Thu. Nov 19th, 2026

ಪುತ್ತೂರ್ದ ಸುದ್ದಿ | Puttur News

ಗೊಬ್ಬೊಂದಿತ್ತಿನ 2 ವರ್ಷದ ಬಾಲೆ ಒರಾನೆ ತೀರ್ ಪೋಂಡು!

ಪುತ್ತೂರು : ಇಲ್ಲಡ್ ಗೊಬ್ಬೊಂದಿತ್ತಿನ ರಡ್ಡ್ ವರ್ಷದ ಬಾಲೆ ಒರಾನೆ ತೀರ್ ಪೋಯಿನ ಘಟನೆ ನಡತ್ಂಡ್.
ಆಸ್ಟಿನ್ (2) ವರ್ಷ ತೀರ್ ಪೋಯಿನ ಬಾಲೆ.
ಕಫ ಉಂಡು ಪಂದ್ ಆಸ್ಟಿನ್‌‌ನ್ ಅ. 28ಗು ಇಲ್ಲದಕುಲು ಪುತ್ತೂರುದ ಖಾಸಗಿ ಆಸ್ಪತ್ರೆಗ್ ಲೆತೊಂದು ಪೋದು ಚಿಕಿತ್ಸೆ ಕೊರ್ತೆರ್. ಅಯಿರ್ದ್ ಬೊಕ್ಕ ಬಾಲೆ ಹುಷಾರಾಯಿನೆನ್ ತೂದು ಇಲ್ಲಗ್ ಲೆತೊಂದು ಬತ್ತಿತ್ತೆರ್.
ಆಂಡ ಕೋಡೆ ಕಾಂಡೆ ಲಕ್‌ದ್ ಒಂತೆ ಪೊರ್ತು ಗೊಬ್ಬೊಂದಿತ್ತಿನ ಬಾಲೆ ಒರಾನೆ ಹುಷಾರ್ ತತ್ತ್‌ದ್ ತೀರ್ ಪೋಂಡು ಪಂದ್ ತೆರಿದ್ ಬೈದ್ಂಡ್.

ಕಡಬ: ಗ್ಯಾಸ್ ಟ್ಯಾಂಕರ್‌ಗ್ ಕಾರ್ ಡಿಕ್ಕಿ ; ಪಿಯುಸಿ ವಿದ್ಯಾರ್ಥಿ ಮರಣ

ಕಡಬ : ಕುಡ್ಲ -ಬೆಂಗಳೂರು ಹೈವೇ ಬರಿಟ್ಟ್ ಉಂತಾದಿನ ಗ್ಯಾಸ್ ಟ್ಯಾಂಕರ್‌ಗ್ ಕಾರ್ ಡಿಕ್ಕಿ ಆದ್ ಕಾರ್‌ಡಿತ್ತಿನ ಪಿಯುಸಿ ವಿದ್ಯಾರ್ಥಿ ಅಲ್ಪನೇ ತೀರ್ ಪೋತೆರ್.

ಈ ಘಟನೆ ಗುರುವಾರ ಬೊಲ್ಪುಗು ನೆಲ್ಯಾಡಿದ ಕರ್ಬಸಂಕದಲ್ಪ ನಡತ್ಂಡ್ .
ತೀರ್ ಪೋಯಿನಾರ್ ನೆಲ್ಯಾಡಿಡ್ ‘ಫ್ಲವರ್ಸ್ ಹೋಟೆಲ್’ ನಡಪಾವೊಂದಿತ್ತಿನ ಜೋಜೋ ಟಿ. ಜೋರ್ಜ್ ಮೆರೆನ ಮಗೆ 16 ವರ್ಷದ ಅಶ್ವಿನ್ ಜೋಜೋ ಜೋರ್ಜ್ ಪಂದ್ ತೆರಿದ್ ಬೈದ್ಂಡ್.
ಮೇರ್ ಪುತ್ತೂರಿನ ಕಾಲೇಜಿದ ಪ್ರಥಮ ಪಿಯುಸಿ ವಿದ್ಯಾರ್ಥಿ.

