ಒಡಿಪು ಪುತ್ತೂರು ಬೊಲ್ತೆರ್

ಉಪರಾಷ್ಟ್ರಪತಿಗ್ ಬೂಕು ಕೊರ್ದು ಎದುಕೊಂಡಿನ ಸಿಎಂ ಬೊಮ್ಮಾಯಿ

ಬೆಂಗ್ಳೂರು: ಬೆಂಗ್ಳೂರುಗು ಬತ್ತಿನ ಉಪರಾಷ್ಟ್ರಪತಿ ವೆಂಕಯ್ಯನಾಯ್ಡು ಮೆರೆಗ್ ಸಿಎಂ ಬಸವರಾಜ ಬೊಮ್ಮಾಯಿ ಬೂಕು ಕೊರ್ದು ಎದುಕೊಂಡೆರ್.

ಲೇಸ್ ದ ನಿಮಿತ್ತ ಕೆಂಪೇಗೌಡ ಅಂತರಾಷ್ಟ್ರೀಯ ವಿಮಾನ ನಿಲ್ದಾಣಗ್ ಬತ್ತಿನ ವೆಂಕಯ್ಯನಾಯ್ಡು ಮೆರೆನ್ ಸಿಎಂ ಎದುಕೊಂಡೆರ್ . ವಿಮಾನದ ಕೈತಲ್ ಪೋದು ಸಿಎಂ ಬೊಮ್ಮಾಯಿ ವಿಶೇಷ ಹಾರ, ಶಾಲು ಸೇರಿನoಚ ಬೂಕು ಕೊರ್ದು ಎದುಕೊಂಡೆರ್.

ಕಂಡಗ್ ಜತ್ದ್ ಬೆನ್ನಿ ಮಲ್ತಿನ ಶೋಭಾ ಕರಂದ್ಲಾಜೆ

ಮಂಡ್ಯ : ಮಂಡ್ಯ ತಾಲೂಕುದ ಸಾತನೂರು ದ ಕೈತಲ್ ಕೇಂದ್ರ ಕೃಷಿ ರಾಜ್ಯ ಖಾತೆ ಸಚಿವೆ ಶೋಭಾ ಕರಂದ್ಲಾಜೆ ಮೇರ್ ಕಂಡಡ್ ನಾಟಿ ಮಲ್ತ್ ಗಮನ ಸೆಳೆತೆರ್.

ಕೃಷಿ ಸಚಿವೆರಾದ್ ಸುರುತ ಸಲ ಮಂಡ್ಯಗ್ ಬತ್ತಿನ ಮೇರ್ ಜನಾಶೀರ್ವಾದಗ್ ಚಾಲನೆ ಕೊರ್ದು ಸಾತನೂರುದ ಕೃಷಿ ಕಂಡೊಡು ಪೊಂಜೊವ್ಲೆನ ಒಟ್ಟುಗು ನಟ್ಟಿ ನಡಿಯೆರ್.

ಸಂಘಟನೆ ವಿಭಜನೆ ಆವರೆ ಬಲ್ಲಿ : ಡಾ. ಆಕಾಶ್ ರಾಜ್ ಜೈನ್

ಮುಲ್ಕಿ: ತುಳುನಾಡ್‌ಡ್ ಅಂಚೆನೇ ಪಿದಯಿ ರಾಜ್ಯ ಪಿದಯಿ ದೇಶೋಲೆಡ್ ಅವ್ವೆತೋ ಸಂಘಟನೆಲು ತುಳುಅಪ್ಪೆನ ಸೇವೆ ಮಲ್ಲೊಂದುಲ್ಲ. ಸಂಘಟನೆಲೆಡ್ ಏಪಲ ಬಿನ್ನಾಭಿಪ್ರಾಯ ಬರಿಯರೆ ಬಲ್ಲಿ. ಒಂಜಿ ವೇಳೆ ಬಿನ್ನಾಭಿಪ್ರಾಯ ಬತ್ತುಂಡಲ ಅವೆನ್ ಒಂಜೇ ಇಲ್ಲಡುಪ್ಪುನ ಮೆಗ್ಯೆ ಪಲಯೆಲೆಕ್ಕ ಒಂಜೇ ಮನಸ್ಸಡ್ ಸರಿ ಮಲ್ಪೊಡು ಸಂಘಟನೆ ಏಪಲ ವಿಭಜನೆ ಆವರೆ ಬಲ್ಲಿ ಪಂಡ್‌ದ್ ಆಳುಪ ರಾಜ ವಂಶಸ್ತೆರ್ , ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿದ ಪದುಕೆರ್ ಡಾ.ಆಕಾಶ್‌ರಾಜ್ ಜೈನ್ ಪಂಡೆರ್.

