ಅಭಯಚಂದ್ರ ಜೈನ್

ಕೋವಿಡ್ ವಾರಿಯರ್ಸ್ ಗಾದ್ ತನ್ನ ಗಾಡಿನೇ ಕೊರಿನ ಮಾಜಿ ಸಚಿವೆರಾಯಿನ ಅಭಯಚಂದ್ರ ಜೈನ್

Jul 8, 2021

ಮೂಡುಬಿದಿರೆ, ಜುಲೈ 8: ಮಾಜಿ ಸಚಿವ ಅಭಯಚಂದ್ರ ಮೇರ್ ಸುಮಾರ್ ರಡ್ಡರೆ ತಿಂಗೊಲ್ ಲಾಕ್‌ಡೌನ್ ಪೊರ್ತುಡು ಕೋವಿಡ್ ವಾರಿಯರ್ಸ್ ನ ಅಗತ್ಯ ಪ್ರಯಾಣಗ್ ತಮ್ಮ ಇನ್ನೋವಾ ಕಾರ್ ನ್ ಪೂರ್ಣಾವಧಿ ಚಾಲಕ, ಇಂಧನ ದೊಟ್ಟುಗು ಕೊರ್ತೆರ್ .

ಕರಿನ ವರ್ಷ ಕೋವಿಡ್-19 ನಿಮಿತ್ತ ಪಾಡ್ದಿನ ಲಾಕ್‌ಡೌನ್ ಪೊರ್ತುಡು ಮೂಡುಬಿದಿರೆ ಸಮುದಾಯ ಆರೋಗ್ಯ ಕೇಂದ್ರ ಬೊಕ್ಕ ಮೂಡುಬಿದಿರೆದ ಜಿ.ವಿ. ಪೈ ಚಾರಿಟೆಬಲ್ ಆಸ್ಪತ್ರೆದ ದಾದಿನಕುಲೆಗ್ , ಆರೋಗ್ಯ ಸಹಾಯಕಿಯೆರೆಗ್ ಸೇರಿನಂಚ 25 ಜನಕ್ ಈ ಸೌಲಭ್ಯ ಕೊರಿನ ಅಭಯಚಂದ್ರ ಮೇರ್ ಈ ಸಲಲ ಆತೆ ಜನಕ್ ಈ ಉಚಿತ ಸೇವೆ ಕೊರ್ತೆರ್ .

ಮೂಡುಬಿದಿರೆ ಬೊಕ್ಕ್ ಪರಿಸರಡ್ ಆರೋಗ್ಯ ಸೇವೆದ ಕರ್ತವ್ಯ ಮಲ್ಪುನ ಈ ಜನಕುಲು ಬಸ್ ಓಡಾಟ ಇಜ್ಜoದೆ ಸಂಕಷ್ಟಡ್ ಉಪ್ಪುನಗ ಅಕ್ಲೆಗ್ ಶಾಸಕೆರ್ನ ಸೌಕರ್ಯ ಬಾರಿ ಪ್ರಯೋಜನ ಆಂಡ್.

ತುಳುಮಣ್ಣ್ ದ ಜವನೆರೆಗ್ ಕೆಲಸ ಕೊರಂದಿನ ಎಂಆರ್ ಪಿಎಲ್ ವಿರುದ್ಧ ಲಾಕ್ ಡೌನ್ ರ್ದ್ ಬೊಕ್ಕ ಪ್ರತಿಭಟನೆ : ಅಭಯಚಂದ್ರ ಜೈನ್

