ಉಡುಪಿದ ಸುದ್ದಿ | Udupi News

ಗುರುಕುಲೆನ ಸಾದಿಡ್ ಶಿಷ್ಯೆರ್ನ ಪಜ್ಜೆ ದಲಿತ ಕೇರಿಗ್ ಪೇಜಾವರ ಶ್ರೀ ಭೇಟಿ

ಹಿಂದೂ ಸಮಾಜಡ್ ಉಪ್ಪುನ ಅಸೃಶ್ಯತೆನ್ ನಿವಾರಣೆ ಮಲ್ತ್ದ್ ಸಶಕ್ತ ಸುದೃಢ ಮಲ್ಪುನ ದಿಟ್ಟಿ ಡ್ ದೇಶದ ಅವ್ವೆತೋ ಕಡೆ ದಲಿತೆರ್ನ ಕಾಲೊನಿಗ್ ಭೇಟಿ ಕೊರ್ದು ಕ್ರಾಂತಿಕಾರ್ಯ ನಡಪಾದ್ ಪೇಜಾವರ ಶ್ರೀ ವಿಶ್ವೇಶತೀರ್ಥ ಶ್ರೀಪಾದೆರ್ ಪುದರ್ ಪಡೆದಿತ್ತೆರ್.

ಇತ್ತೆ ಆರ್ನ ಶಿಷ್ಯ ಶ್ರೀ ವಿಶ್ವಪ್ರಸನ್ನ ತೀರ್ಥೆರ್ ಲಾ ಗುರುಕುಲ್ನ ಸಾದಿಡ್ ಪಜ್ಜೆ ದೀಪಿನ ಮಾಮಲ್ಲ ನಿರ್ಧಾರ ದೆತೊಂದೆರ್. ಐತಾರ ಉಡುಪಿದ ಕೊಡವೂರು ಗ್ರಾಮದ ಪಾಳೆಕಟ್ಟೆ ಪನ್ಪಿನ ಜಾಗೆ ಡ್ ಪರಿಶಿಷ್ಟರ ಬಡಾವಣೆಗ್ ತನ್ನ ಸುರುತ್ತಾ ಭೇಟಿ ಕೊರ್ದು ಹಿಂದೂ ಸಮಾಜ ಸಂಘಟನೆಗ್ ಯಾನ್ ತಯಾರುಲ್ಲೆ ಪಂದ್ ಪಂಡೆರ್.

ಅಯೋಧ್ಯೆ ರಾಮ ಮಂದಿರ ನಿರ್ಮಾಣನ್ ದುಂಬು ದೀಯೊಂದು ನನೂರ ಭಾರತಡ್ ಹಿಂದೂ ಸಮಾಜನ್ ಸಂಘಟನಾತ್ಮಕವಾದ್ ಗಟ್ಟಿ ಮಲ್ಪೊಡಾತುಂಡು. ಈ ಆಶಯದೊಟ್ಟುಗು ಸುಮಾರ್ 120 ಇಲ್ಲ್ ಉಪ್ಪುನ ಈ ಬಡಾವಣೆಗ್ ಭೇಟಿ ಕೊರ್ದು 400 ದಲಿತ ಬಂಧುಲೆಡ ಹಿಂದವಃ ಸೋದರಾ ಸರ್ವೇ ಪನ್ಪಿನ ಗುರು ವಿಶ್ವೇಶತೀರ್ಥ ಸಂದೇಶದ ಮುಖೇನ ವಿಶ್ವಾಸ ದಿಂಜಾಯೆರ್ .

