Thu. Nov 19th, 2026

ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News

ನ.12-14 : ರಜತಾದ್ರಿ ಮುಂಡ್ರಬೈಲ್ ಶ್ರೀ ಆದಿಶಕ್ತಿ ಚಾಮುಂಡೇಶ್ವರಿ ದೇವಲ್ಯಡ್ ಪ್ರತಿಷ್ಠಾ ದಿನತ್ತ ಉಚ್ಚಯ

ಇಡ್ಕಿದು: ರಜತಾದ್ರಿ ಮುಂಡ್ರಬೈಲ್ ಶ್ರೀ ಆದಿಶಕ್ತಿ ಚಾಮುಂಡೇಶ್ವರಿ ದೇವಲ್ಯಡ್ ಪ್ರತಿಷ್ಠಾ ವಾರ್ಷಿಕೋತ್ಸವ ನ.12 ರ್ದ್ ನ.14 ಮುಟ್ಟ ನಡಪರೆ ಉಂಡು.

ನ.12 ಕ್ ಬಯ್ಯಗ್ 6 ಗಂಟೆಗ್ ದುರ್ಗಾ ನಮಸ್ಕಾರ ಪೂಜೆ, ಕೈತಲ್ದಕ್ಲೆರ್ದ್ ಸಾಂಸ್ಕೃತಿಕ ಲೇಸ್ ಬೊಕ್ಕ ಉಳ್ಳಾಲ್ತಿ ದುರ್ಗಾಪರಮೇಶ್ವರಿ ಕೃಪಾಪೋಷಿತ ಯಕ್ಷಗಾನ ಮಂಡಳಿ (ರಿ.) ಅಂಗ್ರಿ, ಕನ್ಯಾನ ಮೊಕ್ಲೆರ್ದ್ ರಂಗಚಕ್ರವರ್ತಿ ಸುಬ್ಬು ಸಂಟ್ಯಾರ್ ವಿರಚಿತದ ಅಜ್ಜನ ಪಜ್ಜೆ ತುಳು ಆಟ ನಡಪರೆ ಉಂಡು. ನೆಕ್ಕ್ ಬಿನ್ನೆರಾಯಿನ ರಂಗ್ ದ ರಾಜೆ ಸುಂದರ್ ರೈ ಮಂದಾರ ಕಲಾವಿದೆರಾದ್ ಬರ್ಯೆರೆ ಉಲ್ಲೆರ್. ನ.13ಕ್ ಬೊಲ್ಪುಗು 6 ಗಂಟೆರ್ದ್ ಗಣಹೋಮ, ನಾಗತಂಬಿಲ,ನವಕಲಶ, ಬೊಕ್ಕ ಚಂಡಿಕಾ ಹವನ ಸುರು ಆದ್ 11:30ಕ್ ಮುಗಿಪುಂಡು. ಬೊಕ್ಕ ಮಹಾಪೂಜೆ, ಪ್ರಸಾದ, ಅನ್ನಸಂತರ್ಪಣೆ, ಆಯಿರ್ದ್ ಬೊಕ್ಕ ದೈವದ ಭಂಡಾರ ಜಪ್ಪರೆ ಉಂಡು. ಬೊಕ್ಕ ಕಲ್ಲುರ್ಟಿ, ಪಟ್ಟದ ಪಂಜುರ್ಲಿ, ಗುಳಿಗಗ್ ನೇಮ ನಡಪುಂಡು.
ನ.14 ಕ್ ಬೊಲ್ಪುಗು 10:30ಕ್ ಶ್ರೀ ದೇವಿಗ್ ಇಸೇಸ ಮಹಾಪೂಜೆ, ದೈವಲೆಗ್ ವಾರ್ಷಿಕ ತಂಬಿಲ, ಗುಳಿಗಗ್ ಕೋರಿ ಕೊರ್ಯೆರೆ ಉಂಡು. ರಾತ್ರೆ 8 ಗಂಟೆಗ್ ಕಲ್ಲುರ್ಟಿ ಅಗೆಲ್ ನಡಪುಂಡು ಪಂದ್ ಲೆಪ್ಪೋಲೆಡ್ ತೆರಿಪಾದೆರ್.

