ಸೆ.24 ಕ್ಕ್ ದೇಶದ ಬೇತೆ ಬೇತೆ ವಿಭಾಗಡ್ ಸಂಚಾರ ಮಲ್ಪುನ ಒಟ್ಟು 9 ವಂದೇ ಭಾರತ್ ರೈಲ್ ಗ್ ಪ್ರಧಾನಿ ನರೇಂದ್ರ ಮೋದಿ ಚಾಲನೆ ಕೊರಿಯೆರೆ ಉಲ್ಲೆರ್.
ಹೈದರಾಬಾದ್-ಬೆಂಗ್ಲೂರ್, ಚೆನ್ನೈ-ತಿರುನಲ್ವೇಲಿ, ವಿಜಯವಾಡ-ಚೆನ್ನೈ, ಪಟ್ನಾ-ಹೌರಾ, ರೌರ್ ಕೆಲಾ-ಪುರಿ, ಕಾಸ್ರೋಡು-ಅಲಪ್ಪುಳ- ತಿರುವನಂತಪುರಂ, ಜೈಪುರ-ಉದಯಪುರ, ರಾಂಚಿ-ಟಾಟಾ ನಗರ- ಕೋಲ್ಕತಾ, ಜಾಮಾನಗರ- ರಾಜ್ ಕೋಟ್- ಅಹಮದಾಬಾದ್ ಮಾರ್ಗಗ್ ಹಸಿರು ನಿಶಾನೆ ತೋಪಾದೆರ್. ಇತ್ತೆ ದೇಶಡ್ 25 ವಂದೇ ಭಾರತ್ ರೈಲ್ ಸಂಚಾರ ಮಲ್ಪುಂಡು.
ಮಧ್ಯಪ್ರದೇಶಡ್ 2 ಸಾರ ಕೋಟಿ ರೂ. ಖರ್ಚಿಡ್ 108 ಅಡಿ ಎತ್ತರಡ್ ನಿರ್ಮಾಣ ಆಯಿನ ಆದಿ ಶಂಕರಾಚಾರ್ಯೆರೆನ ಪ್ರತಿಮೆ ಇನಿ ಅನಾವರಣ ಆಪುಂಡು.
ಈ ಪ್ರತಿಮೆ ಭೋಪಾಲ್ ದ ನರ್ಮದಾ ತುದೆತ್ತ ಬರಿಟ್ಟ್ ಇಪ್ಪುನ ಓಂಕಾರೇಶ್ವರ ಪ್ರದೇಶಡ್ ಉಂಡು. ಮುಲ್ಪದ ಸಿಎಂ ಶಿವರಾಜ್ ಸಿಂಗ್ ಚೌಹಾನ್ ಮೇರ್ ಈ ಪ್ರತಿಮೆನ್ ಅನಾವರಣ ಮಲ್ಪುವೆರ್. ಸೆ.18 ಕ್ಕ್ ನಡಪೊಡಾಯಿನ ಅನಾವರಣ ಲೇಸ್ ಭಾರೀ ಬರ್ಸದಾವೆರ ಇನಿ ನಡಪುಂಡು.
ಬೋಲ್ತೆರ್ ತಾಲೂಕು ಡ್ ಕಾಡಾನೆ ಧಾಳಿ ಮಲ್ತ್ ದ್ ಕೃಷಿ ನಾಶ ಮಲ್ತೊಂದು ಉಂಡು, ಈ ಬಗೆಟ್ ಕ್ರಮ ದೆತೊನೊಡು ಪಂದ್ ಒತ್ತಾಯ ಮಲ್ತ್ ಜಿಲ್ಲಾ ಉಸ್ತುವಾರಿ ಸಚಿವೆರ್ ದಿನೇಶ್ ಗುಂಡೂರಾವ್ ಮೆರೆಗ್ ಕೆಪಿಸಿಸಿ ಪ್ರಧಾನ ಕಾರ್ಯದರ್ಶಿ ರಕ್ಷಿತ್ ಶಿವರಾಂ ಸೆ.20 ದಾನಿ ಮನವಿ ಸಲ್ಲಿಸಾಯೆರ್.
ಬೋಲ್ತೆರ್ ತಾಲೂಕುದ ಧರ್ಮಸ್ಥಳ, ಶಿಬಾಜೆ, ಮುಂಡಾಜೆ, ಕಡಿರುದ್ಯಾವರ, ಮಿತ್ತಬಾಗಿಲು, ಮಲವಂತಿಗೆ, ಚಾರ್ಮಾಡಿ, ನೆರಿಯ, ಪುದೆವೆಟ್ಟು ಗ್ರಾಮದ ರೈತೆರ್ ಕಾಡಾನೆ ಧಾಳಿ ರ್ದ್ ಲಕ್ಷಾಂತರ ರೂ ಕೃಷಿ ನಷ್ಟನ್ ಅನುಭವಿಸಾದೆರ್.
