ಡೆಲ್ಲಿ: ಗುಜರಾತ್ ವಿಧಾನಸಭೆ ಚುನಾವಣೆಗ್ ಸಂಬಂಧ ಪಟ್ಟಿನ ಬಿಜೆಪಿ ಅಭ್ಯರ್ಥಿಲೆನ ಸುರುತ ಪಟ್ಟಿ ಪ್ರಕಟ ಆತ್ಂಡ್.
ಈ ಪಟ್ಟಿಡ್ ಕ್ರಿಕೆಟರ್ ರವೀಂದ್ರ ಜಡೇಜಾ ಮೆರೆನ ಬೊಡೆದಿ ರಿವಾಬ್ ಗ್ ಬಿಜೆಪಿ ಟಿಕೆಟ್ ಕೊರ್ತುಂಡು. ಮೇರ್ ಜಾಮ್ ನಗರ ಉತ್ತರ ವಿಧಾನಸಭಾ ಕ್ಷೇತ್ರರ್ದ್ ಬಿಜೆಪಿ ಅಭ್ಯರ್ಥಿಯಾದ್ ವೋಟ್ ಗ್ ಉಂತೆರೆ ಉಲ್ಲೆರ್.
ಜೈಪುರ: ಭಾರತದ ಆಣನ್ ಮದಿಮೆ ಆಯಿನ ಜರ್ಮನಿ ಮೂಲದ ಪೊಂಜೋವ್ ಇತ್ತೆ ಜೈಪುರದ ಕೈತಲ್ ನೀರುಳ್ಳಿ ಕೃಷಿ ಮಲ್ತೊಂದು ಉಲ್ಲೆರ್.
ಮಾಮಿ ಇಲ್ಲಲ್ ಇಪ್ಪುನ ಮೇರ್ ಇತ್ತೆ ಹಳ್ಳಿದ ಬದುಕು ನಡಪಾವೊಂದು ಉಲ್ಲೆರ್. ಅತ್ತಂದೆ ಇತ್ತೆ ಹಿಂದಿಡ್ ಪಾತೆರ್ಯೆರೆ ಕಲ್ತ್ ದೆರ್. ನೀರುಳ್ಳಿ ನಡ್ಪುನ ವೀಡಿಯೋನ್ ನಮಸ್ತೆ ಜೂಲಿ ಪನ್ಪುನ ಇನ್‍ಸ್ಟಾಗ್ರಾಮ್ ಅಕೌಂಟ್ ಡ್ ಪಾಡ್ದೆರ್. ನೆಟ್ ಭಾರತದ ಹಳ್ಳಿದ ಬದುಕ್ ಡ್ ಖುಷಿ ಆದ್ ಉಲ್ಲೆ ಪಂದ್ ಪಂತೆರ್. ಈ ವೀಡಿಯೋ ತೂಪುನಕ್ಲೆನ ಉಡಲ್ ಗೆಂದ್ ದ್ಂಡ್. ಮೆರೆನ ಈ ವೀಡಿಯೋ ಗ್ ಸಾರ ಸಾರ ಜನ ಲೈಕ್ ಮಲ್ದೆರ್.
ಬಂಟ್ವಾಳ: ಬೇಲೆಗ್ ಸೇರ್ಯೆರೆಗ್ ಇಂಟರ್‌ವ್ಯೂ ಲೆಟರ್ ಬೈದ್ಂಡ್, ಯಾನ್ ಇಂಟರ್‌ವ್ಯೂಗ್ ಪೋದು ಬರ್ಪೆ ಪಂದ್ ಇಲ್ಲಲ್ ದಕ್ಲೆಡ ಪಂದ್ ಪೋಯಿನ ಪೊಣ್ಣು ನನಲ ಇಲ್ಲಡೆ ಬರಂದೆ ನಾಪತ್ತೆ ಆತೆರ್.
