ಪುತ್ತೂರ್ದ ಸುದ್ದಿ | Puttur News

ಪುತ್ತೂರು ಖಾಸಗಿ ಬಸ್ಸ್ ಡ್ ಮಾದಕ ಸೊತ್ತು ಸಾಗಾಟ; ರಡ್ಡ್ ಜನ ಅರೆಸ್ಟ್

ಪುತ್ತೂರು: ಬೆಂಗ್ಲೂರು-ಕುಡ್ಲ ಖಾಸಗಿ ಬಸ್‌ಡ್ ಮಾದಕ ಸೊತ್ತುಲೆನ್ ಸಾಗಾಟ ಮಲ್ತೊಂದು ಇತ್ತಿನ ರಡ್ಡ್ ಜನನ್ ಪೊಲೀಸೆರ್ ಪತ್ತಿನ ಘಟನೆ ಇನಿ ಬೊಲ್ಪುಗ್ ಮುರಟ್ ನಡತ್‌ಂಡ್.

ಬೆಂಗ್ಲೂರುರ್ದ್ ಪುತ್ತೂರ್‌ಗ್ ಬತ್ತ್ ದ್ ಕುಡ್ಲಗ್ ಪೋಪುನ ಖಾಸಗಿ ಬಸ್‌ಡ್ ಮಾದಕ ಸೊತ್ತುಲೆನ್ ಸಾಗಾಟ ಮಲ್ತೊಂದು ಇತ್ತಿನವು ಗೊತ್ತಾದ್ ಮುರತಲ್ಪ ಬಸ್‌ನ್ ಉಂತಾದ್ ತೂನಗ ಮಾದಕ ಸೊತ್ತುಲು ಇಪ್ಪುನವು ಗೊತ್ತಾತ್‌ಂಡ್.

ಪೊಲೀಸೆರ್ ರಡ್ಡ್ ಜನನ್ ಅರೆಸ್ಟ್ ಮಲ್ತ್ ದ್ ವಿಚಾರಣೆ ಮಲ್ತೊಂದುಲ್ಲೆರ್ ಪಂದ್ ತೆರಿದ್ ಬೈದುಂಡ್.

ಏರೋ ಮಲ್ತಿನ ತಪ್ಪುಗ್ ಕಡಬದ ಯುವಕೆ ಸೌದಿಡ್ ಜೈಲ್ ಪಾಲ್….!!!

ಕಡಬ ತಾಲೂಕ್ ದ ಊತ್ತೂರು ಗ್ರಾಮದ ಮುಜೂರು ದಿ. ಕೆಂಚಪ್ಪ ಗೌಡ ಬೊಕ್ಕ ಹೇಮಾವತಿ ದಂಪತಿನ ಮಗೆ ಚಂದ್ರಶೇಖರ್ ಎಮ್. ಕೆ ಮೇರ್ ರಿಯಾದ್ (ಸೌದಿ ಅರೇಬಿಯಾ) ಅಲ್ಪಾನರ್ ಸೆರಾಮಿಕ್ಸ್ ಪನ್ಪುನ ಕಂಪನಿಡ್ ಕೆಲಸ ಮಲ್ತೊಂದು ಇತ್ತೆರ್. ಹ್ಯಾಕರ್ ನ ಮೋಸದಾಟಗ್ ತಿಕ್ಕಿನ ಚಂದ್ರಶೇಖರ್ ಇತ್ತೆ ಜೈಲ್ ಡ್ ಲಾಕ್ ಆತೆರ್. 2022 ನವೆಂಬರ್‌ರ್ದ್ ರಿಯಾದ್ ಜೈಲ್‌ಡೆ ದಿನ ಕಳೆಯೊಂದು ಉಲ್ಲೆರ್.

