ಬೆಂಗ್ಲೂರು : ಈ ಸರ್ತಿದ 10ನೇ ಕ್ಲಾಸ್ ದ ವಾರ್ಷಿಕ ಪರೀಕ್ಷೆ ಮಾ.25 ರ್ದ್ ಎ.6 ಮುಟ್ಟ ನಡಪರೆ ಉಂಡು.
ಎಸ್ಸೆಸ್ಸೆಲ್ಸಿ ಪರೀಕ್ಷೆದ ತಾತ್ಕಾಲಿಕ ವೇಳಾಪಟ್ಟಿನ್ ಶಿಕ್ಷಣ ಇಲಾಖೆ ಇನಿ ಪ್ರಕಟ ಮಲ್ದ್ಂಡ್.
ಮಾ.25 ಕ್ಕ್ ಕನ್ನಡ, ಮಾ.27 ಕ್ಕ್ ಸಮಾಜ ವಿಜ್ಞಾನ, ಮಾ.30 ಕ್ಕ್ ವಿಜ್ಞಾನ, ಎ.2 ಕ್ಕ್ ಗಣಿತ, ಎ.4 ಹಿಂದಿ, ಎ.6 ಕ್ಕ್ ಇಂಗ್ಲಿಷ್ ಪರೀಕ್ಷೆ ನಡಪರೆ ಉಂಡು.
ಬೆಂಗ್ಲೂರು: ಸೆಕೆಂಡ್ ಪಿಯುಸಿ ವಾರ್ಷಿಕ ಪರೀಕ್ಷೆ ಮಾರ್ಚ್ 2-22 ಮುಟ್ಟ ನಡಪರೆ ಉಂಡು.
ಮಾ.2 ಕ್ಕ್ ಕನ್ನಡ, ಮಾ.4 ಕ್ಕ್ ಇತಿಹಾಸ, ಮಾ.6 ಕ್ಕ್ ಸಮಾಜ ಶಾಸ್ತ್ರ, ಗಣಕ ವಿಜ್ಞಾನ, ಮಾ.7 ಕ್ಕ್ ಹಿಂದಿ, ಮಾ.9 ಕ್ಕ್ ರಾಜ್ಯಶಾಸ್ತ್ರ, ಸಂಖ್ಯಾಶಾಸ್ತ್ರ, ಮಾ.11 ಕ್ಕ್ ಇಂಗ್ಲಿಷ್, ಮಾ.13 ಕ್ಕ್ ವ್ಯವಹಾರ ಅಧ್ಯಯನ, ಮಾ.16 ಕ್ಕ್ ಭೂಗೋಳಶಾಸ್ತ್ರ, ಜೀವಶಾಸ್ತ್ರ, ಮಾ.18 ಕ್ಕ್ ರಸಾಯನಶಾಸ್ತ್ರ, ಮಾ.20 ಕ್ಕ್ ಐಚ್ಚಿಕ ಕನ್ನಡ, ಲೆಕ್ಕಶಾಸ್ತ್ರ, ಮಾ.22 ಕ್ಕ್ ಅರ್ಥಶಾಸ್ತ್ರ ಪರೀಕ್ಷೆ ನಡಪರೆ ಉಂಡು.
ಸಮಾಜಪರ ಚಿಂತಕೆರ್, ಶಿಕ್ಷಣ ಪ್ರೇಮಿ, ಸಮಾಜ ಸೇವಕೆರ್ ಮಹೇಶ್ ಮೇರ್ ಬಂಟರ ಸಂಘ ಬೊಂಬೈದ ಒತ್ತು ಗುರ್ಕಾರೆಯಾದ್ ಆಯ್ಕೆ ಆತೆರ್.
