ತುಳು

ತೋಕೂರು ಶಾಲೆದ ತೋಟೊಡು ಶ್ರಮದಾನ

ಹಳೆಯಂಗಡಿ: ಶ್ರೀ ಸುಬ್ರಹ್ಮಣ್ಯ ಮಹಾಗಣಪತಿ ಸ್ಪೋರ್ಟ್ಸ್ ಕ್ಲಬ್( ರಿ) ತೋಕೂರು ಆಶ್ರಯೊಡು ತೋಕೂರುದ ಹಿಂದೂಸ್ಥಾನಿ ಶಾಲೆದ ತೋಟೊಡು ಐತಾರದಾನಿ ಶ್ರಮದಾನದ ಒರುಟ್ಟು ಸ್ವಚ್ಛತೆದ ಕೆಲಸ ನಡತ್ಂಡ್.

ಕ್ಲಬ್ ದ ಗೌರವ ಮಾರ್ಗದರ್ಶಕೆರ್ ಅಂಚೆನೆ ಬೊಂಬೈ ತಿಲಕ್ ನಗರದ ಪೆಸ್ತಮ್ ಸಾಗರ್ ಕರ್ನಾಟಕ ಸಂಘ ಉಂದೆತ್ತ ಅಧ್ಯಕ್ಷೆರ್ ಆದುಪ್ಪುನ ರಾಮಣ್ಣ ದೇವಾಡಿಗ ಮೇರ್ ಶಾಲೆದ ಎದುರು ನಡ್ತಿನ ಪೂತ್ತ ದೈಕುಲೆನ ಕಟ್ಟೆ ಬುಡ್ಪಾದ್ ಗೊಬ್ಬರ ಪಾಡ್ದ್ ಶ್ರಮದಾನೊಗು ಚಾಲನೆ ಕೊರಿಯೆರ್.

ಪಡುಪಣಂಬೂರು ಗ್ರಾಮ ಪಂಚಾಯ್ತಿ ಸದಸ್ಯೆರ್ ಸಂತೋಷ್ ಕುಮಾರ್, ಕ್ಲಬ್ ದ ಗೌರವ ಮಾರ್ಗದರ್ಶಕೆರ್ ರಮೇಶ್ ಅಮೀನ್ , ಮುಂಬೈ, ಗೌರವ ಗುರ್ಕಾರ್ಲು ನಾರಾಯಣ್ ಜಿ.ಕೆ., ಗುರ್ಕಾರ್ಲು ಸಂತೋಷ್ ದೇವಾಡಿಗ, ಒತ್ತು ಗುರ್ಕಾರ್ಲು ದೀಪಕ್ ಸುವರ್ಣ, ಕಾರ್ಯಾಧ್ಯಕ್ಷೆರ್ ಸುರೇಶ್ ಶೆಟ್ಟಿ, ಮಲ್ಲ ಕಾರ್ಯಂತೆರ್ ಜಗದೀಶ್ ಕುಲಾಲ್, ಪಣವುದ ಪಾಲವೆರ್ ಸಂಪತ್ ದೇವಾಡಿಗ, ಪರಿಸರ ರಕ್ಷಣೆ ಕಾರ್ಯಂತೆರ್ ಸುನಿಲ್ ದೇವಾಡಿಗ,ಕ್ರಿಕೆಟ್ ಕೂಟ ದ ನಾಯಕೆ ಗೌತಮ್ ಬೆಲ್ಚಡ, ಸದಸ್ಯೆರ್ ಪದ್ಮನಾಭ ಶೆಟ್ಟಿ, ವಿಜಯ ಕುಮಾರ್, ಧರ್ಮಾನಂದ ಶೆಟ್ಟಿಗಾರ್, ರಮೇಶ್ ಕರ್ಕೇರ, ಸೋಮನಾಥ ಪೂಜಾರಿ, ಕಾರ್ತಿಕ್ ಭಟ್ ಮೊಕುಲು ಮಾತ ಶ್ರಮದಾನೊಡು ಪಾಲ್ ಪಡೆಯೆರ್.
ಗಣೇಶ್ ಅಮೀನ್ ಮೇರ್ ಕೊರ್ತಿನ ಕಿದೆ ಗೊಬ್ಬರೊನು ತಾರೆದ ಬೊಕ್ಕ ಪೂತ್ತ ದೈಕ್ ಲೆನ ಮುದೆಲೆಗ್ ಪಾಡ್ದ್, ಕಜವು, ಪ್ಲಾಸ್ಟಿಕ್ ದೆತ್ತ್ ದ್ ಪರಿಸರ ಸ್ವಚ್ಚತೆಡ್ ಮಾತೆರ್ಲ ಪಾಲ್ ಪಡೆಯೆರ್.

