ಕುಡ್ಲ

ಪೆಜಮಾಡಿ ಮಹಿಳಾ ಮಂಡಳಿರ್ದ್ ಗೌಜಿದ ‘ಅಟಿಡೊಂಜಿ ದಿನ’ ಆಚರಣೆ

ತುಳುನಾಡ್ ದ ಸಂಸ್ಕೃತಿ, ಪರಂಪರೆ, ಪೊಂಜೋವುಲೆನ ಪಾತ್ರನ್ ನನದ ಪೀಳಿಗೆಗ್ ಎತ್ತಾವೊಡು: ಶಿಕ್ಷಕಿ ರೇಣುಕಾ ಪೂಜಾರಿ ಪುತ್ತೂರ್

ಪೆಜಮಾಡಿ : ಪೆಜಮಾಡಿ ಮಹಿಳಾ ಮಂಡಳಿ ಬಿಲ್ಲವರ ಸಂಘದ ಮುತಾಲಿಕೆಡ್ ಬಿಲ್ಲವರ ಸಭಾಭವನಡ್ ಗೌಜಿ ಬೊಕ್ಕ ಸಾಂಪ್ರದಾಯಿಕ ವೈಭವದ “ಆಟಿಡೊಂಜಿ ದಿನ” ಲೇಸ್ ನಡತ್ಂಡ್.

ಲೇಸ್ ಡ್ ಸಂಪನ್ಮೂಲ ವ್ಯಕ್ತಿಯಾದ್ ಪಾಲ್ ಪಡೆಯಿನ ಶಿಕ್ಷಕಿ, ಪುಗರ್ತೆದ ನಿರೂಪಕಿ ರೇಣುಕಾ ಪೂಜಾರಿ ಪುತ್ತೂರ್ ಪಾತೆರ್ದ್, “ಆಟಿ ತಿಂಗೊಲ್ ತುಳುನಾಡ್ ದ ಸಂಸ್ಕೃತಿ, ಪ್ರಕೃತಿ ಬೊಕ್ಕ ಜೀವನಶೈಲಿದೊಟ್ಟಿಗೆ ಬೆರೆತ್ ಪೊಯಿನ ಅಮೂಲ್ಯ ಪರಂಪರೆ ಆತ್ಂಡ್. ನಮ್ಮ ಹಿರಿಯೆರ್ ಅನುಸರಿಸಾವೊಂದು ಬತ್ತಿನ ಆಚಾರ-ವಿಚಾರಲು, ಆರೋಗ್ಯಪೂರ್ಣ ಆಹಾರ ಪದ್ಧತಿ, ಔಷಧೀಯ ಗುಣ ಇಪ್ಪುನ ಆಟಿ ತಿಂಗೊಲ್ದ ಇಸೇಸ ಆಹಾರ ಬೊಕ್ಕ ಸಂಸ್ಕೃತಿದ ಮೌಲ್ಯನ್ ಇತ್ತೆದ ಯುವ ಪೀಳಿಗೆಗ್ ಪರಿಚಯ ಮಲ್ಪುನ ಜಬದಾರಿ ನಮ್ಮ ಮಾತೆರ್ನಾಲ‌ ಮಿತ್ತ್ ಉಂಡು. ಇಂಚಿನ ಲೇಸ್ ಕೇವಲ ಆಚರಣೆಗ್ ಮಾತ್ರ ಅತ್ತ್, ನಮ್ಮ ಸಂಸ್ಕೃತಿನ್ ಒರಿಪಾದ್ ಬುಲೆಪಾವೊಡು. ಪೊಂಜೋವುಲು ನಮ್ಮ ಸಂಸ್ಕೃತಿದ ನಿಜವಾಯಿನ ರಾಯಭಾರಿಲು” ಪಂದ್ ಪಂಡೆರ್.

ಲೇಸ್ ನ್ ಉದಿಪನ ಮಲ್ತಿನ ಪೆಜಮಾಡಿ ಬಿಲ್ಲವರ ಸಂಘದ ಅಧ್ಯಕ್ಷೆರ್ ಮೋಹನ್ ದಾಸ್ ಪೆಜಮಾಡಿ ಪಾತೆರ್ದ್, “ಆಟಿಡೊಂಜಿ ದಿನ ತುಳುನಾಡ್ ದ ಸಂಸ್ಕೃತಿದ ಪ್ರತೀಕ ಆತ್ಂಡ್. ಇಂಚಿನ ಲೇಸ್ ದ ಮುಕೇನ ನಮ್ಮ ಸಂಪ್ರದಾಯ, ಸಂಸ್ಕೃತಿ ಬೊಕ್ಕ ಆಚರಣೆನ್ ನನದ ಪೀಳಿಗೆಗ್ ಪರಿಚಯ ಮಲ್ಪುನ ಬೇಲೆನ್ ಮೆಚ್ಚೊಡಾಯಿನವು. ಮಹಿಳಾ ಮಂಡಳಿದ ಈ ಪ್ರಯತ್ನ ಸಮಾಜಗ್ ಎಡ್ಡೆ ಸಂದೇಶ ಕೊರೊಂದು ಉಂಡು” ಪಂದ್ ಪಂಡೆರ್.