ಕರಿನ 23 ವರ್ಷೊದಿಂಚ ಪೊವಾಯಿ ಪಾಸ್ಪೋಳಿ ಕನ್ನಡ ಶಾಲೆದ ಜೋಕುಲೆಗ್ ಮಾತ ರೀತಿಡ್ ಸಹಕಾರ ಮಲ್ತ್ ದ್, ಶಾಲೆಗ್ ಗೌರವ ಶಿಕ್ಷಕೆರೆನ್ ಕೊರ್ನ ಅಪ್ಪಟ ಕನ್ನಡ ಪ್ರೇಮಿ ಮೇರ್, ಬೊಂಬೈ ಮಹಾನಗರಡ್ ಬಂಟರ ಸಂಘದ ಬೇತೆ ಬೇತೆ ಜಬದಾರಿ ದೆತೊಂದು ಶಿಕ್ಷಣಗ್ ಎಚ್ಚದ ಮಹತ್ವ ಕೊರ್ದು, ಒವ್ವೇ ಜಾತಿ ಮತ ಭೇದ ಭಾವ ಮಲ್ಪಂದೆ ಸಮಾಜದ ಪರ ಬೇಲೆ ಮಲ್ಪುನ ಮಹೇಶ್ ಒರಿ ಎಡ್ಡೆ ಮನಸ್ ದ ವ್ಯಕ್ತಿ.
ಹುಷಾರ್ ದಾಂತಿನಕ್ಲೆನ್ ಅಕ್ಲೆನ ಇಲ್ಲಗ್ ಭೇಟಿ ಕೊರ್ದು ಅಕ್ಲೆನ ಚಿಕಿತ್ಸೆಗ್ ಸಕಾಯ ಆಪುನ ಮೇರ್ ಒವ್ವೇ ಪ್ರಚಾರನ್ ಬಯಸಂದೆ ತನ್ನೆರ್ದ್ ಆಪುನ ಸಹಾಯನ್ ಮಲ್ತೊಂದು ಬೈದೆರ್. ಸಮಾಜದ ಒವ್ವೇ ಜಾತಿ ಧರ್ಮದ ಬಡಪತ್ತ್ ದ ಪೊಣ್ಣು ಜೋಕ್ಲೆನ ಮದಿಮೆಗ್ ಸಕಾಯ ಮಲ್ತೊಂದು ಬಂಟರ ಸಂಘದ ಮುಖೇನ ಬಡ ವರ್ಗದ ಪೊಣ್ಣು ಜೋಕ್ಲೆನ ಮದಿಮೆದ ಮಾತ ಖರ್ಚ್ ನ್ ದೆತೊನುನ ಯೋಜನೆನ್ ಕನಯೆರೆ ಮಸ್ತ್ ಶ್ರಮ ಪಾಡ್ದೆರ್.
ಪೊವಾಯಿ ಕನ್ನಡ ಸೇವಾ ಸಂಘದ ಮತ ಯೋಜನೆಲೆಗ್ ಸಕಾಯ ಆಯೆರೆ ಮಹೇಶ್ ಮೆರೆನ ಕೊಡುಗೆ ಮಸ್ತ್ ಉಂಡು. ಪದವೀಧರೆರ್ ಆಯಿನ ಮೇರ್ ಮದ್ಯಗುತ್ತು ಶ್ಯಾಮ ಶೆಟ್ಟಿ ಬೊಕ್ಕ ಪಡ್ಡೆದ್ರ ಕಾಜಲ್ ನಿವಾಸ ಲೀಲಾವತಿ ಶೆಟ್ಟಿ ದಂಪತಿಲೆನ ಮಗೆ ಆತೆರ್. ಸಂಸಾರ ಜೀವನಡ್ ಬೊಡೆದಿ ವಿಜಯಲಕ್ಷ್ಮಿ, ಜೋಕುಲು ಅಶ್ವಿನ್ ಬೊಕ್ಕ ಸಾಗರ್ ಉಲ್ಲೆರ್. ವೃತ್ತಿಡ್ ಬಾಬಾ ಗ್ರೂಪ್ಸ್ ಆಪ್ ಕಂಪನೀಸ್ ಸಂಸ್ಥೆದ ಮಾಲಕೆರ್ ಆಯಿನ ಮೇರ್ ಬಂಟರ ಸಂಘದ ಮಲ್ಲ ಮಟ್ಟದ ತಾನಗ್ ಏರ್ದೆರ್.
ಜೈ ತುಲುನಾಡ್ (ರಿ.) ಕುಡ್ಲ ಎಗ್ಗೆದ ಮುತಾಲಿಕೆಡ್, ಎ.ಜೆ ಹಾಸ್ಪಿಟಲ್ ದ ಒಟ್ಟುಸೇರಿಗೆಡ್ ನೆತ್ತೆರ್ ಉಂಬೊಲಿ ಡಿ.10 ಐತಾರ ಬಜ್ಪೆ ಬ್ರಹ್ಮಶ್ರೀ ನಾರಾಯಣ ಗುರು ಸಮುದಾಯ ಭವನಡ್ ನಡಪರೆ ಉಂಡು.
