ಊರ್ದ ಸುದ್ದಿ Regional News

ತುಳುನಾಡ ಪೊರ್ಲು ಸೇವಾ ಟ್ರಸ್ಟ್ ವತಿರ್ದ್ ಜನಸೇವಾ ಕಾರ್ಯ

ಬಂಟ್ವಾಳ, ಜೂನ್ 29: ಒರ್ತಿಯೇ ದಿನ ದೆತ್ತೊಂದು ಇತ್ತಿನ ಬಂಟ್ವಾಳ ದ ಕಕ್ಯಪದವು ಕಾಲೋನಿದ ದಿವಂಗತ ಮಾನಿಗ ಮೆರ್ನ ಬೊಡೆದಿ ಬೊಮ್ಮಿ ಮೆರ್ನ ಇಲ್ಲದ ಮಾಡ್ , ಪಕ್ಕಾಸು, ರೀಪು ಪರತ್ತಾಯಿನ ಕಾರಣರ್ದ್ ಕರಿನ 3 ವರ್ಷರ್ದ್ ಬರ್ಸದ ಪೊರ್ತುಡು ದಿನ ದೆಪ್ಪರೆ ಕಷ್ಟ ಆವೊಂದಿತ್ತುಂಡು ಐರ್ದಾವರ ನೆತ್ತ ದುರಸ್ತಿ ಕಾರ್ಯ ತುಳುನಾಡ ಪೊರ್ಲು ಸೇವಾ ಟ್ರಸ್ಟ್ ವತಿರ್ದ್ ಯಶಸ್ವಿಯಾದ್ ನಡತುಂಡು .

ಈ ಪೊರ್ತುಡು ಡಾ| ಬಿ. ಆರ್ ಅಂಬೇಡ್ಕರ್ ಯುವಕ ಸಂಘದ ಗುರ್ಕಾರ್ಲಾಯಿನ ಅಣ್ಣು ಖಂಡಿಗ ಬೊಕ್ಕ ಸರ್ವ ಸದಸ್ಯೆರ್ ಅಂಚನೇ ಟ್ರಸ್ಟ್ ದ ಸೇವಾ ಮಾಣಿಕ್ಯೆರ್ ಸೇವಾ ಕೈಂಕರ್ಯಡ್ ಪಾಲ್ ಪಡೆದಿತ್ತೆರ್ .

ಎಸ್ಎಸ್ಎಫ್ ಮುಡಿಪು ಡಿವಿಷನ್ ವತಿರ್ದ್ ಮಾದಕ ವಸ್ತು ಸೇವನೆ ವಿರೋಧಿ ಜಾಗ್ರತಿ ಕಾರ್ಯಕ್ರಮ

ಮುಡಿಪು, ಜೂ.29: ಅಂತರಾಷ್ಟ್ರೀಯ ಮಾದಕ ಪದಾರ್ಥ ಸೇವನೆ ನಿಷೇಧ ದಿನದ ಪ್ರಯುಕ್ತ ಎಸ್ಸೆಸ್ಸೆಫ್ ಮುಡಿಪು ಡಿವಿಶನ್ ವತಿರ್ದ್ ಜಾಗೃತಿ ಅಭಿಯಾನ ಕಾರ್ಯಕ್ರಮ ನಡತುಂಡು .

ಈ ಲೇಸ್ ಡ್ ಎಸ್ಸೆಸ್ಸೆಫ್ ದ.ಕ ಜಿಲ್ಲೆ (ವೆಸ್ಟ್) ಕಾರ್ಯದರ್ಶಿ ಇಬ್ರಾಹಿಂ ಅಹ್ಸನಿ ಮಂಜನಾಡಿ ದುಆ ನಡಪಾಯೆರ್ . ಎಸ್ಸೆಸ್ಸೆಫ್ ಮುಡಿಪು ಡಿವಿಶನ್ ಗುರ್ಕಾರ್ಲಾಯಿನ ಮನ್ಸೂರ್ ಹಿಮಮಿ ಗುರ್ಕಾರ್ಮೆ ವಯಿಸೊಂಡೆರ್ .

ಲೇಸ್ ನ್ ಉದಿಪನ ಮಲ್ತ್ ಪಾತೆರಿನ ಎಸ್ಸೆಸ್ಸೆಫ್ ದ.ಕ ಜಿಲ್ಲೆ ( ವೆಸ್ಟ್ ) ಕ್ಯಾಂಪಸ್ ಕಾರ್ಯದರ್ಶಿ ಝುಹೈರ್ ಮಾಸ್ಟರ್, ‘ಇಂಚಿನ ದಿನಟ್ ಎಚ್ಚದ ಜೋಕುಲು ದುಶ್ಚಟದ ದಾಸರಾವೊಂದು ಉಲ್ಲೆರ್ . ನೆತ್ತ ಬಗ್ಗೆ ಎಸ್ಸೆಸ್ಸೆಫ್ ಅವ್ವೆತೋ ವರ್ಷರ್ದ್ ಸ್ವಾಸ್ಥ್ಯ ಸಂಕಲ್ಪದ ಮುಖೇನ ಮಾಹಿತಿ ಮಾರ್ಗದರ್ಶನನ್ ಕೊರೊಂದು ಉಲ್ಲೆರ್.

