Thu. Nov 19th, 2026

ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News

ಫ್ರಿಡ್ಜ್ ದ ಪಿರವು ದೆಂಗ್ ದ್ ಕುಲ್ದಿನ ಉಚ್ಚುದ ರಕ್ಷಣೆ..!

ತುಮಕೂರು: ಇಲ್ಲಲ್ ಇತ್ತಿನ ಫ್ರಿಡ್ಜ್ ದ ಪಿರವು ದೆಂಗ್ ದ್ ಕುಲ್ಲುದ್ ಇತ್ತಿನ ಸುಮಾರ್ ಆಜಿ ಅಡಿ ಉದ್ದದ ಉಚ್ಚುನು ರಕ್ಷಣೆ ಮಲ್ದಿನ ಘಟನೆ ನಡತ್ಂಡ್.

ಕುಣಿಗಲ್ ತಾಲೂಕ್ ದ ಕೊತ್ತಗೆರೆ ಗ್ರಾಮದ ಮಹೇಶ್ ಪನ್ಪುನರೆನ ಇಲ್ಲದ ಫ್ರಿಡ್ಜ್ ದ ಪಿರವು ಈ ಉಚ್ಚು ಇತ್ತ್ಂಡ್. ಇಚಾರ ತೆರಿದ್ ಜಾಗೆಗ್ ಬತ್ತಿನ ಉರಗ ತಜ್ಞೆ ಮಹಾಂತೇಶ್ ಉಚ್ಚುನ್ ಪತ್ತ್ ದ್ ಕಾಡ್ ಗ್ ಬುಡ್ತೆರ್.

ಶಾಲೆದ ಗಾಡಿ ಪಲ್ಟಿ ಆದ್ 12 ಜೋಕುಲೆಗ್ ಪೆಟ್ಟ್

ಸವದತ್ತಿ: ಸವದತ್ತಿದ ಕುಮಾರೇಶ್ವರ ಶಾಲೆಗ್ ಬರೊಂದು ಇತ್ತಿನ ಶಾಲೆದ ಗಾಡಿ ಪಲ್ಟಿಯಾದ್ 12 ವಿದ್ಯಾರ್ಥಿಲೆಗ್ ಪೆಟ್ಟಾಯಿನ ಘಟನೆ ನಡತ್ಂಡ್.


ಈ ಘಟನೆಡ್ ಪೆಟ್ಟಾಯಿನಕಲೆನ್ ಸವದತ್ತಿ ಸರ್ಕಾರಿ ಆಸ್ಪತ್ರೆ ಬೊಕ್ಕ ಒರಿಯನ್ ಧಾರವಾಡ ಜಿಲ್ಲಾಸ್ಪತ್ರೆಗ್ ದಾಖಲ್ ಮಲ್ದೆರ್.

ದ.ಕ. ಜಿಲ್ಲೆಡ್ ಮತದಾರೆರ್‍ನ ಸಂಖ್ಯೆ 44373 ಕಮ್ಮಿ ಆತ್ಂಡ್

ಕುಡ್ಲ: ದಕ್ಷಿಣ ಕನ್ನಡ ಜಿಲ್ಲೆದ 8 ವಿಧಾನ ಸಭಾ ಕ್ಷೇತ್ರದ ಮತದಾರೆರ್‍ನ ಕರಡು ಪಟ್ಟಿ ಬುಧಾರ ನ.9 ಗ್ ಪ್ರಕಟಿಸಾದೆರ್. ಇಂಚಾದ್ ಜಿಲ್ಲೆಡ್ ಒಟ್ಟು 17,08,955 ಮತದಾರೆರ್ ಪಟ್ಟಿಡ್ ಉಲ್ಲೆರ್. ಕರಿನ ವರ್ಷ ಮತದಾರೆರ್‍ನ ಪಟ್ಟಿನ್ ತೂಂಡಾ ಜಿಲ್ಲೆಡ್ ಮತದಾರೆರ್‍ನ ಸಂಖ್ಯೆ 44,373 ದಾತ್ ಕಮ್ಮಿ ಆತ್ಂಡ್.

