ಬೊಲ್ತೆರ್ ಸುದ್ದಿ | Belthangady News

ನೆರಿಯಡ್ ಕಾರ್‌ದ ಮಿತ್ತ್ ಆನೆ ದಾಳಿ : ಕೆಲವೆರೆಗ್ ಗಾಯ, ಕಾರ್ ಜಖಂ‌

ಬೋಲ್ತೆರ್: ತಾಲೂಕುದ ನೆರಿಯ ಪೋಸ್ಟ್ ಆಫೀಸ್ ಕೈತಲ್‌ಡ್ ಕಾರ್‌ದ ಮಿತ್ತ್ ಕಾಡಾನೆ ದಾಳಿ ಮಲ್ತಿನ ನಡಕೆ ನಡತ್‌ಂಡ್.‌ ಆಜಿ ಜನ ಇತ್ತಿನ ಆಲ್ಟೋ ಕಾರ್‌ದ ಮಿತ್ತ್ ಕಾಡಾನೆ ದಾಳಿ ಮಲ್ತ್‌ದ್, ಕೆಲವೆರೆಗ್ ಗಾಯ ಆದ್ ಕಾರ್‌ ಪೂರ್ತಿ ಜಖಂ ಆತ್‌ಂಡ್‌ ಪಂದ್‌ ತೆರಿದ್‌ ಬೈದ್‌ಂಡ್.

ಪೆಟ್ಟ್ ಆಯಿನಕ್ಲೆನ್ ಕೂಡ್ಲೆ ಸ್ಥಳೀಯ ಆಸ್ಪತ್ರೆಗ್ ಚಿಕಿತ್ಸೆಗ್‌ ಪಂದ್‌ ಲೆತೊಂದು ಪೋತೆರ್.

ಟೀಮ್ ದೇವರಗುಡ್ಡೆ ವತಿರ್ದ್ ಜೋಕ್ಲೆನ ದಿನಾಚರಣೆ, ಅಂಗನವಾಡಿಗ್ ಚೇರ್ ವಿತರಣೆ

ಕಲ್ಮಂಜ: ಕಲ್ಮಂಜ ಗ್ರಾಮದ ಪಜಿರಡ್ಕ- ಮದ್ಮಲ್ ಕಟ್ಟೆ ಅಂಗನವಾಡಿ ಕೇಂದ್ರಗ್ ಮಕ್ಕಳ ದಿನಾಚರಣೆ ಪ್ರಯುಕ್ತ ಟೀಮ್ ದೇವರಗುಡ್ಡೆ ವತಿರ್ದ್ ನ.25 ಶನಿವಾರ ಚೇರ್ ವಿತರಣೆ ಮಲ್ತೆರ್. 15-20 ಜೋಕುಲು ಇಪ್ಪುನ ಅಂಗನವಾಡಿ ಕೇಂದ್ರಡ್ ಮಸ್ತ್ ಮೂಲ ಸೌಕರ್ಯ ಇಜ್ಜಾಂದೆ, ಬೊಕ್ಕ ಬರ್ಸದ ಕಾಲಡ್ ನೀರ್ ಸೇರೊಂದು ಇಪ್ಪುಂಡು. ಸ್ಥಿತಿ ಈ ಅಂಚನೆ ಅಂಗನವಾಡಿ ಕೇಂದ್ರಗ್ ಪೊಸ ಕಟ್ವಾನದ ಬೇಡಿಕೆ ಮಸ್ತ್ ವರ್ಷರ್ದ್ ಕೇಂದ್ ಬರೊಂದು ಉಂಡು.

