ಆಕಸ್ಮಾತ್‌ ಆದ್ 3 ವರ್ಷದ ಬಾಲೆ ಗುವೆಲ್‌ ಬೂರ್ದು ತೀರ್‌ಪೋಯಿನ ಘಟನೆ ಶಿರಸಿದ ಸಿಪಿ ಬಜಾರ್ ಕೈತಲ್‌ ನಡತ್‌ದುಂಡ್. ಅನುಶ್ರೀ ರಾಜಶೇಖರ್ (3) ತೀರ್‌ಪೋಯಿನ ಬಾಲೆ. ಅಪ್ಪೆನ ಒಟ್ಟಿಗೆ ಗುವೆಲ್‌ರ್ದ್‌ ನೀರ್‌ ಕನನಗ ಈ ಘಟನೆ ನಡತ್‌ದುಂಡ್. ಶಿರಸಿ ನಗರ ಠಾಣೆಡ್‌ ಕೇಸ್‌ ದಾಖಲಾತ್‌ಂಡ್.
ಉಜಿರೆ: ಛತ್ತೀಸ್ ಗಡದ ಚಂಪಾ ಕ್ರೀಡಾಂಗಣಡ್‌ ನಡತ್ತಿನ ವಿದ್ಯಾಭಾರತಿ ರಾಷ್ಟ್ರ ಮಟ್ಟದ ವಾಲಿಬಾಲ್ ಪಂದ್ಯಾಟಡ್ ಕರ್ನಾಟಕ ರಾಜ್ಯ ತಂಡನ್ ಪ್ರತಿನಿಧಿಸಾದ್ ದ.ಕ ಜಿಲ್ಲೆದ ಬೋಲ್ತೆರ್ ತಾಲೂಕುದ ವಿವೇಕಾನಂದ ಶಿಕ್ಷಣ ಸಂಸ್ಥೆದ ಮುಂಡಾಜೆ ಪದವಿ ಪೂರ್ವ ಕಾಲೇಜ್‌ದ 19 ನೇ ವಯೋಮಾನದ ಪೊಂಜೊಕ್ಲೆನ ತಂಡ ಚಾಂಪಿಯನ್ ಆತೆರ್. ನವಂಬರ್ ತಿಂಗೊಲುಡು ಶಿವಮೊಗ್ಗಡ್ ನಡಪುನ ಎಸ್.ಜಿ.ಎಫ್.ಐ ರಾಷ್ಟ್ರ ಮಟ್ಟದ ವಾಲಿಬಾಲ್ ಪಂದ್ಯಾಟಗ್ ಆಯ್ಕೆಯಾತೆರ್.
ವಿಜಯಾ ಕಾಲೇಜ್ ಮುಲ್ಕಿ ಮೊಕ್ಲೆನ ಮುತಾಲಿಕೆಡ್ ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿ ಜೈ ತುಲುನಾಡ್ (ರಿ.) ದ ಒಟ್ಟುಸೇರಿಗೆಡ್ ಬಲೆ ತುಲು ಲಿಪಿ ಕಲ್ಪುಗ ಕಜ್ಜಕೊಟ್ಯದ ಉದಿಪನ ಲೇಸ್ ಅ.6 ಸುಕ್ರಾರ ಮಧ್ಯಾಹ್ನ ಮುಲ್ಕಿ ವಿಜಯ ಕಾಲೇಜ್ ದ ಮಿನಿ ಸಭಾಂಗಣಡ್ ನಡಪರೆ ಉಂಡು.
ಆಳುಪ ವಂಶಸ್ಥೆರ್, ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿದ ಮಾಜಿ ಪದುಕೆರ್ ಡಾ. ಆಕಾಶ್ ರಾಜ್ ಜೈನ್ ಲೇಸ್ ದ ಉದಿಪನ ಮಲ್ಪುವೆರ್. ಮುಲ್ಕಿ ವಿಜಯ ಕಾಲೇಜ್ ದ ಪ್ರಾಂಶುಪಾಲೆರ್ ಡಾ. ಶ್ರೀಮಣಿ ಗುರ್ಕಾರ್ಮೆನ್ ಒಯಿಸೊನ್ವೆರ್.