ಚಂದ್ರಶೇಖರ್ ಕರಿನ ವರ್ಷ ಮೊಬೈಲ್ ಬೊಕ್ಕ ಸಿಮ್ ದೆತೊನಿಯೆರೆ ರಿಯಾದ್ ಡ್ ಇಪ್ಪುನ ಮೊಬೈಲ್ ಅಂಗಡಿಗ್ ಪೋದ್ ಇತ್ತೆರ್. ಈ ಪೊರ್ತುಡು ಚಂದ್ರಶೇಖರ್ ಅರೆರ್ದ್ 2 ಸಲ ತಂಬ್‌ನ್ ದೆತೊಂದೆರ್. ಒಂಜಿ ವಾರದ ಬೊಕ್ಕ ಆ ಮೊಬೈಲ್ ನಂಬರ್‌ಗ್ ಅರೆಬೀಕ್ ಭಾಷೆಡ್ ಮೆಸೇಜ್ ಬತ್‌ಂಡ್ ಮೆಸೇಜ್‌ನ್ ಕ್ಲಿಕ್ ಮಲ್ತಿನ ಚಂದ್ರಶೇಖರ್ ಸಿಮ್ ದ ಬಗೆಟ್ ಮಾಹಿತಿ ಬೊಕ್ಕ ಓಟಿಪಿ ನ್ ಕೆಂಡೆರ್. ಓಟಿಪಿ ಪನ್ನ ಚಂದ್ರಶೇಖರ್ ಬೊಕ್ಕ ಕೆಲಸಗ್ ಪೋಯೆರ್. ನೆತ್ತ ಒಟ್ಟಿಗೆ ತನ್ನ ಎಂಗೇಜ್ಮೆಂಟ್‌ದ ಬೇಲೆಡ್ ಒಂತೆ ಬ್ಯುಸಿ ಆದ್ ಇತ್ತೆರ್. ನೆತ್ತ ನಡುಟ್ ಒಂಜಿ ದಿನ ಒರಾನೆ ಪೊಲೀಸೆರ್ ಬತ್ತ್ ದ್ ಚಂದ್ರಶೇಖರ್‌ ಮೆರೆನ್ ಅರೆಸ್ಟ್ ಮಲ್ತೆರ್.

ರಿಯಾದ್ ದೇಶದ ಚಂದ್ರಶೇಖರ್ ಅರೆಗ್ ಗೊತ್ತಿಜಂದೆ ಅಲ್ಪದ ಬ್ಯಾಂಕ್ ಒಂಜೆಟ್ ಅಕೌಂಟ್ ಮಲ್ತ್ ಇತ್ತೆರ್. ಬೊಕ್ಕ ಅವ್ವೇ ದೇಶದ ಪೊಂಜೊವ್‌ನ 22 ಸಾವಿರ ಈ ಖಾತೆಗ್ ಜಮೆ ಆಯಿನ ಕೂಡ್ಲೆ ಅವೆರ್ದ್ ಬೇತೆ ದೇಶಗ್ ವರ್ಗಾವಣೆ ಆದ್ ಇತ್ತ್ಂಡ್. ಕಾಸ್ ಕಳೆವೊನ್ನ ಪೊಂಜೊವ್ ಚಂದ್ರಶೇಖರ್‌ನ ಖಾತೆಗ್ ಜಮೆ ಆಯಿನೆನ್ ಗಮನಿಸಾದ್ ಅರೆನ ಮಿತ್ತ್ ದೂರು ಕೊರ್ತೆರ್. ಅಂಚಾದ್ ಪೊಲೀಸೆರ್ ಚಂದ್ರಶೇಖರ್‌ನ್ ಅರೆಸ್ಟ್ ಮಲ್ತ್ ದೆರ್. ಹ್ಯಾಕರ್ ನ ಕಿರುಕುಳರ್ದ್ ಚಂದ್ರಶೇಖರ್ ಜೈಲ್‌ಡ್ ಬಂಧಿ ಆತೆರ್. ಮಗೆ ಬರ್ಪೆ ಪಂದ್ ಅಪ್ಪೆ ಪಕ್ಕಿದಂಚ ಕಾತೊಂದು ಕುಲ್ದೆರ್. ಮಗನ್ ಬುಡ್ಪಾಯೆರೆ ಕರಿನ 8 ತಿಂಗೊಲ್‌ರ್ದ್ ಬಂಗ ಬರೊಂದು ಉಲ್ಲೆರ್. ಚಂದ್ರಶೇಖರ್ ಬೇಲೆ ಮಲ್ತೊಂದು ಇತ್ತಿನ ಕಂಪನಿಲ ನೆತ್ತ ಬಗ್ಗೆ ಒವ್ವೇ ಮಾಹಿತಿಲ ಪನಂದೆ ಅನ್ಯಾಯ ಮಲ್ತೆರ್ ಪಂದ್ ಅಪ್ಪೆ ಕಣ್ಣ ನೀರ್ ಪಾಡೊಂದುಲ್ಲೆರ್.