ಈ ಬಗೆಟ್ ಸುದ್ದಿಗೋಷ್ಠಿಡ್ ಸುಕ್ರಾರ ಮಾಹಿತಿ ಕೊರಿನ ಜಿಲ್ಲಾಧಿಕಾರಿ ಎಂ.ಆರ್.ರವಿಕುಮಾರ್, “ಕರಿನ ವರ್ಷ ಮತೆದಾರೆರ್‍ನ ಪಟ್ಟಿಡ್ 17,53,328 ಜನಕ್ಲೆನ ಪುದರ್ ಇತ್ತ್ಂಡ್. 8 ವಿಧಾನಸಭಾ ಕ್ಷೇತ್ರದ ಮತದಾರೆರ್‍ನ ಪಟ್ಟಿನ್ ಪರಿಷ್ಕರಣೆ ಮಲ್ಪುನಗ ಮಸ್ತ್ ಮತದಾರೆರ್ ಬೇತೆ ಕಡೆಟ್ಟ್ ಕ್ಷೇತ್ರರ್ದ್ ಪಿದಯಿ ಪೋದು ಇಪ್ಪುನವು ತೋಜಿದ್ ಬೈದ್ಂಡ್. ನನ ಕೆಲವೆರ್ ತೀರ್ ಪೋತೆರ್. ಇಂಚಿನ 73,783 ಮತದಾರೆರ್‍ನ ಪುದರ್‌ನ್ ಪಟ್ಟಿರ್ದ್ ಕೈ ಬುಡ್ತ. ಈ ವರ್ಷ ಪೊಸತ್ತಾದ್ 29,410 ಮತದಾರೆರೆನ್ ಸೇರ್ಪಡೆ ಮಲ್ತ್‌ದ. ಒಟ್ಟಾರೆಯಾದ್ ಕರಿನ ವರ್ಷಗ್ ತೂಂಡ ಈ ಸರ್ತಿ ಮತದಾರೆರ್‍ನ ಸಂಖ್ಯೆ 44,373 ದಾತು ಕಮ್ಮಿ ಆತೆರ್. ಮತದಾರೆರ್ ಕರಡು ಪಟ್ಟಿಗ್ ಸೇರಿಯರೆ ಇತ್ತ್ಂಡ ಡಿ.8 ಕಡೆತ್ತ ತೇದಿ ಪಂದ್ ತೆರಿಪಾಯೆರ್.

ಪೊಸ ಸೇರ್ಪಡೆಗ್ ಅಭಿಯಾನ್:

18 ವರ್ಷ ದಿಂಜಿನ ಮತದಾರೆರ್‍ನ ಸೇರ್ಪಡೆಗ್ ನ.12, ನ.20, ಡಿ.3 ಅಂಚನೆ ಡಿ.4 ಕ್ಕ್ 8 ವಿಧಾನಸಭಾ ಕ್ಷೇತ್ರಡ್‌ಲ ವಿಶೇಷ ಅಭಿಯಾನ ಮಲ್ಪರೆ ಉಂಡು. ಪಟ್ಟಿಗ್ ಪೊಸತ್ತಾದ್ ಸೇರ್ಪಡೆ ಆಪಿನ ಪುದರ್‌ಗ್ ಡಿ.26 ತ್ತ ಉಲಯಿ ಸೇರಿಸಾವೊಲಿ. ಪರಿಷ್ಕೃತ ಪಟ್ಟಿನ್ 2023 ತ್ತ ಜ.1 ಕ್ಕ್ ಕಡೆ ಮಲ್ತ್‌ದ್, ಜ.3 ಕ್ಕ್ ಪ್ರಿಂಟ್‌ಗ್ ಕಡಪಾಯರೆ ಉಂಡು. ಜ.5 ಕ್ಕ್ ಪರಿಷ್ಕೃತ ಪಟ್ಟಿ ತಿಕ್ಕುಂಡು. ಜಿಲ್ಲೆಡ್ 8 ಕ್ಷೇತ್ರಡ್ ಒಟ್ಟು 1860 ಮತಗಟ್ಟೆಲು ಉಲ್ಲ ಪಂದ್ ಮಾಹಿತಿ ಕೊರಿಯೆರ್.

