Thu. Nov 19th, 2026

ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News

ಟಿ20 ವಿಶ್ವಕಪ್ ಸೆಮಿಫೈನಲ್: ಟಾಸ್ ಗೆಂದಿನ ನ್ಯೂಜಿಲೆಂಡ್

ಸಿಡ್ನಿ: ಆಸ್ಟ್ರೇಲಿಯಾಡ್ ನಡತೊಂದು ಇಪ್ಪುನ ಟಿ2020 ವಿಶ್ವಕಪ್ ಟೂರ್ನಿದ ಸುರುತ್ತ ಸೆಮಿಫೈನಲ್‌ಡ್ ಪಾಕಿಸ್ತಾನ ಬೊಕ್ಕ ನ್ಯೂಜಿಲೆಂಡ್ ಕೂಟ ಗೊಬ್ಬರೆ ಉಂಡು.

ಸಿಡ್ನಿಡ್ ಟಾಸ್ ಗೆಂದಿನ ನ್ಯೂಜಿಲೆಂಡ್ ನಾಯಕೆ ಕೇನ್ ವಿಲಿಯಮ್ಸನ್, ಸುರುಕ್ಕ್ ಬ್ಯಾಟಿಂಗ್ ಮಲ್ಪರೆ ನಿರ್ಧಾರ ಮಲ್ತ್‌ದೆರ್.

ನಾಟಿ ವೈದ್ಯ ಕ್ಷೇತ್ರದ ಮಲ್ಲ ಸಾಧಕೆರ್ ಗಣೇಶ್ ಪಂಡಿತ್

ಉಳ್ಳಾಲಡ್ ಧನ್ವಂತರಿ ವೈದ್ಯಶಾಲೆದ ಮುಖೇನ 68 ವರ್ಷೊರ್ದಿಂಚ ಅವೇತೋ ಜನಕ್ ತನ್ನ ಪಾರಂಪರಿಕ ನಾಟಿ ವಿದ್ಯೆದ ಚಿಕಿತ್ಸೆನ್ ಕೊರ್ನ ದಿ. ನಾರಾಯಣ ಪಂಡಿತ್ ಮೆರೆನ ಮಗೆ ಗಣೇಶ್ ಪಂಡಿತ್ ತನ್ನ ಪೊಪ್ಪನ ನಾಟಿ ವೈದ್ಯ ಪದ್ದತಿನ್ ಎಲ್ಯೆರ್ದೆ ಕಲ್ತ್ ದ್, ಪೊಪ್ಪನ ಒಟ್ಟಿಗೆ ವೈದ್ಯ ಶಾಲೆಡ್ ಸಹಾಯಕೆರಾದ್, ನಾರಾಯಣ ಪಂಡಿತ್ ನ ಕಾಲದ ಮುಟ್ಟ ಬೇಲೆ ಮಲ್ತೆರ್. ಬೊಕ್ಕ ಅರೆನ ತಾದಿಡೇ ನಾಟಿ ವೈದ್ಯ ಪದ್ದತಿನ್ ದುಂಬು ಕೊನೊಂದು ಉಲ್ಲೆರ್.

ಉಳ್ಳಾಲ ಧನ್ವಂತರಿ ವೈದ್ಯಶಾಲೆಗ್ ಸುಮಾರ್ 68 ವರ್ಷದ ಇತಿಹಾಸ ಉಂಡು. ಈ ಐತಿಹಾಸಿಕ ಉಳ್ಳಾಲ ಸಯ್ಯದ್ ಮದನಿ ದರ್ಗಾ, ಇತಿಹಾಸ ಪ್ರಸಿದ್ಧವಾಯಿನ ಶ್ರೀ ಸೋಮನಾಥ ದೇವಲ್ಯ ಶಾಂತಿ ಧಾಮ, ಸಂತ ಸೆಬಾಸ್ಟಿಯನ್ ಚರ್ಚ್ ವ್ಯಾಪ್ತಿಡ್ ಬರ್ಪುಂಡು. ಈ ಭಾಗದ ಪ್ರತಿಯೊಂಜಿ ಇಲ್ಲದಕುಲು ಧನ್ವಂತರಿ ವೈದ್ಯ ಶಾಲೆರ್ದ್ ಮರ್ದ್, ಚಿಕಿತ್ಸೆ ದೆತೊಂದು ಹುಷಾರ್ ಆತೆರ್. ಪುಗರ್ತೆದ ಆಸ್ಪತ್ರೆದ ವೈದ್ಯೆರೆರ್ದ್ ಹುಷಾರ್ ಆವಂದಿನ ಸೀಕುಲು ಧನ್ವಂತರಿ ವೈದ್ಯ ಶಾಲೆದ ಚಿಕಿತ್ಸೆರ್ದ್ ಹುಷಾರ್ ಆಯಿನ ಉದಾರ್ಮೆ ಮಸ್ತ್ ಉಂಡು.