ಬಂಟ್ವಾಳ ತಾಲೂಕ್ ದ ಇಡ್ಕಿದು ಗ್ರಾಮದ ಕಂಬಳಬೆಟ್ಟು ನಿವಾಸಿ ದಿ. ಆನಂದ ಮೆರೆನ ಮಗಲ್ ಸುಶ್ಮಿತ ( 21) ನಾಪತ್ತೆ ಆತಿನಾರ್. ಮೇರ್ ನ. 8 ಅಂಗಾರೆ ಬೊಲ್ಪುಗು ಇಲ್ಲ್ ರ್ದ್ ಕುಡ್ಲಗ್ ಪಂದ್ ಬೈದೆರ್. ಈ ಬಗೆಟ್ ವಿಟ್ಲ ಪೋಲೀಸ್ ಠಾಣೆಗ್ ದೂರು ದಾಖಲ್ ಆತ್ಂಡ್. ಪೊಲೀಸೆರ್ ಮೆರೆನ್ ನಾಡೊಂದು ಉಲ್ಲೆರ್.
ಬೆಂಗ್ಲೂರ್: ನಾಗದೇವೆರೆನ ಮೂರ್ತಿನ್ ಬಚ್ಚಾಲಿಲು ವಿರೂಪ ಮಲ್ತ್ ದ್, ಹಿಂದೂಲೆನ ಭಾವನೆಗ್ ಧಕ್ಕೆ ಕನತಿನ ಘಟನೆ ಬೆಂಗ್ಲೂರ್ ದ ಎಲೆಕ್ಟ್ರಾನಿಕ್ ಸಿಟಿ ಚಿಕ್ಕತೋಗೂರ್ ಗೇಟ್ ದ ಕೈತಲ್ ನಡತ್ಂಡ್.
ಸುಮಾರ್ 30 ವರ್ಷರ್ದಿಂಚ ಮುಲ್ಪ ಪೂಜೆ ಪುನಸ್ಕಾರ ನಡತೊಂದು ಉಂಡು. ಪ್ರತಿದಿನಲ ಪೂಜೆ ನಡಪುನ ಈ ಜಾಗೆಡೇ ಬಚ್ಚಾಲಿಲು ಕಲ್ಲ್ ಡ್ ಆಕ್ ದ್ ದೇವೆರೆನ ಮೂರ್ತಿನ್ ಪುಡತ್ ಪಡ್ದೆರ್. ದೇವೆರೆನ ಮೂರ್ತಿನ್ ವಿರೂಪ ಮಲ್ತಿನೆಕ್ಕ್ ಹಿಂದೂ ಸಂಘಟನೆದ ಕಾರ್ಯಕರ್ತೆರ್ ಬೆಚ್ಚ ಆತೆರ್. ಈ ಜಾಗೆಗ್ ಬಜರಂಗದಳ ಬೊಕ್ಕ ಹಿಂದೂ ಪರ ಹೋರಾಟಗಾರೆರ್, ಎಲೆಕ್ಟ್ರಾನಿಕ್ ಸಿಟಿ ಪೊಲೀಸೆರ್ ಭೇಟಿ ಕೊರ್ತೆರ್.
ಒಡಿಪು: ಬುಡೊಕಾನ್ ಕರಾಟೆ ಡೋ ಇಂಡಿಯಾ ವತಿರ್ದ್ ಒಡಿಪುಡು ಇಂಚಿಪ್ಪ ನಡತಿನ 40ನೇ ರಾಷ್ಟ್ರಮಟ್ಟದ ಕರಾಟೆ ಚಾಂಪಿಯನ್ ಶಿಪ್‌ಡ್ ಪರ್ಕಳ ಇಂಗೀಷ್ ಮೀಡಿಯಮ್ ಶಾಲೆದ 7ನೇ ಕ್ಲಾಸ್ ದ ವಿದ್ಯಾರ್ಥಿ ಮುಹಮ್ಮದ್ ಮಾಹಿಝ್ ಶಾಲಿಮಾರ್ ಮೇರ್ ಕಟಾ, ಕುಮಿಟೇ ಬೊಕ್ಕ ಟೀಮ್ ಕಟ ಮೂಜಿ ವಿಭಾಗಲೆಡ್ ಮೂಜಿ ಬಂಗಾರ್ ದ ಪದಕಲೆನ್ ಗೆಂದ್ ದೆರ್.