ನನ ದುಂಬುಗು ಪುದರ್ ಸೇರ್ಸಾವರೆ ಕಾಪೊಡು ಪಂದ್ ಇಜ್ಜಿ. ವರ್ಷಡ್ ನಾಲ್ ತಾರೀಕ್‌ಡ್ ಪುದರ್ ಸೇರ್ಸಾವೊಲಿ. ಜನವರಿ 1, ಏಪ್ರಿಲ್ 1, ಜುಲೈ 1 ಬೊಕ್ಕ ಅಕ್ಟೋಬರ್ 1 ಕ್ಕ್ ಪುದರ್ ಸೇರ್ಪಡೆ ಮಲ್ಪೊಲಿ. ಅಡೆ ಮುಟ್ಟ 18 ವರ್ಷ ದಿಂಜಿನಕ್ಲೆನ ಪುದರ್‌ನ್ ಮತದಾರೆರ್‍ನ ಪಟ್ಟಿಗ್ ಸೇರಿಸಾಯರೆ ಅವಕಾಶ ಉಂದು ಪಂದ್ ಜಿಲ್ಲಾಧಿಕಾರಿ ಮಾಹಿತಿ ಕೊರಿಯೆರ್.

ಇಲಿನಾಯ್ಸ್ ಅಸೆಂಬ್ಲಿಗ್ ಭಾರತ ಮೂಲದ ನಬೀಲಾ ಆಯ್ಕೆ

ವಾಷಿಂಗ್ಟನ್‌: ಅಮೆರಿಕ ಇಲಿನಾಯ್ಸ ಜನರಲ್‌ ಅಸೆಂಬ್ಲಿಗ್ ಭಾರತ ಮೂಲದ ನಬೀಲಾ ಸಯ್ಯದ್‌ ಆಯ್ಕೆ ಆತೆರ್.

ರಿಪಬ್ಲಿಕನ್ ಪಕ್ಷದ ಕ್ರಿಸ್‌ಬೋಸ್ ಮೆರೆನ್ ಸೋಪಾದ್ ನಬೀಲಾ ಆಯ್ಕೆ ಆತೆರ್. ಯುನಿವರ್ಸಿಟಿ ಆಫ್ ಕ್ಯಾಲಿಫೋರ್ನಿಯಾರ್ದ್ ರಾಜಕೀಯ ಶಾಸ್ತ್ರ ಬೊಕ್ಕ ಉದ್ದಿಮೆ ವಿಭಾಗಡ್ ಪದವಿ ಪಡೆಯಿನ ನಬೀಲಾ ಶೇ. 52.3 ವೋಟು ಪಡೆತೆರ್. ಇಲಿನಾಯ್ಸ್ ಜನರಲ್ ಅಸೆಂಬ್ಲಿಗ್ ಆಯ್ಕೆ ಆಯಿನ ಎಲ್ಯ ಸದಸ್ಯೆ ಪನ್ಪುನ ಪುದರ್ ಲ ಬೈದ್ಂಡ್. ಅವ್ವತ್ತಂದೆ, ದಕ್ಷಿಣ ಏಷ್ಯಾ ಮೂಲರ್ದ್ ಆಯ್ಕೆ ಆಯಿನಕ್ಲೆಡ್ ಸುರುತಾರೇ ಮೇರ್. ಅಮೆರಿಕ ಸಂಸತ್‌ದ ಮಧ್ಯಂತರ ಚುನಾವಣೆಡ್ ಇತ್ತೆ ಅಮೆರಿಕಡ್ ಇಪ್ಪುನ ಭಾರತ ಮೂಲದ ಕೆಲವೆರ್ ಆಯ್ಕೆ ಆತೆರ್.

ಸೈನಿಕನೊಟ್ಟಿಗೆ ವ್ಯಾಯಾಮ ಮಲ್ತಿನ ನಾಯಿ: ವೀಡಿಯೊ ವೈರಲ್!

ಡೆಲ್ಲಿ: ಡೆಲ್ಲಿ ಮೆಟ್ರೋ ನಿಲ್ದಾಣಡ್ ವ್ಯಾಯಾಮ ಮಲ್ತೊಂದು ಇತ್ತಿನ ಸೈನಿಕನ್ ತೂದು ಅಂಚನೆ ಮಲ್ತಿನ ನಾಯಿದ ವೀಡಿಯೊ ಸಾಮಾಜಿಕ ಮಾಧ್ಯಮಲೆಡ್ ವೈರಲ್ ಆತ್ಂಡ್.