ನೆಕ್ಕ್ ಮಾತೆರ್ಲ ಸಹಕಾರ ಕೊರೊಡು ಪಂದ್ ಪಂಡೆರ್. ಕಾರ್ಯಕ್ರಮಡ್ ಬಾಲವಿಕಾಸ ಸಮಿತಿದ ಗುರ್ಕಾರ್ಲು ರೇಖಾ, ಆಶಾ ಕಾರ್ಯಕರ್ತೆ ವಿಜಯಾ, ಅಂಗನವಾಡಿ ಕಾರ್ಯಕರ್ತೆ ಜಯಶ್ರೀ, ಸಹಾಯಕಿ ಶ್ರೀದೇವಿ, ಟೀಮ್ ದೇವರಗುಡ್ಡೆದ ಹರೀಶ್ ಗೌಡ, ಸಚಿನ್ ಗೌಡ ಕಲ್ಮಂಜ, ಶಿವಪ್ರಸಾದ್, ಸಂಧ್ಯಾ, ಪುಷ್ಪಾವತಿ ಬೊಕ್ಕ ಪೋಷಕೆರ್ ಇತ್ತೆರ್.

ದೋಸ್ತಿನ ಬುಡೆದಿನ ಮೊಬೈಲ್‌ ಕಂಡ್‌ದ್‌ ದುಡ್ಡು ಟ್ರಾನ್ಸ್‌ಫರ್ !!

ಬೋಲ್ತೆರ್: ಪೊಂಜೊವ್‌ ಒರ್ತಿನ ಮೊಬೈಲ್‌ ಕಂಡ್‌ದ್ ಅವೆರ್ದ್‌ ಕಾಸ್‌ ಟ್ರಾನ್ಸ್‌ಪರ್‌ ಮಲ್ತೊಂದು ಮೋಸ ಮಲ್ತಿನ ಘಟನೆ ಬೋಲ್ತೆರ್‌ಡ್‌ ನಡತ್‌ಂಡ್. ಅಭಿದಾ ಬಾನು, ಬೋಲ್ತೆರ್‌ದ ಕುವೆಟ್ಟು ನಿವಾಸಿ ದೂರು ಕೊರ್ತೆರ್. ಸಿದ್ದಿಕ್‌ ಬೊಕ್ಕ ಬೇತೆಕ್ಲೆನ ಮಿತ್ತ್‌ ಕೇಸ್‌ ದಾಖಲಾತ್‌ಂಡ್. ಈ ಘಟನೆ ನ.9 ದಾನಿ ನಡತ್‌ಂಡ್. 

ಪೊಂಜೊವ್‌ ಇಲ್ಲಲ್‌ ಇಜ್ಜಂದಿನ ಟೈಮ್‌ ತೂದು ಪರಿಚಯದ ಸಿದ್ದಿಕ್‌ ಪೊಂಜೊವ್‌ನ ಇಲ್ಲಲ್‌ ಮೊಬೈಲ್‌ ಕಂಡ್‌ದ್ ಫೋನ್‌ ಪೇ ಮುಖಾತರ ಅಕೌಂಟ್‌ರ್ದ್ 64 ಸಾವಿರ ಕಾಸ್‌ದ ಪೈಕಿ 34 ಸಾವಿರ ಜಾಫರ್‌ಗ್, 25 ಸಾವಿರ ಮಹಮ್ಮದ್‌ಗ್‌ ಬೊಕ್ಕ 🤔2000 ರೂ. ಸಿರಾಜ್‌ಗ್ ವರ್ಗಾವಣೆ ಮಲ್ತ್‌ದೆ. ಮೊಕುಲು ಮಾತ ಕಂಡನಿನ ಫ್ರೆಂಡ್ಸ್‌ ಆದ್‌ ಕಾಸ್‌ ವಾಪಸ್‌ ಕೊರುವೆರ್‌ ಪಂದ್‌ ಇಡೆ ಮುಟ್ಟ ಕಾತ್‌ದೆರ್.‌ ಆಂಡ ಕಾಸ್‌ ಕೊರಂದಿನ ಕಾರಣ ಬೋಲ್ತೆರ್‌ ಸ್ಟೇಷನ್‌ಗ್‌ ಕೇಸ್‌ನ್‌ ಕೊರ್ತೆರ್.‌ ನೆತ್ತ ಪ್ರಕಾರ ಕೇಸ್‌ ದಾಖಲ್‌ ಮಲ್ತೊಂದು ತನಿಖೆ ಮಲ್ತೊಂದು ಉಲ್ಲೆರ್.

