ಮಡಿಕೇರಿ: ತಮಿಳುನಾಡ್ ಡ್ ಮಾರಿಯೆರೆ ಬೆಂಗ್ಲೂರ್ ರ್ದ್ ರಕ್ತ ಚಂದನ ಮರತ್ತ ತುಂಡುನ್ ಕಾರ್ ಡ್ ಕೊನೊಂದು ಇತ್ತಿನ ಮೂಜಿ ಜನನ್ ಕೊಳ್ಳೆಗಾಲ ಪೇಂಟೆದ ಪೊಲೀಸ್ ಅರಣ್ಯ ಸಂಚಾರಿ ದಳ ಅರೆಸ್ಟ್ ಮಲ್ದೆರ್.
ಬೆಂಗ್ಲೂರ್ ದ ವಿಜಯನಗರದ ನಿವಾಸಿ ಅರುಣ್ ಕುಮಾರ್ (26), ಪಂಡಿತರ ಪಾಳ್ಯ ನಿವಾಸಿ ಆನಂದ್ (46) ಬೊಕ್ಕ ತುಮಕೂರುದ ಸೋಮೇಶ್ವರಪುರಂದ ಮುಸ್ತಫ (52) ಅರೆಸ್ಟ್ ಆಯಿನ ಆರೋಪಿಲು.
ಮೊಕ್ಲೆನ ಕಾರ್ ಡ್ ಇತ್ತಿನ 17.04 ಲಕ್ಷ ರೂ. ಬಿಲೆತ್ತ ರಕ್ತ ಚಂದನ ಮರತ್ತ ತುಂಡು, 3 ಮೊಬೈಲ್, 1
ಕಾರ್ ಬೊಕ್ಕ (ನಗದು) ಕಾಸ್ ನ್ ವಶಕ್ಕ್ ದೆತೊಂದೆರ್.
ಸರ್ಕಾರ 2023 ನೇ ವರ್ಷದ ಸಾರ್ವತ್ರಿಕ ರಜೆ ದಿನತ್ತ ಪಟ್ಟಿ ಪ್ರಕಟ ಮಲ್ದ್ಂಡ್.
ಮಾತ 2-4 ನೇ ಸನಿಯಾರ, ಮಾತ ಐತಾರ ಸೇರ್ದ್ ಕೆಲವು ಪರ್ಬಲೊಗ್ ರಜೆ ಉಂಡು.
ಈ ವರ್ಷದ ರಜೆತ್ತ ದಿನ
•ಜನವರಿ 26 ಗುರುವಾರ ಗಣರಾಜ್ಯೋತ್ಸವ
•ಫೆಬ್ರವರಿ 16 ಸನಿಯಾರ ಮಹಾಶಿವರಾತ್ರಿ
•ಮಾರ್ಚ್ 22 ಬುಧಾರ ಯುಗಾದಿ
•ಎಪ್ರಿಲ್ 3 ಸೋಮಾರ ಮಹಾವೀರ ಜಯಂತಿ, 7 ಸುಕ್ರಾರ ಗುಡ್ ಫ್ರೈಡೆ, 14 ಸುಕ್ರಾರ ಅಂಬೇಡ್ಕರ್ ಜಯಂತಿ
•ಮೇ 1 ಸೋಮಾರ ಕಾರ್ಮಿಕೆರೆ ದಿನ
•ಜೂನ್ 29 ಗುರುವಾರ ಬಕ್ರೀದ್
(ಕರಿದ್ಂಡ್)
•ಜುಲೈ 29 ಸನಿಯಾರ ಮೊಹರಂ ಕಡೆತ್ತ ದಿನ
•ಆಗಸ್ಟ್ 15 ಅಂಗಾರೆ ಸ್ವಾತಂತ್ರ್ಯ ದಿನ
•ಸೆಪ್ಟೆಂಬರ್ 18 ಸೋಮಾರ ಚೌತಿ, 28 ಈದ್ ಮಿಲಾದ್
•ಅಕ್ಟೋಬರ್ 2 ಸೋಮಾರ ಗಾಂಧಿ ಜಯಂತಿ, 23 ಸೋಮಾರ ಮಹಾನವಮಿ, ಆಯುಧಪೂಜೆ, 24 ಅಂಗಾರೆ ವಿಜಯದಶಮಿ
•ನವೆಂಬರ್ 1 ಬುಧಾರ ಕನ್ನಡ ರಾಜ್ಯೋತ್ಸವ, 14 ಅಂಗಾರೆ ಬಲಿಪಾಡ್ಯಮಿ, ತುಡರ್ ಪರ್ಬ, 30 ಗುರುವಾರ ಕನಕದಾಸ ಜಯಂತಿ
•ಡಿಸೆಂಬರ್ 25 ಸೋಮಾರ ಕ್ರಿಸ್ ಮಸ್.
