಂಗ್ರೆಸ್ ವತಿರ್ದ್ ಜನಾಂದೋಲನ ಯಾತ್ರೆ : ಸೊರಕೆ

ಕಾಪು, ಮೇ 19: ದೇಶದ ಆತಂಕರಿಕ ಭದ್ರತೆ, ರಕ್ಷಣೆ ಬೊಕ್ಕ ಆಪತ್ ಕಾಲದ ಬಂಗದ ಪೊರ್ತುಡು ಬಳಕೆಗ್ ಬೋಡಾಪಿನ ಕಚ್ಚಾತೈಲ ಸಂಗ್ರಹಣೆಗಾದ್ ಕೇಂದ್ರ ರಕ್ಷಣಾ ಇಲಾಖೆದ ಮುಖೇನ ಪಾದೂರುದ ಕಚ್ಛಾ ತೈಲ ಸಂಗ್ರಹಣಾ ಘಟಕನ್ ಅನುಷ್ಟಾನಗ್

ಕಂದೇರ್ , ಅವೆನ್ ರಕ್ಷಣಾ ಇಲಾಖೆರ್ದ್ ಪ್ರತ್ಯೇಕ ಮಲ್ತ್ ದ್ , ಪೆಟ್ರೋಲಿಯಂ ಇಲಾಖೆಗ್ ಕೊರ್ತೆರ್ . ಅಲ್ಪರ್ದ್ ಕುಡ ಖಾಸಗಿದಕ್ಲೆಗ್ ಗುತ್ತಿಗೆ ಆಧಾರಡ್ ಕೊರ್ಪಿನವು ಖಂಡನೀಯ ಪಂದ್ ಮಾಜಿ ಸಚಿವ ವಿನಯ ಕುಮಾರ್ ಸೊರಕೆ ಪಂಡೆರ್.

ಕಾಪು ನಗರ ಕಾಂಗ್ರೆಸ್ ಗುರ್ಕಾರ್ಲಾಯಿನ ಮಹಮ್ಮದ್ ಸಾದಿಕ್ ದೀನಾರ್, ಕಾಂಗ್ರೆಸ್ ಅಲ್ಪಸಂಖ್ಯಾತ ವಿಭಾಗದ ಗುರ್ಕಾರ್ಲಾಯಿನ ಸಂಶುದ್ದೀನ್ ಶೇಖ್, ಕಾಪು ಬ್ಲಾಕ್ ಕಾಂಗ್ರೆಸ್ ಕೋಶಾಧಿಕಾರಿ ಹರೀಶ್ ನಾಯಕ್, ಕಾಪು ಗ್ರಾಮೀಣ ಕಾಂಗ್ರೆಸ್ ಗುರ್ಕಾರ್ಲಾಯಿನ ನಾಗೇಶ್ ಸುವರ್ಣ, ಮಜೂರು ಗ್ರಾಮೀಣ ಕಾಂಗ್ರೆಸ್ ಗುರ್ಕಾರ್ಲಾಯಿನ ನಾಗಭೂಷಣ ರಾವ್ ಪಾಲ್ ಪಡೆದಿತ್ತೆರ್ .