ಮಲ್ಲ ಬಿನ್ನೆರಾದ್ ಜೈ ತುಲುನಾಡ್ (ರಿ.) ದ ಒತ್ತು ಗುರ್ಕಾರ್ಲು ಉದಯ್ ಪೂಂಜ, ಪ್ರಧಾನ ಕಾರ್ಯಂತೆರ್ ಕಿರಣ್ ತುಲುವೆ ಪಾಲ್ ಪಡೆಯೆರೆ ಉಲ್ಲೆರ್. ದೈಹಿಕ ಶಿಕ್ಷಣ ನಿರ್ದೇಶಕೆರ್, ಮುಲ್ಕಿ ವಿಜಯ ಕಾಲೇಜ್ ತುಳು ಲಿಪಿ ಮೇಲ್ವಿಚಾರಕೆರ್ ವಿಘ್ನೇಶ್ ಭಟ್ ಪಾಲ್ ಪಡೆಯೆರೆ ಉಲ್ಲೆರ್.
ಅಂಚೆನೆ ಪ್ರತಿ ಸನಿಯಾರ ಮಧ್ಯಾಹ್ನ 1:30 ಕ್ಕ್ ತುಲು ಲಿಪಿ ಕ್ಲಾಸ್ ನಡಪುಂಡು. ಕಿರಣ್ ತುಲುವೆ ಬೊಕ್ಕ ಪ್ರಶಾಂತ್ ಪೂಜಾರಿ ಕಲ್ಪಾದಿಲು ಆತೆರ್.
ರೆಂಜಾಳ ಸಂಸ್ಕೃತಿ ಸಿಂಚನ, ಶ್ರೀ ಮಹಮ್ಮಾಯಿ ಕುಣಿತಾ ಭಜನಾ ಮಂಡಳಿ, ಸಾರ್ವಜನಿಕ ಗಣೇಶೋತ್ಸವ ಸಮಿತಿದ ಮುತಾಲಿಕೆಡ್, ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿ ಜೈ ತುಲುನಾಡ್ (ರಿ.) ದ ಒಟ್ಟುಸೇರಿಗೆಡ್ ಬಲೆ ತುಲು ಲಿಪಿ ಕಲ್ಪುಗ ಕಜ್ಜಕೊಟ್ಯದ ತುಲು ಲಿಪಿ ಪರೀಕ್ಷೆ ಅ.8 ಐತಾರ ರೆಂಜಾಳ ವಾಣಿ ಕಲಾಮಂದಿರ ಸರಕಾರಿ ಸಂಯುಕ್ತ ಪ್ರೌಢಶಾಲೆಡ್ ನಡತ್ಂಡ್.
ಪ್ರಶಾಂತ್ ಪೂಜಾರಿ ನಂದೊಲ್ಗೆ ಬೊಕ್ಕ ಪವಿತ್ರ ಕೋಟ್ಯಾನ್ ಬೊಲ್ವಾಯಿ ಈ ಲೇಸ್ ದ ಕಲ್ಪಾದಿಲು ಇತ್ತೆರ್.
ಮಣಿಪಾಲ: ಜೈ ತುಲುನಾಡ್ (ರಿ.) ಒಡಿಪು ವಲಯ ಬೊಕ್ಕ ಅಕಾಡೆಮಿ ಹಿರಿಯ ಪ್ರಾಥಮಿಕ ಶಾಲೆ ಮಣಿಪಾಲದ ಒಟ್ಟುಸೇರಿಗೆಡ್ ಪುದರ್‌ ಪಲವೆ ಉದಿಪನ ಲೇಸ್ ಅ.7 ಕ್ಕ್ ಸನಿಯಾರ ಬೊಲ್ಪುಗು ಮಣಿಪಾಲ ಅಕಾಡೆಮಿ ಹಿರಿಯ ಪ್ರಾಥಮಿಕ ಶಾಲೆಡ್ ನಡಪರೆ ಉಂಡು.
ಈ ಲೇಸ್ ದ ಉದಿಪನನ್ ಒಡಿಪು ತುಳುಕೂಟದ ಗುರ್ಕಾರ್ಲು ಜಯಕರ್ ಶೆಟ್ಟಿ ಇಂದ್ರಾಳಿ ಮಲ್ಪುವೆರ್. ಗುರ್ಕಾರ್ಮೆನ್ ಜೈ ತುಲುನಾಡ್ (ರಿ.) ದ ಒತ್ತು ಗುರ್ಕಾರ್ಲು ಉದಯ್ ಪೂಂಜಾ ಒಯಿಸೊನ್ವೆರ್. ಮಲ್ಲ ಬಿನ್ನೆರಾದ್ ಆಳುಪ ವಂಶಸ್ತೆರ್, ಕರ್ನಾಟಕ ತುಳು ಸಾಹಿತ್ಯ ಅಕಾಡಮಿದ ಮಾಜಿ ಪದುಕೆರ್ ಡಾ/ ಆಕಾಶ್‌ರಾಜ್ ಜೈನ್, ತಾರಾ ಉಮೇಶ್ ಆಚಾರ್ಯ ಪಾಲ್ ಪಡೆಯೆರೆ ಉಲ್ಲೆರ್.