ಕಾಡಾನೆನ್ ನಿಯಂತ್ರಣ ಮಲ್ಪೆರೆ ಅರಣ್ಯ ಇಲಾಖೆಗೆ ಸರ್ಕಾರ ನಿರ್ದೇಶನ ಕೊರೊಡು. ಬೊಕ್ಕ ಆ್ಯಂಟಿ ಡಿಪ್ರೆಡೇಷನ್ ಕ್ಯಾಂಪನ್ನು (Anti depredation camp) ರಚಿಸಾದ್ ಸಿಬ್ಬಂದಿನ್ ನೇಮಕ ಮಲ್ತ್ ಗಸ್ತು ತಿರ್ಗೆರೆ ಗಾಡಿದ ವ್ಯವಸ್ಥೆನ್ ಮಲ್ಪೊಡು ಪಂದ್ ಸಚಿವೆರೆಗ್ ರಕ್ಷಿತ್ ಶಿವರಾಂ ವಿವರಣೆ ಕೊರಿಯೆರ್. ಈ ಪೊರ್ತುಡು ಜಿಲ್ಲಾಧಿಕಾರಿ ಮುಲ್ಲೈ ಮುಹಿಲನ್ ಇತ್ತೆರ್.
ರೋಟರಿ ಸಮುದಾಯದಳ ಬೊಕ್ಕ ಶ್ರೀ ದುರ್ಗಾ ಫ್ರೆಂಡ್ಸ್ ಕ್ಲಬ್ (ರಿ) ಕೆಮ್ಮಣ್ಣು ನಿಟ್ಟೆ ನೆತ್ತ ಒಟ್ಟು ಸೇರಿಗೆಡ್ ಶ್ರೀ ಕೃಷ್ಣ ಜನ್ಮಾಷ್ಟಮಿ ಪ್ರಯುಕ್ತ 35 ನೇ ವರ್ಷದ ಮೊಸರು ಕುಡಿಕೆ ಆಚರಣೆದ ಲೆಕ್ಕಡ್ ಸಾರ್ವಜನಿಕ ಕಾರ್ಯಕ್ರಮ ಕೆಮ್ಮಣ್ಣು ಸರಕಾರಿ ಹಿರಿಯ ಪ್ರಾಥಮಿಕ ಶಾಲಾ ಆವರಣಡ್ ಇಂಚಿಪಗ್ ನಡತ್ಂಡ್.
5 ವರ್ಷರ್ದ್ ತಿರ್ತ್ ದ ಜೋಕ್ಲೆಗ್ ಮುದ್ದು ಕೃಷ್ಣ ಸ್ಪರ್ಧೆ, ಮಲ್ಲ ಜೋಕ್ಲೆಗ್, ಪೊಂಜೊವ್ ನಕ್ಲೆಗ್ ಬೊಕ್ಕ ಅಂಜೊವ್ ನಕ್ಲೆಗ್ ಬೇತೆ ಬೇತೆ ಪಂತೋಲು ನಡತ್ಂಡ್.
ಸಮಾರೋಪ ಸಭಾ ಕಾರ್ಯಕ್ರಮಡ್ SSLC ಬೊಕ್ಕ PUC ಡ್ 90% ಜಾಸ್ತಿ ಮಾರ್ಕ್ ದೆತ್ತಿನಕ್ಲೆಗ್ ಪ್ರತಿಭಾ ಪುರಸ್ಕಾರ ಕಾರ್ಯಕ್ರಮ ನಡತ್ಂಡ್.
ಲೇಸ್ ಡ್ ಜ್ಯೋತಿಷಿ ವೇದಮೂರ್ತಿ ಪ್ರಸನ್ನ ಆಚಾರ್ಯ ಧಾರ್ಮಿಕ ಉಪನ್ಯಾಸ ಮಲ್ತೆರ್. ಮಾತೃಸಂಸ್ಥೆ ರೋಟರಿ ಕ್ಲಬ್ ನಿಟ್ಟೆ ನೆತ್ತ ಗುರ್ಕಾರ್ಲು ರೋ. ಕೃಷ್ಣ ಪ್ರಸಾದ್, ರೋಟರಿ ಸಮುದಾಯದಳದ ಜಿಲ್ಲಾ ಪ್ರತಿನಿಧಿ ರೋ. ಕುಮಾರಸ್ವಾಮಿ ಕಳಸ, Zonal ಲೆಫ್ಟಿಂನೆಂಟ್ ಕಿರಣ್ ಶೆಟ್ಟಿ, ನಿಟ್ಟೆ ಗ್ರಾಮ ಪಂಚಾಯತ್ ಉಪಾಧ್ಯಕ್ಷೆರಾಯಿನ ನಿತಿನ್ ಸಾಲ್ಯಾನ್, ಸಭಾಪತಿ ಕೆ. ಅನಿಲ್ ಕುಮಾರ್, ನಿಟ್ಟೆ ರೈತ ಉತ್ಪಾದಕ ಸಂಸ್ಥೆದ ನಿರ್ದೇಶಕೆರ್ ಬೊಕ್ಕ ಪೂರ್ವ RCC ಜಿಲ್ಲಾ ಪ್ರತಿನಿಧಿ ವೆಂಕಟಕೃಷ್ಣ ಕುಮಾರ್, ಶಾಲಾಭಿವೃದ್ಧಿ ಸಮಿತಿದ ಗುರ್ಕಾರ್ಲು ಶ್ರೀಧರ ಆಚಾರ್ಯ ತೆಂಕುಮನೆ, ಸ್ಥಳೀಯ ಜನಪ್ರತಿನಿಧಿ ಬೊಕ್ಕ ಸಂಸ್ಥೆಯ ಕ್ರೀಡಾ ಕಾರ್ಯದರ್ಶಿ ಸಂತೋಷ ಶೆಟ್ಟಿ, ದುರ್ಗಾ ಫ್ರೆಂಡ್ಸ್ ಕ್ಲಬ್(ರಿ.) ಕೆಮ್ಮಣ್ಣು ನೆತ್ತ ಗುರ್ಕಾರ್ಲು ಸುರೇಶ ಆಚಾರ್ಯ, ಕಾರ್ಯದರ್ಶಿ ಸುಧಾಕರ ಮಡಿವಾಳ ಇತ್ತೆರ್.