ವಿನಮ್ರ ಇಡ್ಕಿದು ಪದ ಪಂಡಿನ “ಮೋಕೆ ಜೋಕೆ “ ಪನ್ಪುನ ತುಳು ಭಾವಗೀತೆದ ಆಡಿಯೋ ಬೊಕ್ಕ ವಿಡಿಯೋ ಪೇಂಟೆದ ವುಡ್ ಲ್ಯಾಂಡ್ ಹೋಟೆಲ್ ಡ್ (ಜೂನ್ 29) ಕೋಡೆ ನಡತಿನ ಲೇಸ್ ಡ್ ಬುಡುಗಡೆ ಆಂಡ್.
ಯಕ್ಷಗಾನ ಅರ್ಥಧಾರಿ, ಪ್ರವಚನಕಾರೆ, ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿ, ಕರ್ನಾಟಕ ಜಾನಪದ ಬೊಕ್ಕ ಯಕ್ಷಗಾನ ಅಕಾಡೆಮಿದ ಮಾಜಿ ಸದಸ್ಯೆರಾಯಿನ ಪ್ರೊ. ಭಾಸ್ಕರ್ ರೈ ಕುಕ್ಕುವಳ್ಳಿ ಈ ಭಾವಗೀತೆನ್ ಬುಡುಗಡೆ ಮಲ್ತೆರ್.
ಬೊಕ್ಕ ಮೇರ್ ಪಾತೆರ್ದ್, “ಪಜ್ಜಿ ಗೋಡೆಗ್ ಕಲ್ಲ್ ದಕ್ಕ್ಂಡ ಎಂಚ ಗಟ್ಟಿಯಾದ್ ಉಂತುಡೊ ಅಂಚೆನೆ ಎಲ್ಯ ಪ್ರಾಯಡೇ ಜೋಕುಲೆಗ್ ಎಡ್ಡೆ ಸಂಸ್ಕಾರ ಕೊರ್ಂಡ ಅಕ್ಲೆಗ್ ಎಡ್ಡೆ ತಾದಿಡೇ ಬುಲೆಪೆರ್. ಕಲ್ಪುನೆತ್ತೊಟ್ಟಿಗೆ ಜೋಕುಲು ಎಡ್ಡೆ ಹವ್ಯಾಸನ್ ರೂಢಿ ಮಲ್ತೊಂಡ ಅಕ್ಲೆನ ವ್ಯಕ್ತಿತ್ವ ಎಡ್ಡೆ ಆಪುಂಡು. ಬಾಲ ಪ್ರತಿಭೆ ವಿನಮ್ರ ಇಡ್ಕಿದು ನನ ಎಡ್ಡೆ ಗಾಯಕೆ ಆಪೆ ಪನ್ಪುನೆನ್ ಅಯನ ಸ್ವರ ಬೊಕ್ಕ ಪದ್ಯ ಪನ್ಪುಂಡು” ಪಂದ್ ಪಂಡೆರ್.
ಈ ಲೇಸ್ ಡ್ ಮಲ್ಲ ಬಿನ್ನೆರಾದ್ ಸುರತ್ಕಲ್ ಗೋವಿಂದ ದಾಸ ಕಾಲೇಜ್ ದ ಪ್ರಾಂಶುಪಾಲೆರ್ ಪ್ರೊ. ಪಿ. ಕೃಷ್ಣಮೂರ್ತಿ ಪಾಲ್ ಪಡೆದಿತ್ತೆರ್.
ಮೇರ್ ಪಾತೆರ್ದ್, “ತುಳುಕ್ಕು ಪೊಸ ಪೊಸ ಗಾಯಕೆರ್ ಬೊಕ್ಕ ಪೊಸ ಪೊಸ ಭಾವಗೀತೆಲು ಬರೊಡಾಯಿನ ಅಗತ್ಯ ಇತ್ತೆದ ದಿನಟ್ಟ್ ಮುಖ್ಯ ಆತ್ಂಡ್. ಬಾಲ ಪ್ರತಿಭೆ ವಿನಮ್ರ ಇಡ್ಕಿದು ಪಂಡಿನ ತುಳು ಪದ್ಯ ಮಾತೆರೆಗ್ಲಾ ಇಷ್ಟ ಅವಡ್, ದುಂಬಗ್ ಎಡ್ಡೆ ಗಾಯಕೆ ಅವಡ್ ಪಂದ್ ಎಡ್ಡೆಪ್ಪು ಬಯಕಿಯೆರ್.