ಜೈ ತುಳುನಾಡ್ (ರಿ) ಉಂದೆತ್ತ ಏಳನೇ ವರ್ಷದ ಉಚ್ಚಯದ
ಅಂಗವಾದ್ ಪೊಸ ರೂಪದ ಡಿಜಿಟಲ್ ವೇದಿಕೆ ಕ್ಲಬ್‌ಹೌಸ್‌ಡ್ ಆಟಿ 25 ಪೋಪಿನಾನಿ (ಆಗಸ್ಟ್ 10) ಅಂಗಾರೆ ಬಯ್ಯಡ್ ನಡತಿನ ಲೇಸ್ ಡ್ ಗುರ್ಕಾರ್ಮೆ ಒಯಿಸೊಂದು ಆರ್ ಪಾತೆರಿಯರ್.

ವೈಯಕ್ತಿಕ ವಿಚಾರ ಸಂಘಟನೆಗ್ ಅಡ್ಡಿ ಬರ್ಪುಂಡು, ಆಂಡ ಅವಕ್ಕೆ ಒಯಿಕ್ಲಾ ಅವಕಾಶ ಕೊರೆ ಬಲ್ಲಿ. ಗಂಧದ ಕೊರಡ್ ನ್ ಏತ್ ತರೆತುಂಡಲ ಪರಿಮಳ ಕೊರೊಂದುಪ್ಪುನ ಲೆಕ್ಕನೆ ಒಂಜಿ ಥರತ್ತ ಕೋಂಗಿದ ಪಾತೆರೊಗುಲ ಮಂಡೆ ಕೊರಂದೆ ತುಳುನಾಡ್‌ದ ಬುಳೆಚ್ಚಿಲ್ಗ್ ಪುಣೆವೊಡು ಪಂಡೆರ್.

ಒಡಿಪು ಜಿಲ್ಲೆದ ಕೊಡವೂರು ತುಳುತ್ತ ಮಹಾಕವಿ ಅರುಣಾಬ್ಬನ ಊರು. ಈ ಊರುಡು ಬೊಕ್ಕ ಅಲ್ತ ಶ್ರೀ ಶಂಕರನಾರಾಯಣ ದೇವಸ್ಥಾನೊಡು ಸರ್ಕಾರದ ನೀತಿ ನಿಯಮಾವಳಿದ ಪೋಡಿಗೆದ ನಡುಟ್ಟುಲ ತುಳು ಲಿಪಿ ಪಲವೆ ಪಾಡಾವುನ ಕೆಲಸ ನಡತ್ಂಡ್. ಇತ್ತೆ ತುಳು ಸಾಹಿತ್ಯ ಅಕಾಡೆಮಿ ಅಂಚೆನೆ ಜೈ ತುಳುನಾಡ್‌ದಂಚಿನ ಮಸ್ತ್ ತುಳು ಸಂಘಟನೆಲ್ನ ಬೆರಿಸಾಯೊಡು ತುಳು ಲಿಪಿಕ್ ರಾಜ್ಯದ ಮಾನಾದಿಗೆ ತಿಕ್ದ್‌ಂಡ್. ಆ ಕಜ್ಜಡ್ ಪಾಲ್ ಪಡೆಯಿನೆಕ್ ಎಂಕ್ ಮಲ್ಲ ಪೆರ್ಮೆ ಆವೊಂದುಂಡು ಪಂಡೆರ್.