ಶ್ರೀಕುಲು ಬರ್ಪಿನ ಬಗ್ಗೆ ಕೈತಲ್ ದ ನಗರಸಭಾ ಸದಸ್ಯ ಬೊಕ್ಕ ಸಂಘ ಪರಿವಾರದ ಸ್ವಯಂ ಸೇವಕ ವಿಜಯ ಕೊಡವೂರು ಬೊಕ್ಕ ಶ್ರೀಕುಲ್ನ ಆಪ್ತರಾದಿಪ್ಪುನ ಸಾಮಾಜಿಕ ಕಾರ್ಯಕರ್ತ ವಾಸುದೇವ ಭಟ್ ಪೆರಂಪಳ್ಳಿ ರಡ್ಡ್ ದಿನತ ದುಂಬೇ ಕಾಲೊನಿಗ್ ಭೇಟಿ ಕೊರ್ದು ಮಾಹಿತಿ ತೆರಿಪಾದ್ ಇತ್ತೆರ್. ಅಂಚಾದ್ ಬಾರಿ ಸಂತೋಷಡೆ ಜನಕುಲು ಕಾಲೊನಿದ ಮಾರ್ಗಡ್ ಐತ ಮಲ್ತ್ ದ್ ರಂಗೋಲಿ ಪಾರ್ದ್ ಅಲಂಕಾರ ಮಲ್ತಿತ್ತೆರ್ .ಸಾಮೂಹಿಕ ಭಜನೆದೊಟ್ಟುಗು ಶ್ರೀಕುಲೆನ್ ಎದುಕೊಂಡೆರ್. ಐರ್ದ್ ಬೊಕ್ಕ ಅಲ್ಪದ ಮೂಜಿ ಇಲ್ಲಗ್ ಭೇಟಿ ಕೊರ್ದು ರಾಮ ತುಡರ್ ಪೊತ್ತಾದ್ ಇಲ್ಲದ ಜನಕುಲ್ಡ ಪಾತೆರ್ ದ್ ಶ್ರೀಕುಲು ಶ್ರೀರಾಮ ಜಯರಾಮ ಜಯಜಯರಾಮ ಮಂತ್ರದೀಕ್ಷೆ ಕೊರ್ದು ನಿತ್ಯ ಶುದ್ಧ ಮನಸ್ ರ್ದ್ ಈ ಮಂತ್ರ ಪನೊಡು ಪಂದ್ ತೇರಿಪಾಯೆರ್. ಮೂಜಿ ಇಲ್ಲದಕುಲು ಶ್ರೀಕುಲೆಗ್ ಫಲ ಪುಷ್ಟ ಸಹಿತ ಭಕ್ತಿ ಗೌರವ ಕೊರಿಯೆರ್ .‌ ಶ್ರೀ ಮಠದ ವತಿರ್ದ್ ಮಾತಾ ಇಲ್ಲಗ್ ದೀಪ ಕೊರ್ದು ರಾಮದೀಪ ಪೊತ್ತಾಯೆರ್ .ಅಲ್ಪರ್ಡ್ ಬಡಾವಣೆದ ಶ್ರೀ ಮೂಕಾಂಬಿಕಾ ಭಜನಾ ಮಂದಿರಗ್ ಬತ್ತ್ ದ್ ಶ್ರೀ ದೇವಿನ ದುಂಬು ಉಪ್ಪುನ ತುಡರ್ ಪೊತ್ತಾದ್ ಮಂಗಳಾರತಿ ಬೆಳಗಿಯೆರ್ .

