ಊರ್ದ ಸುದ್ದಿ Regional News

ಖೀರ್ ಮಲ್ಪುನ ಪ್ಯಾಕೆಟ್‌ಡ್ 20 ಲಕ್ಷ ರೂ. ಬಿಲೆತ್ತ ಬಂಗಾರ್!

ಕುಡ್ಲ: ದುಬೈರ್ದ್ ಬತ್ತಿನ ಪ್ರಯಾಣಿಕನ ಕೈರ್ದ್ ಖೀರ್ ಮಿಕ್ಸ್ ಪ್ಯಾಕೆಟ್‌ಡ್ ದೆಂಗಾದ್ ದೀದ್ ಕಲ್ವತಾದಿಡ್ ಕೊನೊಂದು ಇತ್ತಿನ 20 ಲಕ್ಷ ರೂ. ಬಿಲೆತ್ತ ಬಂಗಾರ್ ನ್ ಬಜ್ಪೆ ಇಮಾನ ನಿಲ್ದಾಣಡ್ ಕಸ್ಟಮ್ ಅಧಿಕಾರಿಲು ವಶಕ್ಕ್ ಪಡೆತೆರ್.

ವಶಕ್ಕ್ ಪಡೆಯಿನ ಬಂಗಾರ್ 347 ಗ್ರಾಂ ತೂಕ ಉಂಡು. 24 ಕ್ಯಾರೆಟ್ ಶುದ್ಧತೆ ಇಪ್ಪುನ ಈ ಬಂಗಾರ್ ದ ಬಿಲೆ 20 ಲಕ್ಷ ರೂ. ಪಂದ್ ಅಂದಾಜಿ ಮಲ್ದೆರ್.

ಅ.11: ಕುಡ್ಲಡ್ ವಿಶ್ವ ಬಂಟರ ಸಮ್ಮೇಳನದ ಲೆಪ್ಪೋಲೆ ಬುಡುಗಡೆ

ಕುಡ್ಲ: ಜಾಗತಿಕ ಬಂಟರ ಸಂಘಲೆನ ಒಕ್ಕೂಟದ ಮುತಾಲಿಕೆಡ್ ಗುರ್ಕಾರೆ ಐಕಳ ಹರೀಶ್ ಶೆಟ್ಟಿ ಮೆರೆನ ದುಂಬಾತ್ತಿಗೆಡ್ ನಡಪುನ ವಿಶ್ವ ಬಂಟರ ಸಮ್ಮೇಳನದ ಲೆಪ್ಪೋಲೆ ಬುಡುಗಡೆ ಲೇಸ್ ಬಂಟ್ಸ್ ಹಾಸ್ಟೆಲ್ ಕೈತಲ್ ದ ಗೋಲ್ಡ್ ಪಿಂಚ್ ಹೋಟೆಲ್ ದ ಸಿಲ್ವರ್ ಬಿಲ್ಸ್ ಹಾಲ್ ಡ್ ಅ.11 ಕ್ಕ್ ಬಯ್ಯಗ್ 4 ಗಂಟೆಗ್ ನಡಪರೆ ಉಂಡು.

ಒಡಿಪುದ ಅಜ್ಜರಕಾಡು ಮೈದಾನಡ್ ಅ.28 ಕ್ಕ್ ನಳಿನ ಭೋಜ ಶೆಟ್ಟಿ ವೇದಿಕೆಡ್ “ವಿಶ್ವ ಬಂಟರ ಕ್ರೀಡಾಕೂಟ” ಬೊಕ್ಕ ಅ.29 ಕ್ಕ್ ಒಡಿಪುದ ಅಮ್ಮಣ್ಣಿ ರಾಮಣ್ಣ ಶೆಟ್ಟಿ ಸಭಾಭವನದ ವಠಾರಡ್ ಶ್ರೀ ಕನ್ಯಾನ ಸದಾಶಿವ ಶೆಟ್ಟಿ ವೇದಿಕೆಡ್ “ವಿಶ್ವ ಬಂಟರ ಸಾಂಸ್ಕೃತಿಕ ವೈಭವ ಲೇಸ್ ನಡಪರೆ ಉಂಡು.

