ಬೊಂಬೈ: ಬೊರಿವಲಿ ಶ್ರೀ ಜಗದೀಶ್ವರೀ ದೇವಲ್ಯಡ್ ಅ.15-24 ಮುಟ್ಟ 48 ನೇ ವರ್ಷೊದ ಮಾರ್ನೆಮಿ ಉಚ್ಚಯ ನಡಪರೆ ಉಂಡು.
ಪ್ರತಿದಿನೊಲ ಬೇತೆ ಬೇತೆ ಧಾರ್ಮಿಕ, ವೈದಿಕ ವಿಧಿ ವಿಧಾನ ನಡಪರೆ ಉಂಡು. ಈ ಉಚ್ಚಯೊಗ್ ಮಾತೆರ್ಲಾ ಬತ್ತ್ ದ್ ಲೇಸ್ ನ್ ಪೊರ್ಲು ಮಲ್ತ್ ದ್ ಕೊರೊಡು ಪಂದ್ ಬೊರಿವಿಲಿ ಶ್ರೀ ಜಗದೇಶ್ವರೀ ದೇವಲ್ಯದ ಗುರ್ಕಾರ್ಲು ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.
ಬೊಂಬೈ: ಯಕ್ಷ ರಂಗದ ತಾಳಮದ್ದಳೆದ ಭೀಷ್ಮ ಪಂದೇ ಪುಗರ್ತೆ ಪಡೆಯಿನ ಕೆ.ಕೆ ಶೆಟ್ಟಿ ಮೆರೆನ ಅಭಿಮಾನಿ ಬಳಗದ ಮುತಾಲಿಕೆಡ್, ವೇದಮೂರ್ತಿ ಪೆರ್ಣಂಕಿಲ ಹರಿದಾಸ್ ಭಟ್ ಮೆರೆನ ಆಶೀರ್ವಾದದೊಟ್ಟಿಗೆ, ವಿದ್ಯಾವಿಹಾರ್ ಪಶ್ಚಿಮದ ಕಲಾಯಿ ವಿಲೇಜ್ ಶ್ರೀ ಗಾಂವ್ಹೇವಿ ಅಂಬಿಕಾ ಶ್ರೀ ಆದಿನಾಥೇಶ್ವರ ಶ್ರೀ ಮಹಾಗಣಪತಿ ದೇವಲ್ಯಡ್ ಅ.7 ಕ್ಕ್ ಸಾಂಸ್ಕೃತಿಕ ಲೇಸ್ ದ ಲೆಕ್ಕೊಡು ಬೊಂಬೈ ಬೊಕ್ಕ ಊರುದ ಕಲಾವಿದೆರೆನ ಒಟ್ಟುಸೇರಿಗೆಡ್ ಶ್ರೀಕೃಷ್ಣ ರಾಯಭಾರ ಯಕ್ಷಗಾನ ತಾಳಮದ್ದಳೆ ಬೊಕ್ಕ ಅಭಿನಂದನೆ ಲೇಸ್ ನಡಪರೆ ಉಂಡು.
ಅಭಿನಂದನೆ ಲೇಸ್ ಡ್ ವೇದಮೂರ್ತಿ ಪೆರ್ಣಂಕಿಲ ಹರಿದಾಸ್ ಭಟ್ ಎಡ್ಡೆಪ್ಪು ಬಯಕಿಯೆರೆ ಉಲ್ಲೆರ್. ಸಭಾಧ್ಯಕ್ಷತೆನ್ ಕನ್ನಡಿಗ ಕಲಾವಿದರ ಪರಿಷತ್ತು ಮಹಾರಾಷ್ಟ್ರದ ಗುರ್ಕಾರೆ ಡಾ. ಸುರೇಂದ್ರ ಕುಮಾರ್ ಹೆಗ್ಡೆ ಒಯಿಸೊನ್ವೆರ್.
