ಆಪಗಪಗ ಹುಷಾರ್ ತತ್ತೊಂದು ಇತ್ತಿನ ಮಾಜಿ ಸಿನಿಮಾ ನಟಿ ರಮ್ಯಾ ಇತ್ತೆ ಲಂಡನ್ ಡ್ ಆಸ್ಪತ್ರೆಗ್ ದಾಖಲ್ ಆತೆರ್.
ಲಂಡನ್ ದ lanserhof ನ್ಯಾಚುರೋಪಥಿ ಆಸ್ಪತ್ರೆಗ್ ದಾಖಲಾದ್ ಕರಿನ ನಾಲ್ ಐನ್ ದಿನೊರ್ದಿಂಚಿ ಪ್ರಕೃತಿ ಚಿಕಿತ್ಸೆ ಪಡೆವೊಂದು ಉಲ್ಲೆರ್.
ವೆಲ್ ನೆಸ್ ಕ್ಲಿನಿಕ್ ದ ಪೋಟೋನ್ ರಮ್ಯಾ ತನ್ನ ಇನ್ ಸ್ಟಾಡ್ ಪಾಡ್ದೆರ್. ಮೆರೆಗ್ ನೆರ್ದ್ ದುಂಬು ಕಾರ್ ಡ್ ಟ್ಯೂಮರ್ ಆದಿತ್ತ್ಂಡ್.
ರಾಜಬೂಡು ಚೆನ್ನೈ ಸೇರ್ದ್ ತಮಿಳ್‌ನಾಡ್‌ದ ಕೆಲ ಪ್ರದೇಶಲೆಡ್ ಐತಾರ ಭಾರೀ ಬರ್ಸ ಬತ್ತಿತ್ತ್‌ದ್ ಸಂಚಾರ ಅಸ್ತವ್ಯಸ್ತ ಆತ್ಂಡ್.
ಸೋಮಾರಲ ತೆಡಿಲ್‌ದೊಟ್ಟುಗು ಭಾರೀ ಬರ್ಸ ಬರ್ಪಿನ ಮುನ್ಸೂಚನೆ ಇತ್ತಿನೆಡ್ದಾವರ ಕಾಂಚೀಪುರಂ, ತಿರುವಳ್ಳೂರು, ಚೆಂಗಲ್ಪಟ್ಟು, ರಾಣಿಪೇಟ್ ಸೇರಿನಂಚನೆ ವೆಲ್ಲೂರು ಜಿಲ್ಲೆಲೆಡ್ ಶಾಲೆಗ್ ರಜೆ ಘೋಷಣೆ ಮಲ್ತ್‌ದೆರ್.
ಭಾರೀ ಬರ್ಸರ್ದಾವರ ಚೆನ್ನೈಗ್ ಪೊಯರೆ ಇತ್ತಿನ ಆಜೆಡ್ದ್ ಎಚ್ಚದ ಇಮಾನಲೆಗ್ ಬೆಂಗ್ಲೂರ್‌ಗ್ ಮಾರ್ಗ ಬದಲ್ ಮಲ್ತ್‌ದೆರ್. 12 ರ್ದ್ ಎಚ್ಚದ ಇಮಾನದ ಸವಾರಿನ್ ಬದಲ್ ಮಲ್ದೆರ್.
ಬೆಂಗ್ಲೂರ್: ಪೊಸ ಸರ್ಕಾರ ಆಡಳಿತಗ್ ಬತ್ತಿನ ಬೆರಿಟ್ಟೆ ಕರೆಂಟ್ ಬಿಲ್ ಎಚ್ಚ ಆತಿನೆಡ್ದಾವರ, ಕೈಗಾರಿಕೆಲೆಗ್ ಮಸ್ತ್ ಬಂಗ ಆತ್ಂಡ್. ಇಂಚಾದ್ ಉಂದೆನ್ ಖಂಡಿಸಾದ್ ಕರ್ನಾಟಕ ವಾಣಿಜ್ಯ ಮಂಡಳಿ ಬೊಕ್ಕ ಕೈಗಾರಿಕಾ ಮಂಡಳಿ ಜೂನ್ 22 ಕ್ಕ್ ಕರ್ನಾಟಕ ಬಂದ್‌ಗ್ ಲೆಪ್ಪು ಕೊರ್ದಿತ್ತ್‌ದ್ ಉಂದೆಕ್ಕ್ ರಾಜ್ಯದ ಮಸ್ತ್ ಉದ್ಯಮಿಲು ಅಂಚನೆ ಕೈಗಾರಿಕೆಲು ಬೆಂಬಲ
ತೆರಿಪಾದೆರ್.