ಲೇಸ್ ದ ಗುರ್ಕಾರ್ಮೆನ್ ಜಾಗತಿಕ ಬಂಟರ ಸಂಘಲೆನ ಒಕ್ಕೂಟದ ಗುರ್ಕಾರೆ ಐಕಳ ಹರೀಶ್ ಶೆಟ್ಟಿ ಒಯಿಸೊನ್ವೆರ್. ಈ ಪೊರ್ತುಡು ಬಂಟರ ಯಾನೆ ನಾಡವರ ಮಾತೃ ಸಂಘದ ಗುರ್ಕಾರೆ ಅಜಿತ್ ಕುಮಾರ್ ರೈ ಮಾಲಾಡಿ, ಜಾಗತಿಕ ಬಂಟ ಪ್ರತಿಷ್ಠಾನದ ಗುರ್ಕಾರೆ ಡಾ. ಎ. ಜೆ. ಶೆಟ್ಟಿ, ಇಂಟರ್ ನ್ಯಾಷನಲ್ ಬಂಟ್ಸ್ ವೆಲ್ಫೇರ್ ಟ್ರಸ್ಟ್ ದ ಗುರ್ಕಾರೆ ಡಾ. ಎ. ಸದಾನಂದ ಶೆಟ್ಟಿ, ಸಂಸದೆರ್ ನಳಿನ್ ಕುಮಾರ್ ಕಟೀಲ್, ಮೇಯರ್ ಸುಧೀರ್ ಶೆಟ್ಟಿ, ಮಾಜಿ ಸಚಿವೆರ್ ಬಿ ರಮಾನಾಥ ರೈ, ಕೆಪಿಸಿಸಿ ಪ್ರಧಾನ ಕಾರ್ಯದರ್ಶಿ ಮಿಥುನ್ ರೈ, ಬೊಕ್ಕ ವಲಯ ಬಂಟರ ಸಂಘಲೆನ ಗುರ್ಕಾರ್ಲು, ಪದುಕೆರ್ ಪಾಲ್ ಪಡೆಯೆರೆ ಉಲ್ಲೆರ್.

ಯಕ್ಷಮಿತ್ರರು ಸುರತ್ಕಲ್ ಮುತಾಲಿಕೆಡ್ ಯಕ್ಷಗಾನ ತಾಳಮದ್ದಳೆ, ಸನ್ಮಾನ ಲೇಸ್

ಸುರತ್ಕಲ್: ಯಕ್ಷ ಮಿತ್ರರು ಸುರತ್ಕಲ್ ದ 18ನೇ ವರ್ಷೊದ ಲೆಕ್ಕೊಡು ಅ.8 ಐತಾರ ಸುರತ್ಕಲ್ ಇಡ್ಯಾ ಮಹಾಲಿಂಗೇಶ್ವರ ದೇವಲ್ಯದ ಸಿದ್ದಕಟ್ಟೆ ಚೆನ್ನಪ್ಪ ಶೆಟ್ಟಿ ವೇದಿಕೆಡ್ ಕರ್ಣಾವಸಾನ ಯಕ್ಷಗಾನ ತಾಳಮದ್ದಳೆ ನಡತ್ಂಡ್.

ಈ ಪೊರ್ತುಡು ಯಕ್ಷಗಾನ ಕಲಾವಿದೆ, ಅರ್ಥಧಾರಿ ಸದಾಶಿವ ಆಳ್ವ ತಲಪಾಡಿ ಮೆರೆಗ್ ಸನ್ಮಾನ ನಡತ್ಂಡ್. ದಿನೇಶ್ ಶೆಟ್ಟಿ ಕಾವಳಕಟ್ಟೆ ಅಭಿನಂದನಾ ಭಾಷಣಡ್ ಸದಾಶಿವ ಆಳ್ವರ ಕಲಾ ಸೇವೆನ್ ಪುಗರಿಯೆರ್. ಬೊಕ್ಕ ಮೇರ್ ಪಾತೆರ್ದ್, ತಾಳಮದ್ದಲೆ ಅರ್ಥಧಾರಿಯಾದ್ ಸದಾಶಿವ ಆಳ್ವ ಮೆರೆನ ಪಾತೆರ, ತುಳು ಭಾಷೆಡ್ ಅರೆಗ್ ಇಪ್ಪುನ ಜ್ಞಾನ ಇತ್ತೆದ ಯುವ ಕಲಾವಿದೆರೆಗ್ ಸ್ಪೂರ್ತಿ ಆತ್ಂಡ್. ನೆರ್ದ್ ದುಂಬು ಕಾಂಚನ ಸಂಜೀವ ರೈ, ಬೆಳ್ಳಾರೆ ವಿಶ್ವನಾಥ ಶೆಟ್ರೆಗ್ ತುಳು ಭಾಷೆದ ಬಗೆಟ್ಟ್ ಇತ್ತಿನ ಒಲವು, ಭಾಷಾ ಶುದ್ಧತೆನ್ ಇತ್ತೆ ನಮ ಸದಾಶಿವ ಆಳ್ವೆರೆಡ ತೂವೊಲಿ ಪಂದ್ ಪಂಡೆರ್.