‌ ಜಾಲ್ ಡ್ ಸಮಸ್ತ ನಿವಾಸಿಲೆಗ್ ಸಂದೇಶ ಕೊರ್ದು ರಾಮಮಂದಿರ ನಿರ್ಮಾಣ ಕಾರ್ಯಗ್ ಸಮಸ್ತ ಹಿಂದೂ ಸಮಾಜದ ಸಹಕಾರ ಸಹಭಾಗಿತ್ವ ಪಡೆಯರೆ ಮಾತಾ ಸ್ತರತ ಹಿಂದೂ ಬಂಧುಲೆಗ್ ಭೇಟಿ ಆವೊಂದು ಉಲ್ಲಐತ ಪ್ರಕಾರ ಇಡೆಗ್ ಬೈದ. ಮಂದಿರ ನಿರ್ಮಾಣ ಕಾರ್ಯ ನಿರ್ವಿಘ್ನವಾದ್ ನಡತುದು ಇಡೀ ದೇಶಗ್ ರಾಮನ ಕೃಪೆಯಾದ್ ಶಾಂತಿ ಸುಭಿಕ್ಷೆ ಸಮೃದ್ಧಿ ನೆಲೆಸರೆ ನಮ ಪ್ರತೀನಿತ್ತ ಇಲ್ಲ ಇಲ್ಲಡ್ ರಾಮ ಗಾದ್ ದೀಪ ಬೆಳಗಾದ್ ರಾಮಂತ್ರಜಪ ರಾಮ ಭಜನೆ ನಡಪಾವೊಡು.ಪ್ರತಿಯೊರಿ ಲಾ ರಾಮನ ಜೀವನಾದರ್ಶ ನೆಲೆಯಾವೊಡು. ನಮ ಮಾತಾ ಹಿಂದೂ ಸಮಾಜದ ಅವಿಭಾಜ್ಯ ಅಂಗವಾದ್ ಸಮಾಜದ ಒಳಿತಿಗಾದ್ ಶ್ರಮಿಸಾವೊಡು ಪಂಡೆರ್. ಮಾತೆರೆಗ್ಲಾ ರಾಮ ಮಂತ್ರ ಕಲ್ಪಯೆರ್ .ಸುಬ್ರಹ್ಮಣ್ಯ ಷಷ್ಠೀಯಾಯೀನೇರ್ದಾವರ ಶ್ರೀ ಮಠದ ಅಧೀನಡ್ ಉಪ್ಪುನ ಮುಚ್ಲುಕೋಡು ಶ್ರೀ ಸುಬ್ರಹ್ಮಣ್ಯ ದೇವಸ್ಥಾನಡ್ ಲಡ್ಡು ಪ್ರಸಾದ ಮಲ್ಪಾದ್ ಶ್ರೀ ಕುಲು ಮಾತೆರೆಗ್ಲಾ ಪಟ್ಟಿಯೆರ್.

ಶ್ರೀ ವಿಶ್ವೇಶತೀರ್ಥ ಸ್ವಾಮೀಜಿ ತೀರ್ ಪೋದು ಒಂಜಿ ವರ್ಷಡ್ ಶ್ರೀಮಠದ ಮಾತಾ ಜವಾಬ್ದಾರಿಗ್ ಪುಗೆಲ್ ಕೊರ್ದು ಶ್ರೀವಿಶ್ವಪ್ರಸನ್ನತೀರ್ಥರ್ ಗುರುಕುಲು ಮಲ್ದಿನ ಸಾಮಾಜಿಕ ಕಾರ್ಯಲೆನ್ ದುಂಬು ಕೊನೊಪಿನ ಸಂಕಲ್ಪ ಮಲ್ದಿನವು ಶ್ಲಾಘನೀಯ ಪಂದ್ ವಿಜಯ ಕೊಡವೂರು ತೇರಿಪಾಯೆರ್ .ವಿಹಿಂಪ‌ಜಿಲ್ಲಾ ಗುರ್ಕರ್ಲಾಯಿನ ವಿಷ್ಣುಮೂರ್ತಿ ಆಚಾರ್ಯ ಪಾಲ್ ಪಡೆದಿತ್ತೆರ್.