“ಪಂಡಿತೊ ನಾರಾಯಣ ಹರಿ” ಪಂದ್ ಎನ್ನ್ ದ್ ಏತೋ ಜನ ಜಾತಿ, ಮತ, ಭೇದ ಇಜ್ಜಂದೆ ಈ ಕೇಂದ್ರಗ್ ಬತ್ತ್ ದ್ ಶರೀರದ ಮಾತ ಸೀಕ್ ಗ್ಲಾ ಚಿಕಿತ್ಸೆ ದೆತೊಂದು ನಾಟಿ ಮರ್ದ್ ದೊಟ್ಟಿಗೆ ಹುಷಾರ್ ಆತೆರ್. ಉಳ್ಳಾಲ ಭಾಗದ ಜನಕುಲು ಅತ್ತಂದೆ, ದ.ಕ ಜಿಲ್ಲೆದ ಬೇತೆ ಬೇತೆ ಜಾಗೆರ್ದ್ ಮರ್ದ್ ಗಾದ್ ಇಡೆಗ್ ಬರ್ಪುನವು ಇಸೇಸ. ಆತ್ ಎಡ್ಡೆ ಕೈಗುಣರ್ದ್ ಕೊರ್ಪುನ ಮರ್ದ್ ಮೇರೆನವು ಆತ್ಂಡ್. ವಿದೇಶರ್ದ್ ಬತ್ತಿನಕುಲು ಕೆಲವೊಂಜಿ ಶರೀರದ ಸೀಕ್ ಗ್ ಮರ್ದ್ ದೆತೊಂದು, ವಿದೇಶಗ್ ಪೋಯಿ ಬೊಕ್ಕಲ ಕೂಡ ವಿದೇಶಲೆಗ್ ಮರ್ದ್, ಕಷಾಯಲೆಗ್ ಕೊನೊಪಾವೊಂದು ಇತ್ತೆರ್. ಮನುಷ್ಯಗ್ ಅಕಾಲವಾದ್ ಬರ್ಪುನ ಸಂಧಿವಾತ, ಬೆರಿಬೇನೆ, ಗಂಟ್ ಬೇನೆ, ಕೈಕಾರ್ ಒಯಿಪುನ, ನರದೌರ್ಬಲ್ಯ ಇಂಚಿನ ಸುಮಾರ್ ರೋಗಗ್ ಮೆರೆನ ಕೈರ್ದ್ ಎಣ್ಣೆ ಪೂಜಾದ್ ಹುಷಾರ್ ಆತೆರ್, ಅವೆತ್ತೊ ಬಡಪತ್ತ್ ದಕುಲೆಗ್ ಧರ್ಮಾಗ್ ಚಿಕಿತ್ಸೆ ಮರ್ದ್ ಲೆನ್ ಕೊರೊಂದು ಬೈದಿನ ಮೇರ್ ಕೊರೊನದ ಪೊರ್ತುಡು ಕಷಾಯ, ಮರ್ದ್ ಲೆನ್ ಸಾರ್ವಜನಿಕೆರೆಗ್ ಧರ್ಮಾರ್ಥ ಕೊರ್ಪುನೆತ್ತ ಒಟ್ಟಿಗೆ ದಿನಸಿ ಸಾಮಾನ್ ಲೆನ್ ಕೊರ್ತೆರ್. ಪಂಡಿತೆರಾದ್ ಸೇವಾ ಮನೋಭಾವನೆನ್ ಬುಲೆಪಾವೊಂದು ಬೈದಿನ ಮೇರ್ ಸಮಾಜದ ಪ್ರತಿ ವರ್ಗದ, ಜಾತಿದ ಜನತೊಟ್ಟಿಗೆಲ ಪ್ರೀತಿಡ್ ಉಲ್ಲೆರ್. ನಾಟಿ ವೈದ್ಯ ಕ್ಷೇತ್ರಡ್ ಜನಕ್ಲೆನ ಪ್ರೀತಿ, ವಿಶ್ವಾಸನ್ ಕಾಪಾದ್, ಎಡ್ಡೆ ಸೇವೆನ್ ಕೊರ್ಪುನ ಜನ ಆತೆರ್. ಮೇರ್ ಪುಟ್ಟು ಅಂಗವಿಕಲತೆ ಇಪ್ಪುನ ಅವೆತ್ತೊ ಜೋಕುಲೆಗ್ ನಾಟಿ ವೈದ್ಯ ಪದ್ದತಿ ಕೊರ್ದು ಹುಷಾರ್ ಮಲ್ದೆರ್. ಭಾರತದ ಈ ಪಾರಂಪರಿಕ ನಾಟಿ ವೈದ್ಯೆರಾದ್ ಮೇರ್ ಜನಸೇವೆ ಮಲ್ತೊಂದು ಉಲ್ಲೆರ್. ಅಂಚಾದ್ ನಾಟಿ ವೈದ್ಯ ಕ್ಷೇತ್ರಡ್ ಮೆರೆಗ್ ದ.ಕ ಜಿಲ್ಲಾ ರಾಜ್ಯೋತ್ಸವ ಪ್ರಶಸ್ತಿ ತಿಕ್ಕೊಡಿತ್ತ್ಂಡ್. ನನ ದುಂಬುದ ದಿನೊಟ್ಟಾಂಡಲ ಆ ಪ್ರಶಸ್ತಿ ಅರೆಗ್ ತಿಕ್ಕಡ್ ಪನ್ಪಿನವು ಮಾತೆರ್ನಲ ಆಸೆ.