ಮೇರ್ ಆತ್ರಾಡಿದ ಮುಹಮ್ಮದ್ ಶಮೀರ್ ಬೊಕ್ಕ ಅಸ್ಮಾ ದಂಪತಿಲೆನ ಮಗೆ. ಅಂತಾರಾಷ್ಟ್ರೀಯ ಕರಾಟೆ ಪಟು ಪ್ರವೀಣ್ ಸುವರ್ಣ ಮೆರೆಡ ಕರಾಟೆ ಟ್ರೈನಿಂಗ್ ದೆತೊನೊಂದು ಉಲ್ಲೆರ್.
ಬೊಲ್ತೇರ್: ದಕ್ಷಿಣ ಕನ್ನಡ ಜಿಲ್ಲಾ ಮಟ್ಟದ ಪದವಿ ಪೂರ್ವ ವಿದ್ಯಾರ್ಥಿಲೆನ 2022-23 ನೇ ಸಾಲ್ ದ ಸಾಹಿತ್ಯ ಬೊಕ್ಕ ಸಾಂಸ್ಕೃತಿಕ ಪಂತೊ ನ.12 ದಾನಿ ಉಜಿರೆ ಎಸ್. ಡಿ.ಎಂ. ಪದವಿ ಪೂರ್ವ ಕಾಲೇಜ್ ಡ್ ನಡಪರೆ ಉಂಡು.
ಈ ಲೇಸ್ ನ್ ವಿಧಾನ ಪರಿಷತ್ ಸದಸ್ಯೆರ್ ಪ್ರತಾಪ ಸಿಂಹ ನಾಯಕ್ ಉದಿಪನ ಮಲ್ಪೆರೆ ಉಲ್ಲೆರ್. ಅಧ್ಯಕ್ಷತೆನ್ ದಕ್ಷಿಣ ಕನ್ನಡ ಪದವಿ ಪೂರ್ವ ಶಿಕ್ಷಣ ಇಲಾಖೆದ ನಿರ್ದೇಶಕೆರ್ ಜಯಣ್ಣ ಸಿ.ಡಿ. ಒಯಿಸೊನ್ವೆರ್. ಶ್ರೀ ಧರ್ಮಸ್ಥಳ ಮಂಜುನಾಥೇಶ್ವರ ಶಿಕ್ಷಣ ಸಂಸ್ಥೆದ ವಿದ್ಯಾರ್ಥಿ ಕ್ಷೇಮಪಾಲನಾ ಅಧಿಕಾರಿ ಬಿ. ಸೋಮಶೇಖರ ಶೆಟ್ಟಿ ಬಿನ್ನೆರಾದ್ ಪಾಲ್ ಪಡೆ ವೆರ್ ಪಂದ್ ಕಾಲೇಜ್ ಪ್ರಕಟಣೆಡ್ ತೆರಿಪಾದ್ಂಡ್.
ಕುಡ್ಲ: ರಾಜ್ಯೊಡು ಬಿ.ಜೆ.ಪಿ ದಕ್ಲೆನ ಮಾಲಿಕತ್ವೊಡು ಇಪ್ಪುನ 11 ಬೀಫ್ ಫ್ಯಾಕ್ಟರಿಲೆನ್ ಉಂತಾವುನ ತಾಕತ್ತ್ ಬಿ.ಜೆ.ಪಿ ಸರಕಾರಗ್ ಉಂಡಾ ಪಂದ್ ಯು.ಟಿ ಖಾದರ್ ಕೇನ್ದೆರ್.
ಮೇರ್ ಕೋಡೆ ಕುಡ್ಲದ ಕಾಂಗ್ರೆಸ್ ಕಚೇರಿಡ್ ಪಾತೆರ್ದ್, ಸೆಂಟ್ರಲ್ ಮಾರ್ಕೆಟ್‌ಡ್ ಬೀಫ್ ಫ್ಯಾಕ್ಟರಿಲೆನ್ ಮಲ್ತ್ ದ್ ನೇ ಮಹಾನಗರ ಪಾಲಿಕೆ ಬೊಕ್ಕ ಅಲ್ಪದ ಜನಪ್ರತಿನಿಧಿನಕುಲು. ನೆತ್ತ ಬಗೆಟ್ ಅಕುಲ್ ಕ್ರಮ ಗೆತೊನೊಡ ಪಂದ್ ಪಂಡೆರ್.
