Wed. Nov 18th, 2026

ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News

ನ.26: ಪೈವಳಿಕೆ ಶ್ರೀ ಅಯ್ಯಪ್ಪ ಭಜನಾ ಮಂದಿರ ವಾರ್ಷಿಕ ಉಚ್ಚಯ, ಶಾಂಭವಿ ವಿಲಾಸ ಯಕ್ಷಗಾನ

ಪೈವಳಿಕೆ ಶ್ರೀ ಅಯ್ಯಪ್ಪ ಭಜನಾ ಮಂದಿರ ವಾರ್ಷಿಕ ಉಚ್ಚಯ ಲೆಕ್ಕೊಡು ನ.26 ಶನಿಯಾರ ರಾತ್ರೆ 10:30 ರ್ದ್ ಪುಗರ್ತೆದ ಕಲಾವಿದೆರ್ ಕೂಡುವಿಕೆಡ್ “ಶಾಂಭವಿ ವಿಲಾಸ” ಯಕ್ಷಗಾನ ಬಯಲಾಟ ನಡಪರೆ ಉಂಡು.

ಹಿಮ್ಮೇಳಡ್ ಭಾಗವತೆರಾದ್ ರವಿಚಂದ್ರ ಕನ್ನಡಿಕಟ್ಟೆ ಬೊಕ್ಕ ಚಿನ್ಮಯ ಕೃಷ್ಣ ಕಲ್ಲಡ್ಕ ಉಲ್ಲೆರ್. ಚೆಂಡೆಡ್ ಚೈತನ್ಯ ಕೃಷ್ಣ ಪದ್ಯಾಣ, ಮದ್ದಳೆಡ್ ಲವಕುಮಾರ ಐಲ, ಚಕ್ರತಾಳಡ್ ನಿಶ್ವಥ್ ಜೋಗಿ ಬೊಕ್ಕ ಮುಮ್ಮೇಳಡ್ ವಾಸುದೇವ ರಂಗಭಟ್, ಸದಾಶಿವ ಶೆಟ್ಟಿಗಾರ್ ಸಿದ್ದಕಟ್ಟೆ, ರಕ್ಷಿತ್ ಶೆಟ್ಟಿ ಪಡ್ರೆ, ಪ್ರಸಾದ ಸವಣೂರ್, ಶಿವಾನಂದ ಬಜಕೂಡ್ಲು, ಮುಖೇಶ್ ದೇವದಾರ್, ಪೆರ್ಮುದೆ ಜಯಪ್ರಕಾಶ್ ಶೆಟ್ಟಿ, ಪ್ರಜ್ವಲ್ ಕುಮಾರ್, ದೇವಕಾನ ಶ್ರೀಕೃಷ್ಣ ಭಟ್, ಶಿವರಾಜ್ ಬಜಕೂಡ್ಲು, ಕಿರಣ ಕುದ್ರೆಕೋಡ್ಲು, ಪೃದ್ದೀಶ್ ಪರ್ಕಳ ಬೊಕ್ಕ ಕೀರ್ತನ್ ಉಲ್ಲೆರ್. ಪೆರ್ಮುದೆ ಜಯಪ್ರಕಾಶ್ ಶೆಟ್ರೆನ ಸಂಯೋಜನೆಡ್ ನಡಪುನ ಈ ಯಕ್ಷಗಾನದ ವೇಷಭೂಷಣ ಗಣೇಶ್ ಕಲಾವೃಂದ ಪೈವಳಿಕೆ ಕೊರೊಂದುಲ್ಲೆರ್.

ದೈವಾರಾಧನೆದ ಬಗೆಟ್ಟ್ ಖಡಕ್ ಎಚ್ಚೆರ್ಗೆ ಕೊರಿನ ದೈವಾರಾಧಕೆರ್

ಕಾಂತಾರ ಪಿಚ್ಚರ್ ಯಶಸ್ಸ್‌ದ ಬೆರಿಟ್ಟೆ, ಕಾಸ್‌ಗಾದ್ ಕೆಲವೆರ್ ದೈವಾರಾಧನೆನ್ ಬೊಡ್ಚಾಂದಿನೆಕ್ಕ ಉಪಯೋಗ ಮಲ್ತೊಂದು ಉಲ್ಲೆರ್ . ಅಂಚಿನ ಪೋಸ್ಟ್‌ದ ವಿರುದ್ಧ ತುಳುನಾಡ ದೈವಾರಾಧಕೆರ್ ಎಚ್ಚರ್ಗೆ ಕೊರ್ತೆರ್.