ಎಫ್ ಕೆ ಸಿಸಿಐ ಎಚ್ಚರ್ಗೆ ಕೊರ್ಂಡಲ ರಾಜ್ಯ ಸರ್ಕಾರ ಒವ್ವೆ ಚರ್ಚೆ ಮಲ್ಪಂದಿನ ನಿಲೆಟ್ ಕರ್ನಾಟಕ ಚೇಂಬರ್ ಆಫ್ ಕಾಮರ್ಸ್ ಅಂಚನೆ ಇಂಡಸ್ಟ್ರಿ ಬಂದ್ ಮಲ್ಪರೆ ನಿರ್ಧಾರ ಮಲ್ತ್‌ದ್ಂಡ್.
ಬೊಲ್ತೇರ್: ಕಲ್ಪಾರ್ಥಿಲೆನ್ ಬಸ್‌ಟ್ ದುಂಬು ಪೋಲೆ ಪಂದ್ ನಿರ್ವಾಹಕೆರ್ ದುಂಬು ನೂಕಿನ ಕಾರಣಗ್ ಬಸ್ ಉಂತಾದ್ ಲಡಾಯಿ ಮಲ್ತಿನ ಘಟನೆ ಚಾರ್ಮಾಡಿ ಚೆಕ್ ಪೋಸ್ಟ್ ಕೈತಲ್ ನಡತ್ಂಡ್.
ಈ ಬಗೆಟ್ ಧರ್ಮಸ್ಥಳ ಪೊಲೀಸ್ ಠಾಣೆಡ್ ನಿರ್ವಾಹಕೆರ್ ಕೊರಿನ ದೂರುಡ್ ಕೇಸ್ ದಾಖಲ್ ಆತ್ಂಡ್. ಕುಡ್ಲರ್ದ್ ಮೂಡಿಗೆರೆಗ್ ಸವಾರಿ ಮಲ್ಪುನ ಸರ್ಕಾರಿ ಬಸ್‌ಕ್ಕ್ ಉಜಿರೆಡ್ ಕಲ್ಪಾರ್ಥಿಲು ಬತ್ತ್‌ದಿತ್ತ್‌ದ್ ಈ ಪೊರ್ತುಡು ನಿರ್ವಾಹಕೆರ್ ಬಸ್‌ಟ್ ದುಂಬು ಪೋಲೆ ಪಂದ್ ನೂಕ್‌ದಿತ್ತೆರ್. ಬಸ್ ನಿರ್ವಾಹಕೆರ್ ಬೊಕ್ಕ ಕೆಲ ಕಲ್ಪಾರ್ಥಿಲೆನ ನಡುಟ್ಟ್ ಪಾತೆರಕತೆ ನಡತ್‌ದ್ಂಡ್.
ಒಡಿಪುದ ಪೇಜಾವರ ಶ್ರೀ ವಿಶ್ವಪ್ರಸನ್ನ ತೀರ್ಥ ಸ್ವಾಮಿಲು 40 ಅಡಿತ್ತ ಗುವೆಲ್‌ಗ್ ಜತ್ತ್‌ದ್ ಪುಚ್ಚೆದ ಕಿನ್ನಿನ್ ರಕ್ಷಣೆ ಮಲ್ತ್‌ದೆರ್.