ರಾಮಮಂದಿರ ಟ್ರಸ್ಟ್ ದ ಸೊತ್ತು ಅತ್ತ್,ಇಡೀ ದೇಶದ ಸೊತ್ತು – ಪೇಜಾವರ ಶ್ರೀ

ಅಯೋಧ್ಯೆಡ್ ಶ್ರೀ ರಾಮಮಂದಿರದ ನಿರ್ಮಾಣೊಗ್ ಒಡಿಪುದ ಗ್ರಾಮ ಗ್ರಾಮೊಡ್ ನಿಧಿ ಸಮರ್ಪಣಾ ಅಭಿಯಾನ ನಡಪರೆಗುಂಡ್..ನೆತ್ತ ವತಿಡ್ದ್ ಕೊಡವೂರು ಶ್ರೀ ಶಂಕರನಾರಾಯಣ ದೇವಸ್ಥಾನೊಡ್ ನಡತಿನ ಪೂರ್ವ ಭಾವಿ ಸಭೆಟ್ ಪೇಜಾವರ ಮಠದ ಶ್ರೀ ಕುಲು ಪಾತೆರ್ದ್ ರಾಮಮಂದಿರ ಟ್ರಸ್ಟ್ ದ ಸೊತ್ತು ಅತ್ತ್,ಇಡೀ ದೇಶದ ಸೊತ್ತು.ಏರ್ ಮಾತಾ ರಾಮದೇವೆರೆನ್ ನಂಬುವೆರಾ ಅಕಲ್ನ ಸೊತ್ತು.ಅಭಿವೃದ್ಧಿ ಮಲ್ಪುನ ಜಬಾದಾರಿ ಮಾತ್ರ ಟ್ರಸ್ಟ್ ದವ್ವ್ ಪಂಡುದ್ ಪಂಡೆರ್.ನಮ್ಮ ಮಾತೆರ್ನ ರಾಮಮಂದಿರ ಆವೊಡಾಂಡ ರಾಮಭಕ್ತೆರ್ನ ಮಾತೆರ್ನ ಸಹಕಾರ ಬೋಡು.ಐಕ್ ಮಾತೆರ್ಲ ಕೈಜೋಡಿಸಾಂಡ ಮಾತ್ರ ಪೊರ್ಲುದ ರಾಮಮಂದಿರ ಅವರೆಗ್ ಸಾಧ್ಯ ಪಂಡೆರ್.ವಿಶ್ವ ಹಿಂದೂ ಪರಿಷತ್ ದ ಕಾರ್ಯಕರ್ತೆರ್ ಇಲ್ಲ ಇಲ್ಲಗ್ ರಶೀದಿ ಪಸೊಂದ್ ಬರ್ಪೆರ್ ನಿಕಲ್ಡ ಆಪಿನಾತ್ ಸಹಕಾರ ಮಲ್ಪುಲೆ ಪಂಡುದ್ ಈ ಪೊರ್ತುಡ್ ಬಿನ್ನಪ ಮಲ್ತೆರ್.

ವೇದಿಕೆಡ್ ರಾಷ್ಟ್ರೀಯ ಸ್ವಯಂ ಸೇವಾ ಸಂಘದ ನಗರ ಸಂಘ ಸಂಚಾಲಕೆರಾಯಿನ ರಾಮಚಂದ್ರ ಸನಿಲ್,ಕೊಡವೂರು ಕೇಂದ್ರ ಪ್ರಮುಖ್ ಚಂದ್ರಕಾಂತ್,ಕೊಡವೂರು ವಸತಿ ಪ್ರಮುಖ್ ರಾಜೇಶ್ ಖಾನಂಗಿ,ವಾಸುದೇವ ಭಟ್ ಉಪಸ್ಥಿತರಿತ್ತೆರ್.

ಕೊಡವೂರು ಶ್ರೀ ಶಂಕರನಾರಾಯಣ ದೇವಸ್ಥಾನಡ್ ರಾಶಿ ಪೂಜಾ ಸೇವಾ ಸಮಿತಿದ ಮಹಿಳಾ ಘಟಕದ ಸಭೆ

ಕೊಡವೂರು ಶ್ರೀ ಶಂಕರನಾರಾಯಣ ದೇವಸ್ಥಾನಡ್ ರಾಶಿ ಪೂಜಾ ಮಹೋತ್ಸವದ ಪರವಾದ್ ಐತಾರ ದಾನಿ ರಾಶಿ ಪೂಜಾ ಸೇವಾ ಸಮಿತಿದ ಮಹಿಳಾ ಘಟಕದ ಸಭೆ ನಡತುಂಡು.

ಮಹಿಳಾ ಘಟಕದ ಸಂಚಾಲಕಿ ಆಯಿನ ಹೇಮಲತಾ ಎಸ್ ಸಾಲಿಯಾನ್ , ದೇವಸ್ಥಾನದ ಆಡಳಿತ ಮಂಡಳಿದ ಗುರ್ಕಾರಲಾಯಿನ ಕೊಡವೂರು ಪ್ರಕಾಶ್ ಜಿ., ರಾಶಿಪೂಜಾ ಸೇವಾ ಸಮಿತಿದ ಗುರ್ಕಾರಲಾಯಿನ ಸಾಧು ಸಾಲಿಯಾನ್, ಕಾರ್ಯದರ್ಶಿ ಜನಾರ್ದನ್ ಕೊಡವೂರು, ಸಂಚಾಲಕ ರಾಜ ಎ ಸೇರಿಗಾರ, ಸುಧಾ ಏನ್ ಶೆಟ್ಟಿ, ಬೇಬಿ ಎಸ್. ಮೆಂಡನ್ ಪಾಲ್ ಪಡೆದಿತ್ತೆರ್.ಅಂಚನೇ ಇಲ್ಲ ಇಲ್ಲಗ್ ಲೆಪ್ಪೋಲೆನ್ ಪಟ್ಟುನ ಜಬಾದಾರಿನ್ ಮಹಿಳಾ ಘಟಕದಕ್ಲೆಗ್ ವಹಿಸಾದ್ ಕೊರಿಯೆರ್.

