ಆಟಿ ತಿಂಗೊಲು ಬತ್ತ್ಂಡ ನಮ್ಮ ತುಳುನಾಡ್ ಡ್ ಪುಟ್ಟು ಬಲತಿನ ತುಳುವೆರೆಗೊಂಜಿ ಗೌಜಿ- ಗಮ್ಮತ್ತ್ , ಅವುಲ ಪೆದ್ದಿ ಅಪ್ಪೆನ ಊರು ಬುಡ್ದ್ ಬಂಜಿದ ಬಡವುಗೋಸ್ಕರ ಪರವೂರುಡು ಬದುಕ್ ಕಟ್ಟಿನ ನಮ್ಮ ಪೆರ್ಮೆದ ತುಳುವೆರ್ ಆಟಿಡೊಂಜಿ ದಿನ ಲೇಸ್ ನ್ ಪುರಾ ಪೊರ್ಲುಡ್ ಆಚರಣೆ ಮಲ್ಪುವೆರ್.
ಆಗೊಸ್ಟು7 ಐತಾರ ಪರಿವಾರ ಬಂಟರ ಸಂಘ ( ರಿ ) ಬೆಂಗಳೂರು ವಲಯದ ಸಮಾಜದ ಬಂಧುಲೆನ್ ಪುರಾ ಒಟ್ಟು ಸೇರ್ಪಾದ್ ಮಾಗಡಿ ರೋಡುದ ಮಾಚೋಹಳ್ಳಿದ ಸುರೇಂದ್ರ ಕುಕ್ಕರಬೆಟ್ಟು ಮೆರನ ಎಸ್ ಕೆ ಎಂಟರ್ ಪ್ರೈಸಸ್ ಕಾಂಪ್ಲೆಕ್ಸ್ ದ ಚಾವಡಿಡ್ ‘ಆಟಿಡೊಂಜಿ ಲೇಸ್’ ಬಾರಿ ಗೌಜಿಡ್ ನಡತ್ತ್ಂಡ್.
ಮಾಸ್ಟರ್ ಆಯುಷ್ ದೇವೆರೆನ ಭಕ್ತಿ ಸುಗಿಪುದೊಟ್ಟುಗ್ ,ಸಂಘದ ಗುರ್ಕಾಲು,ಕಾರ್ಯೆಂತೆರ್, ಸಂಘದ ಕಾರ್ಯಕಾರಿ ಸಮಿತಿದ ಸದಸ್ಯೆರ್ ಬೊಕ್ಕ ,ಮುಖ್ಯ ಬಿನ್ನೆರೆನ ಬೊಕ್ಕ ಮಾತಾ ಸಮಾಜದ ಬಂದುಲೆನ ಉಪಸ್ಥಿತಿಡ್ ತುಡಾರ್ ಅರ್ಲಾದ್ ಆಟಿಡೊಂಜಿ ಲೇಸ್ ದ ಉದಿಪನ ಮಲ್ತೆರ್.
ಪರಿವಾರ ಬಂಟರ ಸಂಘದ ಗುರ್ಕಾಲಾಯಿನ ರಘವೀರ್ ನಾಯ್ಕ್ , ಸಂಘದ ಹಿರಿಯ ಸದಸ್ಯೆರಾಯಿನ ವಿಜಯ ಬ್ಯಾಂಕ್ ದ ನಿವೃತ್ತ ಅಧಿಕಾರಿ ಐಲುಕುಂಜೆ ಸಂಜೀವ ನಾಯ್ಕ ಬೊಕ್ಕ ಆರೆನ ಧರ್ಮಪತ್ನಿ ಪದ್ಮಾವತಿ ಸಂಜೀವ ನಾಯ್ಕ್ ಮೊಕುಲು ಮಲ್ಲ ಬಿನ್ನೆರಾದ್ ಆಟಿದ ಈ ಪೊರ್ತುಡು ನಮ ಆಚರಣೆ ಮಲ್ಪುನೆಟ್ಟ್ ದುಂಬುದ ಜನಾಂಗೊಗು ತೆರಿಪಾಯಿಲಕ್ಕ ಆಪುಂಡು ಪಂಡ್ದ್ ಅಭಿಪ್ರಾಯ ಪಂಡೆರ್.ಪರಿವಾರ ಬಂಟರ ಸಂಘದ ಪುಗರ್ತೆದ ಯುವ ನ್ಯಾಯವಾದಿ ವಿನೋದ್ ಕುಮಾರ್ ಮೆರ್ ಪರಿವಾರ ಬಂಟರ ಸಮುದಾಯೊನ್ 2A ಜಾತಿ ಪಟ್ಟಿಡ್ ಸೇರಿಸಾವುನ ಬಗೆಟ್ ತೆರಿಪಾಯೆರ್.
ಪರಿವಾರ ಬಂಟರ ಸಂಘದ ಕಾರ್ಯದರ್ಶಿ ಯಶವಂತ್ ನಾಯ್ಕ್ ಮೇರ್ ಬಿನ್ನೆರೆನ್ ಗಣ್ಯರೆನ್ ಮೋಕೆಡ್ ಎದ್ಕೊನಿಯೆರ್.