ಚಂದ್ರಶೇಖರ್ ಮೇರೆನ್ ಜೈಲ್‌ರ್ದ್ ಬುಡ್ಪಾಯೆರೆ ಕೇಂದ್ರ ಸರಕಾರ, ವಿದೇಶಾಂಗ ಸಚಿವೆರ್ ಒತ್ತಡ ಪಾಡೊಡು ಪಂದ್ ದ.ಕ. ಜಿಲ್ಲಾಧಿಕಾರಿನ ಮುಖೇನ ಮನವಿ ಸಲ್ಲಿಸಾದೆರ್. ಈ ಮುಖೇನ ಒವ್ವೆ ತಪ್ಪು ಮಲ್ಪಂದೆ ಸೆರೆವಾಸ ಅನುಭವಿಸೊಂದು ಇಪ್ಪುನ ಚಂದ್ರಶೇಖರ್‌ಗ್ ನ್ಯಾಯ ಒದಗಾವುನಂಚ ಎಂಡೊ ವಿರೋಧಿ ಹೋರಾಟ ಸಮಿತಿ ಆಗ್ರಹಿಸಾದುಂಡು.

ಪುತ್ತೂರ್‌ ಅಕ್ಷಯ ಕಾಲೇಜ್ ಡ್ ಆಟಿದ ಕೂಟ

ಸಂಪ್ಯ: ಅಕ್ಷಯ ಕಾಲೇಜ್ ಪುತ್ತೂರ್, ರಾಷ್ಟ್ರೀಯ ಸೇವಾ ಯೋಜನೆ ಬೊಕ್ಕ ಐಕ್ಯೂಎಸಿ ನೆತ್ತ ಒಟ್ಟು ಸೇರಿಗೆಡ್ ಆಟಿದ ಕೂಟ ಕಾಲೇಜ್‌ದ ಸಭಾಂಗಣಡ್ ಆ.16 ದಾನಿ ನಡತ್‌ಂಡ್.

ಲೇಸ್‌ದ ಉದಿಪನನ್ ತುಳು ವಿದ್ವಾಂಸೆರ್ ಕೆ.ಕೆ ಪೇಜಾವರ ನಡಪಾಯೆರ್. ಅಕ್ಷಯ ಕಾಲೇಜ್‌ದ ಗುರ್ಕಾರ್ಲು ಜಯಂತ್ ನಡುಬೈಲ್ ಲೇಸ್‌ದ ಗುರ್ಕಾಮೆನ್ ವಹಿಸಾದ್ ಇತ್ತೆರ್. ಮಲ್ಲ ಬಿನ್ನೆರಾದ್ ಕಲ್ಪಾದಿ, ತುಳು ಸಾಹಿತಿ, ಸ.ಹಿ.ಪ್ರಾ. ಶಾಲೆ ಕಣಿಯೂರು ಮುಲ್ತ ರೇಣುಕಾ ಕಣಿಯೂರು, ಅಕ್ಷಯ ಕಾಲೇಜ್‌ದ ನಿರ್ದೇಶಕೆರ್ ಕಲಾವತಿ ಜಯಂತ್ ಪಾಲ್ ಪಡೆದಿತ್ತೆರ್.

ರಾಷ್ಟ್ರೀಯ ಸ್ವಯಂ ಸೇವಾ ಯೋಜನೆದ ಅಧಿಕಾರಿಲು ಕಿಶೋರ್ ಕುಮಾರ್ ರೈ, ಐಕ್ಯೂಎಸಿ ಸಂಯೋಜಕೆರ್ ರಾಕೇಶ್ ಕುಳದಪಾರೆ, ಆಡಳಿತಾಧಿಕಾರಿ ಅರ್ಪಿತ್ ಟಿ.ಎ, ಪ್ರಾಂಶ್‌ಪಾಲೆರ್ ಸಂಪತ್ ಕೆ ಪಕ್ಕಳ ಲೇಸ್‌ಡ್ ಪಾಲ್ ಪಡೆದಿತ್ತೆರ್.