ಹವಾಮಾನ ವರದಿ : ಕುಡ್ಲಡ್ ರೆಡ್ ಅಲರ್ಟ್

ಬೆಂಗ್ಳೂರು, ಜೂನ್ 5: ನೈರುತ್ಯ ಮುಂಗಾರು ಕರ್ನಾಟಕನ್ ಪ್ರವೇಶ ಮಲ್ದುಂಡು . ಅಂಚಾದ್ ಇನಿರ್ದ್ ಬರ್ಸ ಜೋರಾಪಿನ ಸಾಧ್ಯತೆ ಉಂಡು , ಮಲೆನಾಡು, ಕರಾವಳಿ, ದಕ್ಷಿಣ ಒಳನಾಡ್ ಡ್ ಅಧಿಕ ಪ್ರಮಾಣದ ಬರ್ಸ ನಿರೀಕ್ಷೆ ಮಲ್ದೆರ್ . ಕರಾವಳಿ ಜಿಲ್ಲೆ ಆಯಿನ ದಕ್ಷಿಣ ಕನ್ನಡ, ಉಡುಪಿ, ಉತ್ತರ ಕನ್ನಡಡ್ ಇನಿ ರೆಡ್ ಅಲರ್ಟ್​ ಘೋಷಣೆ ಮಲ್ದೆರ್.

ಯುವ ಹಾಸ್ಯ ಕಲಾವಿದೆ ಅಕ್ಷಯ್ ಸರಿಪಳ್ಳ

ಕತ್ತಲಾವಂದೆ ನಕ್ಷತ್ರ ತೂಯೆರೆ ಸಾಧ್ಯ ಇಜ್ಜಿ, ಕಷ್ಟ ಇಜ್ಜಂದೆ ಜೀವನ ನಡಪುಜಿ. ಕಲ್ಲ್ ಮುಳ್ಳುದ ನಡುಟುಲಾ ಜೀವನದ ತೇರ್ ಸಾಗೆರೆ ಸಾರ ಮುಳ್ಳು ಇತ್ತ್oಡಲಾ ಐತ ನಡುಟು ಗುಲಾಬಿ ಪುರ್ಪದಲಕ ಮೆನ್ಕೊಡು ಅವ್ವೆ ನಿಜವಾಯಿನ ಸಾಧನೆ . ಕಷ್ಟನೇ ಬರಡ್ ಸುಖನೆ ಉಪ್ಪಡ್ ಈ ರಡ್ಡ್ ಸನ್ನಿವೇಶಡ್ ಲಾ ತಾನ್ ತೆಲ್ತೊಂದು ನನೊರಿಯನ್ ತೆಲ್ಪಾವೊಂದು ಜೀವನ ಸಾಗವುನನೇ ನಿಜವಾಯಿನ ಕಲಾವಿದನ ಬದ್ಕ್. ಅಂಚಿನ ಕಲಾವಿದೆರ್ ನೆಟ್ಟ್ ನಮ್ಮ ಕುಡ್ಲದ ಪೆರ್ಮೆದ ಮಗೆ ಅಕ್ಷಯ್ ಸರಿಪಳ್ಳ ಲಾ ಒರಿಯೇ.ಕಲ್ಲ್ ನ್ ಕೆತ್ತ್oಡ ಮಾತ್ರ ಅವು ಶಿಲ್ಪ ಆಪುಂಡು ಐಕೊಂಜಿ ರೂಪ ತಿಕ್ಕುಂಡು ಅಂಚನೇ ಕಷ್ಟನ್ ಮಾತಾ ಮೀರ್ದ್ ಉಂತುದು ಬಾರಿ ಮಲ್ಲ ಕನ ಕಟ್ಟ್oಡ ಮಾತ್ರ ಅವು ನಿಜ ರೂಪ ಪಡೆದ್ ಸಾಧನೆ ಮಲ್ಪರೆ ತಾದಿ ಆಪುಂಡು.ಇಂಚಿನ ಸಾಧನೆದ ತಾದಿಡ್ ನಡತೊಂದು ಉಪ್ಪುನ ನಮ್ಮ ಪೆರ್ಮೆದ ಕಲಾವಿದೆ ಮೇರ್.