ರೋಟರಿ ಜಿಲ್ಲೆ 3182 ಇದರ ನಿಕಟಪೂರ್ವ ಸಹಾಯಕ ರಾಜ್ಯಪಾಲೆರ್, ನಿಟ್ಟೆ ತಾಂತ್ರಿಕ ಸಂಸ್ಥೆದ ಪ್ರೊಫೆಸರ್ ರೋ. ಡಾ ಶಶಿಕಾಂತ ಕರಿಂಕ, ನಿವೃತ್ತ ಮುಖ್ಯ ಶಿಕ್ಷಕೆರ್ ರೋ. ಶ್ರೀ ಕೆ. ವಿಷ್ಣುಮೂರ್ತಿ ರಾವ್ ಬೊಕ್ಕ ಹಿರಿಯ ಕೃಷಿಕೆರ್, ಹೈನುಗಾರೆರ್ ಆಯಿನ ತೆಂಕುಮನೆ ವಾಸು ಆಚಾರ್ಯ ಮೊಕ್ಲೆಗ್ ಮನಾದಿಗೆ ನಡತ್ಂಡ್.
ಡಾ. ದಿಲೀಪ್ ಕುಮಾರ್, ಶ್ರೀ ಕೃಷ್ಣಾನಂದ ರಾವ್, ಡಾ. ರಘುನಂದನ್ ರಾವ್ ಬೊಕ್ಕ ಪ್ರಶಾಂತ್ ಕುಮಾರ್ ಹೊಳ್ಳ ಬತ್ತಿ ಬಿನ್ನೆರ್ ಬೊಕ್ಕ ಸಾಧಕೆರ್ನ ಪರಿಚಯ ಮಲ್ತೆರ್.
ಗುರ್ಕಾರೆರ್ ಪ್ರದೀಪ್ ಸುವರ್ಣ ಎದ್ಕೊಂದು, ಕಾರ್ಯದರ್ಶಿ ಪ್ರಕಾಶ್ ಸಾಲ್ಯಾನ್ ಸೊಲ್ಮೆ ಸಾಂದಾಯ ಮಲ್ತೆರ್. ಪೂರ್ವಾಧ್ಯಕ್ಷ ಸತೀಶ್ ಶೆಟ್ಟಿ ಲೇಸ್ ದ ಸುಧಾರಿಕೆ ಮಲ್ತೆರ್
ಸುಮಾರ್ ಬೇಡಿಕೆನ್ ಈಡೇರಿಸಾಯೆರೆ ಒತ್ತಾಯ ಮಲ್ತ್ ದ್ ಕೆಎಸ್ ಆರ್ ಟಿಸಿ ನೌಕರೆರ್ ಅ.5 ಕ್ಕ್ ಬೆಂಗ್ಲೂರ್ ಡ್ ಪ್ರತಿಭಟನೆ ಮಲ್ಪರೆ ನಿರ್ಧಾರ ಮಲ್ದೆರ್.
ಸಂಬಳ ಎಚ್ಚದ ಪರಿಷ್ಕೃತ ಬಾಕಿನ್ ಕೊರೊಡು ಪಂದ್ ಎಲೆಕ್ಟ್ರಿಕ್ ಬಸ್ ನ್ ಸರ್ಕಾರಿ ನೌಕರೆರೆನ ನೇಮಕ ಮಲ್ಪುನ ಬಗೆಟ್ಟ್ ಸೇರಿನಂಚೆನೆ ಸುಮಾರ್ ಬೇಡಿಕೆನ್ ಮೊಕುಲು ಸರ್ಕಾರ ದುಂಬು ದೀತೆರ್. ಅತ್ತಂದೆ ಸಂಸ್ಥೆದ ಮಾತ ನೌಕರೆರ್ ಪ್ರತಿಭಟನೆಡ್ ಪಾಲ್ ಪಡೆಪುನೆರ್ದಾವೆರ ಅನಿ ಕೆಎಸ್ ಆರ್ ಟಿಸಿ ಬಸ್ ಸಂಚಾರ ಸಾಧ್ಯ ಇಜ್ಜಿ ಪಂದ್ ವರದಿ ಆತ್ಂಡ್.
ಐಸಿಸಿ ಟಿ20 ವಿಶ್ವಕಪ್-2024 ಮೆಗಾ ಟೂರ್ನಿ ಅಮೆರಿಕಡ್ ನಡಪರೆ ಉಂಡು ಪಂದ್ ಘೋಷಣೆ ಆತ್ಂಡ್.
ಅಮೆರಿಕದ ಡಲ್ಲಾಸ್, ಫ್ಲೋರಿಡಾ ಬೊಕ್ಕ ನ್ಯೂಯಾರ್ಕ್ ಪೇಂಟೆಲು ಈ ಲೇಸ್ ನ್ ಆಯೋಜನೆ ಮಲ್ಪುಂಡು ಪಂದ್ ಐಸಿಸಿ ತೆರಿಪಾದ್ಂಡ್.