ಕಜ್ಜೊಡು ಇಸೇಸವಾದ್ ಚಾವಡಿಡ್ ಆಟಿ ಕಳೆಂಜೆ, ಸುಗ್ಗಿ ನಲಿಕೆ, ಪಾಡ್ದನೊ, ಪಿಲಿಯೇಸ, ತುಳು ಗೊಬ್ಬುಲು, ಪೊರ್ಲ ಪದೊಕುಲು, ಪುಚ್ಚೆ ಪಜ್ಜೆಡ್ ತುಳುವೆರೆ ತುತ್ತೈತೊದ ಐಸಿರ, ಆಟಿದ ಅಟಿಲಾಯಿನ ಪತ್ರೊಡೆ, ಕನಿಲೆ ಗಸಿ, ತೇಟ್ಲ, ತಜಂಕ್ ಪತ್ರೊಡೆ, ತೇರೆ ಕೊಡಿ ಚಟ್ನಿ, ಪೆಲಕಾಯಿ ಗೂಂಜಿ ಚಟ್ನಿ, ಪೆಲಕಾಯಿ ಪಾಯಸ, ಪೂಂಬೆ ಚಟ್ನಿ ಬೊಕಲಾತ್ 90 ಬಗೆತ ಆಟಿದ ರುಚಿಕುಲು ಈ ಕೂಟಡ್ ಇತ್‌ಂಡ್.

ಆರ್ಯಾಪು ಗ್ರಾ.ಪಂ ರಡ್ಡ್ ಜನ ಜಿಜೆಪಿ ಬೆಂಬಲಿತ ಸದಸ್ಯೆರ್ ಕಾಂಗ್ರೆಸ್ ಸೇರ್ಪಡೆ

ಪುತ್ತೂರು: ಆರ್ಯಾಪು ಗ್ರಾ.ಪಂ ದ ರಡ್ಡ್ ಜನ ಸದಸ್ಯೆರ್ ಶಾಸಕೆರ್ ಅಶೋಕ್ ರೈ ಬೊಕ್ಕ ಬ್ಲಾಕ್ ಕಾಂಗ್ರೆಸ್ ಅಧ್ಯಕ್ಷೆರ್ ಎಂ.ಬಿ ವಿಶ್ವನಾಥ ರೈ ಮುತಾಲಿಕೆಡ್ ಕಾಂಗ್ರೆಸ್ ಪಕ್ಷಗ್ ಸೇರ್ಪಡೆ ಆಯೆರ್.

ಆರ್ಯಾಪು ಮೂಜನೇ ವಾರ್ಡ್ ದ ಬಿಜೆಪಿ ಬೆಂಬಲಿತ ಸದಸ್ಯೆರ್ ಪವಿತ್ರ ರೈ ಬೊಕ್ಕ ಪೂರ್ಣಿಮಾ ರೈ ಕಾಂಗ್ರೆಸ್ ಸೇರಿನ ಗ್ರಾ.ಪಂ ಸದಸ್ಯೆರ್. ಗ್ರಾ.ಪಂ ಅಧ್ಯಕ್ಷ, ಉಪಾಧ್ಯಕ್ಷೆರ್‌ನ ಆಯ್ಕೆದ ಬೆರಿಟ್ಟೆ ಬಿಜೆಪಿ ಸದಸ್ಯೆರ್ ಬಿಜೆಪಿನ್ ಬುಡ್ದು ಕಾಂಗ್ರೆಸ್ ಸೇರ್ಪಡೆ ಆಯಿನ ಕೂತೂಹಲಗ್ ಕಾರಣ ಆತ್‌ಂಡ್.

ಅಕ್ಷಯ ಕಾಲೇಜ್‌ಡ್ ಗ್ರಂಥಪಾಲಕರ ದಿನಾಚರಣೆ, ಪುಸ್ತಕ ಪ್ರದರ್ಶನ

ಪುತ್ತೂರು: ಅಕ್ಷಯ ಎಜುಕೇಶನಲ್ & ಚಾರಿಟೇಬಲ್ ಟ್ರಸ್ಟ್(ರಿ) ಕಾಲೇಜ್‌ಡ್ ಆ. 12 ಶನಿವಾರ IQAC & Library Information Science ನೆತ್ತ ಮುತಾಲಿಕೆಡ್ ಗ್ರಂಥಪಾಲಕರ ದಿನಾಚರಣೆ ನಡತ್‌ಂಡ್

ಲೇಸ್‌ನ್ ಪುತ್ತೂರು ಧನ್ವಂತರಿ ಆಯುರ್ವೇದಿಕ್ ಕ್ಲಿನಿಕ್‌ನ ವೈದ್ಯರಾಯಿನ ಡಾ. ಶ್ಯಾಮ್‌ಪ್ರಸಾದ್ ಎಂ ಉದಿಪನ ಮಲ್ತೆರ್. ಬೊಕ್ಕ ಪಾತೆರ್ನ ಆರ್, ಕಲ್ಪಾರ್ಥಿಲು ಓದುನೆನ್ ಹವ್ಯಾಸವಾದ್ ಮಲ್ಪುನ ಬದಲ್ ನಿರಂತರವಾದ್ ಓದುನೆನ್ ರೂಡಿ ಮಲ್ಪೊಡು ಪಂಡೆರ್.

