ಜೀವೊನ್ ಒತ್ತೆ ದೀದ್ ಕುಲಕಸುಬು ಮಲತೊಂದುಪ್ಪುನ ಮೀನುಗಾರೆರ್ನ ಬೇಲೆ ಮೆಚ್ಚೊಡಾಯಿನವ್ವ್ : ಡಿ.ಕೆ.ಶಿವಕುಮಾರ್
ಯಾನ್ ಮುಲ್ಪ ರಾಜಕಾರಣ ಮಲ್ಪರೆಗ್ ಬೈದುಜಿ.ಮೀನುಗಾರೆರ್ನ ಸಮಸ್ಯೆಲೆಗ್ ಸರಕಾರೊಡ್ದ್ ಸರಿಯಾಯಿನ ಪರಿಹಾರ ಕೊರ್ಪಾವರೆಗ್ ಬೈದೆ.ಮಾತಾ ವರ್ಗದ ಜನಕ್ಲೆನ ವಿಚಾರೊಲೆನ್ ತೆರಿದ್ಅಕಲೆನ ಸಮಸ್ಯೆಲೆಗ್ ಧ್ವನಿ ಆವರೆಗ್ ಬೈದೆ.ಮೀನುಗಾರೆರೆಗ್ ಒವ್ವೇ ರೀತಿದ ಸಮಸ್ಯೆ ಬತ್ತುಂಡಲಾ ಅಕಲೆಗ್ ಧೈರ್ಯ ಕೊರ್ಪಿನ ಬೇಲೆ ಮಲ್ಪುವೆ ಪಂಡುದ್ ಕರ್ನಾಟಕ ಪ್ರದೇಶ ಕಾಂಗ್ರೆಸ್ ಸಮಿತಿದ ಅಧ್ಯಕ್ಷೆರಾಯಿನ ಡಿ.ಕೆ.ಶಿವಕುಮಾರ್ ಪಂಡೆರ್.ಆರು ಮಂಗಳವಾರದಾನಿ ಮಲ್ಪೆ ಬದರುಗ್ ಭೇಟಿ ಕೊರ್ದ್ ಸಮಸ್ತ ಮೀನುಗಾರೆರ್ನ ಧ್ವನಿಯಾದ್ ಪಾತೆರಿಯೆರ್.
ಡಿಜಿಲ್ ದ ರೇಟ್ ದಿನ ಪೋಯಿಲೆಕ್ಕ ಜಾಸ್ತಿ ಆವೊಂದುಂಡ್.ಮೀನುಗಾರೆರೆಗ್ 50 ರೂಪಾಯಿಡ್ ಡಿಸಿಲ್ ಬೊಕ್ಕ 20 ರೂಪಾಯಿಡ್ ಕೆರೊಸಿನ್ ಕೊರುಂಡ ಮಾತ್ರ ಅಕಲೆಗ್ ಮೀನುಗಾರಿಕೆ ಮಲ್ಪರೆಗ್ ಸಾಧ್ಯ ಆಪುಂಡ್.ಇಜ್ಜಾಂಡ ಬಾರೀ ಬಂಗದ ಪರಿಸ್ಥಿತಿನ್ ಮೀನುಗಾರೆರ್ ಎದುರಿಸಾವೊಡಾಪುಂಡ್.ಮೀನುಗಾರಿಕೆ ಮಲ್ರುಜಿಡ ಅವ್ವೆನೇ ನಂಬೊಂದ್ ಬದುಕೊಂದುಪ್ಪುನ ಅವ್ವೇತೊ ಕುಟುಂಬೊಲೆಗ್ ಪೆಟ್ಟು ಬೂರುಂಡ್.ಈ ನಿಟ್ಟುಡ್ ಸರಕಾರ ಮೀನುಗಾರೆರೆಗ್ ಸರಿಯಾಯಿನ ಪರ್ಯಾಯ ವ್ಯವಸ್ಥೆ ಮಲ್ತ್ ಕೊರೊಡು ಪಂಡುದ್ ಆರು ತೆರಿಪಾಯೆರ್. ಈ ಪೊರ್ತುಡ್ ಮೀನುಗಾರ ಮುಖಂಡೆರ್ ಅಕಲ್ನ ಸಮಸ್ಯಲೆನ್ ಡಿ.