ಬೊಂಬಾಯಿದ ಸುದ್ದಿ | Mumbai News

ಜಯ ಸುವರ್ಣ ಕೂಟದಕ್ಲೆನ ಕೈಕ್ಕ್ ಭಾರತ್ ಬ್ಯಾಂಕ್ ದ ಆಡಳಿತ

ಬೊಂಬೈ: ಮಹಾರಾಷ್ಟ್ರದ ಮಣ್ಣ್ ಡ್ ಬಿಲ್ಲವ ಸಮಾಜದ ಪ್ರತಿಷ್ಠೆದ ಬ್ಯಾಂಕ್, ತುಳುವೆರೆನ ಪೆರ್ಮೆದ ಭಾರತ್ ಬ್ಯಾಂಕ್ ದ ಆಡಳಿತ ಮಂಡಳಿದ ಓಟುಡು ಬಿಲ್ಲವ ಭವನದ ರೂವಾರಿ ದಿ. ಜಯ ಸುವರ್ಣ ಮೆರೆನ ಕೂಟದಕುಲು ಗೆಂದ್ ದೆರ್.

ಪ್ರತಿಷ್ಠಿತ ಭಾರತ್ ಬ್ಯಾಂಕ್ ಗ್ ಅ.2 ಕ್ಕ್ ಓಟು ನಡತ್ ದ್ ಅ.4 ಕ್ಕ್ ರಿಸಲ್ಟ್ ಬೈದ್ಂಡ್. ಬೊಲ್ಪುರ್ದ್ ರಾತ್ರೆ ಮುಟ್ಟ ಒಟ್ಟು 5 ಸುತ್ತುಡು ಓಟು ಗೆನ್ಪುನ ಬೇಲೆ ನಡತ್ಂಡ್. ಸುರುತ್ತ ಸುತ್ತುಡು ಜಯ ಸುವರ್ಣ ಪ್ಯಾನೆಲ್ ದ ಮಾತ ಅಭ್ಯರ್ಥಿಲು ಮಸ್ತ್ ಓಟುರ್ದ್ ದುಂಬು ಇತ್ತೆರ್. ಅಕೇರಿದ ಸುತ್ತುದ ಓಟುದ ಲೆಕ್ಕ ಮುಗಿನಗ ಜಯ ಸುವರ್ಣ ಪ್ಯಾನೆಲ್ ದ ಎಚ್ಚದ ಅಭ್ಯರ್ಥಿಲು 1500 ರ್ದ್ ಎಚ್ಚ ಓಟುದ ಅಂತರಡ್ ಗೆಂದಿಯೆರ್.

ಭಾರತ್ ಬ್ಯಾಂಕ್ ದ ಆಡಳಿತ ಮಂಡಳಿ ಓಟುಡು ಈ ಸರ್ತಿ ಜಯ ಸುವರ್ಣ ಬೊಕ್ಕ ಬೊಂಬೈ ಬಿಲ್ಲವರ ಅಸೋಸಿಯೇಷನ್ ದ ಅಧ್ಯಕ್ಷೆರ್ ಹರೀಶ್ ಅಮೀನ್ ಮೆರೆನ ಪ್ಯಾನೆಲ್ ದ ನಡುಟ್ಟ್ ನೇರ ಫೈಟ್ ಇತ್ತ್ ದ್, ಭಾರಿ ಕುತೂಹಲ ಇತ್ತ್ಂಡ್.

ಓಟುದ ಫಲಿತಾಂಶ ಘೋಷಣೆ ಆಯಿನಂಚೆನೆ, ಜಯ ಸುವರ್ಣ ಅಭಿಮಾನಿ ಬಳಗ, ಹಿತೈಷಿಲು, ಸಮಾಜ ಬಾಂಧವೆರ್ ಜಯ ಸುವರ್ಣ ಪ್ಯಾನೆಲ್ ದ ನಾಯಕೆ ಸೂರ್ಯಕಾಂತ ಜಯ ಸುವರ್ಣ ಬೊಕ್ಕ ಗೆಂದಿನ ಮಾತ ಅಭ್ಯರ್ಥಿಲೆಗ್ ಅಭಿನಂದನೆ ಸಂದಾದೆರ್.