ಈ ಲೇಸ್ ಡ್ ಮಾತೆರ್ಲಾ ಪಾಲ್ ಪಡೆದ್, ನೆತ್ತೆರ್ ದಾನ ಮಲ್ಪೊಲಿ ಪಂದ್ ಲೆಪ್ಪೋಲೆಡ್ ತೆರಿಪಾದೆರ್.
ಲಡಾಖ್ ಡ್ 3.4 ಬಿರ್ಸ್ ದ ಭೂಕಂಪ ಆತ್ಂಡ್.
ಭೂಕಂಪನದ ರಾಷ್ಟ್ರೀಯ ಕೇಂದ್ರದ ಪ್ರಕಾರ ಬೊಲ್ಪುಗು ಆತ್ಂಡ್ ಪಂದ್ ತೆರಿದ್ ಬೈದ್ಂಡ್. ಭೂಮಿ ನಡ್ ಗ್ನಗ ಜನಕುಲು ಇಲ್ಲರ್ದ್ ಪಿದಯಿ ಬೈದೆರ್. ಆಂಡ ಇಡೇ ಮುಟ್ಟ ಒವ್ವೇ ತೊಂದರೆ ಆತಿಜಿ.
ಬೊಂಬೈ: ಚಿಣ್ಣರ ಬಿಂಬದ ಮುತಾಲಿಕೆಡ್ ಜೋಕ್ಲೆನ ಉತ್ಸವ-2023 ಕಾರ್ಯಕ್ರಮ ಡಿ.3 ತಾನಿ ಬೊಂಬೈದ ಎಸ್.ಎಮ್ ಶೆಟ್ಟಿ ಸ್ಕೂಲ್‌ ಆಡಿಟೋರಿಯಂಡ್‌ ನಡಪೆರೆ ಉಂಡು. ಬಂಟರ ಸಂಘ ಮುಂಬಯಿ ನೆತ್ತ ಮಹಿಳಾ ವಿಭಾಗ ದ ಮಾಜಿ ಗುರ್ಕಾರ್ದಿ ರಜನಿ ಸುಧಾಕರ ಹೆಗ್ಡೆ ಲೇಸ್‌ದ ಉದಿಪನ ಮಲ್ಪೆರೆ ಉಲ್ಲೆರ್.
ವೈಷ್ಣವಿ ಮ್ಯಾನೇಜ್‌ಮೆಂಟ್‌ದ ಎಮ್.ಡಿ ಮೋಹನ್‌ ಪೂಜಾರಿ ಗುರ್ಕಾರ್ಮೆ ವಹಿಸರೆ ಉಲ್ಲೆರ್. ಬಿನ್ನೆರಾದ್ ಯುನೈಟೆಡ್‌ ರಬ್ಬರ್‌ ಇಂಡಸ್ಟ್ರೀಸ್‌ದ ಚೇರ್‌ಮನ್‌ ಅಜಿತ್ ರೈ, ಬಾಬಸ್‌ ಹಾಸ್ಪಿಟಾಲಿಟಿ ಬೊಕ್ಕ ಫುಡ್‌ ಸರ್ವೀಸ್‌ದ ವಿಜಯ ಶೆಟ್ಟಿ, ಭಾರತ್‌ ಬ್ಯಾಂಕ್‌ದ ನಿರ್ದೇಶಕೆರ್‌ ಗಣೇಶ್‌ ಪೂಜಾರಿ ಪಾಲ್ ಪಡೆಯೆರೆ ಉಲ್ಲೆರ್.