ಮಣಿಪಾಲ ಅಕಾಡೆಮಿ ಹಿರಿಯ ಪ್ರಾಥಮಿಕ ಶಾಲೆದ ಟೀಚರ್ ಲಕ್ಷ್ಮೀ ಬೊಕ್ಕ ಜೈ ತುಳುನಾಡ್ (ರಿ.) ಪ್ರಚಾರ ಸಮಿತಿದ ನಿದಯಂತೆರ್ ಸದಾಶಿವ ಮುದ್ರಾಡಿ ಲೇಸ್ ದ ಒತ್ತುಪಾಲ್ ದೆತೊನಿಯೆರೆ ಉಲ್ಲೆರ್. ಸ್ವಾತಿ ಸುವರ್ಣ ಈ ಲೇಸ್ ನ್ ಸುಧಾರಿಕೆ ಮಲ್ಪುವೆರ್.
ಪುತ್ತೂರು: ಇತಿಹಾಸ ಪ್ರಸಿದ್ಧ ಪುತ್ತೂರು ಮಹತೋಭಾರ ಶ್ರೀ ಮಹಾಲಿಂಗೇಶ್ವರ ದೇವಸ್ಥಾನಡ್ ಅ.6 ಆರ್ದ್ರಾ ನಕ್ಷತ್ರದಾನಿ ತಿಂಗೊಲ್ದ ಮೃತ್ಯುಂಜಯ ಹೋಮ ನಡಪೆರೆ ಉಂಡು. ಮೃತ್ಯುಂಜಯ ಹೋಮ ಸೇವೆ ಮಲ್ಪುನ ಭಕ್ತಾದಿಲು ರಶೀದಿನ್ ದೇವಳದ ಕೌಂಟರ್‌ಡ್‌ ಮಲ್ಪುನಂಚ ದೇವಳದ ವ್ಯವಸ್ಥಾಪನಾ ಸಮಿತಿದ ಗುರ್ಕಾರ್ಲು ಕೇಶವಪ್ರಸಾದ್ ಮುಳಿಯ ಬೊಕ್ಕ ಕಾರ್ಯನಿರ್ವಹಣಾಧಿಕಾರಿ ಕೆ.ವಿ.ಶ್ರೀನಿವಾಸ್ ತೆರಿಪಾದೆರ್.
ಪುತ್ತೂರು: ಕೊಂಬೆಟ್ಟು ಮರಾಟಿ ಸಮಾಜ ಸೇವಾ ಸಂಘ ನೆತ್ತ ಅಂಗಸಂಸ್ಥೆಯಾಯಿನ ಪುತ್ತೂರು ಕೊಂಬೆಟ್ಟು ಮರಾಟಿ ಮಹಿಳಾ ವೇದಿಕೆ 2023–24ನೇ ಸಾಲ್‌ದ ಪೊಸ ಕಾರ್ಯಕಾರಿ ಸಮಿತಿ ರಚನೆ ಬೊಕ್ಕ ಪದಾಧಿಕಾರಿಲೆನ ಆಯ್ಕೆ ಪುತ್ತೂರುದ ಕೊಂಬೆಟ್ಟು ಮರಾಟಿ ಸಮಾಜ ಮಂದಿರಡ್‌ ನಡತ್ಂಡ್.