ಪೆಜಮಾಡಿ ಯುವ ವಾಹಿನಿ ಘಟಕದ ಮುತಾಲಿಕೆಡ್ ತುಳಸಿ ಪರ್ಬ ಆಚರಣೆ

ಪೆಜಮಾಡಿ ಯುವವಾಹಿನಿ ಘಟಕದ ಮುತಾಲಿಕೆಡ್ ಪೆಜಮಾಡಿ ಬಿಲ್ಲವೆರ್‍ನ ಸಂಘದ ಗುರುಮಂದಿರಡ್ ತುಳುನಾಡ ತುಳಸಿ ಪರ್ಬ ಆಚರಣೆ ಮಲ್ತೆರ್.

ಗುರು ಮಂದಿರದ ಪ್ರಧಾನ ಅರ್ಚಕೆರ್ ಹರೀಶ್ ಶಾಂತಿ ಬೊಂಬಾಯಿ ಧಾರ್ಮಿಕ ಪೂಜಾ ಲೇಸ್‌ನ್ ನಡಪಾದ್ ಕೊರಿಯೆರ್.

ಯುವವಾಹಿನಿ ಕೇಂದ್ರ ಸಮಿತಿದ ಅಧ್ಯಕ್ಷೆರ್ ಉದಯ ಅಮೀನ್ ಮಟ್ಟು, ಮಸ್ಕತ್ ಉದ್ಯಮಿ ಸುಕುಮಾರ್ ಕೋಟ್ಯಾನ್, ಬಿಲ್ಲವ ಸಂಘದ ಅಧ್ಯಕ್ಷೆರ್ ಲೋಕೇಶ್ ಅಮೀನ್, ಯುವವಾಹಿನಿ ಪೆಜಮಾಡಿ ಘಟಕದ ಅಧ್ಯಕ್ಷೆರ್ ಧನಂಜಯ, ಕಾರ್ಯದರ್ಶಿ ಜಯಶ್ರೀ ಸದಾಶಿವ, ಯುವವಾಹಿನಿ ಕೇಂದ್ರ ಸಮಿತಿದ ಮಾಜಿ ಅಧ್ಯಕ್ಷೆರ್ ತಾರಾನಾಥ್, ಬಿಲ್ಲವ ಸಂಘದ ಕಾರ್ಯದರ್ಶಿ ಸುನೀತಾ ಕರ್ಕೇರ, ಕೋಶಾಧಿಕಾರಿ ಪ್ರಭೋದ್ ಚಂದ್ರ ಹೆಜಮಾಡಿ, ಯುವವಾಹಿನಿ ಕೇಂದ್ರ ಸಮಿತಿದ ಸಂಘಟನಾ ಕಾರ್ಯದರ್ಶಿ ಧೀರಜ್ ಪೆಜಮಾಡಿ, ಗುರುಮಂದಿರದ ಅರ್ಚಕೆರ್ ರಾಜೇಶ್ ಶಾಂತಿ, ಯುವವಾಹಿನಿ ಪೆಜಮಾಡಿ ಘಟಕದ ಕೋಶಾಧಿಕಾರಿ ನಿಶಾಂತ್ ಕೋಟ್ಯಾನ್, ಯುವವಾಹಿನಿದ ಸದಸ್ಯೆರ್ ಲೇಸ್‌ಡ್ ಇತ್ತೆರ್.

ಕುಡ್ಲ: ಮಳಲಿ ಮಸೀದಿ ಆಡಳಿತ ಮಂಡಳಿದ ಅರ್ಜಿ ವಜಾ ಮಲ್ತಿನ ಕೋರ್ಟ್

ಕುಡ್ಲ: ಮಳಲಿ ಮಸೀದಿ ವಿವಾದದ ಕೇಸ್‌ಗ್ ಸಂಬಂಧ ಪಟ್ ದ್ ವಿಶ್ವ ಹಿಂದೂ ಪರಿಷತ್ ಕೊರ್ತಿನ ಅರ್ಜಿನ್ ಕುಡ್ಲದ 3ನೇ ಹೆಚ್ಚುವರಿ ಸಿವಿಲ್ ಕೋರ್ಟ್ ವಿಚಾರಣೆಗ್ ದೆತೊಂದುಂಡು.

ಅಂಚನೆ ಮಸೀದಿದ ಆಡಳಿತ ಮಂಡಳಿ ಕೊರ್ತಿನ ಅರ್ಜಿನ್ ವಜಾ ಮಲ್ತ್‌ದ್ಂಡ್. ವಿಎಚ್‌ಪಿದ ಅರ್ಜಿ ಸ್ವೀಕಾರ ಮಲ್ತಿನ ಕೋರ್ಟ್ ಜನವರಿ 8, 2023 ಕ್ಕ್ ದುಂಬುದ ವಿಚಾರಣೆ ನಡಪಾಯರೆ ಉಂಡು.

ವಿಶ್ವ ಗಾಣಿಗೆರ್ನ ಚಾವಡಿ ಕೂಟದ ಮಾಸಭೆ, ಪನವುದ ಸಕಾಯ ಪಟ್ಟುನ ಲೇಸ್

ವಿಶ್ವ ಗಾಣಿಗೆರ್ನ ಚಾವಡಿ ಕೂಟದ ಮುತಾಲಿಕೆಡ್ ಮಾಸಭೆ, ಪನವುದ ಸಕಾಯ ಪಟ್ಟುನ ಲೇಸ್ ಐತಾರ ಪಾಣೇರ್ ಸುಮಂಗಲಾ ಕಲ್ಯಾಣ ಮಂಟಪಡ್ ನಡತ್ಂಡ್.