ಮುಲ್ಕಿ : ಮಾರ್ಗದ ಗುಂಡಿ ಮುಚ್ಚಿನ ಜವನೆರೆನ ಬೇಲೆಗ್ ಜನ ಮೆಚ್ಚಿಗೆ

ಮುಲ್ಕಿ: ಜವನೆಡನ ಕೂಟಸಕುಲು ಪಗೆಲ್ ಡ್ ಬೇಲೆ ಮುಗಿತ್ ದ್ ರಾತ್ರೆದ ಪೊರ್ತುಡು ಸಮಾಜ ಸೇವೆ ರೂಪಡ್ ಮಾರ್ಗದ ಗುಂಡಿಲೆನ್ ಸ್ವಂತ ಖರ್ಚಿರ್ದ್ ಕಾಂಕ್ರೀಟ್ ಪಾಡ್ದ್ ಮುಚ್ಚುನ ಬೇಲೆ ಮಲ್ತೊಂದುಲ್ಲೆರ್.

ಮುಲ್ಕಿ ಎಚ್ ಡಿಎಫ್ ಸಿ ಬ್ಯಾಂಕ್ ಶಾಖೆದ ಎದುರು ಇತ್ತಿನ ಮಲ್ಲ ಗುಂಡಿನ್ ರಾತ್ರೆ ಸುರಭಿ ಇಲೆಕ್ಟ್ರಾನಿಕ್ಸ್ ಸಿಬ್ಬಂದಿ ಸುಪ್ರೀತಾ ಪಿ ಬೊಕ್ಕ ಸಂಬಂಧಿಕೆರಾಯಿನ ಸಚಿನ್ ಪುನರೂರ್, ನರೇಶ್ ಪುನರೂರ್, ಮೊಕುಲು ರಮೇಶ್ ಮೆರೆನ ಒಟ್ಟಿಗೆ ಸೇರ್ದ್ ಜಲ್ಲಿ ಬೊಕ್ಕ ಸಿಮೆಂಟ್ ಪಾಡ್ದ್ ಮಾರ್ಗದ ನಡುಟ್ಟಿತ್ತಿನ ಗುಂಡಿನ್ ಮುಚ್ಚಿದೆರ್. ನೆರ್ದ್ ದುಂಬುಲ ಕೆಂಚನಕೆರೆ ಶಾಲೆದ ಎದುರುದ ಮಾರ್ಗಡ್ ಇತ್ತಿನ ಗುಂಡಿನ್ ಮೊಕುಲು ಇಂಚೆನೆ ಮುಚ್ಚಿದಿತ್ತೆರ್. ಮೊಕ್ಲೆನ ಈ ಬೇಲೆನ್ ಕೈತಲ್ದಕುಲು ಬೊಕ್ಕ ರಿಕ್ಷಾ ಡ್ರೈವರ್ ನಕುಲು ಮೆಚ್ಚಿ ದೆರ್.

ಟಿ-20 ವಿಶ್ವಕಪ್: ಫೈನಲ್‌ಗ್ ಪಾಕಿಸ್ತಾನ

ಸಿಡ್ನಿ: ಟಿ-20 ವಿಶ್ವಕಪ್ ಕ್ರಿಕೆಟ್ ಪಂತೊಡು ಪಾಕಿಸ್ತಾನ ಕೂಟದಕುಲು ಫೈನಲ್‌ಗ್ ಎಂಟ್ರಿ ಆತೆರ್.

ಸೆಮಿಫೈನಲ್ ಪಂತೊಡು ನ್ಯೂಜಿಲ್ಯಾಂಡ್ ಮಿತ್ತ್ 7 ವಿಕೆಟ್ ರ್ದ್ ಗೆಂದಿನ ಪಾಕಿಸ್ತಾನ ಫೈನಲ್‌ಗ್ ಎಂಟ್ರಿ ಆತ್ಂಡ್.