ಬೊಂಬಾಯಿ: ಕಲ್ಯಾಣ್ ದ ತುಳುನಾಡ ತುಳುವೆರ್ ಕೂಟದ ಮಹಿಳಾ ಸದಸ್ಯೆರೆರ್ದ್ ಚೌತಿದಾನಿ ಗಣಪತಿ ದೇವೆರೆನ ಪ್ರತಿಷ್ಠೆ ಪೂಜೆ ಬೊಕ್ಕ ವಿಸರ್ಜನೆ ಲೇಸ್ ಬಾರಿ ಭಕ್ತಿ ಬೊಕ್ಕ ಗೌಜಿಡ್ ನಡತ್ಂಡ್.
ಕಲ್ಯಾಣ್ ಪೂರ್ವದ ಹನುಮಾನ್ ನಗರದ ಸಾಯಿನಾಥ್ ಅಪಾರ್ಟ್ ಮೆಂಟ್ ಡ್ ಶ್ರೀ ಗಣೇಶೋತ್ಸವ ಅಂಗವಾದ್ ಭಜನೆ ನಡತ್ಂಡ್.
ಈ ಪೊರ್ತುಡು ತುಳುನಾಡ ತುಳುವೆರ್ ಸಂಘಟನೆದ ಸಂಸ್ಥಾಪಕೆರ್ ಅಶೋಕ್ ಎಲ್. ಪೂಜಾರಿ ಉಲ್ಯ ಗುತ್ತು ಪಂಜ-ಕೊಯಿಕುಡೆ ಮೆರೆನ್ ಶಾಲ್ ಪಾಡ್ ದ್ ಪೂತ್ತ ಗೊಂಚಿಲ್ ಕೊರ್ದು ತಮ್ಮನ ಮಲ್ತೆರ್.
ಈ ಲೇಸ್ ಡ್ ಯಜಮಾಂದಿ ಪದ್ಮ ಸುವರ್ಣ ಬೊಕ್ಕ ತುಳುನಾಡ ತುಳುವೆರೆ ಮಹಿಳಾ ಸದಸ್ಯೆರಾಯಿನ ಪ್ರಭಾವತಿ ಸುವರ್ಣ, ಅಂಜನ ಪೂಜಾರಿ, ಯಮುನಾ ಕುಲಾಲ್, ಶ್ರೀಮತಿ ಸುವರ್ಣ, ಜಾನಕಿ ಸುವರ್ಣ, ಶಶಿ ಪೂಜಾರಿ, ಜಾನಕಿ ಸುವರ್ಣ, ದೀಪ ಪೂಜಾರಿ, ವಿದ್ಯಾ ಪೂಜಾರಿ, ಸರೋಜಿನಿ ಪೂಜಾರಿ, ಆಶಿಕಾ ಪೂಜಾರಿ, ಗಣೇಶ್ ಸುವರ್ಣ, ಮಂಗೇಶ್ ಪೂಜಾರಿ, ಈಶ್ವರ್ ಪೂಜಾರಿ, ಚೇತನ್ ಪೂಜಾರಿ, ದರ್ಶನ್ ಪೂಜಾರಿ, ಬೊಕ್ಕ ಪ್ರಮೋದ್ ಸಾಲಿಯಾನ್ ಇತ್ತೆರ್.
ಭಜನೆ ಕಾರ್ಯಕ್ರಮದ ಬೊಕ್ಕ ಮಂಗಳಾರತಿ ಆದ್ ತೀರ್ಥ ಪ್ರಸಾದ ಪಟ್ಟುನ ಲೇಸ್ ನಡತ್ಂಡ್.
ಕುಡ್ಲ: “ಬಂಟೆರೆಡ ನಾಯಕತ್ವದ ಗುಣ ಉಂಡು. ವೈದ್ಯಕೀಯ ಕ್ಷೇತ್ರ, ಕ್ರೀಡಾ ಕ್ಷೇತ್ರ, ಸಾಂಸ್ಕೃತಿಕ ಕ್ಷೇತ್ರ, ಹೋಟೆಲ್ ಉದ್ಯಮ ಇಂಚೆನೆ ಮಾತ ಕ್ಷೇತ್ರಡ್ ರಾಜ್ಯ ರಾಷ್ಟ್ರಮಟ್ಟಡ್ ಇನಿ ಬಂಟೆರ್ ಗುರುತಿಸಾವೊಂದುಲ್ಲೆರ್. ತುಳುನಾಡ್ ಗ್ ಬಂಟೆರ್ನ ಕೊಡುಗೆ ಮಲ್ಲ ಉಂಡು. ಅಂಚಿನ ನಾಯಕತ್ವ ನಮಕ್ ಅತೀ ಅಗತ್ಯ. ಬಂಟ ಸಮಾಜದ ಪೊಂಜೊವ್ ನಕುಲ ಪ್ರಬಲರಾದ್ ಉಲ್ಲೆರ್ ಬೇತೆಕ್ಲೆಗ್ ಮಾದರಿಯಾದ್ ಬುಲೆಯೊಂದು ಉಲ್ಲೆರ್. ನನಲ ಸಾಮಾಜಿಕವಾದ್ ಎಚ್ಚ ಪ್ರಬಲರಾದ್ ಧಾರ್ಮಿಕ, ಸಾಂಸ್ಕೃತಿಕ ಕಾರ್ಯಕ್ರಮನ್ ಆಯೋಜನೆ ಮಲ್ತೊಂದು ಸಮಾಜಡ್ ಒಗ್ಗಟ್ಟನ್ ಒರಿಪಾದ್ ಅಭಿವೃದ್ಧಿಗ್ ಕೊಡುಗೆ ಕೊರ್ಲೆ ಪಂದ್ ಆರೋಗ್ಯ ಸಚಿವೆರ್ ಬೊಕ್ಕ ಜಿಲ್ಲಾ ಉಸ್ತುವಾರಿ ಸಚಿವ ದಿನೇಶ್ ಗುಂಡೂರಾವ್ ಪಂಡೆರ್.