ಅಂಚನೆ ಬಯ್ಯಗ್‌ ಜೋಕ್ಲೆನ ಸಾಂಸ್ಕೃತಿಕ ಕಾರ್ಯಕ್ರಮ ನಡಪೆರೆ ಉಂಡು. ಬಯ್ಯ 4 ಗಂಟೆಗ್‌ ಇನಾಮುದ ವಿತರಣೆ ನಡಪೆರೆ ಉಂಡು. ಈ ಲೇಸ್‌ದ ಉದಿಪನನ್‌ ಎಮ್.ಎಲ್.ಎ ದಿಲೀಪ್‌ ಲಾಂಡೆ ಮಲ್ಪೆರೆ ಉಲ್ಲೆರ್. ಶ್ರೀ ಮಹಾಶೇಷ ರುಂಡಮಾಲಿನಿ ದೇವಸ್ಥಾನದ ಶ್ರೀಶ್ರೀಶ್ರೀ ಸುವರ್ಣ ಬಾಬ ಆರ್ಶೀರ್ವಚನ ಕೊರಿಯೆರೆ ಉಲ್ಲೆರ್. ಪೊವಾಯಿ ಎಸ್.ಎಮ್ ಶೆಟ್ಟಿ ಎಜುಕೇಶನ್‌ ಟ್ರಸ್ಟ್‌ದ ಚೇರ್‌ಮನ್‌ ಬಿ.ಆರ್ ಶೆಟ್ಟಿ ಗುರ್ಕಾರ್ಮೆನ್ ವಹಿಸೆರೆ ಉಲ್ಲೆರ್. ಬಿನ್ನೆರಾದ್ ಬಾಬ ಗ್ರೂಪ್ಸ್ ಇನ್ಸ್‌ಟ್ಯೂಟ್‌ದ ಸಿ.ಎಮ್.ಡಿ ಬಂಟರ ಸಂಘ ಮುಂಬಯಿ ನೆತ್ತ ಒತ್ತು ಗುರ್ಕಾರೆ.ಮಹೇಶ್ ಎಸ್ ಶೆಟ್ಟಿ, ಬೊಂಬೈ ಬಂಟ್ಸ್‌ ಅಸೋಸಿಯೇಶನ್ದ ಗುರ್ಕಾರ್ಲು ಸಿ.ಎ ಸುರೇಂದ್ರ ಕೆ.ಶೆಟ್ಟಿ, ಬಿಸಿನೆಸ್‌ ಮ್ಯಾನ್‌ ಪ್ರದೀಪ್‌ ಪೂಜಾರಿ, ಲಾಯರ್‌ ಪ್ರಭಾಕರ ಶೆಟ್ಟಿ ಪಾಲ್ ಪಡೆಯೆರೆ ಉಲ್ಲೆರ್.
ಪಡಂಗಡಿ : ಶ್ರೀ ಕ್ಷೇತ್ರ ಓಡೀಲು ಶ್ರೀ ಮಹಾಲಿಂಗೇಶ್ವರ ದೇವಸ್ಥಾನ ನೆತ್ತ ಬ್ರಹ್ಮ ಕಲಶೋತ್ಸವ ಸಮಿತಿದ ರಚನಾ ಸಭೆ ಡಿ 01 ತಾನಿ ದೇವಸ್ಥಾನದ ವಠಾರಡ್ ನಡತ್ಂಡ್. ಸಭೆತ ಗುರ್ಕಾರ್ಮೆನ್ ಉದ್ಯಮಿ ಶಶಿಧರ್ ಶೆಟ್ಟಿ ನವಶಕ್ತಿ ವಹಿಸ್‌ದ್‌ ಇತ್ತೆರ್. ಸಭೆಟ್ ಬ್ರಹ್ಮಕಲಶೋತ್ಸವ ಒವ್‌ ರೀತಿಡ್ ಮಲ್ಪೊಲಿ ಪಂದ್ ಚರ್ಚೆ ಮಲ್ತೆರ್.
ಈ ಪೊರ್ತುಡು ಬ್ರಹ್ಮಕಲಶೋತ್ಸವ ಸಮಿತಿದ ಗುರ್ಕಾರ್ಲು ಆದ್ ಉದ್ಯಮಿ ಕೊಡುಗೈದಾನಿ ಶಶಿಧರ್ ಶೆಟ್ಟಿ ನವಶಕ್ತಿ ಗುರುವಾಯನಕೆರೆ ಆಯ್ಕೆ ಆಯೆರ್.