ಈ ವೀಡಿಯೊಡು ಸಿಐಎಸ್ ಎಫ್ ಸೈನಿಕೆ ಮಲ್ತಿನ ವ್ಯಾಯಾಮಲೆನ್ ಸೇನಾ ಘಟಕದ ಶ್ವಾನದಳತ ಸದಸ್ಯೆರ್ ಆಯಿನ ನಾಯಿ, ಮಲ್ಪುನೆನ್ ತೂವೊಲಿ. ಈ ವೀಡಿಯೊನು ಅಕಲೆನ ಒಟ್ಟಿಗೆ ಇತ್ತಿನಕುಲು ಮಲ್ದೆರ್. ಈ ವಿಡಿಯೋನ್ ಭಾರತ್ ಡಿಫೆಂಡರ್ಸ್ ದ ಇನ್ಸ್ಟಾಗ್ರಾಮ್ ಡ್ ಪಡ್ದೆರ್. ಕೆಲವೇ ನಿಮಿಷಲೆಡ್ ಈ ವಿಡಿಯೋ ವೈರಲ್ ಆತ್ಂಡ್.

ಕೆಎಸ್‌ಒಯು ಪೊಸ ಕುಲಪತಿಯಾದ್ ಪ್ರೊ.ಶರಣಪ್ಪ ವೈಜನಾಥ್‌ ಹಲ್ಸೆ ನೇಮಕ

ಬೆಂಗ್ಲೂರ್: ಮೈಸೂರ್ ದ ಕರ್ನಾಟಕ ರಾಜ್ಯ ಮುಕ್ತ ವಿಶ್ವವಿದ್ಯಾಲಯದ (ಕೆಎಸ್‌ಒಯು) ಕುಲಪತಿಯಾದ್ ಅಕ್ಕಮಹಾದೇವಿ ಮಹಿಳಾ ವಿಶ್ವವಿದ್ಯಾಲಯದ ಪ್ರಾಧ್ಯಾಪಕೆರ್ ಪ್ರೊ.ಶರಣಪ್ಪ ವೈಜನಾಥ್‌ ಹಲ್ಸೆ ಮೆರೆನ್ ನೇಮಕ ಮಲ್ಪೆರ್.


ಕೆಎಸ್‌ಒಯುದ ನೆರ್ದ್ ದುಂಬುದ ಕುಲಪತಿ ಪ್ರೊ.ಎಸ್‌.ವಿದ್ಯಾಶಂಕರ್‌ ಮೆರೆನ್ ಬೆಳಗಾವಿದ ವಿಶ್ವೇಶ್ವರಯ್ಯ ತಾಂತ್ರಿಕ ವಿವಿ ಕುಲಪತಿಯಾದ್ ನೇಮಕ ಮಲ್ದೆರ್. ಮೇರ್ ಕೆಎಸ್‌ಒಯು ಕುಲಪತಿ ಸ್ಥಾನಗ್ ರಾಜೀನಾಮೆ ಕೊರ್ದು ಇತ್ತೆರ್. ಈ ಪೊರ್ತುಡು ಖಾಲಿ ಇತ್ತಿನ ಸ್ಥಾನಗ್ ಅವ್ವೇ ವಿವಿದ ಕುಲಸಚಿವೆರ್ ಆದಿತ್ತಿನ ಡಾ.ಎ.ಖಾದರ್‌ ಪಾಷ ಮೆರೆನ್ ಪ್ರಭಾರ ಕುಲಪತಿಯಾದ್ ನೇಮಕ ಮಲ್ದೆರ್. ಇತ್ತೆ ರಾಜ್ಯಪಾಲ ಥಾವರ್‌ ಚಂದ್‌ ಗೆಹ್ಲೋಟ್ ಶುಕ್ರಾರ ಪ್ರೊ.ಎಸ್‌.ವಿ. ಹಲ್ಸೆ ಮೆರೆನ್ ಪೊಸ ಕುಲಪತಿಯಾದ್ ನೇಮಕ ಮಲ್ತೆರ್.