ಮಲ್ಪೆ ಮೀನುಗಾರೆರ್ನ ಪ್ರಾಥಮಿಕ ಸಹಕಾರಿ ಸಂಘ(ನಿ.) ಫಿಶ್ ಕ್ಯೂರಿಂಗ್ ಮಲ್ಪೆ ವಾರ್ಡ್ ದ ವರ್ಷದ ಮಹಾಸಭೆ

ಮಲ್ಪೆ ಮೀನುಗಾರೆರ್ನ ಪ್ರಾಥಮಿಕ ಸಹಕಾರಿ ಸಂಘ(ನಿ.)ಮಲ್ಪೆ .ಫಿಶ್ ಕ್ಯೂರಿಂಗ್ ವಾರ್ಡ್ ಮಲ್ಪೆ ನೆತ್ತ ವರ್ಷದ ಮಹಾಸಭೆಟ್ ರಾಜ್ಯೊಡೇ ಶ್ರೇಷ್ಠ ಮೀನುಗಾರಿಕಾ ಪ್ರಶಸ್ತಿ ನ್ ಪಡೆಯಿನ ರಾಮ ಕಾಂಚಾನ್ ಮೆರೆಗ್ ಮಾನಾದಿಗೆ ಮಲ್ತೆರ್..ಸಭೆಟ್ 2019_20‌ನೇ ಸಾಲುಡ್ 10ನೇ ಕ್ಲಾಸ್ ಬೊಕ್ಕ ಸೆಕೆಂಡ್ ಪಿಯುಸಿ ಡ್ ಶೇಕಡಾ 80 ಅಂಕ ಪಡೆಯಿನ ಸದಸ್ಯೆರ್ನ ಜೋಕ್ಲೆಗ್ ಪ್ರತಿಭಾ ಪುರಸ್ಕಾರ ಕೊರಿಯೆರ್.ಅಂಚೆನೇ ಬುದ್ಧಿಮಾಂದ್ಯ ಜೋಕ್ಲೆನ ಶಾಲೆ ಚೈತನ್ಯ ಚಾರಿಟೇಬಲ್ ಟ್ರಸ್ಟ್ (ಸ್ಪಂದನ) ಬೊಕ್ಕ ಪುಣ್ಯಕೋಟಿ ಗೋಸೇವಾ ಟ್ರಸ್ಟ್ ಹೇರೂರು ಮೊಕ್ಲೆಗ್ ಸಂಘದ ವತಿಡ್ದ್ ಪಣವುದ ಸಹಕಾರ ಕೊರಿಯೆರ್.ಸಭೆಟ್ ಸಂಘದ ಅಧ್ಯಕ್ಷೆರಾಯಿನ ನಾರಾಯಣ ಕರ್ಕೇರ ಗುರ್ಕಾರ್ಮೆಡಿತ್ತೆರ್.ಸಭೆಟ್ ಮಲ್ಪೆ ಮೀನುಗಾರ ಸಂಘದ ಮಾಜಿ ಗುರಿಕಾರೆರಾಯಿನ ಸತೀಶ್ ಕುಂದರ್,ವಿಜಯ ಬಂಗೇರ,ಬಾಲಕ್ರಷ್ಣ ಮೆಂಡನ್ ಬೊಕ್ಕ ಸಂಘದ ಪದಾಧಿಕಾರಿಲು ಪಾಲ್ ಪಡೆಯೆರ್.

