ಪುತ್ತೂರ್ದ ಸುದ್ದಿ | Puttur News

ಅಕ್ಷಯ್ ಕಲ್ಲೇಗ ಕೆರ್ನ ಕೇಸ್ ದ ಆರೋಪಿಲೆಗ್ ನ.22 ಮುಟ್ಟ ನ್ಯಾಯಾಂಗ ಕಸ್ಟಡಿ

ಪುತ್ತೂರು: ನ.6 ದಾನಿ ರಾತ್ರೆ ನೆಹರು ನಗರಡ್ ಕಲ್ಲೇಗ ಟೈಗರ್‍ಸ್ ತಂಡದ ಮುಖ್ಯಸ್ಥೆ ಅಕ್ಷಯ್ ಕಲ್ಲೇಗ ಅರೆನ ಕೆರ್ನ ಕೇಸ್‌ ದ ಆರೋಪಿಲಾಯಿನ ಚೇತನ್‌, ಮನೀಶ್‌, ಕೇಶವ, ಮಂಜುನಾಥ್‌ ಮೊಕ್ಲೆನ್ ನ.8 ದಾನಿ ಕೋರ್ಟ್‌ಗ್ ಹಾಜರ್‌ ಮಲ್ತೆರ್.‌ ನ್ಯಾಯಾಧೀಶೆರ್ ನ.22 ಮುಟ್ಟ ನ್ಯಾಯಾಂಗ ಕಸ್ಟಡಿ ಪಾರ್ದ್ ಆದೇಶ ಕೊರ್ತೆರ್.

ಕುಕ್ಕೆಗ್ ಸರ್ಪ ಸಂಸ್ಕಾರಗ್‌ ಬತ್ತಿನ ಜನಕ್ಕ್ ಹಾರ್ಟ್‌ ಆಟ್ಯಾಕ್‌!

ಕುಕ್ಕೆ ಸುಬ್ರಹ್ಮಣ್ಯ ದೇವಸ್ಥಾನಗ್ ಸರ್ಪ ಸಂಸ್ಕಾರಗ್ ಬತ್ತಿನ ಒಂಜಿ ಜನ ಹಾರ್ಟ್‌ ಆಟ್ಯಾಕ್‌ಡ್‌ ತೀರ್‌ಪೋಯಿನ ಘಟನೆ ನ.8 ಕಾಂಡೆ ವರದಿ ಆತ್‌ಂಡ್. ಬೆಂಗಳೂರುದ ಕೆಂಗೇರಿದ ವ್ಯಕ್ತಿ ಅಂದಾಜಿ 55 ವರ್ಷ . ಇನಿ ಕಡೆತ ದಿನತ ಸರ್ಪ ಸಂಸ್ಕಾರ ಪೂಜೆಯಾದ್‌ ಇನಿಯೆ ಹಾರ್ಟ್‌ ಅಟ್ಯಾಕ್‌ಡ್‌ ತೀರ್‌ಪೋತೆರ್.

ಸಂಪಾಜೆದ ಚೈತ್ರಾ ದೇವಜನ ಮಿಸೆಸ್ ಮಲೇಷ್ಯಾ ಪಂತೊಡು ಮೂಜಿ ಇನಾಮು ಗೆಂದಿಯೆರ್

ಮಲೇಷ್ಯಾಡ್ ಇಪ್ಪುನ ಸಂಪಾಜೆ ಮೂಲದ ಚೈತ್ರಾ ದೇವಜನ ಈ ಸರ್ತಿದ ಮಿಸೆಸ್ ಮಲೇಷ್ಯಾ ಫೈನಲಿಸ್ಟ್ ಆದ್ ಮೂಜಿ ಇನಾಮುನ್‌ ಗೆಂದ್‌ದೆರ್. ಕುಶಲ ದಿವಾ, ಟ್ಯಾಲೆಂಟ್ ಟೊರ್ನೆಡೊ, ಬಾರ್ಬಿ ಐಕಾನ್ ಶೀರ್ಷಿಕೆದ ಬೇತೆ ಬೇತೆ ಪ್ರದರ್ಶನಡ್ ಚೈತ್ರಾ ಇನಾಮು ಪಡೆಯೊಂದೆರ್.‌