ಬೊಕ್ಕ ಸಭೆನ್ ಉದ್ದೇಶಿಸಾದ್ ಪಾತೆರ್ನ ಎಸ್ ಸಿಡಿಸಿಸಿ ಬ್ಯಾಂಕ್ ಗುರ್ಕಾರೆರ್ ಡಾ. ಎಂ.ಎನ್. ರಾಜೇಂದ್ರ ಕುಮಾರ್ ಮೇರ್, “ಜಗತ್ತ್ ಡ್ ಸುರುತ ಪೂಜೆ ಮಲ್ಪುನ ಗಣೇಶಗ್. ಅವ್ವೆ ಗಣೇಶನ ಉತ್ಸವದ ಲೆಕ್ಕಡ್ ನಮ ಇನಿ ಒಟ್ಟಿಗೆ ಸೇರ್ದ. ಬಂಟರು, ನಾಡವರು ಪಂಡ ಶಕ್ತಿವಂತೆರ್. ಉಂದುವೆ ಕಾರಣಗ್ ಎಂಟೆದೆಯ ಬಂಟ ಪಂದ್ ಪನ್ಪೆರ್. ಒರಿ ಬಂಟ ನಮ್ಮ ಬಳಗಡ್ ಇತ್ತ್ಂಡ ನಮಕ್ ದೈರ್ಯ ಜಾಸ್ತಿ. ನಾಯಕತ್ವ ಗುಣಕ್ಕ್ ಪುದರ್ ಪಡೆಯಿನ ಬಂಟೆರ್ ಉಂದುವೇ ರೀತಿ ಸಮಾಜಡ್ ಮಾತ ವರ್ಗದ ಜನಕ್ಲೆಗ್ ಒಂಜೆ ವೇದಿಕೆಡ್ ಕನಪುನ ಕಾರ್ಯಕ್ರಮನ್ ಆಯೋಜನೆ ಮಲ್ತೊಂದು ಇಪ್ಪಡ್ ಪಂದ್ ಪಂಡೆರ್.
ಹೇರಂಭ ಇಂಡಸ್ಟ್ರಿಸ್ ಆಡಳಿತ ನಿರ್ದೇಶಕೆರ್ ಸದಾಶಿವ ಶೆಟ್ಟಿ ಕನ್ಯಾನ ಪಾತೆರ್ದ್, “ಶಿಕ್ಷಣ ಇತ್ತೆ ಅವಶ್ಯಕ. ಯಾನ್ ಲ ಬಂಟರ ಸಂಘದ ಸಕಾಯೊರ್ದ್ ಶಿಕ್ಷಣ ಪಡೆದ್ ಈ ಮಟ್ಟಗ್ ಬೈದೆ. ಶಿಕ್ಷಣದ ಮಹತ್ವನ್ ನಮ ಮಾತ ತೆರಿಯೊನೊಡು. ಶಿಕ್ಷಣರ್ದ್ ಪ್ರಗತಿ ಸಾಧ್ಯ” ಪಂಡೆರ್.
ಚಾವಡಿಡ್ ಮಲ್ಲ ಬಿನ್ನೆರಾದ್ ಆರೋಗ್ಯ ಸಚಿವೆರ್ ಬೊಕ್ಕ ದಕ್ಷಿಣ ಕನ್ನಡ ಜಿಲ್ಲಾ ಉಸ್ತುವಾರಿ ಸಚಿವೆರ್ ದಿನೇಶ್ ಗುಂಡುರಾವ್, ಎಸ್ ಸಿಡಿಸಿಸಿ ಬ್ಯಾಂಕ್ ಗುರ್ಕಾರೆರ್ ಡಾ|ಎಂ.ಎನ್. ರಾಜೇಂದ್ರ ಕುಮಾರ್, ಹೇರಂಭ ಇಂಡಸ್ಟ್ರಿಸ್ ಮುಂಬೈ ನೆತ್ತ ಆಡಳಿತ ನಿರ್ದೇಶಕೆರ್ ಸದಾಶಿವ ಶೆಟ್ಟಿ ಕನ್ಯಾನ, ಬಂಟರ ಯಾನೆ ನಾಡವರ ಮಾತೃ ಸಂಘ ಕುಡ್ಲ ನೆತ್ತ ಗುರ್ಕಾರೆರ್ ಅಜಿತ್ ಕುಮಾರ್ ರೈ ಮಾಲಾಡಿ, ಬ್ಯಾಂಕ್ ಆಫ್ ಬರೋಡ ಝೋನಲ್ ಹೆಡ್ ಗಾಯತ್ರಿ ಆರ್., ಮುಂಬೈ ಉದ್ಯಮಿ ಕೆ.