2022 ಟ್ಟ್ ಯುರೋಪ್‌ಡ್ ದೊಂಬುಗು ತೀರ್ ಪೋಯೆರ್ 15 ಸಾರ ಜನ!

2022 ಟ್ಟ್ ಯುರೋಪ್‌ಡ್ ದೊಂಬುಗು 15 ಸಾರ ಜನ ತೀರ್ ಪೋತೆರ್ ಪಂದ್ ವಿಶ್ವ ಆರೋಗ್ಯ ಸಂಸ್ಥೆ ತೆರಿಪಾದ್ಂಡ್. ಸ್ಪೇನ್ ಬೊಕ್ಕ ಜರ್ಮನ್‌ಡ್ ಎಚ್ಚ ಜನ ತೀರ್ ಪೋತೆರ್.

ಜೂನ್, ಆಗೋಸ್ಟ್‌ದ ಪೊರ್ತುಡು ಯುರೋಪ್‌ಡ್ ದಾಖಲ್ ಮಲ್ಪಿನ ಮಟ್ಟಡ್ ದೊಂಬು ಇತ್ತ್ಂಡ್. ಸ್ಪೇನ್‌ಡ್ 4 ಸಾರ, ಪೋರ್ಚುಗಲ್‌ಡ್ 1 ಸಾರ, ಯು.ಕೆ ಡ್ 3,200 ಅಂಚನೆ ಜರ್ಮನ್‌ಡ್ 4,500 ಜನ ತೀರ್ ಪೋತೆರ್ ಪಂದ್ WHO ಅಧಿಕಾರಿಲು ಪಂತೆರ್.

ಪುನೀತ್ ರಾಜ್ ಪುದರ್‌ಡ್ ಅಪ್ಪು ಅಮರ ಹೆಲ್ತ್ ಪ್ರಿವಿಲೇಜ್ ಕಾರ್ಡ್

ಕಾವೇರಿ ಆಸ್ಪತ್ರೆ, ಸಾಯಿ ಸಂಗಮ ಡಯಾಗ್ನೋಸ್ಟಿಕ್ ಬೊಕ್ಕ ಹೆಲ್ತ್ ಕೇರ್ ಮುತಾಲಿಕೆಡ್ ಕರ್ನಾಟಕ ಟೆಲಿವಿಷನ್ ಅಸೋಷಿಯೇಶನ್ ಸದಸ್ಯೆರೆಗ್ ಅಪ್ಪು ಅಮರ ಹೆಲ್ತ್ ಕಾರ್ಡ್ ಕೊರ್ಪಿನ ಭರವಸೆ ಕೊರ್ದಿತ್ತ್ಂಡ್.

ಅಂಚಾದ್ ನವೆಂಬರ್ 13 ಕ್ಕ್ ಐತಾರ ಬಯ್ಯ 5 ಗಂಟೆಗ್ ಬೆಂಗ್ಲೂರ್‌ದ ಕಾವೇರಿ ಆಸ್ಪತ್ರೆಡ್ ನಡಪುನ ಲೇಸ್‌ಡ್ ಅಪ್ಪು ಅಮರ ಹೆಲ್ತ್ ಪ್ರಿವಿಲೇಜ್ ಕಾರ್ಡ್ ಕೊರ್ಪಿನ ಲೇಸ್  ನಡಪರೆ ಉಂಡು.