ಬೋಲ್ತೆರ್: ಬೈಕ್ ಡಿವೈಡರ್‌ಗ್ ಗುದ್ದುದು ತೀರ್‌ಪೋಯಿನ ಕಲ್ಪಾರ್ಥಿ

ಬೋಲ್ತೆರ್ : ಬೈಕ್ ಕೈ ತತ್ತ್‌ದ್ ಡಿವೈಡರ್‌ಗ್ ಗುದ್ದುದು ಕಲ್ಪಾರ್ಥಿ ಒರಿ ಮಸ್ತ್ ಪೆಟ್ಟಾದ್ ತೀರ್‌ಪೋಯಿನ ಘಟನೆ ಬೋಲ್ತೆರ್‌ದ ಉಜಿರೆ ಖಾಸಗಿ ಕಾಲೇಜ್‌ ರೋಡ್‌ಡ್‌ ನಡತ್‌ಂಡ್.‌ ಉಜಿರೆದ ಖಾಸಗಿ ಕಾಲೇಜ್‌ದ ಡಿಪ್ಲೊಮಾ ಕಲ್ಪಾರ್ಥಿ, ಕಲ್ಮಂಜ ಗ್ರಾಮದ ಬಟ್ಟಾಜೆ ನಿವಾಸಿ ದೀಕ್ಷಿತ್ (20) ತೀರ್‌ಪೋಯಿನ ಕಲ್ಪಾರ್ಥಿ.

ಕಾಲೇಜ್‌ಡ್‌ ಕಾರ್ಯಕ್ರಮ ಇತ್ತಿನ ಕಾರಣ ಮದ್ಯಾಹ್ನ ವನಸ್‌ ಆದ್‌ ಪೋನಗ ಈ ಘಟನೆ ನಡತ್‌ಂಡ್.‌ ಅಪಗನೆ ಕೈತಲ್‌ದ ಆಸ್ಪತ್ರೆಗ್‌ ದಾಖಲ್‌ ಮಲ್ತೆರ್.‌ ಆಂಡ ಎಚ್ಚದ ಮರ್ದ್‌ಗಾದ್‌ ಕುಡ್ಲದ ಆಸ್ಪತ್ರೆಗ್‌ ದಾಖಲ್‌ ಮಲ್ತ್‌ ಇತ್ತೆರ್.‌ ತೆರಕ್ಕ್‌ ಜಾಸ್ತಿ ಪೆಟ್ಟ್‌ ಆಯಿನ ಕಾರಣ ಚಿಕಿತ್ಸೆ ಫಲಕಾರಿ ಆವಂದೆ ತೀರ್‌ಪೋತೆರ್.‌ ನೆತ್ತ ಬಗೆಟ್‌ ಬೋಲ್ತೆರ್‌ ಪೊಲೀಸ್‌ ಸ್ಟೇಷನ್‌ಡ್‌ ಕೇಸ್‌ ದಾಖಲಾತ್‌ಂಡ್.