ಸಂಪಾಜೆದ ದೇವಜನ ದಿ.ಜಯಸೂರ್ಯ ಬೊಕ್ಕ ದಿ. ನಾಗವೇಣಿ ದಂಪತಿನ ಮಗಲಾಯಿನ ಚೈತ್ರಾ ಹೈದರಾಬಾದ್ ಮೂಲದ ರಾಜೇಂದ್ರ ಪ್ರಸಾದ್ ಅರೆನೊಟ್ಟಿಗೆ ಮದಿಮೆ ಆದ್ ಕರಿನ ಏಳ್‌ ವರ್ಷರ್ದ್ ಮಲೇಷ್ಯಾದ ಕೌಲಾಲಂಪುರಡ್‌ ವಾಸ ಆದ್‌, ಅಲ್ಪ ಸ್ವಂತ ಉದ್ಯಮ ಮಲ್ತೊಂದು ಉಲ್ಲೆರ್.‌

ಸುಬ್ರಹ್ಮಣ್ಯ: ಸಂಚಾರಿ ವಿಜ್ಞಾನ ಪ್ರದರ್ಶನ ಉದಿಪನ

ದಕ್ಷಿಣ ಕನ್ನಡ ಸೈನ್ಸ್ ಫೌಂಡೇಶನ್ ಕರ್ನಾಟಕ ರಾಜ್ಯ ವೈಜ್ಞಾನಿಕ ಸಂಶೋಧನಾ ಪರಿಷತ್ತ್ ದಕ್ಷಿಣ ಕನ್ನಡ ಘಟಕ, ವಿಶ್ವೇಶ್ವರಯ್ಯ ಕೈಗಾರಿಕಾ ಬೊಕ್ಕ ತಾಂತ್ರಿಕ ವಸ್ತು ಸಂಗ್ರಹಾಲಯ ಬೆಂಗಳೂರು, ಲಯನ್ಸ್ ಕ್ಲಬ್ ಕಡಬ, ನೆತ್ತ ಒಟ್ಟು ಸೇರಿಗೆಡ್ ಸಂಚಾರಿ ವಿಜ್ಞಾನ ಪ್ರದರ್ಶನ ಕಾರ್ಯಕ್ರಮ ಶ್ರೀ ಸುಬ್ರಹ್ಮಣ್ಯೇಶ್ವರ ಪದವಿಪೂರ್ವ ಕಾಲೇಜ್ ಡ್ ನವಂಬರ್ 6 ದಾನಿ ಉದಿಪನ ಆಂಡ್.

ಲೇಸ್ ದ ಉದಿಪನನ್ ವಿಶ್ವೇಶ್ವರಯ್ಯ ಕೈಗಾರಿಕಾ ಬೊಕ್ಕ ತಾಂತ್ರಿಕ ವಸ್ತು ಸಂಗ್ರಹಾಲಯ ಬೆಂಗಳೂರು ನೆತ್ತ ಎಜುಕೇಶನ್ ಆಫೀಸರ್ ಹೇಮರಾಜ್ ಪಾತೆರ್ದ್ ” ಇತ್ತೆದ ತಾಂತ್ರಿಕ ಯುಗಟ್ ನಮಲ ಅವೆತ ಪಿರಾವುಡ್ ಪೋವೊಡಾಪುಂಡು. ಆ ನಿಟ್ಟ್ ಡ್ ವಿದ್ಯಾರ್ಥಿಲು ತನ್ನ ಪ್ರೌಢ ಹಂತಡೆ ವಿಜ್ಞಾನದ ಬಗ್ಗೆ ಎಚ್ಚಿನ ಆಸಕ್ತಿನ್ ವಹಿಸಿದ್ ಕ್ಲಾಸ್ ಡ್ ಪಾಠ ಕೇನ್ನ ಒಟ್ಟಿಗೆ ಪ್ರಾಯೋಗಿಕವಾದ್ ಅವೆತ ವಿವರಣೆನ್ ಬೊಕ್ಕ ಮಾಹಿತಿನ್ ತೆರಿಯೊನ್ನ ಅವಶ್ಯಕ ಪಂದ್ ಪಂಡೆರ್.

