ಕುಡ್ಲ

ಒಡಿಪುಡು ವಿಶ್ವ ಗ್ರಾಹಕೆರ್ನ ದಿನಾಚರಣೆ

ಒಡಿಪು : ಗ್ರಾಹಕೆರ್ನ ಹಿತರಕ್ಷಣೆಗಾದ್ ಸರ್ಕಾರ ಗ್ರಾಹಕರ ರಕ್ಷಣಾ ಕಾಯ್ದೆ ಜಾರಿಗ್ ಕನ್ದುಂಡು , ಸಾರ್ವಜನಿಕೇರ್ ಒವ್ವೆ ವಸ್ತುಲೆನ್ ದೆತೊನ್ನಗ ಅನ್ಯಾಯ ಆಂಡ ಕಾಯ್ದೆಯಡಿ ನೆರವು ದೆತೊನೊಲಿ ಪಂದ್ ಜಿಲ್ಲಾ ಕಾನೂನು ಸೇವೆದ ಪ್ರಾಧಿಕಾರದ ಸದಸ್ಯ ಕಾರ್ಯದರ್ಶಿ ಕಾವೇರಿ ಪಂಡೆರ್ .

ಪೇಂಟೆದ ಅಂಬಲಪಾಡಿದ ಮಹಾಕಾಳಿ ಜನಾರ್ಧನ ದೇವಸ್ಥಾನದ ಭವಾನಿ ಮಂಟಪಡ್ ನಡತಿನ ಜಿಲ್ಲಾ ಆಡಳಿತ, ಆಹಾರ ಬೊಕ್ಕ ನಾಗರಿಕ ಸರಬರಾಜು ಇಲಾಖೆ, ವಾರ್ತಾ ಇಲಾಖೆ, ಕಾನೂನು ಮಾಪನಶಾಸ್ತ್ರ ಇಲಾಖೆ, ಜಿಲ್ಲಾ ಗ್ರಾಹಕರ ವ್ಯಾಜ್ಯದ ಪರಿಹಾರ ವೇದಿಕೆ, ಬಳಕೆದಾರೆರ್ನ ವೇದಿಕೆ ಬೊಕ್ಕ ಗ್ರಾಹಕ ಮಾಹಿತಿ ಕೇಂದ್ರದ ಒಟ್ಟು ಸೇರಿಗೆಡ್ ಅಟ್ಟನೆ ಮಲ್ತಿನ ವಿಶ್ವ ಗ್ರಾಹಕರ ದಿನಾಚರಣೆ ಲೇಸ್ ನ್ ಉದಿಪನ ಮಲ್ತ್ ಪಾತೆರಿಯೆರ್.

ಜಿಲ್ಲಾ ಮಟ್ಟದ ಚದುರಂಗ ಪಂಥೋ

ಒಡಿಪು : ನಗರದ ವಿದ್ಯೋದಯ ಟ್ರಸ್ಟ್‌ದ ಅಂಗಸಂಸ್ಥೆಯಾಯಿನ ವಿದ್ಯೋದಯ ಪ.ಪೂ ಕಾಲೇಜ್ ಡ್ ಪದವಿ ಪೂರ್ವ ಶಿಕ್ಷಣ ಇಲಾಖೆದ ವತಿರ್ದ್ ಜಿಲ್ಲಾ ಮಟ್ಟದ ಚದುರಂಗ ಸ್ಪರ್ಧೆ ಅಂಗಾರೆ ನಡತ್oಡ್.

ಈ ಪಂಥೋನು ಕಾಲೇಜು ಆಡಳಿತ ಮಂಡಳಿದ ಗುರ್ಕಾರ್ಲಾಯಿನ ಎನ್. ನಾಗರಾಜ ಬಲ್ಲಾಳ ಉದಿಪನ ಮಲ್ತೆರ್ . ಜಿಲ್ಲಾ ಕ್ರೀಡಾ ಸಂಯೋಜನಾಧಿಕಾರಿ ದಿನೇಶ್ ಕುಮಾರ್ ಮಲ್ಲ ಬಿನ್ನೆರ್ ಆದ್ ಪಾಲ್ ಪಡೆಯೆರ್.