ಮೀರಾ ಭಾಯಿಂದರ್ ಡ್ ಪುಳಿ ಮುಂಚಿ ತುಳು ಪಿಕ್ಚರ್ ದ ಪ್ರೀಮಿಯರ್ ಶೋ

ಬೊಂಬೈ: ಮೀರಾ ಭಾಯಿಂದರ್ ಮೂವಿಮ್ಯಾಕ್ಸ್ PVR ಕನಕಿಡ್ ಅ.1 ಐತಾರ ಬೊಲ್ಪುಗು 11.30 ಕ್ಕ್ “ಪುಳಿ ಮುಂಚಿ” ತುಳು ಪಿಕ್ಚರ್ ದ ಬೊಂಬೈ ಪ್ರೀಮಿಯರ್ ಶೋ ನಡತ್ಂಡ್.

ಈ ಶೋ ತ್ತ ಎಚ್ಚದ ಪೊಲಬುಗಾದ್ ಸಂತು ಶೆಟ್ಟಿ – 9987830194 ಸತೀಶ್ ಶೆಟ್ಟಿ – 7021631406 ಸೀತಾರಾಮ ಶೆಟ್ಟಿ – 8369544002 ಮೊಕ್ಲೆನ್ ಸಂಪರ್ಕ ಮಲ್ಪೊಲಿ ಪಂದ್ ಲೇಸ್ ದ ವ್ಯವಸ್ಥಾಪಕೆರ್ ಶ್ರೇಯಸ್ ಶೆಟ್ಟಿ ನೆರೊಲ್ ತೆರಿಪಾದೆರ್. ‌

ಬೊಂಬೈ ಕುಲಾಲ ಸಂಘದ ಮುತಾಲಿಕೆಡ್ ನವಿಬೊಂಬೈ ಸ್ಥಳೀಯ ಸಮಿತಿದ ವಾರ್ಷಿಕ ಸ್ನೇಹ ಸಮ್ಮಿಲನ, ಸಾಧಕೆರೆಗ್ ತಮ್ಮನ, ಬುಡ್ದು ಪೋವೊಚ್ಚಿ” ತುಳು ನಾಟಕ

ನವಿಬೊಂಬೈ: ಬೊಂಬೈ ಕುಲಾಲ ಸಂಘದ ನವಿಬೊಂಬೈ ಸ್ಥಳೀಯ ಸಮಿತಿದ ವಾರ್ಷಿಕ ಸ್ನೇಹ ಸಮ್ಮಿಲನ ಲೇಸ್ ಸಂಘದ ಗುರ್ಕಾರೆ ರಾಘು ಎ ಮೂಲ್ಯ ಮೆರೆನ ಗುರ್ಕಾರ್ಮೆಡ್ ಬೊಕ್ಕ ಮಾನಾದಿಗೆದ ಗುರ್ಕಾರೆ ದೇವದಾಸ್ ಕುಲಾಲ್ ಮೆರೆನ ಉಪಸ್ಥಿತಿಡ್ ಅ.1 ಕ್ಕ್ ನವಿಬೊಂಬೈ ಕನ್ನಡ ಸಂಘದ ವಾಶಿ ಬಸ್ ಡಿಪೋ ಕೈತಲ್ ನಡತ್ಂಡ್.