ಸಮಾರಂಭದ ಅಧ್ಯಕ್ಷತೆನ್ ಕಾಲೇಜ್ ದ ಪ್ರಾಂಶುಪಾಲೆರ್ ಸೋಮಶೇಖರ ನಾಯಕ್ ವಹಿಸ್ ದ್ ಇತ್ತೆರ್. ಮಲ್ಲ ಬಿನ್ನೆರಾದ್ ಕಡಬ ಲಯನ್ಸ್ ಕ್ಲಬ್ ದ ಗುರ್ಕಾರ್ಲು ಗೋಪಾಲಕೃಷ್ಣ, ಪ್ರೌಢಶಾಲಾ ಪ್ರಭಾರ ಮುಖ್ಯ ಶಿಕ್ಷಕೆರ್ ಕೃಷ್ಣ ಭಟ್, ತಾಂತ್ರಿಕ ಸಹಾಯಕೆರಾಯಿನ ಚಂದ್ರ, ಬೊಕ್ಕ ದಿಲೀಪ್ ಜಟ್ಟಿ, ಕಾಲೇಜ್ ದ ಭೌತಶಾಸ್ತ್ರ ಉಪನ್ಯಾಸಕೆರ್ ಗಿರೀಶ್ ಇತ್ತೆರ್. ಸಂಚಾರಿ ವಿಜ್ಞಾನ ಪ್ರದರ್ಶನ ನವೆಂಬರ್6 ರ್ದ್ ಡಿಸೆಂಬರ್ 5 ಮುಟ್ಟ ನಿರಂತರವಾದ್ ದಕ್ಷಿಣ ಕನ್ನಡ ಜಿಲ್ಲೆಯಾದ್ಯಂತ ಇಪ್ಪುನ ಕೆಲವು ಶಾಲೆಗ್ ಪೋದು ವಿದ್ಯಾರ್ಥಿಲೆಗ್ ತಾಂತ್ರಿಕ ಮಾಹಿತಿನ್ ಕೊರ್ಪೆರ್. ಪ್ರೌಢಶಾಲಾ ಪ್ರಭಾರ ಮುಖ್ಯ ಶಿಕ್ಷಕ ಕೃಷ್ಣ ಭಟ್ ಮಾತೆರೆನ್ ಎದ್ಕೊಂದು, ಸಹ ಶಿಕ್ಷಕ ಸುರೇಶ್ ಲೇಸ್‌ನ್ ಸುದಾರಿಕೆ ಮಲ್ತೆರ್. ಸಹ ಶಿಕ್ಷಕಿ ಸೊಲ್ಮೆ ಸಂದಾಯ ಮಲ್ತೆರ್. ಬೊಕ್ಕ ವಿದ್ಯಾರ್ಥಿಲೆಗ್ ವಿಜ್ಞಾನ ಪ್ರದರ್ಶನನ್ ತೂವೆರೆ ಅವಕಾಶ ಮಲ್ತೆರ್ .

ಜೋಕ್ಲೆನ ಕಲಾ ಲೋಕರ್ದ್ ರಾಜೇಶ್ ವಿಟ್ಲಗ್ “ಬಾಲಬಂಧು” ಪುರಸ್ಕಾರ‌

ವಿಟ್ಲ : ಜೋಕ್ಲೆನ ಕಲಾಲೋಕ ಕನ್ನಡ ಸಾಹಿತ್ಯ ಪರಿಷತ್ ಬಂಟ್ವಾಳ ತಾಲೂಕು ಘಟಕ ಜೋಕ್ಲೆಗಾದ್ ಕಲೆ ಸಾಹಿತ್ಯ ಚಟುವಟಿಕೆಡ್ ಪ್ರತಿ ವರ್ಷ ಕೊರ್ಪುನ ತಾಲೂಕು ಮಟ್ಟದ ಬಾಲಬಂಧು ಪುರಸ್ಕಾರಗ್‌ ಈ ಸರ್ತಿ ರಾಜೇಶ್ ವಿಟ್ಲ ಆಯ್ಕೆಯಾತೆರ್. ‌