ಮಲ್ಲ ಬಿನ್ನೆರಾದ್ ಕ್ರೈಸ್ಟಲ್ ಆಟೋಮೇಸಸ್ ಪ್ರೈವೇಟ್ ಲಿಮಿಟೆಡ್ ಸಿಎಂಡಿ ಚಂದ್ರಶೇಖರ್ ಶೆಟ್ಟಿ ಥಾಣೆ, ಬಾಂಬೆ ಬಂಟ್ಸ್ ಅಸೋಸಿಯೇಶನ್ ಗುರ್ಕಾರೆ ಸಿಎ ಸುರೇಂದ್ರ ಶೆಟ್ಟಿ, ಬಿಎಂಸಿ ನಿವೃತ್ತ ಇಂಜಿನಿಯರ್ ಹೊಸಬೆಟ್ಟು, ಲಕ್ಷ್ಮೀನಾರಾಯಣ ರಾವ್, ವಿಶ್ವ ಹಿಂದೂ ಪರಿಷತ್ತ್ ಜಿಲ್ಲಾಧ್ಯಕ್ಷೆರ್ ನವಿಬೊಂಬೈ ಸಂಜೀವ ಎನ್ ಶೆಟ್ಟಿ, ಯಕ್ಷಗಾನ ಕಲಾವಿದೆ ವಾಸುದೇವ ಮಾರ್ನಾಡ್, ವಿದ್ಯಾವಿಹಾರ್ ಶ್ರೀ ಗಾಂವ್ಹೇವಿ ಅಂಬಿಕಾ ಶ್ರೀ ಆದಿನಾಥೇಶ್ವರ ಶ್ರೀ ಮಹಾಗಣಪತಿ ದೇವಲ್ಯದ ಆಡಳಿತ ಮೊಕ್ತೇಸರೆರ್ ಹರಿದಾಸ್ ಗೋಪಾಲ್ ಶೆಟ್ಟಿ ಪಾಲ್ ಪಡೆಯೆರೆ ಉಲ್ಲೆರ್.
ಅಭಿನಂದನೆ ಭಾಷಣನ್ ಭಾಗವತೆರ್ ಪೊಲ್ಯ ಲಕ್ಷ್ಮೀನಾರಾಯಣ ಶೆಟ್ಟಿ ಮಲ್ಪರೆ ಉಲ್ಲೆರ್. ಕಲಾಭಿಮಾನಿಲು ಬೊಕ್ಕ ಕೆ.ಕೆ ಶೆಟ್ಟಿ ಅಭಿಮಾನಿಲು ಎಚ್ಚದ ಸಂಖ್ಯೆಡ್ ಪಾಲ್ ಪಡೆದ್ ಲೇಸ್ ನ್ ಪೊರ್ಲು ಮಲ್ತ್ ದ್ ಕೊರೊಡು ಪಂದ್ ಕೆ.ಕೆ ಅಭಿಮಾನಿ ಬಳಗ ಬೊಂಬೈ ಬಿನ್ನಾಪು ಮಲ್ದ್ಂಡ್.
ಬೆಂಗ್ಲೂರ್: ಆದಾಯ ಬೊಕ್ಕ ಜಾತಿ ಪ್ರಮಾಣ ಪತ್ರಲೆನ್ ನನ ದುಂಬುಗ್ ಗ್ರಾಮ ಪಂಚಾಯತ್ದ ಬಾಪೂಜಿ ಸೇವಾ ಕೇಂದ್ರಡ್ ಕೊರಿಯರೆ ತೀರ್ಮಾನ ಮಲ್ತ್ದ ಪಂದ್ ಗ್ರಾಮೀಣಾಭಿವೃದ್ದಿ ಅಂಚನೆ ಪಂಚಾಯತ್ ರಾಜ್ ಸಚಿವೆರ್ ಪ್ರಿಯಾಂಕ್ ಖರ್ಗೆ ತೆರಿಪಾದೆರ್.