ಈ ಲೇಸ್ ಡ್ ಸಂಘದ ಸದಸ್ಯೆರ್ ಬೊಕ್ಕ ಸಮಾಜ ಕಾರ್ಯಕರ್ತೆರ್ ದಿನಕರ್ ಬಂಗೇರ ಥಾಣೆ ಬೊಕ್ಕ ಬಿ ಜಿ ಅಂಚನ್, ಲಲಿತಾ ದಂಪತಿಲು ತನ್ನ 50ನೇ ವರ್ಷೊದ ವೈವಾಹಿಕ ಜೀವನದ ಲೆಕ್ಕೊಡು ಇಸೇಸವಾದ್ ಸನ್ಮಾನ ಮಲ್ತೆರ್. ಬೊಕ್ಕ ಸಂಘದ ಸ್ಥಳೀಯ ಸಮಿತಿದ ಸದಸ್ಯೆರ್ದ್ ಬೊಕ್ಕ ಜೋಕುಲೆರ್ದ್ ಬೇತೆ ಬೇತೆ ಸಾಂಸ್ಕೃತಿಕ ಲೇಸ್ ಬೊಲ್ಪುಗು ನಡತ್ಂಡ್. ಅತ್ತಂದೆ ನವಿಬೊಂಬೈ ಕೈತಲ್ ದ ಸಮಿತಿದ ಸದಸ್ಯೆರೆರ್ದ್ ಧನಂಜಯ ಮೂಳೂರು ನಿರ್ದೇಶನದ, ಸತೀಶ್ ಏರ್ಮಾಳ್ ಬರೆತಿನ “ಬುಡ್ದು ಪೋವೊಚ್ಚಿ” ತುಳು ಸಾಮಾಜಿಕ ಹಾಸ್ಯ ನಾಟಕ ಸಮಿತಿದ ಸದಸ್ಯೆರೆರ್ದ್ ಪ್ರದರ್ಶನ ಆಂಡ್.

ಈ ಲೇಸ್ ಗ್ ಮಾತ ಸಮಾಜ ಬಾಂಧವೆರ್ ಎಚ್ಚದ ಸಂಖ್ಯೆಡ್ ಪಾಲ್ ಪಡೆದ್, ಈ ಲೇಸ್ ನ್ ಪೊರ್ಲು ಮಲ್ತ್ ದ್ ಕೊರೊಡು ಪಂದ್ ಕುಲಾಲ ಸಂಘದ ಪರವಾದ್ ಉಪಾಧ್ಯಕ್ಷೆರ್ ಡಿ ಐ ಮೂಲ್ಯ, ಗೌರವ ಪ್ರಧಾನ ಕಾರ್ಯದರ್ಶಿ ಕರುಣಾಕರ್ ಬಿ ಸಾಲಿಯಾನ್, ಕೋಶಾಧಿಕಾರಿ ಜಯ ಅಂಚನ್, ಮಹಿಳಾ ವಿಭಾಗದ ಕಾರ್ಯಾಧ್ಯಕ್ಷೆ ಮಮತಾ ಎಸ್ ಗುಜರನ್, ಬೊಕ್ಕ ನವಿಬೊಂಬೈ ಪ್ರಾದೇಶಿಕ ಸಮಿತಿದ ಪರವಾದ್ ಕಾರ್ಯಾಧ್ಯಕ್ಷೆರ್ ವಾಸು ಏಸ್ ಬಂಗೇರ, ಉಪ ಕಾರ್ಯಾಧ್ಯಕ್ಷೆರ್ ಸದಾನಂದ ಕುಲಾಲ್, ಕಾರ್ಯದರ್ಶಿ ಎಲ್ ಆರ್ ಮೂಲ್ಯ ಕೆಂಜಾರು, ಕೋಶಾಧಿಕಾರಿ ಸೂರಜ್ ಏಸ್ ಕುಲಾಲ್, ಜತೆ ಕಾರ್ಯದರ್ಶಿ ಕ್ರಪೇಶ್ ಕುಲಾಲ್, ಜತೆ ಕೋಶಾಧಿಕಾರಿ ಆನಂದ್ ಮೂಲ್ಯ ಖಾಮೋಟೆ, ಕ್ರೀಡೆ ಬೊಕ್ಕ ಸಾಂಸ್ಕೃತಿಕ ಸಂಚಾಲಕೆರ್ ಪ್ರಸಾದ್ ಎಸ್ ಮೂಲ್ಯ ಬೊಕ್ಕ ಸದಸ್ಯೆರ್, ಪ್ರಾದೇಶಿಕ ಸಮಿತಿದ ಮಹಿಳಾ ವಿಭಾಗದ ಕಾರ್ಯಾಧ್ಯಕ್ಷೆರ್ ಮಮತಾ ಏಸ್ ಕುಲಾಲ್, ಉಪ ಕಾರ್ಯಾಧ್ಯಕ್ಷೆರ್ ದೇವಕಿ ಸುನಿಲ್ ಸಾಲಿಯಾನ್, ಕಾರ್ಯದರ್ಶಿ ಬೇಬಿ ವಿ ಬಂಗೇರ, ಕೋಶಾಧಿಕಾರಿ ಉಷಾ ಆರ್ ಮೂಲ್ಯ, ಉಪ ಕಾರ್ಯದರ್ಶಿ ಶೋಭಾ ಏನ್ ಬಂಗೇರ, ಉಪ ಕೋಶಾಧಿಕಾರಿ ಸುಶೀಲಾ ಪಿ ಬಂಗೇರ, ಸಾಂಸ್ಕೃತಿಕ ಬೊಕ್ಕ ಕ್ರೀಡೆ ಪ್ರೇಮ ಎಲ್ ಮೂಲ್ಯ, ನವಿಬೊಂಬೈ ಗುರುವಂದನಾ ಭಜನಾ ಮಂಡಳಿದ ಸಂಚಾಲಕೆರ್ ಮಲ್ಲಿಕಾ ಡಿ ಕುಲಾಲ್ ಬೊಕ್ಕ ಮತ ಸದಸ್ಯೆರ್ ಪಾಲ್ ಪಡೆದಿತ್ತೆರ್.