ಕೆ. ಶೆಟ್ಟಿ ಕಾಸ್ರೋಡು, ಬೆಂಗಳೂರು ಬಂಟರ ಸಂಘದ ಗುರ್ಕಾರೆರ್ ಮುರಳೀಧರ ಹೆಗ್ಡೆ, ಮೊಗವೀರ ಮಹಾಸಭಾ ಉಚ್ಚಿಲ ನೆತ್ತ ಗುರ್ಕಾರೆರ್ ಜಯ ಸಿ. ಸುವರ್ಣ, ಕುದ್ರೋಳಿ ಗೋಕರ್ಣನಾಥ ದೇವಸ್ಥಾನದ ಕೋಶಾಧಿಕಾರಿ ಪದ್ಮರಾಜ್ ಆರ್., ಲಯನ್ಸ್ ಗವರ್ನರ್ ಮೆಲ್ವಿನ್ ಡಿಸೋಜ, ದ.ಕ. ಜಿಲ್ಲಾ ಸಂಚಾಲಕೆರ್ ಬಿ.ನಾಗರಾಜ್ ಶೆಟ್ಟಿ, ಕಾಸ್ರೋಡು ಜಿಲ್ಲಾ ಸಂಚಾಲಕೆರ್ ಸಂಜೀವ ಶೆಟ್ಟಿ, ಬಂಟರ ಮಾತೃ ಸಂಘದ ಪ್ರದಾನ ಕಾರ್ಯದರ್ಶಿ ಕೆ.ಎಂ. ಶೆಟ್ಟಿ, ಕೋಶಾಧಿಕಾರಿ ಸಿ.ಎ. ರಾಮ ಮೋಹನ್ ರೈ, ಸಂಜೀವ ಶೆಟ್ಟಿ ಸಂಪಿಗೆ ಅಡಿ ಈ ಪೊರ್ತುಡು ಇತ್ತೆರ್.
ವೈದ್ಯಕೀಯ ಕ್ಷೇತ್ರದ ಸಾಧಕಿ ಡಾ.ಅಮೃತ ಭಂಡಾರಿ, ಕಂಬಳ ಕ್ಷೇತ್ರದ ಸಾಧಕೆರ್ ಕೊಳಚೂರು ಕೊಂಡೆಟ್ಟು ಸುಕುಮಾರ್ ಶೆಟ್ಟಿ, ಕೈಗಾರಿಕಾ ಕ್ಷೇತ್ರದ ಸಾಧಕೆರ್ ಹಾಲಾಡಿ ಶ್ರೀನಿವಾಸ್ ಶೆಟ್ಟಿ ಮೊಕ್ಲೆಗ್ ಈ ಪೊರ್ತುಡು ಮಾನಾದಿಗೆ ನಡತ್ಂಡ್.
ಬಂಟರ ಯಾನೆ ನಾಡವರ ಮಾತೃ ಸಂಘದ ಉಪಾಧ್ಯಕ್ಷೆರ್ ಕಾವು ಹೇಮಾನಾಥ ಶೆಟ್ಟಿ ಪ್ರಾಸ್ತಾವಿಕವಾ‍ದ್ ಪಾತೆರ್ದ್ ಬತ್ತಿ ಬಿನ್ನೆರೆನ್ ಎದ್ಕೊಂಡೆರ್. ಆಶಾಜ್ಯೋತಿ ರೈ ಸೊಲ್ಮೆ ಸಂದಾಯ ಮಲ್ತೆರ್. ಮಂಜುಳಾ ಶೆಟ್ಟಿ ,ಪ್ರಕಾಶ್ ಮೆಲಾಂಟ ಲೇಸ್ ದ ಸುಧಾರಿಕೆ ಮಲ್ತೆರ್.
ಬಂಟರ ಮಾತೃ ಸಂಘದ ಗಣೇಶೋತ್ಸವಡ್ ತುಳುನಾಡ್ದ ದೇವಸ್ಥಾನಲೆನ ಬಂಟ ಆಡಳಿತ ಮೊಕ್ತೇಸರೆರ್ ನಕ್ಲೆಗ್ ಗೌರವಾರ್ಪಣೆ
ಕುಡ್ಲ: ಬಂಟರ ಯಾನೆ ನಾಡವರ ಮಾತೃ ಸಂಘ, ಶ್ರೀ ಸಿದ್ಧಿವಿನಾಯಕ ಪ್ರತಿಷ್ಠಾನ ಬೊಕ್ಕ ಸಾರ್ವಜನಿಕ ಶ್ರೀ ಗಣೇಶೋತ್ಸವ ಸಮಿತಿದ ನಿರೆಲ್ ಡ್ ಬಂಟ್ಸ್ ಹಾಸ್ಟೆಲ್ ದ ಓಂಕಾರ ನಗರಡ್ ನಡಪುನ ಸಾರ್ವಜನಿಕ ಶ್ರೀ ಗಣೇಶೋತ್ಸವದ ಧರ್ಮ ಸಭೆಟ್ಟ್ ದಕ್ಷಿಣ ಕನ್ನಡ, ಒಡಿಪು, ಕಾಸ್ರೋಡು ಜಿಲ್ಲೆದ ದೇವಸ್ಥಾನಲೆನ ಬಂಟ ಆಡಳಿತ ಮೊಕ್ತೇಸರೆರೆಗ್ ಗೌರವಾರ್ಪಣೆ ಮಲ್ಪುನ ಲೇಸ್ ಬುಧಾರ ಕಾಂಡೆ ನಡತ್ಂಡ್.
