2021

ಗಾಲ ಪಾಡಿನಿ ಕಳ್ವೆರೆಗ್, ಆಂಡ ತಿಕ್‌ದ್ ಬೂರಿನಿ ಪರ ನೋಟು ಸಾಗಾವುನಕುಲು!

ಕುಡ್ಲ: ಇಲ್ಲ್ ಪೊಗ್ಗುದು ಲಕ್ಕಾವುನ ಕಳ್ವೆರೆನ್ ಪತ್ತರೆ ಬೋಡಾದ್ ಪೊಲೀಸ್‌ದಕುಲು ಬೇತೆ ಬೇತೆ ಕೂಟೊನು ಮಲ್ತ್‌ದ್ ಅಕುಲು ಕಾರ್ಯಾಚರಣೆಡ್ ಉಪ್ಪುನಗ ತೇದಿ ನ.೧೮ ಗುರುವಾರದಾನಿ ಕಾಂಡೆ ೧೧.೩೦ ಗಂಟೆಗ್ ಅಡ್ಯಾರ್‌ರ್ದ್ ಲಾಲ್‌ಬಾಗ್‌ಗ್ ಭಾರತ ಸರ್ಕಾರ ಬ್ಯಾನ್ ಮಲ್ದಿನ ಪರ ನೋಟುನು ಸಾಗಾವೊಂದುಲ್ಲೆರ್ ಪನ್ಪಿ ಮಾಹಿತಿ ತಿಕ್ಕಿ ಕೂಡ್ಲೆ ಬರ್ಕೆ ಸ್ಟೇಷನ್‌ದ ಪೊಲೀಸ್‌ದಕುಲು ಕೆಎಂ ೦೩ಎಂ ಪಿ೦೩೦೦ ನಂಬರ್‌ದ ಇನೊವಾ ಕಾರ್‌ನ್ ಉಂತಾದ್ ರಡ್ಡ್ ಬ್ಯಾಗ್‌ನ್ ಪತ್ತಿಯೆರ್. ಆ ಬ್ಯಾಗ್‌ಡ್ ಇತ್ತಿನ ೧.೯೨ ಕೋಟಿ ರೂಪಾಯಿ ಬಿಲೆತ್ತ ಪರನೋಟುನು ವಶ ಮಲ್ತೊಂಡೆರ್.

ಆರೋಪಿಲಾಯಿನ ಜುಬೇರ್ ಹಮ್ಮಬ್ಬ(೫೨)ಕಣ್ಣೂರು, ಕುಡ್ಲ, ದೀಪಕ್ ಕುಮಾರ್ (೩೨)ಪಡೀಲ್, ಅಬ್ದುಲ್ ನಾಸಿರ್(೪೦)ಬಜ್ಪೆ ಮೊಕ್ಲೆನ್ ಪತ್ತ್‌ದ್ ಪೊಲೀಸ್‌ದಕುಲು ವಿಚಾರಣೆ ಮಲ್ತೊಂದುಲ್ಲೆರ್.

ಬ್ಯಾನ್ ಆತಿನ ನೋಟುನು ಪತೊಂದು ಜನೊಕ್ಲೆಗ್ ಆಸೆ ತೋಜಾದ್ ಮಂಗೆ ಮಲ್ಪುನ ಬೇಲೆ ಕೆಲ ವರ್ಷೊರ್ದಿಂಚಿ ನಡತೊಂದಿತ್ತ್‌ದ್ ಪರ ನೋಟುಗು ಬಿಲೆ ಇಜ್ಜಿಂದ್ ಗೊತ್ತಿತ್ತ್‌ದ್‌ಲ ಕಾಸ್‌ದ ಆಸೆಗ್ ಬೋಡಾದ್ ಪೊಸ ಪೊಸ ಬ್ರೋಕರ್‌ನಕುಲು ಸೃಷ್ಟಿ ಆತೆರ್.ಉಂದೊಂಜಿ ನಾಮ ಪಾಡುನ ಬೇಲೆ ಪಂದ್ ಗೊತ್ತಿತ್ತ್ಂಡಲ ಆಯಿನಾತ್ ಬೇಗ ದುಡ್ಡು ಮಲ್ಪೊಡು ಪಂದ್ ಕೆಲವು ಜನ ಇಂಚಿತ್ತಿನ ಮಂಗನಕಲ್ನ ಪಾತೆರ ಕೇನುವೆರ್. ಇತ್ತೆ ಆರೋಪಿಲು ಕರ್ಪಿಲ್‌ಡ್ ಇತ್ತ್‌ದ್ ವಿಚಾರಣೆ ಆವೊಂದುಂಡು.
ಮೊಕುಲು ಬಾಯಿಬುಡಿಯೆರ್‌ಡ ಆ ಕಾಸ್‌ದ ನಿಜವಾಯಿನ ವಾರಿಸ್‌ದಾರೆ ಏರ್ ಪಂದ್ ಗೊತ್ತಾಪುಂಡು.