2022

ನ. 19-23 ಮುಟ್ಟ ಶ್ರೀ ಕ್ಷೇತ್ರ ಧರ್ಮಸ್ಥಳಡ್ ಲಕ್ಷ ದೀಪ ಉಚ್ಚಯದ ಗೌಜಿ

ಶ್ರೀ ಕ್ಷೇತ್ರ ಧರ್ಮಸ್ಥಳಡ್ ನ. 19-23 ಮುಟ್ಟ ಲಕ್ಷದೀಪೋತ್ಸವ ಬೊಕ್ಕ ಸರ್ವಧರ್ಮ ಬೊಕ್ಕ ಸಾಹಿತ್ಯ ಸಮ್ಮೇಳನದ ಗೌಜಿ ನಡಪರೆ ಉಂಡು. ಈ ದೀಪೊತ್ಸವಡ್ ಲಕ್ಷಾಂತರ ಭಕ್ತೆರ್ ಸೇರ್ದ್ ದೇವೆರೆನ ದರ್ಶನ ಪಡೆಯರೆ ಉಲ್ಲೆರ್.

ನ.19 ಗ್ ಮಂಜುನಾಥ ಸ್ವಾಮಿನ ಹೊಸಕಟ್ಟೆ ಉಚ್ಚಯ ನಡತ್ತ್‌ದ್ ಕಾಂಡೆ 10.30 ಗ್ ವಸ್ತು ಪ್ರದರ್ಶನ ಉದಿಪನ ಆಯರೆ ಉಂಡು. ಬೊಲ್ತೇರ್ ಶಾಸಕೆರ್ ಹರೀಶ್ ಪೂಂಜ ವಸ್ತುಪ್ರದರ್ಶನ ಉದಿಪನ ಮಲ್ಪರೆ ಉಲ್ಲೆರ್. ನ. 20 ಗ್ ಕರೆಕಟ್ಟೆ ಉಚ್ಚಯ, ನ. 21 ಕ್ಕ್ ಲಲಿತೋದ್ಯಾನ ಉಚ್ಚಯ, ಲಲಿತಕಲಾ ಗೋಷ್ಠಿ, ನ. 22 ಕ್ಕ್ ಕಂಚಿಮಾರುಕಟ್ಟೆ ಉಚ್ಚಯ ಬೊಕ್ಕ ಸರ್ವಧರ್ಮ ಸಮ್ಮೇಳನ, ನ.23 ಕ್ಕ್ ಗೌರಿ ಮಾರುಕಟ್ಟೆ ಉಚ್ಚಯ, ಸಾಹಿತ್ಯ ಸಮ್ಮೇಳನ, ನ.24 ಕ್ಕ್ ಶ್ರೀ ಚಂದ್ರನಾಥ ಸ್ವಾಮಿನ ಸಮವಸರಣ ಪೂಜೆ ನಡಪರೆ ಉಂಡು.

ನ.22 ಕ್ಕ್ ಧರ್ಮಸ್ಥಳದ ಅಮೃತವರ್ಷಿಣಿ ಸಭಾಭವನಡ್ 90 ನೇ ವರ್ಷದ ಸರ್ವಧರ್ಮ ಸಮ್ಮೇಳನ ನಡಪರೆ ಇತ್ತ್‌ದ್, ಪೊಂಜೋವು ಬೊಕ್ಕ ಜೋಕ್ಲೆನ ಅಭಿವೃದ್ಧಿ ಮಂತ್ರಾಲಯ ಬೊಕ್ಕ ಅಲ್ಪಸಂಖ್ಯಾತ ವ್ಯವಹಾರದ ಸಚಿವೆರ್ ಸ್ಮೃತಿ ಇರಾನಿ ಈ ಲೇಸ್‌ನ್ ಉದಿಪನ ಮಲ್ಪರೆ ಉಲ್ಲೆರ್. ಶಿವಮೊಗ್ಗದ ಬಹುಶ್ರುತ ವಿದ್ವಾಂಸೆರ್ ಬೊಕ್ಕ ನ್ಯಾಯವಾದಿ ಎಂ. ಆರ್. ಸತ್ಯನಾರಾಯಣ ಲೇಸ್‌ಡ್ ಗುರ್ಕಾರ್ಮೆ ವಹಿಸೊನರೆ ಉಲ್ಲೆರ್. ಅಂಚನೆ ಮಲ್ಲ ಬಿನ್ನೆರ್ ಲೇಸ್‌ಡ್ ಪಾಲ್ ಪಡೆಯರೆ ಉಲ್ಲೆರ್.

ನ.23 ಕ್ಕ್ ಸಾಹಿತ್ಯ ಸಮ್ಮೇಳನ ನಡಪರೆ ಇತ್ತ್‌ದ್ ಬೆಂಗ್ಲೂರ್‌ದ ರಾಷ್ಟ್ರಪ್ರಶಸ್ತಿ ವಿಜೇತೆರ್ ಶ್ರೇಷ್ಠ ಚಲನಚಿತ್ರ ನಿರ್ದೇಶಕೆರ್ ಪಿ. ಶೇಷಾದ್ರಿ ಲೇಸ್ ಉದಿಪನ ಮಲ್ಪರೆ ಉಲ್ಲೆರ್. ಅಂಚನೆ ಮೈಸೂರ್‌ದ ರಾಷ್ಟ್ರಪತಿ ಪ್ರಶಸ್ತಿ ಪುರಸ್ಕೃತ ವಿದ್ವಾಂಸೆರ್ ಬೊಕ್ಕ ಸಂದರ್ಶಕ ಪ್ರಾಧ್ಯಾಪಕೆರ್ ವಿದ್ವಾನ್ ಡಾ. ಹೆಚ್.ವಿ. ನಾಗರಾಜ ರಾವ್ ಲೇಸ್‌ದ ಗುರ್ಕಾರ್ಮೆ ವಹಿಸೊನರೆ ಉಲ್ಲೆರ್.

ಲಕ್ಷದೀಪೋಚ್ಚಯದ ಲೆಕ್ಕೊಡು ಸಾಂಸ್ಕೃತಿಕ ಲೇಸ್, ಮನೋರಂಜನೆದ ಲೇಸ್ ರಾತ್ರೆ ಇಡೀ ನಡಪರೆ ಉಂಡು. ನ.23 ಕ್ಕ್ ಗೌರಿ ಮಾರುಕಟ್ಟೆ ಉಚ್ಚಯ ನಡತ್ ದ್ ಲಕ್ಷದೀಪೋತ್ಸವದ ಗೌಜಿ ಮುಗಿತಲದ ಲೇಸ್ ನಡಪರೆ ಉಂಡು ಪಂದ್ ದೇವಸ್ಥಾನದ ಲೆಪ್ಪೋಲೆಡ್ ತೆರಿಪಾದೆರ್.