ಪುತ್ತೂರು: ‘ಡಿಜಿಟಲ್ ಅರೆಸ್ಟ್’ ಮಲ್ತ್‌ದ್ ಒಂಜಿ ಜನಕ್ಕ್ 1.31 ಕೋಟಿ ರೂ. ವಂಚನೆ!

ಪುತ್ತೂರು : ಸೈಬರ್ ವಂಚಕೆರ್ ತಾನ್ ಮುಂಬೈ ಪೊಲೀಸ್ ಬೊಕ್ಕ ಭಯೋತ್ಪಾದನಾ ನಿಗ್ರಹ ದಳತ್ತ (ಎಟಿಎಸ್) ಅಧಿಕಾರಿಲು ಪಂಡ್‌ದ್ ಪುತ್ತೂರು ತಾಲೂಕುದ ಒಂಜಿ ಜನನ್ ‘ಡಿಜಿಟಲ್ ಅರೆಸ್ಟ್’ ಮಲ್ತ್‌ದ್ 1.31 ಕೋಟಿ ರೂ.ನ್ ಒಯ್ತ್ ದೆತೊಂದೆರ್.
ದೂರುದ ಪ್ರಕಾರ, ವಂಚನೆಗ್ ಒಳಗಾಯಿನ ಜನಕ್ಕ್ ವಂಚಕೆರ್ ಫೋನ್‌ಡ್ ಸಂಪರ್ಕ ಮಲ್ತ್‌ದ್ ಪಹಲ್ಗಾಮ್ ಹತ್ಯಾಕಾಂಡದ ಆರೋಪಿಲೆಗ್ ದುಡ್ಡು ಕಡಪುಡ್ದಿನ ಆರೋಪ ಮಲ್ತ್ ಪೋಡಿಗೆ ಕಟ್ಟಾದ್ ಅರೆಸ್ಟ್ ಮಲ್ಪುವ ಪಂದ್ ವಂಚನೆ ಮಲ್ದೆರ್.
ಆರೋಪಿಲು ನಿರಂತರವಾದ್ ವಾಟ್ಸಪ್‌ ವಿಡಿಯೋ ಕಾಲ್ ಮಲ್ತ್‌ದ್ ನಿರಂತರವಾಗಿ ಬೆದರಿಕೆ ಪಾಡ್ದ್ ಹಂತಹಂತವಾದ್ ದುಡ್ಡು ಅಕೌಂಟ್‌ಗ್ ಪಾಡಾದೆರ್.
ಸೆಪ್ಟೆಂಬರ್ 2 ಬೊಕ್ಕ ಅಕ್ಟೋಬರ್ 6 ತ್ತ ನಡುಟ್ಟು ಬೇತೆ ಬೇತೆ ಪೊರ್ತುಡು ಒಟ್ಟು 1,31,50,000 ರೂ. ವರ್ಗಾವಣೆ ಮಲ್ತೊಂದೆರ್. ಉಂದು ವಂಚನೆ ಪಂದ್ ಗೊತ್ತಾಯಿಬೊಕ್ಕ ಸೈಬರ್ ಸೆಲ್ ದೂರು ಕೊರ್ತೆರ್. ತನಿಖೆ ನಡತೊಂದು ಉಂಡು.

ವಿಟ್ಲ ಶ್ರೀ ಸರಸ್ವತಿ ಕ್ರೆಡಿಟ್ ಸೌಹಾರ್ದ ಸಂಘದ ಮುತಾಲಿಕೆಡ್ ಝೀ ಕನ್ನಡ ಸರಿಗಮಪ ಲಿಟ್ಲ್‌ ಚಾಂಪ್ 2026 ವಿನ್ನರ್ ಅಶ್ಮಿತ್ ಗ್ ಸನ್ಮಾನ

ವಿಟ್ಲ: ಝೀ ಕನ್ನಡ ಸರಿಗಮಪ ಲಿಟ್ಲ್‌ ಚಾಂಪ್ 2026 ವಿನ್ನರ್ ಅಶ್ಮಿತ್ ಕುಡ್ಲ ಮೆರೆಗ್ ವಿಟ್ಲ ಶ್ರೀ ಸರಸ್ವತಿ ಕ್ರೆಡಿಟ್ ಸೌಹಾರ್ದ ಸಂಘ ವಿಟ್ಲ ಶಾಖೆದ ಮುತಾಲಿಕೆಡ್ ಸನ್ಮಾನ ನಡತ್ಂಡ್.‌