ಟ್ವೀಟ್ ಮುಕೇನ ಮಾಹಿತಿ ಕೊರಿನ ಆರ್, “ರಾಜ್ಯದ ಗ್ರಾಮೀಣ ಭಾಗದ ಜನಕ್ಲೆಗ್ ಎಚ್ಚದ ಅನುಕೂಲ ಕೊರ್ಪಿನ ನಿಲೆಟ್ಟ್ ನಾಡಕಚೇರಿಡ್, ಅಟಲ್ ಜನಸ್ನೇಹಿ ಕೇಂದ್ರಲೆಡ್ ಕೊರೊಂದಿತ್ತಿನ ೪೪ ಸರ್ಕಾರಿ ಸೇವೆಲು ನನ ದುಂಬುಗ್ ಗ್ರಾಮ ಪಂಚಾಯಿತಿಡ್ ಇಪ್ಪುನ ಬಾಪೂಜಿ ಸೇವಾ ಕೇಂದ್ರಲೆಡ್ ತಿಕ್ಕರೆ ಉಂಡು” ಪಂದ್ ಆರ್ ತೆರಿಪಾದೆರ್.
ಬೆಂಗ್ಲೂರ್: ರಾಜಧಾನಿ ಬೆಂಗ್ಲೂರ್ಡ್ ಪುಲ್ಯಕಾಂಡೆ ಐಟಿ ಅಧಿಕಾರಿಲು ಶಾಕ್ ಕೊರ್ದಿತ್ತ್ದ್, 15 ನೆರ್ದ್ ಎಚ್ಚದ ಕಡೆಟ್ಟ್ ಐಟಿ ದಾಳಿ ಮಲ್ತ್ದೆರ್.
ವಿಜಯನಗರ, ಬಿಟಿಎಂ ಲೇಔಟ್, ಹುಳಿಮಾವು, ಸದಾಶಿವನಗರ, ಸ್ಯಾಂಕಿ ಟ್ಯಾಂಕ್ ಸೇರಿನಂಚನೆ ಮಸ್ತ್ ಕಡೆಟ್ಟ್ ಅಧಿಕಾರಿಲು ದಾಳಿ ಮಲ್ತ್ದಿತ್ತ್ದ್, ಐಟಿ ಅಧಿಕಾರಿಲೆನ 15 ನೆರ್ದ್ ಎಚ್ಚದ ತಂಡ ದಾಳಿಗಾದ್ ಚೆನ್ನೈ, ದಿಲ್ಲಿರ್ದ್ ರಾತ್ರೆಡೇ ಬೆಂಗ್ಲೂರ್ಗ್ ಬೈದೆರ್.
ತೆರಿಗೆ ವಂಚನೆ ಮಲ್ತಿನ ಖಾಸಗಿ ಕಂಪನಿಲು, ಅವೆತ್ತ ಮಾಲೀಕೆರ್ ಅಂಚನೆ ಬಂಗಾರ್ದ ಬ್ಯಾರ ಮಲ್ಪುನ ಇಲ್ಲದಕ್ಲೆನ ಮಿತ್ತ್ ದಾಳಿ ಮಲ್ತ್ದಿನ ಮಾಹಿತಿ ತಿಕ್ಕ್ದ್ಂಡ್. ಸದ್ಯಗ್ ದಾಳಿ ಮಲ್ತ್ದ್ ದಾಖಲೆದ ಪರಿಶೀಲನೆ ಮಲ್ತೊಂದುಲ್ಲೆರ್.
ಹೈದರಾಬಾದ್: ಶಿಕ್ಷಕೆರ್ ಒರಿ ತನ್ನ ಶಾಲೆದ ಯುಕೆಜಿ ಕಲ್ಪಾರ್ಥಿ ಹೋಮ್ ವರ್ಕ್ ಮಲ್ಪಂದೆ ಇತ್ತಿನೆಕ್ಕ್ ತರೆಕ್ಕ್ ಪೆಟ್ಟ್ ಹಾಕಿನ ಪರಿಣಾಮ ಕಲ್ಪಾರ್ಥಿ ತಿರ್ತ್ ಬೂರ್ದ್ ತೀರ್ ಪೋಯಿನ ಘಟನೆ ಹೈದರಾಬಾದ್ಡ್ ನಡತ್ಂಡ್.