ನ.13ಕ್ ಪುತ್ತೂರ್ ಹಿಂದೂ ಜಾಗರಣ ವೇದಿಕೆದ ಮುತಾಲಿಕೆಡ್ ಹಿಂದೂ ಜಾಗೃತಿ ಸಮಾವೇಶ

ವಿಶ್ವ ಹಿಂದೂ ಪರಿಷದ್, ಬಜರಂಗದಳ, ಮಾತೃಶಕ್ತಿ ದುರ್ಗಾವಾಹಿನಿ ಕಾಣಿಯೂರ್ ಪುತ್ತೂರ್ ಗ್ರಾಮಾಂತರ ಪ್ರಖಂಡ ಬೊಕ್ಕ ಪುತ್ತೂರ್ ಹಿಂದೂ ಜಾಗರಣ ವೇದಿಕೆದ ಮುತಾಲಿಕೆಡ್ ಹಿಂದೂ ಜಾಗೃತಿ ಸಮಾವೇಶ ನ.13 ಐತಾರದಾನಿ ಮಧಾಹ್ನ 2:30 ಕ್ ಕಾಣಿಯೂರ್ ಡ್ ಜಾತ್ರೆದ ಕಂಡಡ್ ನಡಪರೆ ಉಂಡು.


ಈ ಲೇಸ್ ಗ್ ಮಾರ್ಗದರ್ಶನ ಕೊರ್ಯೆರೆ ಒಡಿಯೂರ್ ಶ್ರೀ ಗುರುದೇವದತ್ತ ಸಂಸ್ಥಾನದ ಸಾದ್ವಿ ಶ್ರೀ ಶ್ರೀ ಮಾತಾನಂದಮಯಿ ಉಲ್ಲೆರ್. ಹಿರಿಯೆರ್ ರಾಷ್ಟ್ರೀಯ ಸ್ವಯಂ ಸೇವಕೆರ್ ಬೆಲಿಯಪ್ಪ ಗೌಡ ದೇವರತ್ತಿ‌ಮಾರ್ ಈ ಲೇಸ್ ದ ಅಧ್ಯಕ್ಷತೆನ್ ಒಯಿಸೊನ್ವೆರ್. ಬಜರಂಗದಳ ಕರ್ನಾಟಕ ದಕ್ಷಿಣ ಪ್ರಾಂತದ ಸಹ ಸಂಯೋಜಕೆರ್ ರಘು ಸಕಲೇಶಪುರ ದಿಕ್ಸೂಚಿ ಭಾಷಣ ಮಲ್ಪೆರೆ ಉಲ್ಲೆರ್. ಬಜರಂಗದಳ ಕರ್ನಾಟಕ ದಕ್ಷಿಣ ಪ್ರಾಂತದ ಸಹ ಸಂಯೋಜೆಕೆರ್ ಮುರಳಿಕೃಷ್ಣ ಹಸಂತಡ್ಕ, ಹಿಂದೂ ಜಾಗರಣ ವೇದಿಕೆದ ಚಿನ್ಮಯ್ ಈಶ್ವರಮಂಗಲ, ಹಿಂದೂ ಮುಖಂಡೆರ್ ಅರುಣ್ ಕುಮಾರ್ ಪುತ್ತಿಲ, ವಿಶ್ವ ಹಿಂದೂ ಪರಿಷತ್ ಪುತ್ತೂರ್ ಗ್ರಾಮಾಂತರ ಪ್ರಖಂಡ ಕಾರ್ಯದರ್ಶಿ ರವಿಕುಮಾರ್ ಕೈತ್ತಡ್ಕ ಈ ಲೇಸ್ ಡ್ ಪಾಲ್ ಪಡೆಯೆರೆ ಉಲ್ಲೆರ್. ಮಾತ ಹಿಂದೂ ಬಾಂಧವೆರ್ ಅತಿ ಎಚ್ಚ ಸಂಖ್ಯೆಡ್ ಸೇರ್ದ್, ಈ ಲೇಸ್ ನ್ ಪೊರ್ಲು ಮಲ್ತ್ ದ್ ಕೊರೊಡು ಪಂದ್ ಲೆಪ್ಪೋಲೆಡ್ ತೆರಿಪಾದೆರ್.

