ಸಂಘಟನೆ

ಜೈ ತುಳುನಾಡ್ ಸಂಘಟನೆದ ವತಿರ್ದ್ ತುಳು ಭಾಷೆನ್ ಅಧಿಕೃತ ಮಲ್ಪೊಡು ಪಂದ್ ಕೇರಳ ಸರ್ಕಾರಗ್ ಬಿನ್ನಾಪು

ಕಾಸ್ರೊಡು, ಜೂನ್ 28: ತುಳುನಾಡ್ ದ ಆಚಾರ ಇಚಾರ ಲಿಪಿ ಸಂಸ್ಕ್ರತಿ ಬೊಕ್ಕ ಭಾಷೆನ್ ಒರಿಪಾದ್ ಬುಳೆಪಾವುನ ನೆಲೆಟ್ಟ್ ಜವಾಬ್ದಾರಿಯುತ ಬೇಲೆನ್ ನಿಸ್ವರ‍್ಥವಾದ್ ಮಲ್ಪರೆ ಜವನೆರ್ ಬೊಕ್ಕ ಪೆರಿಯಾಕುಲು ಒಟ್ಟಾದ್ ಉಪ್ಪುನ ಕೂಟ ನೆ ‘ಜೈ ತುಳುನಾಡ್ ಸಂಘಟನೆ’ ನೆತ್ತ ಕಾಸ್ರೋಡು ಘಟಕರ್ದ್ ಗುರ್ಕಾರ್ಲಾಯಿನ ಹರಿಕಾಂತ್ ಕಾಸರಗೋಡು ಮೆರ್ನ ಮುತಾಲಿಕೆಡ್ , ಕೇರಳ ರಾಜ್ಯಡ್ ತುಳು ಬಾಷೆನ್ ಅಧಿಕೃತ ಭಾಷೆಯಾದ್ ಮಲ್ಪುನ ಬೇಡಿಕೆನ್ ಸರಕಾರದ ಗೇನಗ್ ಕನವೊಡು ಪಂದ್ ಶಾಸಕೆರ್ನ ಕಚೇರಿಗ್ ಭೇಟಿ ಕೊರ್ದು ಬಿನ್ನಾಪು ಮಲ್ದೆರ್.

ದಾಖಲೆದ ಒಟ್ಟುಗು ಉಪ್ಪುನ ಬಿನ್ನಾಪುನು ಮಂಜೇಶ್ವರ ಶಾಸಕ ಎ ಕೆ ಎಂ ಅಶ್ರಫ್ ಬೊಕ್ಕ ಕ್ಷೇತ್ರದ ಪ್ರಸ್ತುತ ಶಾಸಕೆರಾಯಿನ ಸಿ ಯೆಚ್ ಕುಂಞಂಬು ಮೆರೆಗ್ ಕೊರಿಯೆರ್.

ಈ ಪೊರ್ತುಡು ಜೈ ತುಳುನಾಡ್ ಕಾಸರಗೋಡು ಘಟಕದ ಗುರ್ಕಾರ್ಲಾಯಿನ ಹರಿಕಾಂತ್ ಕಾಸರಗೋಡು, ಕಾರ್ಯದರ್ಶಿ ಕಾರ್ತಿಕ್ಕೋ ಪೆರ್ಲ, ಕೋಶಾಧಿಕಾರಿ ಪ್ರಶಾಂತ್ ರೈ ಬಂದಡ್ಕ, ಮುಖ್ಯ ಸಂಚಾಲಕ ಪ್ರವೀಶ್ ಕುಲಾಲ್ ಬೊಕ್ಕ ಸದಸ್ಯ ದೇವಿಪ್ರಸಾದ್ ರೈ ಪಾಲ್ ಪಡೆದಿತ್ತೆರ್ .

