ಪುತ್ತೂರ್ದ ಸುದ್ದಿ | Puttur News

ಕುಕ್ಕೆ ಶ್ರೀ ಸುಬ್ರಹ್ಮಣ್ಯಡ್ ಕೊರೊನಾ ಮಹಾಮಾರಿ ನಿಯಂತ್ರಣಗ್ ಅಂಚನೇ ಲೋಕ ಕಲ್ಯಾಣಾರ್ಥವಾದ್ ವಿಶೇಷ ಪೂಜೆ

ಕುಡ್ಲ , ಮೇ 8: ದೇಶಡ್ ಕೊರೊನಾ ಸೋಂಕು ಪ್ರಕರಣ ದಿನರ್ದ್ ದಿನ ಜಾಸ್ತಿ ಆವೊಂದು ಉಪ್ಪುನೆರ್ದಾವರ ಕೊರೋನ ನಿಯಂತ್ರಣಗ್ ಲಸಿಕೆ ತಯಾರ್ ಆಂಡಲಾ ಒವ್ವೆ ಬದಲಾವಣೆ ತೋಜೋoದು ಇಜ್ಜಿ.

ಪ್ರಪಂಚದ ಅತಿರಥ ಮಹಾರಥ ವಿಜ್ಞಾನಿಲೆ ಅನೇಕ ಸಂಶೋಧನೆ ಮಲ್ತುಂಡಲ , ಕೊರೊನಾ ಪನ್ಪಿ ಮಹಾಮಾರಿನ್ ಕಟ್ಟ್ ದ್ ಪಾಡ್ಯರೆ ಸಾಧ್ಯ ಆವೊಂದು ಇಜ್ಜಿ. ಇಂಚಿಪ್ಪ ಪೊರ್ತುಡು ಕೊರೊನಾನ್ ಶಮನ ಮಲ್ಪರೆ ಮಂತ್ರಶಕ್ತಿದ ಪ್ರಯತ್ನಲ ನಡತೊಂದು ಉಂಡು.

ದಕ್ಷಿಣ ಭಾರತದ ಪುಗಾರ್ತೆ ಪಡೆಯಿನ ನಾಗಕ್ಷೇತ್ರ ಕುಕ್ಕೆ ಸುಬ್ರಹ್ಮಣ್ಯಡ್ ಕೊರೊನಾ ಮಹಾಮಾರಿ ನಿಯಂತ್ರಣಗ್ ಅಂಚನೇ ಲೋಕ ಕಲ್ಯಾಣಾರ್ಥವಾದ್ ವಿಶೇಷ ಪೂಜೆನ್ ಸುರು ಮಲ್ದೆರ್. ಮೇ 5ರ್ದ್ ಮೇ 11 ಮುಟ ನಿರಂತರ ಒಂಜಿ ವಾರದ ಪೂಜಾ ಹೋಮ ಹವನಲು ನಡತೊಂದು ಉಂಡು.

ಸುರತ್ಕಲ್‌ಡ್ ಕೊರೋನ ಸೋಂಕಿತೆರ್ನ ಐಸೋಲೇಶನ್ ಕೇಂದ್ರ ಸ್ಥಾಪನೆ : ಡಾ.ಭರತ್ ಶೆಟ್ಟಿ

ಸುರತ್ಕಲ್, ಮೇ 8: ಸುರತ್ಕಲ್‌ಡ್ ಕೊರೋನ ಸೋಂಕಿತೆರ್ನ ಐಸೋಲೇಶನ್ ಕೇಂದ್ರ ಸ್ಥಾಪಿಸಾವುನ ಇಂಗಿತ ವ್ಯಕ್ತಪಡಿಸಾದಿನ ಶಾಸಕ ಡಾ.ಭರತ್ ಶೆಟ್ಟಿ ಗುರುವಾರ ಅಧಿಕಾರಿಲೆನೊಟ್ಟಿಗೆ ಜಾಗೆ ಪರಿಶೀಲನೆ ಮಲ್ತೆರ್ .

ಸುರತ್ಕಲ್ ಪೊಲೀಸ್ ಠಾಣೆದ ಪಿರವು ಉಪ್ಪುನ ಸಮಾಜ ಕಲ್ಯಾಣ ಇಲಾಖೆಗಗ್ ಸೇರಿನ ಹಾಸ್ಟೆಲ್, ಎನ್‌ಐಟಿಕೆ ಹಾಸ್ಟೆಲ್ ಬೊಕ್ಕ ಹೊಸಬೆಟ್ಟುಡುಪ್ಪುನ ಪ್ರಾಕೃತಿಕ ವಿಕೋಪ ನಿರ್ವಹಣಾ ಭವನನ್ ಪರಿಶೀಲನೆ ಮಲ್ತೆರ್ .