ಬೋಲ್ತೆರ್:‌ ಇಲ್ಲದ ಶೆಡ್ಡ್‌ಡ್‌ ಉತಾಂದ್ ಇತ್ತಿನ ಇನೋವಾ ಕಾರ್‌ನ್‌ ಕಂಡಿನ ಕಲ್ವೆರ್…!!‌

ಬೋಲ್ತೆರ್ : ಇಲ್ಲದ ಶೆಡ್ಡ್‌ಡ್‌ ಉಂತಾದ್‌ ಇತ್ತಿನ ಇನ್ನೋವಾ ಕಾರ್‌ ಕಾಣೆ ಆಯಿನ ಘಟನೆ ಬೋಲ್ತೆರ್ ತಾಲೂಕುದ ಚಾರ್ಮಾಡಿ ಗ್ರಾಮದ ಕಕ್ಕಿಂಜೆದಲ್ಪ ನಡತ್‌ಂಡ್. ಈ ಬಗ್ಗೆ ಧರ್ಮಸ್ಥಳ ಪೊಲೀಸ್ ಠಾಣೆಡ್‌ ಕೇಸ್‌ ದಾಖಲಾತ್‌ಂಡ್. ಉಳ್ಳಾಲ ನಿವಾಸಿ ಇಸಾಕ್ ಪನ್ಪುನಾರ್ನ ಕಾರ್‌ನ್‌ ಅರೆನ ಸಂಬಂಧಿ ನೌಫಲ್ ಪನ್ಪುನಾರ್ ರಾತ್ರೆ ಕಕ್ಕಿಂಜೆ ಇಲ್ಲದ ಶೆಡ್ಡ್‌ಡ್‌ ಉಂತಾದ್‌ ಇತ್ತೆರ್.‌

ಕಾಂಡೆ ತೂನಗ ಕಾರ್‌ ಕಂಡಿನ ಬಗೆಟ್‌ ತೆರಿದ್‌ ಬೈದ್‌ಂಡ್. ಕಾರ್‌ದ ಬಿಲೆ 2.25 ಲಕ್ಷ ರೂಪಾಯಿ ಎಂದು ಅಂದಾಜ್‌ ಮಲ್ತ್‌ದೆರ್, ಕೈತಲ್‌ ಮಾತ ಕಾರ್‌ ನಾಡ್‌ಡಂಲ ಕಾರ್‌ ಪತ್ತೆ ಆವಂದಿನ ಕಾರಣ ಈ ಬಗ್ಗೆ ಧರ್ಮಸ್ಥಳ ಪೊಲೀಸ್ ಠಾಣೆಡ್‌ ಕೇಸ್‌ ದಾಖಲಾತ್‌ಂಡ್.

ವೇಣೂರು ಮಹಾಮಸ್ತಕಾಭಿಷೇಕ ಉಚ್ಚಯೊಗು ಮುಖ್ಯಮಂತ್ರಿ ಸಿದ್ದರಾಮಯ್ಯೆರೆಗ್‌ ಲೆಪ್ಪೋಲೆ

ಬೋಲ್ತೆರ್: ನನದ ಫೆಬ್ರವರಿ ತಿಂಗೊಲುಡು ವೇಣೂರುಡ್ ನಡಪೆರೆ ಇಪ್ಪುನ ಭಗವಾನ್ ಬಾಹುಬಲಿ ಸ್ವಾಮಿನ ಮಹಾಮಸ್ತಕಾಭೀಷೇಕ ಮಹೋತ್ಸವಗ್ ಮುಖ್ಯಮಂತ್ರಿ ಸಿದ್ದರಾಮಯ್ಯ ಮೇರೆಗೆ ಅರ್ವ ಅರಮನೆತ ತಿಮ್ಮಣ್ಣರಸೆರ್ ಡಾ| ಪದ್ಮಪ್ರಸಾದ್ ಅಜಿಲೆರ್ ಲೆಪ್ಪೋಲೆನ್‌ ಕೊರಿಯೆರ್.

ಈ ಪೊರ್ತುಡು ಮಾಜಿ ಸಚಿವೆರ್ ಅಭಯಚಂದ್ರ ಜೈನ್, ವೇಣೂರು ತೀರ್ಥ ಕ್ಷೇತ್ರ ಸಮಿತಿದ ಪ್ರಧಾನ ಕಾರ್ಯದರ್ಶಿ ಪ್ರವೀಣ್ ಕುಮಾರ್ ಇಂದ್ರ ಇತ್ತೆರ್.

