ರಾಜ್ಯದ ಸುದ್ದಿ | State News

ಸರ್ವರ್ ಸಮಸ್ಯೆ ಸರಿ ಮಲ್ಪರೆ ಆವಂದಿನ ರಾಜ್ಯ ಸರಕಾರ: ಶಾಸಕೆರ್ ಡಿ.ವೇದವ್ಯಾಸ ಕಾಮತ್ ಆರೋಪ

ಕುಡ್ಲ: “ರಾಜ್ಯಡ್ ಕಾಂಗ್ರೆಸ್ ಸರಕಾರ ಬತ್ತಿನ ಬೊಕ್ಕ ಪನ್ಪಿನಕುಲು ಕೇನುನಕುಲು ಏರ್ಲಾ ಇಜ್ಜಂದಿನ ಪರಿಸ್ಥಿತಿ ನಿರ್ಮಾಣ ಆತ್ಂಡ್. ಇಂಚಿಪ್ಪ ಶಿವಮೊಗ್ಗ ಜಿಲ್ಲೆಡ್ ನಡತಿನ ಗಲಾಟೆಡ್ ಅವೆನ್ ನಮ ಕಣ್ಣಾರೆ ತೂತ. ಅಲ್ಪದ ಅಮಾಯೆಕೆರೆನ ಮಿತ್ತ್ ಪೆಟ್ಟ್, ಇಲ್ಲ್ ದ ಮಿತ್ತ್ ದಾಳಿ ನಡತ್ ದ್ಂಡ್. ಮುಖ್ಯಮಂತ್ರಿ, ಗೃಹಸಚಿವೆರ್ ದಾಲ ನಡತಿನನೇ ಇಜ್ಜಿ ಪನ್ಪುನ ರೀತಿ ಪಾತೆರೊಂದು ಉಲ್ಲೆರ್ ಪಂದ್ ಶಾಸಕೆರ್ ಡಿ. ವೇದವ್ಯಾಸ ಕಾಮತ್ ಬೆಚ್ಚ ಆತೆರ್.

ಅತ್ತಂದೆ ರಾಜ್ಯಡ್ ಪರಿಶಿಷ್ಟ ಜಾತಿದ ಬಂಧುಲೆಗ್ ಅನ್ಯಾಯ ಆವೊಂದು ಉಂಡು. ರಾಜ್ಯ ಇಡೀ ಆಧಾರ್ ನೋಂದಣಿ, ಬೇತೆ ಕೆಲಸನ್ ಮಲ್ಪರೆ ಜನಕುಲು ಸರಕಾರಿ ಕಚೇರಿಡ್ ಕ್ಯೂ ಉಂತುನ ಪರಿಸ್ಥಿತಿ ಉಂಡು. ಒಲ್ಪ ತೂಂಡಲ ಸರ್ವರ್ ಸಮಸ್ಯೆ ಪನ್ಪೆರ್. ನನ ಕರೆಂಟ್ ಬಿಲ್ ಎಚ್ಚ, ಲೋಡ್ ಶೆಡ್ಡಿಂಗ್ ಸಮಸ್ಯೆ ಸಾಮಾನ್ಯ ಆವೊಂದು ಉಂಡು. ಈ ಬಗೆಟ್ಟ್ ರಾಜ್ಯ ಸರಕಾರ ಒವ್ವೇ ತುರ್ತು ಕ್ರಮ ದೆತೊನವು ತೋಜೊಂದು ಇಜ್ಜಿ. ಸರಕಾರ ಕರೆಂಟ್ ಬಿಲ್ ಎಚ್ಚ ಮಲ್ತ್ ದ್ ಜನಕ್ಲೆಗ್ ತೊಂದರೆ ಕೊರೊಂದು ಉಂಡು ಪಂದ್ ಕಾಮತ್ ಆರೋಪ ಮಲ್ದೆರ್.