ಈ ಘಟನೆ ಒಡಿಪುದ ಮುಚ್ಲುಕೋಡು ಸುಬ್ರಮಣ್ಯ ದೇವಲ್ಯಡ್ ನಡತ್‌ದ್ಂಡ್. ಅಕಲ್ ತತ್ತ್ ದ ಗುವೆಲ್‌ಗ್ ಬೂರ್ದು ಪುಚ್ಚೆ ಬುಲ್ತೊಂದು ಇತ್ತ್ಂಡ್. ಪುಚ್ಚೆದ ಬುಲಿಪುನ್ ಕೇಂದ್ ಸ್ವಾಮಿಲು ಗುವೆಲ್‌ಗ್ ಜತ್ತ್‌ದ್ ಪುಚ್ಚೆದ ಕಿನ್ನಿನ್ ರಕ್ಷಣೆ ಮಲ್ತ್‌ದ್ ಮಾತಾ ಜನಕ್ಲೆರ್ದ್ ಪುಗರ್ತೆ ಪಡೆತೆರ್.
Udupi: Pejawara Shree gets down into a 40 feet deep well to rescue a kitten!!
Udupi Sri Vishwaprassanna Thirtha Swamiji of Pejawara Mutt gets down into 40 feet deep well and rescued a kitten that had fallen into the well.The incident happened at Mucchukodu Subramanya temple.
ಬಿರುವೆರ್ ಕುಡ್ಲ (ರಿ)ಮುಲ್ಕಿ ಘಟಕದ ವತಿರ್ದ್ 72ನೇ ಸ್ಪಂದನಾ ಸೇವಾ ಯೋಜನೆದ ಮುಖೇನ ಒಂಜಿ ಬಡಪತ್ತ್ ದ ಕುಟುಂಬಗ್ ಪನವುದ ಸಕಾಯನ್ ಮಲ್ತೆರ್.
ಬಿರುವೆರ್ ಕುಡ್ಲ (ರಿ) ಸ್ಥಾಪಕಾಧ್ಯಕ್ಷೆರ್ ಉದಯ ಪೂಜಾರಿ ಮೆರೆನ ಮುತಾಲಿಕೆಡ್, “ಸ್ವಂತಗ್ ಒಂತೆ, ಸಮಾಜಗ್ ಸರ್ವಸ್ವ” ಪನ್ಪುನ ಉದ್ದೇಶದೊಟ್ಟಿಗೆ ಏಪಲ ಸಮಾಜ ಸೇವೆ ಮಲ್ತೊಂದು ಇಪ್ಪುನ ಪೆರ್ಮೆದ ಬಿರುವೆರ್ ಕುಡ್ಲ ಸಂಘಟನೆದ ಅಂಗ ಸಂಸ್ಥೆಯಾಯಿನ ಮುಲ್ಕಿ ಘಟಕದ ಕ್ರಿಯಾಶೀಲ ಅಧ್ಯಕ್ಷೆರ್ ಕಿಶೋರ್ ಜೆ. ಸಾಲ್ಯಾನ್ ಮೆರೆನ ಮಾರ್ಗದರ್ಶನಡ್ ಬೊಕ್ಕ ಘಟಕದ ಮಾತ ಸದಸ್ಯೆರೆನ ಸಕಾಯರ್ದ್ 7 ನೇ ಸ್ಪಂದನಾ ಸೇವಾ ಯೋಜನೆನ್ ಇಂಚೊಗು ಹುಷಾರ್ ಇಜ್ಜಂದೆ ಇತ್ತಿನ ಮುಲ್ಕಿ ಒಡೆಯರಬೆಟ್ಟು ನಿವಾಸಿ ಜಯ ಪೂಜಾರಿ ಮೆರೆನ ಶಸ್ತ್ರ ಚಿಕಿತ್ಸೆಗ್ ಚೆಕ್ ಮುಖೇನ ಕೊರಿಯೆರ್.