ಈ ಪೊರ್ತುಡು ನಿರ್ದೇಶಕೆರ್ ರವಿಶ್ ಪೊಸವಳಿಕೆ, ಮ್ಯಾನೇಜರ್ ಜೀವಿತಾ ಕೆ, ಸಿಬ್ಬಂದಿಲು ನವೀನ್ ಹಡೀಲ್, ಸಂದೀಪ್, ಶ್ರೀರಂಜಿತಾ, ವಿಟ್ಲ ಗ್ರಾಮ ಪಂಚಾಯಿತಿ ಮಾಜಿ ಅಧ್ಯಕ್ಷೆರ್ ರಮಾನಾಥ ವಿಟ್ಲ, ಪಟ್ಟಣ ಪಂಚಾಯಿತಿ ಸದಸ್ಯೆರ್ ರವಿಪ್ರಕಾಶ್, ಬಿ ರಾಮದಾಸ್ ಶೆಟ್ಟಿ, ಗೋವರ್ಧನ್ ಕುಮಾರ್, ಜಗದೀಶ್ ಪಾಣೆಮಜಲ್, ಮನೋಜ್ ಕಾಶಿಮಠ, ಶಶಿಕಾಂತ ಪ್ರಭು, ವಾಸುದೇವ ಪ್ರಭು, ಜೀವನ್ ಅಶೋಕ ಅನಿಲಕಟ್ಟೆ ಪಾಲ್ ಪಡೆದಿತ್ತೆರ್.‌

ಸಾರ್ವಜನಿಕ ಶ್ರೀ ಗಣೇಶೋತ್ಸವ ಸಮಿತಿದ 45ನೇ ವರ್ಷೊದ ಚೌತಿ ಪರ್ಬದ ಲೆಪ್ಪೋಲೆ ಬುಡುಗಡೆ

ವಿಟ್ಲ ವಿಶ್ವ ಹಿಂದೂ ಪರಿಷತ್ ಸಾರ್ವಜನಿಕ ಶ್ರೀ ಗಣೇಶೋತ್ಸವ ಸಮಿತಿದ 45ನೇ ವರ್ಷೊದ ಚೌತಿ ಪರ್ಬದ ಲೆಪ್ಪೋಲೆ ಬುಡುಗಡೆ ಲೇಸ್ ವಿಟ್ಲ ಶ್ರೀ ಪಂಚಲಿಂಗೇಶ್ವರ ದೇವಸ್ಥಾನಡ್ ನಡತ್ಂಡ್.

ಪಶು ಚಿಕಿತ್ಸೆಕೆರ್ ಈಶ್ವರ ಭಟ್ ಕಾಶಿಮಠ ಮೇರ್ ಲೆಪ್ಪೋಲೆನ್ ಬುಡುಗಡೆ ಮಲ್ತೆರ್.

ಈ ಪೊರ್ತುಡು ಕೃಷ್ಣಯ್ಯ ಕೆ, ಜಗನ್ನಾಥ ಕಾಸ್ರೋಡು, ಸ್ಥಾಯಿ ಸಮಿತಿದ ಅಧ್ಯಕ್ಷೆರ್ ಅಶೋಕ್ ಕುಮಾರ್ ಶೆಟ್ಟಿ, ಮೋನಪ್ಪ ಗೌಡ, ಸಾರ್ವಜನಿಕ ಶ್ರೀ ಗಣೇಶೋತ್ಸವ ಸಮಿತಿದ ಗೌರವ ಅಧ್ಯಕ್ಷೆರ್ ರಾಮದಾಸ್ ಶೆಣೈ, ಅಧ್ಯಕ್ಷೆರ್ ಜಗದೀಶ್ ಪಾಣೆಮಜಲು, ಕಾರ್ಯದರ್ಶಿ ಜೀವನ್ ಕೂಜಪ್ಪಾಡಿ, ಕೋಶಾಧಿಕಾರಿ ಮನೋಜ್ ಕಾಶಿಮಠ ಬೊಕ್ಕ ಪದುಕೆರ್ ಪಾಲ್ ಪಡೆದಿತ್ತೆರ್.