ಮರಾಟಿ ಮಹಿಳಾ ವೇದಿಕೆದ ಪೊಸ ಗುರ್ಕಾರ್ದಿ ಆದ್ ಚೇತನಾ ಲೋಕಾನಂದ ಬನ್ನೂರು, ಉಪಾಧ್ಯಕ್ಷೆಯಾದ್ ಉಷಾ ಬಾಬು ನಾಯ್ಕ್ ತೆಂಕಿಲ, ಪ್ರಧಾನ ಕಾರ್ಯದರ್ಶಿಯಾದ್ ಕಿಶೋರಿ ದುಗ್ಗಪ್ಪ ಬಡಾವು ಬೊಕ್ಕ ಕೋಶಾಧಿಕಾರಿಯಾದ್ ಮೀನಾಕ್ಷಿ ಮಂಜುನಾಥ್ ಆಯ್ಕೆಯಾಯೆರ್. ಜೊತೆ ಕಾರ್ಯದರ್ಶಿಯಾದ್ ವಸಂತಿ ದರ್ಬೆ, ಸಂಘಟನಾ ಕಾರ್ಯದರ್ಶಿ ಮೋಹಿನಿ ಬಲ್ನಾಡು, ಕುಸುಮಾವತಿ ಕುಂಬ್ರ, ಗೌರಿ ಬರೆಪ್ಪಾಡಿ, ಕ್ರೀಡಾ ಕಾರ್ಯದರ್ಶಿ ಲಲಿತಾ ಅಶೋಕ್, ಸಾಂಸ್ಕೃತಿಕ ಕಾರ್ಯದರ್ಶಿ ಲೀಲಾವತಿ ನಾರಾಯಣ, ಬೊಕ್ಕ ಕಾರ್ಯಕಾರಿ ಸಮಿತಿದ ಸದಸ್ಯೆರ್‌ ಆಯ್ಕೆ ಮಲ್ತೆರ್.
ಪೂವಪ್ಪ ನಾಯ್ಕ ಕುಂಞಕುಮೇರು ಬೊಕ್ಕ ಲೋಕಾನಂದ ನಾಯ್ಕ್ ಆಯ್ಕೆ ಪ್ರಕ್ರಿಯೆನ್‌ ನಡಪಾದ್‌ ಕೊರಿಯೆರ್. ಮರಾಟಿ ಸಮಾಜ ಸೇವಾ ಸಂಘದ ಗುರ್ಕಾರ್ಲು ಮಂಜುನಾಥ ಎನ್.ಎಸ್ ಗುರ್ಕಾರ್ಮೆನ್ ವಹಿಸ್‌ದ್‌ ಇತ್ತೆರ್. ಕಾರ್ಯದರ್ಶಿ ಅಶೋಕ್ ಬಲ್ನಾಡು. ಕೋಶಾಧಿಕಾರಿ ಬಾಬು ನಾಯ್ಕ್ , ನಿಕಟಪೂರ್ವ ಗುರ್ಕಾರ್ದಿ ಯಮುನಾ ವೈ.ಕೆ. ನಾಯ್ಕ್ ಪಟ್ಟೆ, ನಿಕಟಪೂರ್ವ ಕಾರ್ಯದರ್ಶಿ ಪ್ರಧಾನ ಕಾರ್ಯದರ್ಶಿ ಗೌರಿ ಬರೆಪ್ಪಾಡಿ, ನಿಕಟಪೂರ್ವ ಕೋಶಾಧಿಕಾರಿ ಲಲಿತಾ. ವೈ, ಬೊಕ್ಕ ಯುವ ವೇದಿಕೆದ ಪದಾಧಿಕಾರಿಲು ಈ ಪೊರ್ತುಡು ಇತ್ತೆರ್.
ಬೋಲ್ತೆರ್: ಭಾರತ್ ಕೋ ಆಪರೇಟಿವ್ ಬ್ಯಾಂಕ್ ಬೊಂಬೈ ಲಿಮಿಟೆಡ್ ನೆತ್ತ ಪೊಸ ನಿರ್ದೇಶಕೆಯಾದ್ ನಾರಾಯಣ ಸುವರ್ಣ ಮರೋಡಿ ಆಯ್ಕೆಯಾತೆರ್.