ಈ ಪೊರ್ತುಡು ಘಟಕದ ಅಧ್ಯಕ್ಷೆರ್ ಕಿಶೋರ್ ಜೆ ಸಾಲ್ಯಾನ್, ಉಪಾಧ್ಯಕ್ಷೆರ್ ಉಮೇಶ್ ಮಾನಂಪಾಡಿ, ಕಾರ್ಯದರ್ಶಿ ಗಿರಿಧರ್ ಅಮೀನ್, ಕೋಶಾಧಿಕಾರಿ ಅಶೋಕ್ ಸುವರ್ಣ, ಸಂಘಟನಾ ಕಾರ್ಯದರ್ಶಿ ರಾಮನಾಥ್ ಸುವರ್ಣ, ಮೋಹನ ಸುವರ್ಣ ಬೊಕ್ಕ ಸದಸ್ಯೆರ್ ಇತ್ತೆರ್.
ಬೆದ್ರ: ಬೊಂಬೈ ಬಾಂದ್ರಾ ವೆಸ್ಟ್ ದ ಪಾಲಿ ಹಿಲ್‌ದ ಜನತಾ ಬಾರ್ ಆ್ಯಂಡ್ ರೆಸ್ಟೋರೆಂಟ್ ಮಾಲಿಕೆರ್, ಬೆದ್ರ ಕಡಂದಲೆ ಪರಾರಿ ಮನೆತನದ ಲೋಕೇಶ್ ಶೆಟ್ಟಿ (67) ಸನಿಯಾರ (ಜೂ.17) ದೇವೆರೆ ಪಾದೊ ಸೇರಿಯೆರ್.
ಬೆದ್ರ ಶ್ರೀ ಮಹಾವೀರ ಕಾಲೇಜ್ ಡ್ ಬಿಎಸ್‌ಸಿ ಓದಿನ ಮೇರ್ ಬೊಂಬೈಡ್ ಪೊಪ್ಪ ಶಿಮಂತೂರು ಮಜಲಗುತ್ತು ಗೋಪಾಲ ಶೆಟ್ಟಿ ಮೇರ್ ನಡಪಾವೊಂದು ಇತ್ತಿನ ಹೋಟೆಲ್ ಉದ್ಯಮಡ್ ಮೇರ್ ಬೇಲೆ ಮಲ್ತ್ ದ್ ಬೊಕ್ಕ ಸ್ವಂತ ಹೋಟೆಲ್ ನಡಪಾವೊಂದು ಇತ್ತೆರ್. ಬೊಂಬೈದ ಖಾರ್ ವೆಸ್ಟ್ ಡ್ ವಾಸ ಇತ್ತಿನ ಮೇರ್ , ಮಹಾವೀರ ಕಾಲೇಜ್ ದ ಕೈತಲ್ ಕೃಷಿ ಮಲ್ತೊಂದು ಇತ್ತೆರ್. ಅತ್ತಂದೆ ಗುರು ಶ್ರೀ ಸತ್ಯಸಾಯಿಬಾಬಾ ಮೆರೆನ ಭಕ್ತೆಯಾದ್, ಸುಮಾರ್ ಆಧ್ಯಾತ್ಮಿಕ ಜೀವಿಯಾದ್ ಬದ್ಕಿನಾರ್. ಅಂಚೆನೆ ದಾನಿಯಾದ್, ಸುಮಾರ್ ಜನಕ್ಕ್ ಉಪಕಾರಿ ಆತೆರ್. ಮೆರೆಗ್ ಬೊಡೆದಿ ಬೊಕ್ಕ ಮಗಲ್ ಉಲ್ಲೆರ್. ಮೆರೆನ ನಿಧನೊಗು ಮಹಾವೀರ ಕಾಲೇಜ್ ಹಳೆವಿದ್ಯಾರ್ಥಿ ಸಂಘದ ಲೋಕೇಶ್ ಬೊಕ್ಕ ಕೂಟದಕುಲು ಸಂತಾಪ ತೆರಿಪಾದೆರ್.
