2021

“ದೊಂದಿ ಬೊಲ್ಪುಡು ನಡಪುನ ರಾಶಿಪೂಜಾ ಮಹೋತ್ಸವದ ಛಾಯಾಚಿತ್ರ ಸಾಂಗತ್ಯ” ಪಂತೋದ ಇನಾಮು ಪಟ್ಟುನ ಲೇಸ್

ರಾಶಿಪೂಜಾ ಮಹೋತ್ಸವದ ಗೌಜಿನ್ ತನ್ನ ಕ್ಯಾಮೆರಾ ಕಣ್ಣ್ ದ ಮುಖೇನ ದಾಖಲೆ ಮಲ್ತ್ ದ್ ಮಹೋತ್ಸವದ ಪೊರ್ಲುನು ಇಮ್ಮಡಿ ಮಲ್ದೆರ್ ಪಂದ್ ಶ್ರೀ ದೇವಳದ ವ್ಯವಸ್ಥಾಪನಾ ಸಮಿತಿ ಗುರ್ಕಾರ್ಲಾಯಿನ ಕೊಡವೂರು ಪ್ರಕಾಶ್ ಜಿ ಮೇರ್ ರಾಶಿ ಪೂಜಾ ಮಹೋತ್ಸವ ಸೇವಾ ಸಮಿತಿ ಶ್ರೀ ಶಂಕರ ನಾರಾಯಣ ದೇವಸ್ಥಾನ ಕೊಡವೂರು ಬೊಕ್ಕ ಸೌತ್ ಕೆನರಾ ಫೋಟೋಗ್ರಾಪರ್ಸ್ ಅಸೋಷಿಯೇಷನ್ ಉಡುಪಿ ವಲಯ ಅಟ್ಟನೆ ಮಲ್ದಿನ “ದೊಂದಿ ಬೊಲ್ಪುದ ರಾಶಿಪೂಜಾ ಮಹೋತ್ಸವಗ್ ಛಾಯಾಚಿತ್ರ ಸಾಂಗತ್ಯ” ಪನ್ಪಿನ ಶೀರ್ಷಿಕೆದಡಿ ಅಟ್ಟನೆ ಮಲ್ದಿನ ಛಾಯಾಗ್ರಹಣ ಪಂತೋದ ಇನಾಮು ಪಟ್ಟುನ ಲೇಸ್ ಡ್ ಸೋಮವಾರ ಗೆಂದಿನಕ್ಲೆಗ್ ಇನಾಮು ಪಟ್ಟಿಯೆರ್.

ಬಿನ್ನೆರ್ ಆಯಿನ ಜೇಸಿಐ ಸ್ವರ್ಣ ಉಡುಪಿದ ಗುರ್ಕಾರ್ಲಾಯಿನ ಸುದೀಪ್ ಶೆಟ್ಟಿ ಪಾತೆರ್ದ್ ದೊಂದಿ ಬೊಲ್ಪುದ ರಾಶಿಪೂಜಾ ಮಹೋತ್ಸವದ ಛಾಯಾಗ್ರಹಣ ಬಾರಿ ಕಲಾತ್ಮಕವಾದ್ ಮೂಡುದು ಬೈದುಂಡು. ನಿಜವಾದ್ ಲಾ ಛಾಯಾಗ್ರಾಹಕೆರ್ ಅಭಿನಂದನಾರ್ಹೆರ್ ಪಂದ್ ಪಂಡೆರ್.

ಇನಾಮು ಗೆಂದಿನ ಪ್ರದೀಪ್ ಉಪ್ಪುರು, ಪ್ರಶಾಂತ್ ಕೆಮ್ಮಣ್ಣು, ಶ್ರೀಕಾಂತ್ ಉಡುಪ, ದಾಮೋದರ್ ಸುವರ್ಣ ಬೊಕ್ಕ ಸಚಿನ್ ಪೂಜಾರಿ ಮೆರೆಗ್ ಇನಾಮು ಪಟ್ಟಿಯೆರ್.ನಮ್ಮ ವಲಯದ ಸದಸ್ಯೆರಾದ್ ಪ್ರಸ್ತುತ ಬಾದಾಮಿ ಪಂಚಾಯತ್ ಸದಸ್ಯರಾದ್ ಆಯ್ಕೆಯಾಯಿನ ಬಿ.ಎಮ್ ಬೋವಿ ಮೆರೆಗ್ ಮಾನಾದಿಗೆ ಮಲ್ತೆರ್.. ಈ ಪೊರ್ತುಡು ವಲಯ ಗೌರವಾಧ್ಯಕ್ಷ ಶಿವ ಕೆ. ಅಮೀನ್ ಪಾಲ್ ಪಡೆದಿತ್ತೆರ್ . ತೀರ್ಪುಗಾರೆರಾದ್ ಆಸ್ಟ್ರೋ ಮೋಹನ್ ಸಾಕಾರ ಕೊರಿಯೆರ್.