ವಿಟ್ಲ ಸ್ವಸ್ತಿಕ್ ಫ್ರೆಂಡ್ಸ್ ಮೊಕ್ಲೆರ್ದ್ ಆಟಿಡೊಂಜಿ ಕೂಟ ಲೇಸ್

ವಿಟ್ಲ: ವಿಟ್ಲ ಸ್ವಸ್ತಿಕ್ ಫ್ರೆಂಡ್ಸ್ ಮೊಕ್ಲೆರ್ದ್ ಆಟಿಡೊಂಜಿ ಕೂಟ ಲೇಸ್ ವಿಟ್ಲದ ಪ್ರವಾಸಿ ಮಂದಿರಡ್ ನಡತ್ಂಡ್.

ಈ ಪೊರ್ತುಡು ವಿಟ್ಲದ ಆಪದ್ಭಾಂಧವೆರ್ ಅರ್ಪಿತ್ ಚಿಕನ್ ಸೆಂಟರ್ ದ ಮಾಲಕೆರ್ ಮುರಳಿ ವಿಟ್ಲ ಇಂಚಿಪ್ಪ ವಿಟ್ಲದ ಕೋಟಿಕೆರೆಟ್ಟ್ ಮಿಂದಿಯೆರೆ ಬಾರಂದೆ ಮುರ್ಕೊಂದು ಇತ್ತಿನ ಕೆಳಿಂಜದ ಒರಿ ಬೊಕ್ಕ ಬೈರಿಕಟ್ಟೆದ ರಡ್ಡ್ ಜೋಕ್ಲೆನ್ ರಕ್ಷಣೆ ಮಲ್ತಿನ ಮಹೇಶ ಗೌಡ ಬನ ಮೊಕ್ಲೆಗ್ ಸನ್ಮಾನ ಮಲ್ತೆರ್.

ಈ ಲೇಸ್ ಡ್ ಕುಡ್ಲ ಲೋಕಸಭಾ ಕ್ಷೇತ್ರದ ಮಾಜಿ ಸಂಸದೆರ್ ನಳಿನ್ ಕುಮಾರ್ ಕಟೀಲ್, ಪುತ್ತೂರ್ ವಿಜಯ ಸಾಮ್ರಾಟ್ ದ ಸ್ಥಾಪಕ ಅಧ್ಯಕ್ಷೆರ್ ಸಹಜ್ ರೈ ಬಲ್ಲಜ, ಮೈತ್ರೇಯಿ ಗುರುಕುಲದ ಜಗನ್ನಾಥ ಕಾಸ್ರೋಡು, ವಿಟ್ಲ ಪಟ್ಟಣ ಪಂಚಾಯಿತಿ ಅಧ್ಯಕ್ಷೆರ್ ಕರುಣಾಕರ ಗೌಡ ನಾಯ್ತೊಟ್ಟು, ಮಾಜಿ ಅಧ್ಯಕ್ಷೆರ್ ಅರುಣ್ ವಿಟ್ಲ, ಮಾಜಿ ಸ್ಥಾಯಿ ಸಮಿತಿದ ಅಧ್ಯಕ್ಷೆರ್ ರವಿಪ್ರಕಾಶ್, ಸ್ವಸ್ತಿಕ್ ಫ್ರೆಂಡ್ಸ್ ಅಧ್ಯಕ್ಷೆರ್ ತಾರಾನಾಥ, ಕಾರ್ಯದರ್ಶಿ ಆಕಾಶ್ ವಿಟ್ಲ, ಕೋಶಾಧಿಕಾರಿ ಚಂದ್ರಶೇಖರ್ ವಿಟ್ಲ, ಸದಸ್ಯೆರ್ ನಾಗೇಶ್ ಬಸವನಗುಡಿ, ಸುದರ್ಶನ್ ವಿಟ್ಲ, ರಿತೇಶ್, ಜೀವನ್, ರಂಜಿತ್, ರಾಹುಲ್ ಶೆಣೈ, ವಿಘ್ನೇಶ್, ಉತ್ತೇಜ್, ಆದರ್ಶ್, ದಯಾನಂದ, ವಿಶ್ವನಾಥ ಅಳಿಕೆ, ಶರತ್, ಮನೋಜ್, ಶ್ರೀನಿವಾಸ್ ಗೌಡ, ಮೋನಪ್ಪ ಗೌಡ, ಜತ್ತಪ್ಪ ಗೌಡ, ಹೃತಿಕ್, ಸುಬ್ರಹ್ಮಣ್ಯ, ನಿತೀಶ್, ಪ್ರೀತೇಶ್, ಪ್ರಕಾಶ್ ಪಾಲ್ ಪಡೆದಿತ್ತೆರ್.