ದೈವದ ಪುದರ್‌ಡ್ ಮಸ್ತ್ ಜನ ಕಾಸ್ ಲೂಟಿ ಮಲ್ಪುನ ಪ್ರಯತ್ನ ಮಲ್ತೊಂದುಲ್ಲೆರ್ ಪನ್ಪಿನ ಆರೋಪ ಕೇನೊಂದುಂಡು. ಈ ಬಗೆಟ್ ಸಾಮಾಜಿಕ ಜಾಲತಾಣಡ್ ಕೆಲವೊಂಜಿ ಪೋಸ್ಟ್ ಬತ್ತಿತ್ತ್‌ದ್ ಈ ರೀತಿ ಮಲ್ಪುನಕ್ಲೆಗ್ ದೈವಾರಾಧಕೆರ್ ಖಡಕ್ ವಾರ್ನಿಂಗ್ ಕೊರ್ತೆರ್.

ನನ ದುಂಬುಗು ಬಸ್‌ಟ್ ಗೂಗಲ್ ಪೇ, ಫೋನ್ ಪೇ ಮುಕೇನ ಟಿಕೇಟ್ ದೆತೊನೊಲಿ!

ಬೆಂಗ್ಲೂರ್: ನನ ದುಂಬುಗು ಬಿಎಂಟಿಸಿ ಬಸ್‌ಟ್ ಕಾಸ್ ಕೊರ್ದು ಟಿಕೇಟ್ ದೆತೊನೊಡು ಪಂದ್ ಇಜ್ಜಿ. ಗೂಗಲ್ ಪೇ, ಫೋನ್ ಪೇ ಮಲ್ಪುನ ಮುಕೇನ ಪ್ರಯಾಣಿಕೆರ್ ಬಿಎಂಟಿಸಿ ಬಸ್‌ಟ್ ಪ್ರಯಾಣ ಮಲ್ಪೊಲಿ.

ಬಿಎಂಟಿಸಿ ಬಸ್ ನಿರ್ವಾಹಕೆರೆಗ್ ಆಂಡ್ರಾಯ್ಡ್‌ದ ವಿದ್ಯುನ್ನಾನ ಟಿಕೆಟ್ ಯಂತ್ರ ತಿಕ್ಕರೆ ಉಂಡು. ಉಂದೆಟ್ಟ್ ಯುಪಿಐ ಪಾಡ್ದಿತ್ತ್‌ದ್, ಪ್ರಯಾಣಿಕೆರ್ ಗೂಗಲ್ ಪೇ, ಫೋನ್ ಪೇ ಸೇರಿನಂಚನೆ ಆನ್‌ಲೈನ್‌ಡ್ ಕಾಸ್ ಪಾಡ್ದ್ ಟಿಕೆಟ್ ದೆತೊನೊಲಿ ಪಂದ್ ಬಿಎಂಟಿಸಿ ಪೆರಿಯ ಅಧಿಕಾರಿಲು ಮಾಹಿತಿ ಕೊರ್ತೆರ್.

ಕುಡ್ಲಡ್ ಕುಕ್ಕರ್ ಬಾಂಬ್ ಪುಡಾದಿನ ಕೇಸ್: ಜಾಗೆಗ್ ಭೇಟಿ ಕೊರಿನ ಗೃಹಮಂತ್ರಿ ಅರಗ ಜ್ಞಾನೇಂದ್ರ ಬೊಕ್ಕ ಡಿಜಿಪಿ ಸೂದ್

ಕುಡ್ಲ: ಕಂಕನಾಡಿ ಪೊಲೀಸ್ ಠಾಣಾ ವ್ಯಾಪ್ತಿದ ಕಪಿನಾನಿಯೋ ಶಾಲೆದ ಕೈತಲ್ ಪೊವೊಂದಿತ್ತಿನ ರಿಕ್ಷಾಡ್ ಕುಕ್ಕರ್ ಬಾಂಬ್ ಪುಡಾದಿನ ಕೇಸ್‌ದ ತನಿಖೆ ನಡತೊಂದು ಇತ್ತ್‌ದ್, ಇನಿ ಕಾಂಡೆ ಗೃಹ ಸಚಿವೆರ್ ಅರಗ ಜ್ಞಾನೇಂದ್ರ ಮೇರ್ ಘಟನೆ ಆಯಿನ ಜಾಗೆಗ್ ಭೇಟಿ ಕೊರ್ದು ಪರಿಶೀಲನೆ ಮಲ್ತ್‌ದೆರ್.