ರಾಜ್ಯಡ್ ನನ ಮೂಜಿ ದಿನ ಭಾರೀ ಬರ್ಸದ ಅಂದಾಜಿ

ಕುಡ್ಲ: ಬಂಗಾಲ ಕೊಲ್ಲಿಡ್ ವಾಯುಭಾರ ಕುಸಿತ ಆಯಿನ ಕಾರಣ ರಾಜ್ಯ ರಾಜಧಾನಿ ಸೇರ್ದ್ ಸುಮಾರ್ ಜಿಲ್ಲೆಡ್ ನ.14ಮುಟ್ಟ ಬರ್ಸ ಬರ್ಪಿನ ಸಾಧ್ಯತೆ ಉಂಡು.

ನ. 14 ಮುಟ್ಟ ಒಡಿಪು, ಕುಡ್ಲ, ಉತ್ತರ ಕನ್ನಡ ಜಿಲ್ಲೆಡ್ ಭಾರೀ ಬರ್ಸ ಬರ್ಪಿನ ಸಾಧ್ಯತೆ ಉಂಡು. ಇಂಚಾದ್ ಯಲ್ಲೋ ಅಲರ್ಟ್‌ ಘೋಷಣೆ ಮಲ್ಪೆರ್. ಇನಿ ಬೊಲ್ಪುಗು ಕುಡ್ಲ ಪೇಂಟೆಡ್ ಪನಿ ಪನಿ ಬರ್ಸ ಬೈದ್ಂಡ್. ಮುಗಲ್ ಪಾಡ್ನ ವಾತಾವರಣ ಉಂಡು.

ನ.14ಕ್ಕ್ ನಮ್ಮೂರ ಆಟ-ಕೂಟ ಟ್ರಸ್ಟ್ (ರಿ.) ಸರ್ವ ಸದಸ್ಯೆರ್ನ ಸಭೆ

ಕುಡ್ಲ: ನಮ್ಮೂರ ಆಟ-ಕೂಟ ಟ್ರಸ್ಟ್ (ರಿ.) ಕುಡ್ಲ ನೆತ್ತ ಸರ್ವಸದಸ್ಯೆರ್ನ ಸಭೆ ಬೊಕ್ಕ ಡಿ. 24 ದಾನಿ ಉರ್ವದ ಡಾ. ಅಂಬೇಡ್ಕರ್ ಭವನಡ್ ನಡಪರೆ ಇಪ್ಪುನ ಟ್ರಸ್ಟ್ ದ 2ನೇ ವರ್ಷದ “ನಮ್ಮ ಸಂಭ್ರಮ” ಲೇಸ್ ದ ಅಟ್ಟಣೆ ಸಭೆ ಟ್ರಸ್ಟ್ ದ ಗೌರವಾಧ್ಯಕ್ಷೆರ್ ಕದ್ರಿ ನವನೀತ್ ಶೆಟ್ಟಿ ಮೆರೆನ ಅಧ್ಯಕ್ಷತೆಡ್ ಬಲ್ಮಠದ ಹೋಟೆಲ್ ಕ್ವಾಲಿಟಿಡ್ ನ.14 ಸೋಮಾರ ಬಯ್ಯಗ್ 6:30ಕ್ಕ್ ನಡಪರೆ ಉಂಡು.

ಸಭೆಟ್ ಟ್ರಸ್ಟ್ ದ ಉದ್ದೇಶ ವಾರ್ಷಿಕ ಸಾಮಾಜಿಕ, ಧಾರ್ಮಿಕ, ಸಾಂಸ್ಕೃತಿಕ ಕಾರ್ಯಕ್ರಮವಾದ್ ತಾಳಮದ್ದಳೆಡ್ ಸತ್ಯನಾರಾಯಣ ಪೂಜೆ, ಅನ್ನ ಪ್ರಸಾದ, ಬಯ್ಯಗ್ ಯಕ್ಷ ಬಾಲ ರಂಗಪ್ರವೇಶ ಪಂತೊ, ಯಕ್ಷಗಾನ ಪ್ರದರ್ಶನ ಬೊಕ್ಕ ಸಭಾ ಕಾರ್ಯಕ್ರಮಡ್ ಆಶಕ್ತೆರೆಗ್ ಪನವುದ ಸಕಾಯ, ಬೇತೆ ಬೇತೆ ಕ್ಷೇತ್ರದ ಸಾಧಕೆರೆಗ್ ನಮ್ಮೂರ ಪ್ರಶಸ್ತಿ ಆಯ್ಕೆ ಬೊಕ್ಕ ಲೇಸ್ ದ ಅಟ್ಟಣೆದ ಬಗ್ಗೆ ಸಭೆಟ್ ನಿರ್ಧಾರ ಮಲ್ಪೆರೆ ಆಪುಂಡು. ಟ್ರಸ್ಟ್ ದ ಬಲವರ್ಧನೆಗಾದ್ ಪೊಸ ಪದಾಧಿಕಾರಿಲೆನ ಆಯ್ಕೆ ನಡಪರೆ ಉಂಡು ಪಂದ್ ಸ್ಥಾಪಕಾಧ್ಯಕ್ಷೆರ್ ಮುಲ್ಕಿ ಕರುಣಾಕರ ಶೆಟ್ಟಿ ಪತ್ರಿಕಾ ಪ್ರಕಟಣೆಡ್ ತೆರಿಪಾದೆರ್.