ವರದಿ: ಧನಂಜಯ ಬೆದ್ರ
(ಸಹಕಾರ: ಶ್ರೀ ಮಹಾವೀರ ಕಾಲೇಜ್ ಹಳೆವಿದ್ಯಾರ್ಥಿ ಸಂಘದ ದೋಸ್ತಿಲು)
ಮೂಲ್ಕಿ : ಪೆಜಮಾಡಿ ಬಂದರ್ ಅಭಿವೃದ್ಧಿ ಆಪಿನ ಪೊರ್ತುಡು ಸಸಿಹಿತ್ಲು ಬೀಚ್ ಗ್ ಭಾರಿ ಹಾನಿ ಆಪಿನ ಅಪಾಯ ಇತ್ತಿನೆರ್ದ್ ಅವೆನ್ ಒರಿಪುನ ಸಲುವಾದ್ ತುರ್ತಾದ್ 1 ಕಿ.ಮೀ. ಮುಟ್ಟ ತಡೆಗೋಡೆ ಕಟ್ಟರೆ ರಾಜ್ಯ ಬಂದರು ಬೊಕ್ಕ ಮೀನುಗಾರಿಕಾ ಸಚಿವೆರ್ ಮಾಂಕಾಳ ವೈದ್ಯ ಅಧಿಕಾರಿಲೆಗ್ ಆದೇಶ ಕೊರಿಯೆರ್.
ಆರ್ ಸಸಿಹಿತ್ಲು ಮುಂಡ ಬೀಚ್ ಗ್ ಬೇತೆ ಬೇತೆ ಇಲಾಖೆದ ಅಧಿಕಾರಿಲ್ನ ಒಟ್ಟುಗು ಅಂಚೆನೆ ಜನಪ್ರತಿನಿಧಿನಕಲ್ನ ಒಟ್ಟುಗು ಸುಕ್ರಾರ ಭೇಟಿ ಕೊರ್ದು ಮಾಧ್ಯಮದಕಲ್ನೊಟುಗು ಪಾತೆರಿಯೆರ್.
ಸಸಿಹಿತ್ಲು ಸೇರ್ದ್ ಕರಾವಳಿದ ಮಾತ ಬೀಚ್ ಸಂರಕ್ಷಣೆ ಗ್ ಆದ್ಯತೆ ಕೊರ್ದು ಮಲ್ಪುವ. ಮುಲ್ತ ಬೀಚ್ ಪ್ರವಾಸಿಗೆರ್ನ ಅಂಚೆನೆ ಕೈತಲ್ದದಕ್ಲೆನ ಹಿತಾಸಕ್ತಿನ್ ತೂದು ಯೋಜನೆ ಮಲ್ಪುನ ಜಬದಾರಿ ಸರ್ಕಾರದ ಆದುಂಡು. ಉಂದೆಕ್ಕ್ ಇಲಾಖೆದ ಅಧಿಕಾರಿಲು ಬೊಕ್ಕ ಕೈತಲ್ದ ಮೀನುಗಾರೆರೆನ್ ವಿಶ್ವಾಸಗ್ ದೆತೊಂದು ಯೋಜನೆ ಮಲ್ಪರೆ ಸೂಚನೆ ಕೊರ್ತೆ ಪಂದ್ ಪಂಡೆರ್.