ಬಾಲಕೃಷ್ಣ ಬೊಕ್ಕ ಜಯಲಕ್ಷ್ಮಿ ದಂಪತಿಲೆನ ಮಗೆ ಆಯಿನ ಅಕ್ಷಯ್ ಸರಿಪಳ್ಳ ಯಕ್ಷಗಾನದ ಹಾಸ್ಯ ಕಲಾವಿದೆ ಆಯಿನ ಅಮ್ಮೆರ್ನ ಸ್ಫೂರ್ತಿಡ್ ಅರೆನ ಸಾಕಾರಡ್ ತನ್ನ ಕಿನ್ಯ ಪ್ರಯೋಡೆ ಕಲಾವಿದೆ ಆವೊಡು ಪನ್ಪಿನ ಅಂಗಲ್ಪು ದೀಯೊಂದು ತನ್ನ ಅಮ್ಮೆರ್ ದೀನ ಪಜ್ಜೆನ್ ತಾನ್ಲಾ ಇಲ್ಲಡ್ ಕಲ್ತೊಂದು ತುಳಸಿಜಲಂಧರ ಪನ್ಪಿನ ಯಕ್ಷಗಾನ ಪ್ರಸಂಗಡ್ ಜಲಂಧರನ ಪಾತ್ರ ಮಲ್ದಿನ ಮೆರೆಗ್ ರಂಗಚಾವಡಿಗ್ ಪಜ್ಜೆ ದೀಪಿನ ಆಸಕ್ತಿ ಎಚ್ಚ ಆಂಡ್.

ತನ್ನ ಪ್ರಾಥಮಿಕ ಶಿಕ್ಷಣ ಮಲ್ತೊಂದು ಉಪ್ಪುನಗನೇ ಕಿನ್ಯ ಕಿನ್ಯ ನಾಟಕ ಮಲ್ತೊಂದು ಬತ್ತಿನ ಮೆರೆಗ್ ಶಾಲಾ ಪೊರ್ತುಡು ನಾಟಕ ಕಲ್ಪಾಯೆರೆ ಪಂದೆ ಗುರುಕುಲು ಇತ್ತ್ಜೆರ್ ತಂಕ್ ತೆರಿನ ಇಚಾರೋನು ಜೋಕುಲು ಒಟ್ಟು ಸೇರೊಂದು ಮಲ್ತೊಂದು ಇತ್ತೆರ್. ಇಂಚನೇ ನಾಟಕ ಕ್ಷೇತ್ರಡ್ ನನಾತ್ ಆಸಕ್ತಿ ಜಾಸ್ತಿ ಆಯಿನ ಮೆರೆಗ್ ಊರುದ ಜಾತ್ರೆ ದ ಪೊರ್ತುಡು ಅಭಿನಯ ಮಲ್ಪರೆ ಅವಕಾಶ ತಿಕ್ಕ್oಡ್. ಸ್ವತಂತ್ರ ದಪಗ ವರ್ಷಲಾ ಪ್ರಶಾಂತ್ ಅಂಚನ್ ಯೆಯ್ಯಾಡಿ ಮೆರ್ನ ನಿರ್ದೇಶನಡ್ ನಡಪಾವೊಂದು ಇತ್ತಿನ ನಾಟಕಡ್ ಪಾಲ್ ಪಡೆಯುನ ಅವಕಾಶ ಮೆರೆಗ್ ತಿಕ್ಕoಡ್.ಇಂಚ ತನ್ನ ಶಾಲಾ ಕಾಲೇಜ್ ಕಲ್ಪುನ ಪೊರ್ತುಡು ಮಲ್ತಿನ ನಾಟಕ ಮೆರೆಗ್ ದುಂಬು ಪಜ್ಜೆ ದೀಯೆರೆ ನನಾತ್ ಸ್ಫೂರ್ತಿ ಆಂಡ್. ಅಂಚನೇ ತನ್ನ ಪದವಿ ಶಿಕ್ಷಣಡ್ ಸತೀಶ್ ನಿನಾಸಂ ಮೇರ್ ನಿರ್ದೇಶನ ಮಲ್ತಿನ ರಾಜ್ಯ ಮಟ್ಟಡ್ ಪಾಲ್ ಪಡೆಯಿನ ” ಮದರ್ ಕರೇಜ್” ಪನ್ಪಿನ ನಾಟಕಡ್ಲಾ ಅಕ್ಷಯ್ ಪಾಲ್ ಪಡೆದಿತ್ತೆರ್. ತನ್ನನೇ ಆಯಿನ ಕೂಟ ಕಟ್ಟೊಂದು ಪ್ರತಿ ಕಾಲೇಜ್ ಡ್ ನಡಪುನ ನಾಟಕ ಪಂಥೋಡು ಪಾಲ್ ಪಡೆಯೊಂದು ತನ್ನನೇ ವಿದ್ಯಾ ಸಂಸ್ಥೆಡ್ ನಡಪುನ ನಾಟಕೋತ್ಸವಡ್ ” ಇಂಚ ದಾಯೆ ” ಪನ್ಪಿನ ನಾಟಕಡ್ ಪಾಲ್ ಪಡೆಯಿನ ಪುಗಾರ್ತೆ ಮೆರೆಗ್ ಉಂಡು.