ಉಂದೊಂಜಿ ದರೋಡೆಕೋರ ಸರ್ಕಾರ ಆತ್ಂಡ್. ಈ ಬಗೆಟ್ಟ್ ಜನಕುಲು ಎಚ್ಚರೊಡು ಇಪ್ಪೊಡು. ಸೈಬರ್ ವಂಚನೆ ಮಿತಿಮೀರ್ದ್ ನಡತೊಂದು ಉಂಡು. ಜನಕ್ಲೆನ ಅಕೌಂಟ್ ರ್ದ್ ಕಾಸ್ ಕಂಡೊಂದು ಉಲ್ಲೆರ್. ನೆತ್ತ ಜಬದಾರಿನ್ ಸರಕಾರನೇ ದೆತೊನೊಡು. ಈ ಅಕೌಂಟ್ ಕೆಲಸ ಸರಿಯಾಯಿನ ಸಮಯಡ್ ನಡತೊಂದು ಇಜ್ಜಿ. ಸೈಬರ್ ವಂಚನೆನ್ ಸರಕಾರನೇ ನಡಪಾವೊಂದು ಉಂಡಾ ಪನ್ಪುನ ಸಂಸಯ ಉಂಡು. ಸರಕಾರ ಕಾಸ್ ಕಳೆವೊನ್ನಕಲೆಗ್ ಕಾಸ್ ಕೊರೊಡು.

ಪ್ರಾಯದಕುಲು, ಅಸಹಾಯಕೆರ್, ವಿಧವೆಯೆರ್ ಇಂಚ ಮಾತೆರೆಗ್ಲಾ ನೆರ್ದ್ ದುಂಬು ತಿಕೊಂದು ಇತ್ತಿನ ಸವಲತ್ತ್ ತಿಕೊಂದಿಜ್ಜಿ. ಮಾತೆಕ್ಲಾ ಬಿಪಿಎಲ್ ಕಾರ್ಡ್ ಮಾನದಂಡ ಮಲ್ತೊಂದು ಉಂಡು. ಆಂಡ ಕರಿನ ನಾಲ್ ತಿಂಗೊಲುರ್ದಿಂಚ ಒಂಜೇ ಒಂಜಿ ಪೊಸ ಬಿಪಿಎಲ್ ಕಾರ್ಡ್ ಮಲ್ತಿಜಿ. ಇಂಚಿನವೇ ನೂದೆರ್ದ್ ಎಚ್ಚ ಸಮಸ್ಯೆಲು ಪ್ರತಿ ದಿನ ಎದುರಾವೊಂದು ಉಂಡು. ಜಿಲ್ಲಾಡಳಿತ, ಮಂತ್ರಿಲೆನೊಟ್ಟಿಗೆ ಏರ್ಲಾ ಕೆಬಿ ಕೊರೊಂದು ಇಜ್ಜೆರ್. ಉಂದು ಕರಿನ ನಾಲ್ ತಿಂಗೊಲ್ ಕಾಂಗ್ರೆಸ್ ಆಡಳಿತ ಜನಕ್ಲೆಗ್ ಕೊರಿನ ಭಾರೀ ಮಲ್ಲ ಸಾಧನೆ ಪಂದ್ ಪಂಡೆರ್.

ಪತ್ರಿಕಾಗೋಷ್ಠಿಡ್ ವಿಜಯ್ ಕುಮಾರ್, ನಿತಿನ್ ಕುಮಾರ್, ಮಾಜಿ ಮೇಯರ್ ಪ್ರೇಮಾನಂದ ಶೆಟ್ಟಿ, ದಿವಾಕರ್ ಪಾಂಡೇಶ್ವರ್, ಪ್ರಧಾನ ಕಾರ್ಯದರ್ಶಿ ರೂಪಾ ಬಂಗೇರ, ಸುರೇಂದ್ರ ಜಪ್ಪಿನಮೊಗರು ಇತ್ತೆರ್.