ಪುತ್ತೂರ್ದ ಸುದ್ದಿ | Puttur News

ಪ್ರವೀಣ್ ನೆಟ್ಟಾರು ತೀರ್ದ್ ಇನಿಕ್ ಒಂಜಿ ವರ್ಷ

ಆನಿ ರಾತ್ರೆ ತನ್ನ ಚಿಕನ್ ಸೆಂಟರ್ ಮುಚ್ಚಿದ್ ಇಲ್ಲಗ್ ಪೋನಗ ಗುಂಪೊಂಜಿ ಬತ್ತ್ ದ್ ತಲವಾರ್‌ಡ್ ಹಾಕ್‌ದ್ ಗಂಬೀರವಾದ್ ಗಾಯ ಆಯಿನ ಆರ್ ಪುತ್ತೂರು ಆಸ್ಪತ್ರೆಗ್ ಪೋಪಿನ ಸಾದಿಡ್ ತನ್ನ ಪ್ರಾಣನೆ ಕಳೆಯೊಂಡೆರ್.

ನೆಟ್ಟಾರು ಶೇಖರ ಪೂಜಾರಿ-ರತ್ನಾವತಿ ಮೊಕ್ಲೆನ ಒರಿಯೆ ಮಗೆ ಪ್ರವೀಣ್ ಕಾಲೇಜ್ ಜೀವನದ ಬೊಕ್ಕ ಕೆಲವ್ ವೃತ್ತಿ ಮಲ್ತ್ ದ್ ಅಕೇರಿಗ್ ಮಾಸ್ತಿಕಟ್ಟೆದ ಅಕ್ಷಯ ಚಿಕನ್ ಸೆಂಟರ್‌ದ ಔಟ್ಲೆಟ್ ಮಲ್ತೊಂದಿತ್ತೆರ್. ಸಂಘ ಸಂಸ್ಥೆಡ್ ಕ್ರಿಯಾಶೀಲರಾದ್ ಪರೋಪಕಾರಿ ವ್ಯಕ್ತಿಯಾದಿತ್ತೆರ್.

ಒಂಜಿ ವರ್ಷ ಆದ್ ಇತ್ತ್ಂಡಲ ಪ್ರವೀಣ್ ನೆಟ್ಟಾರ್‌ನ ಸಾವು ಗ್ ನ್ಯಾಯ ಒದಗಿಜಿ ಪಂದ್ ಜನಕ್ಕುಲು ನನಲ ಆಕ್ರೋಶ ವ್ಯಕ್ತ ಪಡಿಸಾವೊಂದುಲ್ಲೆರ್. ಪೊಲೀಸ್ ಬೊಕ್ಕ ಎನ್‌ಐಎ ತನಿಖೆದ ಪೊರ್ತುಡು ಐನ್ ಜನ ಆರೀಪಿಲೆನ್ ಪತ್ ದೆರ್.  ಬಾಕಿದ ಆರೋಪಿಲು ದೆಂಗ್‌ದ್ ಕುಲ್‌ದೆರ್. ಸುಳಿವು ಕೊರ್ನಕ್ಲೆಗ್ ಇನಾಮು ಘೋಷಣೆ ಮಲ್ದೆರ್. ಬಾಕಿ ಆರೋಪಿಲು ಶರಣಾಯಿಜಿಡ ಇಲ್ಲ್ ಬೊಕ್ಕ ಆಸ್ತಿನ್ ಜಪ್ತಿ ಮಲ್ಪುವ ಪಂದ್ ಘೋಷಣೆ ಮಲ್ದ್ಂಡ್.

ಈ ಮಾತ ಬೆಳವಣಿಗೆದ ಮಧ್ಯಡ್ ಒಂಜಿ ವರ್ಷ ಆದ್‌ಲ ಆಂಡ್. ಈ ನೆಂಪುಗಾದ್ ಸುಳ್ಯ ಬಿಜೆಪಿ ಮಂಡಲ ಸಮಿತಿರ್ದ್ ರಕ್ತದಾನ ಶಿಬಿರ ನಡತ್‌ಂಡ್.

ಆರ್ಯಾಪು ಗ್ರಾಪಂ ವೋಟುಡು ಪುತ್ತಿಲ ಪರಿವಾರದ ಸುಬ್ರಹ್ಮಣ್ಯ ಬಲ್ಯಾಯರೆಗ್ ಜಯ

ಪುತ್ತೂರು: ಆರ್ಯಾಪು ಗ್ರಾ.ಪಂ ದ ಆರ್ಯಾಪು ವಾರ್ಡ್-2 ಗ್ ನಡತಿನ ಉಪ ಚುನಾವಣೆಡ್ ಪುತ್ತಿಲ ಪರಿವಾರದ ಬೆಂಬಲಿತ ಅಭ್ಯರ್ಥಿ ಸುಬ್ರಹ್ಮಣ್ಯ ಬಲ್ಯಾಯ 499 ವೋಟ್‌ಡ್ ಗೆಲ್ತೆರ್.