ಜೈ ತುಳುನಾಡ್ (ರಿ) ಕಾಸರಗೋಡು ಸಂಘಟನೆದ ವತಿರ್ದ್ ಆನ್ ಲೈನ್ಡೇ ಪತ್ತನಾಜೆ ಕೂಟ ಅಟ್ಟನೆ

ಕಾಸ್ರೋಡು, ಮೇ 25 : ಜೈ ತುಳುನಾಡ್ (ರಿ) ಸಂಘಟನೆದ ಕಾಸರಗೋಡು ಘಟಕದ ಮುತಾಲಿಕೆಡ್ ಪತ್ತನಾಜೆದ ಪತ್ತೆರಿ ಕೂಟ ಲಾಕ್ ಡೌನ್ ದ ನಡುಟುಲಾ ಆನ್‌ಲೈನ್ ಡೇ ನಡತುಂಡು.

ತುಳುನಾಡ್ ದ ಆಚಾರ ಇಚಾರ, ಲಿಪಿ, ಸಂಸ್ಕೃತಿ ಬೊಕ್ಕ  ಒರಿಪಾದ್ ಬುಲೆಪಾವುನ ಜವಾಬ್ದಾರಿಯುತ ಬೇಲೆನ್ ನಿಸ್ವಾರ್ಥವಾದ್ ಜವಣ್ಯೇರ್ನ ಅಂಚನೆ ಪೆರಿಯೇರ್ನ ಕೂಟ ಬಾರಿ ಒಗ್ಗಟ್ ಡ್ ಮಲ್ತೊಂದು ಉಲ್ಲೆರ್.ಐತ ಒಟ್ಟುಗು ತುಳುನಾಡ್ ಡ್ ಮಾಜೊಂದು ಉಪ್ಪುನ ಪರ್ಬಲೆನ್ ಯುವ ಪೀಳಿಗೆಗ್ ಗೊತ್ತು ಮಲ್ಪಾವುನ ಪ್ರಯತ್ನನ್ ಸಾರ್ವಜನಿಕವಾದ್ ಮಲ್ತೊಂದು ಉಲ್ಲೆರ್ . ಅಂಚನೆ ತುಳುನಾಡ್ ದ ವಿಶೇಷ ದಿನಟ್ ಒಂಜಾಯಿನ ಪತ್ತನಾಜೆನ್ಲ ಗಣ್ಯರ ಸಮ್ಮುಖಡ್ , ಲಾಕ್ ಡೌನ್ ನಡುಟುಲಾ ಗೂಗಲ್ ಮೀಟ್ ಪನ್ಪಿನ ಆನ್‌ಲೈನ್ ವೇದಿಕೆಡ್ ಬಾರಿ ಗೌಜಿ ಡ್ ಪತ್ತನಾಜೆದ ಪತ್ತೆರಿ ಕೂಟನ್ ಆಚರಣೆ ಮಲ್ತೆರ್ . ಲೇಸ್ ದ ಗುರ್ಕಾರ್ಮೆನ್ ಘಟಕದ ಗುರ್ಕಾರ್ಲಾಯಿನ ಹರಿಕಾಂತ್ ಕಾಸರಗೋಡು ವಯಿಸ್ದ್ ಇತ್ತೆರ್ .

ಪೆರಿಯ ಪತ್ರಕರ್ತ, ಸಹಕಾರಿ ದುರೀಣೆರ್ ತುಳು ಸಾಹಿತಿಲೂ ಆಯಿನ ಬಿ.ಪಿ. ಶೇಣಿ ಮೆರ್ ಪತ್ತನಾಜೆದ ಬಗ್ಗೆ ಮಾಹಿತಿ ಕೊರಿಯೆರ್ . ಘಟಕದ ಗೌರವಾಧ್ಯಕ್ಷೇರಾಯಿನ ಉಮೇಶ್ ಸಾಲಿಯಾನ್, ಘಟಕದ ಜೊತೆಕಾರ್ಯದರ್ಶಿ, ತುಳು ಸಾಹಿತಿ ಶ್ರೀನಿವಾಸ ಆಳ್ವ ಕಳತ್ತೂರು, ವಿಕಿಪೀಡಿಯ ಸಂಪಾದಕಿ ಬೊಕ್ಕ ಘಟಕದ ಉಪಾಧ್ಯಕ್ಷೆ ವಿನೋದ ಪ್ರಸಾದ್ ರೈ ಕಾರಿಂಜೆ ಅಂಚನೆ ತುಳು ಸಾಹಿತಿ, ಘಟಕದ ಸದಸ್ಯೆ ರಾಜಶ್ರೀ ಟಿ ರೈ ಪೆರ್ಲ ಪಾಲ್ ಪಡೆದಿತ್ತೆರ್.