ರಿತೇಶ್ ಎದ್ಕೊನಿಯೆರ್. ಹರೀಶ್ ವಿಟ್ಲ ಸೊಲ್ಮೆ ಸಂದಾದ್ ಲೇಸ್ ನ್ ಸುಧಾರಿಕೆ ಮಲ್ತೆರ್.

ವಿಟ್ಲ ಹನುಮಗಿರಿ ಶ್ರೀ ರಾಮ ಮಂದಿರಡ್ ಶ್ರೀ ರಾಮೋಚ್ಚಯ

ವಿಟ್ಲ ಹನುಮಗಿರಿ ಶ್ರೀ ರಾಮ ಮಂದಿರಡ್ ಕೊಪ್ಪ ಕೃಷ್ಣ ಪ್ರಸಾದ್ ಮುತಾಲಿಕೆಡ್ ಶ್ರೀ ರಾಮೋಚ್ಚಯ ನಡತ್ಂಡ್.

ವಿಟ್ಲ ಜಿಎಸ್ ಬಿ ಸಮಾಜದ ಅಧ್ಯಕ್ಷೆರ್ ಸುಭಾಶ್ ಚಂದ್ರ ನಾಯಕ್, ರಾಧಾಕೃಷ್ಣ ಪೈ, ನರೇಂದ್ರ ಶೆಣೈ, ವಿಕಾಸ್ ಅರ್ಗೋಡ್, ಮಂಜುನಾಥ ಪೈ, ಶ್ರೀಧರ್ ಪೈ, ಪ್ರದೀಪ್ ಭಟ್, ಮುರಳೀಧರ ಭಟ್, ರಾಘವೇಂದ್ರ ಪೈ ಪಾಲ್ ಪಡೆದಿತ್ತೆರ್.

29 ವರ್ಷೊದ ಬೊಕ್ಕ ಒಂಜಾಯಿನ 1997ತ್ತ ಬಿ.ಎ. ವಿದ್ಯಾರ್ಥಿಲು: ಗುರುಕ್ಲೆಗ್ ಮಾನಾದಿಗೆ

ಪುತ್ತೂರ್ : 1997ನೇ ಸಾಲ್ ದ ಬಿ.ಎ. ಅಕೇರಿದ ವರ್ಷೊದ ಹಿರಿಯ ವಿದ್ಯಾರ್ಥಿಲು ಪದವಿ ಮುಗಿತ್ ದ್ 29 ವರ್ಷೊದ ಬೊಕ್ಕ ಐತಾರ ನಡತಿನ ಪುನರ್ಮಿಲನ ಲೇಸ್ ಡ್ ಒಂಜಿ ಕಡೆ ಸೇರ್ದ್ ವಿದ್ಯಾರ್ಥಿ ಜೀವನದ ಎಡ್ಡೆ ನೆಂಪುಲೆನ್ ನೆಂಪು ಮಲ್ತೆರ್. ಕಾಲೇಜ್ ಸಭಾಂಗಣಡ್ ನಡತಿನ ಲೇಸ್ ಭಾವುಕ ಕ್ಷಣಗ್ ಸಾಕ್ಷಿ ಆಂಡ್.

