ಬೊಲ್ತೆರ್ ಸುದ್ದಿ | Belthangady News

ಮಲ್ಪೆ ಪಡುಕೆರೆ ಪ್ರದೇಶಗ್ ಒಡಿಪು ಜಿಲ್ಲಾಧಿಕಾರಿ ಜಿ.ಜಗದೀಶ್ ಭೇಟಿ

ಒಡಿಪು , ಮೇ 17: ಚಂಡಮಾರುತದ ಪ್ರಭಾವ ಜಿಲ್ಲೆಡ್ ಮಸ್ತ್ ಪರಿಣಾಮ ಬೂರ್ದುಂಡು . ನೇರ್ದಾವರ ಸಾರ್ವಜನಿಕ ಬೊಕ್ಕ ಖಾಸಗಿ ಆಸ್ತಿಪಾಸ್ತಿಲೆಗ್ ಬಾರಿ ನಷ್ಟ ಆತುಂಡು . ಜಿಲ್ಲೆಡ್ ಇತ್ತೇ ಮುಟ ಒಟ್ಟು 36 ಇಲ್ಲಗ್ ಹಾನಿಯಾತುಂಡು ಪಂದ್ ಒಡಿಪು ಜಿಲ್ಲಾಧಿಕಾರಿ ಜಿ.ಜಗದೀಶ್ ತೆರಿಪಾದೆರ್ .

ತೌಕ್ತೆ ಚಂಡಮಾರುತರ್ದ್ ಹಾನಿಯಾತಿನ ಮಲ್ಪೆ ಪಡುಕೆರೆ ಪ್ರದೇಶಗ್ ಐತಾರ ಭೇಟಿ ಕೊರ್ದು ಪರಿಶೀಲನೆ ನಡಪಾಯಿನ ಬೊಕ್ಕ ಆರ್ ಮಾಧ್ಯಮದಕ್ಲೇನೊಟ್ಟಿಗೆ ಪಾತೆರಿಯೆರ್ .

ಸುಮಾರ್ 60 ಜನನ್ ಸುರಕ್ಷಿತ ಜಾಗೆಗ್ ಕಡಪಾದೆರ್ ಐತ ಪ್ರಕಾರ, ಮಾತೆರ್ಲ ಅಕ್ಲೆನ ಇಲ್ಲಗ್ ಪೋಯೆರೆ ಸೂಚನೆ ಕೊರ್ತೆರ್ .

ಉಳ್ಳಾಲಗ್ ಭೇಟಿ ಕೊರಿನ ಸಚಿವ ಅಂಗಾರ

ಉಳ್ಳಾಲ, ಮೇ 17: ವಾಯುಭಾರ ಕುಸಿತಗ್ ಪೋಡಿನ ಸೋಮೇಶ್ವರದ ಹಿಂದು ರುದ್ರಭೂಮಿ‌, ಸೋಮೇಶ್ವರ ಮೋಹನ್ ಬೊಕ್ಕ ಹೇಮಚಂದ್ರ ಮೆರ್ನ ಇಲ್ಲ್ , ಉಚ್ಚಿಲದ ರೋಹಿತ್ ಮಾಸ್ಟರ್, ನಾಗೇಶ್ ಉಚ್ಚಿಲ್, ರೂಪೇಶ್ ಉಚ್ವಿಲ್ ಬೊಕ್ಕ ಕಡಪ್ಪರ ಫ್ರೆಂಡ್ಸ್ ಕ್ಲಬ್ ಅಂಚನೆ ಬೆಟ್ಟಂಪಾಡಿ ಎಂಡ್ ಪಾಯಿಂಟ್ ದ ಕೈತಲ್ ಶನಿವಾರ ಪೋಯಿನ ಸಚಿವ ಅಂಗರ ಮೇರ್ ಸ್ಥಳೀಯೆರ್ , ಪಕ್ಷದ ಮುಖಂಡೆರ್ ಅಧಿಕಾರಿಲೆನ , ಸಂತ್ರಸ್ತೆರ್ನ ಒಟ್ಟುಗು ಪಾತೆರ್ದ್ ಪರಿಹಾರ ಕೊರ್ಪೆ ಪಂದ್ ಭರವಸೆ ಕೊರಿಯೆರ್.

ಐತ ಪ್ರಕಾರ ತುರ್ತು ಅಗತ್ಯ ಉಪ್ಪುನ ಸೋಮೇಶ್ವರದ ಹೇಮಚಂದ್ರ ಬೊಕ್ಕ ಮೋಹನ್ ಮೆರ್ನ ಇಲ್ಲದ ಕೈತಲ್, ಉಚ್ಚಿಲ ರೋಹಿತ್ ಮಾಸ್ಟರ್ ಬೊಕ್ಕ ರೂಪೇಶ್ ಉಚ್ಚಿಲ್, ನಾಗೇಶ್ ಉಚ್ವಿಲ್ ಮೆರ್ನ ಇಲ್ಲದ ಕೈತಲ್ ಸದ್ಯಗ್ ಇಲ್ಲ್ ರಕ್ಷಿಸಾಯರೇ ಕಾಮಗಾರಿ ನಡಪಾವುಲಕ ಸೂಚನೆ ಕೊರಿಯೆರ್ .