ಡಾಕ್ಟರ್ ಎಸ್. ಕೃಷ್ಣಮೂರ್ತಿ ನಿಗೂಢ ಸಾವು ಕೇಸ್ ಡ್ ಐನ್ ಜನ ಆರೋಪಿಲು ಅರೆಸ್ಟ್

ಕಾಸ್ರೋಡು: ಬದಿಯಡ್ಕದ ಡಾಕ್ಟರ್ ಎಸ್. ಕೃಷ್ಣ ಮೂರ್ತಿ ಮೆರೆನ ನಿಗೂಢ ಸಾವುದ ಕೇಸ್ ಗ್ ಸಂಬಂಧ ಪಟ್ ದ್ ಐನ್ ಜನ ಆರೋಪಿಲೆನ್ ಬದಿಯಡ್ಕ ಪೊಲೀಸೆರ್ ಅರೆಸ್ಟ್ ಮಲ್ದೆರ್.


ಈ ಕೇಸ್ ಡ್ ಅಲಿ ತುಪ್ಪೆಕಲ್, ಮುಹಮ್ಮದ್ ಹನೀಫ್, ಅಶ್ರಫ್, ಮುಹಮ್ಮದ್ ಬೊಕ್ಕ ಉಮ್ಮರುಲ್ ಫಾರೂಕ್ ನ್ ಅರೆಸ್ಟ್ ಮಲ್ದೆರ್. ಮೊಕುಲು ಕ್ಲಿನಿಕ್ ಗ್ ಪೋದು ಡಾಕ್ಟರ್ ಗ್ ಬೆದರಿಕೆ ಕೊರ್ತೆರ್ ಪಂದ್ ತೆರಿದ್ ಬೈದ್ಂಡ್. ಡಾಕ್ಟರ್ ಕ್ಲಿನಿಕ್ ಗ್ ಬತ್ತಿನ ಪೊಂಜೋವ್ ಡ ಅನುಚಿತವಾದ್ ವರ್ತನೆ ಮಲ್ದೆರ್ ಪಂದ್ ಆರೋಪ ಈ ಘಟನೆಗ್ ಕಾರಣ ಆದಿತ್ತ್ಂಡ್. ಬೆದರಿಕೆ ಕೊರ್ನ ಬೊಕ್ಕ ಡಾ. ಕೃಷ್ಣಮೂರ್ತಿ ನಾಪತ್ತೆ ಆತೆರ್. ಈ ಬಗೆಟ್ ವಿಶ್ವ ಹಿಂದೂ ಪರಿಷತ್‌ ದ ಮುತಾಲಿಕೆಡ್ ಬದಿಯಡ್ಕಡ್ ಪ್ರತಿಭಟನೆ ನಡತ್ಂಡ್. ಅಂಚನೆ ಮೆರೆನ ಬೈಕ್ ಕುಂಬಳೆ ಪೇಟೆಡ್ ಪತ್ತೆ ಆತ್ಂಡ್. ಮೊಬೈಲ್ ಕ್ಲಿನಿಕ್ ಡ್ ಬುಡ್ದ್ ಪೋತೆರ್. ಈ ಬಗೆಟ್ ಬೊಡೆದಿ ಕೊರ್ನ ದೂರುದಂಚನೆ ಬದಿಯಡ್ಕ ಪೊಲೀಸೆರ್ ಕೇಸ್ ದಾಖಲ್ ಮಲ್ದೆರ್. ಆಂಡ ಮೆರೆನ ಪುನ ಕುಂದಾಪುರದ ರೈಲ್ವೆ ಪಟ್ಟೆಡ್ ಗುರುವಾರ ಪತ್ತೆ ಆತ್ಂಡ್. ಇನಿ ಮೆರೆನ ಪುನನ್ ಬೊಲ್ಪುಗು ಬದಿಯಡ್ಕಗ್ ಕನದೆರ್. ಬೊಕ್ಕ ಇಲ್ಲದ ಪಿರವು ಅಕೇರಿದ ಕ್ರಿಯೆ ನಡತ್ಂಡ್.