ಹೇಮಂತ್(5) ತೀರ್ ಪೋಯಿನ ಕಲ್ಪಾರ್ಥಿ. ಅಪಗನೆ ಕಲ್ಪಾರ್ಥಿನ್ ಆಸ್ಪತ್ರೆಗ್ ಲೆತೊಂದು ಪೋದಿತ್ತೆರ್. ಆಂಡ ಚಿಕಿತ್ಸೆ ಫಲಕಾರಿ ಆವಂದೆ ಹೇಮಂತ್ ತೀರ್ ಪೋತೆರ್. ಶಿಕ್ಷಕೆರ್ನ ವಿರುದ್ಧ ಕ್ರಮಕ್ಕ್ ಆಗ್ರಹಿಸಾದ್ ಕಲ್ಪಾರ್ಥಿನ ಪೋಷಕೆರ್ ಬೊಕ್ಕ ಕುಟುಬ ಸದಸ್ಯೆರ್ ಶಾಲೆದ ಎದುರು ಬಾಲೆದ ಪುನನ್ ಪತೊಂದ್ ಸೂಕ್ತ ತನಿಖೆ ಆವೊಡು ಪಂದ್ ಪ್ರತಿಭಟನೆ ಮಲ್ತೊಂದುಲ್ಲೆರ್.
ಅಟಿಲ್ಗ್ ಗಲಸುನ ಎಲ್ಪಿಜಿ ಗ್ಯಾಸ್ ಕೊರ್ಪಿನಕ್ಲೆನ ಕಮಿಷನ್ ಕಾಸ್ನ್ ಕೇಂದ್ರ ಪೆಟ್ರೋಲಿಯಂ ಬೊಕ್ಕ ನೈಸರ್ಗಿಕ ಅನಿಲ ಸಚಿವಾಲಯ ಎಚ್ಚ ಮಲ್ತ್ಂಡ್.
14 ಕೆಜಿ ಸಿಲಿಂಡರ್ ಕಮಿಷನ್ನ್ 64.84 ರೂಪಾಯಿರ್ದ್ 73.18 ರೂಪಾಯಿಗ್ ಎಚ್ಚ ಆತ್ಂಡ್. ಪಂಡ 8.24 ರೂಪಾಯಿ ಎಚ್ಚ ಆತ್ಂಡ್. 5 ಕೆಜಿ ಸಿಲಿಂಡರ್ದ ಕಮಿಷನ್ ಕಾಸ್ 32.42 ರೂಪಾಯಿರ್ದ್ 36.54 ರೂಪಾಯಿಗ್ ಎಚ್ಚ ಮಲ್ತ್ದೆರ್. ನನ ಗ್ರಾಹಕೆರ್ ಸಿಲಿಂಡರ್ ಕಾಸ್ದ ಒಟ್ಟಿಗೆ ಕಮಿಷನ್ ಕಾಸ್ನ್ಲ ಕೊರೊಡಾಪುಂಡು.
ಸಿಕ್ಕಿಂಡ್ ಮೇಘಸ್ಫೋಟ ಆದ್ ಬತ್ತಿನ ಬಿರ್ಸ್ ದ ಬೊಲ್ಲರ್ದಾವರ 23 ಸೇನಾ ಸಿಬ್ಬಂದಿಲು ನಾಪತ್ತೆ ಆಯಿನ ಘಟನೆ ನಡತ್ಂಡ್.
