ಬೊಂಬೈ ವಿಶ್ವವಿದ್ಯಾಲಯ ಕನ್ನಡ ವಿಭಾಗ ಸೆ.30 ಕ್ಕ್ ಕವಿವರ್ಯ ಕುಸುಮಾಗ್ರಜ ಮರಾಠಿ ಭಾಷಾಭವನದ ಸಭಾಂಗಣಡ್ ಮಧ್ಯಾಹ್ನ ಜಯ ಸಿ ಮೆರೆನ ನೆಂಪುಗಾದ್, ಅನಿತಾ ತಾಕೊಡೆ ಮೆರೆನ ಸುವರ್ಣಯುಗ ಬೂಕು ಬುಡುಗಡೆ ಲೇಸ್ ನ್ ಆಯೋಜನೆ ಮಲ್ದೆರ್.
ಈ ಪೊರ್ತುಡು ಬೇತೆ ಬೇತೆ ಕ್ಷೇತ್ರಡ್ ಸಾಧನೆ ಮಲ್ತಿನ ಬೊಂಬೈ ತುಳು-ಕನ್ನಡಿಗೆರೆನ್ ಗುರುತಿಸಾದ್ ಗೌರವಿಸಾವೊನ ಲೇಸ್ ಕರಿನ ಸುಮಾರ್ ವರ್ಷೊದಿಂಚ ಕನ್ನಡ ವಿಭಾಗ ನಡಪಾವೊಂದು ಬರೊಂದು ಉಂಡು. ಈ ಸರ್ತಿ ಸಂಘಟನಾ ಕ್ಷೇತ್ರದ ಸಾಧನೆಗಾದ್ ಸಂಘಟಕೆರ್, ಡೊಂಬಿವಲಿ ಕರ್ನಾಟಕ ಸಂಘದ ಗುರ್ಕಾರೆ ಆಯಿನ ಇಂದ್ರಾಳಿ ದಿವಾಕರ ಶೆಟ್ಟಿ, ಸಾಂಸ್ಕೃತಿಕ ಕ್ಷೇತ್ರದ ಸಾಧನೆಗಾದ್ ಪುಗರ್ತೆ ಪಡೆಯಿನ ನಿರೂಪಕೆರ್, ಸಾಹಿತಿ, ಕಲಾವಿದೆರ್ ಆಯಿನ ಅಶೋಕ್ ಪಕ್ಕಳ ಬೊಕ್ಕ ಶೈಕ್ಷಣಿಕ, ಸಾಹಿತ್ಯ ಕ್ಷೇತ್ರದ ಸಾಧನೆಗಾದ್ ಡಾ. ಉಮಾ ರಾಮರಾವ್ ಮೆರೆನ್ ಮಾನಾದಿಗೆ ಮಲ್ತೆರ್.
ಬೊಂಬೈ ವಿಶ್ವವಿದ್ಯಾಲಯ ಕನ್ನಡ ವಿಭಾಗದ ಪ್ರಾಧ್ಯಾಪಕೆರ್ ಬೊಕ್ಕ ಮುಖ್ಯಸ್ಥೆರಾಯಿನ ಡಾ.ಜಿ.ಎನ್ ಉಪಾಧ್ಯ ಮೆರೆನ ಗುರ್ಕಾರ್ಮೆಡ್ ನಡಪರೆ ಇಪ್ಪುನ ಈ ಲೇಸ್ ಡ್ ಬೊಂಬೈದ ಸಂಸದೆರ್ ಗೋಪಾಲ ಶೆಟ್ಟಿ, ಕರ್ನಾಟಕ ಸರಕಾರದ ಪ್ರಾಥಮಿಕ ಬೊಕ್ಕ ಪ್ರೌಢ ಶಿಕ್ಷಣ ಖಾತೆದ ಸಚಿವೆರ್ ಮಧು ಬಂಗಾರಪ್ಪ, ಕನ್ನಡ ವಿಭಾಗದ ಸಂದರ್ಶಕ ಪ್ರಾಧ್ಯಾಪಕೆರ್ ಡಾ. ವಿಶ್ವನಾಥ ಕಾರ್ನಾಡ್, ರಾಣಿ ಅಬ್ಬಕ್ಕ ತುಳು ಅಧ್ಯಯನ ಕೇಂದ್ರ ಬಂಟ್ವಾಳದ ಗುರ್ಕಾರೆ ಡಾ.ತುಕರಾಮ್ ಪೂಜಾರಿ, ಸಾಯಿ ಪ್ಯಾಲೇಸ್ ಗ್ರೂಪ್ ಆಫ್ ಹೋಟೆಲ್ಸ್ ದ ಆಡಳಿತ ನಿರ್ದೇಶಕೆರ್ ರವಿ ಎಸ್ ಶೆಟ್ಟಿ, ಜಾಗತಿಕ ಬಂಟರ ಸಂಘದ ಗುರ್ಕಾರೆ ಐಕಳ ಹರೀಶ ಶೆಟ್ಟಿ, ವಿಶ್ವದೇವಾಡಿಗ ಮಹಾಮಂಡಲದ ಗುರ್ಕಾರೆ ಧರ್ಮಪಾಲ ಯು ದೇವಾಡಿಗ, ಜಯಶ್ರೀ ಕೃಷ್ಣ ಪರಿಸರಪ್ರೇಮಿ ಸಮಿತಿ, ಬೊಂಬೈದ ಸಂಸ್ಥಾಪಕೆರ್ ತೋನ್ಸೆ ಜಯಕೃಷ್ಣ ಎ ಶೆಟ್ಟಿ, ರಾಷ್ಟ್ರೀಯ ಬಿಲ್ಲವ ಮಹಾಮಂಡಲದ ಗುರ್ಕಾರೆ ರಾಜಶೇಖರ ಕೋಟ್ಯಾನ್, ಸೂರ್ಯಕಾಂತ ಜಯ ಸುವರ್ಣ, ಭಾಸ್ಕರ ಸಾಲ್ಯಾನ್ ಮೊಕ್ಲೆನ ಉಪಸ್ಥಿತಿಡ್ ಮಾನಾದಿಗೆ ನಡಪರೆ ಉಂಡು.
ಬೊಂಬೈ ವಿಶ್ವವಿದ್ಯಾಲಯ ಕನ್ನಡ ವಿಭಾಗದ ಸಹಪ್ರಾಧ್ಯಾಪಕೆರ್ ಡಾ.ಪೂರ್ಣಿಮಾ ಸುಧಾಕರ ಶೆಟ್ಟಿ, ಬಿಲ್ಲವರ ಅಸೋಸಿಯೇಶನ್ ದ ಮಾಜಿ ಗುರ್ಕಾರೆ ನಿತ್ಯಾನಂದ ಕೋಟ್ಯಾನ್ ಮೊಕುಲು ಲೇಸ್ ನ್ ಸಂಯೋಜನೆ ಮಲ್ದೆರ್. ಅಂಚೆನೆ ಈ ಲೇಸ್ ಡ್ ಮಾತೆರ್ಲಾ ಪಾಲ್ ಪಡೆವೊಡು ಪಂದ್ ಪ್ರಕಟಣೆಡ್ ತೆರಿಪಾದೆರ್.