ಕಡೇಶಿವಾಲಯ ಸರಕಾರಿ ಹಿರಿಯ ಪ್ರಾಥಮಿಕ ಶಾಲಾ ನೇತೃತ್ವಡ್ ನ.6 ದಾನಿ ನಡಪುನ 17ನೇ ವರ್ಷದ ಬಂಟ್ವಾಳ ತಾಲೂಕು ಜೋಕ್ಲೆನ ಸಾಹಿತ್ಯ ಸಮ್ಮೇಳನಡ್, ಸಮಾರೋಪ ಸಮಾರಂಭಡ್ ರಾಜೇಶ್ ವಿಟ್ಲ ಮೇರೆಗ್‌ ಮಾನಾದಿಗೆ ಮಲ್ತ್‌, ಬಂಟ್ವಾಳ ತಾಲೂಕು ಮಟ್ಟದ ಬಾಲಬಂಧು ಪುರಸ್ಕಾರನ್‌ ಕೊರಿಯೆರೆ ಉಲ್ಲೆರ್‌ ಪಂದ್ ಜೋಕ್ಲೆನ ಕಲಾ ಲೋಕದ ಗುರ್ಕಾರೆರಾಯಿನ ರಮೇಶ ಎಂ. ಬಾಯಾರು ತೆರಿಪಾದೆರ್.

ಉಬಾರ್:‌ ಹಾರ್ಟ್‌ ಆಟ್ಯಾಕ್‌ಡ್‌ ತೀರ್‌ಪೋಯಿನ ಕಲ್ಪಾರ್ಥಿ

ಉಬಾರ್: ಕಲ್ಪಾರ್ಥಿ ಒರಿ ಹಾರ್ಟ್‌ ಆಟ್ಯಾಕ್‌ಡ್‌ ತೀರ್‌ಪೋಯಿನ ಘಟನೆ ಉಬಾರ್‌ ಕೈತಲ್‌ದ ನೆಲ್ಯಾಡಿದ ಕೌಕ್ರಾಡಿದಲ್ಪ ನಡತ್‌ಂಡ್. ತೀರ್‌ಪೋಯಿನ ಕಲ್ಪಾರ್ಥಿ ಕೌಕ್ರಾಡಿ ಶಾಂತಿ ಬೆಟ್ಟು ನಿವಾಸಿ ಯೂಸುಫ್ ಅರೆನ ಮಗೆ ಮಹಮ್ಮದ್ ಇರ್ಫಾನ್ (18) ಪಂದ್‌ ತೆರಿದ್‌ ಬೈದ್‌ಂಡ್.‌

ಇರ್ಫಾನ್ ಎ.ಸಿ ಮೆಕ್ಯಾನಿಕ್ ಕಲ್ತೊಂದು ಇತ್ತ್‌ದ್‌, ಮೇರೆಗ್‌ ಪೊಪ್ಪ, ಅಮ್ಮ, ಅಣ್ಣೆ, ಬೊಕ್ಕ ಮೂಜಿ ಜನ ಅಕ್ಕನಕುಲು ಉಲ್ಲೆರ್.

ಅಕ್ಷಯ್ ಕಲ್ಲೇಗ ಮರ್ಡರ್‌ ಕೇಸ್; ಮೂಜಿನೇ ಆರೋಪಿ ಅರೆಸ್ಟ್!‌‌

ಪುತ್ತೂರು : ಪುತ್ತೂರು ಪೇಂಟೆಡ್‌ ಸೋಮವಾರ ನಡುರಾತ್ರೆ ನಡತ್ತಿನ ಪುಗರ್ತೆದ ಕಲ್ಲೇಗ ಟೈಗರ್ಸ್‌ ಕೂಟದ ಮುಖ್ಯಸ್ಥೆ ಅಕ್ಷಯ್‌ ಕಲ್ಲೇಗ ಮರ್ಡರ್‌ ಕೇಸ್‌ದ ಮೂಜಿನೇ ಆರೋಪಿನ್‌ ಪೊಲೀಸೆರ್‌ ಅರೆಸ್ಟ್‌ ಮಲ್ತ್‌ದೆರ್.‌

ಮಂಜುನಾಥ್‌ ಅರೆಸ್ಟ್‌ ಆಯಿನ ಮೂಜಿನೇ ಆರೋಪಿ, ಚೇತನ್‌ ಬೊಕ್ಕ ಮನೀಶ್‌‌ ಇನಿ ಕಾಂಡೆನೆ ಪೋದು ಸರೆಂಡರ್‌ ಆದಿತ್ತೆರ್ ಸೋಮವಾರ ​ಬಯ್ಯಗ್‌ ಆಯಿನ ಒಂಜಿ ಆಕ್ಸಿಡೆಂಟ್‌ದ ವಿಚಾರವಾದ್ ಅಕ್ಷಯ್‌ ಬೊಕ್ಕ ಆರೋಪಿಲೆನ ನಡುಟ್ಟು ಪಾತೆರಕತೆ ಆದಿತ್‌ಂಡ್.