ಜೈ ತುಳುನಾಡ್ ಸಂಘಟನೆದ ಏಳ್ ವರ್ಸದ ಸಾಧನೆ ಮಾಮಲ್ಲ ಸಾಧನೆ. ತುಳು ಬಾಸೆದ ಬುಲೆಚ್ಚಿಲ್‌ಗಾದ್ ಎಡ್ಡೆನೆ ಬೆನ್ಪಾಟಿಕೆ ಮಲ್ದೆರ್ . ಕಾಡ್ದ ಸಿಂಹ ತಾನ್ ಬತ್ತಿನ ತಾದಿನ್ ಪಿರ ಒರ ಉಂತುದು ತೂಪಿನಲೆಕ್ಕ ಜೈ ತುಳುನಾಡ್ ಸಂಘಟನೆಲ ಒರ ತನ್ನ ಕೆಲಸೊನು ಪಿರ ಸಿಂಹಾವಲೋಕನ ಮಲ್ಪೊಡು ಪನ್ನಿನ ಸಲಹೆನ್ಲಾ ಆರ್ ಕೊರಿಯರ್.

ಮಲ್ಲ ಬಿನ್ನೆರಾದಿತ್ತಿನ ತುಳು ಸಾಹಿತಿ, ಸಂಶೋಧಕರ್, ಪ್ರಾಧ್ಯಾಪಕೆರ್ ಡಾ.ಅರುಣ್ ಉಳ್ಳಾಲ್ ಪಾತೆರ್ದ್, ಆಟದ ದಿಗಿಣ, ಗಗ್ಗರದ ದುನಿಪು, ಕಂಬುಲದ ನಿರ್ಸಾನಿ ತೋಜುನ ಈ ತುಳು ಮಣ್ಣ್ ದ ಮಿತ್ತ್ ಮೋಕೆ ದೀತಿನ, ಸಾರ ಸಾರ ಸಂಖ್ಯೆಡ್ ಜವನೆ, ಜವಾನಿಯೆರುಪ್ಪುನ ಜೈ ತುಳುನಾಡ್ ಸಂಘಟನೆ ಒಂಜಿ ಅಪರೂಪದ ಕೂಟ ತುಳು ಬಾಸೆಗಾದ್ ಅಕ್ಲೆನ ಪುಣೆಪಾಟ ಒಂಜಿ ಆದರ್ಶ. ಏಳ್ ಪನ್ಪಿನವು ಗೇಲ್‌ಗೆ ಏಳನೇ ವರ್ಸದ ಕುಸಿಟ್ಟ್ ಉಪ್ಪುನ ಈ ಕೂಟದಕುಲು ಮಣ್ಣ್ ಮದಪ್ಪಂದಿ ಬೇಲೆ ಮತ್ತೊಂದುಲ್ಲೆರ್, ಅಕ್ಲೆಗ್ ಎಡ್ಡೆ ಆವಡ್. ಸಂಘಟನೆ ನನಲ ಬುಲೆವಡ್ ಪಂಡೆರ್.

ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿದ ಗುರ್ಕಾರ್ಲು ದಯಾನಂದ ಕತ್ತಲ್‌ಸಾರ್ ಪಾತೆರ್ದ್, ಜೈ ತುಳುನಾಡ್ ಸಂಘಟನೆ ತುಳು ಅಕಾಡೆಮಿದ ಬೆರಿಮುಳ್ಳು ಆದ್ ಕೆಲಸ ಮಲ್ತೊಂದು ಉಂಡು . ತುಳುನಾಡ್‌ಗಾದ್ ಅಕುಲು ಬೆಂದಿನ ಬೆನ್ನಿ ಮದಪ್ಪರೆ ಆವಂದಿನ, ನಯಾ ಪೈಸೆದ ಆಸೆ ದೀವಂದೆ ಪರಿಪೂರ್ಣ ಸೇವಾ ಮನೋಭಾವೊಡು ತುಳು ಲಿಪಿನ್ ಊರೊರ್ಮೆ ಕಲ್ಪಾದ್ ಕೊರಿನ ಸಂಘಟನೆದ ಮಾತೆರೆಗ್ಲ ಸೊಲ್ಮೇಲು ಪಂದ್ ಪಂಡೆರ್.