ಲೇಸ್ ದ ಅಧ್ಯಕ್ಷತೆನ್ ಒಯಿಸೊಂದು ಪೆಜಮಾಡಿ ಮಹಿಳಾ ಮಂಡಳಿದ ಅಧ್ಯಕ್ಷೆರ್ ಲಾವಣ್ಯ ಪ್ರಭೋದ್ ಪಾತೆರ್ದ್, “ಪೊಂಜೋವುನಕುಲು‌ ಕುಟುಂಬನ್ ಅತ್ತಂದೆ, ಸಮಾಜದ ಸಂಸ್ಕೃತಿ ಬೊಕ್ಕ ಪರಂಪರೆದ ಸಂರಕ್ಷಕೆರಾತೆರ್. ನಮ್ಮ ಆಚರಣೆ, ಆಹಾರ ಪದ್ಧತಿ, ಜನಪದ ಕಲೆ ಬೊಕ್ಕ ಸಂಸ್ಕೃತಿನ್ ಜೋಕ್ಲೆಗ್ ತೆರಿಪಾವುನ ಜಬದಾರಿ ನಮ್ಮ ಮಾತೆರ್ನಾಲ ಮಿತ್ತ್ ಉಂಡು. ಇಂಚಿನ ಲೇಸ್ ಪೊಂಜೋವುಲೆಗ್ ಒಗ್ಗಟ್ಟ್ ಬುಲೆಪಾವುನೊಟ್ಟಿಗೆ ಸಂಸ್ಕೃತಿದ ಮಿತ್ತ್ ದ ಅಭಿಮಾನನ್ ನನಾತ್ ಎಚ್ಚ ಮಲ್ಪೊಂಡು” ಪಂದ್ ಪಂಡೆರ್.

ಲೇಸ್ ದ ಲೆಕ್ಕೊಡು ಅಟಿ ತಿಂಗೊಲ್ ಗ್ ಸಂಬಂಧಪಟ್ಟಿನ ಬೇತೆ ಬೇತೆ ಸಾಂಪ್ರದಾಯಿಕ ಪಂತೊಲು ನಡತ್ಂಡ್. ಪಂತೊಡು ಗೆಂದಿನಕ್ಲೆಗ್ ಇನಾಮುನ್ ಪಟ್ಟಿಯೆರ್. ಸಂಘದ ಸದಸ್ಯೆರ್ದ್ ತುಳುನಾಡ್ ದ ಜನಪದ ನೃತ್ಯ ವೈಭವ ಪ್ರದರ್ಶನ ಆಂಡ್.

ಅಟಿತಿಂಗೊಲ್ದ ಬೇತೆ ಬೇತೆ ಬಗೆ ಬಗೆತ್ತ ತಿಂಡಿ ತಿನೆಸ್ ನ್ ಬಡಿಸಿಯೆರ್. ಈ ಪೊರ್ತುಡು ಶಿಕ್ಷಕಿ, ಪುಗರ್ತೆದ ನಿರೂಪಕಿ ರೇಣುಕಾ ಪೂಜಾರಿ ಪುತ್ತೂರ್ ಮೆರೆಗ್ ಸನ್ಮಾನ ಮಲ್ತ್ ದ್, ಮಾನಾದಿಗೆ ಮಲ್ತೆರ್.

ಈ ಪೊರ್ತುಡು ಪೆಜಮಾಡಿ ಶ್ರೀ ಮಹಾಲಿಂಗೇಶ್ವರ ದೇವಸ್ಥಾನದ ಆಡಳಿತ ಮೊಕ್ತೇಸರೆರ್ ದಯಾನಂದ ಪೆಜಮಾಡಿ, ಬಿಲ್ಲವರ ಸಂಘದ ಪ್ರಧಾನ ಕಾರ್ಯದರ್ಶಿ ಪ್ರಭೋದ್ ಚಂದ್ರ ಪೆಜಮಾಡಿ, ಮಾಜಿ ಅಧ್ಯಕ್ಷೆರ್ ಜೀನರಾಜ್ ಬಂಗೇರ, ಪಡ್ಡೆದ್ರ ಸಹಕಾರಿ ವ್ಯವಸಾಯಿಕ ಸಂಘದ ಮುಖ್ಯ ಕಾರ್ಯನಿರ್ವಹಣಾಧಿಕಾರಿ ನಿಶ್ಮಿತಾ ಪಿ.ಎಚ್., ಯುವವಾಹಿನಿ ಘಟಕದ ಅಧ್ಯಕ್ಷೆರ್ ಪ್ರಥಮೇಶ್ ಬಂಗೇರ, ಬಿರುವೆರ್ ಬ್ರದರ್ಸ್ ಅಧ್ಯಕ್ಷೆರ್ ಗುರುಪ್ರಸಾದ್ ಪಾಲ್ ಪಡೆದಿತ್ತೆರ್.

ಲಾವಣ್ಯ ಪ್ರಭೋದ್ ಎದ್ಕೊನಿಯೆರ್. ಕಾರ್ಯದರ್ಶಿ ಆಶಾ ನವೀನ್ ಸೊಲ್ಮೆ ಸಂದಾಯೆರ್. ದೀರಜ್ ಪೆಜಮಾಡಿ ಬೊಕ್ಕ ಪ್ರಾಪ್ತಿ ಸುವರ್ಣ ಲೇಸ್ ನ್ ಸುಧಾರಿಕೆ ಮಲ್ತೆರ್.