ತಾನ್ ಕಡೆತ ವರ್ಷದ ಪದವಿ ವ್ಯಾಸಂಗ ಮಲ್ಪುನಗ “ಬಲೆ ತೆಲಿಪಾಲೆ ” ಬೊಕ್ಕ ” V4 ನ್ಯೂಸ್ ಕಾಮಿಡಿ ಪ್ರೇಮಿಯರ್ ಲೀಗ್ ಡ್ ಪಾಲ್ ಪಡೆಯುನ ಅವಕಾಶ ಮೆರೆಗ್ ತಿಕ್ಕoಡ್. ಬಲೆ ತೆಲಿಪಾಲೆದ ಕಡೆತ ಸುತ್ತುಡು ಮೂಜನೆ ಇನಾಮು ಗೆಂದಿನ ಪೆರ್ಮೆ ಮೆರ್ನವು. ಅಂಚನೇ ಸಿಪಿಎಲ್ ರಡ್ಡ್ನೇ ಸುತ್ತುಡು ರಾಜಶ್ರೀ ಕುಡ್ಲ ತಂಡದ ” ಮ್ಯಾನ್ ಆಫ್ ದ ಮ್ಯಾಚ್ ” ಪನ್ಪಿನ ಮಾನದಿಗೆಲಾ ಮೆರೆಗ್ ಬೈದುಂಡು. ಇತ್ತೇ ಕುಡ್ಲದ ಪುಗಾರ್ತೆದ ಕೂಟ ಆಯಿನ ” ಶಾರದಾ ಆರ್ಟ್ಸ್ ಐಸಿರಿ ” ಕೂಟಡ್ ” ಮಲ್ಲ ಸಂಗತಿಯೇ ಅತ್ತ್ ಪನ್ಪಿ ನಾಟಕಡ್ ಅಭಿನಯ ಮಲ್ತೊಂದು ಉಪ್ಪುನ ಪುಗಾರ್ತೆ ಮೆರೆಗ್ ಉಂಡು.

ಪರಿಶ್ರಮ ಇತ್ತ್oಡ ಮಾತ್ರ ಪೊಸ ಅಧ್ಯಾಯ ಸುರು ಆಯೆರೆ ಸಾಧ್ಯ ನೆಕ್ಕ್ ಮಾಮಲ್ಲ ಉದಾರ್ಮೆ ಅಕ್ಷಯ್ ಸರಿಪಳ್ಳ ಪಂಡ ತಪ್ಪಾವಂದ್. ” ಬೇನೆ ಶಾಶ್ವತ ಅತ್ತ್ ಅವೆನ್ ಎದುರಿಸಾದ್ ದುಂಬರಿಯೊಡು, ಖುಷಿ ಪರ್ಬದಲಕ ಬತ್ತಿನ ಕ್ಷಣಕ್ಲೆನ್ ಅನುಭವಿಸಾವೊಡು ಪನ್ಪಿ ಪಾತೆರ ಪನೊಂದು. ಸಾಧನೆದ ಶಿಖರ ಏರಿನ ಇರೆನ ತಾದಿ ಸುಖಕರವಾದ್ ಉಪ್ಪಡ್ ಪನೊಂದು, ಈ ನಮ್ಮ ಪೆರ್ಮೆದ ಕಲಾವಿದನ ಸಾಧನೆ ನನಾತ್ ಮಿನ್ಕಡ್, ಕಲಾಮಾತೆನ ಸೇವೆ ಮಲ್ಪರೆ ಅಪ್ಪೆ ಇರೆಗ್ ಏಪೊಗ್ಲಾ ಬೆರಿಸಹಾಯ ಕೊರಡ್ ಪನ್ಪಿನವು ನಮ್ಮ ಆಶಯ.