ಯಶೋದ ರಿಕ್ಷಾ ಚಾಲಕೆರ್ನ ಬೊಕ್ಕ ಮಾಲಕೆರ್ನ ಸಂಘ(ರಿ)ದ ಕಛೇರಿ ಉದಿಪನ

ತಾರೀಖ್ 15 ನೇ ಡಿಸೆಂಬರ್ 2020 ಅಂಗಾರೆ ದಾನಿ ಕೃಷ್ಣಮಠ ಪಾರ್ಕಿಂಗ್ ಬೈಲಕೆರೆ ಹೋಟೆಲ್ ಮಥುರದ ಕೈತಲ್ ಯಶೋದ ಆಟೋ ಚಾಲಕೆರ್ನ ಬೊಕ್ಕ ಮಾಲಕೆರ್ನ ಸಂಘ (ರಿ) ನೆತ್ತ ಪ್ರಧಾನ ಕಛೇರಿನ್ ಉಡುಪಿ ಸಂಚಾರಿ ಠಾಣೆದ ಸಬ್ ಇನ್ಸ್ಪೆಕ್ಟರ್ ಅಬ್ದುಲ್ ಖಾದರ್ ಮೇರ್ ತುಡರ್ ಅರ್ಲಾದ್ ಉದಿಪನ ಮಲ್ತೆರ್.

ಕಾನೂನು ಮಾತೆರೆಗ್ಲಾ ಒಂಜೇ ಆತುಂಡು. ಐತ ಪರಿಪಾಲನೆ ಬೊಕ್ಕ ಶಿಸ್ತು ನಮ್ಮ ಜಬದಾರಿ ಆದುಂಡು ಅಂಚನೇ ಚಾಲಕೆರೆಗ್ ಅನುಕೂಲ ಆಪಿನ ಬೇತೆ ಬೇತೆ ಇನ್ಶುರೆನ್ಸ್ ದ ಬಗ್ಗೆ ಮಾಹಿತಿ ತೆರಿಪಾಯೆರ್ . ಕಾರ್ಯಕ್ರಮದ ಗುರ್ಕಾರ್ಮೆ ನ್ ಯಶೋದ ಆಟೋ ಸಂಘದ ಜಿಲ್ಲಾಧ್ಯಕ್ಷರಾಯಿನ ಶ್ರೀ ಕೆ.ಕೃಷ್ಣಮೂರ್ತಿ ಆಚಾರ್ಯ ವಯಿಸೊಂದು ಇತ್ತೆರ್.ಅಂಚನೇ ಮಲ್ಲ ಬಿನ್ನೆರ್ ಆದ್ ಪಾಲ್  ಪಡೆಯಿನ ಉದ್ಯಮಿ ಶ್ರೀಮಹಿಷಮರ್ದಿನಿ ಲ್ಯಾಂಡ್ ಲಿಂಕ್ಸ್ ದ ಗುರ್ಕಾರ್ಲಾಯಿನ ಭಾಸ್ಕರ್ ಶೇರಿಗಾರ್ ಬೊಕ್ಕ ಯಶೋದ ಆಟೋ ಯೂನಿಯನ್ ಗೌರವ ಸಲಹೆಗಾರರಾದಿತ್ತಿನ ಮೇರ್ ಪಾತೆರ್ದ್ ” ಯಾನ್ಲಾ 82ನೇ ಇಸವಿಡ್ ಒಂಜಿ ರಿಕ್ಷಾ ಡ್ರೈವರ್ ಆದ್ ಇತ್ತೆ ಅಪಗ ರಿಕ್ಷಾ ಚಾಲಕೆರೆಗ್ ಆತ್ ಬಂಗ ಇತ್ತುಜಿ ಇತ್ತೆ ಮಾತ್ರ ಮಸ್ತ್ ಬಂಗ ಉಂಡು ಅಂಚಾದ್ ಯಾನ್ ನಿಕ್ಲೆನೊಟ್ಟಿಗೆ ಯೇಪಲ ಉಪ್ಪುವೆ” ಪಂದ್ ಪಂಡೆರ್.