ಆಕ್ಸಿಡೆಂಟ್‌ಡ್‌ ಆಯಿನ ನಷ್ಟದ ಕಾಸ್‌ದ ಬಗೆಟ್‌ ಪಾತೆರಿಯರೆ ಪಂದ್‌ ಆರೋಪಿಲು ಅಕ್ಷಯ್‌ನ್ ರಾತ್ರೆ 11.30 ಗಂಟೆಗ್ ಕುಡೊರ ಲೆತ್ತ್‌ದ್‌ ಇತ್ತೆರ್‌ ಪಂದ್ ತೆರಿದ್‌ ಬೈದ್‌ಂಡ್. ಪಾತೆರಕತೆ ಜೋರ್‌ ಜೋರ್‌ ಆದ್‌ ಆ ಪೊರ್ತುಡು ಅಕುಲ್‌ ಮರ್ಡರ್‌ ಮಲ್ತ್‌ದೆರ್‌ ಪಂದ್‌ ತೆರಿದ್‌ ಬೈದ್‌ಂಡ್.‌

ಉಂದುವೇ ಅಕ್ಷಯ್ ಕಲ್ಲೇಗ ಕೂಟದಕುಲ್‌ ಬಿಗ್ ಬಾಸ್‌ ಸೀಸನ್‌ 9 ಡ್‌ ಪಿಲಿಯೇಸ್‌ನ್‌ ನಲ್ತ್‌ದ್‌ ಪುಗರ್ತೆನ್‌ ಪಡೆದಿತ್ತೆರ್.

ಕಲ್ಲೇಗ ಟೈಗರ್ಸ್ ದ ಮುಖ್ಯಸ್ಥೆ ಅಕ್ಷಯ್ ಕಲ್ಲೇಗ ಮರ್ಡರ್

ಪತ್ತೂರು: ಕಲ್ಲೇಗ ಟೈಗರ್ಸ್ ದ ಮುಖ್ಯಸ್ಥೆ ಅಕ್ಷಯ್ ಕಲ್ಲೇಗನ್ ಪಗೆಮಾನಿಲು ನಡುರಾತ್ರೆಡ್ ಕೆರ್ದ್ ಪಾಡ್ದೆರ್.

ನೆಹರು ನಗರದಲ್ಪ ನಡೀರ್‌ಡ್ ಈ ನಡಕೆ ನಡತ್ಂಡ್. ನೆರ್ದ್ ದುಂಬು ಒಂಜಿ ಆಕ್ಸಿಡೆಂಟ್ ದ ವಿಚಾರಡ್ ರಡ್ಡ್ ಕೂಟದಕ್ಲೆನ್ ರಾಜಿ ಸಂದಾನಗ್ ಲೆತ್ತ್ ಇತ್ತೆರ್.

ರಾಜಿ ಸಂದಾನದ ಪೊರ್ತುಡು ಪಾತೆರಕತೆ ಜೋರ್ ಜೋರಾದ್ ಆದ್ ಚೇತನ್ ಬೊಕ್ಕ ಮನೀಷ್ ಅಕ್ಷಯ್ ನ್ ಕೆರ್ತೆರ್ ಪಂದ್ ತೆರಿದ್ ಬೈದ್ಂಡ್. ಆರೋಪಿಲೆನ್ ಪೊಲೀಸ್ ದಕುಲ್ ಅರೆಸ್ಟ್ ಮಲ್ತ್ ದೆರ್.

ರೈ ಎಸ್ಟೇಟ್ ಚಾರಿಟೇಬಲ್ ಟ್ರಸ್ಟ್‌ರ್ದ್ ವಸ್ತ್ರ ವಿತರಣೆ | ಕೊಂಬೆಟ್ಟು ಕ್ರೀಡಾಂಗಣಡ್ ದೊಂಪದ ಮೂರ್ತ