ಈ ಲೇಸ್ ಡ್ ಬಂಟ್ವಾಳ ಶಾಸಕೆರ್ ರಾಜೇಶ್ ನಾಯ್ಕ್ ಉಳಿಪ್ಪಾಡಿ ಪಾತೆರ್ದ್, ಸಮಾಜದ ಜವನೆರೆನ್ ಸಾಮಾಜಿಕ ಜಾಲತಾಣಡ್ ಒಟ್ಟು ಮಲ್ತ್ ದ್, ಸಮಾಜದಬೇಲೆಡ್ ಪಾಲ್ ಪಡೆಯಿನ ವಿಜಿಸಿ ಕೂಟದ ಕಜ್ಜ ಮೆಚ್ಚೊಡಾಯಿನ. ನೇರ್ದಾವೆರ ಹಿಂದೂ ಸಮಾಜದ ಶಕ್ತಿ ನನಾತ್ ವೃದ್ಧಿ ಅಪುಂಡು ಪಂದ್ ಪಂಡೆರ್. ಬೊಂಬೈ ಸಪಲ್ಯ ಸೇವಾ ಸಂಘದ ಅಧ್ಯಕ್ಷೆರ್ ಶ್ರೀನಿವಾಸ್ ಸಪಲ್ಯ ಮೆರೆನ ಮಾರ್ಗದರ್ಶನಡ್ ನೂರ್ದೆದ್ಲಾ ಎಚ್ಚ ಸಾಧಕ ವಿದ್ಯಾರ್ಥಿಲೆಗ್ ಪನವುದ ಸಕಾಯ ಪಟ್ಟಿಯೆರ್. ಸಾಮಾಜಿಕ ಕಾರ್ಯಕರ್ತೆರ್ ಕಾರ್ತಿಕ್ ಎಸ್ ಕಟೀಲ್ ಬೊಕ್ಕ ಗ್ಲಾಸ್ ಆರ್ಟ್ಸ್‌ಡ್ ಇಂಡಿಯಾ ಬುಕ್ ಆಫ್ ರೆಕಾರ್ಡ್-2022 ಪ್ರಶಸ್ತಿ ವಿಜೇತೆರ್ ದೀಪಕ್ ರೆಂಕಿದಗುತ್ತು ಮೆರೆಗ್ ತಮ್ಮನ ನಡತ್ಂಡ್. ಸುರುಟ್ಟು ಸ್ವರಕ್ಷಾ ಫಾರ್ ವುಮೆನ್ ಟ್ರಸ್ಟ್ ದ ವತಿರ್ದ್ ಸ್ವರಕ್ಷಾ ತರಬೇತಿ ಶಿಬಿರ ನಡತ್ಂಡ್. ಬೊಕ್ಕ ಈ ಲೇಸ್ ಡ್ ಬಂಟ್ವಾಳ ಶಾಸಕೆರ್ ರಾಜೇಶ್ ನಾಯ್ಕ್ ಉಳಿಪ್ಪಾಡಿ ಮೆರೆಗ್ ಕೂಟದ ಲೆಕ್ಕೊಡು ಬೇತೆ ಬೇತೆ ಬೇಡಿಕೆಲು ಇಪ್ಪುನ ಬಿನ್ನಾಪುನ್ ಸಂದಾಯೆರ್. ಲೇಸ್ ದ ಅಧ್ಯಕ್ಷತೆನ್
ಬಂಟ್ವಾಳ ತಾಲೂಕ್ ಗಾಣಿಗರ ಯಾನೆ ಸಪಲಿಗರ ಸಂಘ ಅಧ್ಯಕ್ಷೆರ್ ರಘು ಸಪಲ್ಯ ಒಯಿಸೊಂದು ಇತ್ತೆರ್. ಸುಂದರ ಸೋಮೇಶ್ವರ ದೀಪ ಅರ್ಲಾದ್ ಲೇಸ್ ಉದಿಪನ ಮಲ್ತೆರ್. ಪತ್ರಕರ್ತೆರ್ ದಾಮೋದರ ದೊಂಡೋಲೆ ನಿರೂಪಣೆ ಮಲ್ತೆರ್. ದೇವಿಪ್ರಸಾದ್ ಎಂ ಎದ್ಕೊನಿಯೆರ್. ಗಣೇಶ್ ಶಂಭೂರ್ ಪ್ರಾಸ್ತಾವಿಕ ಪಾತೆರ್ಯೆರ್. ಹೇಮಲತಾ ಮೆಂಡನ್ ಬೊಂಬೈ ಸೊಲ್ಮೆ ಸಂದಾಯೆರ್.