ಒಡಿಪು ಅಗ್ನಿಶಾಮಕದ ಸಹಾಯಕ ಠಾಣಾಧಿಕಾರಿ ಮುಹಮ್ಮದ್ ಗೌಸ್ ಗ್ ರಾಷ್ಟ್ರಪತಿ ಪದಕ

ಒಡಿಪು: ಒಡಿಪು ಅಗ್ನಿಶಾಮಕದ ಸಹಾಯಕ ಠಾಣಾಧಿಕಾರಿ ಮೀರ್ ಮುಹಮ್ಮದ್ ಗೌಸ್ 2021ಇಸ್ವಿದ ರಾಷ್ಟ್ರಪತಿಲೆನ ಸೇವಾ ಪದಕನ್ ಸೋಮಾರ ಬೆಂಗ್ಲೂರ್ ರಾಜಭವನಡ್ ರಾಜ್ಯಪಾಲ ಥಾವರ್ ಚಂದ್ ಗೆಹ್ಲೋಟ್ ಮೆರೆರ್ದ್ ದೆತ್ತೊಂಡೆರ್.

1992ಟ್ ಅಗ್ನಿಶಾಮಕ ಇಲಾಖೆಗ್ ಸೇರ್ನ ಮೇರ್, 30ವರ್ಷ ಸೇವಾ ಅವಧಿಡ್ ಎಡ್ಡೆ ಅಗ್ನಿಶಾಮಕೆರಾದ್, ಬೊಕ್ಕ ಸಹಾಯಕ ಠಾಣಾಧಿಕಾರಿಯಾದ್ ಕಜ್ಜ ಮಲ್ದೆರ್. ನಿಸ್ವಾರ್ಥ ಸೇವೆದ ಗೌರವಾರ್ಥವಾದ್ ಮೆರೆಗ್ ಇಲಾಖೆ 33 ಸರ್ತಿ ನಗದು ಇನಾಮ್ ಲೆನ್ , 2 ಸೇವೆ ಪತ್ರಲೆನ್ ಕೊರ್ತುಂಡು. ಮೆರೆಗ್ 2012ಟ್ ಮುಖ್ಯಮಂತ್ರಿಲು ಬಂಗಾರ್ ದ ಪದಕ ಕೊರ್ದು ಗೌರವಿಸಾದೆರ್.

7 ತಿಂಗೊಲ್ಡು 42 ಲೀಟರ್ ಮಿರೆ ಪೇರ್ ದಾನ ಮಲ್ತಿನ ಪುಣ್ಯಾತ್ಮೆದಿ ಅಪ್ಪೆ..!

ತಮಿಳ್‌ನಾಡ್‌ಡ್ 29 ವರ್ಷದ ಟಿ.ಸಿಂಧು ಮೋನಿಕಾ ಪನ್ಪಿನಾರ್ 7 ತಿಂಗೊಲ್‌ಡ್ 42 ಲೀಟರ್ ಮಿರೆ ಪೇರ್ ದಾನ ಮಲ್ತ್‌ದೆರ್.

ಸರ್ಕಾರಿ ಆಸ್ಪತ್ರೆಡ್ ಪುಟ್ಟಿನ 1,400 ಜೋಕುಲೆಗ್ ಆರ್ ಮಿರೆ ಪೇರ್‌ನ್ ಕೊರ್ತೆರ್. ಜುಲೈ 2021 ಜೆರ್ದ್ ಎಪ್ರಿಲ್ 2022 ಮುಟ್ಟ 42 ಲೀಟರ್ ಪೇರ್‌ನ್ ದಾನ ಮಲ್ತ್‌ದೆರ್. ಸಿಂಧು ಮೆರೆನ ಈ ಬೇಲೆ ಏಷ್ಯನ್ ಬುಕ್ ಆಫ್ ರೆಕಾರ್ಡ್‌ಡ್ ದಾಖಲ್ ಆತ್ಂಡ್.

ಶ್ರೀ ರಾಮಕುಂಜೇಶ್ವರ ಇಂಗ್ಲೀಷ್ ಮೀಡಿಯಂ ಶಾಲೆಡ್ ತುಡರ್ ಪರ್ಬ

ಶ್ರೀ ರಾಮಕುಂಜೇಶ್ವರ ಇಂಗ್ಲೀಷ್ ಮೀಡಿಯಂ ಶಾಲೆಡ್ ನ.5 ದಾನಿ ತುಡರ್ ಪರ್ಬ ಆಚರಣೆ ಮಲ್ತೆರ್.