ಈ ಪೊರ್ತುಡು ಪಶ್ಚಿಮ ವಲಯ ಐಜಿಪಿ ಚಂದ್ರಗುಪ್ತ, ಡಿಜಿಪಿ ಪ್ರವೀಣ್ ಸೂದ್, ಕುಡ್ಲದ ನಗರ ಪೊಲೀಸ್ ಕಮಿಷನರ್ ಎನ್ ಶಶಿಕುಮಾರ್, ದಕ್ಷಿಣ ಕನ್ನಡ ಜಿಲ್ಲಾಧಿಕಾರಿ ರವಿ ಕುಮಾರ್ ಸೇರಿನಂಚನೆ ಪೆರಿಯ ಅಧಿಕಾರಿಲು ಇತ್ತೆರ್.

ಆಧಾರ್ ಕಾರ್ಡ್ ದಕ್ಕ್ ದ್ ಪೋಂಡ ನಿರ್ಲಕ್ಷ್ಯ ಮಲ್ಪೊಡ್ಚಿ : ಎಡಿಜಿಪಿ ಅಲೋಕ್ ಕುಮಾರ್

ಕುಡ್ಲ: ಏಪಾಂಡಲ ನಿಕ್ಲೆನ ಆಧಾರ್ ಕಾರ್ಡ್ ಕಳೆಯೊಂಡ ಅವೆಕ್ಕ್ ನಿರ್ಲಕ್ಷ್ಯ ಮಲ್ಪೊಡ್ಚಿ. ಕುಕ್ಕರ್ ಬಾಂಬ್ ಪುಡಾದಿನ ಕೇಸ್ ನಿಕ್ಲೆಗೊಂಜಿ ಎಚ್ಚೆರ್ರ್ಗೆ ಆದ್ ಉಂಡು ಪಂದ್ ಎಡಿಜಿಪಿ ಅಲೋಕ್ ಕುಮಾರ್ ತೆರಿಪಾಯೆರ್.

ಮಾಧ್ಯಮದೊಟ್ಟುಗು ಪಾತೆರಿನ ಆರ್, ಬಾಂಬ್ ಆರೋಪಿ ಶಾರಿಕ್‌ಡ ಇತ್ತಿನಿ ಪ್ರೇಮ್‌ರಾಜ್ ಪನ್ಪಿನಾರೆನ ಮೆರೆನ ಆಧಾರ್‌ಕಾರ್ಡ್. ಪ್ರೇಮ್‌ರಾಜ್ ತನ್ನ ಆಧಾರ್‌ಕಾರ್ಡ್‌ನ್ ಕಳೆಯೊಂದಿತ್ತೆರ್. ಈ ಕೇಸ್‌ಡ್ ಪ್ರೇಮ್‌ರಾಜ್ ಆರೋಪಿ ಆಪಿನ ಸಾಧ್ಯತೆ ಇತ್ತ್ಂಡ್. ಆಂಡ ಯಾನ್ ಪ್ರೇಮ್‌ರಾಜ್ ನೊಟ್ಟುಗು ಪಾತೆರಿನೆಡ್ದಾವರ ಸತ್ಯ ಪಿದಯಿ ಬೂರ್ಂಡ್. ಅಂಚಾದ್ ನಿಕ್ಲೆಲ ಆಧಾರ್ ಕಾರ್ಡ್ ಕಳೆಯೊಂಡ ನಿರ್ಲಕ್ಷ್ಯ ಮಲ್ಪೊಡ್ಚಿ ಪಂದ್ ಎಚ್ಚೆರ್ಗೆ ಪಂಡೆರ್.