ಮಲ್ಲ ಬಿನ್ನೆರಾದ್ ತುಳು ಸಾಹಿತ್ಯ ಅಕಾಡೆಮಿದ ಪಾದುಕೆರ್ ತಾರ ಆಚಾರ್ಯ, ಒಡಿಪು ಸಮೂಹ ಸಂಸ್ಥೆ, ಮಣಿಪಾಲ ಉಂದೆತ್ತ ಉಪನ್ಯಾಸಕೆರ್ ಅರ್ಪಿತಾ ಶೆಟ್ಟಿ, ಟೈಮ್ಸ್ ಆಫ್ ಕುಡ್ಲ ಪತ್ರಿಕೆದ ಒತ್ತು ಸಂಪೊಲಿಗೆದಾರ್ ಯಶೋಧರ ಕೋಟ್ಯಾನ್, ಜೈ ತುಳುನಾಡ್ (ರಿ) ಗುರ್ಕಾರ್ಲು ಸುದರ್ಶನ್ ಸುರತ್ಕಲ್ ಮೊಕುಲು ಇತ್ತೆರ್.

ಡಾ.ರವೀಶ್ ಪರವ, ಪಡುಮಲೆ ಮೇರ್ ಪಾಡ್ಡನದ ಒರುಟ್ಟು ಲೇಸ್ ಉದಿಪನ ಮಲ್ತೆರ್ , ಜೈ ತುಳುನಾಡ್ ಒತ್ತು ಗುರ್ಕಾರ್ಲು ಉದಯ ಪೂಂಜ ಮಾತೆರೆನ್ಲ ಎಡ್ಕೊಂಡೆರ್. ಪದುಕೆರಾಯಿನ ಕಿರಣ್ ತುಳುವೆ ಸಂಘಟನೆದ ಏಳ್ ವರ್ಷದ ಸಾಧನೆದ ಪೊಲಬು ಮಲ್ತೆರ್ . ಯಶ್ಚಿತಾ ಸೊಲ್ಮೆ ಸಂದಾಯೆರ್‌, ಅರುಣ್ – ವಿ.ಸುರತ್ಕಲ್ ಲೇಸ್ ಸುಧಾರ್ಮೆ ಮಲ್ತೆರ್ .

ಸ್ಯಾಂಡಲ್ ವುಡ್ ಪೆರಿಯ ನಿರ್ಮಾಪಕ ಬಿ. ವಿಜಯ್ ಕುಮಾರ್ ವಿಧಿವಶ

ಬೆಂಗ್ಳೂರು: ಸ್ಯಾಂಡಲ್ ವುಡ್ ಪೆರಿಯ ನಿರ್ಮಾಪಕ ಬಿ. ವಿಜಯ್ ಕುಮಾರ್ (63) ಹೃದಯಘಾತರ್ದ್ ತೀರ್ ಪೋತೆರ್.

ವಿಜಯ್ ಕುಮಾರ್ ಮೇರ್ ಪ್ರಾಯದ ಸೀಕ್ ರ್ದ್ ಇತ್ತೆರ್ . ಈ ನೆಲೆಟ್ಟ್ ಆಸ್ಪತ್ರೆಗ್ ದಾಖಲಾದಿತ್ತೆರ್ . ಆಂಡ ಕೋಡೆ ರಾತ್ರಿ 9: 30 ಕ್ ಹೃದಯಘಾತರ್ದ್ ತೀರ್ ಪೋತೆರ್.

ವಿಜಯ್​​ಕುಮಾರ್ ಮೇರ್ ಸಿಂಹಾದ್ರಿಯ ಸಿಂಹ, ಲಯನ್ ಜಗಪತಿ ರಾವ್, ಮೌನಗೀತೆ, ಜಗದೇಕ ವೀರ, ಸ್ವಚ್ಛ ಭಾರತ ಸೇರಿನಂಚ ಅವ್ವೆತೋ ಸಿನಿಮಾಲೆನ್ ಮಲ್ದೆರ್ .