ನ.19: ಬೋಲ್ತೆರ್‌ಡ್ ದೇಸಿ ನಾಯಿ ಬೊಕ್ಕ ಪುಚ್ಚೆದ ಕಿನ್ನಿನ್‌ ದತ್ತು ಕೊರ್ಪುನ ಶಿಬಿರ

ಬೋಲ್ತೆರ್: ತಾಲೂಕುದ ಪ್ರಾಣಿ ಪ್ರಿಯರೆಗ್ ಸುವರ್ಣವಕಾಶ, ಎಮಿನಲ್ ಕೇರ್ ಟ್ರಸ್ಟ್ ಶಕ್ತಿನಗರ ಕುಡ್ಲ ರೋಟರಿ ಕ್ಲಬ್‌ ಬೋಲ್ತೆರ್‌ ಬೊಕ್ಕ ಪಟ್ಟಣ ಪಂಚಾಯತ್ ಬೋಲ್ತೆರ್‌ ನೆತ್ತ ಒಟ್ಟು ಸೇರಿಗೆಡ್ ದೇಸಿ ನಾಯಿ ಬೊಕ್ಕ ಪುಚ್ಚೆದ ಕಿನ್ನಿಲೆನ  ದತ್ತು ಕೊರ್ಪುನ ಶಿಬಿರ ನ.19 ದಾನಿ ಕಾಂಡೆ 10 ಗಂಟೆರ್ದ್ ಸಂಜೆ 5 ಗಂಟೆ ಮುಟ್ಟ ಬೋಲ್ತೆರ್ ಬಸ್ ಸ್ಟಾಂಡ್‌ದಲ್ಪ ನಡಪೆರೆ ಉಂಡು.

ದತ್ತುಕೊರ್ಪುನ ನಿಯಮ: ನಿಕ್ಲೆನ ಎಡ್ರಸ್‌ದ ಜೆರಾಜ್ಸ್‌ ಕಡ್ಡಾಯವಾದ್‌ ಕನವೊಡು. ನಿಕುಲು ನಾಯಿ ಪುಚ್ಚೆಗ್ ಸಂತಾನ ಆವಂದಿನಂಚ ಚಿಕಿತ್ಸೆ ಮಲ್ಪೊಡು, ತಿಂಗೊಲುಗು ಒರ ನಾಯಿ / ಪುಚ್ಚೆದ ಬಗ್ಗೆ ವರದಿ ಕೊರೊಡು.

ನ.19: ಉಜಿರೆ ಎಸ್.ಡಿ.ಎಂ ಮಲ್ಟಿ-ಸ್ಪೆಷಾಲಿಟಿ ಆಸ್ಪತ್ರೆಡ್‌ ಜೋಕ್ಲೆನ ರೋಗ ತಪಾಸಣಾ ಶಿಬಿರ

ಉಜಿರೆ ಶ್ರೀ ಧರ್ಮಸ್ಥಳ ಮಂಜುನಾಥೇಶ್ವರ ಮಲ್ಟಿ-ಸ್ಪೆಷಾಲಿಟಿ ಆಸ್ಪತ್ರೆಡ್ ಹೆಗ್ಗಡೆರೆನ ಬೊಕ್ಕ ಮಾತೃಶ್ರೀ ಅಮ್ಮನ ನಿರ್ದೇಶನದಂಚ ನ.19 ದಾನಿ ಐತಾರ ಕಾಂಡೆ 10.00 ರ್ದ್ ಮಧ್ಯಾಹ್ನ 1 ಗಂಟೆ ಮುಟ್ಟ ಜೋಕ್ಲೆನ ರೋಗ ತಪಾಸಣಾ ಶಿಬಿರ ನಡಪೆರೆ ಉಂಡು. ಈ ಶಿಬಿರಡ್ 14 ವರ್ಷದ ಉಲಾಯಿದ ಮಾತ ಜೋಕುಲೆಗ್ ರೋಗ ತಪಾಸಣೆ ಉಚಿತವಾದ್ ತಿಕ್ಕೆರೆ ಉಂಡು.