ಗೌರವಾಧ್ಯಕ್ಷೆರಾದ್ ಬೋಲ್ತೆರ್ ಶಾಸಕೆರ್ ಹರೀಶ್ ಪೂಂಜ , ಕಾರ್ಯಾಧ್ಯಕ್ಷರಾದ್ ಸಂತೋಷ್ ಕುಮಾರ್ ಜೈನ್, ಪ್ರಧಾನ ಕಾರ್ಯದರ್ಶಿ ಚಿದಾನಂದ ಇಡ್ಯಾ, ಉಪಾಧ್ಯಕ್ಷೆರ್ ಪ್ರಭಾಕರ ಬಂಗೇರ, ಶ್ರೀಕಾಂತ್ ಶೆಟ್ಟಿ ಮುಂಡಾಡಿ, ನಾರಾಯಣ ಮೂಲ್ಯ, ಅಜಿತ್ ಶೆಟ್ಟಿ ಕೊರ್ಯರ್, ಕಾರ್ಯದರ್ಶಿ ಸಂತೋಷ್ ಹಲ್ಲಂದಡಿ, ಶಶಿರಾಜ್ ಶೆಟ್ಟಿ, ಧನಲಕ್ಷ್ಮಿ, ಆನಂದ ಶೆಟ್ಟಿ ಐಸಿರಿ, ಕೋಶಾಧಿಕಾರಿ ವಸಂತ ಗೌಡ, ಜತೆ ಕಾರ್ಯದರ್ಶಿ ಲೀಲಾವತಿ ಸೋಣಂದೂರು ಆಯ್ಕೆ ಆಯೆರ್. ಸಭೆಟ್ ತಂತ್ರಿಲಾಯಿನ ಉದಯ ಪಾಂಗಣ್ಣಾಯ, ಮಾಜಿ ಶಾಸಕೆರ್ ಪ್ರಭಾಕರ ಬಂಗೇರ, ಗೋಪಾಲ ಶೆಟ್ಟಿ ಕೊರ್ಯರ್, ಸುಕೇಶ್ ಕಡಂಬು, ವ್ಯವಸ್ಥಾಪನಾ ಸಮಿತಿದ ಗುರ್ಕಾರ್ಲು ಪ್ರಭಾಕರ ಉಪ್ಪಡ್ಕ ಇತ್ತೆರ್. ಚಿದಾನಂದ ಇಡ್ಯಾ ಲೇಸ್‌ದ ಸುದಾರಿಕೆ ಮಲ್ತೆರ್. ಶಾಂತಾ ಜೆ ಬಂಗೇರ ಸೊಲ್ಮೆ ಸಂದಾಯ ಮಲ್ತೆರ್.
ತರೆಕಡಪ ಬಿಲೆತ್ತ ನಾಯಿದ ಕಿನ್ನಿದ ಮಿತ್ತ್‌ದ ಮೋಕೆ ಒರಿ ಜವನನ ಜೀವ ದೆತೊಂದುಂಡು. ತಾನ್ ಇಷ್ಟಪಟ್ ದಿನ ನಾಯಿದ ಕಿನ್ನಿನ್ ಅಪ್ಪೆ ದೆತ್ತ್‌ ಕೊರ್ಜೆರ್‌ ಪಂದ್ ಮಗೆ ಬಲ್ಲ್ ಪಾಡೊಂದು ಆತ್ಮಹತ್ಯೆ ಮಲ್ತೊನ್ನ ಘಟನೆ ಹುಬ್ಬಳ್ಳಿಡ್‌ ನಡತ್ಂಡ್. ಹುಬ್ಬಳ್ಳಿ ಮಿಷನ್‌ ಕಾಂಪೌಂಡ್‌ಡ್ ಈ ಘಟನೆ ನಡತ್ಂಡ್, ಆಲೆನ್ ಭಸಮ್ (24) ಆತ್ಮಹತ್ಯೆ ಮಲ್ತೊನ್ನ ಜವನೆ.