ರಾಜ್ಯದ ರಡ್ಡ್ ಪೊಲೀಸ್ ಅಧಿಕಾರಿಲೆಗ್ ರಾಷ್ಟಪತಿ ಪದಕ

ನವದೆಹಲಿ : ಸ್ವಾತಂತ್ರ್ಯ ದಿನಾಚರಣೆದಾನಿ ಎಡ್ಡೆ ಸೇವೆ ಮಲ್ದಿನ ಪೊಲೀಸ್ ಅಧಿಕಾರಿಲೆಗ್ ಕೊರ್ಪಿನoಚಿನ ರಾಷ್ಟ್ರಪತಿ ಪದಕ ಬೊಕ್ಕ ಪೊಲೀಸ್ ಪದಕದ ಪಟ್ಟಿನ್ ಬುಡುಗಡೆ ಮಲ್ದೆರ್ . ಈ ಸಲ 1,380 ಪೊಲೀಸ್ ಅಧಿಕಾರಿಲೆಗ್ ಪ್ರಶಸ್ತಿ ಕೊರ್ತೆರ್ . ನೆಟ್ಟ್ ಕರ್ನಾಟಕದ ರಡ್ಡ್ ಪೊಲೀಸ್ ಅಧಿಕಾರಿಲೆಗ್ ರಾಷ್ಟ್ರಪತಿ ಪದಕ ಬೈದುಂಡು , 19 ಪೊಲೀಸ್ನಕ್ಲೆಗ್ ಪೊಲೀಸ್ ಸೇವಾ ಪದಕ ಪ್ರಶಸ್ತಿ ಬೈದುಂಡು .

ಈ ಬಗ್ಗೆ ಕೇಂದ್ರ ಗೃಹ ಇಲಾಖೆರ್ದ್ ಪಟ್ಟಿನ್ ರಿಲೀಸ್ ಮಲ್ದುಂಡು , ಕರ್ನಾಟಕದ ರಡ್ಡ್ ಪೊಲೀಸ್ ಅಧಿಕಾರಿಲೆಗ್ ಈ ಸಲದ ರಾಷ್ಟ್ರಪತಿ ಪದಕ ಬೈದುಂಡು .

ಆ.23 ರ್ದ್ ಶಾಲೆ ಸುರು : ಮಾರ್ಗಸೂಚಿ ಬುಡುಗಡೆ

ಬೆಂಗ್ಳೂರು : ಆಗಸ್ಟ್ 23ರ್ದ್ ರಾಜ್ಯಡ್ ಸರ್ಕಾರಿ, ಅನುದಾನಿತ ಬೊಕ್ಕ ಅನುದಾನ ರಹಿತ ಪ್ರೌಡ ಶಾಲೆದ 9 ಬೊಕ್ಕ 10ನೇ ತರಗತಿ ಜೋಕ್ಲೆಗ್ ಶಾಲೆನ್ ಪೂರ್ಣ ಪ್ರಮಾಣಡ್ ಸುರು ಮಲ್ತ್, ಬೋಧನಾ ತರಗತಿಲೆನ್ ನಡಪಾದ್ , ಮಾರ್ಗಸೂಚಿ ಕ್ರಮನ್ ಬುಡುಗಡೆ ಮಲ್ದೆರ್ .