ಮಹಿಳಾ ವೇದಿಕೆದ ಕಾರ್ಯಕರ್ತೆಯಾಯಿನ ರಾಖಿ ನಯನ್ ಚಂದ್ರ ಮೆರ್ ಆಟಿದ ಪೊಲಬುನ್ ತೆರಿಪಾಯೆರ್ .ನಮ್ಮ ತುಳುನಾಡ್ ದ ಸಂಸ್ಕೃತಿ,ಆಚಾರ ವಿಚಾರದ ಬಗ್ಗೆ ಸಾಕ್ಷ್ಯ ಚಿತ್ರ ಬೊಕ್ಕ ಐತ ವಿಶೇಷತೆ ಬಗ್ಗೆ ಸಂಘದ ಮಾಜಿ ಕಾರ್ಯೆಂತೆರ್ ಎಡನೀರು ಬಾಲಕೃಷ್ಣ ಮೇರ್ ತೆರಿಪಾದ್ ಕೊರಿಯೆರ್.
ಸಂಘದ ಕಾರ್ಯೆಂತೆರ್ ಯಶವಂತ್ ನಾಯ್ಕ್ ಮೇರ್ ಚಾವಡಿ ಲೇಸ್ಡ್ ಪಾತೆರೊಂದು ನಮ್ಮ ಜವನೆರ್ ಸಮಾಜದ ಏಳಿಗೆಗಾದ್ ದುಂಬು ಬರೊಡ್ ಆ ನಿಟ್ಟಿಡ್ ನಮ್ಮ ಪರಿವಾರ ಬಂಟರ ಸಂಘೊಗು ಅಭಿವೃದ್ಧಿ ಆಪುಂಡ್ ಪಂಡ್ದ್ ಬಿನ್ನಪು ಮಲ್ತೆರ್ ಅಂಚೆನೇ ಪುತ್ತೂರುಡ್ ನಮ್ಮ ಪೊಸ ಸಂಘದ ಬುಳೆಚ್ಚಿಲೆಗ್ ದಾನಿಲೆನ ಅವಶ್ಯಕತೆ ಉಂಡು ಪಂಡೆರ್ ಅಂಚೆನೇ ಸಂಕೇತಿಕವಾದ್ ಕಟ್ಟಡ ನಿರ್ಮಾಣಗೊ ಒಂಜಿ ಲಕ್ಷದ ದೇಣಿಗೆದ ಅಡ್ವಾನ್ಸ್ ರೂ 50000/ ಪಣವುದ ಸಹಕಾರ ಕೊರಿಯೆರ್.
ಆಟಿದ ಸಂಭ್ರಮೊದ ದಿನೊಟ್ ಸಮಾಜದ ಬಂದುಲು ಅಕ್ಲೆನ ಇಲ್ಲಡ್ ಅಟಿಲ್ ಮಲ್ತ್ ದ್
ಬೇತೆ ಬೇತೆ ರೀತಿದ ತಿಂಡಿ ತಿನಸ್ ನ್ ಕೊನುದು ಬತ್ತ್ದ್ ಸಮಾಜದ ಬಂದುಲು ಆಟಿದ ವನಸ್ ಮಲ್ತ್ ದ್ ಖುಷಿ ಪಡೆಯೆರ್.
ಲೇಸ್ ಡ್ ಪಾಲುಪಡೆಯಿನ ಮುಖ್ಯ ಬಿನ್ನೆರೆಗ್, ಗಣ್ಯೆರೆಗ್ ಶಾಲು ಪಾಡ್ದ್ ಮಾನಾದಿಗೆ ಮಲ್ತೆರ್,ಅಂಚೆನೇ ಲೇಸ್ದ್ ಸಂಭಾಗಣದ ಜಾಗೆನ್ ಕೊರ್ನ ಉದ್ಯಮಿ ಸುರೇಂದ್ರ ಕುಕ್ಕರೆ ಬೆಟ್ಟು ಬೊಕ್ಕ ಧರ್ಮಪತ್ನಿ ನಯನ ಸುರೇಂದ್ರ ಕುಕ್ಕರೆ ಬೆಟ್ಟು ಮೊಕೆಲೆಗ್ ಸಂಘದ ಮಾನಾದಿಗೆ ಮಲ್ತೆರ್. ಕಟ್ಟೊನ ನಿರ್ಮಾಣಗೊ ಬೋಡಾದ್ ಪಣವುದ ಸಹಕಾರ ಕೊರ್ನ ಸಮಾಜದ ಬಂದುಲೆಗ್ಲ ಪೂ ಗೊಂಚಿಲ್ ಕೊರ್ದು ಮಾನಾದಿಗೆ ಮಲ್ತೆರ್.
ಗುರ್ಕಾಮೆ ವಹಿಸೊಂದು ರಘುವೀರ್ ನಾಯ್ಕ್ ಮೇರ್ ಪಾತೆರ್ದ್ ನಮ್ಮ ಸಮಾಜದ ಅಭಿವೃದ್ಧಿ ಆವೊಡಾಂಡ ನಮ ಮಾತಾ ಒಂಜೇ ಮನಸ್ಸ್ ಡ್ ಸಮಾಜದ ಅಭಿವೃದ್ಧಿ ಗಾದ್ ನಮ ಒಂಜೆಪ್ಪನ ಜೋಕುಲೆಲೆಕ ಕೈ ಜೋಡಿಸಾದ್ ಬೇಲೆ ಮಲ್ಪೊಡ್ ಪಂಡ್ದ್ ಬಿನ್ನಪು ಮಲ್ತೆರ್. ರವೀಶ್ ಬಾಲಕೃಷ್ಣ ಮೇರ್ ವಂದಾನರ್ಪನೆ ಮಲ್ತೆರ್ , ಲೇಸ್ದ್ ನಿರೂಪಣೆನ್ ಸೌಮ್ಯ ಮನೋಜ್ ಮೆರ್ ಪೊರ್ಲುಡ್ ನಡಪಾದ್ ಕೊರಿಯೆರ್.
✍🏻 ಯಾದವ ಎಸ್ ಕಲ್ಲಾಪು