ಈ ಪೊರ್ತುಡು ವಿನಮ್ರ ಇಡ್ಕಿದು, ಚಿತ್ರೀಕರಣ, ನಿರ್ದೇಶನ, ಸಂಕಲನನ್ ಮಲ್ತಿನ ವಿದ್ಯಾ.ಯು ಇತ್ತೆರ್. ರಘು ಇಡ್ಕಿದು ಲೇಸ್ ದ ಸುಧಾರಿಕೆ ಮಲ್ತೆರ್.
ಪೆಪ್ಸಿ, ಕೋಕ್ ಸೇರಿನಂಚನೆ ಸಾಫ್ಟ್ ಡ್ರಿಂಕ್ಸ್ ಬೊಕ್ಕ ಚೂಯಿಂಗ್ ಗಮ್ ಗಲಸ್ ನಗ ಕೃತಕ ಚೀಪೆ ಆಸ್ಪರ್ಟೇಮ್ ನರಮಾನಿಗ್ ಕ್ಯಾನ್ಸರ್ ಆಪಿನ ಸೊತ್ತು ಪಂದ್ ಪಟ್ಟಿ ಮಲ್ಪೆರೆ ವಿಶ್ವ ಆರೋಗ್ಯ ಸಂಸ್ಥೆ ನಿರ್ಧಾರ ಮಲ್ದ್ಂಡ್.
WHO ಕ್ಯಾನ್ಸರ್ ಸಂಶೋಧನಾ ವಿಭಾಗವಾಯಿನ ಇಂಟರ್ ನ್ಯಾಷನಲ್ ಏಜೆನ್ಸಿ ಫಾರ್ ರಿಸರ್ಚ್ ಆನ್ ಕ್ಯಾನ್ಸರ್ (IARC) ಜುಲೈ ತಿಂಗೊಲ್ಡ್ ಆಸ್ಪರ್ಟೇಮ್ ಕ್ಯಾನ್ಸರ್ ಇಪ್ಪುನವು ಪಂದ್ ಘೋಷಣೆ ಮಲ್ಪುವಂದ್ ವರದಿ ಆತ್ಂಡ್. ಭಾರತ ಸೇರಿನಂಚನೆ 90 ರ್ದ್ ಎಚ್ಚ ದೇಶಲು ನೆನ್ ಗಲಸುನೆನ್ ಅನುಮೋದನೆ ಮಲ್ದ್ಂಡ್.
ವಾಷಿಂಗ್ಟನ್: ಕಡಲ್ ದೊಲಯಿ ಟೈಟಾನಿಕ್ ಅವಶೇಷನ್ ತೂಯೆರೆ ಪೋಪಿನ ಮಾರ್ಗಗ್ ಟೈಟಾನ್‌ ಪುಡಾದ್ಂಡ್. ನೆತ್ತ ಟೈಟಾನ್‌ ಸಬ್‌ ಮರ್ಸಿಬಲ್‌ದ ಅವಶೇಷನ್ ಪಿದಯಿ ಕನದೆರ್.
ಉತ್ತರ ಅಟ್ಲಾಂಟಿಕ್‌ ದ ಮೇಲ್ಮೈರ್ದ್ 12,000 ಅಡಿರ್ದ್ ಎಚ್ಚ ಕಡಲ್ ದ ಅಡಿರ್ದ್ ಸಂಗ್ರಹ ಮಲ್ತಿನ ಅವಶೇಷನ್ ಕೆನಡಾದ ನ್ಯೂಫೌಂಡ್‌ ಲ್ಯಾಂಡ್ ದ ಸೇಂಟ್ ಜಾನ್ಸ್‌ ಡ್ ಕನತೆರ್ ಪಂದ್ ಯುಎಸ್ ಕೋಸ್ಟ್ ಗಾರ್ಡ್ ಪಂತ್ಂಡ್.