ಬೊಂಬಾಯಿ: ಕೋಟಿ ರೂಪಾಯಿ ಕಾಸ್‌ಡ್ ಜೀರ್ಣೋದ್ಧಾರ ಆಯರೆ ಇಪ್ಪುನ ಹಳೆಯಂಗಡಿ ಕೈತಲ್ದ ತೋಕೂರು ಶ್ರೀ ಸುಬ್ರಹ್ಮಣ್ಯ ದೇವಲ್ಯದ ಜೀರ್ಣೋದ್ಧಾರ ಸಮಿತಿದ ಬೊಂಬಾಯಿ ಉಪ ಸಮಿತಿದ ವಿಶೇಷ ಸಭೆ ನ.13 ಕ್ಕ್ ಕಾಂಡೆ 10.30 ಗಂಟೆಗ್ ಘಾಟ್ಕೋಪರ್ ಪೂರ್ವದ ರೈಲ್ ನಿಲ್ದಾಣ ಕೈತಲ್ ಇಪ್ಪುನ ಹೋಟೆಲ್ ಸಾಮ್ರಾಟ್ ಚಾವಡಿಡ್ ನಡಪರೆ ಉಂಡು.
ದೇವಲ್ಯದ ವ್ಯವಸ್ಥಾಪನ ಸಮಿತಿದ ಅಧ್ಯಕ್ಷೆರ್ ಹರಿದಾಸ್ ಭಟ್ ಅಧ್ಯಕ್ಷತೆಡ್ ಜೀರ್ಣೋದ್ಧಾರ ಸಮಿತಿದ ಗೌರವಾಧ್ಯಕ್ಷೆರ್ ತೋಕೂರುಗುತ್ತು ಭಾಸ್ಕರ್ ಶೆಟ್ಟಿ ಮುತಾಲಿಕೆಡ್ ನಡಪುನ ಸಮಲೋಚನ ಸಭೆಟ್ಟ್ ಊರುದ ಅಂಚನೆ ಪರಿಸರದ ಗ್ರಾಮಸ್ಥೆರ್ ಪಾಲ್ ಪಡೆಯೊಂದ್, ಸಲಹೆ-ಸೂಚನೆ ಕೊರ್ದ್ ಸಭೆನ್ ಯಶಸ್ವಿ ಮಲ್ಪೊಡು ಪಂದ್ ಬೊಂಬಾಯಿ ಸಮಿತಿದ ಅಧ್ಯಕ್ಷೆರ್ ನಾಗೇಶ್ ಜಿ. ಶೆಟ್ಟಿ, ಗೌರವ ಪ್ರಧಾನ ಕಾರ್ಯದರ್ಶಿ ರಾಮಣ್ಣ ಬಿ. ದೇವಾಡಿಗ, ಕೋಶಾಧಿಕಾರಿ ಶಶಿಧರ ಆರ್ ಶೆಟ್ಟಿ ಮೊಕುಲು ಪತ್ರಿಕಾ ಪ್ರಕಟನೆಡ್ ತೆರಿಪಾದೆರ್.
ಧರ್ಮಸ್ಥಳ: ಶ್ರೀ ಕ್ಷೇತ್ರ ಧರ್ಮಸ್ಥಳ ಕಾರ್ತಿಕ ತಿಂಗೊಲ್ದ ದೀಪ ಉಚ್ಚಯೊಗು ತಯಾರ್ ಆತ್ಂಡ್. ನ. 19-23 ಮುಟ್ಟ ಧರ್ಮಸ್ಥಳಡ್ ಲಕ್ಷದೀಪೋತ್ಸವದ ಗೌಜಿ ನಡಪರೆ ಇತ್ತ್‌ದ್, ಲಕ್ಷಾಂತರ ಭಕ್ತೆರ್ ಸೇರಿಯರೆ ಉಲ್ಲೆರ್. ಅಂಚನೆ ಬೇತೆ ಬೇತೆ ರೀತಿದ ಸಾಂಸ್ಕೃತಿಕ ಲೇಸ್ ನಡಪರೆ ಉಂಡು.