ಅವ್ವತ್ತಾಂದೆ ಸಸಿಹಿತ್ಲು ಬೀಚ್ ದ ಜಾಗೆ ಸೇರ್ದ್ ಸುತ್ತಮುತ್ತ ಒವ್ವೇ ರೀತಿಡ್ ಲ ಖಾಸಗಿದಕಲೆಗ್ ಅವಕಾಶ ಇಜ್ಜಿ. ಅರಣ್ಯ, ಮೀನುಗಾರಿಕೆ, ಪ್ರವಾಸೋದ್ಯಮ ಇಲಾಖೆದ ಮುಕೇನ ಕಂದಾಯ ಭೂಮಿಡ್ ಬೀಚ್ ಅಭಿವೃದ್ಧಿ ಮಲ್ಪರೆ ಉಂಡು.ನೆರ್ದ್ ಪಿರವುದ ಯೋಜನೆಲೆನ ಬಗೆಟ್ಟ್ ಸೂಕ್ತ ಪರಿಶೀಲನೆ ಮಲ್ಪುವ. ಒವ್ವೇ ಯೋಜನೆ ಕೈತಲ್ದಕಲೆಗ್ ಪರಿಣಾಮಕಾರಿ ಆಂಡ ಮಾತ್ರ ಅಯಿಕ್ಕ್ ಸಹಕಾರ ಕೊರ್ಪ.ಕೈತಲ್ದಕ್ಲೆನ ವಿರೋಧ ಬತ್ತ್ಂಡ ಅವೆನ್ ಜಾರಿ ಮಲ್ಪುಜ ಪಂಡೆರ್.
ಕೆಪಿಸಿಸಿ ರಾಜ್ಯ ಕಾರ್ಯದರ್ಶಿ ಮಿಥುನ್ ರೈ ಮೇರ್ ಪಾತೆರ್ದ್, ಮರಿಯಲೊಡು ಕೈತಲ್ದ ನಿವಾಸಿಲೆಗ್ ಸೂಕ್ತ ರಕ್ಷಣೆದ ವ್ಯವಸ್ಥೆ ಆವೊಡು. ಅಂಚೆನೆ ಬೀಚ್ ಅಭಿವೃದ್ಧಿದ ಬಗೆಟ್ಟ್ ಯೋಜನೆಲೆನ ಸಾಧಕ ಬಾಧಕ, ಮೀನುಗಾರೆರೆಗ್ ಬೇಲೆ ಅಂಚೆನೆ ಪ್ರವಾಸೋದ್ಯಮದ ಪೂರಕ ಯೋಜನೆಲೆನ ಬಗೆಟ್ಟ್ ಸಚಿವೆರೆಗ್ ಮಾಹಿತಿ ಕೊರಿಯೆರ್.
ಕೆಪಿಸಿಸಿ ಸದಸ್ಯೆರ್ ಎಚ್.ವಸಂತ ಬೆರ್ನಾಡ್ ಮೇರ್ ಪಾತೆರ್ದ್, ನೆರ್ದ್ ದುಂಬು ಬೀಚ್ ಅಭಿವೃದ್ಧಿ ಸಮಿತಿದ ಮುಕೇನ ನಡತಿನ ಸರ್ಫಿಂಗ್ ಬೊಕ್ಕ ಪ್ರದೇಶಾಭಿವೃದ್ಧಿದ ಬಗೆಟ್ಟ್ ಪೊಲಬು ಮಲ್ತೆರ್.
ಹಳೆಯಂಗಡಿ ಪಂಚಾಯಿತಿ ಸದಸ್ಯೆರಾಯಿನ ಚಂದ್ರಕುಮಾರ್,ಅನಿಲ್ ಕುಮಾರ್,ಅಬ್ದುಲ್ ಅಜೀಜ್, ಪದ್ಮಾವತಿ ಶೆಟ್ಟಿ, ಜಲಜಾ, ಪಿಡಿಒ ಮುತ್ತಪ್ಪ, ಕಾರ್ಯದರ್ಶಿ ಕೇಶವ ದೇವಾಡಿಗ, ಮೂಲ್ಕಿ ಪಟ್ಟಣ ಪಂಚಾಯಿತಿ ಸದಸ್ಯೆರ್ ಪುತ್ತುಬಾವ, ಮೋಹನ್ ಕೋಟ್ಯಾನ್, ಸಮೀರ್ , ಧರ್ಮಾನಂದ ಶೆಟ್ಟಿಗಾರ್, ಮಾಜಿ ಸದಸ್ಯೆರ್ ಜಗನ್ನಾಥ ಕೋಟ್ಯಾನ್, ರಿತೇಶ್, ಪ್ರವೀಣ್ ಕರ್ಕೇರ, ಪ್ರವಾಸೋದ್ಯಮ ಇಲಾಖೆದ ಸಹಾಯಕ ನಿರ್ದೇಶಕೆರ್ ಮಾಣಿಕ್ಯ, ಮೂಲ್ಕಿ ತಹಶೀಲ್ದಾರ್ ಪ್ರದೀಪ್, ಉಪತಹಶೀಲ್ದಾರ್ ದಿಲೀಪ್ ರೋಡ್ಕರ್, ಕಂದಾಯ ನಿರೀಕ್ಷಕೆರ್ ದಿನೇಶ್, ಗ್ರಾಮಕರಣಿಕ ಮೋಹನ್, ಸಹಾಯಕೆರ್ ನವೀನ್, ಬೇತೆ ಬೇತೆ ಇಲಾಖೆದ ಅಧಿಕಾರಿಲಾಯಿನ ಕ್ಯಾಪ್ಟನ್ ಸಿ. ಸ್ವಾಮೀ, ಟಿ.ಎಸ್.ರಾಥೋಡ್, ಶ್ರೀನಿವಾಸ ಮೂರ್ತಿ, ಪ್ರವೀಣ್ ಕುಮಾರ್, ಮನೋಹರ ಆಚಾರ್ಯ, ಮಾಧವ ಕಾರಂತ್ ಮೊಕುಲು ಮಾತ ಇತ್ತೆರ್.
ಕಾರ್ಲ ತಾಲೂಕ್‌ದ ಕುಕ್ಕುಂದೂರು ಗ್ರಾಮದ ಜೋಡುರಸ್ತೆಡ್ ಇಂಜಿನಿಯರಿಂಗ್ ಕಲ್ಪಾರ್ಥಿ ಒರ್ತಿ ಆತ್ಮಹತ್ಯೆ ಮಲ್ತಿನ ಘಟನೆ ನಡತ್ಂಡ್.
ಅಶೋಕ್ ಶೆಟ್ಟಿ ಮೆರೆನ ಮಗೆ ಅಮೃತ್ ಶೆಟ್ಟಿ (21) ಆತ್ಮಹತ್ಯೆ ಮಲ್ತಿನ ಕಲ್ಪಾರ್ಥಿ.
ಮೇರ್ ಖಾಸಗಿ ಕಾಲೇಜಿಡ್ ಇಂಜಿನಿಯರಿಂಗ್ ಕಲ್ತೊಂದಿತ್ತೆರ್. ಮನಸ್ಸ್‌ಗ್ ಬೇಜಾರ್ ಆದ್ ಜೋಡುರಸ್ತೆಡ್ ಇಪ್ಪುನ ತನ್ನ ಇಲ್ಲಡ್ ಆತ್ಮಹತ್ಯೆ ಮಲ್ತ್‌ದೆರ್. ಕಾರ್ಲ ಪೊಲೀಸ್ ಠಾಣೆಡ್ ಕೇಸ್ ದಾಖಲ್ ಆತ್ಂಡ್.
ಸುರತ್ಕಲ್: ಜೋಳದ ಕೊನೊವೊಂದಿತ್ತಿನ ಲಾರಿಡ್ ಆಕಸ್ಮತ್ ಆದ್ ತೂ ಪೊತ್ತಿನ ಘಟನೆ ಸುರತ್ಕಲ್ ಕೈತಲ್ದ ಗೋವಿಂದಾಸ್ ಕಾಲೇಜ್‌ದ ಎದುರುಡು ಇಪ್ಪುನ ಮಾರ್ಗಡ್ ನಡತ್ಂಡ್.
ಘಟನೆಡ್ ಕೆಲಪೊರ್ತು ಗಾಡಿದ ಸವಾರಿ ಉಂತುದ್ಂಡ್. ಒವ್ವೇ ರೀತಿದ ಅಪಾಯ ಆತಿಜಿ ಪಂದ್ ತೆರಿದ್ ಬೈದ್ಂಡ್.
