ತುಳು ಸುದ್ದಿ

ಕೇರಳ ಬೊಕ್ಕ ಮಹಾರಾಷ್ಟ್ರರ್ದ್ ಕರ್ನಾಟಕಗ್ ಬರ್ಪಿನ ಪ್ರಯಾಣಿಕೆರೆಗ್ ವಿಶೇಷ ಸರ್ವೇಕ್ಷಣಾ ಚಟುವಟಿಕೆ

ಕುಡ್ಲ, ಜುಲೈ 31:ಪ್ರಸ್ತುತ, ಕೈತಲ್ ದ ಕೇರಳ ಬೊಕ್ಕ ಮಹಾರಾಷ್ಟ್ರಡ್ ಕೋವಿಡ್ 19 ಕೈ ಮೀರ್ದ್ ಉಪ್ಪುನ ಪರಿಸ್ಥಿತಿದ ನೆಲೆಟ್ಟ್ , ಸದರಿ ರಾಜ್ಯರ್ದ್ ಕರ್ನಾಟಕಗ್ ಬರ್ಪಿನ ಪ್ರಯಾಣಿಕೆರ್ನ ಸಂಬಂಧ ಈ ಕೆಲವು ವಿಶೇಷ ಸರ್ವೇಕ್ಷಣಾ ಚಟುವಟಿಕೆಲೆನ್ ಕಡ್ಡಾಯವಾದ್ ದೆತೊನೆರೆ ಸೂಚನೆ ಕೊರ್ತೆರ್ .

ಕೇರಳ ಬೊಕ್ಕ ಮಹಾರಾಷ್ಟ್ರರ್ದ್ ಬರ್ಪಿನಕುಲು, ಕೋವಿಡ್ 19 ಲಸಿಕೆದ ರಡ್ಡ್ ಡೋಸ್
ಪಡೆದಿತ್ತುಂಡಲ / ಪಡೆದ್ ಇಜ್ಜಿನ್ದಲ 72 ಗಂಟೆದುಲಯಿ ಮಲ್ದಿನ ಆರ್ಟಿ ಪಿ ಸಿ ಆರ್ ಪರೀಕ್ಷೆದ ನೆಗೆಟವ್ ವರದಿನ್ ಪಡೆದ್ ಉಪ್ಪೊಡು .ವಿಮಾನ, ರೈಲು, ರಸ್ತೆ ( ಬಸ್ ಬೊಕ್ಕ ಬೇತೆ ಸ್ವಂತ ಗಾಡಿ ದ ಮುಖೇನ ಮಾರ್ಗ ಕರ್ನಾಟಕಗ್ ಬರ್ಪಿನ ಪ್ರಯಾಣಿಕೆರೆಗ್ ನಿಯಮದ ಪಾಲನೆ ಕಡ್ಡಾಯ ಆದುಂಡು . ಅಂಚನೇ ಕೇರಳ ಬೊಕ್ಕ ಮಹಾರಾಷ್ಟ್ರರ್ದ್ ಬರ್ಪಿನ ಮಾತಾ ವಿಮಾನಗ್ ಲ ಅನ್ವಯವಾದುಂಡು .

ನೆತ್ತ ಪ್ರಕಾರ 72 ಗಂಟೆ ದ ಉಲಯಿ ಮಲ್ಪಾಯಿನ , ಆರ್ ಟಿ – ಪಿಸಿಆರ್ ನೆಗೆಟಿವ್ ಟೆಸ್ಟ್ ವರದಿನ್ ಪಡೆಯಿನ ಪ್ರಯಾಣಿಕಕೆರೆಗ್ ಮಾತ್ರ ಸಂಬಂಧಪಟ್ಟಿನ ವಿಮಾನಯಾನ ಸಂಸ್ಥೆದಕುಲು
ಬೋರ್ಡಿಂಗ್ ಪಾಸ್ ಕೊರೊಡು .
ರೈಲ್ ಡ್ ಪ್ರಯಾಣ ಮಲ್ಪುನ ಮಾತಾ ಪ್ರಯಾಣಿಕೆರ್ ಆರ್ ಟಿ – ಪಿಸಿಆರ್ ನೆಗೆಟಿವ್ ಟೆಸ್ಟ್ ವರದಿನ್ ಪಡೆಯುನೇನ್ ಖಚಿತ ಮಲ್ತೊನೊಡು ಪಂದ್ ಪ್ರಕಟಣೆಗ್ ಪಂತೆರ್.