ಅಂಚನೇ ರಿಕ್ಷಾ ಚಾಲಕೆರ್ನ ಬೊಕ್ಕ ಮಾಲಕೆರ್ನ ಸಂಘ (ರಿ) ದ ಲಾಂಛನನ್ ಅಂಚನೇ ಸಂಘದ ವತಿರ್ದ್ ” ಸಂಕಟಮೋರ್ಚಾ ” ಆರೋಗ್ಯ ವಿಮೆನ್ ಉಡುಪಿ ಸಂಚಾರಿ ಠಾಣೆದ ಸಬ್ ಇನ್ಸ್ಪೆಕ್ಟರ್ ಅಬ್ದುಲ್ ಖಾದರ್ ಬುಡುಗಡೆ ಮಲ್ತೆರ್.ಮಲ್ಲ ಬಿನ್ನೆರಾಯಿನ ಉದ್ಯಮಿ ಕಡಿಯಾಳಿ ಭಾಸ್ಕರ್ ಶೇರಿಗಾರ್ ಆಟೋ ಚಾಲಕೆರೆಗ್ ಸಮವಸ್ತ್ರ ಪಟ್ಟಿಯೆರ್. ಅಂಚನೇ ಪ್ರಶಾಂತ್ ಪೂಜಾರಿ, ಮಹೇಶ್ ಮಲ್ಪೆ, ಗಣೇಶ್ ಪಾಲ್ ಪಡೆದಿತ್ತೆರ್. ಸಂಘದ ಪದಾಧಿಕಾರಿಲು ಬೊಕ್ಕ ಸದಸ್ಯೆರ್ ಪಾಲ್ ಪಡೆದಿತ್ತೆರ್. ಪ್ರಧಾನ ಕಾರ್ಯದರ್ಶಿ ಪ್ರವೀಣ್ ಕುಂಜಿಬೆಟ್ಟು ಎದುಕೊಂಡೆರ್ , ಜಿಲ್ಲಾ ಕೋಶಾಧಿಕಾರಿ ಪ್ರವೀಣ್ ಆಚಾರಿ, ತಾಲ್ಲೂಕು ಗುರ್ಕಾರ್ಲಾಯಿನ ಶ್ರೀ ಹರೀಶ್ ಅಮೀನ್ ಸೊಲ್ಮೆ ಸಂದೈತ ಮಲ್ತೆರ್ . ನಿರೂಪಣೆ ನ್ ದಿವಾಕರ್ ಕಡೆಕಾರು ಮಲ್ತೆರ್.

ಸರಕಾರಿ ಕಛೇರಿಗ್ ಸಾರ್ವಜನಿಕೆರ್ ಪೋನಗ ಸೌಜನ್ಯಯುತವಾದ್ ವರ್ತನೆ ಮಲ್ಪೊಡು ಪಂದ್ ಬಿನ್ನಾಪು ಪತ್ರ

ಸರ್ಕಾರಿ ಸೇವೆ ಸಾರ್ವಜನಿಕೆರ್ನ ಸೇವೆಯಾದ್ ಉಪ್ಪುನೆರ್ದಾವರ , ಸಾರ್ವಜನಿಕೆರ್ ಅಕ್ಲೆನ ಸಮಸ್ಯೆ ಗ್ ಪರಿಹಾರ ನಾಡರೆ ಸರ್ಕಾರಿ ಕಛೇರಿ ಗ್ ಪೋನಗ ಜನಕ್ಲೆಡ ಸೌಜನ್ಯಯುತವಾದ್ /ಸಮಾಧಾನವಾದ್ ವರ್ತನೆ ಮಲ್ಪೊಡು ಅಂಚನೇ ತಾರತಮ್ಮ, ಮಲ್ಪಂದೆ ಬತ್ತಿನಕ್ಲೆಗ್ ಕುಲ್ಲರೆ ಕುರ್ಚಿ ಕೊರ್ದು ಕುಲ್ಲರೆ ಪನೊಡು ಪಂದ್ ಸಚಿವಾಲಯದ ಅಧಿಕಾರಿ/ ಸಿಬ್ಬಂದಿಲೆಗ್ ಅಧೀನ ಇಲಾಖೆದ ಗುರ್ಕಾರ್ಲೆನ ಮುಖೇನ ಮಾತಾ ಸರ್ಕಾರಿ ಅಧಿಕಾರಿಲೆಗ್ ಸಿಬ್ಬಂದಿಲೆಗ್ ತೆರಿಪಾದುಂಡು.