ಕಾಲೇಜ್ ದ ಪ್ರಾಂಶುಪಾಲೆರಾಯಿನ ಎ.ಲಕ್ಷ್ಮೀನಾರಾಯಣ ಛಾತ್ರಾ ಎದುಕೊಂಡೆರ್ . ನಿಯೋಜಿತ ಪ್ರಾಂಶುಪಾಲ ಸಂದೀಪ್ ಕುಮಾರ್ ಪಾಲ್ ಪಡೆದ್ ಇತ್ತೆರ್ . ಉಪನ್ಯಾಸಕ ಶಿವಪ್ರಸಾದ್ ಭಟ್ ನಿರೂಪಣೆ ಮಲ್ತೆರ್ , ದೈಹಿಕ ಶಿಕ್ಷಣ ಉಪನ್ಯಾಸಕ ವಿನಯ್ ಸೊಲ್ಮೆ ಸಂದೈತ ಮಲ್ತೆರ್ .

ಒಡಿಪುಡು ಪೌರಕಾರ್ಮಿಕೆರ್ನ ಸ್ವಚ್ಛತಾ ಜಾಥ

ಒಡಿಪು , ಮಾ.18: ಒಡಿಪು ನಗರಸಭೆ ವತಿರ್ದ್ ಪೌರಕಾರ್ಮಿಕರ ಸ್ವಚ್ಛತಾ ಜಾಥನ್ ಬುಧವಾರ ಪೇಂಟೆಡ್ ಅಟ್ಟನೆ ಮಲ್ತಿತ್ತೆರ್.

ಜಾಥಗ್ ನಗರಸಭೆ ಗುರ್ಕಾರ್ಲಾಯಿನ ಸುಮಿತ್ರಾ ಆರ್.ನಾಯಕ್ ಚಾಲನೆ ಕೊರಿಯೆರ್ . ನಗರಾಭಿವೃದ್ಧಿ ಪ್ರಾಧಿಕಾರದ ಗುರ್ಕಾರ್ಲಾಯಿನ ರಾಘವೇಂದ್ರ ಕಿಣಿ, ಆರೋಗ್ಯಾಧಿಕಾರಿ ಕರುಣಾಕರ್ ಬೊಕ್ಕ ನಗರಸಭೆ ಸದಸ್ಯೆರ್ ಪಾಲ್ ಪಡೆದ್ ಇತ್ತೆರ್.

ಸ್ವಚ್ಛ ಭಾರತ್ ಅಭಿಯಾನದ ಯೋಜನೆದಡಿ ಸಾರ್ವಜನಿಕ ಪ್ಲಾಸ್ಟಿಕ್ ನಿಷೇಧ, ಹೋಮ್ ಕಾಂಪೋಸ್ಟ್ ಮಾನ್ಯುಯಲ್ ಸ್ಕಾವೆಂಜಿಗ್, ಪರಿಸರ ಮಾಲಿನ್ಯ ಜನಜಾಗೃತಿ ಕಾರ್ಯಕ್ರಮದ ಪರವಾದ್ ಈ ಜಾಥನ್ ಪೇಂಟೆಡ್ ನಡಪಾಯೆರ್.