ಈ ಬಗ್ಗೆ ಸಾರ್ವಜನಿಕ ಶಿಕ್ಷಣ ಇಲಾಖೆದ ಆಯುಕ್ತೆರ್ ಮಾರ್ಗಸೂಚಿ ಬುಡುಗಡೆ ಮಲ್ದೆರ್ , 2021-22ನೇ ಶೈಕ್ಷಣಿಕ ವರ್ಷದ ಶಾಲೆ ಸುರು ಮಲ್ಪುನ ಬಗ್ಗೆ ಮುಖ್ಯಮಂತ್ರಿಲೆನ ಗುರ್ಕಾರ್ಮೆಡ್ ಆರೋಗ್ಯ ಇಲಾಖೆದ ಕೋವಿಡ್ ತಾಂತ್ರಿಕ ಸಲಹಾ ಸಮಿತಿದ ಸದಸ್ಯೆರ್ ಬೊಕ್ಕ ಬೇತೆ ಬೇತೆ ಇಲಾಖೆದ ಪೆರಿಯ ಅಧಿಕಾರಿಲೆನ ಸಭೆಟ್ ಚರ್ಚೆ ಮಲ್ತ್ , ಆ.23 ರ್ದ್ ರಾಜ್ಯಡ್ ಕೋವಿಡ್-19 ದ ಸೋಂಕುದ ಪ್ರಮಾಣ ಶೇ.2ರ್ದ್ ಕಮ್ಮಿ ಉಪ್ಪುನ ಜಿಲ್ಲೆಡ್ 9ನೇ ಬೊಕ್ಕ 10ನೇ ತರಗತಿಲೆನ್ ಸುರು ಮಲ್ಪರೆ ಮಾತಾ ಕರ್ನಾಟಕ ರಾಜ್ಯ ಸರ್ಕಾರದ ಸರ್ಕಾರಿ, ಅನುದಾನಿತ ಬೊಕ್ಕ ಅನುದಾನ ರಹಿತ ಶಾಲೆನ್ ಸುರು ಮಲ್ಪರೆ ನಿರ್ಧಾರ ಮಲ್ದೆರ್.

ಫರಂಗಿಪೇಟೆಡ್ ” ಮೆಡೋಕ್ ವಿಷನ್ ಕೇರ್’ದ ಪೊಸ ಶಾಖೆ ಉದಿಪನ

ಬಂಟ್ವಾಳ : ಕಣ್ಣ್ ದ ಹಾರೈಕೆ ಕ್ಷೇತ್ರಡ್ ಬಾರಿ ವರ್ಷದ ಹಲವು ಅನುಭವ ಬೊಕ್ಕ ಪರಂಪರೆದೊಟ್ಟುಗು ಬೇಲೆ ಮಲ್ತೊಂದು ಉಪ್ಪುನ ದಕ್ಷಿಣ ಕನ್ನಡ ಜಿಲ್ಲೆದ ಮಾಮಲ್ಲ ಒಪ್ಟಿಕಲ್ ಸಂಸ್ಥೆ ‘ಮೆಡೋಕ್ ವಿಷನ್ ಕೇರ್’ದ ಪೊಸ ಶಾಖೆ ಫರಂಗಿಪೇಟೆದ ಬಸ್ ಸ್ಟ್ಯಾಂಡ್ ಕೈತಲ್ ಉದಿಪನ ಆಂಡ್.

ಮಳಿಗೆನ್ ಶಾಸಕ ಯು.ಟಿ.ಖಾದರ್ ಉದಿಪನ ಮಲ್ತೆರ್ . ಫರಂಗಿಪೇಟೆ ಜುಮಾ ಮಸೀದಿ ಖತೀಬ್ ಅಬ್ಬಾಸ್ ದಾರಿಮಿ ದುಅ ನಡಪಾಯೆರ್ .ಈ ಪೊರ್ತುಡು ಪುದು ಪಂಚಾಯತ್ ಗುರ್ಕಾರ್ಲಾಯಿನ ರಮ್ಲಾನ್ ಮಾರಿಪಳ್ಳ, ಆಡಳಿತ ಪಾಲುದಾರೆರಾಯಿನ ಝಿರಾರ್ ಅಬ್ದುಲ್ಲಾ, ಇರ್ಷಾದ್ ಮುಹಮ್ಮದ್ ಫೈಝ್, ನಿಝಾಂ ಪಾಲ್ ಪಡೆದಿತ್ತೆರ್.