ಊರು ಪರವೂರುರ್ದು ಆನ್ ಲೈನ್ ಮುಖೇನ ಪಾಲ್ ಪಡೆಯಿನ ಗಣ್ಯೆರ್ , ಅಭಿಮಾನಿಲು ಇಂಚಿನ ಲೇಸುಲು ನನಾತ್ ಸಂಘಟನೆ ಮುಖೇನ ನಡಪಾವಡ್ ಪಂದ್ ಎಡ್ಡೆಪ್ಪುನು ಬಯಕಿಯೆರ್.

ಲೇಸ್ ದ ನಿರೂಪಣೆನ್ ಘಟಕದ ಕಾರ್ಯದರ್ಶಿ ಕಾರ್ತಿಕ್ ಮಲ್ತೆರ್ ಅಂಚನೆ ಸದಸ್ಯೆ ಕುಶಾಲಾಕ್ಷಿ ವಿ ಕುಲಾಲ್ ಕಣ್ವತೀರ್ಥ ಸೊಲ್ಮೆ ಸಂದೈತ ಮಲ್ತೆರ್.

ಡಿವೈಎಫ್‌ಐ ಸಂಘಟನೆದ ವತಿರ್ದ್ ನೆತ್ತೆರ್ ದಾನ ಶಿಬಿರ

ಕುಡ್ಲ , ಮೇ 19: ಕೋವಿಡ್‌ಗ್ ಸಂಬಂಧ ಪಟ್ಟಿನoಚ ಡಿವೈಎಫ್‌ಐ ಸಂಘಟನೆದ ಹೆಲ್ಪ್ಲೈನ್ ಕೆಲವು ದಿನರ್ದ್ ನಿರಂತರವಾದ್ ಬೇಲೆ ಮಲ್ತೊಂದು ಉಪ್ಪುನ ನಡುಟುಲಾಸೋಮವಾರ ಡಿವೈಎಫ್‌ಐ ಕಾರ್ಯoತೆರ್ ಬೆಂಗರೆ ಪ್ರದೇಶಡ್ ಇಂಡಿಯನ್ ರೆಡ್‌ಕ್ರಾಸ್ ಬ್ಲಡ್ ಬ್ಯಾಂಕ್‌ಡ್ ನೆತ್ತೆರ್ ದಾನ ಮಲ್ತೆರ್.

ಈ ಪೊರ್ತುಡು ಡಿವೈಎಫ್‌ಐ ರಾಜ್ಯಾಧ್ಯಕ್ಷ ಮುನೀರ್ ಕಾಟಿಪಳ್ಳ, ಸಹಾಯವಾಣಿ ಮುತಾಲಿಕೆ ವಾಯಿಸೊಂಡಿನ ಡಿವೈಎಫ್‌ಐ ದ.ಕ. ಜಿಲ್ಲಾ ಕಾರ್ಯದರ್ಶಿ ಸಂತೋಷ್ ಬಜಾಲ್, ನಗರಾದ್ಯಕ್ಷ ನವೀನ್ ಕೊಂಚಾಡಿ, ನೌಶಾದ್ ಬೆಂಗರೆ, ರಿಯಾಝ್ ಬೆಂಗರೆ, ಬಿಲಾಲ್ ಬೆಂಗರೆ, ಅಸ್ಲಂ, ಮುಹಾಬ್ ಪಾಲ್ ಪಡೆದ್ ಇತ್ತೆರ್.