ಕೆ.ಶಿವಕುಮಾರ್ ನ ದುಂಬು ಪ್ರಸ್ತಾವನೆ ಮಲ್ತೆರ್. ಸಾಗರ ಮಾಲ ಯೋಜನೆ,ನುಂಗೆಲ್ ಮೀನು ನುಂಗಾವುನ ಜಾಗದ ಲೀಜ್ ಸಮಸ್ಯೆ,ಮೀನುಗಾರ ಕಾರ್ಮಿಕೆರ್ನ ಸಮಸ್ಯೆ,ಮತ್ಸ್ಯ ಕ್ಷಾಮ ವಿಚಾರ,ಡೀಸಿಲ್ ಸಬ್ಸಿಡಿ ಸೇರಿನಂಚ ಸರಕಾರದ ಒವ್ವೇ ಯೋಜನೆಲು ಮೀನುಗಾರೆರೆಗ್ ಸರಿಯಾದ್ ತಿಕ್ಕೊಂದಿಜ್ಜಿ ಪಂಡುದ್ ಮೀನುಗಾರ ಮುಖಂಡೆರ್ ಅಕಲ್ನ ಸಮಸ್ಯೆಲೆನ್ ಪಂಡೆರ್.ನೆಕ್ ಪ್ರತ್ಯುತ್ತರ ವಾದ್ ಸರಕಾರೊಗ್ ಕೆಬಿ ಕೇನುಜ ಬಾಯಿ ಬರ್ಪುಜ ? ಮೀನುಗಾರೆರೆಗ್ ದಾಯೆಗ್ ಇಂಚ ಅನ್ಯಾಯ ಮಲ್ಪುನ ಅಕುಲು ನ್ಯಾಯೊಡ್ ಬದುಕರೆಗ್ ಅಕಲೆಗ್ ಬೋಡಾಯಿನ ವ್ಯವಸ್ಥೆ ನ್ ಸರಕಾರ ಮಲ್ಪೊಡು..ಸಬ್ಸಿಡಿ ಕೊರಿಯರೆಗ್ ದಾದ ಸಮಸ್ಯೆ ಪಂಡುದ್ ಸರಕಾರೊನ್ ಪ್ರಶ್ನೆ ಮಲ್ತೆರ್.
ಈ ಪೊರ್ತುಡ್ ವೇದಿಕೆಡ್ ಮಾಜಿ ಸಚಿವೆರಾಯಿನ ಪ್ರಮೋದ್ ಮಧ್ವರಾಜ್,ವಿನಯ್ ಕುಮಾರ್ ಸೊರಕೆ,ಮಾಜಿ ಶಾಸಕೆ ಗೋಪಾಲ ಪೂಜಾರಿ,ಯುವ ಕಾಂಗ್ರೆಸ್ ದ ಮಿಥುನ್ ರೈ,ಮಲ್ಪೆ ಮೀನುಗಾರ ಸಂಘದ ಅಧ್ಯಕ್ಷೆರಾಯಿನ ಕ್ರಷ್ಣ ಸುವರ್ಣ,ಮೀನುಗಾರ ಮುಖಂಡೆರಾಯಿನ ಮದನ್ ಕುಮಾರ್,ಪ್ರಭಾಕರ ಕೊಟ್ಲೆಕರ್,ರಾಘವ ಕರ್ಕೇರ,ರಮೇಶ್ ಕೋಟ್ಯಾನ್,ಪ್ರಸಾದ್ ರಾಜ್ ಕಾಂಚಾನ್,ಶಿವಪ್ಪ ಕಾಂಚಾನ್,ಮಹಿಳಾ ಮೀನುಗಾರ ಸಂಘದ ಅಧ್ಯಕ್ಷೆರಾಯಿನ ಜಲಜ ಕೋಟ್ಯಾನ್.ಉಡುಪಿ ಜಿಲ್ಲಾ ಕಾಂಗ್ರೆಸ್ ಅಧ್ಯಕ್ಷ ಅಶೋಕ್ ಕುಮಾರ್ ಕೊಡವೂರು,ರಮೇಶ್ ಕಾಂಚಾನ್,ಹರೀಶ್ ಕಿಣಿ,ಸತೀಶ್ ಅಮೀನ್ ಮೊಕುಲು ಮಾತಾ ಉಪಸ್ಥಿತರಿತ್ತೆರ್..