ಇಡ್ಯಾ ದೇವಲ್ಯದ ಆಡಳಿತ ಮೊಕ್ತೇಸರೆರ್ ಐ. ರಮಾನಂದ ಭಟ್ ಮೆರೆನ ಆಶೀರ್ವಚನಡ್ ಯಕ್ಷಮಿತ್ರರು ಯಕ್ಷಗಾನ ಕಲೆನ್ ಆರಾಧನೆ ಮಲ್ಪುವೆರ್. ಏಪಲ ತಾಳ ಮದ್ದಳೆ ಮಲ್ಪುನ ಮುಖೇನ ಯಕ್ಷ ಕಲೆಕ್ಕ್ ಪ್ರೋತ್ಸಾಹ ಕೊರ್ಪೆರ್. ಸದಾಶಿವ ಆಳ್ವೆರಂಚಿನ ಪ್ರತಿಭಾವಂತ ಕಲಾವಿದೆರೆನ್ ಗುರುತಿಸಾದ್, ಗೌರವಿಸಾವುನ ಮುಖೇನ ಎಡ್ಡೆ ಬೇಲೆ ಮಲ್ಪುವೆರ್ ಪಂದ್ ಪಂಡೆರ್.

ಸುರತ್ಕಲ್ ನಿನಾದ ಟ್ರಸ್ಟ್ ದ ಸಂಚಾಲಕೆರ್ ಕಡಂಬೋಡಿ ಮಹಾಬಲ ಪೂಜಾರಿ ಗುರ್ಕಾರ್ಮೆನ್ ಒಯಿಸೊಂದಿತ್ತೆರ್. ಬಿನ್ನೆರಾಯಿನ ಎಸಿಪಿ ಮಹೇಶ್ ಕುಮಾರ್, ಎಎಸ್ ಐ ಕುಶಲ‌ ಮಣಿಯಾಣಿ, ಕಲಾಪೋಷಕೆರ್ ಪ್ರೇಮ್ ಶೆಟ್ಟಿ ಸುರತ್ಕಲ್ ಎಡ್ಡೆಪ್ಪು ಬಯಕಿಯೆರ್.

ಈ ಪೊರ್ತುಡು ಯಕ್ಷಮಿತ್ರರು ಸಂಘಟನೆದ ಗುರ್ಕಾರೆ ಜಗದೀಪ್ ಶೆಟ್ಟಿ, ಕಾರ್ಯದರ್ಶಿ ನಾಗರಾಜ್ ಕಡಂಬೋಡಿ, ಕೋಶಾಧಿಕಾರಿ ರಾಜೇಶ್ ಕೆ ಮುಂಚೂರು ಬೊಕ್ಕ ಸದಸ್ಯೆರ್ ಪಾಲ್ ಪಡೆದಿತ್ತೆರ್. ಮಹೇಶ್ ಮೂರ್ತಿ ಲೇಸ್ ದ ಸುಧಾರಿಕೆ ಮಲ್ತೆರ್. ಕಿರಣ್ ಆಚಾರ್ಯ ಸೊಲ್ಮೆ ಸಂದಾಯೆರ್.