ದೇಶ ಭಕ್ತಿ ಗೀತೆ ಪಂಥಗ್ “ಗೋಲ್ಡನ್ ಬುಕ್ ಆಫ್ ವರ್ಲ್ಡ್‌ ರೆಕಾರ್ಡ್”

ಬೊಲ್ತೆರ್ : ಸ್ವಾತಂತ್ರ್ಯದ ಅಮೃತಮಹೋತ್ಸವದ ಪೊರ್ತುಡು ಶಾಸಕ ಹರೀಶ್ ಪೂಂಜ ಮುತಾಲೀಕೇಡ್ ಅಟ್ಟನೆ ಮಲ್ತಿನ ಆನ್‌ಲೈನ್ ದೇಶಭಕ್ತಿ ಗೀತೆ ಪಂಥಗ್ ಗೋಲ್ಡನ್ ಬುಕ್ ಆಫ್ ವರ್ಲ್ಡ್‌ ರೆಕಾರ್ಡ್ ಮಾನದಿಗೆ ಬೈದುಂಡು .

ಗೋಲ್ಡನ್ ಬುಕ್ ಆಫ್ ವರ್ಲ್ಡ್‌ ರೆಕಾರ್ಡ್‌ದ ಏಪ್ಯಾ ಮುಖ್ಯಸ್ಥ ಡಾ.ಮನೀಶ್ ವೈಷ್ಣವಿ ಐತಾರ ಬೆಳ್ತಂಗಡಿ ಶ್ರೀಮಂಜುನಾಥ ಸ್ವಾಮಿ ಕಲಾಭವನಡ್ ನಡತಿನ ಸರಳ ಲೇಸ್ ಡ್ ಶಾಸಕ ಹರೀಶ್ ಪೂಂಜ ಮೆರೆಗ್ ಪ್ರಶಸ್ತಿ ಪತ್ರ, ಪದಕನ್ ಮಾನದಿಗೆ ಮಲ್ತೆರ್.

‘ಗೋಲ್ಡನ್ ಬುಕ್ ಆಫ್ ವರ್ಲ್ಡ್‌ ರೆಕಾರ್ಡ್‌ದ ಮಾತಾ ಷರತ್ತು, ನಿಯಮಗ್ ಅನುಸಾರ ಲೇಸ್ ನಡಪಾದೆರ್ .

ಆಗಸ್ಟ್ 25 ಕ್ಕ್ ಪಂಥದ ಫಲಿತಾಂಶ ಪ್ರಕಟ ಆಯರೇ ಉಂಡು ,ಸುರುತ , ರಡ್ಡನೇ ಇನಾಮುದ ಒಟ್ಟುಗು ಪಂತಾರ್ತಿಲೆಗ್ ಮಾನದಿಗೆ ನಡಪರೆ ಉಂಡು. ಬೆಳಗಾವಿ, ಬೀದರ್, ಬೆಂಗ್ಳೂರು, ಮೈಸೂರು, ಕಾಸ್ರೋಡು, ಮಹರಾಷ್ಟ್ರ, ದೆಹಲಿ ಬೊಕ್ಕ ವಿದೇಶರ್ದ್ ಲೇಸ್ ಡ್ ಪಾಲ್ ಪಡೆತೆರ್ ಪಂದ್ ಸಂಘಟಕೆರ್ ತೆರಿಪಾದೆರ್..

ಲೇಸ್ ಡ್ ಪ್ರಶಾಂತ್ ಶೆಟ್ಟಿ, ನಿರ್ದೇಶಕ ಸ್ಮಿತೇಶ್ ಬಾರ್ಯ, ಅನೀಶ್ ವೇಣೂರು ಪಾಲ್ ಪಡೆದಿತ್ತೆರ್ .

ಒಡಿಪುದ ಕೊರಗಜ್ಜ ಸಾನದ ಮೂಕಾಂಬಿಕ ಅಪ್ಪೆನ ಗುಂಡದ ತುಲು ಲಿಪಿ ಪುದರ್ ಪಲವೆ ಉದಿಪನ

ಒಡಿಪು : ಒಡಿಪುದ ಎಂ ಜಿ ಎಮ್ ಕಾಲೇಜ್ ಎದುರು ಉಪ್ಪುನ ಕೊರಗಜ್ಜ ಸಾನಡ್ ಉಪ್ಪುನ ಮೂಕಾಂಬಿಕ ಅಪ್ಪೆನ ಗುಂಡದ ತುಲು ಲಿಪಿ ಪುದರ್ ಪಲವೆ ಉದಿಪನ ಜೈ ತುಲುನಾಡ್ (ರಿ) ಒಡಿಪು ಎಗ್ಗೆ ಬೊಕ್ಕ ಸಾನದ ಪದುಕೆರ್ನ ಸೇರಿಗೆಡ್ ನಡತ್ಂಡ್.