ಎನ್‌ಐಟಿಕೆಡ್ ಹಾಸ್ಟೆಲ್‌ದ ಮೂಜಿ ಕಟ್ಟಡ ಪರಿಶೀಲನೆ ಮಲ್ದೆರ್ , ಇರ್ನೂದು ಬೆಡ್‌ಲೆದ ಸಾಮರ್ಥ್ಯ ಉಪ್ಪುನ ಕೇಂದ್ರನ್ ತಯಾರ್ ಮಲ್ದೆರ್.

ಇನಿರ್ದ್ ಪುತ್ತೂರು ಪೇಂಟೆಗ್ ಪ್ರವೇಶ ಇಜ್ಜಿ

ಪುತ್ತೂರು, ಮೇ 6: ಇನಿರ್ದ್ ಪುತ್ತೂರು ಪೇಂಟೆಡ್ ತಿರ್ಗುಂಡ ಪೊಲೀಸೆರ್ ಕ್ರಮ ದೆತೊನುವೆರ್.

ಕೊರೋನ ಜಾಸ್ತಿ ಆವೊಂದು ಇತ್ತುಂಡಲ ಜನ ನನಲಾ ಕ್ಯಾರೇ ಆವಂದಿಲಕ ಅಕ್ಲೆಗ್ ಬೋಡಾಯಿಲಕ ಪೇಂಟೆಗ್ ಬರೊಂದು ಉಪ್ಪುನ ಜಾಸ್ತಿ ಆವೊಂದು ಉಪ್ಪುನ ನೆಲೆಟ್ಟ್ ಅನಗತ್ಯವಾದ್ ಪೇಂಟೆಗ್ ಬರ್ಪಿನ ಜನಕ್ಲೆನ್ ನಿಯಂತ್ರಣ ಮಲ್ಪುನ ನೆಲೆಟ್ಟ್ ಪುತ್ತೂರು ಪೇಂಟೆಡ್ ಪೊಲೀಸೆರ್ ಬ್ಯಾರಿಕೆಡ್ ಪಾರ್ದ್ ಗಾಡಿಲೆದ ತಪಾಸಣೆ ಮಲ್ಪರೇ ಉಲ್ಲೆರ್.

ಒಡಿಪುಡು ಯಶೋಧ ಅಟೋ ಯೂನಿಯನ್ ರ್ದ್ ಉಚಿತ ರಿಕ್ಷಾ ಸೇವೆಗ್ ಚಾಲನೆ

ಒಡಿಪು , ಮೇ 5: ಕೋವಿಡ್ ಕರ್ಫ್ಯೂ ನೆಲೆಟ್ಟ್ ಕೋವಿಡ್ ಸೇರಿನಂಚ ಮಾತಾ ರೀತಿದ ವೈದ್ಯಕೀಯ ಚಿಕಿತ್ಸೆಗಾದ್ ಉಡುಪಿದ ಯಶೋಧ ಅಟೋ ಯೂನಿಯನ್ ಅಟ್ಟನೆ ಮಲ್ದಿನ ಉಚಿತ ಅಟೋ ಸೇವೆಗ್ ಒಡಿಪು ಜಿಲ್ಲಾಧಿಕಾರಿ ಜಿ.ಜಗದೀಶ್ ಕೋಡೆ ಜಿಲ್ಲಾಧಿಕಾರಿ ಕಚೇರಿ ಆವರಣಡ್ ಚಾಲನೆ ಕೊರಿಯೆರ್ .

ಯೂನಿಯನ್ ಗುರ್ಕಾರ್ಲಾಯಿನ ಕೆ.ಕೃಷ್ಣಮೂರ್ತಿ ಪಾತೆರ್ದ್ , ಕೋವಿಡ್ ಕರ್ಫೂ ಪೊರ್ತುಡು ಕೊರೋನ ಪರೀಕ್ಷೆ, ಚಿಕಿತ್ಸೆ ಅಂಚನೇ ಮೆಡಿಕಲ್ ಸೇರಿನಂಚ ಬೇತೆ ಬೇತೆ ವೈದ್ಯಕೀಯ ಸೌಲಭ್ಯಗ್ ಪೋಪಿನ ನಾಗರಿಕೆರೆಗ್ ದಿನದ 24 ಗಂಟೆ ಉಚಿತ ಆಟೋ ಸೇವೆನ್ ಕೊರ್ಪಿನ ಉದ್ದೇಶ ಉಂಡು . ನೆಕ್ಕದ್ ಒಡಿಪು ನಗರ ಸಭೆತ ಮಾತಾ ವಾರ್ಡ್‌ಡ್ ಬೊಕ್ಕ ಕೈತಲ್ ದ ಗ್ರಾಮಡ್ 36 ಆಟೋಲೆನ್ ತಯಾರ್ ಮಲ್ದೆರ್.