5 ಜನ ಸಾಹಸಿಲೆನ ಗಳ ಸೈಯೆರೆ ಕಾರಣ ಆಯಿನ ಈ ನೌಕೆದ ಅವಶೇಷದೊಟ್ಟಿಗೆ ನರಮಾನಿನ ಅವಶೇಷಲ ಪತ್ತೆ ಆತ್ಂಡ್ ಪಂದ್ ಕೋಸ್ಟ್ ಗಾರ್ಡ್‌ದ ಅಧಿಕಾರಿಲು ತೆರಿಪಾದೆರ್.
ಪುತ್ತೂರ್: ಪಿಕಪ್ ಬೈಕ್ ಗ್ ಗುದ್ದುದು ಬೈಕ್ ಸವಾರೆ ಜಾಗಡೇ ತೀರ್ ಪೋಯಿನ ಘಟನೆ ಪುತ್ತುರ್ ತಾಲೂಕ್ ದ ಆರ್ಯಾಪು ಗ್ರಾಮದ ಸಂಟ್ಯಾರ್ ಡ್ ನಡತ್ಂಡ್.
ಸುಳ್ಯ ತಾಲೂಕ್ ದ ಜಟ್ಟಿಪಳ್ಳ ನಿವಾಸಿ ನಾಗರಾಜ (53) ಪನ್ಪುನಾರ್ ಈ ಘಟನೆಡ್ ತೀರ್ ಪೋಯಿನಾರ್ ಪಂದ್ ತೆರಿದ್ ಬೈದ್ಂಡ್. ಪುತ್ತೂರ್ ಸಂಚಾರಿ ಪೊಲೀಸೆರ್ ಜಾಗೆಗ್ ಭೇಟಿ ಕೊರ್ದು ಕೇಸ್ ದಾಖಲ್ ಮಲ್ದೆರ್.
ಭಾರತದ ಒಂಜೇ ಒಂಜಿ ಬೊಕ್ಕ ಅಪರೂಪದ ಮಂಗೆ ಅಸ್ಸಾಂಡ್ ಪತ್ತೆ ಆತ್ಂಡ್.
ಈ ಬಗ್ಗೆ ಭಾರತೀಯ ಅರಣ್ಯ ಸೇವಾ ಅಧಿಕಾರಿ ಪರ್ವೀನ್ ಕಸ್ವಾನ್ ಮೇರ್ ವಿಡಿಯೋ ಟ್ವೀಟ್ ಮಲ್ಪುನ ಮುಖೇನ ಪೊಲಬು ಕೊರ್ತೆರ್. ಉಂದು ಹೂಲಾಕ್ ಗಿಬ್ಬನ್ ಬೊಕ್ಕ ಮನುಷ್ಯೆರೆಲೆಕ್ಕ ರಡ್ಡ್ ಕಾರ್ ಡ್ ನಡಪುಂಡು ಪಂದ್ ಟ್ವೀಟ್ ಡ್ ಬರೆತೆರ್.
ಭಾರತಡ್ ಕೇವಲ ರಡ್ಡ್ ಜಾತಿದ ಗಿಬ್ಬನ್ ಉಂಡು. ನೆಟ್ಟ್ ಪೂರ್ವ ಬೊಕ್ಕ ಪಶ್ಚಿಮ ಹೂಲಾಕ್ ಸೇರ್ ದ್ಂಡ್. ಈ ಜಾತಿದ ಮಂಗೆಲು ಭಾರೀ ಕಮ್ಮಿ ಬೊಕ್ಕ ಅಸ್ಸಾಂದ ಕಾಡ್ ಡ್ ಮಾತ್ರ ತೂಯೆರೆ ತಿಕ್ಕುಂಡು.
ಬಂಗಾರ್ ದ ಬಿಲೆಟ್ಟ್ ಕರಿನ ರಡ್ಡ್ ದಿನಟ್ಟ್ 530 ರೂ. ಕಮ್ಮಿ ಆತ್ಂಡ್.
ಇನಿ ಪ್ರತಿ 10 ಗ್ರಾಂ ದ 24 ಕ್ಯಾರೆಟ್ ಬಂಗಾರ್ ದ ಬಿಲೆ 210 ರೂ. ಕಮ್ಮಿ ಆದ್ 58,750 ರೂ. ಉಂಡು. ಅವ್ವೇ ರೀತಿ 22 ಕ್ಯಾರೆಟ್ ಬಂಗಾರ್ ದ ಬಿಲೆ 200 ರೂ. ಕಮ್ಮಿ ಆತ್ಂಡ್. ಇತ್ತೆ 53,850 ರೂ. ಉಂಡು.
