ಕರ್ನಾಟಕ ರಾಜ್ಯಡ್ ಸುದ್ದಿಲು | Karnataka News

ರಾಜಬೂಡು ಬೆಂಗ್ಲೂರುಡು “ಶಿವದೂತೆ ಗುಳಿಗ”ನ ಅಬ್ಬರ..!

ಬೆಂಗ್ಲೂರ್: ತುಳು ರಂಗಭೂಮಿ ಬೊಕ್ಕ ತುಳು ಸಿನಿಮೊಡೊ ಪುಗರ್ತೆ ಪಡೆಯಿನ ಪೆರ್ಮೆದ ನಿರ್ದೇಶಕೆರಾಯಿನ ವಿಜಯ ಕುಮಾರ್ ಕೊಡಿಯಾಲ್ ಬೈಲ್, ಮೆರೆನ ಪುದರ್ ಕೇನಂದಿನ ಅಭಿಮಾನಿಲು ಏರ್ಲಾ ಇಜ್ಜಿ. ದಾಯೆ ಪಂಡ ತುಳುನಾಡ್ ದ ರಂಗಭೂಮಿಡ್ ಒಂಜಿ ಪೊಸತ್ತ್ ಬದಲಾವಣೆ ಮಲ್ತಿನಾರ್, ಅಂಚೆನೇ ಪೊಸ ಪೊಸತ್ತ್ ತುಳು ರಂಗಭೂಮಿಡ್ ಸಾಮಾಜಿಕ, ಪೌರಾಣಿಕ ನಾಟಕೊಲೆನ್ ಪೂರ ವಿಭಿನ್ನ ಶೈಲಿಡ್ ಪ್ರದರ್ಶನ ಮಲ್ತ್ ದ್ ಅಭಿಮಾನಿಲೆನ ಉಡಲ್ ಗೆಂದಾಯಿನರ್.

ಇಂಚಪ್ಪ ಮಸ್ತ್ ಪುಗರ್ತೆ ಪಡೆದ್ ತುಳುನಾಡ್ ದ ಮಾತಾ ಕಡೆಟ್ಲಾ ಪ್ರದರ್ಶನ ಕೊರ್ದು, ತುಳುನಾಡ ಮಣ್ಣ್ ಡ್ ಕಾರ್ನಿಕೊಡು ಮೆರೆಯುವುನ ಗುಳಿಗ ದೈವದ ಕತೆನ್ ಪಾಡ್ದನದ ಆಧಾರೊಡ್ “ಶಿವದೂತೆ ಗುಳಿಗೆ ” ಪನ್ಪಿನ ಭಕ್ತಿದ ಒರುಟ್ಟು ಧರ್ಮ ಬೊಕ್ಕ ದೈವ ಶಕ್ತಿದ ಬಗೆಟ್ಟ್ ನಂಬುಗೆ ಪುಟ್ಟಾವುನಂಚಿನ ತುಳು ನಾಟಕ ಆಗಸ್ಟ್ 28ನೇ ತಾರೀಕ್ ದಾನಿ ಐತಾರ ಬೆಂಗಳೂರುದ ರವೀಂದ್ರ ಕಲಾಕ್ಷೇತ್ರೊಡು ಒಂಜೇ ದಿನೊಟ್ಟು ಮೂಜಿ ಪ್ರದರ್ಶನ ಮಲ್ತ್ ದ್ ಒಂಜಿ ದಾಖಲೆನ್ ಸೃಷ್ಟಿ ಮಲ್ತೆರ್.

ಚಿತ್ರ ನಟೆ, ರಂಗಭೂಮಿ ಕಲಾವಿದೆ ಸ್ವರಾಜ್ ಶೆಟ್ಟಿ ಮೆರೆನ ಗುಳಿಗನ ಮುಖ್ಯ ಪಾತ್ರ ತೂನಗ ಮೈತ ರೋಮ ಪೂರ ಸರ್ತ ಆಪುಂಡು. ಅಂಚೆನೇ ಗುಳಿಗ ದೈವದ ನಟನೆಡ್ದ್ ಅಭಿಮಾನಿಲೆನ ಉಡಲ್ಡ್ ಭಕ್ತಿ ದಿಂಜುನೆಟ್ಟ್ ಸಂಶಯನೇ ಇಜ್ಜಿ. ಅಂಚೆನೇ ಮಾತಾ ಪ್ರಬುದ್ಧ ಕಲಾವಿದೆರ್ ಆಕಲೆನ ಪಾತ್ರೊಗ್ ತಕ್ಕ ನ್ಯಾಯ ಕೊರ್ತೆರ್. ಅಂಚೆನೇ ಕತೆಗ್ ತಕ್ಕ ಪುಗರ್ತೆದ ಭಾಗವತೆರಾಯಿನ ಯಕ್ಷಧ್ರುವ ಪಟ್ಲ ಸತೀಶ್ ಶೆಟ್ರು ಬೊಕ್ಕ ಪೆರ್ಮೆದ ತೆಲಿಕೆದ ಬೊಳ್ಳಿ ದೇವದಾಸ್ ಕಾಪಿಕಾಡ್ ಮೊಕೆಲೆನ ಭಕ್ತಿದಿಂಜಾವುನ ಪೊರ್ಲುದ ಪದ ಯಾಪಲ ಮದೆಪೆರಾವಂದಿನ. ಸಾಹಿತ್ಯಗೊ ತಕ್ಕ ಸಂಗೀತ ನಿರ್ದೇಶನೊನ್ ಎ.ಕೆ. ವಿಜಯ್ ಕೋಕಿಲ ಮೇರ್ ಕೊರ್ತೆರ್.