ಈ ಪೊರ್ತುಡು ದ.ಕ. ಜಿಲ್ಲಾ ಅಗ್ನಿಶಾಮಕ ದಳ ಅಧಿಕಾರಿ ಭರತ್ ಕುಮಾರ್ ಕಲ್ಲಡ್ಕ, ಸುಮಂಗಲಾ ಕ್ರೆಡಿಟ್ ಕೋ-ಆಪರೇಟಿವ್ ಸೊಸೈಟಿ ಅಧ್ಯಕ್ಷೆರ್ ನಾಗೇಶ್ ಕಲ್ಲಡ್ಕ, ಸಾಮಾಜಿಕ ಕಾರ್ಯಕರ್ತೆರ್ ಶೋಭಲತಾ ಕಟೀಲ್, ವಿಜಿಸಿ ಕೂಟದ ಗೌರವ ಸಲಹೆಗಾರೆರ್ ಧನಪಾಲ್ ಸದಾಶಿವ್, ಅಧ್ಯಕ್ಷೆರ್ ಹರಿಪ್ರಸಾದ್ ಶಕ್ತಿನಗರ, ಅಖಿಲ ಕರ್ನಾಟಕ ಗಾಣಿಗ ಸಂಘ ಬೆಂಗ್ಲೂರ್ ನಿರ್ದೇಶಕೆರ್ ಭಾಸ್ಕರ ಎಡಪದವು, ಸಾಮಾಜಿಕ ಕಾರ್ಯಕರ್ತೆರ್ ಚಂದ್ರಶೇಖರ್ ಎಡಪದವು, ಸದಾಶಿವ ಬರಿಮಾರ್, ಯಶೋಧರ ಕರ್ಬೆಟ್ಟು, ನಿವೃತ್ತ ಪೊಲೀಸ್ ಅಧಿಕಾರಿ ಮೋಹನ್ ಉಳ್ಳಾಲ್, ಪತ್ರಕರ್ತೆರ್ ಮೋಹನ್ ಶ್ರೀಯಾನ್, ಬಂಟ್ವಾಳ ತಾಲೂಕ್ ಗಾಣಿಗ ಸಂಘ ಅಧ್ಯಕ್ಷೆರ್ ರಘು ಸಪಲ್ಯ, ಸಾಮಾಜಿಕ ಕಾರ್ಯಕರ್ತೆರ್ ಕಾರ್ತಿಕ್ ಎಸ್. ಕಟೀಲ್, ಪದಾಧಿಕಾರಿಗಳಾಯಿನ ಹರಿಪ್ರಸಾದ್ ಶಕ್ತಿನಗರ, ದೇವಿಪ್ರಸಾದ್ ಎಂ., ಗಣೇಶ್ ಶಂಭೂರು, ಸಂದೀಪ್ ಮೆಂಡನ್, ಶಶಿಕಾಂತ್ ಸಪಲಿಗ, ಲತೀಶ್ ಸಪಲ್ಯ ಕುಂಪಲ, ಅಭಿಷೇಕ್ ಧರ್ಮಸ್ಥಳ ಇತ್ತೆರ್.

ತೆನಸ್ ಗಾದ್ ಇಲ್ಲದ ಎದುರು ಬತ್ತ್ ದ್ ಉಂತಿನ ಆನೆದ ವೀಡಿಯೋ ವೈರಲ್ !