ಪುದರ್‌ಪಲವೆ ಉದಿಪನ ತುಲುಲಿಪಿ ಕಲ್ಪಾರ್ತಿ ಶ್ರೀಮತಿ ಪ್ರಮೀಳ ಸಾಲಿಯಾನ್ ಮೇರ್ ಮಲ್ತೆರ್ , ಈ ಸಂದರಪುಡು ಸಾನದ ಮುಖ್ಯ ಪಾತ್ರಿಲಾಯಿನ ನವೀನ್ ಪಾತ್ರಿ, ಸಾನದ ಪದುಕೆರ್, ಜೈ ತುಲುನಾಡ್ (ರಿ) ಲಿಪಿ ಸಮಿತಿ ಮೇಲ್ವಿಚಾರಕೆರ್ ಶರತ್ ಕೊಡವೂರ್, ಜೈ ತುಲುನಾಡ್ (ರಿ) ಒಡಿಪು ಎಗ್ಗೆದ ಸಂಚಾಲಕೆರಾಯಿನ ರಾಜೇಶ್ ತುಲುವೆ, ಸಚಿನ್ ಬಡಗಬೆಟ್ಟು ಪದುಕೆರಾಯಿನ ಕಿನ್ನು ಒಡಿಪು ಬೊಕ್ಕ ಸುರೇಶ್ ಹಾವಂಜೆ ಪಾಲ್ ಪಡೆಯೆರ್.

ಒಡಿಪುದ ಕೊರಗಜ್ಜನ ಗುಂಡದ ತುಲು ಲಿಪಿ ಪುದರ್ ಪಲವೆ ಉದಿಪನ

ಒಡಿಪು : ಒಡಿಪುದ ಎಂ ಜಿ ಎಮ್ ಕಾಲೇಜ್ ಎದುರು ಉಪ್ಪುನ ಕೊರಗಜ್ಜ ಸಾನಡ್ ಕೊರಗಜ್ಜನ ಗುಂಡದ ತುಲು ಲಿಪಿ ಪುದರ್‌ ಪಲವೆದ ಉದಿಪನ ಜೈ ತುಲುನಾಡ್ (ರಿ) ಒಡಿಪು ಎಗ್ಗೆ ಬೊಕ್ಕ ಸಾನದ ಪದುಕೆರೆನ ಸೇರಿಗೆಡ್ ನಡತ್ಂಡ್.

ಪುದರ್ ಪಲವೆ ಉದಿಪನ ಸಾನದ ಮುಖ್ಯ ಪಾತ್ರಿ ನವೀನ್ ಮೇರ್ ಮಲ್ತೆರ್ . ಈ ಪೊರ್ತುಡು ಸಾನದ ಪದುಕೆರ್, ಜೈ ತುಲುನಾಡ್ (ರಿ) ಲಿಪಿ ಸಮಿತಿ ಮೇಲ್ವಿಚಾರಕೆರ್ ಶರತ್ ಕೊಡವೂರ್, ತುಲುಲಿಪಿ ಕಲ್ಪಾರ್ತಿ ಶ್ರೀಮತಿ ಪ್ರಮೀಳ -ಸಾಲಿಯಾನ್, ಜೈ ತುಲುನಾಡ್ (ರಿ) ಒಡಿಪು ಎಗ್ಗೆದ ಸಂಚಾಲಕೆರಾಯಿನ ರಾಜೇಶ್ ತುಲುವೆ, ಸಚಿನ್ ಬಡಗಬೆಟ್ಟು, ಪದುಕೆರಾಯಿನ ಕಿನ್ನು ಒಡಿಪು ಬೊಕ್ಕ ಸುರೇಶ್ ಹಾವಂಜೆ ಪಾಲ್ ಪಡೆಯೆರ್.