ವರದಿದ ಪ್ರಕಾರ, ಉತ್ತರ ಸಿಕ್ಕಿಂದ ಲೊನಾಕ್ ಕಡಲ್ದ ಮಿತ್ತ್ ಮೇಘಸ್ಪೋಟ ಆದ್ ಲಾಚೆನ್ ಕಣಿವೆದ ತೀಸ್ತಾ ಸುದೆಟ್ಟ್ ಬೊಲ್ಲ ಬರಿಯರೆ ಕಾರಣ ಆಂಡ್. ಕಣಿವೆದ ಉದ್ದಗ್ಲ ಕೆಲ ಸೇನಾ ಟೆಂಟ್ ಲೆನ ಮಿತ್ತ್ ಪರಿಣಾಮ ಬೂರ್ದ್ಂಡ್. ಉಂದೆಟ್ಟ್ 23 ಸಿಬ್ಬಂದಿಲು ನಾಪತ್ತೆ ಆತೆರ್. ಕೆಲ ಗಾಡಿಲು ಕೆಸರ್ದ ಅಡಿಟ್ಟ್ ಮುರ್ಕ್ದ್ ಪೋತ್ಂಡ್.
ಎರ್ನಾಕುಲಂ: ಗೂಗಲ್ ಮ್ಯಾಪ್ ತೂದು ಕಾರ್ ಬುಡೊಂದು ಪೋಯಿನ ರಡ್ಡ್ ಡಾಕ್ಟರ್ನಕುಲು ತುದೆಕ್ಕ್ ಬೂರ್ದು ರಡ್ಡ್ ಜನ ತೀರ್ ಪೋಯಿನ ಘಟನೆ ಕೇರಳದ ಎರ್ನಾಕುಲಂಡ್ ನಡತ್ಂಡ್.
ಕೊಡುಂಗಲ್ಲೂರ್ದ ಖಾಸಗಿ ಆಸ್ಪತ್ರೆಡ್ ಬೇಲೆ ಮಲ್ತೊಂದಿತ್ತಿನ 28 ವರ್ಷದ ಡಾಕ್ಟರ್ ಅದ್ವೈತ್ ಬೊಕ್ಕ ಡಾ.ಅಜ್ಮಲ್ ತೀರ್ ಪೋಯಿನಕುಲು.
ಬರ್ತ್ಡೇ ಪಾರ್ಟಿಡ್ ಪಾಲ್ ಪಡೆದ್ ಕೊಚ್ಚಿರ್ದ್ ಕತ್ತಲೆಗ್ ವಾಪಸ್ ಬರೊಂದಿತ್ತಿನ ಪೊರ್ತುಡು ಜೋರ್ ಬರ್ಸ ಬರೊಂದಿತ್ತ್ಂಡ್. ಸಾದಿಲ ಸರಿಯಾದ್ ತೋಜಂದಿನೆಡ್ದಾವರ ಗೂಗಲ್ ಮ್ಯಾಪ್ನ್ ತೂಯೆರ್. ಅಯಿಟ್ಟ್ ಸಾದಿ ತಪ್ಪಾದ್ ತೋಜ್ಪಾಯಿನೆಡ್ದಾವರ ಸುದೆಕ್ಕ್ ಬೂರ್ದು ತೀರ್ ಪೋಯೆರ್.