ನ.28-29: ತೋಕೂರು ಸುಬ್ರಹ್ಮಣ್ಯ ದೇವಲ್ಯಡ್ ಷಷ್ಠಿ ಬಲಿ ಉಚ್ಚಯ

ಹಳೆಯಂಗಡಿ: ತೋಕೂರು ಶ್ರೀ ಸುಬ್ರಮಣ್ಯ ದೇವಲ್ಯಡ್ ನ.28 ಬೊಕ್ಕ 29 ಗ್ ಪಂಚೆಮಿ ಬೊಕ್ಕ ಷಷ್ಠಿ ಮಹೋಚ್ಚಯದ ಬಲಿ ಉಚ್ಚಯ ನಡಪರೆ ಉಂಡು.

ದೇವಲ್ಯ ಸಂಪೂರ್ಣವಾದ್ ಜೀರ್ಣೋದ್ಧಾರ ಆವೊಂದಿಪ್ಪುನೆಡ್ದಾವರ ಕಾಮಗಾರಿದ ಬೇಲೆ ಆವೊಂದುಂಡು. ಈ ಸರ್ತಿ ದಾಲ ಗೌಜಿ ಇಜ್ಜಂದೆ ಷಷ್ಠಿ ಮಹೋಚ್ಚಯ ನಡಪರೆ ಉಂಡು. ಧ್ವಜಾರೋಹಣ, ಪೇಟೆ ಸವಾರಿ ಆದ್ ರಥೋಚ್ಚಯ ನಡಪುಜಿ. ನ. 28 ಗ್ ಮಧ್ಯಾಹ್ನ ನುಪ್ಪು ಸೇವೆ ಅಂಚನೆ ರಾತ್ರೆ ಬಾಲಾಲಯಡ್ ಬಲಿ ಉಚ್ಚಯ, ಮಹಾಪೂಜೆ ನಡಪರೆ ಉಂಡು. ನ.29 ಗ್ ಕಾಂಡೆ 10 ಗಂಟೆಗ್ ಮಹಾಪೂಜೆ ಅಂಚನೆ ನುಪ್ಪು ಸೇವೆ ನಡಪರೆ ಉಂಡು. ಪರಕೆದ ಸೇವೆಲು ಏಪದೆಲಕನೆ ನಡಪರೆ ಉಂಡು ಪಂದ್ ದೇವಲ್ಯದ ವ್ಯವಸ್ಥಾಪನ ಸಮಿತಿದ ಅಧ್ಯಕ್ಷೆರ್ ಹರಿದಾಸ್ ಭಟ್ ಪ್ರಕಟನೆಡ್ ತೆರಿಪಾದೆರ್.

ಧರ್ಮಸ್ಥಳ ಲಕ್ಷ ದೀಪದ ಉಚ್ಚಯ: ಸರ್ವಧರ್ಮ ಸಮ್ಮೇಳನದ 90 ನೇ ಅಧಿವೇಶನನ್ ಉದಿಪನ ಮಲ್ತಿನ ಕೇಂದ್ರ ಸಚಿವೆರ್ ಸ್ಮೃತಿ ಇರಾನಿ

ಉಜಿರೆ: ಧರ್ಮಸ್ಥಳಡ್ ಅನ್ನದಾನ, ವಿದ್ಯಾದಾನ, ಔಷಧ ದಾನ ಬೊಕ್ಕ ಅಭಯದಾನ ಪನ್ಪಿನ ಚತುರ್ವಿಧ ದಾನಲು ದಿನಲ ಇತ್ತಿನೆಡ್ದಾವರ ಮುಲ್ಪ ಸತ್ಯ, ಧರ್ಮ, ನ್ಯಾಯ ಬೊಕ್ಕ ನೀತಿ ನೆಲೆ ಆತ್ಂಡ್. ಧರ್ಮಾಧಿಕಾರಿಲು ಡಿ. ವೀರೇಂದ್ರ ಹೆಗ್ಗಡೆರ್ ಧರ್ಮದ ಸಾಕಾರ ಮೂರ್ತಿಯಾದಿತ್ತ್‌ದ್ ಅರೆನ ಶಿಸ್ತು, ಸಮಯಪ್ರಜ್ಞೆ, ವಿನಯ, ಸೌಜನ್ಯ ಸರಳತೆ ಅಂಚನೆ ಉದಾತ್ತ ಚಿಂತನೆಲು ಮಾತೆರೆಗ್ಲಾ ಆದರ್ಶ ಅಂಚನೆ ಅನುಕರಣೀಯವಾದ್ ಉಂಡು ಪಂದ್ ಕೇಂದ್ರ ಸರ್ಕಾರದ ಮಹಿಳಾ ಬೊಕ್ಕ ಮಕ್ಕಳ ಅಭಿವೃದ್ಧಿ, ಅಲ್ಪಸಂಖ್ಯಾತ ವ್ಯವಹಾರದ ಸಚಿವೆರ್ ಸ್ಮೃತಿ ಇರಾನಿ ಪಂಡೆರ್.

