ಕೇರಳ ಸುದ್ದಿ | Kerala News

ಅರವಣ ಪಾಯಸದ ಏಲಕ್ಕಿಡ್ ಕ್ರಿಮಿನಾಶಕ !

ಏಲಕ್ಕಿಡ್ ಕ್ರಿಮಿನಾಶಕ ಇಪ್ಪುನವು ಪತ್ತೆ ಆಯಿನೆಡ್ದಾವರ 6.5 ಕೋಟಿ ರೂ. ಬಿಲೆತ್ತ ಅಯ್ಯಪ್ಪ ಸ್ವಾಮಿನ ಪ್ರಸಾದ ಆಯಿನ “ಅರವಣಂ” ಪಾಯಸ ನಷ್ಟ ಆತ್ಂಡ್.

ಅರವಣಂ ಪಟ್ಟುನೆಕ್ಕ್ ಕೋಡೆ ಬಯ್ಯಗ್ ಕೇರಳ ಹೈಕೋರ್ಟ್ ತಡೆ ಪಾಡ್ದ್ಂಡ್. ಏಲಕ್ಕಿ ಪಾಡಂದೆ ಅರವಣಂ ತಯಾರ್ ಮಲ್ಪುನ ಬೇಲೆ ಕೋಡೆ ರಾತ್ರೆರ್ದ್ ಸುರು ಆತ್ಂಡ್.

ಮಕರ ಜ್ಯೋತಿ ತೂಯರೆ ಶಬರಿಮಲೆಟ್ಟ್ ತಯಾರಿ

ಪುಗರ್ತೆದ ಜಾಗೆ ಶಬರಿಮಲೆಟ್ಟ್ ಮಕರ ಜ್ಯೋತಿ ತೂಯರೆ ದೇವಸ್ವಂ ಬೋರ್ಡ್ ಮಾತ ರೀತಿದ ತಯಾರ್ ಸುರು ಮಲ್ತ್ ದಂಡ್.

ಬತ್ತಿನ ಭಕ್ತೆರ್ ಮಕರ ಜ್ಯೋತಿ ತೂಯರೆ ಅನುಕೂಲ ಆಪಿಲೆಕ್ಕ ಆ ಜಾಗೆಡ್ ತಡೆಪು ಬೇಲಿ ನಿರ್ಮಾಣ, ಬೊಲ್ಪು ಅಂಚನೆ ಪರ್ಪಿನ ನೀರ್‌ದ ವ್ಯವಸ್ಥೆ ಮಲ್ತ್‌ದೆರ್. ತೂತ್ತ ಅಪಾಯನ್ ತಡೆಯರೆ ಕಾಡ್‌ಡ್ ಅಟಿಲ್ ಮಲ್ಪುನೆನ್ ನಿಷೇಧ ಮಲ್ತ್‌ದೆರ್.

500 ರೂ. ಸಾಲ ಕೇಂದಿನ ಪೊಂಜೊವುನ ಅಕೌಂಟ್ ಗ್ ಬತ್ತ್ಂಡ್ 51 ಲಕ್ಷ ರೂಪಾಯಿ!!

ಕೇರಳ: ಬಡಪತ್ತ್ ದ ಪೊಂಜೊವು ಒರ್ತಿ ತನ್ನ ಮಗನ ಟೀಚರ್‌ನ ಕೈತಲ್ 500 ರೂಪಾಯಿ ಸಾಲ ಕೇಂಡ್ ದಿನ ಬೆರಿಕ್ಕೇ ಅರೆನ ಅಕೌಂಟ್ ಗ್ ಒಂಜೇ ದಿನಟ್ಟ್ 51 ಲಕ್ಷ ರೂಪಾಯಿ ಕಾಸ್ ಬತ್ತ್‌ದ್ಂಡ್!!