ಬೊಂಬೈ: ಮಾಣಿಕ್ಯ ಪ್ರಕಾಶನ ಸಂಸ್ಥೆ ಹಾಸನ, ಕರ್ನಾಟಕ ಪ್ರತಿ ವರ್ಷದಂಚೆನೆ ಈ ವರ್ಷಲ ರಾಜ್ಯ ಬೊಕ್ಕ ಅಂತರ್ ರಾಜ್ಯದ ಸಾಹಿತ್ಯಿಕ ಕ್ಷೇತ್ರ ಕೊರ್ಪುನ 2023ನೇ ಸಾಲ್ ದ ಪ್ರಶಸ್ತಿನ್ ಪ್ರಕಟ ಮಲ್ದ್ಂಡ್. ಸಂಸ್ಥೆದ ಪದ್ಮಾವತಿ ವೆಂಕಟೇಶ ದತ್ತಿ ಪುರಸ್ಕಾರಗ್ ಬೊಂಬೈದ ಪುಗರ್ತೆದ ಲೇಖಕಿ ಅನಿತಾ ಪಿ.ತಾಕೊಡೆ ಮೆರೆನ `ನಿವಾಳಿಸಿ ಬಿಟ್ಟ ಕೋಳಿ’ ಕಥಾ ಸಂಕಲನ ಆಯ್ಕೆ ಆತ್ಂಡ್ ಪಂದ್ ಮಾಣಿಕ್ಯ ಪ್ರಕಾಶನ ಹಾಸನ ನೆತ್ತ ಪ್ರಕಾಶಕೆರ್ ದೀಪ ಉಪ್ಪಾರ್ ಬೊಕ್ಕ ಕೇಂದ್ರ ಕನ್ನಡ ಸಾಹಿತ್ಯ ವೇದಿಕೆ ಬೆಂಗ್ಲೂರ್ ದ ಸಂಸ್ಥಾಪಕಾಧ್ಯಕ್ಷೆರ್ ಕೊಟ್ರೇಶ್ ಎಸ್.ಉಪ್ಪಾರ್ ಪ್ರಕಟಣೆಡ್ ತೆರಿಪಾದೆರ್.
ಅನಿತಾ ಪೂಜಾರಿ ಮೇರ್ ಕಬಿಯಾದ್, ಲೇಖಕಿರಾದ್, ಕಥೆಗಾರ್ತಿಯಾದ್ ಸಾಹಿತ್ಯ ಕ್ಷೇತ್ರಡ್ ಗುರುತಿಸಾಯಿನಾರ್. ಮೇರ್ ಕೆಎಸ್ಒಯು ಮೈಸೂರು ವಿಶ್ವವಿದ್ಯಾಲಯಡ್ ಬಿ.ಎ ಪದವಿ ಪಡೆತೆರ್. ಬೊಂಬೈ ವಿಶ್ವವಿದ್ಯಾಲಯಡ್ ಎಂ.ಎ ಪದವಿನ್ ಸುರುತ್ತ
ರ್ಯಾಂಕ್ ದೊಟ್ಟಿಗೆ ಪಡೆಪುನ ಮುಖೇನ ಎಂ.ಬಿ.ಕುಕ್ಯಾನ್ ಸ್ವರ್ಣ ಪದಕನ್ ಪಡೆತೆರ್. ಇತ್ತೆ ಬೊಂಬೈ ವಿಶ್ವವಿದ್ಯಾಲಯಡ್ ಡಾ| ಜಿ. ಎನ್ ಉಪಾಧ್ಯ ಮೆರೆನ ಮಾರ್ಗದರ್ಶನಡ್ “ಬೊಂಬೈ ಬಿಲ್ಲವರು ಸಾಂಸ್ಕೃತಿಕ ಅಧ್ಯಯನ’ ವಿಷಯದ ಬಗೆಟ್ಟ್ ಪಿಎಚ್.ಡಿ ಅಧ್ಯಯನ ಮಲ್ತೊಂದು ಉಲ್ಲೆರ್.
ಬೊಂಬೈ ಬೊಕ್ಕ ಕುಡ್ಲ ಆಕಾಶವಾಣಿಡ್ ಮೆರೆನ ಕತೆ, ಭಾವಗೀತೆ ಬೊಕ್ಕ ಕವನಲು ಪ್ರಸಾರ ಆತ್ಂಡ್. ಇತ್ತೆ ಪ್ರಸ್ತುತ ಕನ್ನಡಿಗ ಪತ್ರಕರ್ತೆರೆನ ಸಂಘ ಮಹಾರಾಷ್ಟ್ರ (ರಿ.) ದ ಕಾರ್ಯಕಾರಿ ಸಮಿತಿದ ಸಕ್ರಿಯ ಸದಸ್ಯೆರಾದುಲ್ಲೆರ್.