May 28, 2021

ಮುಲ್ಕಿ : ತುಳುನಾಡ್ ದ ಜನೊಕುಲೆಗ್ ಅನುಕೂಲ ಮಲ್ಪುನ ಉದ್ದೇಶೊಡು ನಮ್ಮ ಹಿರಿಯ ನಾಯಕೆರಾದುಪ್ಪುನ ಬಿ.ಜನಾರ್ದನ ಪೂಜಾರ್ಲು, ಆಸ್ಕರ್ ಫರ್ನಾಂಡಿಸ್ ಬೊಕ್ಕ ವೀರಪ್ಪ ಮೊಯ್ಲಿ ಮೊಕ್ಲೆನ ರಾಜಕೀಯ ಇಚ್ಛಾಶಕ್ತಿಡ್ ಎಂಆರ್ ಪಿಎಲ್, ಎಸ್ ಇಝಡ್ ದಂಚಿನ ಮಾಮಲ್ಲ ಕಂಪೆನಿಲು ಮೂಲು ಸ್ಥಾಪನೆ ಆಯ. ಆಂಡ ಇತ್ತೆದ ಆಡಳಿತೆದ ಸಂಸದೆರ್, ಮಂತ್ರಿಲು, ಶಾಸಕೆರೆಗ್ ಇಚ್ಛಾಶಕ್ತಿ ಇಜ್ಜಾಂದಿ ನೆರ್ದಾವರ ಮುಲ್ತಕಲೆಗ್ ಕಂಪೆನಿಲೆಡ್ ಕೆಲಸ ಕೊರಂದೆ ಬೇತೆ ರಾಜ್ಯದಕ್ಲೆಗ್ ಕೆಲಸ ಕೊರೊಂದುಲ್ಲೆರ್. ಉಂದೆತ್ತ ವಿರುದ್ಧ ಲಾಕ್ ಡೌನ್ ಮುಗಿನೆರ್ದ್ ಬೊಕ್ಕ ಕಾಂಗ್ರೆಸ್ ಮಲ್ಲಮಟ್ಟ್ ದ ಪ್ರತಿಭಟನೆ ಮಲ್ಪರೆ ಉಂಡು ಪಂಡ್ ದ್ ಮಾಜಿ ಸಚಿವೆರ್ ಅಭಯಚಂದ್ರ ಜೈನ್ ಪಂಡೆರ್.