ತಲಪಾಡಿ ಗಡಿ ಭಾಗ ಪರಿಶೀಲನೆ ಮಲ್ತಿನ ದಕ ಜಿಲ್ಲಾಧಿಕಾರಿ

ಕುಡ್ಲ, ಜುಲೈ 31: ಕಾಸರಗೋಡು ಜಿಲ್ಲೆಡ್ ಕೋವಿಡ್-19 ಸೋಂಕು ಪ್ರಮಾಣ ಜಾಸ್ತಿ ಆವೊಂದು ಉಪ್ಪುನ ನೆಲೆಟ್ಟ್ ಅಂಚನೇ ದ.ಕ.ಜಿಲ್ಲೆಡ್ ಲಾ ಪಾಸಿಟಿವಿಟಿ ದರ ಜಾಸ್ತಿ ಆವೊಂದು ಉಪ್ಪುನ ನೆಲೆಟ್ಟ್ ದ.ಕ.ಜಿಲ್ಲಾಧಿಕಾರಿ ಡಾ. ರಾಜೇಂದ್ರ ಕೆ.ವಿ. ಬೊಕ್ಕ ಕುಡ್ಲ ನಗರ ಪೊಲೀಸ್ ಆಯುಕ್ತ ಶಶಿಕುಮಾರ್ ದ.ಕ.-ಕಾಸರಗೋಡು ಜಿಲ್ಲೆದ ಗಡಿ ಭಾಗವಾಯಿನ ತಲಪಾಡಿ ಚೆಕ್‌ಪೋಸ್ಟ್‌ಗ್ ಶುಕ್ರವಾರ ಭೇಟಿ ಕೊರ್ದು ಕೋವಿಡ್ ತಪಾಸಣೆ ಬಗ್ಗೆ ಪರಿಶೀಲನೆ ಮಲ್ತೆರ್ . ಆತೆ ಅತ್ತoದೆ ದೇವಿಪುರ ಗಡಿಭಾಗಗ್ ಪೋದು ವಸ್ತುಸ್ಥಿತಿ ಅವಲೋಕನೆ ಮಲ್ತೆರ್ .

ಎನ್ಎಂಸಿ ನಿಬಂಧನೆದ ತಿದ್ದುಪಡಿಕ್ ಐಎಂಐ ಆಗ್ರಹ

ಕುಡ್ಲ, ಜುಲೈ 31: ಆಧುನಿಕ ವೈದ್ಯ ಕ್ಷೇತ್ರಗ್ ಮಾರಕವಾಯಿನ ಅಂಚನೇ ಅರ್ಧ ಕಲ್ತಿನ ವೈದ್ಯೆರೆನ್ ಸೇವೆಗ್ ಲೆತೊಂದು ಬರ್ಪಿನ ಮುಖೇನ ಜನರ ಜೀವದ ಒಟ್ಟುಗು ಗೊಬ್ಬರೇ ಕಾರಣವಾಯಿನ ರಾಷ್ಟ್ರೀಯ ವೈದ್ಯಕೀಯ ಆಯೋಗದ ಮಸೂದೆಯ ನಿಯಮ ಬೊಕ್ಕ ನಿಬಂಧನೆಡ್ ಸೂಕ್ತ ತಿದ್ದುಪಡಿ ಮಲ್ಪೊಡು ಪಂದ್ ಐಎಂಎ ರಾಜ್ಯ ಘಟಕದ ಗುರ್ಕಾರ್ಲಾಯಿನ ಡಾ.ವೆಂಕಟಾಚಲಪತಿ ಆಗ್ರಹ ಮಲ್ತೆರ್ .

ಪತ್ರಿಕಾಗೋಷ್ಠಿಡ್ ಪಾತೆರಿನ ಮೇರ್, ಕಾಯ್ದೆಯ ಸೆಕ್ಷನ್ 32, 50 ಬೊಕ್ಕ 51ನ್ ದೆತ್ದ್ ಪಾಡೊಡು ಪಂದ್ ಪಂಡೆರ್.ದೇಶಡ್ 10 ಲಕ್ಷರ್ದ್ ಜಾಸ್ತಿ ಅನರ್ಹ ವೈದ್ಯೆರ್ ಉಲ್ಲೆರ್ . ಪದವಿ ಪಡೆಯಿನ ವೈದ್ಯೆರೆನ್ ನಿಯಂತ್ರಣ ಮಲ್ಪರೆ ಅವ್ವೆತೋ ಕಾನೂನು ಇತ್ತುಂಡಲ , ನಕಲಿ ವೈದ್ಯೇರ್ನ ಹಾವಳಿ ತಡೆಕ್ ಒವ್ವೆ ಕಾಯ್ದೆ ಇಜ್ಜಿ . ಉಪ್ಪುನ ಕಾಯ್ದೆಲು ಪರಿಣಾಮಕಾರಿಯಾತುಜಿ . ಆಯಿನಾತ್ ಬೇಗ ಸರ್ಕಾರ ಪರಿಣಾಮಕಾರಿ ಕಾಯ್ದೆ ಜಾರಿಗ್ ಕ್ರಮ ದೆತೊನೊಡು ಪಂದ್ ಪಂಡೆರ್.