ಆಲೆನ್ ನಾಯಿ ಪ್ರೇಮಿಯಾದ್, 2 ಲಕ್ಷ ರೂ. ಬಿಲೆತ್ತ ನಾಯಿದ ಕಿನ್ನಿನ್ ದೆತ್ತ್‌ ಕೊರ್ಜಿ ಪಂದ್ ಅಪ್ಪೆಡ ಹಠ ಮಲ್ತೊಂದು ಇತ್ತೆ. ಮಗನ ಕಿರಿಕಿರಿ ತಡೆಯಂದೆ ಬೇಜಾರ್‌ ಆದ್ ಆಯನ ಅಪ್ಪೆ ಇಲ್ಲ್‌ ಬುಡ್ದು ಪೋದಿತ್ತೆರ್. ನೆರ್ದ್ ಬೇಜಾರ್‌ ಆಯಿನ ಆಲೆನ್ ಇಲ್ಲಲ್‌ ಬಲ್ಲ ಪಾಡೊಂದು ಆತ್ಮಹತ್ಯೆ ಮಲ್ತೊಂದೆ. ಘಟನೆದ ಬಗ್ಗೆ ಹುಬ್ಬಳ್ಳಿ ಉಪನಗರ ಠಾಣೆಡ್ ಕೇಸ್‌ ದಾಖಲಾತ್‌ಂಡ್.
ಕಟೀಲ್ : ಹಿಮಾಲಯದ ಗುಡ್ದೆರ್ದ್ ಪುಟ್ಟಿನ ನೀರ ಒಸರ್ ಕೃಷಿ ಕಂಡಡ್ ಪಸೆರ್ದ್ ಫಲ ಕೊರ್ಪುನಂಚ, ಬಾಷೆದ ಉಪಯೋಗ ಎಡ್ಡೆ ರೀತಿಡ್ ಆವೊಡು ಪಂದ್ ಗಣಕ ತಜ್ಞೆರ್ ಕೆ ಪಿ ರಾವ್ ಪಂಡೆರ್. ಆರ್ ಕಟೀಲು ಶ್ರೀ ದುರ್ಗಾಪರಮೇಶ್ವರೀ ಸಮೂಹ ಶಿಕ್ಷಣ ಸಂಸ್ಥೆದ ಆಶ್ರಯಡ್ ನಡಪುನ ಮೂಜಿ ದಿನತ್ತ “ಭ್ರಮರ ಇಂಚರ ನುಡಿ ಪರ್ಬ” ಕಾರ್ಯಕ್ರಮದ ಗುರ್ಕಾರ್ಮೆನ್ ವಹಿಸ್ ದ್ ಪಾತೆರಿಯೆರ್.
ಕಟೀಲು ಪದವಿ ಕಾಲೇಜ್ ರ್ದ್ ಸಮ್ಮೇಳನ ನಡಪುನ ಮುಟ್ಟ ಮೆರವಣಿಗೆ ನಡತ್ಂಡ್, ಮೆರವಣಿಗೆಡ್ ಭಗವದ್ಗೀತೆನ್ ಪಲ್ಲಕ್ಕಿಡ್ ಪತೊಂದು ಬತ್ತ್ ದ್ ವಿಶೇಷ ಗೌರವ ಸಲ್ಲಿಸಾಯೆರ್. ಬೇತೆ ಬೇತೆ ವೇಷಭೂಷಣಲು, ವಿದ್ಯಾರ್ಥಿಲು ಮೆರವಣಿಗೆಗ್ ಸಾಥ್ ಕೊರಿಯೆರ್.
ಹಳೆವಿದ್ಯಾರ್ಥಿ ಶೇಖರ ಪೂಜಾರಿ ಮೆರವಣಿಗೆ ಉದಿಪನ ಮಲ್ತೆರ್. ಜಾನಪದ ವಸ್ತು ಸಂಗ್ರಹಾಲಯನ್ ಆನಂದ ಸಿ ಕುಂದರ್ ಉದಿಪನ ಮಲ್ತೆರ್, ಕಾರ್ಯಕ್ರಮಡ್ ಸಾಹಿತಿ ಪಾದೆಕಲ್ಲು ವಿಷ್ಣು ಭಟ್, ಪವನಜ. ದೇವಳದ ಆಡಳಿತ ಮಂಡಳಿದ ಗುರ್ಕಾರ್ಲು ಸನತ್ ಕುಮಾರ್ ಶೆಟ್ಟಿ, ದೇವಳದ ಪ್ರಧಾನ ಅರ್ಚಕೆರ್ ಲಕ್ಷೀನಾರಾಯಣ ಅಸ್ರಣ್ಣ, ಅನಂತಪದ್ಮನಾಭ ಅಸ್ರಣ್ಣ, ಹಳೆವಿದ್ಯಾರ್ಥಿ ಸಂಘದ ಗುರ್ಕಾರ್ಲು ಲೋಕಯ್ಯ ಸಾಲಿಯಾನ್, ಕಿರಣ್ ಕುಮಾರ್ ಶೆಟ್ಟಿ, ಗ್ರೆಗರಿನ್ ತಾವ್ರೋ, ಉಪಾಧ್ಯಕ್ಷೆರ್ ಭಾರತಿ, ಸುರೇಶ್, ಬಾಲಕೃಷ್ಣ ಇತ್ತೆರ್.