ಅ.10: ನೆರುಲ್ ಶನೀಶ್ವರ ಮಂದಿರದ ಸಭಾಗೃಹಡ್ ಶನೀಶ್ವರ ಮಹಾತ್ಮೆ ಆಟ

ಬೊಂಬೈ ಶ್ರೀ ಸಿದ್ಧಿವಿನಾಯಕ ಯಕ್ಷಗಾನ ಮಂಡಳಿ 18ನೇ ಶನೀಶ್ವರ ಮಂದಿರ ನೆರೂಲ್ ದ ಮುತಾಲಿಕೆಡ್ ಅ.10 ಬಯ್ಯಗ್ ನೆರುಲ್ ಶನೀಶ್ವರ ಮಂದಿರದ ಸಭಾಗೃಹಡ್ ಶನೀಶ್ವರ ಮಹಾತ್ಮೆ ಆಟ ನಡಪರೆ ಉಂಡು.

ಕೈತಲ್ ದ ಸಂಘ ಸಂಸ್ಥೆ ಕಲಾಪೋಷಕೆರೆನ ಸಹಕಾರಡ್, ಧರ್ಮದರ್ಶಿಲು ರಮೇಶ್ ಪೂಜಾರಿ ಮೆರೆನ ಎಡ್ಡೆಪ್ಪುದೊಟ್ಟಿಗೆ, ಶ್ರೀ ಶನೀಶ್ವರ ಮಂದಿರ ನೆರೂಲ್ ನವಿ ಬೊಂಬೈದ ಪ್ರೋತ್ಸಾಹಡ್ ನಡಪರೆ ಉಂಡು.