ಪ್ರಾಸ್ತಾವಿಕದ ಪಾತೆರ ಪಂಡಿನ ಬಂಟರ ಯಾನೆ ನಾಡವರ ಮಾತೃ ಸಂಘದ ಅಧ್ಯಕ್ಷೆರ್ ಮಾಲಾಡಿ ಅಜಿತ್ ಕುಮಾರ್ ರೈ ಮೇರ್, “ಬಂಟ ಪಂಡ ಅವೊಂಜಿ ಜಾತಿಯತ್ತ್, ಅವೊಂಜಿ ಧರ್ಮ. ದಾಯೆ ಪಂಡ ಬಂಟ ಸಮುದಾಯಗ್ ಸಮಾಜಡ್ ಅಯಿತ್ತನೇ ಆಯಿನ ಐತಿಹ್ಯ ಉಂಡು. ಇನಿ ರಾಜಕೀಯಲ ಸೇರ್ದ್ ಮಾತ ಕ್ಷೇತ್ರಡ್ ಲ ಬಂಟೆರೆನ ಸ್ಥಾನ ಪಲ್ಲಟ ಮಲ್ಪುನ ಯೋಜನೆ ಪಿರಾವುರ್ದೇ ನಡತೊಂದುಂಡು. ಅಂಚಾದ್ ಬಂಟೆರ್ ಸಂಘಟಿತೆರಾವೊಡು. ನಮ್ಮ ಹಕ್ಕ್, ಕರ್ತವ್ಯನ್ ಮದಪಂದೆ ನಮ್ಮತನನ್ ಒರಿತೊನೊಡು ಪಂದ್ ಪಂಡೆರ್.
ಧರ್ಮಸಭೆನ್ ಬಿನ್ನೆರ್ ಸೇರ್ದ್ ತುಡರ್ ಅರ್ಲಾದ್ ಉದಿಪನ ಮಲ್ತೆರ್.
ಆಶಯದ ಮದಿಪು ಮದಿತಿನ ಜಾನಪದ ವಿದ್ವಾಂಸೆರ್ ಡಾ.ವೈ.ಎನ್.ಶೆಟ್ಟಿ ಎರ್ಮಾಳ್ ಮೇರ್, “ಒಲ್ಪ ಭೂಮಿ ಉಸುಲು ದೆಪ್ಪುಂಡಾ ಅಲ್ಪ ದೇವರ್ ಉಲ್ಲೆರ್ ಪಂದ್ ಅರ್ಥ. ಭೂಮಿದಡಿಟ್ಟ್ ಬೊಲ್ಪು ದೀಂಡಲ 24 ಗಳಿಗೆಲ ಬೊಲ್ಪು ಅರ್ಲೊಂದಿತ್ತ್ಂಡ ಅವುಲು ದೇವೆರ್ ನ ಅಸ್ತಿತ್ವ ಉಂಡು. ದೇವೆರೆಗ್ ಮೂಜಿ ಪೊರ್ತು ಪೂಜೆ ನಡಪುಂಡು. ಅವೆನ್ ನಿರ್ವಹಣೆ ಮಲ್ಪುನು ಮೊಕ್ತೇಸರೆರ್. ಬಂಟ ಸಮುದಾಯಡ್ ದೇವಸ್ಥಾನ, ದೈವಸ್ಥಾನಲೆನ ಜಬದಾರಿ ಒಯಿಸೊಂದಿನ ಮಸ್ತ್ ಜನ ಹಿರಿಯೆರ್ ಉಲ್ಲೆರ್.ಅಕ್ಲೆನ್ ಗುರ್ತು ಮಲ್ತ್ ದ್ ತಮ್ಮನ ಮಲ್ಪುನ ಬಂಟರ ಸಂಘದ ಕಾರ್ಯಕ್ರಮ ಮೆಚ್ಚೊಡಾಯಿನ ಪಂದ್ ಆರ್ ಪಂಡೆರ್.
ಬಸ್ರೂರು ಶ್ರೀ ಮಹಾಲಿಂಗೇಶ್ವರ ದೇವಸ್ಥಾನದ ಅಧ್ಯಕ್ಷೆರ್ ಅಪ್ಪಣ್ಣ ಹೆಗ್ಡೆರ್ ಪಾತೆರ್ದ್, “ದೇವೆರ್ನ ಗುಡಿಟ್ಟ್ ಇತ್ತಿನ ಗಣಪತಿನ್ ಬಯಲ್ ಡ್ ಕುಲ್ಲಾದ್ ಪೂಜೆ ಮಲ್ತೊಂದುಲ್ಲೆರ್. ಬಂಟೆರ್ ದೈವಭಕ್ತೆರ್. ಜಿಲ್ಲೆದ ಎಚ್ಚಿಮ ದೇವಸ್ಥಾನಲೆಡ್ ಹೆಚ್ಚಿನ ಕೊಡುಗೆ ಕೊರ್ಪಿನಿ ಬಂಟೆರೇ. ಆಂಡಲ ಸಮುದಾಯಡ್ ಪರಸ್ಪರ ಭಿನ್ನಮತರ್ದ್ ಒಗ್ಗಟ್ಟ್ ಕಮ್ಮಿ ಆವೊಂದುಂಡು. ನಮ ಒಗ್ಗಟ್ಟ್ ಡ್ ಇತ್ತ್ಂಡ ಏರ್ಲಾ ನಮನ್ ಪಂದಾವರೆ ಸಾಧ್ಯ ಇಜ್ಜಿ. ಉಂದೆನ್ ಬಂಟ ಸಮಾಜ ಅರ್ಥ ಮಲ್ತೊನೊಡು ಪಂದ್ ಪಂಡೆರ್.