ಪದವಿ ಕಾಲೇಜ್ ದ ಪ್ರಾಂಶುಪಾಲೆರ್ ಕೃಪ್ಣ ಕಾಂಚನ್, ಪದವಿ ಪೂರ್ವ ಕಾಲೇಜ್ ದ ಪ್ರಾಂಶುಪಾಲೆರ್ ಕುಸುಮಾವತಿ, ಪ್ರಾಥಮಿಕ ಶಾಲೆದ ಮುಖ್ಯೋಪಾಧ್ಯಾಯಿನಿ ಸರೋಜಿನಿ, ಆಂಗ್ಲ ಮಾಧ್ಯಮ ಶಾಲೆದ ಮುಖ್ಯೋಪಾಧ್ಯಾಯೆರ್ ಚಂದ್ರಶೇಖರ ಭಟ್, ಪ್ರಧಾನ ಅರ್ಚಕೆರ್ ಹರಿನಾರಾಯಣ ದಾಸ ಅಸ್ರಣ್ಣ ಬಿನ್ನೆರೆನ್ ಎದ್ಕೊಂದು, ಡಾ.ಕೃಷ್ಣ ಸೊಲ್ಮೆ ಸಂದಾಯ ಮಲ್ತೆರ್. ಉಪಪ್ರಾಶುಂಪಾಲೆರ್ ರಾಜಶೇಖರ್ ಲೇಸ್ ದ ಸುದಾರಿಕೆ ಮಲ್ತೆರ್.
ಕುಡ್ಲ: ರಾಷ್ಟ್ರೀಯ ಹೆದ್ದಾರಿ ಕೇರಳಗ್ ಸಂಪರ್ಕ ಕೊರ್ಪುನ ತಲಪಾಡಿ ಟೋಲ್‌ಗೇಟ್ ಡ್ ಸಿಬ್ಬಂದಿ ಕಾರ್‌ನ್‌ ಅಡ್ಡಕಟ್ಟ್‌ದ್ ಬೋರ್ಚಾಂದಿನ ಶಬ್ದರ್ದ್‌ ನೆರ್ದ್ ಗೂಂಡಾಗಿರಿ ಮಲ್ತಿನ ಆರೋಪಗ್ ಸಂಬಂಧಿಸಾದ್ ಕಾರು ಡ್ರೈವರ್ ಪೊಲೀಸೆರೆಗ್ ದೂರು ಕೊರ್ತೆರ್.
ಟೋಲ್‌ ಗೇಟ್‌ಡ್ ಅಬ್ದುಲ್ ಕರೀಂ ಪನ್ಪುನಾರ್ ಕಾರ್‌ದ ಫಾಸ್ಟಾಗ್‌ರ್ದ್ ಕಾಸ್ ಕಟ್ಟ್‌ ಆತ್ಂಡ್. ಆಂಡಲ ಸಿಬ್ಬಂದಿ ಗೇಟ್ ದೆಪ್ಪಂದಿನ ಕಾರಣ ಕರೀಂ ಪ್ರಶ್ನೆ ಮಲ್ತ್‌ದೆರ್. ಈ ಬಗ್ಗೆ ಕರೀಂ ಟೋಲ್‌ಗೇಟ್ ಮ್ಯಾನೇಜರ್ ಬೊಕ್ಕ ಸಿಬ್ಬಂದಿನ ವಿರುದ್ಧ ಪೊಲೀಸ್ ಠಾಣೆಡ್ ದೂರು ಕೊರ್ದು ಕೇಸ್‌ ದಾಖಲಾತ್‌ಂಡ್.