ಹಾಸನ: ಸಕಲೇಶಪುರ ತಾಲೂಕ್ ದ ಹೆಬ್ಬನಹಳ್ಳಿ ಗ್ರಾಮಡ್ ಆನೆ ಬಡವುಡು ಲೋಕೇಶ್ ಪನ್ಪುನರೆನ ಇಲ್ಲದ ಎದುರು ಬತ್ತ್ ದ್ ಉಂತಿನ ಘಟನೆ ನಡತ್ಂಡ್.

ಬಡವಾಯಿನ ಈ ಆನೆ ಸುಮಾರ್ ಪೊರ್ತು ಉಂತುದ್ ಅಂಚಿರ್ದ್ ಇಂಚಿ ಪೋಪುನ ವೀಡಿಯೋ ಇತ್ತೆ ವೈರಲ್ ಆತ್ಂಡ್. ಹಾಸನ ಜಿಲ್ಲೆಡ್ ಆನೆಲೆನ ಉಪದ್ರ ಎಚ್ಚಾತ್ಂಡ್. ಇದ ಮುಟ್ಟ ಸುಮಾರ್ 70 ಜನ ಆನೆದ ದಾಳಿಡ್ ಸೈದೆರ್ . ಇಂಚಾದ್ ಊರುದಕುಲು ಪೋಡಿಗೆಡ್ ದಿನ ದೆಪ್ಪುಲೆಕ್ಕ ಆತ್ಂಡ್.

ಸಿಸಿ ಟಿವಿ ದೆಪ್ಪರೆ ತೂಯಿನ ಪೊಯ್ಯೆ ದಂಧೆದಕುಲು: ಕೇಸ್ ದಾಖಲ್

ಉಳ್ಳಾಲ: ಜಿಲ್ಲಾಡಳಿತ ನಿರ್ದೇಶನದಂಚನೆ ಪಾಡ್ದಿನ ಸಿಸಿಟಿವಿನ್ ಪೊಯ್ಯೆದ ದಂಧೆದಕುಲು ದೆಪ್ಪರೆ ತೂಯಿನ ಘಟನೆ ಸೋಮೇಶ್ವರ ಮೂಡ ಲೇಔಟ್ ಡ್ ನಡತ್ಂಡ್.

ಈ ಬಗೆಟ್ ಉಳ್ಳಾಲದ ಗ್ರಾಮಲೆಕ್ಕಾಧಿಕಾರಿ ಈ ಸಂತೋಷ್ ಕೊರ್ನ ದೂರುದಂಚನೆ ಉಳ್ಳಾಲ ಪೊಲೀಸ್ ಠಾಣೆಡ್ ಕೇಸ್ ದಾಖಲ್ ಆತ್ಂಡ್.
ಕೆಲವು ತಿಂಗೊಲ್ದ ಪಿರವು ಸೋಮೇಶ್ವರ ಕಡಲ್ ದ ಬರಿಟ್ಟ್ ಪಾಡ್ದಿನ ಸಿಸಿಟಿವಿನ್ ಲಾರಿಡ್ ಗುದ್ದುದು ದೆತ್ತಿನ ಕೇಸ್ ಡ್ ನಾಲ್ ಜನ ಅರೆಸ್ಟ್ ಆದಿತ್ತೆರ್.

ನ.11: ಬೆಂಗ್ಲೂರುಗ್ ಮೋದಿ ಬರ್ಪಿನೆಡ್ದಾವರ 4 ಸಾರ ಪೊಲೀಸೆರ್ನ ನಿಯೋಜನೆ

ದೇವನಹಳ್ಳಿದ ಕೆಂಪೇಗೌಡ ಇಮಾನ ನಿಲ್ದಾಣಡ್ ಕೆಂಪೇಗೌಡ ಮೂರ್ತಿ ಉದಿಪನ ಮಲ್ಪರೆ ಪ್ರಧಾನಿ ಮೋದಿ ನ.11 ಕ್ಕ್ ಬೆಂಗ್ಲೂರುಗ್ ಬರಿಯರೆ ಇತ್ತ್‌ದ್, ಬಂದೋಬಸ್ತ್‌ಗಾದ್ 4000 ಪೊಲೀಸೆರೆನ್ ಪಾಡ್ದೆರ್.