✍️ಶ್ರೀನಿಧಿ ಶೆಟ್ಟಿ

ತುಳು ಭಾಷೆನ್ ರಾಜ್ಯ ಭಾಷೆಯಾದ್ ಗುರ್ತಿಸಾವಾಡ್ : ಡಿ. ವಿ ಸದಾನಂದ ಗೌಡ

ಮುಡಿಪು, ಮೇ 31: ‘ಜಾಗತೀಕರಣದ ಪ್ರಭಾವರ್ದ್ ತುಳು ಸೇರಿನoಚ ಅವ್ವೆತೋ ಭಾಷೆ ಅಳಿಯೊಂದು ಉಂಡು. ಭಾಷೆದ ಅಳಿವು- ಉಳಿವು ಅವೆನ್ ಗಳಸುನಕ್ಲೆನ ಕೈಟ್ ಉಂಡು. ತುಳು ಭಾಷೆದ ಮೂಲಸತ್ವನ್ ನಮ ಮಾತಾ ಸೇರ್ದ್ ಒರಿಪಾವೊಡು ಪಂದ್ ಕೇಂದ್ರ ರಾಸಾಯನಿಕ ಬೊಕ್ಕ ರಸಗೊಬ್ಬರ ಖಾತೆ ಸಚಿವ ಡಿ.ವಿ. ಸದಾನಂದ ಗೌಡ ಪಂಡೆರ್ .

ವಿಶ್ವವಿದ್ಯಾಲಯ ಸಂಧ್ಯಾ ಕಾಲೇಜು, ತುಳು ಸ್ನಾತಕೋತ್ತರ ಅಧ್ಯಯನ ವಿಭಾಗ ಬೊಕ್ಕ ಶ್ರೀ ಧರ್ಮಸ್ಥಳ ಮಂಜುನಾಥೇಶ್ವರ ತುಳು ಪೀಠದ ಒಟ್ಟು ಸೇರಿಗೆಡ್ ನಡತೊಂದು ಉಪ್ಪುನ ತುಳು ಉಪನ್ಯಾಸ ಮಾಲಿಕೆದ ವರ್ಷಾಚರಣೆದ ಪ್ರಯುಕ್ತ ಶನಿವಾರ ಆನ್‌ಲೈನ್‌ ವೇದಿಕೆಡ್ ನಡತಿನ 52ನೇ ಸಂಚಿಕೆಡ್ ಮಲ್ಲ ಬಿನ್ನೆರ್ ಆದ್ ಪಾತೆರಿಯೆರ್.

ತುಳು ವೆಬಿನಾರ್ ಉಪನ್ಯಾಸ ಮಾಲಿಕೆ

ಕುಡ್ಲ ,ಮೇ 28: ಕುಡ್ಲ ವಿಶ್ವವಿದ್ಯಾನಿಲಯ ಸಂಧ್ಯಾ ಕಾಲೇಜು ತುಳು ಸ್ನಾತಕೋತ್ತರ ಅಧ್ಯಯನ ವಿಭಾಗ ಬೊಕ್ಕ ಶ್ರೀ ಧರ್ಮಸ್ಥಳ ಮಂಜುನಾಥೇಶ್ವರ ತುಳು ಪೀಠದ ಒಟ್ಟು ಸೇರಿಗೆಡ್ ಪ್ರತಿ ಶನಿವಾರ ನಡತೊಂದು ಉಪ್ಪುನ ಉಪನ್ಯಾಸ ಮಾಲಿಕೆ ಒಂಜಿ ವರ್ಷ ಆತುಂಡು . ನಿರಂತರವಾದ್ 51 ವಾರ ನಡತಿನ ವೆಬಿನಾರ್ , 52ನೇ ಸಂಚಿಕೆ ಮೇ 29 ತಾರೀಖ್ ಗ್ ಬೈಯ್ಯಗ್ 5 ಗಂಟೆಗ್ ಝೂಮ್ ಆಯಪ್‌ಡ್ ನಡಪರೇ ಉಂಡು.

ಮಲ್ಲ ಬಿನ್ನೆರ್ ಆದ್ ಕೇಂದ್ರ ಸಚಿವ ಡಿ.ವಿ.ಸದಾನಂದ ಗೌಡ ಪಾಲ್ ಪಡೆಯರೇ ಉಲ್ಲೆರ್ , ಪತ್ರಕರ್ತೆ ವಿಜಯಲಕ್ಷ್ಮಿ ಶಿಬರೂರು ಉಪನ್ಯಾಸ ಕೊರಿಯರೆ ಉಲ್ಲೆರ್ . ಕುಡ್ಲ ವಿ.ವಿ. ಕುಲಪತಿ ಪ್ರೊ.ಪಿ.ಎಸ್. ಯಡಿಪಡಿತ್ತಾಯ ಗುರ್ಕಾರ್ಮೆ ವಯಿಸೆರೆ ಉಲ್ಲೆರ್ ಪಂದ್ ಪ್ರಕಟನೆಡ್ ತೆರಿಪಾದೆರ್ .