ಆರ್ ಅಂಗಾರೆದಾನಿ ಧರ್ಮಸ್ಥಳದ ಲಕ್ಷ ದೀಪ ಉಚ್ಚಯದ ಪೊರ್ತುಡು ಸರ್ವಧರ್ಮ ಸಮ್ಮೇಳನದ 90 ನೇ ಅಧಿವೇಶನನ್ ಉದಿಪನ ಮಲ್ತ್‌ದ್ ಪಾತೆರಿಯೆರ್.

ಜನಕ್ಲೆನ ಸೇವೆನೇ ದೇವೆರ್ನ ಸೇವೆ ಪಂದ್ ಲೋಕ ಕಲ್ಯಾಣ ಸೇವಾ ಕಾರ್ಯಡ್ ಹೆಗ್ಗಡೆರೆನ ಜೀವನನೇ ಧರ್ಮದ ಪ್ರತಿರೂಪವಾದ್ ಉಂಡು. ಜನಹಿತವೇ ರಾಷ್ಟ್ರದ ಹಿತ ಪನ್ಪಿನ ನಿಸ್ವಾರ್ಥ ಭಾವನೆರ್ದ್ ಆರ್ ಸೇವೆ ಮಲ್ತೊಂದುಲ್ಲೆರ್. ದೇವೆರೆನ್ ನಮ ಏರ್ ತೂಯಿಜಿಂಡಲ ದೇವರ್‍ನ ಭಯ ಬೊಕ್ಕ ಭಕ್ತಿನ್ ಖಾವಂದೆರೆನ ಮುಕೇನ ತೂವೊಂದುಲ್ಲ. ಸರ್ವಧರ್ಮದ ಸಾರಲ ಒಂಜೇ ಆದಿತ್ತ್‌ದ್, ನಮ ಮಾತ ಧರ್ಮನ್ ಸಮಾನವಾದ್ ಗೌರವಿಸಾವೊಡು, ಮೋಕೆ ಮಲ್ಪೊಡು ಪಂದ್ ಆರ್ ಸಲಹೆ ಕೊರಿಯೆರ್.

ಧರ್ಮಸ್ಥಳದ ಗ್ರಾಮಾಭಿವೃದ್ಧಿ ಯೋಜನೆ ಅಂಚನೆ ಸ್ವ-ಸಹಾಯ ಸಂಘದ ಮುಕೇನ ಮಹಿಳಾ ಸಬಲೀಕರಣಗ್ ಹೆಗ್ಗಡೆರ್ ಅಂಚನೆ ಹೇಮಾವತಿ ಹೆಗ್ಗಡೆರ್ ಕೊರಿನ ಕೊಡುಗೆಗ್ ಅಭಿನಂದನೆ ಮಲ್ತೆರ್. ಧರ್ಮಸ್ಥಳದ ಸೇವಾ ಕಾಯಕ ವಿಶ್ವಗ್ ಮಾದರಿ ಉಂದೆರ್ದ್ ಯುವಜನತೆ ತಮ್ಮ ಉಜ್ವಲ ಭವಿಷ್ಯ ರಚನೆ ಆಪುಲೆಕ್ಕ ಆವಡ್ ಪಂದ್ ಎಡ್ಡೆಪ್ಪುನು ಬಯಕ್ಯೆರ್.