ವರ್ಷೊಲೆನ ಬೊಕ್ಕ ಭೇಟಿ ಆಯಿನ ಹಿರಿಯ ವಿದ್ಯಾರ್ಥಿಲು ತನ್ನ ಕಾಲೇಜ್ ದಿನತ್ತ ಅನುಭವ, ಸ್ನೇಹದ ಬಂಧ, ತುಂಟಾಟ ಬೊಕ್ಕ ಮರೆಪೆರೆ ಅವಂದಿನ ಘಟನೆಲೆನ್ ಪಂಡೊಂಡೆರ್. ಈ ಪೊರ್ತುಡು ಆನಿದ ಪ್ರಾಂಶುಪಾಲೆರ್ ಫಾ. ಫ್ರೆಡ್ ಮಸ್ಕರೇನ್ಹಸ್, ಫಾ. ಲಾರೆನ್ಸ್ ಮೆಂಡೋನ್ಸಾ ಬೊಕ್ಕ ಹಾಸ್ಟೆಲ್ ವಾರ್ಡನ್ ಫಾ. ಎಫ್.ಎಕ್ಸ್. ಗೋಮ್ಸ್ ಮೊಕ್ಲೆನ ಶಿಸ್ತುಬದ್ಧ ಮಾರ್ಗದರ್ಶನನ್ ಕೃತಜ್ಞತೆರ್ದ್ ನೆನೆತೆರ್.

ಲೇಸ್ ಡ್ ಅನಿದ ಪ್ರಾಧ್ಯಾಪಕೆರ್ ಸಿರಿಲ್ ಮಥಾಯಸ್, ಜೆ.ಬಿ. ಸಿಕ್ವೇರಾ, ಸುಬೈರ್, ನಾರ್ಬರ್ಟ್ ಮಸ್ಕರೇನ್ಹಸ್ ಬೊಕ್ಕ ಎವರೆಸ್ಟ್ ರೋಡ್ರೀಗಸ್ ಮೊಕ್ಲೆಗ್ ಹಿರಿಯ ವಿದ್ಯಾರ್ಥಿಲು ಸನ್ಮಾನ ಮಲ್ತ್ ದ್ ಮಾನಾದಿಗೆ ಸಂದಾಯೆರ್. ಸನ್ಮಾನ ಸ್ವೀಕಾರ ಮಲ್ತಿನ ಪ್ರಾಧ್ಯಾಪಕೆರ್ ಹಿರಿಯ ವಿದ್ಯಾರ್ಥಿಲೆಗ್ ಎಡ್ಡೆಪ್ಪು ಬಯಕ್ ದ್, ಜೀವನಡ್ ನನಾತ್ ಸಾಧನೆ ಮಲ್ಪುಲೆಕ್ಕ ಅವಡ್ ಪಂದ್ ಆಶೀರ್ವಾದ ಮಲ್ತೆರ್.

ಮಲ್ಲ ಬಿನ್ನೆರಾದ್ ಪಾಲ್ ಪಡೆಯಿನ ಕಾಲೇಜ್ ದ ಪ್ರಾಂಶುಪಾಲೆರ್ ವಂ. ಡಾ. ಆ್ಯಂಟನಿ ಪ್ರಕಾಶ್ ಮೊಂತೇರೋ ಪಾತೆರ್ದ್, “29 ವರ್ಷೊದ ಬೊಕ್ಕ ತನ್ನ ಮಾತೃಸಂಸ್ಥೆನ್ ಮರಪಂದೆ ಇತೊಂಜಿ ಸಂಖ್ಯೆಡ್ ಒಂಜಾದ್ ಸೇರಿನವು ಮೆಚ್ಚೊಡಾಯಿನವು. ಉಂದು ಕಾಲೇಜ್ ದೊಟ್ಟಿಗೆ ಹಿರಿಯ ವಿದ್ಯಾರ್ಥಿಲೆಗ್ ಇಪ್ಪುನ ಭಾವನಾತ್ಮಕ ನಂಟ್ ದ ಪ್ರತೀಕ ಆತ್ಂಡ್. ಇಂಚಿನ ಪುನರ್ಮಿಲನ ದುಂಬುನ ಸ್ನೇಹನ್ ಮರುಜೀವ ಮಲ್ಪುನೆತ್ತೊಟ್ಟಿಗೆ ಗುರು-ಶಿಷ್ಯೆರೆನ ಬಾಂಧವ್ಯನ್ ನನಾತ್ ಗಟ್ಟಿ ಮಲ್ಪೊಂಡು. ಹಿರಿಯ ವಿದ್ಯಾರ್ಥಿಲೆನ ಅನುಭವ, ಮಾರ್ಗದರ್ಶನ ಬೊಕ್ಕ ಸಹಕಾರ ಸಂಸ್ಥೆದ ಬೆಳವಣಿಗೆಗ್ ಅಮೂಲ್ಯ ಆತ್ಂಡ್. ನನದ ದಿನಟ್ಟ್ ಮೇರ್ ಕಾಲೇಜ್ ದ ಶೈಕ್ಷಣಿಕ ಬೊಕ್ಕ ಸಾಮಾಜಿಕ ಚಟುವಟಿಕೆಲೆಗ್ ಬೆಂಬಲ ಕೊರ್ಪಿನ ಮುಕೇನ ಮಾತೃಸಂಸ್ಥೆದ ಪ್ರಗತಿಗ್ ಕೈಜೋಡಿಸಾವೊಡು” ಪಂದ್ ಪಂಡೆರ್.