ರಸಗೊಬ್ಬರದ ಸಬ್ಸಿಡಿ, ಕೃಷಿ ಉಪಕರಣದ ಜಿಎಸ್ ಟಿ ದೆಪ್ಪೊಡು, ಕುಮ್ಮಿ ಭೂಮಿದ ಹಕ್ಕ್ ಕೊರೊಡು: ಬೆದ್ರ ರೈತೆರ್ನ ಪ್ರತಿಭಟನೆ

ಬೆದ್ರ: ಜಿಲ್ಲೆದ ಸಾರ ಸಾರ ರೈತೆರ್ ಕುಮ್ಕಿ ಭೂಮಿ ಹಕ್ಕ್ ಗಾದ್ ಕೆಲವು ವರ್ಷೊರ್ದಿಂಚ ಪೊರ್ಂಬಾಟ ಮಲ್ತೊಂದು ಉಲ್ಲೆರ್. ಇತ್ತೆ ಕುಮ್ಕಿ ಹಕ್ಕ್ ನ್ ಕೊರೊಡೇ ಪಂದ್ ಒತ್ತಾಯ ಮಲ್ತ್ ದ್ ಸಾರ ಸಾರ ರೈತೆರ್ ಬೆದ್ರ ಪೇಂಟೆಡ್ ಗುರುವಾರ ಪ್ರತಿಭಟನೆ ಮಲ್ತೆರ್.

ಬಿಜೆಪಿದ ಚುನಾವಣೆ ಪ್ರಣಾಳಿಕೆಡ್ ಈ ಭರವಸೆ ಕೊರ್ದು, ಇತ್ತೆ ಆಯಿನ ಈಡೇರಿಸಾವೊಡ್ ಪಂದ್ ತಹಸೀಲ್ದಾರ್ ಸತ್ಯಪ್ಪ ಕೊಚನೂರು ಮೆರೆನ ಮುಖೇನ ರಾಜ್ಯ ಸರಕಾರಗ್ ಬಿನ್ನಾಪು ಸಂದಾಯೆರ್. ಸಂಘಟನೆ ಜಿಲ್ಲಾ ಘಟಕದ ಅಧ್ಯಕ್ಷೆರ್ ಶಾಂತಿ ಪ್ರಸಾದ್ ಹೆಗ್ಡೆ ಪಾತೆರ್ದ್, ಕರಿನ ಏಪ್ರಿಲ್ ಡ್ ಬೆದ್ರಗ್ ಬತ್ತ್ ದ್ ಇತ್ತಿನ ಮುಖ್ಯಮಂತ್ರಿ ಬಸವರಾಜ್ ಬೊಮ್ಮಾಯಿ ಸಾರ್ವಜನಿಕ ಸಭೆಟ್ ರೈತೆರೆಗ್ ಕುಮ್ಕಿ ಭೂಮಿ ಹಕ್ಕ್ ಕೊರ್ಪುನ ಬೊಕ್ಕ ಡೀಮ್ಡ್ ಅರಣ್ಯ ಸಮಸ್ಯೆ ಸರಿ ಮಲ್ಪುನ ಭರವಸೆ ಕೊರ್ತೆರ್. ಆಂಡ, ಪಂಡಿನ ಪಾತೆರ ಕಾರ್ಯ ರೂಪಗ್ ಬೈಜಿ ಪಂದ್ ಪಂಡೆರ್.