ಜು.23 ದಾನಿ ನಡತಿನ ಉಪಚುನಾವಣೆಡ್ ಒಟ್ಟು 1237 ವೊಟ್‌ಡ್ 999 ವೋಟ್ ಚಲಾವಣೆ ಆತ್‌ಂಡ್. ನೆಟ್ ಪುತ್ತಿಲ ಪರಿವಾರದ ಬೆಂಬಲಿತ ಅಭ್ಯರ್ಥಿ ಸುಬ್ರಹ್ಮಣ್ಯ ಬಲ್ಯಾಯ 499 ವೋಟ್, ಕಾಂಗ್ರೆಸ್ ಬೆಂಬಲಿತ ಪುರುಷೋತ್ತಮ ಪ್ರಭು 353 ವೋಟ್ ಬೊಕ್ಕ ಬಿಜೆಪಿ ಬೆಂಬಲಿತ ಅಭ್ಯರ್ಥಿ ಜಗದೀಶ ಭಂಡಾರಿ 140 ವೋಟ್‌ನ್ ಪಡೆತೆರ್.

ಕರಿನ ವೋಟ್‌ಡ್ ಬಿಜೆಪಿ ಪಡೆಯಿನ ಸ್ಥಾನನ್ ಈ ಸಲ ಪುತ್ತಿಲ ಪರಿವಾರ ಪಡೆದ್ಂಡ್.

ತೋಟಗಾರಿಕೆ ಎಂ.ಎಸ್ಸಿಡ್ ಬಂಗಾರ್ ದ ಪದಕ ಪಡೆಯಿನ ಚೈತ್ರ ಕೆ.

ಪುತ್ತೂರು: ಕೃಷಿ ಬೊಕ್ಕ ತೋಟಗಾರಿಕಾ ವಿಶ್ವವಿದ್ಯಾಲಯ ಶಿವಮೊಗ್ಗ ನೆತ್ತ 2021-22 ನೇ ಸಾಲ್‌ದ “ತೋಟದ ಬೆಳೆಗಳು, ಸಾಂಬಾರ, ಔಷಧೀಯ ಬೊಕ್ಕ ಸುಗಂಧ ದ್ರವ್ಯ ಬೆಳೆ” ವಿಜ್ಞಾನ ವಿಷಯಡ್ ಎಂ.ಎಸ್ಸಿ(ತೋಟಗಾರಿಕೆ) ಸ್ನಾತಕೋತ್ತರ ಪದವಿದ 10 ಅಂಕಡ್ ಸರಾಸರಿ 9.40 ಅಂಕ ಪಡೆಯಿನ ಪುತ್ತೂರು ತಾಲೂಕು ನರಿಮೊಗರು ಗ್ರಾಮದ ಕೈಪಂಗಳ ಬೊಳ್ಳಮೆದ ಚೈತ್ರ ಕೆ. ಬಂಗಾರ್‌ದ ಪದಕ ಪಡೆತೆರ್.

ಜು.21 ದಾನಿ ಶಿವಮೊಗ್ಗ ವಿಶ್ವವಿದ್ಯಾಲಯಡ್ ನಡತ್‌ನ “ಘಟಿಕೋತ್ಸವ ಸುಗ್ಗಿ ಸಂಭ್ರಮ-8” ಈ ಲೇಸ್‌ಡ್ ರಾಜ್ಯದ ರಾಜ್ಯಪಾಲೆರ್ ಬೊಕ್ಕ ವಿಶ್ವವಿದ್ಯಾಲಯದ ಕುಲಾಧಿಪತಿ ಥಾವರ್‌ಚಂದ್ ಗೆಹ್ಲೋಟ್ ಪ್ರಶಸ್ತಿ ಪ್ರದಾನ ಮಲ್ತೆರ್.

ಈ ಪೊರ್ತುಡು ಮಾಜಿ ಮುಖ್ಯಮಂತ್ರಿ ಬಿ.ಎಸ್ ಯಡಿಯೂರಪ್ಪ, ಕೃಷಿ ಸಚಿವೆರ್ ಬೊಕ್ಕ ವಿಶ್ವವಿದ್ಯಾಲಯದ ಸಹ ಕುಲಾಧಿಪತಿ ಎನ್. ಚಲುವರಾಯಸ್ವಾಮಿ ಲೇಸ್‌ಡ್ ಪಾಲ್ ಪಡೆಯೆರ್.

ಚೈತ್ರ ಮೇರ್ ಪುತ್ತೂರು ತಾಲೂಕುದ ನರಿಮೊಗರು ಗ್ರಾಮದ ಕೈಪಂಗಳ ಬೊಳ್ಳಮೆ ನಿವಾಸದ ಶಿವಮ್ಮ ಬೊಕ್ಕ ಪದ್ಮಪ್ಪ ಪೂಜಾರಿ ಲೆನ ಮಗಲ್.