ಮೂರ್ತಿ ಉದಿಪನ ಆಯಿಬೊಕ್ಕ ಪ್ರಧಾನ ಮಂತ್ರಿಲು ಸಾರ್ವಜನಿಕ ಭಾಷಣ ಮಲ್ಪರೆ ಇತ್ತ್‌ದ್, 4 ಲಕ್ಷ ಜನ ಸೇರುನ ಸಾಧ್ಯತೆ ಉಂಡು.

ಸರ್ಕಾರಿ ಬೇಲೆ ತಿಕ್ಕರೆ ಅನುಭವ ಕಡ್ಡಾಯ: ಗೋವಾ ಸರ್ಕಾರ

ಪಣಜಿ: ಸರ್ಕಾರಿ ಬೇಲೆಗ್ ಅರ್ಜಿ ಪಾಡ್ ನಗ ಖಾಸಗಿ ವಲಯಡ್ ಕಮ್ಮಿ ಪಂಡ ಒಂಜಿ ವರ್ಷ ಬೇಲೆ ಮಲ್ತಿನ ಅನುಭವ ಇಪ್ಪೊಡು ಪನ್ಪಿನ ನಿಯಮನ್ ಜಾರಿಗ್ ಕನಯರೆ ಗೋವಾ ಸರ್ಕಾರ ದುಂಬು ಬೈದ್ಂಡ್.

ಪಣಜಿಡ್ ನಡತಿನ ಉದ್ಯೋಗ ಮೇಳಡ್ ಪಾತೆರಿನ ಗೋವಾ ಮುಖ್ಯಮಂತ್ರಿ ಪ್ರಮೋದ್ ಸಾವಂತ್, “ಎಡ್ಡೆಂತಿನ ಅಂಚನೆ ಪ್ರತಿಭಾನ್ವಿತ ಉದ್ಯೋಗಿಲೆನ್ ಸರ್ಕಾರಿ ವಲಯಡ್ ದೆತೊನರೆ ಈ ನಿರ್ಧಾರ ಮಲ್ತ್‌ದ” ಪಂದ್ ಪಂಡೆರ್.

ಶಬರಿಮಲೆ ಯಾತ್ರೆ ಸುರು ಆಯರೆ ನನ ಕೆಲವೇ ದಿನ: ದೇವಲ್ಯಡ್ ಬಿರ್ಸ್ ದ ತಯಾರಿ

ಪಂಪಾ: ಶಬರಿಮಲೆ ಯಾತ್ರೆ ಸುರು ಆಯರೆ ನನ ಒಂಜಿ ವಾರ ಮಾತ್ರ ಬಾಕಿ ಉಂಡು. ನ.16 ಕ್ಕ್ ಬಯ್ಯ ಮಂಡಲ ತೀರ್ಥ ಯಾತ್ರೆಗಾದ್ ದೇವಲ್ಯದ ಬಾಕಿಲ್ ದೆಪ್ಪುವೆರ್ .

ಕೋವಿಡ್ ರ್ದ್ ಬೊಕ್ಕ ತೀರ್ಥಯಾತ್ರೆ ಸಂಪೂರ್ಣವಾದ್ ಸುರು ಆಪಿನೆಡ್ದಾವರ ಎಚ್ಚದ ಸಂಖ್ಯೆದ ಭಕ್ತೆರೆನ್ ಸರ್ಕಾರ ಬೊಕ್ಕ ದೇವಸ್ವಂ ಮಂಡಳಿ ನಿರೀಕ್ಷೆ ಮಲ್ತೊಂದು ಉಂಡು. ನಿಲಕ್ಕಲ್, ಪಂಪಾ ಬೊಕ್ಕ ಸನ್ನಿಧಾನಡ್ ಮೂಲ ಸೌಕರ್ಯದೊಟ್ಟುಗು ಬೇತೆ ರೀತಿದ ಸಿದ್ಧತೆ ಭಾರೀ ಬೇಗಡ್ ನಡತೊಂದು ಉಂಡು.