ಜೈ ತುಳುನಾಡ್ ಸಂಘಟನೆದ ವತಿರ್ದ್ ತುಳು ಭಾಷೆನ್ ಅಧಿಕೃತ ಮಲ್ಪೊಡು ಪಂದ್ ಕೇರಳ ಸರ್ಕಾರಗ್ ಬಿನ್ನಾಪು

ಕಾಸ್ರೊಡು, ಜೂನ್ 28: ತುಳುನಾಡ್ ದ ಆಚಾರ ಇಚಾರ ಲಿಪಿ ಸಂಸ್ಕ್ರತಿ ಬೊಕ್ಕ ಭಾಷೆನ್ ಒರಿಪಾದ್ ಬುಳೆಪಾವುನ ನೆಲೆಟ್ಟ್ ಜವಾಬ್ದಾರಿಯುತ ಬೇಲೆನ್ ನಿಸ್ವರ‍್ಥವಾದ್ ಮಲ್ಪರೆ ಜವನೆರ್ ಬೊಕ್ಕ ಪೆರಿಯಾಕುಲು ಒಟ್ಟಾದ್ ಉಪ್ಪುನ ಕೂಟ ನೆ ‘ಜೈ ತುಳುನಾಡ್ ಸಂಘಟನೆ’ ನೆತ್ತ ಕಾಸ್ರೋಡು ಘಟಕರ್ದ್ ಗುರ್ಕಾರ್ಲಾಯಿನ ಹರಿಕಾಂತ್ ಕಾಸರಗೋಡು ಮೆರ್ನ ಮುತಾಲಿಕೆಡ್ , ಕೇರಳ ರಾಜ್ಯಡ್ ತುಳು ಬಾಷೆನ್ ಅಧಿಕೃತ ಭಾಷೆಯಾದ್ ಮಲ್ಪುನ ಬೇಡಿಕೆನ್ ಸರಕಾರದ ಗೇನಗ್ ಕನವೊಡು ಪಂದ್ ಶಾಸಕೆರ್ನ ಕಚೇರಿಗ್ ಭೇಟಿ ಕೊರ್ದು ಬಿನ್ನಾಪು ಮಲ್ದೆರ್.

ದಾಖಲೆದ ಒಟ್ಟುಗು ಉಪ್ಪುನ ಬಿನ್ನಾಪುನು ಮಂಜೇಶ್ವರ ಶಾಸಕ ಎ ಕೆ ಎಂ ಅಶ್ರಫ್ ಬೊಕ್ಕ ಕ್ಷೇತ್ರದ ಪ್ರಸ್ತುತ ಶಾಸಕೆರಾಯಿನ ಸಿ ಯೆಚ್ ಕುಂಞಂಬು ಮೆರೆಗ್ ಕೊರಿಯೆರ್.

ಈ ಪೊರ್ತುಡು ಜೈ ತುಳುನಾಡ್ ಕಾಸರಗೋಡು ಘಟಕದ ಗುರ್ಕಾರ್ಲಾಯಿನ ಹರಿಕಾಂತ್ ಕಾಸರಗೋಡು, ಕಾರ್ಯದರ್ಶಿ ಕಾರ್ತಿಕ್ಕೋ ಪೆರ್ಲ, ಕೋಶಾಧಿಕಾರಿ ಪ್ರಶಾಂತ್ ರೈ ಬಂದಡ್ಕ, ಮುಖ್ಯ ಸಂಚಾಲಕ ಪ್ರವೀಶ್ ಕುಲಾಲ್ ಬೊಕ್ಕ ಸದಸ್ಯ ದೇವಿಪ್ರಸಾದ್ ರೈ ಪಾಲ್ ಪಡೆದಿತ್ತೆರ್ .

ಇನಿರ್ದ್ ಹಾಲ್ ಡ್ ಮದಿಮೆ ಮಲ್ಪರೆ ಅವಕಾಶ : ದ. ಕ ಜಿಲ್ಲಾಧಿಕಾರಿ

ಕುಡ್ಲ , ಜೂ.28: ಕೋವಿಡ್-19 ಮಾರ್ಗಸೂಚಿ ಕಟ್ಟು ನಿಟ್ಟಾದ್ ಪಾಲಿಸಾವುನೆತ್ತ ಒಟ್ಟುಗು ಛತ್ರ, ಹೊಟೇಲ್‌, ರೆಸಾರ್ಟ್‌ಡ್ ಸಭಾಂಗಣಡ್ ಮದಿಮೆ ನಡಪಾಯೆರೆ ಜೂ.28ರ್ದ್ ಜಿಲ್ಲಾದ್ಯಂತ ಅವಕಾಶ ಕೊರ್ತೆರ್ .

ಆಂಡ ಮದಿಮೆಡ್ ಪಾಲ್ ಪಡೆಪಿನಕ್ಲೆನ ಸಂಖ್ಯೆ 40 ಡಾಟರೆ ಬಲ್ಲಿ ಪಂದ್ ದ.ಕ. ಜಿಲ್ಲಾಧಿಕಾರಿ ಡಾ.ರಾಜೇಂದ್ರ ಕೆ.ವಿ. ಪಂಡಿನ ಪೊಸ ಆದೇಶಡ್ ತೆರಿಪಾದೆರ್.

ಮದಿಮೆ ಕಾರ್ಯಕ್ರಮ ನಡಪಾವುನಕುಲು ಮಂಗಳೂರು ನಗರ ಪಾಲಿಕೆ ವ್ಯಾಪ್ತಿಡ್ ಪಾಲಿಕೆದ ಆಯುಕ್ತೆರ್ , ನಗರ ಸ್ಥಳೀಯಾಡಳಿತ ಸಂಸ್ಥೆದ ವ್ಯಾಪ್ತಿಡ್ ಸಂಬಂಧಪಟ್ಟಿ ನಂಚ ಸಂಸ್ಥೆದ ಮುಖ್ಯಾಧಿಕಾರಿಲು , ಗ್ರಾಪಂ ವ್ಯಾಪ್ತಿಡ್ ಪಿಡಿಒ ರ್ದ್ ಪೂರ್ವಾನುಮತಿ ಪಡೆಯೊಡು ಪಂದ್ ಪಂಡೆರ್.