ಈ ಲೇಸ್ ನ್ ರಂಗಕಲಾವಿದೆರ್ ಬಾಲಕೃಷ್ಣ ಶೆಟ್ಟಿ ಅದ್ಯಪಾಡಿ ಒಯಿಸೊನ್ವೆರ್ ಪಂದ್ ನವಿಬೊಂಬೈದ ನೆರುಲ್ ಶ್ರೀ ಶನೀಶ್ವರ ಮಂದಿರದ ವಿಶ್ವಸ್ಥೆರ್, ಮಿತ್ರ ಬಳಗದ ರಾಜೇಶ್ ಗೌಡ ಸಿಂಧೂರ್, ಶ್ರೀ ಸಿದ್ದಿವಿನಾಯಕ ಯಕ್ಷಗಾನ ಮಂಡಳಿದ ಸಂಚಾಲಕೆರ್ ಸುರೇಶ್ ಬರ್ಕಲ್ ಮಕ್ಕಿ ಲೆಪ್ಪೋಲೆಡ್ ತೆರಿಪಾದೆರ್.

ಅ.3: ಪನ್ವೇಲ್ ಡ್ ಮೈತಿದಿ ನಾಟಕ

ಸಂತೋಷ್ ಜಿ.ಶೆಟ್ಟಿ ಮೆರೆನ ಸಂಪೂರ್ಣ ಸಹಕಾರಡ್, ವಿಜಯ್ ಕುಮಾರ್ ಕೊಡಿಯಾಲ್ ಬೈಲ್ ನಿರ್ದೇಶನ ಮಲ್ತಿನ ತುಳು ನಾಟಕ ಮೈತಿದಿ ಅ.10 ಅಂಗಾರೆ ಮಧ್ಯಾಹ್ನ ಪನ್ಪೇಲ್ ದ ಆದ್ಯ ಕ್ರಾಂತಿವೀರ್ ವಾಸುದೇವ್ ಬಲ್ವಂತ್ ಫಡ್ಕೆ ಆಡಿಟೋರಿಯಮ್ ನಡಪರೆ ಉಂಡು.

ಈ ನಾಟಕ ತುಳು ರಂಗಭೂಮಿಡ್ ಸಂಚಲನ ಮೂಡಿಸಾಯಿನ ಶಿವದೂತೆ ಗುಳಿಗೆ ನಾಟಕದ ಕಲಾವಿದೆರೆರ್ದ್, ತುಳುನಾಡ ಐಸಿರಿ ರೂಪಶ್ರೀ ವರ್ಕಾಡಿ ಬೊಕ್ಕ ಚಲನಚಿತ್ರ ನಟೆ ಸ್ವರಾಜ್ ಶೆಟ್ಟಿ ಅಭಿನಯಡ್ ನಡಪರೆ ಉಂಡು. ನೆಕ್ಕ್ ಎ.ಕೆ ವಿಜಯ್ (ಕೋಕಿಲಾ) ಸಂಗೀತ ಕೊರ್ತೆರ್.

ದುರ್ಗಾಂಬಿಕಾ ಭಜನಾ ಮಂಡಳಿದ 50 ನೇ ವರ್ಷದ ಮಾರ್ನೆಮಿ ಪೂಜೆದ ಸಭೆ

ಬೊಂಬೈ ಮಹಾ ನಗರೊಡು ಪುದರ್ ಪೋಯಿನ ಪದ್ಮಾಕರ್ ಈಶ್ವರ್ ಗಂಭೀರ್ ಮೆರ್ನ ಕ್ಯಾಂಟೀನ್ ಡ್ ಬೇಲೆ ಮಲ್ಪುನ ಜೋಕುಲು ಸ್ಥಾಪನೆ ಮಲ್ತಿನ ದುರ್ಗಾಂಬಿಕಾ ಭಜನಾ ಮಂಡಳಿ, ಎಂ.ಎಲ್. ಎ ಹಾಸ್ಟೆಲ್ ಮುಂಬಯಿ ನೆತ್ತ 50ನೇ ವರ್ಷದ ಮಾರ್ನೆಮಿ ಪೂಜೆದ ಬಗೆಟ್ಟ್ ಚರ್ಚೆ ಡಿ. ಕೆ ಶೆಟ್ಟಿ ಮೆರೆನ ಮುತಾಲಿಕೆಡ್ ಅಕ್ಟೋಬರ್ 1 ಐತಾರ ಬಯ್ಯಗ್ ಕನ್ನಡ ಸೇವಾ ಸಂಘದ ಸಭಾಗೃಹಡ್ ನಡತ್ಂಡ್.