ನನ ಬೊಳ್ಳಿದ ಬಿಲೆ ಕೆಜಿಗ್ 71,250 ರೂ. ಉಂಡು. ಕೋಡೆ ಬಂಗಾರ್ ದ ಬಿಲೆ 320 ರೂ. ಕಮ್ಮಿ ಆತ್ಂಡ್. ಮದಿಮೆ ಲೇಸ್ ಮುಗಿದ್ ಮರಿಯಾಲ ಸುರು ಆಯಿನೆರ್ದಾವೆರ ಬಂಗಾರ್ ದ ಬಿಲೆಟ್ಟ್ ಒಂತೆ ಕಮ್ಮಿ ಆತ್ಂಡ್.
ವಾಟ್ಯಾಪ್ ಸೇರಿನಂಚನೆ ಸೋಷಿಯಲ್ ಮೀಡಿಯಾಡ್ ಪೊಂಜೋವ್ ಲು ತನ್ನ ಪೋಟೋನ್ ಡಿಪಿಗ್ ಪಾಡಿಯೆರೆ ಬಲ್ಲಿ ಪಂದ್ ತಮಿಳ್ ನಾಡ್ ಮಹಿಳಾ ಆಯೋಗದ ಅಧ್ಯಕ್ಷೆರ್ ಎಎಸ್ ಕುಮಾರಿ ಪಂತೆರ್.
ಡಿಪಿ ಡ್ ಇಪ್ಪುನ ಪೋಟೋನ್ ಸೈಬರ್ ಅಪರಾಧಿಲು ಮಾರ್ಫಿಂಗ್ ಮಲ್ಪೆರೆ ಗಲಸುವೆರ್. ಸೈಬರ್ ಕ್ರೈಮ್ ಬಗ್ಗೆ ಪೊಂಜೋವ್ ನಕುಲು ದೂರು ಕೊರಿಯೆರೆ ಪಿರ ಜಾರೊಂದುಲ್ಲೆರ್. ಜಾಗೃತಿ ಮೂಡಿಸಾವೊನ ಅಗತ್ಯ ಉಂಡು. ಇಂಚಾದ್ ಸೋಷಿಯಲ್ ಮೀಡಿಯಾ ಗಲಸುನಗ ಪೊಂಜೋವ್ ನಕುಲು ಎಚ್ಚದ ಎಚ್ಚರಿಕೆ ಒಯಿಸೊನ್ನ ಅಗತ್ಯ ಉಂಡು ಪಂದ್ ಮೇರ್ ಲೇಸ್ ವೊಂಜೇಟ್ ಪಂತೆರ್.
ಕಾರವಾರ: ಮದಿಮೆ ಆಯೆರೆ ಪೊಣ್ಣು ತಿಕಿಜಿ ಪಂದ್ ಕೃಷಿಕೆಯೊರಿ ಬಲ್ಲ್ ಪಾಡೊಂದು ತೀರ್ ಪೋಯಿನ ಘಟನೆ ಯಲ್ಲಾಪುರಡ್ ನಡತ್ಂಡ್.
ಉತ್ತರ ಕನ್ನಡ ಜಿಲ್ಲೆದ ಯಲ್ಲಾಪುರದ ತೇಲಂಗಾರ ಕಿರಗಾರಿ ಇಲ್ಲದ ನಿವಾಸಿ ನಾಗರಾಜ್ ಗಣಪತಿ ಗಾಂವ್ಕರ್ (35) ತೀರ್ ಪೋಯಿನಾರ್.
ಕೃಷಿರ್ದ್ ಜೀವನ ಮಲ್ತೊಂದು ಇತ್ತಿನ ನಾಗರಾಜ್ ಮಾತೆರ್ಲೆಕ್ಕನೇ ತಾನ್ ಲ ಮದಿಮೆ ಆವೊಡು ಪಂದ್ ಕನ ದೀದಿತ್ತೆರ್. ಅಂಚೆನೆ ಸಂಬಂಧಿಕೆರೆಡ, ಬ್ರೋಕರ್ ಡ ಪೊಣ್ಣು ನಾಡಿಯೆರೆ ಪಂದ್ ಇತ್ತೆರ್. ಆಂಡ ಒಲ್ಪಲ ಪೊಣ್ಣು ತಿಕಂದಿನ ಕಾರಣ ಮನಸ್ ಬೇನೆಯಾದ್ ಬಲ್ಲ್ ದೆತ್ತೊಂದೆರ್ ಪಂದ್ ತೆರಿದ್ ಬೈದ್ಂಡ್.