ಒಡಿಪುಡು ಎಂಜಿಎಂ ಕೃಷಿ ಸಮ್ಮಿಲನ-2021

ಒಡಿಪು , ಮಾ.18: ಜೋಕುಲು ಬೊಕ್ಕ ಜವನೆರೆಗ್ ಕೈತಲ್ ದ ಕೃಷಿ ಬೊಕ್ಕ ಕೃಷಿ ಬದ್ಕ್ ದ ಬಗ್ಗೆ ಅರಿವು ಮೂಡಾಯರೇ ಅಂಚನೇ ಅಕ್ಲೆಗ್ ಕೃಷಿ ಆಸಕ್ತಿ ಎಚ್ಚ ಮಲ್ಪುನ ಪರವಾದ್ ರಡ್ಡ್ ದಿನತ ಎಂಜಿಎಂ ಕೃಷಿ ಸಮ್ಮಿಲನ ಲೇಸ್ ನ್ ಮಾ.20 ಬೊಕ್ಕ 21 ತಾರೀಖ್ ಗ್ ಎಂಜಿಎಂ ಕಾಲೇಜ್ ದ ಆವರಡ್ ಅಟ್ಟನೆ ಮಲ್ದೆರ್ ಪಂದ್ ಕಾಲೇಜ್ ದ ಪ್ರಾಂಶುಪಾಲೆರಾಯಿನ ಡಾ.ದೇವಿದಾಸ ನಾಯ್ಕಾ ತೆರಿಪಾದೆರ್.

ಕಾಲೇಜ್ ಡ್ ಬುಧವಾರ ನಡತಿನ ಸುದ್ದಿಗೋಷ್ಠಿಡ್ ಮೇರ್ ಈ ಇಚಾರ ತೆರಿಪಾಯೆರ್.ಈ ಲೇಸ್ ಡ್ ಒಡಿಪು ಜಿಲ್ಲೆದ ಕೃಷಿಕೆರೆರ್ದ್ ಕೃಷಿ ಉತ್ಪನ್ನದ ಪ್ರದರ್ಶನ, ಮಾರಾಟ ಬೊಕ್ಕ ಬೇತೆ ಬೇತೆ ವಿಷಯದ ಬಗ್ಗೆ ತಜ್ಞರೆರ್ದ್ , ಸಾಧಕ ಕೃಷಿಕೆರೆರ್ದ್ ಮಾಹಿತಿ ಮಾಲಿಕೆ ಅಟ್ಟನೆ ಮಲ್ದೆರ್ .

ಸರ್ವ ಕಾಲೇಜು ವಿದ್ಯಾರ್ಥಿ ಸಂಘದ ಒತ್ತುಗುರ್ಕಾರ್ಲಾದ್ ಅಹ್ನಾಫ್ ಡೀಲ್ಸ್ ಆಯ್ಕೆ

ಕುಡ್ಲ ,ಮಾ.17: ಮಂಗಳೂರು ಯುನಿವರ್ಸಿಟಿದ ಅಧೀನಡ್ ಉಪ್ಪುನ , ಸರ್ವ ಕಾಲೇಜು ವಿದ್ಯಾರ್ಥಿ ಸಂಘದ ಒತ್ತು ಗುರ್ಕಾರ್ಲಾದ್ ಅಹ್ನಾಫ್ ಡೀಲ್ಸ್ ಆಯ್ಕೆಯಾತೆರ್.

ತನ್ನ ಎಲ್ಯ ಪ್ರಾಯಡೇ ಸಮಾಜಮುಖಿ ಕಾರ್ಯಡ್ ಪಾಲ್ ಪಡೆತಿನ ಅಹ್ನಾಫ್, ಅತ್ಯುತ್ತಮ ಕ್ರೀಡಾಪಟು ಲಾ ಅಂದ್. ಎಸ್ ಡಿ ಎಂ ಕಾಲೇಡ್ ಸುರುತ್ತ ವರ್ಷದ ಬಿಬಿಎ ಪದವಿ ಕಲ್ತೊಂದು ಉಪ್ಪುನ ಅಹ್ನಾಫ್, ಕುಡ್ಲದ ಪ್ರತಿಷ್ಠಿತ ಸಮಾಜ ಸೇವಾ ಸಂಸ್ಥೆ, ಬಿ-ಹ್ಯೂಮನ್ ನೆತ್ತ ಸ್ಥಾಪಕರಾಯಿನ ಆಸಿಫ್ ಡೀಲ್ಸ್ ಮೆರ್ನ ಸುಪುತ್ರೆ.