ಅಸ್ತಮ, ಉಬ್ಬಸ ಅತಿಸಾರ (ಅತಿಭೇದಿ), ಮಲಬದ್ಧತೆ, ಜ್ವರ, ಅಲರ್ಜಿ, ರ್‍ಯಾಶಸ್ (ದದ್ದುಗಳು), ಚರ್ಮದ ಸೋಂಕು, ಕೆಮ್ಮು, ಕಫ, ಹೊಟ್ಟೆ ನೋವು, ಕೂಲಿಬೇನೆ, ಮೂಂಕು ಕಟ್ಟುನ, ವಾಕರಿಕೆ ಬೊಕ್ಕ ಕಕ್ಕುನ, ಪೌಷ್ಟಿಕಾಂಶದ ಕೊರತೆ, ಮೂರ್ಛೆರೋಗ, ಜೋಕ್ಲೆನ ಬೆಳವಣಿಗೆದ ಮೌಲ್ಯಮಾಪನ, ಜಾಂಡೀಸ್, ಸಾಮಾನ್ಯ ಪರೀಕ್ಷೆಲೆನ್‌ ಈ ಪೊರ್ತುಡು ಮಲ್ಪುವೆರ್.

ದಡ್ಡು ಬಾಲಕೃಷ್ಣ ಭಟ್ಟೆರೆಗ್ ನುಡಿನಮನ

ಬೋಲ್ತೆರ್: ಕರಿಮಣೇಲು ಶ್ರೀ ಕ್ಷೇತ್ರ ದೇಲಂಪುರಿ ಶ್ರೀ ಮಹಾದೇವ ಮಹಾಗಣಪತಿ ಸಭಾ ಮಂಟಪಡ್ ದುಡ್ಡು ಬಾಲಕೃಷ್ಣ ಭಟ್ಟೆರೆನ ನುಡಿನಮನ ಕಾರ್ಯಕ್ರಮ ನ.19 ದಾನಿ ಐತಾರ 4 ಗಂಟೆಗ್ ನಡಪೆರೆ ಉಂಡು.

ಮಾತೆರ್ಲ ಬತ್ತ್ ದ್ ಶ್ರೀ ಕ್ಷೇತ್ರ ದೇಲಂಪುರಿದ ಜೀರ್ಣೋದ್ಧಾರದ ರೂವಾರಿಗ್ ನುಡಿನಮನ ಸಲ್ಲಿಸಾವೊಡು ಪಂದ್ ಲೆಪ್ಪೋಲೆಡ್ ತೆರಿಪಾದೆರ್.

ನಾಳ: ಹಿರಿಯಕ್ಲೆನ ಸೇವಾ ಪ್ರತಿಷ್ಠಾನದ ಸಭೆ

ಅಖಿಲ ಕರ್ನಾಟಕ ಹಿರಿಯಕ್ಲೆನ ಸೇವಾ ಪ್ರತಿಷ್ಠಾಮೆಲ್ಕಾರ್ ಬಂಟ್ವಾಳ ನೆತ್ತ ಕೇಂದ್ರ ಸಮಿತಿದ ಸಭೆ ನಾಳ ಶ್ರೀ ದುರ್ಗಾಪರಮೇಶ್ವರಿ ದೇವಸ್ಥಾನದ ವಠಾರಡ್ ನಡತ್ಂಡ್.

ವ್ಯವಸ್ಥಾಪನ ಸಮಿತಿದ ಸದಸ್ಯೆ ಅಂಬಾ ಆಳ್ವ ತುಡರ್ ಅರ್ಲಾದ್ ಉದಿಪನ ಮಲ್ತೆರ್.