ರಾಷ್ಟ್ರ ನಿರ್ಮಾಣಡ್ ಮಾನವೀಯ ಮೌಲ್ಯ ಅಗತ್ಯ:ವೀರೇಂದ್ರ ಹೆಗ್ಗಡೆರ್

ಪ್ರಾಸ್ತಾವಿಕ ಪಾತೆರಡ್ ಬಿನ್ನೆರೆನ್ ಎದ್ಕೊನಿನ ಧರ್ಮಾಧಿಕಾರಿ ಡಿ. ವೀರೇಂದ್ರ ಹೆಗ್ಗಡೆರ್ ಧರ್ಮ ಶಾಶ್ವತ, ಸುಖ-ದುಃಖ ತಾತ್ಕಾಲಿಕವಾದ್ ಉಂಡು. ಮಾನವೀಯತೆ ಬೊಕ್ಕ ಸಮನ್ವಯತೆ ಧರ್ಮದ ಮೂಲ ಉದ್ದೇಶವಾದಿತ್ತ್‌ದ್ ನಮ್ಮ ಸಾರ್ಥಕ ಬದ್‌ಕ್‌ಗ್ ಪ್ರೇರಣೆ ಕೊರ್ಪಿನ ಸಾಧನವಾತ್ಂಡ್. ರಾಷ್ಟ್ರ ನಿರ್ಮಾಣಡ್ ಮಾನವೀಯ ಮೌಲ್ಯದ ಪಾತ್ರ ಮುಖ್ಯವಾದ್ ಉಂಡು. ಪ್ರತಿ ಒರಿಲ ಧರ್ಮ ಬೊಕ್ಕ ನೈತಿಕತೆದ ನಿಲೆಟ್ಟ್ ಮಾನವೀಯ ಮೌಲ್ಯನ್ ಬುಳೆಪಾವೊಡು. ಬೇತೆ ಬೇತೆ ಧರ್ಮದ ಸಾರ ಬೊಕ್ಕ ಸಂದೇಶನ್ ತೆರಿಯೊಂದು ಸರ್ವಧರ್ಮ ಸಮನ್ವಯದೊಟ್ಟುಗು ಸಾಮರಸ್ಯನ್ ಸಾಧಿಸಾವುನವೇ ಸರ್ವಧರ್ಮ ಸಮ್ಮೇಳನದ ಉದ್ದೇಶವಾತ್ಂಡ್ ಪಂದ್ ಪಂಡೆರ್.

ಕ್ರೈಸ್ತಧರ್ಮಡ್ ಧರ್ಮ ಸಮನ್ವಯದ ಬಗೆಟ್ ಧರ್ಮಗುರು ಮಾರ್ಸೆಲ್ ಪಿಂಟೊ, ಇಸ್ಲಾಂ ಬೊಕ್ಕ ಭಾರತೀಯ ಭಾವೈಕ್ಯದ ಬಗೆಟ್ ಹಾಸಿಂ ಪೀರ್ ಇ ವಾಲೀಕರ ಬೊಕ್ಕ ಜೈನ ಧರ್ಮಡ್ ಸಾಮರಸ್ಯ ಪನ್ಪಿನ ವಿಷಯದ ಬಗೆಟ್ ಬೆದ್ರದ ನಿವೃತ್ತ ಮುಖ್ಯ ಶಿಕ್ಷಕೆರ್ ಮುನಿರಾಜ ರೆಂಜಾಳ ಉಪನ್ಯಾಸ ಕೊರಿಯೆರ್.

ಅಧ್ಯಕ್ಷತೆ ವಹಿಸೊಂದು ಶಿವಮೊಗ್ಗದ ಪುಗರ್ತೆದ ವಕೀಲೆರ್ ಎಂ.ಆರ್. ಸತ್ಯನಾರಾಯಣ ಪಾತೆರ್ದ್, ನಮ್ಮ ಧರ್ಮದ ಬಗೆಟ್ ತೆರಿಯೊಂದು ಬೇತೆ ಧರ್ಮನ್ ಸಮಾನವಾದ್ ಗೌರವಿಸಾವೊಡು. ಧರ್ಮಸ್ಥಳ ಸರ್ವಧರ್ಮದ ಸಮನ್ವಯ ಬೊಕ್ಕ ಸಾಮರಸ್ಯದ ಕೇಂದ್ರವಾದುಂಡು ಪಂದ್ ಪಂಡೆರ್.