ನಾರಾಯಣ ಸುವರ್ಣ ಕರಿನ ಮಸ್ತ್‌ ವರ್ಷರ್ದ್ ಬೊಂಬೈಡ್‌ ಬ್ಯಾರ ಮಲ್ತೊಂದು, ತುಳುನಾಡ್‌ಡ್‌ ನಡಪುನ ಪ್ರತಿಯೊಂಜಿ ಕಾರ್ಯಕ್ರಮಕ್ಕ್‌ ಸಹಕಾರನ್‌ ಕೊರೊಂದು ಬರೊಂದುಲ್ಲೆರ್. ಮರೋಡಿ ಶ್ರೀ ನಾರಾಯಣ ಗುರು ಸೇವಾ ಸಮಿತಿದ ಗುರ್ಕಾರೆ ಆದ್, ಮರೋಡಿ ಶ್ರೀ ಉಮಾಮಹೇಶ್ವರ ದೇವಸ್ಥಾನದ ಮುಂಬಯಿ ಸಮಿತಿ ಸಂಚಾಲಕೆಯಾದ್ ಸೇವೆ ಮಲ್ತೊಂದು ಉಲ್ಲೆರ್
ಪ್ರಾಥಮಿಕ ಶಾಲೆ ಬೊಕ್ಕ ಪ್ರೌಢಶಾಲೆಗ್ ದಸರಾ ರಜೆನ್ ಅ.8 ರ್ದ್ ಅ.24 ಮುಟ್ಟ ಕೊರ್ದು ಸಾರ್ವಜನಿಕ ಶಿಕ್ಷಣ ಇಲಾಖೆ ಆದೇಶ ಕೊರ್ತುಂಡು. ಪ್ರಾಥಮಿಕ ಬೊಕ್ಕ ಪ್ರೌಢಶಾಲಾ ಕಲ್ಪಾರ್ಥಿಲೆಗ್ ಅಕ್ಟೋಬರ್ ತಿಂಗೊಲುಡು 17 ದಿನ ದಸರಾ ರಜೆ ಕೊರ್ತೆರ್. ರಾಜ್ಯ ಶಾಲಾ ಶಿಕ್ಷಣ ಇಲಾಖೆದ ವಾರ್ಷಿಕ ರಜೆ ಕ್ಯಾಲೆಂಡರ್ ಪ್ರಕಾರ ಅಕ್ಟೋಬರ್ 8 ರ್ದ್ 24 ಮುಟ್ಟ ದಸರಾ ರಜೆ ಇಪ್ಪುಂಡು.
ಪೊವಾಯಿ ಸುವರ್ಣ ನಾಗ ಮಹಾಶೇಷ ರುಂಡ ಮಾಲಿನಿ ದೇವಸ್ಥಾನಡ್ ಮಾರ್ನೆಮಿದ ಉಚ್ಚಯ ತಾರೀಕ್ 15 ಅಕ್ಟೋಬರ್ ಸುರು ಆದ್ ನವೆಂಬರ್ 5 ತಾರೀಕ್ ಮುಟ್ಟ ನಡಪೆರೆ ಉಂಡು.
ಅ15 ತಾರಿಕ್ ಗ್ ಘಟ ಸ್ಥಾಪನೆ, ಪ್ರತಿದಿನ ಭಜನೆ, ಅ.21 ತಾರಿಕ್ ಮಹಾ ಚಂಡಿಕಾ ಹೋಮ, ಅ.22 ತಾರಿಕ್ ಗ್ ಮಹಾಪೂಜೆ, ಬಯ್ಯಗ್ 5.30 ಗ್ ಶ್ರೀ ಗೀತಾಂಬಿಕಾ ಕೃಪಾಪೋಷಿತ ಯಕ್ಷಗಾನ ಮಂಡಳಿ ಅಸಲ್ಪ ಘಾಟಿಕೋಪರ್ ಮೊಕ್ಲೆರ್ದ್ ” ಶಾಂಭವಿ ವಿಜಯ ” ಯಕ್ಷಗಾನ ಬಯಲಾಟ ನಡಪರೆ ಉಂಡು. ಅ28 ತಾರಿಕ್ ಗ್ ಶ್ರೀ ಸತ್ಯನಾರಾಯಣ ಮಹಾ ಪೂಜೆ, ಅ29 ತಾರಿಕ್ ಘಟ ವಿಸರ್ಜನೆ,ಪಿಲಿ ನಲಿಕೆದ ಒಟ್ಟುಗು ನ.5 ತಾರಿಕ್ ಗ್ ಶ್ರೀ ಅಣ್ಣಪ್ಪ ಸ್ವಾಮೀ ಮಹಾ ಪೂಜೆ, ಮಹಾ ಅನ್ನ ಸಂತರ್ಪಣೆ ನಡಪರೆ ಉಂಡು. ಈ ಮಾತ ದೇವೆರೆನ ಕೆಲಸೊಡು ಭಕ್ತೆರ್ ಕುಟುಂಬದ ಸಮೇತ ಬತ್ತ್ ದ್ ದೇವೆರೆನ ಕೃಪೆಗ್ ಪಾತ್ರ ಆವೊಡು ಪಂದ್ ಕ್ಷೇತ್ರದ ಧರ್ಮದರ್ಶಿ ಶ್ರೀ ಶ್ರೀ ಸುವರ್ಣ ಬಾಬಾ ವಿನಂತಿ ಮಲ್ದೆರ್.