ಕಾಂಗ್ರೆಸ್ ವತಿರ್ದ್ ಜನಾಂದೋಲನ : ಐವನ್ ಡಿಸೋಜ

ಕುಡ್ಲ : ದೇಶದ ಜನಕ್ಲೆನ ಬೇನೆನ್ ಕೇಂದ್ರ ಸರ್ಕಾರದ ಗಮನಗ್ ಕನಪಿನ ನೆಲೆಟ್ಟ್ “ನಮಕ್ ಉಚಿತ ಲಸಿಕೆ ಕೊರ್ಲೆ , ‘ಲಸಿಕೆನ್ ನಿಗದಿತ ಪೊರ್ತುದ ಉಲಯಿ ಕೊರ್ಲೆ ಪನ್ಪಿನ ‘ ಜನಾಂದೋಲನನ್ ಐತಾರ (ಮೇ 16) ಕಾಂಗ್ರೆಸ್‌ ಸುರು ಮಲ್ಪರೆ ಉಂಡು ಪಂದ್ ಎಐಸಿಸಿ ಕಾರ್ಯದರ್ಶಿ ಐವನ್ ಡಿಸೋಜ ಪಂಡೆರ್ .

ಸಂಜೆವಾಣಿ ಕುಡ್ಲ ಆವೃತ್ತಿದ ವ್ಯವಸ್ಥಾಪಕ ವಿಜಯ್ ರಾವ್ ನಿಧನ

ಕುಡ್ಲ ,ಮೇ 14 : ಸಂಜೆವಾಣಿ ಪತ್ರಿಕೆದ ಕುಡ್ಲ ಆವೃತ್ತಿದ ವ್ಯವಸ್ಥಾಪಕ ವಿಜಯ್. ಎಸ್. ರಾವ್ (55) ಮೇರ್ ಕೋಡೆ ರಾತ್ರಿ ತೀರ್ ಪೋಯೆರ್.ಕೊರೋನ ಸೋಂಕುರ್ದು ಇತ್ತಿನ ವಿಜಯ್ ಮೇರ್ ಕರಿನ ರಡ್ಡ್ ವಾರರ್ದ್ ಆಸ್ಪತ್ರೆದ ತೀವ್ರ ನಿಗಾ ಘಟಕಡ್ ಚಿಕಿತ್ಸೆ ಪಡೆಯೊಂದು ಇತ್ತೆರ್ . ಆಂಡ ಮರ್ದ್ ಗ್ ಸ್ಪಂದನೆ ಮಲ್ಪಂದೆ ಕೋಡೆ ರಾತ್ರಿ ತೀರ್ ಪೋಯೆರ್.

ಕರಿನ 18 ವರ್ಷರ್ದ್ ಕುಡ್ಲ ಸಂಜೆವಾಣಿ ಆವೃತ್ತಿಡ್ ವ್ಯವಸ್ಥಾಪಕ ಹುದ್ದೆಡಿತ್ತಿನ ವಿಜಯ್ ಮೇರ್ , ಸರಳ, ಸಜ್ಜನಿಕೆ ಬೊಕ್ಕ ತೆಲಿಕೆ ಮೋನೆದ ಮುಖೇನ ಮಾತೆರ್ನ ಮನ ಗೆಂದ್ ದಿತ್ತೆರ್. ಸಂಜೆವಾಣಿ ಪತ್ರಿಕೆದ ವ್ಯವಸ್ಥಾಪಕ ನಿರ್ದೇಶಕ ಬಿ.ಟಿ. ಆಮುದನ್, ಸಂಜೆವಾಣಿ ಪತ್ರಿಕೆದ ಮಾತಾ ಆವೃತ್ತಿದ ಸಂಪಾದಕೀಯ ಬಳಗ ಬೊಕ್ಕ ಮಾತಾ ಸಿಬ್ಬಂದಿ ವರ್ಗ ಕಣ್ಣ ನೀರ ಪನಿತರ್ಪಣ ಮಲ್ದೆರ್.

ಹೃದಯಾಘಾತರ್ದ್ ತೀರ್ ಪೋಯಿನ ಬೆಂಗ್ಳೂರ್ದ ಐಟಿ ಉದ್ಯೋಗಿ ಶ್ರೀಕಾಂತ್ ಪ್ರಭು

ಉಳ್ಳಾಲ, ಮೇ 13: ವರ್ಕ್‌ ಫ್ರಂ ಹೋಂಡ್ ಇತ್ತಿನ ಬೆಂಗಳೂರ್ ದ ಐಟಿ ಉದ್ಯೋಗಿ, ಉಳ್ಳಾಲ ನಿವಾಸಿ ಶ್ರೀಕಾಂತ್ ಪ್ರಭು (40) ಹೃದಯಾಘಾತರ್ದ್ ಸೋಮವಾರ ಬೈಯ್ಯಗ್ ತೀರ್ ಪೋಯೆರ್.

ಉಳ್ಳಾಲ ಚೀರುಂಭ ಭಗವತಿ ಕ್ಷೇತ್ರ ದ ಕೈತಲ್ ವಾಸುದೇವ ಪ್ರಭು ಬೊಕ್ಕ ತಾರಾಮತಿ ದಂಪತಿ 2ನೇ ಮಗೆ ಶ್ರೀಕಾಂತ್ ಮದಿಮೆ ಆದ್ ಒರ್ತಿ ಮಗಲ್ ಉಲ್ಲಲ್.

ಲಾಕ್‌ಡೌನ್ ರ್ದ್ ಬೊಕ್ಕ ಬೆಂಗಳೂರುರ್ದ್ ಊರುಗು ಬತ್ತಿನ ಶ್ರೀಕಾಂತ್, ಇಲ್ಲಡೆ ಬೇಲೆ ಮಲ್ತೊಂದು ಇತ್ತೆರ್ . ಸೋಮವಾರ ಬೇಲೆ ಮಲ್ತೊಂದು ಇತ್ತಿಲಕನೇ ಹೃದಯಾಘಾತ ಆತುಂಡು.