ಇನಿ ಶೌರ್ಯ ಯಾತ್ರೆದ ನಿಲೆಟ್ಟ್ ಗಾಡಿಲೆನ ಸಂಚಾರದ ಮಾರ್ಗ ಬದಲ್

ವಿಶ್ವ ಹಿಂದೂ ಪರಿಷತ್ತ್ ಬೊಕ್ಕ ಭಜರಂಗ ದಳತ್ತ ಮುತಾಲಿಕೆದ ಶೌರ್ಯ ಯಾತ್ರೆ ಮೆರೆವಣಿಗೆ ಇಪ್ಪುನೆರ್ದಾವರ ಇನಿ ಮಧ್ಯಾಹ್ನ 2 ಗಂಟೆಗ್ ಕುಡ್ಲ ಪೇಂಟೆದ ಅಂಬೇಡ್ಕರ್ ವೃತ್ತರ್ದ್ ಸುರು ಆದ್ ಪೇಂಟೆದ ಕದ್ರಿ ಮೈದಾನಡ್ ಮುಗಿತಲ ಆಪುಂಡು.

ಈ ಬಗೆಟ್ಟ್ ಅಂಬೇಡ್ಕರ್ ವೃತ್ತರ್ದ್ ಬಂಟ್ಸ್ ಹಾಸ್ಟೆಲ್ ದಂಚಿ ಪೋಪಿನ ಪಿ.ವಿ ಎಸ್ ಸರ್ಕಲ್ ರ್ದ್ ಬಂಟ್ಸ್ ಹಾಸ್ಟೆಲ್ ದಂಚಿ, ಕದ್ರಿ ಕಂಬುಲ ಜಂಕ್ಷನ್ ಕಡೆರ್ದ್ ಬಂಟ್ಸ್ ಹಾಸ್ಟೆಲ್ ದಂಚಿ, ಮಲ್ಲಿಕಟ್ಟೆ ಕಡೆರ್ದ್ ಬಂಟ್ಸ್ ಹಾಸ್ಟೆಲ್ ದಂಚಿ ಪೋಪಿನ ಮಾತ ರೀತಿದ ಗಾಡಿಲೆನ ಸಂಚಾರನ್ ಲೇಸ್ ಮುಗಿವುನ ಮುಟ್ಟ ಸಂಚಾರ ಉಂತಾದೆರ್.

ಪಡೀಲ್ ಬೊಕ್ಕ ತಲಪಾಡಿರ್ದ್ ಬರ್ಪಿನ ಮಾತ ಕೆಎಸ್ ಆರ್ ಟಿಸಿ ಬಸ್ಸ್ ಲು ಪಂಪ್ ವೆಲ್ ಗ್ ಬತ್ತ್ ದ್, ಪಂಪ್ ವೆಲ್ ರ್ದ್ ನಂತೂರು, ಕೆಪಿಟಿ ಮಾರ್ಗದ ಮುಖೇನ ಕೆಎಸ್ ಆರ್ ಟಿಸಿ ಗ್, ಬೊಕ್ಕ ಕೆಎಸ್ ಆರ್ ಟಿಸಿ ರ್ದ್ ಪೋಪಿನ ಮಾತ ಬಸ್ ಕೆಪಿಟಿ ನಂತೂರು, ಪಂಪ್ ವೆಲ್ ಮುಖೇನ ಪೋಪುಂಡು.

ನಂತೂರು ಕಡೆರ್ದ್ ಸ್ಟೇಟ್ ಬ್ಯಾಂಕ್ ಕಡೆಕ್ಕ್ ಪೋಪಿನ ಮತ ಬಸ್ ಲು, ಗಾಡಿಲು ಶಿವಭಾಗ್, ಹಾರ್ಟಿಕಲ್ಚರ್, ಬೆಂದೂರು, ಕರಾವಳಿ, ಕಂಕನಾಡಿ ಜಂಕ್ಷನ್ ಪೋದು ಪಳ್ನೀರ್ ಮಾರ್ಗದ ಮುಖೇನ ಸ್ಟೇಟ್ ಬ್ಯಾಂಕ್ ಗ್ ಪೋಪುಂಡು.

ಪಂಪ್ ವೆಲ್ ಕಡೆರ್ದ್ ಸ್ಟೇಟ್ ಬ್ಯಾಂಕ್ ಕಡೆರ್ದ್ ಪೋಪಿನ ಮಾತ ಬಸ್ ಲು, ಗಾಡಿಲು ಕಂಕನಾಡಿ ಜಂಕ್ಷನ್ ಗ್ ಬತ್ತ್ ದ್ ಪಳ್ನೀರ್ ಮಾರ್ಗದ ಮುಖೇನ ಸ್ಟೇಟ್ ಬ್ಯಾಂಕ್ ಗ್ ಪೋಪುಂಡು.