ಉದ್ಯಮಿ ಎಜೆ ಶೆಟ್ರ್ ಪಾತೆರ್ದ್, “ಬಂಟ ಸಮುದಾಯ ಒಟ್ಟು ಸೇರ್ಂಡ ಮೂಲು ದೇವಸ್ಥಾನ ಕಟ್ಟಾವುನ ಕಷ್ಟ ದಾಲ ಅತ್ತ್. ದುಂಬುದ ದಿನಕ್ಲೆಡ್ ಬಂಟ ಸಮುದಾಯದ ಹಿರಿಯೆರ್ ಆ ಬಗೆಟ್ಟ್ ಯೋಚನೆ ಮಲ್ಪೊಡು” ಪಂದ್ ಪಂಡೆರ್.
ಮಲ್ಲ ಬಿನ್ನೆರಾದ್ ಬಸ್ರೂರು ಶ್ರೀ ಮಹಾಲಿಂಗೇಶ್ವರ ದೇವಸ್ಥಾನದ ಅಧ್ಯಕ್ಷೆರ್ ಅಪ್ಪಣ್ಣ ಹೆಗ್ಡೆ, ಕದ್ರಿ ಶ್ರೀ ಮಂಜುನಾಥೇಶ್ವರ ದೇವಸ್ಥಾನದ ಆಡಳಿತ ಮೊಕ್ತೇಸರೆರ್ ಡಾ.ಎ.ಜೆ. ಶೆಟ್ಟಿ, ಮಲಬಾರ್ ದೇವಸ್ವಂ ಬೋರ್ಡ್ ಸದಸ್ಯೆರ್ ಶಂಕರ್ ರೈ ಮಂಟಾಡಿ, ದ.ಕ. ಜಿಲ್ಲಾ ಸಂಚಾಲಕೆರ್ ಬಿ.ನಾಗರಾಜ್ ಶೆಟ್ಟಿ, ಕಾಸ್ರೋಡು ಜಿಲ್ಲಾ ಸಂಚಾಲಕೆರ್ ಸಂಜೀವ ಶೆಟ್ಟಿ, ಬಂಟರ ಮಾತೃ ಸಂಘದ ಪ್ರಧಾನ ಕಾರ್ಯದರ್ಶಿ ಕೆ.ಎಂ. ಶೆಟ್ಟಿ, ಕೋಶಾಧಿಕಾರಿ ಸಿ.ಎ. ರಾಮ ಮೋಹನ್ ರೈ, ಸಂಜೀವ ಶೆಟ್ಟಿ ಸಂಪಿಗೆ ಅಡಿ ಮೊಕುಲು ಮಾತ ಇತ್ತೆರ್. ಸಂಚಾಲಕೆರ್ ಬಿ. ಶೇಖರ ಶೆಟ್ರ್ ಬಿನ್ನೆರೆನ್ ಪರಿಚಯ ಮಲ್ತೆರ್.
ಪುರುಷೋತ್ತಮ ಭಂಡಾರಿ ಅಡ್ಯಾರ್ ಸಭೆ ಸುಧಾರಿಕೆ ಮಲ್ತೆರ್. ಸಮನ್ವಯಕಾರೆರ್ ಉಲ್ಲಾಸ್ ಶೆಟ್ಟಿ ಪೆರ್ಮುದೆ ಬಿನ್ನೆರೆನ್ ಎದ್ಕೊನಿಯೆರ್. ಸತೀಶ್ ಶೆಟ್ಟಿ ಕೊಡಿಯಾಲ್ ಬೈಲ್ ಸೊಲ್ಮೆ ಸಂದಾಯೆರ್.
ಕೇಂದ್ರ ಲೋಕಸೇವಾ ಆಯೋಗಡ್ ಖಾಲಿ ಇಪ್ಪುನ 167 ಎಂಜಿನಿಯರಿಂಗ್ ಸರ್ವಿಸಸ್ ಎಕ್ಸಾಮಿನೇಷನ್ ಬೇಲೆಗ್ ಅರ್ಜಿ ಸಂದಾವೊಲಿ.
ಈ ಬೇಲೆಗ್ ಡಿಪ್ಲೊಮಾ, ಎಂಜಿನಿಯರಿಂಗ್ ಪದವಿ, ಎಂ.ಎಸ್ಸಿ, ಸ್ನಾತಕೋತ್ತರ ಪದವಿ ಆಯಿನ ಅಭ್ಯರ್ಥಿಲು ಮಾತ್ರ ಅರ್ಜಿ ಸಂದಾಯೆರೆ ಆಪುನೇ. ಅರ್ಜಿನ್ ಆನ್ ಲೈನ್ ಮುಖೇನ ಸಂದಾವೊಲಿ. ಅರ್ಜಿ ಸಂದಾಯೆರೆ ಸೆ.26 ಕಡೆತ್ತ ದಿನ ಆತ್ಂಡ್.