ಸಭೆತ ಉದಿಪನನ್ ಸೂಪರ್ ಕೇರ್ ಕೇಟರಿಂಗ್ ಸಂಸ್ಥೆದ ಗುರ್ಕಾರೆ ಪದ್ಮಾಕರ್ ಗಂಭೀರ್ ಮೆರೆನ ಅರುವತ್ತೆ ಚಂದ್ರಹಾಸ್ ಶೆಟ್ಟಿ ಬೋಲ್ನಾಡ್ ಗುತ್ತು ಮೇರ್ ಮಲ್ತೆರ್. ಭಜನಾ ಮಂಡಳಿದ ಬಗೆಟ್ಟ್ ಕರಿನ 50 ವರ್ಷ ದ ದುಂಬು ಅತಿನ ವಿಷಯ ಸಭೆಟ್ ತೆರಿಪಾಯೆರ್. ಬೊಕ್ಕ ಸಭೆಟ್ ಹೆಚ್ಚಿನ ಸದಸ್ಯೆರ್ ಅಕ್ಲೆಕ್ಲೆನ ಅನುಭವ ಪಟ್ಟೊಂದು 50ನೇ ವರ್ಷದ ಮಾರ್ನೆಮಿದ ಪೂಜೆ ಗೌಜಿ ಮಲ್ಪುಗ ಪಂದ್ ನಿರ್ಧಾರ ಮಲ್ತೆರ್. ರಘು ಶೆಟ್ಟಿ ಕಾರ್ಯಕ್ರಮ ನಿರೂಪಣೆ ಮಲ್ತೆರ್. ಡಿ ಕೆ. ಶೆಟ್ಟಿ ಸೊಲ್ಮೆ ಸಂದಾಯೆರ್.

ನಾಸಿಕ್ ದ ಶ್ಯಾಮ್ ಸುಂದರ್ ಹೊಟೇಲ್ ಡ್ 15 ನೇ ವರ್ಷೊದ ಚೌತಿದ ಗೌಜಿ

ಬೊಂಬೈ: ನಾಸಿಕ್ ದ ಶ್ಯಾಮ್ ಸುಂದರ್ ಹೊಟೇಲ್ ಡ್ 15 ನೇ ವರ್ಷೊದ ಚೌತಿ ಊರುದಕ್ಲೆನ ಸಮ್ಮುಖಡ್ ಭಾರೀ ಗೌಜಿಡ್ ನಡತ್ಂಡ್.

ಈ ಲೇಸ್ ಡ್ ಹೊಟೇಲ್ ದ ಧಣಿ ರವಿ ಪೂಜಾರಿ, ಧರ್ಣಪ್ಪ ಪೂಜಾರಿ, ಕೃಷ್ಣಪ್ಪ ಪೂಜಾರಿ ಬೊಕ್ಕ ಶ್ಯಾಮ್ ಸುಂದರ್ ಹೋಟೆಲ್ ದ ಮಾತ ಸಿಬ್ಬಂದಿಲು ಭಾರಿ ಶ್ರದ್ಧಾ ಭಕ್ತಿಡ್ ಪೂಜೆಡ್ ಪಾಲ್ ಪಡೆಯೆರ್.