ಹಳೆಯಂಗಡಿ ದ ಮುಲ್ಕಿ ಬ್ಲಾಕ್ ಕಾಂಗ್ರೆಸ್ ಕಚೇರಿಡ್ ಗುರುವಾರ ನಡತಿನ ಸುದ್ದಿಗೋಷ್ಠಿಡ್ ಪಾತೆರ್ನ ಆರ್, ಎಂಆರ್ ಪಿಎಲ್ ಸಂಸ್ಥೆಗ್ ಸಾರ ಸಾರ ಎಕ್ರೆ ಜಾಗೆ ಬುಡ್ದು ಕೊರ್ತಿನ ತುಳುನಾಡ್ದ ಜನೊಕ್ಲೆಗ್ ಇತ್ತೆ ಅವುಲು ಉದ್ಯೋಗ ತಿಕ್ಕೊಂದಿಜ್ಜಿ. ಇಂಚೊಗು ನಡತಿನ ನೇಮಕಾತಿಡ್ ದಕ್ಷಿಣ ಕನ್ನಡ ಜಿಲ್ಲೆ ಅತ್ತ್ ಡ ಕರ್ನಾಟಕ ದ ಜನೊಕ್ಲೆಗ್ ತಿಕ್ಕೊಡಿತ್ತಿನ ಉದ್ಯೋಗೊನು ಬೇತೆ ರಾಜ್ಯದಕ್ಲೆಗ್ ಕೊರೊಂದುಲ್ಲೆರ್. ಉಂದೆತ್ತ ವಿರುದ್ಧ ಜಿಲ್ಲಾಧಿಕಾರಿಲೆನ ಕಚೇರಿದ ಎದುರುಡು ದಕ್ಷಿಣಕನ್ನಡ ಬೊಕ್ಕ ಒಡಿಪು ಜಿಲ್ಲೆದ ಐನ್ ಸಾರ ಜನೊಕ್ಲೆನದ ಸೇರ್ಸಾದ್ ಪ್ರತಿಭಟನೆ ಮಲ್ಪುವ ಪಂಡೆರ್.ಯುವ ನಾಯಕೆರ್ ಮಿಥುನ್ ರೈ ಪಾತೆರ್ದ್,2019ನೇ ಇಸ್ವಿಡ್ ಎಂಆರ್ ಪಿಎಲ್ 233 ಪೋಸ್ಟ್ ಗ್ ಅರ್ಜಿ ಲೈದ್ಂಡ್. ಕರ್ನಾಟಕದ 6 ಸಾರ ಜನ ಅರ್ಜಿ ಪಾಡ್ದೆರ್. ಅಯಿಟ್ ದಕ್ಷಿಣ ಕನ್ನಡ ಜಿಲ್ಲೆದಕುಲು 2 ಸಾರ ಜನ ಉಲ್ಲೆರ್. ಅಯಿಟ್ 2021ನೇ ಇಸ್ವಿಡ್ 184 ಜನಕ್ಕ್ ಕೆಲಸದ ವೆರಿಫಿಕೇಶನ್ ಬೈದ್ಂಡ್. ಅಯಿಟ್ಟ್ ದಕ್ಷಿಣ ಕನ್ನಡದಕ್ಲು 4 ಜನ ಮಾತ್ರ. ಬೊಕ್ಕ ಪೂರ ಉತ್ತರಪ್ರದೇಶ, ಬಿಹಾರದಕ್ಲೆಗ್ ತಿಕ್ ದ್ಂಡ್.ಸರೋಜಿನಿ ಮಹಿಷಿ ವರದಿದ ಪ್ರಕಾರ ಕೈತಲ್ದಕ್ಲೆಗ್ ಶೇ.100 ಉದ್ಯೋಗ ತಿಕ್ಕೊಡು. ಆಂಡ ಉಂದೆಟ್ಟ್ ಮಲ್ಲ ಅವ್ಯವಹಾರ ನಡದ್ಂಡ್. ದಿಲ್ಲಿದ ಕಂಪೆನಿಗ್ ಪರೀಕ್ಷೆ ಬರೆಪಾವುನ ಜಬದಾರಿ ಕೊರ್ದು ಕೈತಲ್ದಕ್ಲೆಗ್ ಅನ್ಯಾಯ ಆತ್ಂಡ್. ಉಂದೆಕ್ಕ್ ನಮ್ಮ ರಾಜಕೀಯ ಪ್ರತಿನಿಧಿಲೆನ ಇಚ್ಛಾಶಕ್ತಿ ದ ಕೊರತೆ ಕಾರಣ. ನಮ್ಮ ಜಿಲ್ಲೆದಕುಲೇ ಆದುಪ್ಪುನ ಕೇಂದ್ರ ಸಚಿವೆರ್, ಇರುವೆರ್ ಸಂಸದೆರ್ ಎಂಆರ್ ಪಿಎಲ್ ನೇಮಕೊಗು ತಡೆ ಕನತ್ ದ್ ಆ ಕೆಲಸೊನು ತುಳುನಾಡ್ ದಕಲೆಗ್ ದೆಪ್ಪಾದ್ ಕೊರೊಡು. ಅದ ಮುಟ್ಟ ಕಾಂಗ್ರೆಸ್ ಬುಡಂದೆ ಪೊಂರ್ಬಾಟ ಮಲ್ಪುಂಡು ಪಂಡ್ ದ್ ಪಂಡೆರ್.ಸುದ್ದಿಗೋಷ್ಠಿಡ್ ಕೆಪಿಸಿಸಿ ವಕ್ತಾರೆ ವಸಂತ ಬೆರ್ನಾಡ್, ಕೆಪಿಸಿಸಿ ರಾಜ್ಯ ಹಿಂದುಳಿದ ವರ್ಗದ ಕಾರ್ಯಂತೆರ್ ಪ್ರವೀಣ್ ಬೊಳ್ಳೂರು, ಹಳೆಯಂಗಡಿ ಗ್ರಾಮ ಪಂಚಾಯ್ತಿ ಸದಸ್ಯೆರಾಯಿನ ಧನರಾಜ್ ಕೋಟ್ಯಾನ್, ಅನಿಲ್ ಕುಮಾರ್ ಸಸಿಹಿತ್ಲು ಚಂದ್ರಕುಮಾರ್, ಅಬ್ದುಲ್ ಅಜೀಜ್, ಅಬ್ದುಲ್ ಖಾದರ್, ಸತೀಶ್ ಕೋಟ್ಯಾನ್ ಮೊಕುಲು ಮಾತ ಇತ್ತೆರ್.