ಏರ್ ಧರ್ಮೊನ್ ದಂಟುವೆನಾ ಅಂಚಿನಕಲೆಗ್ ಗುಳಿಗೆ ಕಷ್ಟೊನು ಕೊರುವೆ. ಧರ್ಮದ ರಕ್ಷಣೆಗ್ ಬೋಡಾದ್ ಕೈಲಾಸೊಡ್ದ್ ಪುಣ್ಯದ ಈ ಮಣ್ಣ್ ಡ್ ಕಾರ್ನಿಕ ತೋಜಾವುನ ಶಿವದೂತೆ ಗುಳಿಗ ಪನ್ಪಿನ ದೈವದ ಕತೆನ್ ತೂವಂದಿನಕಲು ಈ ಭಕ್ತಿ ದಿಂಜಾವುನ ನಾಟಕ ಮುಖಾಂತರ ತೂದ್ ತುಳು ರಂಗಭೂಮಿನ್ ಬೊಕ್ಕ ಕಲಾವಿದೆರೆನ್ ಬುಳೆಪಾವುಲೆ , ಐತೊಟ್ಟುಗ್ ನಮ್ಮ ಪೆರ್ಮೆದ ತುಳು ಭಾಸೆನ್ ಓರಿಪಾವುಗ ಪಂಡ್ದ್ ಸೇರ್ದಿನ ಮಾತಾ ಬಿನ್ನೆರೆಗ್ಲಾ ,ಕಲಾಪೋಷಕರೆಗ್ಲಾ,ಸಂಘಟನೆದ ಮುಖ್ಯಸ್ಥೆರೆಗ್ಲಾ ಪೆರ್ಮೆದ ನಿರ್ದೇಶಕೆರಾಯಿನ ವಿಜಯ ಕುಮಾರ್ ಕೊಡಿಯಾಲ್ ಬೈಲ್ ಮೇರ್ ಬಿನ್ನಯ ಮಲ್ತೆರ್.

ಬೆಂಗಳೂರುದ ರವೀಂದ್ರ ಕಲಾಕ್ಷೇತ್ರೊಗ್ ಕಾಂಡೆಡ್ದ್ ಬಯ್ಯ ಮುಟ್ಟದ ನಾಟಕ ಪ್ರದರ್ಶನೊಗು ಚಲನ ಚಿತ್ರ ನಿರ್ಮಾಪಕರೆನ ಸಂಘದ ಅಧ್ಯಕ್ಷೆರ್ ಉಮೇಶ್ ಬಣಕಾರ್,ಪುಗರ್ತೆದ ಸಂಗೀತ ನಿರ್ದೇಶಕೆರಾಯಿನ ವಿ.ಮನೋಹರ್, ಗುರುಕಿರಣ್,ಚಾರ್ಲಿ ಸಿನಿಮಾದ ನಿರ್ದೇಶಕೆರ್ ಕಿರಣ್,ನಿರೂಪಕಿ ಅನುಶ್ರೀ,ರಾಜ್ ಬಿ ಶೆಟ್ಟಿ,ಅರುಣ್ ರೈ ತೋಡಾರ್‌ ಬೊಕ್ಕ ಬೆಂಗಳೂರುದ ಬೇತೆ ಬೇತೆ ಸಂಘ ಸಂಸ್ಥೆದ ಮುಖ್ಯಸ್ಥೆರ್ ಬತ್ತ್ ದ್ ತುಳು ರಂಗಭೂಮಿಡ್ ಒಂಜಿ ದಾಖಲೆ ಸಷ್ಟಿ ಮಲ್ತಿನ ಶಿವದೂತೆ ಗುಳಿಗೆ ತೂದ್ ನಿರ್ದೇಶಕೆ ವಿಜಯ ಕುಮಾರ್ ಕೊಡಿಯಾಲ್ ಬೈಲ್ ಮೆರೆಗ್ ಬೊಕ್ಕ ಕಲಾವಿದೆರೆಗ್ ನನಾತ್ ಇಂಚಿತ್ತಿನ ಪೌರಾಣಿಕ, ಸಾಮಾಜಿಕ ಕತೆನ್ ನಾಟಕ ಪ್ರದರ್ಶನ ಮೂಲಕ ಮಲ್ಪುಲೆ ಪಂಡ್ದ್ ಎಡ್ಡೆಪ್ಪುದ ಪಾತೆರ ಪಂಡೆರ್.

ಅಂಚೆನೇ ಮೂಜಿ ಪ್ರದರ್ಶನದ ಸುಧಾರಿಕೆ ಬೊಕ್ಕ ನಿರೂಪಣೆನ್ ಪುಗರ್ತೆದ ನಿರೂಪಣೆ ಚತುರೆ ಕಲಾವಿದೆ ರಾಜ್ ಸಂಪಾಜೆ ಮೇರ್ ನಡಪಾದ್ ಕೊರಿಯೆರ್.

✍️ ಯಾದವ ಎಸ್ ಕಲ್ಲಾಪು