ಅ.1: ಮದರ್ ಇಂಡಿಯಾ ಎಕ್ಸ್ ಸ್ಟೂಡೆಂಟ್ಸ್ ಫೌಂಡೇಶನ್ ದ ಸುರುತ್ತ ವರ್ಷೊದ ಸಭೆ

ಬೊಂಬೈ: ಮದರ್ ಇಂಡಿಯಾ ಎಕ್ಸ್ ಸ್ಟೂಡೆಂಟ್ಸ್ ಫೌಂಡೇಶನ್ ಸಂಸ್ಥೆದ ಸುರುತ್ತ ವರ್ಷೊದ ಸಭೆ ಅ.1 ಕ್ಕ್ ಬೊಲ್ಪುಗು ಬೊಂಬೈ ಕೋಟೆದುಲಯಿದ ಪಿ.ಎಂ. ಮಾರ್ಗಡ್ ಇಪ್ಪುನ ಎಲ್. ಐ. ಸಿ. ಕ್ಯಾಂಟೀನ್ ದ 4ನೇ ಮಾಳಿಗೆ ಸಂಸ್ಥೆದ ಗುರ್ಕಾರೆ ಸುರೇಂದ್ರ ಪೂಜಾರಿ ಮೆರೆನ ಗುರ್ಕಾರ್ಮೆಡ್ ನಡಪರೆ ಉಂಡು ಪಂದ್ ಪ್ರಧಾನ ಕಾರ್ಯದರ್ಶಿ ಹರೀಶ್ ಮೈಂದನ್ ತೆರಿಪಾದೆರ್.

ಈ ಸಭೆಟ್ಟ್ ವರದಿ ಮಂಡನೆ, ಲೆಕ್ಕ ಪಟ್ಟಿಲೆನ ಮಂಜೂರಾತಿ ಬೊಕ್ಕ ನನದ ಚಟುವಟಿಕೆದ ಬಗೆಟ್ಟ್ ಚರ್ಚೆ ಬೊಕ್ಕ ನಿರ್ಣಯ ದೆತೊನಿಯೆರೆ ಆಪುಂಡು. ಅಂಚಾದ್ ಸದಸ್ಯೆರ್ ಎಚ್ಚದ ಸಂಖ್ಯೆಡ್ ಪಾಲ್ ಪಡೆವೊಡು ಪಂದ್ ಪ್ರಕಟಣೆಡ್ ತೆರಿಪಾದೆರ್.

ಅ.8: ವಿರಾರ್-ನಾಲಾಸೋಪಾರ ಕರ್ನಾಟಕ ಸಂಸ್ಥೆದ ವರ್ಷೊದ ಸಭೆ

ವಿರಾರ್-ನಾಲಾಸೋಪಾರ ಕರ್ನಾಟಕ ಸಂಸ್ಥೆದ ವರ್ಷೊದ ಸಭೆ ಅ.8 ಐತಾರ ಬೊಲ್ಪುಗು ನಾಲಾಸೋಪಾರ ಪೂರ್ವದ ದ್ವಾರಕ ಹೋಟೆಲ್ ಬ್ಯಾಂಕ್ವೆಟ್ ಹಾಲ್ ಅಚೋಲೆಡ್ ನಡಪರೆ ಉಂಡು.

ಈ ಸಭೆ ಮಾನಾದಿಗೆ ಗುರ್ಕಾರೆ ವಿರಾರ್ ಶಂಕರ್ ಬಿ. ಶೆಟ್ಟಿ ಮೆರೆನ ಗೌರವ ಉಪಸ್ಥಿತಿಡ್, ಬೊಕ್ಕ ಗುರ್ಕಾರೆ ಸದಾಶಿವ ಎ.ಕರ್ಕೇರ ಮೆರೆನ ಗುರ್ಕಾರ್ಮೆಡ್ ನಡಪರೆ ಉಂಡು. ಈ ಸಭೆಕ್ಕ್ ಸದಸ್ಯೆರ್ ಮತ ಸರಿಯಾಯಿನ ಪೊರ್ತುಡು ಪಾಲ್ ಪಡೆದ್ ಸಂಸ್ಥೆದ ಅಭಿವೃದ್ಧಿಗ್ ಸಲಹೆ ಸೂಚನೆನ್ ಕೊರೊಡು ಪಂದ್ ಗೌರವ ಪ್ರಧಾನ ಕಾರ್ಯದರ್ಶಿ ಸತೀಶ್ ಕೆ. ಶೆಟ್ಟಿ ಪ್ರಕಟಣೆಡ್ ತೆರಿಪಾದೆರ್.