ಈ ಪೊರ್ತುಡು ಭಾರತೀಯ ಕಿಸಾನ್ ಸಂಘದ ಸಂಘಟನಾ ಕಾರ್ಯದರ್ಶಿ ನಾರಾಯಣ್ ಸ್ವಾಮಿ ಬೊಕ್ಕ ಕುಡ್ಲ ಎಪಿಎಂಸಿ ಮಾಜಿ ಅಧ್ಯಕ್ಷೆರ್ ಕೃಷ್ಣ ರಾಜ ಹೆಗ್ಡೆ ಇತ್ತೆರ್. ಸಂಘಟನೆದ ರಾಜ್ಯ ಘಟಕದ ಪ್ರಧಾನ ಕಾರ್ಯದರ್ಶಿ ರಮೇಶ್, ರಾಜು ಹಾಡ್ಯಾ ಪಾತೆರ್ದ್, ಜನಪ್ರತಿನಿಧಿನಕುಲು ರೈತರೆಗ್ ಕುಮ್ಕಿ ಹಕ್ಕ್ ಬೊಕ್ಕ ಡೀಮ್ಡ್ ಅರಣ್ಯ ಸಮಸ್ಯೆನ್ ಬಗೆಹರಿಸುನ ಭರವಸೆ ಕೊರ್ದು, ಅವೆನ್ ಈಡೇರಿಸಾದಿಜೆರ್. ಸಮಸ್ಯೆ ಸರಿ ಮಲ್ಪುನ ಮುಟ್ಟ ಎಂಕುಲು ಹೋರಾಟ ಉಂತಾವುಜ ಪಂದ್ ಪಂಡೆರ್. ರೈತ ಮುಖಂಡೆರ್ ಆಯಿನ ವಲೇರಿಯನ್ ಕುಟಿನ್ನೋ, ಹೊಸಬೆಟ್ಟು ವಸಂತ್ ಭಟ್ ಬೊಕ್ಕ ಅಶ್ವಥ್ ಪುರ ಸಂತೋಷ್ ಶೆಟ್ಟಿ ಕಡಂದಲೆ ಪಾತೆರ್ಯೆರ್.

ಈ ಪೊರ್ತುಡು ಸಂಘದ ಪ್ರಾಂತ್ಯ ಸಂಘಟನಾ ಕಾರ್ಯದರ್ಶಿ ನಾರಾಯಣ್ ಸ್ವಾಮಿ, ಕ್ರೈಸ್ತ ಅಭಿವೃದ್ದಿ ಸಮಿತಿದ ಮಾಜಿ ಅಧ್ಯಕ್ಷೆರ್ ಜೋಯ್ಲಸ್ ಡಿಸೋಜ, ಎಪಿಎಂಸಿ ಅಧ್ಯಕ್ಷೆರ್ ಕೃಷ್ಣರಾಜ ಹೆಗ್ಡೆ, ಸುಖಾನಂದ್ ಶೆಟ್ಟಿ, ನೇಮಿರಾಜ ಆಳ್ವ ಬೊಕ್ಕ 12 ಗ್ರಾಂ. ಪಂ. ವ್ಯಾಪ್ತಿದ 2 ಸಾರರ್ದ್ ಲ ಹೆಚ್ಚ ಜನ ರೈತೆರ್ ಇತ್ತೆರ್. ಬೆಳುವಾಯಿ ಭಾಸ್ಕರ್ ಆಚಾರ್ಯ ಲೇಸ್ ದ ನಿರ್ವಹಣೆ ಮಲ್ತೆರ್.

ಸಂತೋಷ್ ಶೆಟ್ರ್ ನ ಪಾತೆರಗ್ ಸೊರ ಕೊರಿನ ಬೆದ್ರ ಕಿಸಾನ್ ಸಂಘದಕುಲು ಕರ್ನಾಟಕ ರಾಜ್ಯದ ಭಾರತೀಯ ಕಿಸಾನ್ ಸಂಘದ ಪ್ರಧಾನ ಕಾರ್ಯದರ್ಶಿ ರಮೇಶ್ ರಾಜು ಮೆರೆನ ಎದುರುಡು ಕಡಂದಲೆ-ಪಾಲಡ್ಕದ ಗ್ರಾಮಸ್ಥೆರ್ನೊಟ್ಟಿಗೆ ಎಂಕುಲು ಉಲ್ಲ ಪಂದ್ ಧೈರ್ಯ ಕೊರ್ಪುನ ಘೋಷಣೆ ಮಲ್ತೆರ್.

ವರದಿ: ಜಗದೀಶ್ ಬೆದ್ರ