ರಾಶಿಪೂಜಾ ಸೇವಾ ಸಮಿತಿದ ಕಾರ್ಯದರ್ಶಿ ಜನಾರ್ದನ್ ಕೊಡವೂರು ಎದುಕೊಂಡೆರ್ . ವಲಯಾಧ್ಯಕ್ಷ ಪ್ರಕಾಶ್ ಕೊಡಂಕೂರ್ ಪ್ರಸ್ತಾವನೆ ಮಲ್ತೆರ್ . ರಾಘವೇಂದ್ರ ಸೇರಿಗಾರ್ ನಿರೂಪಣೆ ಮಲ್ತೆರ್ . ಕಾರ್ಯದರ್ಶಿ ಸುಕೇಶ್ ಅಮೀನ್ ಸೊಲ್ಮೆ ಸಂದೈತ ಮಲ್ತೆರ್ .

ಸಚಿವ ಕೋಟ ಮೆರ್ನ ಇಲ್ಲಗ್ ಪೇಜಾವರ ಶ್ರೀ ಭೇಟಿ ಸಚಿವೆರೆರ್ದ್ ಗುರುಪೂಜೆ

ಪೇಜಾವರ ಶ್ರೀ ವಿಶ್ವಪ್ರಸನ್ನತೀರ್ಥ ಶ್ರೀಪಾದೆರ್ ರಾಜ್ಯ ಹಿಂದುಳಿದ ವರ್ಗದ ಕಲ್ಯಾಣ ಇಲಾಖೆ ಬೊಕ್ಕ ಮುಜರಾಯಿ ಮಂತ್ರಿ ಕೋಟ ಶ್ರೀನಿವಾಸ ಪೂಜಾರಿ ಮೆರ್ನ ಆಹ್ವಾನದ ಮೇರೆಗ್ ಕೋಟಡುಪ್ಪುನ ಆರ್ನ ಇಲ್ಲಗ್ ಸೋಮವಾರ ಬೆಳಕಾಂಡೆ ಗ್ಗೆ ಭೇಟಿ ಕೊರಿಯೆರ್ .

ಶ್ರೀಲೆನ್ ಭಕ್ತಿಡ್ ಎದುಕೊನಿನ ಶ್ರೀನಿವಾಸ ಪೂಜಾರಿ ಶಾಂತಾ ದಂಪತಿ ಶ್ರೀಲೆನ ಕಾರ್ ಗ್ ನೀರ್ ಪಾರ್ದ್ ತುಳಸಿ ಮಾಲಾರ್ಪಣೆ ಮಲ್ತೆರ್ .‌ಇಲ್ಲದ ದೇವೆರ್ನ ಕೋಣೆದ ಎದುರು ಅಲಂಕೃತ ಪೀಠಡ್ ಶ್ರೀ ರಾಮದೇವೆರ್ನ ಭಾವಚಿತ್ರಗ್ ಪುಷ್ಪಮಾಲಾರ್ಪಣೆ ಮಲ್ತೆರ್ ಮಂಗಳಾರತಿ ಮಲ್ತೆರ್ .

