ವ್ಯಾಕ್ಸಿನ್

ಕೋವಿಡ್ ವ್ಯಾಕ್ಸಿನ್ ದ ವಿಷಯೊಡು ಜನೊಕ್ಲೆಗ್ ಸರಿ ಮಾಹಿತಿ ಕೊರ್ಲೆ : ಉಮಾನಾಥ ಕೊಟ್ಯಾನ್

ಮೂಲ್ಕಿ:ಸರ್ಕಾರಿ ಆಸ್ಪತ್ರೆಡ್ ಕೋವಿಡ್ ವ್ಯಾಕ್ಸಿನ್ ಬೊಕ್ಕ ಆರೋಗ್ಯ ತಪಾಸಣೆಗ್ ಬರ್ಪಿನಕ್ಲೆಗ್ ಸರಿ ಆಯಿನ ಮಾಹಿತಿನ್ ಡಾಕ್ಟರ್ ನಕುಲು ಬೊಕ್ಕ ಆರೋಗ್ಯ ಸಹಾಯಕಿಯೆರ್ ಕೊರೊಡು. ಸುರುಟ್ಟೇ ಪೋಡ್ಯೊಂದು ಬರ್ಪಿನ ಜನೊಕ್ಲೆನ್ ಎಚ್ಚ ಪೊರ್ತು ಕಾಪಾವೊಡ್ಚಿ ಪಂಡ್ ದ್ ಶಾಸಕೆರ್ ಉಮಾನಾಥ ಕೊಟ್ಯಾನ್ ಪಂಡೆರ್.
ಆರ್ ಮೂಲ್ಕಿ ಸರ್ಕಾರಿ ಆಸ್ಪತ್ರೆಗೆ ಶುಕ್ರಾರ ಭೇಟಿ ಕೊರ್ದು ಪರಿಶೀಲನೆ ಮಲ್ತ್ ದ್ ವೈದ್ಯಾಧಿಕಾರಿಲೆಗ್ ಮಾರ್ಗದರ್ಶನ ಕೊರಿಯೆರ್.
ಕೋವಿಡ್ ವ್ಯಾಕ್ಸಿನ್‌ಗಾದ್ ಸಾಲ್ ಉಂತುದಿನ ಜನೊಕ್ಲೆಡ ಶಾಸಕೆರ್ ಮಾಹಿತಿ ದೆತೊನಿ ಬೊಕ್ಕ ಮಾಧ್ಯಮದಕಲ್ಡ ಪಾತೆರ್ದ್ , ಮೂಲ್ಕಿ ಬೊಕ್ಕ ಬೆದ್ರ ಕೇಂದ್ರೊಲೆಗ್ ಜಿಲ್ಲಾಧಿಕಾರಿಲೆನ ಒರುಟ್ಟು ತಲಾ ಒಂಜಿ ವೆಂಟಿಲೇಟರ್‌ ಕೊರ್ತುಂಡು. ಆಸ್ಪತ್ರೆಗೆ ಬೋಡಾಯಿನ ಆಕ್ಸಿಜನ್ ವ್ಯವಸ್ಥೆ ಮಲ್ಪಾದ್ಂಡ್ ಪಂಡೆರ್ .

ವೈದ್ಯಾಧಿಕಾರಿ ಡಾ. ಕೃಷ್ಣ, ಮೂಲ್ಕಿ ಪಟ್ಟಣ ಪಂಚಾಯಿತಿ ಅಧ್ಯಕ್ಷೆರ್ ಸುಭಾಷ್ ಶೆಟ್ಟಿ, ಉಪಾಧ್ಯಕ್ಷೆರ್ ಸತೀಶ್ ಅಂಚನ್, ಸ್ಥಾಯಿ ಸಮಿತಿ ಅಧ್ಯಕ್ಷೆರ್ ಶೈಲೇಶ್‌ಕುಮಾರ್, ಮಾಜಿ ಅಧ್ಯಕ್ಷೆರ್ ಸುನಿಲ್ ಆಳ್ವ, ಉಮೇಶ್ ಮಾನಂಪಾಡಿ, ಹರಿಶ್ಚಂದ್ರ ಕೋಟ್ಯಾನ್ ಮೊಕುಲು ಮಾತ ಇತ್ತೆರ್.