ಪುತ್ತೂರು: ರೈ ಎಸ್ಟೇಟ್ ಎಜುಕೇಶನಲ್ ಆಂಡ್ ಚಾರಿಟೇಬಲ್ ಟ್ರಸ್ಟ್ ವತಿರ್ದ್ ನ.13 ದಾನಿ ತುಡರ್‌ ಪರ್ಬದ ಲೆಕ್ಕಡ್‌ ನಡಪುನ ವಸ್ತ್ರ ವಿತರಣೆ ಬೊಕ್ಕ ಸಹಭೋಜನಾ ಕಾರ್ಯಕ್ರಮ ಕೊಂಬೆಟ್ಟು ತಾಲೂಕು ಕ್ರೀಡಾಂಗಣಡ್‌ ನಡಪೆರೆ ಇತ್ತ್‌ದ್‌ ನೆತ್ತ ಚಪ್ಪರ ಮುಹೂರ್ತ ನ.6 ಸೋಮವಾರ ದಾನಿ ನಡತ್‌ಂಡ್. ಶಾಸಕೆರ್ ಅಶೋಕ್ ಕುಮಾರ್ ರೈ ಕಾರ್ಯಕ್ರಮದ ನೇತೃತ್ವ ವಹಿಸ್‌ದ್‌ ಇತ್ತೆರ್.‌

ಈ ಪೊರ್ತುಡು ಟ್ರಸ್ಟ್ ಮುಖ್ಯಸ್ಥೆರ್ ಸುಮಾ ಅಶೋಕ್ ರೈ, ಸೀತಾರಾಮ ರೈ ಹೆಗ್ಗಡೆ ಹಿತ್ತಿಲು, ಬ್ಲಾಕ್ ಕಾಂಗ್ರೆಸ್ ಅಧ್ಯಕ್ಷೆರ್ ಎಂ ಬಿ ವಿಶ್ವನಾಥ ರೈ, ಕೆಪಿಸಿಸಿ ಸಂಯೋಜಕೆರ್ ಕಾವು ಹೇಮನಾಥ ಶೆಟ್ಟಿ, ಟ್ರಸ್ಟ್ ಕಾರ್ಯಾಧ್ಯಕ್ಷೆರ್‌ ಸುದೇಶ್ ಶೆಟ್ಟಿ, ಕೆಪಿಸಿಸಿ ಕಾರ್ಯದರ್ಶಿ ಎಂ ಎಸ್ ಮಹಮ್ಮದ್, ಅಕ್ರಮ ಸಕ್ರಮ ಸಮಿತಿ ಸದಸ್ಯೆರ್ ಮಹಮ್ಮದ್ ಬಡಗನ್ನೂರು, ಮಾಜಿ ಜಿಪಂ ಸದಸ್ಯೆ ಅನಿತಾ ಹೇಮನಾಥ ಶೆಟ್ಟಿ, ವಿಟ್ಲ ಉಪ್ಪಿನಂಗಡಿ ಬ್ಲಾಕ್ ಅಧ್ಯಕ್ಷೆರ್ ಡಾ.ರಾಜಾರಾಂ ಕೆ ಬಿ, ಕೋಡಿಂಬಾಡಿ ಗ್ರಾಪಂ ಉಪಾಧ್ಯಕ್ಷೆರ್ ಜಯಪ್ರಕಾಶ್ ಬದಿನಾರ್, ನಿಹಾಲ್ ಶೆಟ್ಟಿ, ರಿತೇಶ್ ಶೆಟ್ಟಿ, ಮುರಳೀದರ್ ರೈ ಮಟಂತಬೆಟ್ಟು, ಕೃಷ್ಣಪ್ರಸಾದ್ ಆಳ್ವ, ಪಂಜಿಗುಡ್ಡೆ ಈಶ್ವರಭಟ್, ಶಿವರಾಮ ಆಳ್ವ, ನ್ಯಾಯವಾದಿ ಅರುಣಾ ಆಳ್ವ, ಟ್ರಸ್ಟಿನ ಸದಸ್ಯೆರ್ ಕೃಷ್ಣಪ್ರಸಾದ್ ಭಟ್, ಯೋಗೀಶ್ ಸಾಮಾನಿ, ಶಿವಪ್ರಸಾದ್, ರಾಕೇಶ್ ರೈಕುದ್ಕಾಡಿ, ರಾಮಣ್ಣ ಪಿಲಿಂಜ, ಚಂದ್ರಶೇಕರ ಕಲ್ಲಗುಡ್ಡೆ ಇತ್ತೆರ್.