ಈ ಅರ್ಥಪೂರ್ಣ ಲೇಸ್ ನ್ ಆಯೋಜನೆ ಮಲ್ಪೆರೆ ದಿನೇಶ್ ಕುಮಾರ್, ಪ್ರಮೋದ್ ಕುಮಾರ್, ಜಯಾನಂದ ಎನ್., ಫಾ. ವಿನ್ಸೆಂಟ್ ಕ್ರಾಸ್ಟ ಬೊಕ್ಕ ಮಹಾಬಲೇಶ್ವರ ಕೆ. ಮೊಕ್ಲೆನ ಶ್ರಮ ಮಹತ್ವದ ಆತ್ಂಡ್. ಹಿರಿಯ ವಿದ್ಯಾರ್ಥಿ ಸಂಘದ ಕಾರ್ಯದರ್ಶಿ ತೇಜಸ್ವಿ ಭಟ್ ಬೊಕ್ಕ ಖಜಾಂಚಿ ಅಭಿಷೇಕ್ ಸುವರ್ಣ ಈ ಲೇಸ್ ಡ್ ಪಾಲ್ ಪಡೆದ್ ಸಹಕಾರ ಕೊರಿಯೆರ್.

ಪ್ರಮೋದ್ ಕುಮಾರ್ ಲೇಸ್ ನ್ ಸುಧಾರಿಕೆ ಮಲ್ತೆರ್. ಜಯಾನಂದ ಎನ್. ಸೊಲ್ಮೆ ಸಂದಾಯೆರ್. ಜಾರ್ಜ್ ಟಿ.ಎಸ್. ಎದ್ಕೊನಿಯೆರ್. ಫಾ.ವಿನ್ಸೆಂಟ್ ಕ್ರಾಸ್ಟ ಪ್ರಾಸ್ತಾವಿಕ ಪಾತೆರಿಯೆರ್. ಹೇಮಲತಾ ಎಂ. ಸೊಲ್ಮೆ ಸಂದಾಯೆರ್.

ವಿಟ್ಲ ಶ್ರೀ ಪಂಚಲಿಂಗೇಶ್ವರ ಸದನಡ್ ಬಾಲಗೋಕುಲ ಕ್ಲಾಸ್ ಸುರು

ವಿಟ್ಲ ಬಾಲಗೋಕುಲ ಸಮಿತಿದ ಮುತಾಲಿಕೆಡ್ ವಿಟ್ಲ ಶ್ರೀ ಪಂಚಲಿಂಗೇಶ್ವರ ಸದನಡ್ ಬಾಲಗೋಕುಲ ಕ್ಲಾಸ್ ಸುರು ಮಲ್ತೆರ್.