ಜುಲೈ ಡ್ ದಾಖಲೆದ 113 ರ್ದ್ ಜಾಸ್ತಿ ಕರೆ ಸ್ವೀಕಾರ ಮಲ್ತಿನ ಚೈಲ್ಡ್ ಹೆಲ್ಪ್ ಲೈನ್

ಕುಡ್ಲ, ಜುಲೈ 31: ಕೇಂದ್ರ ಸರಕಾರದ ಮಹಿಳಾ ಬೊಕ್ಕ ಮಕ್ಕಳ ಅಭಿವೃದ್ಧಿ ಇಲಾಖೆದ ಯೋಜನೆದಡಿಟ್ ದಿನತ 24 ಗಂಟೆ ಜೋಕ್ಲೆಗ್ ತುರ್ತು ಸೇವೆನ್ ಕೊರೊಂದು ಉಪ್ಪುನ ಚೈಲ್ಡ್‌ ಲೈನ್‌-1098 ದ.ಕ.ಜಿಲ್ಲಾ ಕಚೇರಿಗ್ 80ದಾತ್ ಬರೊಂದು ಉಪ್ಪುನ ಪ್ರಕರಣಲು ಜುಲೈ ತಿಂಗೊಲ್ ಡು ಈ ಮುಟ 113ಕ್ ಏರ್ದುಂಡು . ಜು. 31ಕ್ಕ್ ಈ ಸಂಖ್ಯೆ ನನಲ ಜಾಸ್ತಿ ಆಯೆರೆ ಉಂಡು.

ಈ ದುಂಬು 2019ಟ್ಟ್ ಜಾಸ್ತಿ ಪಂಡ 102 ಕರೆ ಬೈದುಂಡು ಇತ್ತೆ , 2 ವರ್ಷದ ಅಂತರರ್ದ್ ಬೊಕ್ಕ ಜುಲೈ ತಿಂಗೊಲ್ಡು ಅತ್ಯಧಿಕ ಕರೆ (113) ಬೈದುಂಡು .

ಉಚಿತ ನೇತ್ರ ತಪಾಸಣಾ ಶಿಬಿರ ಪಂಡ ಕತ್ತಲೆರ್ದ್ ಬೊಲ್ಪುಗು ಪೋಪಿನ ಲೇಸ್ : ಗೀತಾಂಜಲಿ ಸುವರ್ಣ

ಪಡುಬಿದ್ರಿ : ಉಚಿತ ನೇತ್ರ ತಪಾಸಣಾ ಶಿಬಿರ ಪಂಡ ಕತ್ತಲೆರ್ದ್ ಬೊಲ್ಪುಗು ಪೋಪಿನ ಲೇಸ್ ಇಂಚಿನ ಜನಪರ ಲೇಸ್ ದ ಪ್ರಯೋಜನನ್ ಸಾರ್ವಜನಿಕೆರ್ ಪಡೆಯೋಡು . ಆ ಮುಖೇನ ಬದುಕು ಡ್ ಪಟ್ಟಿನ ಕತ್ತಲೆರ್ದ್ ದೂರ ಆವೊಡು ಪಂದ್ ಬಿಜೆಪಿ ರಾಜ್ಯ ಕಾರ್ಯಕಾರಿಣಿ ಸದಸ್ಯೆ ಗೀತಾಂಜಲಿ ಸುವರ್ಣ ಪಂಡೆರ್ . ಮೇರ್ ಪಡುಬಿದ್ರಿದ ಸುಸ್ಲಾನ್ ಆರ್ ಎಂಡ್ ಆರ್ ಕಾಲೊನಿಡ್ ಕರ್ನಾಟಕ ಸಾಮಾಜಿಕ ಸಾಂಸ್ಕತಿಕ ಅಭಿವೃದ್ಧಿ ಪ್ರತಿಷ್ಠಾನ ಪ್ರಸಾದ್ ನೇತ್ರಾಲಯ ಒಟ್ಟು ಸೇರ್ದ್ ಅಟ್ಟನೆ ಮಲ್ತಿನ ಉಚಿತ ನೇತ್ರ ತಪಾಸಣಾ ಚಿಕಿತ್ಸಾ ಶಿಬಿರನ್ ಉದಿಪನ ಮಲ್ತ್ ಪಾತೆರಿಯೆರ್.