ಬೊಂಬೈ: ಕರ್ನಾಟಕ ಕರಾವಳಿ ಜಿಲ್ಲೆದ ಅಭಿವೃದ್ದಿಗಾದ್ ಕ್ರಿಯಾಶೀಲ ಆದಿಪ್ಪುನ ಸರಕಾರೇತರ ಸಂಘಟನೆ ಜಯಶ್ರೀ ಕೃಷ್ಣ ಪರಿಸರ ಪ್ರೇಮಿ ಸಮಿತಿದ 23ನೇ ವಾರ್ಷಿಕ ಮಹಾಸಭೆ ಸೆ.18 ಕ್ಕ್ ಬಯ್ಯಗ್ ಕುರ್ಲಾ ಪೂರ್ವ ಬಂಟರ ಸಂಘ ಬೊಂಬೈದ ಅನೆಕ್ಸ್ ಸಭಾಗೃಹಡ್ ಸಮಿತಿದ ಸಂಸ್ಥಾಪಕೆರ್ ತೋನ್ಸೆ ಜಯಕೃಷ್ಣ ಎ ಶೆಟ್ಟಿ ಮೆರೆನ ಉಪಸ್ಥಿತಿಡ್, ಗುರ್ಕಾರೆ ಎಲ್. ವಿ. ಅಮೀನ್ ಮೆರೆನ ಗುರ್ಕಾರ್ಮೆಡ್ ನಡಪರೆ ಉಂಡು.
ಮಹಾಸಭೆತ್ತ ಕಾರ್ಯಸೂಚಿದಂಚೆನೆ ಸಭೆಟ್ಟ್ ಸಮಿತಿದ ದಕ್ಷಿಣ ಕನ್ನಡ ಬೊಕ್ಕ ಒಡಿಪು ಜಿಲ್ಲೆಡ್ ಕೈತಲ್ ದ ಸಮಿತಿ ಸ್ಥಾಪನೆ ಮಲ್ಪುನ ಬಗೆಟ್ಟ್ ಮಂಜೂರು ಮಲ್ಪರೆ ಉಂಡು. ಒಡಿಪು ಜಿಲ್ಲೆದ ಉಳೆಪಾಡಿ ಬೊಕ್ಕ ಕೊಲ್ಲೂರು ಬಳ್ಕುಂಜೆಡ್ 1097 ಎಕರೆ ಭೂ ಕೈಗಾರಿಕೀಕರಣದ ಯೋಜನೆ ಬಗೆಟ್ಟ್ ಚರ್ಚೆ ಮಲ್ಪೆರೆ ಉಂಡು. ಅಂಚೆನೆ ಬೇತೆ ಬೇತೆ ಇಸಯಲೆನ ಬಗೆಟ್ಟ್ ಚರ್ಚೆ ನಡಪರೆ ಉಂಡು.
ಈ ಸಭೆಟ್ಟ್ ಸಮಿತಿದ ಸದಸ್ಯೆರ್ ಮಾತ ಬತ್ತ್ ದ್ ಸಭೆನ್ ಪೊರ್ಲು ಮಲ್ತ್ ದ್ ಕೊರೊಡು ಪಂದ್ ಜಯಶ್ರೀ ಕೃಷ್ಣ ಪರಿಸರ ಪ್ರೇಮಿ ಸಮಿತಿದ ಪ್ರಧಾನ ಕಾರ್ಯದರ್ಶಿ ಮುಂಡ್ಕೂರು, ಸುರೇಂದ್ರ ಸಾಲ್ಯಾನ್, ಗೌರವ ಕೋಶಾಧಿಕಾರಿ ತುಳಸಿದಾಸ್ ಅಮೀನ್ ಬೊಕ್ಕ ಪದಾಧಿಕಾರಿಲು ಬಿನ್ನಾಪು ಮಲ್ತೆರ್.