ಲೇಸ್ ದ ಗುರ್ಕಾರ್ಮೆನ್ ವಹಿಸಾದ್ ಪ್ರತಿಷ್ಠಾನದ ಗುರ್ಕಾರ್ಲು ಕಯ್ಯಾರು ನಾರಾಯಣ ಭಟ್ ಪಾತೆರ್ದ್ ಪ್ರತಿಷ್ಠಾನದ ಸೇವಾ ಕಾರ್ಯಲು ನಿಸ್ವಾರ್ಥರ್ದ್ ಸದಸ್ಯೆರ್ನ ಬದ್ಧತೆರ್ದ್ ಎಡ್ಡೆ ಕಾರ್ಯಲು ನಡಪಡ್ ಪಂದ್, ಶ್ರೀ ಕ್ಷೇತ್ರ ಸೌತಡ್ಕಡ್ ಡಿ.17 ದಾನಿ ಪ್ರತಿಷ್ಠಾನದ ಮೂಜನೇ ವಾರ್ಷಿಕೋತ್ಸವ ನಡಪೆರೆ ಉಂಡು ಪಂದ್ ತೆರಿಪಾಯೆರ್.

ಪ್ರತಿಷ್ಠಾನದ ಬೋಲ್ತೆರ್ ಘಟಕದ ಸಂಚಾಲಕೆರ್ ವಸಂತ ಸುವರ್ಣ ಉದಯಶಂಕರ ರೈ ಪುಣಚ ಉತ್ತರ ಭಾರತದ ತೀರ್ಥಕ್ಷೇತ್ರದ ಯಾತ್ರೆದ ಅನುಭವನ್ ಪಟ್ಟೊಂಡೆರ್.

ಯಕ್ಷಗಾನ ಕಲಾವಿದ ಕೊಳ್ತಿಗೆ ನಾರಾಯಣಗೌಡ, ಪ್ರತಿಷ್ಠಾನದ ಉಪಾಧ್ಯಕ್ಷ ಜಯರಾಮ ಭಂಡಾರಿ ಧರ್ಮಸ್ಥಳ, ಪ್ರತಿಷ್ಠಾನದ ಪದಾಧಿಕಾರಿಲಾಯಿನ ಅನಾರು ಕೃಷ್ಣಶರ್ಮ, ಭವಾನಿ ಶಂಕರ ಶೆಟ್ಟಿ ಪುತ್ತೂರು, ಮನಮೋಹನ ರಾವ್ ಬಿ.ಸಿ ರೋಡು, ಚಂದ್ರಶೇಖರ ಆಳ್ವ ಪಡುಮಲೆ , ಸೀತಾರಾಮ ಶೆಟ್ಟಿ ಉಜಿರೆ,ಸಂಜೀವ ಪಾರೆಂಕಿ, ರಾಘವ .ಎಚ್ ಗೇರುಕಟ್ಟೆ , ಗಣೇಶ ಭಟ್ ಕುತ್ರೊಟ್ಟು, ದೇವಳದ ಕಚೇರಿ ವ್ಯವಸ್ಥಾಪಕೆರ್ ಗಿರೀಶ್ ಶೆಟ್ಟಿ ನಾಳ ಈ ಪೊರ್ತುಡು ಇತ್ತೆರ್.

ದ.ಕ ಜಿಲ್ಲಾ ಗಮಕ ಕಲಾಪರಿಷತ್ತ್ ದ ಗುರ್ಕಾರ್ಲು ಮಧೂರು ಮೋಹನ ಕಲ್ಲೂರಾಯ ಕಾರ್ಯಕ್ರಮಗ್ ಸಹಕಾರ ಕೊರಿಯೆರ್.

ಪ್ರತಿಷ್ಠಾನದ ಸಹ ಸಂಚಾಲಕೆರ್ ಭಾಸ್ಕರ ಬಾರ್ಯ ಎದ್ಕೊಂದು, ಕಾರ್ಯದರ್ಶಿ ದಿವಾಕರ ಆಚಾರ್ಯ ಗೇರುಕಟ್ಟೆ ಸೊಲ್ಮೆ ಸಂದಾಯ ಮಲ್ತೆರ್. ಪ್ರತಿಷ್ಠಾನದ ಉಪಾಧ್ಯಕ್ಷೆರ್ ದುಗ್ಗಪ್ಪ.ಯನ್ ಕಾರ್ಯಕ್ರಮದ ಸುದಾರಿಕೆ ಮಲ್ತೆರ್.