ಧರ್ಮಸ್ಥಳ ಗ್ರಾಮ ಪಂಚಾಯಿತಿ ಪಿ.ಡಿ.ಒ. ಉಮೇಶ್ ಗೌಡ ಬತ್ತಿನ ಬಿನ್ನೆರೆನ್ ಎದ್ಕೊನಿಯೆರ್. ಎಸ್.ಡಿ.ಎಂ. ಕಾಲೇಜ್‌ದ ಉಪನ್ಯಾಸಕೆರ್ ಡಾ. ಶ್ರೀಧರ ಭಟ್ ಲೇಸ್ ಸುಧಾರಿಕೆ ಮಲ್ತೆರ್. ಆಯಿಬೊಕ್ಕ ಕಂಚಿಮಾರುಕಟ್ಟೆ ಉಚ್ಚಯ ನಡತ್ಂಡ್.

ಗೇರುಕಟ್ಟೆ ಮಾರ್ಗದ ರಡ್ಡ್ ಗುಂಡಿ ಮುಚ್ಚಿನ ಸುಪ್ರೀತಾ ಪುನರೂರ್ ಕೂಟದಕುಲು

ಮುಲ್ಕಿ: ಕಾರ್ನಾಡ್ ಕೈತಲ್ದ ಗೇರುಕಟ್ಟೆದ ರಾಜ್ಯ ಹೆದ್ದಾರಿಡ್ ಇತ್ತಿನ ರಡ್ಡ್ ಮಲ್ಲ ಗುಂಡಿಲೆನ್ ಯುವ ಸಮಾಜಸೇವಕಿ ಸುಪ್ರೀತಾ ಪುನರೂರು ಬೊಕ್ಕ ಕೂಟದಕುಲು ಐತಾರ ರಾತ್ರೆ ಶ್ರಮದಾನದ ಮುಕೇನ ಮುಚ್ಚಿದೆರ್.


ಸುರಭಿ ಎಲೆಕ್ಟ್ರಾನಿಕ್ಸ್ ಸಿಬ್ಬಂದಿ ಕುಮಾರಿ ಸುಪ್ರೀತಾ ಪುನರೂರ್ ಬೊಕ್ಕ ಅರೆನ ಕೂಟದ ಸದಸ್ಯೆರಾಯಿನ ಸಚಿನ್, ನರೇಶ್, ರಮೇಶ್, ಸಂಪತ್, ಐಸನ್ ಡಿ’ಸೋಜಾ ಬೊಕ್ಕ ಮೂಲ್ಕಿ ಪೊಲೀಸ್ ಸಿಬ್ಬಂದಿ ವೀರೇಶ್ ಮೊಕುಲು ಕಾಂಕ್ರೀಟ್ ಪಾಡ್ದ್ ಮುಚ್ಚಿದೆರ್. ಮೊಕಲೆಗ್ ಸುರಭಿ ಎಲೆಕ್ಟ್ರಾನಿಕ್ಸ್ ಸಂಸ್ಥೆದ ಮಾಲಕೆರ್ ಜಾನ್ ಕ್ವಾಡ್ರಸ್ ಬೊಕ್ಕ ಕುಬೆವೂರ್‌ದ ಅಶ್ವಿನ್ ಮೊಕುಲು ಸಿಮೆಂಟ್ ಕೊರ್ದು ಸಾಕಾರ ಮಲ್ತೆರ್.

ಜನವರಿ 7: ಕುಲಶೇಖರ ಪತ್ತ್ ಸಮಸ್ತೆರ್ನ ಯಕ್ಷಗಾನ ಸೇವಾ ಸಮಿತಿದ 54 ನೇ ವರ್ಷದ ” ಶ್ರೀ ದೇವಿ ಮಹಾತ್ಮೆ’ ಆಟ