ಐರ್ದ್ ಬೊಕ್ಕ ನಡತಿನ ಗುರುವಂದನಾ ಸಭೆಟ್ ಪ್ತಸ್ತಾವನೆದೊಟ್ಟಿಗೆ ಶ್ರೀಲೆಗ್ ಸಚಿವೆರ್ 7 ವರ್ಷದ ಪಿರವು ಕೀರ್ತಿಶೇಷ ಶ್ರೀ ವಿಶ್ವೇಶತೀರ್ಥ ಶ್ರೀಲು ಇಲ್ಲಗ್ ಭೇಟಿ ಕೊರ್ದು ಅನುಗ್ರಹ ಮಲ್ತಿನೆನ್ ನೆಂಪು ಮಲ್ತೊಂದು ಇತ್ತೆ ಶಿಷ್ಯ ಶ್ರೀಲಾ ಗುರುಕ್ಲೆನ ಮಹದಾಶಯದ ಸಾದಿಡ್ ಪೋವೊಂದು ಸಮಸ್ತ ಹಿಂದೂ ಸಮಾಜನ್ ಸಂಘಟನೆ ಮಲ್ಪುನ ಕಾರ್ಯಡ್ ಸಕ್ರಿಯೆರಾದ್ ಪೋವೊಂದು ಉಪ್ಪುನ ಬಾರಿ ಸಂತೋಸದ ಇಚಾರ ಪಂದ್ ಪಂಡೆರ್.ಶ್ರೀಲೆನ ಆಗಮನರ್ದ್ ಕುಚೇಲನ ಇಲ್ಲಗ್ ಕೃಷ್ಣ ಬತ್ತಿಲಕತನ್ನ ಇಡೀ ಕುಟುಂಬಗ್ ಬಾರಿ ಸಂತೋಷ ಆತುಂಡು ಪಂದ್ ಪಂಡೆರ್.ಅಂಚನೇ ಪೂಮಾಲೆ, ಫಲಪುಷ್ಪ ಗುರುಕಾಣಿಕೆ ಸಹಿತ ಗುರುವಂದನೆ ನ್ ಪೂಜಾರಿಲೆನ ಇಲ್ಲದಕುಲು ಮಲ್ತೆರ್ . ಇಂದೇ ಪೊರ್ತುಡು  ಮಾರ್ಚ್ 13 ತಾರೀಖ್ ಗ್ ನಡಪರೆ ಉಪ್ಪುನ ದಕ ಉಡುಪಿ ಉಭಯ ಜಿಲ್ಲೆದ ಪಂಚಾಯತ್ ಸದಸ್ಯೆರ್ನ *ಹೊಳಪು* ಕ್ರೀಡಾಕೂಟದ ಆಂಮತ್ರಣ ಪತ್ರಿಕೆನ್ ಶ್ರೀಲು ಬುಡುಗಡೆ ಮಲ್ತೆರ್. ಸಂದೇಶ ಕೊರಿನ ಶ್ರಿಲು , ರಾಮನ ಕಾರ್ಯಡ್ ಸಮಗ್ರ ಹಿಂದು ಸಮಾಜ ಬಾರಿ ಉಮೇದ್ ಡ್ ಪಾಲ್ ಪಡೆಯೋಡು. ಅನ್ಯ ಮತೀಎರೆರ್ದ್ ಹಿಂದೂ ಸಮಾಜ ಎದುರಿಸಾವುನ ಸವಾಲುಲೆನ್ ಸಂಘಟಿತರಾದ್ ಎದುರಿಸಾವೊಡು . ಹೊಳಪು ಕ್ರೀಡಾಕೂಟ ಯಶಸ್ವಿಯಾವಡ್ ಪಂದ್ ಎಡ್ಡೆಪ್ಪು ಬಯಕಿನ ಶ್ರೀಲು ಸಚಿವ ಪೂಜಾರಿಲು ಮಂತ್ರಿಯಾದ್ ಇಡೀ ಸಮಾಜದ ಎಡ್ಡೆಪ್ಪುಗು ಬೆರಿಸಾಯ ಕೊರ್ಪಿನ ಶ್ಲಾಘನೀಯ ಪಂದ್ ಪಂಡೆರ್.

ಉದ್ಯಮಿ ,ಸಾಮಾಜಿಕ ಧುರೀಣ ಆನಂದ್ ಸಿ ಕುಂದರ್ , ಜಿ ಪಂ ಗುರ್ಕಾರ್ಲಾಯಿನ ದಿನಕರ ಬಾಬು , ಬಿ ಎನ್ ಶಂಕರಪೂಜಾರಿ ಮಧುಸೂದನ ಬಾಯರಿ ರಾಮದೇವ ಐತಾಳ, ಶ್ರೀರಮಣ ಉಪಾಧ್ಯಾಯ ಅಚ್ಯುತ ಅಮೀನ್ ಕಲ್ಮಾಡಿ , ಅನೇಕ ಗ್ರಾಮ‌ಪಂಚಾಯತ್ ಗುರ್ಕಾರ್ಲು, ಸದಸ್ಯೆರ್ ಜಿ.‌ಪಂ ತಾಲೂಕು ಪಂಚಾಯತ್ ಸದಸ್ಯೆರ್ ಅಂಚನೇ ಪೂಜಾರಿನ ಕುಟುಂಬಸ್ತೆರ್ ಪಾಲ್ ಪಡೆದಿತ್ತೆರ್ . ವಾಸುದೇವ ಭಟ್ ಪೆರಂಪಳ್ಳಿ ಸಚಿವರ ಆಪ್ತರಾಯಿನ ಹರೀಶ್ ಶೆಟ್ಟಿ ಕೋಟ , ಪ್ರಕಾಶ್ , ರಂಜಿತ್ ಅಶೋಕ್ , ವಿವೇಕ್ ಸುಬ್ರಾಯ ಆಚಾರ್ಯ ಸಾಕಾರ ಕೊರಿಯೆರ್.

ಶಬರಿನ್ ತೂಯಿಲಕ ಆಂಡ್…!!! :

ಇಲ್ಲಡ್ ರಾಮಗ್ ಮಂಗಳಾರತಿ ಮಲ್ತಿ ಬೊಕ್ಕ ಸಚಿವ ಕೋಟ ತನ್ನ ಅಪ್ಪೆ 90 ವರ್ಷದ ಲಚ್ಚಿಪೂಜಾರ್ತಿಲೆನ ಮುಖೇನ ಅಯೋಧ್ಯೆ ಮಂದಿರ ನಿರ್ಮಾಣಗ್ ನಿಧಿ ಸಮರ್ಪಣೆ ಮಲ್ತೆರ್ . ನೆರ್ದ್ ಸಂತೋಷಆಯಿನ ಶ್ರೀಲು ಶಬರಿನ ದರ್ಶನ ಆಯಿಲಕ ಆಂಡ್ ಪಂದ್ ಲಚ್ಚಿಯಮ್ಮಗ್ ಶಾಲು ಪಾರ್ದ್ ಎಡ್ಡೆಪ್ಪು ಬಯಕಿಯೆರ್.