ತುಳುನಾಡ್ ಡ್ ಹಿರಿಯೆರ್ ಆಚರಣೆ ಮಲ್ತೊಂದು ಬತ್ತಿನ ಸಂಪ್ರದಾಯಲೆನ್ ಜೋಕುಲೆಗ್ ಕಲ್ಪಾವುನ ಉದ್ದೇಶೊಡು ಸಂಸ್ಥೆ ಇಂಚಿನ ಸಾಂಪ್ರದಾಯಿಕ ಆಚರಣೆಲೆನ್ ಕರಿನ 15 ವರ್ಷರ್ದ್ ನಡಪಾವೊಂದು ಬೈದ್ಂಡ್. ಈ ತುಡರ್ ಪರ್ಬ ಲೇಸ್ ಡ್ ಕುಂಬ್ರ ದುರ್ಗಾಪ್ರಸಾದ್ ರೈ, ನ್ಯಾಯವಾದಿಲು ಪುತ್ತೂರ್ ಅತ್ಯಾರ್‌ದ ಪೂಜೆದ ಪ್ರಾತ್ಯಕ್ಷಿಕೆದೊಟ್ಟಿಗೆ, ತುಡರ್ ಪರ್ಬದ ಇಸೇಸತೆನ್, ಮೂಜಿ ದಿನತ ಆಚರಣೆದ ದುಂಬುದ ಸತ್ವನ್ ಮನಸ್ ಗ್ ಮುಟ್ಟುಲೆಕ್ಕ ಜೋಕುಲೆಗ್ ತೆರಿಪಾಯೆರ್.

ಗೋಪೂಜೆ ಮಲ್ತಿನ ಶರವೂರು ಶ್ರೀ ದುರ್ಗಾಪರಮೇಶ್ವರಿ ಕ್ಷೇತ್ರದ ವ್ಯವಸ್ಥಾಪನಾ ಸಮಿತಿದ ಅಧ್ಯಕ್ಷೆರ್ ದಾಮೋದರ ಗೌಡ ಕಕ್ವೆ ಮೇರ್ ಎಡ್ಡೆಪ್ಪು ಬಯಕಿಯೆರ್. ಪೂವರಿ ತುಳು ಪತ್ರಿಕೆದ ಪ್ರಧಾನ ಸಂಪಾದಕೆರಾಯಿನ ವಿಜಯಕುಮಾರ್ ಭಂಡಾರಿ ಹೆಬ್ಬಾರಬೈಲು ಮೇರ್ ಪ್ರಶಂಶನೀಯ ಪಾತೆರ್ಯೆರ್. ಸಭೆತ ಅಧ್ಯಕ್ಷತೆನ್ ಸಂಸ್ಥೆದ ಕಾರ್ಯದರ್ಶಿ ಕೆ ಸೇಸಪ್ಪ ರೈ ಒಯಿಸೊಂದಿತ್ತೆರ್.