ಪಾಲಕ್ಕಾಡ್‌ದ ಕೂಟ್ಟನಾಡ್‌ದ ಸುಭದ್ರ ಪನ್ಪಿನಾರ್ ತನ್ನ ಮಗನ ಶಾಲೆದ ಟೀಚರ್ ಗಿರಿಜಾ ಹರಿಕುಮಾರ್ ಮೆರೆಡ 500 ರೂ. ಸಾಲ ಕೇಂದಿತ್ತೆರ್. ಶಿಕ್ಷಕಿ ಆ ಪೊಂಜೊವುಗು 1 ಸಾರ ಕೊರ್ದಿತ್ತೆರ್. ಅಂಚನೆ ಪೊಂಜೊವುನ ಪರಿಸ್ಥಿತಿನ್ ಸೋಶಿಯಲ್ ಮೀಡಿಯಾಡ್ ಪಾಡ್ದಿತ್ತೆರ್. ಉಂದೆಕ್ಕ್ ದಾನಿಲು ಸಕಾಯ ಮಲ್ತ್‌ದಿತ್ತ್‌ದ್ ಒಂಜೇ ದಿನಟ್ಟ್ 51 ಲಕ್ಷ ರೂ. ಕಾಸ್ ಪಾಡ್ದೆರ್.

ಪೊಂಜೊವುನ ಕಂಡನಿ ಕೂಲಿ ಬೇಲೆದಾರ್ ಆದಿತ್ತ್‌ದ್ ಕೆಲ ತಿಂಗೊಲ್‌ದ ಪಿರ ತೀರ್ ಪೋದಿತ್ತೆರ್. ರಡ್ಡನೇ ಮಗೆ ಅತುಲ್ ರಾಜ್ “ಸೆರೆಬ್ರಲ್ ಪಾಲ್ಸಿ” ಸೀಕ್‌ರ್ದ್ ನರೆಲೊಂದು ಇತ್ತ್‌ದ್ ಆಯನ್ ಇಲ್ಲಡ್ ಬುಡ್ದ್ ಬೇಲೆಗ್ ಪೋಯರೆ ಪೊಂಜೊವುಗ್ ಆವೊಂದಿಜ್ಜಾಂಡ್. ಅಯಿಕ್ ಆರ್ ಟೀಚರ್ ಡ್ 500 ರೂ. ಸಾಲ ಕೇಂಡ್ ದಿತ್ತೆರ್.

ಬಾಲೆ ದಿಂಗ್ ದಿನ ರಿಮೋಟ್ ಬ್ಯಾಟರಿನ್ 20 ನಿಮಿಷಡ್ ಪಿದಯಿ ದೆತ್ತಿನ ಕೇರಳದ ಡಾಕ್ಟರ್ಸ್…!

ತಿರುವನಂತಪುರಂ: ಗೊಬ್ಬೊಂದಿತ್ತಿನ ರಡ್ಡ್ ವರ್ಷದ ಬಾಲೆಯೊಂಜಿ ಬ್ಯಾಟರಿ ದಿಂಗ್ ದಿತ್ತ್‌ದ್ ಅವೆನ್ ವೈದ್ಯೆರ್ 20 ನಿಮಿಷಡ್ ಪಿದಯಿ ದೆತ್ತ್‌ದ್ ಬಾಲೆನ್ ಬಚಾವ್ ಮಲ್ತಿನ ಘಟನೆ ತಿರುವನಂತಪುರಟ್ಟ್ ನಡತ್ಂಡ್.

ಟಿವಿ ರಿಮೋಟ್‌ಗ್ ಪಾಡ್ದಿನ 5 ಸೆಂಟಿಮೀಟರ್ ಉದ್ದದ ಬೊಕ್ಕ ಒಂಜರೇ ಸೆಂಟಿ ಮೀಟರ್ ಅಗೆಲದ ಬ್ಯಾಟರಿನ್ ಬಾಲೆ ಗೊಬ್ಬೊಂದಿತ್ತಿನ ಪೊರ್ತುಡು ದಿಂಗ್ ದ್ಂಡ್. ವಿಷಯ ತೆರಿ ಕೂಡ್ಲೆ ಪೋಷಕೆರ್ ಬಾಲೆನ್ ಆಸ್ಪತ್ರೆಗ್ ಲೆತೊಂದು ಪೋತೆರ್. ಆಯಿಬೊಕ್ಕ ವೈದ್ಯೆರ್ ಶಸ್ತ್ರ ಚಿಕಿತ್ಸೆ ಮಲ್ತ್‌ದ್ 20 ನಿಮಿಷಡ್ ಬ್ಯಾಟರಿನ್ ಪಿದಯಿ ದೆತ್ತ್‌ದೆರ್.