ಲೇಸ್‌ದ ಸಂಪನ್ಮೂಲ ವ್ಯಕ್ತಿಯಾದ್ ಕಾಲೇಜು ಶಿಕ್ಷಣ ಇಲಾಖೆದ ಮಾಜಿ ಲೈಬ್ರೆರಿಯನ್ ಪ್ರೊ. ರಾಮಚಂದ್ರ ಪಾತೆರ್ದ್ ಡಾ.ಎಸ್.ಆರ್ ರಂಗನಾಥನ್ ಅರೆನ ಪುಟ್ಟಿನ ದಿನನ್ ಗ್ರಂಥಪಾಲಕರ ದಿನಾಚರಣೆಯಾದ್ ಒವ್ ಕಾರಣಗ್ ಆಚರಣೆ ಮಲ್ಪೆರ್ ಅಂಚನೆ ರಂಗನಾಥನ್ ಅರೆನ ಜೀವನ ಶೈಲಿದ ಗ್ರಂಥಾಲಯಗ್ ಕೊರ್ನ ಕೊಡುಗೆದ ಬಗ್ಗೆ ಸಂಕ್ಷಿಪ್ತವಾದ್ ಮಾಹಿತಿ ಕೊರ್ದು, ಕಲ್ಪಾರ್ಥಿಲು ಜಾಸ್ತಿ ಸಮಯನ್ ಗ್ರಂಥಾಲಯಡ್ ಕಲೆಂಡ ಉತ್ತಮ ವ್ಯಕ್ತಿಯಾದ್ ಸಮಾಜಡ್ ಬದುಕೊಲಿ ಪಂಡೆರ್.

ಗ್ರಂಥಪಾಲ ದಿನತ ಮುಖೇನ ನಡತ್‌ನ ಪುಸ್ತಕ ವಿಮರ್ಶೆ ಪಂತೊಡ್ ಸುರುತ ಇನಾಮ್ ಮನ್ವಿತ್ ಬೊಕ್ಕ ರಡ್ಡನೇ ಇನಾಮು ರಾಕೇಶ್ ಪಡೆತೆರ್. ಅಂಚನೆ ಜ್ಞಾಪಕ ಪರೀಕ್ಷೆಡ್ ಸುರುತ ಇನಾಮ್ ರಕ್ಷಿತ್, ರಡ್ಡನೇ ಇನಾಮು ವರ್ಷಿತ್ ಮೊಕ್ಲೆಗ್ ಇನಾಮುನ್ ಪಟ್ಯೆರ್.

ಲೇಸ್‌ದ ಬೊಕ್ಕ ಕಾಲೇಜ್‌ದ ಗ್ರಂಥಾಲಯಡ್ ಪುಸ್ತಕ ಪ್ರದರ್ಶನ ನಡೆತ್‌ಂಡ್. ಲೇಸ್ ಡ್ ಅಕ್ಷಯ ಕಾಲೇಜ್‌ದ ಚೇರ್‌ಮಾನ್ ಜಯಂತ್ ನಡುಬೈಲ್, ಕಾಲೇಜ್ ದ ಪ್ರಾಂಶುಪಾಲೆರಾಯಿನ ಸಂಪತ್ ಪಕ್ಕಳ, ಆಡಳಿತಾಧಿಕಾರಿ ಅರ್ಪಿತ್ ಟಿ.ಎ ಬೊಕ್ಕ ಪ್ರಭಾವತಿ ಇತ್ತೆರ್.

ಉಪನ್ಯಾಸಕಿ ಸೌಜನ್ಯ ಸ್ವಾಗತ ಮಲ್ತ್, ಸಂಯೋಜಕೆರಾಯಿನ ರಾಕೇಶ್ ಕುಲದಪಾರೆ ಸೊಲ್ಮೆ ಸಂದಾಯೆರ್. ಉಪನ್ಯಾಸಕೆರ್ ಕಿಶನ್ ರಾವ್ ಲೇಸ್ ದ ನಿರೂಪಣೆ ಮಲ್ತೆರ್.