ಈ ಪೊರ್ತುಡು ಸಭೆಟ್ ಸಂಸ್ಥೆದ ಆಡಳಿತಾಧಿಕಾರಿ ಆನಂದ್ ಎಸ್ ಟಿ, ಪ್ರೌಢಶಾಲೆ ವಿಭಾಗದ ಮುಖ್ಯಗುರುಕುಲು ಗಾಯತ್ರಿ ಯು ಎನ್ ಬೊಕ್ಕ ಪ್ರಾಥಮಿಕ ವಿಭಾಗದ ಮುಖ್ಯಗುರುಕುಲು ಲೋಹಿತಾ ಎ, ತಾಂತ್ರಿಕ ಸಲಹೆಗಾರೆರ್ ಜಯೇಂದ್ರ ಬಿ, ನೇತ್ರಾವತಿ ತುಳುಕೂಟದ ಸದಸ್ಯೆರ್ ಗೋಪಾಲ ಶೆಟ್ಟಿ ಕಳೆಂಜ ಇತ್ತೆರ್. ಮುಖ್ಯಗುರುಕುಲು ಆಯಿನ ಗಾಯತ್ರಿ ಯು ಎನ್ ಎದ್ಕೊನಿಯೆರ್, ವಿದ್ಯಾರ್ಥಿನಿಲಯದ ವ್ಯವಸ್ಥಾಪಕೆರ್ ರಮೇಶ್ ರೈ ಆರ್ ಬಿ ಸೊಲ್ಮೆ ಸಂದಾಯೆರ್. ಲೇಸ್ ನ್ ಸಹಶಿಕ್ಷಕೆರ್ ಸುಬ್ರಹ್ಮಣ್ಯ ಸಿ ಕೆ ನಿರ್ವಹಣೆ ಮಲ್ತೆರ್. ಬೊಕ್ಕ ಸಹಶಿಕ್ಷಕಿ ಸರಿತಾ ರಾಮಕುಂಜ ಮೇರ್ ಲೇಸ್ ದ ಸಂಯೋಜನೆ ಮಲ್ತೆರ್.

Deepawali celebration at Sri Ramakunjeshwar English medium school
##
The Ramakunjeshwar English medium school celebrated Deepawali on the 5 th November.The celebration was conducted with a view to introduce the new generation with the tradition and culture associated with our festivals.The school has been holding these type of celebration from the past 15 years.
Sri Kumbra Durga Prasad Rai , advocate from Puttur took part in the ceremonies and gave a beautiful speech of the importance of the rituals and their significance and the implications each of the three days of the festival conveys.
The ‘ Govupuja’ was conducted by Damodargowda of Sharavoor Sri Durga parameshwara Kshetra.
Vijay Kumar Bhandary chief editor of Poovari Tulu newspaper conveyed his appriciation of the proceedings.
The program was presided over by K Sessappa Rai secretary of the institution.
The managing officer of the institution Anand S T, the headmistress of the primary section Gayatri U N, headmistress of the secondary section Lohitha A, Technical adviser Jayandra B, Gopal Shetty and others were present.

ಲಾರಿಗ್ ಬೈಕ್ ಗುದ್ದುದು ತೀರ್ ಪೋಯೆರ್ ಒಂಜೇ ಕುಟುಂಬದ ಮೂಜಿ ಜನ

ಕಲಬುರಗಿ: ಲಾರಿಗ್ ಬೈಕ್ ಗುದ್ದುದು ಒಂಜೇ ಕುಟುಂಬದ ಮೂಜಿ ಜನ ಜಾಗೆಡೆ ತೀರ್ ಪೋಯಿನ ಘಟನೆ ಕೋಡೆ ರಾತ್ರೆ ಕಲಬುರಗಿಡ್ ನಡತ್ಂಡ್.

ಈ ಘಟನೆಡ್ ದೀಪಕ್ (45), ಯುವರಾಜ್ (17) ಬೊಕ್ಕ ರಾಹುಲ್ (17) ತೀರ್ ಪೋಯೆರ್. ಕುಟುಂಬಸ್ಥೆರ್ ದೇವೆರೆನ ಪರಕೆ ಸಂದಾಯೆರ್ ಪೋಯಿನ ಪೊರ್ತುಡು, ಮೊಕುಲು ಮೂಜಿ ಜನ ಜವನೆರ್ ಬೈಕ್‌ ಡ್ ಪೋತೆರ್. ಅತ್ನಗ ಈ ಘಟನೆ ನಡತ್ಂಡ್. ಈ ಬಗೆಟ್ ಮಹಾಗಾಂವ್ ಪೊಲೀಸ್ ಠಾಣೆಡ್ ಕೇಸ್ ದಾಖಲ್ ಆತ್ಂಡ್.