ಇಸ್ರೋದ ಸ್ಪೇಸ್ ಆನ್ ವೀಲ್ ಬಸ್ ಸುಳ್ಯಗ್

ಭಾರತದ ಪೆರ್ಮೆದ ಬಾಹ್ಯಾಕಾಶ ವಿಜ್ಞಾನ ಸಂಸ್ಥೆ ಇಸ್ರೋದ ಸಾಧನೆದ ಪೊಲಬು ಕೊರ್ಪಿನ “ಸ್ಪೇಸ್ ಆನ್ ವೀಲ್” ಮೊಬೈಲ್ ಬಸ್ ನ.7 ರ್ದ್ 9 ಮುಟ್ಟ ದ.ಕ ಜಿಲ್ಲೆಡ್ ಸಂಚಾರ ಮಲ್ಪುಂಡು. ನ. 9 ಗು ಸುಳ್ಯಗ್ ಬತ್ತ್‌ದ್ ಸುಳ್ಯದ ಜೂನಿಯರ್ ಕಾಲೇಜಿದ (ಸರಕಾರಿ ಪದವಿ ಪೂರ್ವ ಕಾಲೇಜು) ಮೈದಾನೊಡು ಕಾಂಡೆ 9.30 ರ್ದ್ ಬಯ್ಯಡ್ 4 ಗಂಟೆ ಮುಟ್ಟ ಜೋಕುಲೆಗ್ ಅಂಚೆನೇ ಸಾರ್ವಜನಿಕೆರೆಗ್ ವೀಕ್ಷಣೆಗ್ ತಿಕ್ಕುಂಡು.

ಜಿಲ್ಲೆದ ವಿಜ್ಞಾನ ಪ್ರತಿಷ್ಠಾನ ಬೊಕ್ಕ ಕರ್ನಾಟಕ ರಾಜ್ಯ ವೈಜ್ಞಾನಿಕ ಸಂಶೋಧನಾ ಪರಿಷತ್ತ್‌ದ ಜಿಲ್ಲಾ ಘಟಕೊದ ಕಡೆರ್ದ್ ಹೂಸ್ಕೂಲ್ ದ ಜೋಕುಲೆಡ ವೈಜ್ಞಾನಿಕ ಬೊಕ್ಕ ಬಾಹ್ಯಾಕಾಶ ವಿಷಯೊಲೆಡ್ ಆಸಕ್ತಿ ಪುಟ್ಟಾಯೆರ ಈ ಕಾರ್ಯಕ್ರಮೊದ ಅಟ್ಟನೆ ಮಲ್ತಿತ್ತ್‌ದ್, ಉಂದೆಟ್ ಚಂದ್ರಯಾನ-1, ಮಂಗಳಯಾನ, ರಾಕೆಟ್ ಉಡ್ಡಯನ ಕೇಂದ್ರ, ಸಂವಹನ ಉಪಗ್ರಹ, ಆರ್ಯಭಟ, ಭಾಸ್ಕರ ಇಂಚಿನ ದುಂಬುದ ಉಪಗ್ರಹೊಲೆನ ಮಾಡೆಲ್‌, ಅಂಚೆನೇ ನನ ದುಂಬದ ಬಾಹ್ಯಾಕಾಶ ಯೋಜನೆ ಗಗನ್ ಯಾನ್ 2024 ಸೇರ್ದ್ ನನಲಾತ್ ಬಾಹ್ಯಾಕಾಶ ಯೋಜನೆಲೆನ ಮಾಡೆಲ್‌ಲು ತೂಯೆರ ತಿಕ್ಕುವ.

ತಾಲೂಕ್‌ದ ಮಾತಾ ಪ್ರೌಢಶಾಲೆದ ಜೋಕುಲು ಅಂಚೆನೆ ಸಾರ್ವಜನಿಕೆರ್ ಉಂದೆತ್ತ ಪ್ರಯೋಜನ ಪಡೆಯೊಡು ಪಂದ್ ಕರ್ನಾಟಕ ರಾಜ್ಯ ವೈಜ್ಞಾನಿಕ ಸಂಶೋಧನಾ ಪರಿಷತ್ತ್‌ದ ಜಿಲ್ಲಾ ಘಟಕೊದ ಉಪಾಧ್ಯಕ್ಷೆರ್ ಡಾ. ಅನುರಾಧಾ ಕುರುಂಜಿ ಮೇರ್ ತೆರಿಪಾದೆರ್.