ಪುತ್ತೂರ್‌ಡ್ ಚರುಂಬುರಿ ಪರ್ಬ

ಪುತ್ತೂರ್: “ಪ್ರಭು ಚರುಂಬುರಿ” ಮುತಾಲಿಕೆಡ್ ಕೊಂಬೆಟ್ಟು ಬಂಟರ ಭವನದ ಕೈತಲ್ ಜಿ.ಎಲ್ ಟ್ರೇಡ್ ಸೆಂಟರ್‌ದ ಕಟ್ವಾನಡ್ ” ಚರುಂಬುರಿ ಪರ್ಬ” ಗ್ ಚಾಲನೆ ಕೊರಿಯೆರ್. ಆ.12-16 ಮುಟ ಬಯ್ಯ 4 ಗಂಟೆರ್ದ್ 10 ಗಂಟೆ ಮುಟ ಚರುಂಬುರಿ ಪರ್ಬ ನಡಪೆರೆ ಉಂಡು.

ಈ ಲೇಸ್ ಗ್ ಭಟ್ ಆಂಡ್ ಭಟ್ ಯೂಟ್ಯೂಬ್ ವಾಹಿನಿದ ಸ್ಥಾಪಕೆರ್ ಸುದರ್ಶನ್ ಭಟ್ ಕಾರ್ಯಕ್ರಮದ ಬಿನ್ನೆರಾದ್ ಬತ್ ಇತ್ತೆರ್. ಈ ಪೊರ್ತುಡು ಪುತ್ತೂರ್‌ದ ಡಾ. ಶಿವರಾಮ ಭಟ್ ಕ್ಲಿನಿಕ್‌ದ ಕಂಪೌಂಡರ್ ನರಸಿಂಹ ಭಟ್ ಮೇರೆಗ್ ಮಾನಾದಿಗೆ ಮಲ್ತೆರ್.

15 ಬಗೆತ ಚರುಂಬುರಿ
ಜಿಂಜರ್ ಗಾರ್ಲಿಕ್, ರಾಕೆಟ್, ನಾರ್ಮಲ್, ಗರಿಗರಿ, ರಾಜಾ ಸ್ಪೆಷಲ್ ಇಂಚನೆ 15 ಬಗೆತ ಚರುಂಬುರಿ , 20 ರೂ- 50 ರೂ ಮುಟದ ಚರುಂಬುರಿ ಮೂಲ್ ತಿಕ್ಕುಂಡು.

ಸೌಜನ್ಯ ಕೇಸ್ ಪಿರ ತನಿಖೆ ಮಲ್ತ್ ಜಿಂಡ ಸಂಘರ್ಷ ಹೋರಾಟ: ಅರುಣ್ ಪುತ್ತಿಲ

ಪುತ್ತೂರು: ಸೌಜನ್ಯ ಕೇಸ್ ದ ಪಿರ ತನಿಖೆ ಮಲ್ಪರೆ ಒತ್ತಾಯ ಮಲ್ತ್ ದ್ ಪುತ್ತಿಲ ಪರಿವಾರ್ದ್ ದರ್ಬೆರ್ದ್ ಪುತ್ತೂರು ಬಸ್ ಸ್ಟ್ಯಾಂಡ್ ಮುಟ್ಟ ಸೋಮಾರ ಮೆರವಣಿಗೆ ನಡ ತ್ಂಡ್.

ಸೌಜನ್ಯ ಅತ್ಯಾಚಾರ ಬೊಕ್ಕ ಕೆರ್ತಿನ ಬಗೆಟ್ಟ್ ಸರಕಾರ ಮರು ತನಿಖೆ ಮಲ್ತಿಜಿಂಡ ದುಂಬುದ ದಿನಟ್ ಸಂಘರ್ಷದ ಹೋರಾಟ ನಡಪುಂಡ್ ಪಂದ್ ಅರುಣ್ ಕುಮಾರ್ ಪುತ್ತಿಲ ಸಭೆಟ್ ತೆರಿಪಾಯೆರ್.

ಅಂಚನೆ ಈ ಪ್ರತಿಭಟನೆದ ಪೊರ್ತುಡು ಜನಕುಲು ಅಂಗಡಿನ್ ಬಂದ್ ಮಲ್ಪುನ ಮುಕೇನ ಈ ಹೋರಾಟಗ್ ಬೆಂಬಲ ಕೊರಿಯೆರ್.

ಈ ಪೊರ್ತುಡು ಸೌಜನ್ಯ ಪರ ಹೋರಾಟ ಗಾರೆರ್ ಮಸ್ತ್ ಸಂಖ್ಯೆಡ್ ಪಾಲ್ ಪಡೆದಿತ್ತೆರ್.