ಕುಡ್ಲ: ಕುಡ್ಲದ ಕುಲಶೇಖರ ಪತ್ತ್ ಸಮಸ್ತೆರೆನ ಯಕ್ಷಗಾನ ಸೇವಾ ಸಮಿತಿದ 54 ನೇ ವರ್ಷದ ಸೇವೆದ ಅಂಗವಾದ್ ಕಟೀಲ್ ಶ್ರೀ ದುರ್ಗಾಪರಮೇಶ್ವರಿ ಪ್ರಸಾದಿತ ದಶಾವತಾರ ಯಕ್ಷಗಾನ ಮಂಡಳಿದಕ್ಲೆರ್ದ್ ಶ್ರೀ ದೇವಿ ಮಹಾತ್ಮೆ ಯಕ್ಷಗಾನ ಬಯಲಾಟ ಜನವರಿ 7 ಶನಿಯಾರ ರಾತ್ರೆ ಪದವು ಗ್ರಾಮದ ಕುಲಶೇಖರ ಕಲ್ಪನೆ ಮೈದಾನದ ಮಂಟಪಡ್ ನಡಪರೆ ಉಂಡು.

ಈ ಲೇಸ್ ಡ್ ನಿಕುಲು ಮಾತ ಪಾಲ್ ಪಡೆದ್, ಶ್ರೀ ದೇವಿನ ಪುಣ್ಯ ಕೃಪೆಗ್ ಪಾತ್ರರಾವೊಡು ಪಂದ್ ಕುಲಶೇಖರ ಪತ್ತ್ ಸಮಸ್ತೆರೆನ ಯಕ್ಷಗಾನ ಸೇವಾ ಸಮಿತಿದ ಅಧ್ಯಕ್ಷೆರ್ ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.

ನ. 26-27: ನಡಾರ್ ಫ್ರೆಂಡ್ಸ್ ಸರ್ಕಲ್ (ರಿ.) ಕುಡ್ಲದ 25 ನೇ ವಾರ್ಷಿಕ ಉಚ್ಚಯ

ಕುಡ್ಲ: ನಡಾರ್ ಫ್ರೆಂಡ್ಸ್ ಸರ್ಕಲ್ (ರಿ.) ಕುಡ್ಲದ 25 ನೇ ವಾರ್ಷಿಕ ಉಚ್ಚಯ ನ. 26 ಶನಿಯಾರರ್ದ್ 27 ಐತಾರ ಮುಟ್ಟ ನಡಪರೆ ಉಂಡು.

ಈ ಲೇಸ್ ದ ಅಂಗವಾದ್ ನ. 26ಕ್ ಸಾಮೂಹಿಕ ಶ್ರೀ ಸತ್ಯನಾರಾಯಣ ಪೂಜೆ, ಮಹಾಪೂಜೆ, ಅನ್ನಸಂತರ್ಪಣೆ ಬೊಕ್ಕ ಕೈತಲ್ ದ ಕಲಾವಿದೆರೆರ್ದ್ ಬೇತೆ ಬೇತೆ ಡ್ಯಾನ್ಸ್ ಲೇಸ್ ಲು ನಡಪುಂಡು. ಬೊಕ್ಕ ಪುಣ್ಯಕೋಟಿ ಕ್ರಿಯೇಷನ್ ಕೂಟರ್ದ್ ತುಳು ಕಿರುಚಿತ್ರ ಬುಡುಗಡೆ ಆಪುಂಡು ಬೊಕ್ಕ ಕುಡ್ಲ ಕುಸಲ್ ಕಲಾವಿದೆರ್ ಮೊಕ್ಲೆರ್ದ್ ಕಾಮಿಡಿ ಎಕ್ಸ್‌ಪ್ರೆಸ್‌ ತುಳು ನಾಟಕ ನಡಪರೆ ಉಂಡು. ಡಿ.27 ಕ್ ಕೈತಲ್ ದ ಪ್ರತಿಭೆಲೆರ್ದ್ ಬೇತೆ ಬೇತೆ ಡ್ಯಾನ್ಸ್ ಲೇಸ್ ಲು, ಸಭಾ ಕಾರ್ಯಕ್ರಮ ಬೊಕ್ಕ ಶಿವದೂತ ಗುಳಿಗೆ ತುಳು ನಾಟಕ ನಡಪುಂಡು ಪಂದ್ ನಡಾರ್ ಫ್ರೆಂಡ್ಸ್ ಸರ್ಕಲ್ (ರಿ.) ಬಗಂಬಿಲ ನೆತ್ತ ಅಧ್ಯಕ್ಷೆರ್, ಪದಾಧಿಕಾರಿಲು ಬೊಕ್ಕ ಸರ್ವ ಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.