ನ.22 ಕ್ಕ್ 90ನೇ ವರ್ಷದ ಸರ್ವಧರ್ಮ ಸಮ್ಮೇಳನ ನ. 23 ಕ್ಕ್ ಸಾಹಿತ್ಯ ಸಮ್ಮೇಳನ ಲಕ್ಷದೀಪೋಚ್ಚಯದ ಲೆಕ್ಕೊಡು ನಡಪರೆ ಇತ್ತ್‌ದ್ ಕೇಂದ್ರ ಸಚಿವೆರ್ ಸ್ಮೃತಿ ಇರಾನಿ ಸೇರಿನಂಚನೆ ನಾಡ್‌ದ ಮಲ್ಲ ಮಲ್ಲ ವಿದ್ವಾಂಸೆರ್ ಈ ಲೇಸ್‌ಡ್ ಪಾಲ್ ಪಡೆಯರೆ ಉಲ್ಲೆರ್.
ಲಕ್ಷದೀಪೋಚ್ಚಯದ ಲೆಕ್ಕೊಡು ವಸ್ತು ಪ್ರದರ್ಶನ, ಸಾಂಸ್ಕೃತಿಕ ಲೇಸ್, ಮನೋರಂಜನೆದ ಲೇಸ್ ರಾತ್ರೆ ಇಡೀ ನಡಪರೆ ಉಂಡು. ನ.19 ಗ್ ಮಂಜುನಾಥ ಸ್ವಾಮಿನ ಹೊಸಕಟ್ಟೆ ಉಚ್ಚಯ, ನ. 20 ಗ್ ಕರೆಕಟ್ಟೆ ಉಚ್ಚಯ, ನ. 21 ಕ್ಕ್ ಲಲಿತೋಧ್ಯಾನ ಉಚ್ಚಯ, ನ. 22 ಕ್ಕ್ ಕಂಚಿಮಾರುಕಟ್ಟೆ ಉಚ್ಚಯ, ನ.23 ಕ್ಕ್ ಗೌರಿ ಮಾರುಕಟ್ಟೆ ಉಚ್ಚಯ ನಡತ್ ದ್ ಲಕ್ಷದೀಪೋತ್ಸವದ ಗೌಜಿ ಮುಗಿತಲದ ಲೇಸ್ ನಡಪರೆ ಉಂಡು.
ದಿಲ್ಲಿ: ಭಾರತೀಯ ಜನತಾ ಪಕ್ಷದ ಮೋರ್ಬಿದ ಮಾಜಿ ಶಾಸಕೆರ್ ಕಾಂತಿವಾಲ್ ಅಮೃತಿಯಾ ಮೆರೆಗ್ ಈ ಸರ್ತಿದ ವಿಧಾನಸಭಾ ವೋಟುಗು ಟಿಕೆಟ್ ಕೊರ್ತೆರ್.
ಇಚಿಂಪ್ಪಗ್ ಮೋರ್ಬಿ ಸಂಕದ ಘಟನೆ ಆನಗ ತನ್ನ ಜೀವದ ಹಂಗ್ ಬುಡ್ದ್ ಟ್ಯೂಬ್ ಪಾಡೊಂದು ನೀರ್‌ಗ್ ಲಾಗಿನ ಕಾಂತಿವಾಲ್ ಮಸ್ತ್ ಜನತ್ತ ಜೀವ ಒರಿಪಾದೆರ್. ಘಟನೆದ ಪೊರ್ತುಡು ಧೈರ್ಯ ಮಲ್ತ್ ಮಲ್ತಿನ ಬೇಲೆಗ್ ಪ್ರತಿಫಲ ತಿಕ್ಕ್‌ದ್ಂಡ್.