ಉದಿಪನನ್ ವರಮಹಾಲಕ್ಷ್ಮಿ ಪೂಜಾ ಸಮಿತಿದ ಕಾರ್ಯದರ್ಶಿ ರಶ್ಮಿ ಹರೀಶ್ ಮೇರ್ ತುಡರ್ ಅರ್ಲಾವುನ ಮುಕೇನ ಮಲ್ತೆರ್.

ಲೇಸ್ ದ ಅಧ್ಯಕ್ಷತೆನ್ ರಾಧಾಕೃಷ್ಣ ಕೂಡೂರು ಒಯಿಸೊಂದಿತ್ತೆರ್. ಬಾಲಗೋಕುಲ ಕ್ಲಾಸ್ ನ್ ಮೈತ್ರೇಯಿ ಗುರುಕುಲದ ಭಗಿನಿಯೆರ್ ನಡಪಾದ್ ಕೊರಿಯೆರ್. ನಿಶ್ಮಿತ ಮೇರ್ ಲೇಸ್ ನ್ ಸುಧಾರಿಕೆ ಮಲ್ತೆರ್.

ಮೋಹನ ಕಟ್ಟೆ, ನಾಗೇಶ್ ಆಚಾರ್ಯ, ಸವಿತಾ ಜತ್ತಪ್ಪ ಗೌಡ, ಸುದರ್ಶನ್ ಲೇಸ್ ಡ್ ಪಾಲ್ ಪಡೆದಿತ್ತೆರ್.

“ಬ್ರಿಡ್ಜ್ ಮ್ಯಾನ್ ಆಫ್ ಇಂಡಿಯಾ” ಪದ್ಮಶ್ರೀ ಡಾ.ಗಿರೀಶ್ ಭಾರದ್ವಾಜ್ ನನ ನೆಂಪು ಮಾತ್ರ

ಸುಳ್ಯ : “ಬ್ರಿಜ್ ಮ್ಯಾನ್ ಆಫ್ ಇಂಡಿಯಾ” ಪುಗರ್ತೆ ಪಡೆತಿನ, ಅಲ್ಪಲ್ಪ ತೂಗು ಸೇತುವೆ ಕಟ್ಟಾದ್ ಕೊರೊಂದಿತ್ತಿನ ಸುಳ್ಯದ ಎಂಜಿನಿಯರ್, ಪದ್ಮಶ್ರೀ ಗೌರವ ದೆತೊಂದಿನ ಡಾ.ಗಿರೀಶ್ ಭಾರದ್ವಾಜ್ (76) ಅಂಗಾರೆ ಕಾಂಡೆ ದೇವೆರೆ ಅಂಗಾರ್ ಸೇರಿಯೆರ್.
ತಿಗಲೆ ಬೇನೆದ ಕಾರಣ ಅರೆನ್ ಸುಳ್ಯದ ಕೆವಿಜೆ ಆಸ್ಪತ್ರೆಗ್ ದಾಖಲ್ ಮಲ್ತ್‌ದಿತ್ತೆರ್. ಚಿಕಿತ್ಸೆ ಫಲಕಾರಿ ಆವಂದೆ ಇನಿ ಆರ್ ದೇವೆರೆ ಪಾದ ಸೇರಿಯೆರ್. ಅರೆಗ್ ಮೂಜಿ ಜನ ಜೋಕುಲು ಉಲ್ಲೆರ್.
ದೇಶದ ನಾನಾ ಕಡೆತ್ತ ಗ್ರಾಮೀಣ ಭಾಗೊಡು ತುದೆ, ತಾರ್, ತೋಡುದ ನಡುಟ್ಟು ತೂಂಕನದ ಸಂಕ (ತೂಗು ಸೇತುವೆ) ಕಟ್ಟ್‌ದ್ ರಡ್ಡ್ ಊರುದ ಸಂಪರ್ಕದ ಸಾಧಕೆ ಆದ್ ಇಡೀ ದೇಶಡ್ ಪುಗರ್ತೆ ಪಡೆಯಿನ ಮೆರೆಗ್ 2017ಟ್ ಕೇಂದ್ರ ಸರಕಾರ ಪದ್ಮಶ್ರೀ ಬಿರ್ದ್ ಕೊರ್ದು ಮಾನಾದಿಗೆ ಮಲ್ದ್ಂಡ್.