ಮೈಸೂರ್: ಹನುಮ ಜಯಂತಿದ ಪೊರ್ತುಡು ಬೊಡ್ಚಾಂದಿನ ಕಾರಣಗ್ ಜವನೆರ್ನ ರಡ್ಡ್ ಕೂಟದ ನಡುಟ್ಟ್ ಲಡಾಯಿ ಆದ್ ಉಂದೆಟ್ಟ್ ಯುವ ಬ್ರಿಗೇಡ್ ಕಾರ್ಯಕರ್ತನ್ ಕೆರಿನ ಘಟನೆ ಜಿಲ್ಲೆ ಟಿ.ನರಸೀಪುರ ಪೇಂಟೆಡ್ ನಡತ್ಂಡ್.
ಟಿ.ನರಸೀಪುರತ್ತ ಶ್ರೀರಾಂಪುರ ಕಾಲೋನಿ ನಿವಾಸಿ ವೇಣುಗೋಪಾಲ್ ನಾಯಕ್ (32) ತೀರ್ ಪೋಯಿನ ಕಾರ್ಯಕರ್ತೆ ಪಂದ್ ತೆರಿದ್ ಬೈದ್ಂಡ್. ಐತಾರದಾನಿ ಈ ಲಡಾಯಿ ನಡತ್‌ದಿತ್ತ್ಂಡ್. ಲಡಾಯಿ ಜಾಸ್ತಿ ಆದ್ ಕೆರ್ಪುನೆಟ್ಟ್ ಕಡೆ ಆತ್ಂಡ್. ಟಿ.ನರಸೀಪುರ ಪೊಲೀಸ್ ಠಾಣೆಡ್ ಈ ಕೇಸ್ ದಾಖಲ್ ಆತ್ಂಡ್.
ಕುಡ್ಲ: ನನದ 5 ದಿನ (ಜು.15 ಮುಟ್ಟ) ತುಳುನಾಡ್‌ದ ಕೆಲವು ಜಾಗೆಡ್ ಭಾರೀ ಬರ್ಸ ಬರ್ಪಿನ ಸಾಧ್ಯತೆ ಉಂಡು ಪಂದ್ ಭಾರತೀಯ ಹವಾಮಾನ ಇಲಾಖೆ ಎಚ್ಚೆರ್ಗೆ ಕೊರ್ತ್ಂಡ್.
ವಿಶೇಷವಾದ್ ದಕ್ಷಿಣಕನ್ನಡ, ಒಡಿಪು ಬೊಕ್ಕ ಉತ್ತರ ಕನ್ನಡ ಜಿಲ್ಲೆಡ್‌ ಭಾರೀ ಬರ್ಸ ಬರ್ಪಿನ ಮುನ್ಸೂಚನೆ ಇತ್ತ್‌ದ್, ಯಲ್ಲೋ ಅಲರ್ಟ್ ಘೋಷಣೆ ಮಲ್ತ್‌ದೆರ್.
ಒಡಿಪು: ಮುಲ್ಪದ ಸಂತೆಕಟ್ಟೆ ಕೈತಲ್ ನಿರ್ಮಾಣ ಆವೊಂದಿತ್ತಿನ ಅಂಡರ್ ಪಾಸ್ ನಿರ್ಮಾಣದ ಪ್ರದೇಶಡ್ ಸರ್ವೀಸ್ ಮಾರ್ಗ ಜರಿದ್ ಸುಮಾರ್ 350 ರ್ದ್ ಎಚ್ಚದ ಇಲ್ಲ್ ಅಂಚನೆ ಅಂಗಡಿಲೆಗ್ ಮಾರ್ಗನೆ ಇಜ್ಜಂದಿಲೆಕ್ಕ ಆತ್ಂಡ್.
ಅಂಡರ್‌ಪಾಸ್ ನಿರ್ಮಾಣದ ಕೈತಲ್‌ಡ್ ಇತ್ತಿನ ತಡೆಗೋಡೆ ಜುಲೈ 10 ತ್ತ ಸೋಮಾರ ಕಾಂಡೆ ಜರಿದ್ಂಡ್. ಉಂದೆರ್ದಾವರ ಸರ್ವೀಸ್ ರಸ್ತೆ ಬೊಕ್ಕ ರಾಷ್ಟ್ರೀಯ ಹೆದ್ದಾರಿ ಪೂರ್ತಿ ಜರಿಯುನ ಸಾಧ್ಯತೆ ಉಂಡು ಪಂದ್ ಮುಲ್ಪದ ಜನಕುಲು ಬೊಕ್ಕ ಚಿಲ್ಲರೆ ಬ್ಯಾರದ ಅಂಗಡಿದ ಮಾಲೀಕೆರ್ ತೆರಿಪಾದೆರ್.
ತುಳುನಾಡ್‌ದ ಬರವುದ ಬಿರ್ಸೆದಿ, ಅವು ಏತೊ ಬರವುದ ಗೊಂಚಿಲ್‌ಡ್ ಜನ ಮಂದೆನ್ ಗೆಂದ್‌ದ್ ತನ್ನ ಬರವುಗೇ ಬೊಟ್ಟ ದೀದ್ ದೇವೆರೆ ಪಾದ ಸೇರ್ದಿನ ಶ್ವೇತಾ ಕಜೆ ಮೆರೆನ ಕಡೆತ್ತ ಬರವು ದಯಾ ಕ್ರಿಯೇಷನ್‌ದ ಮುಖೇನ ಮಾತೃ ಸ್ವರೂಪಿಣಿ ಪನ್ಪಿನ ದುರ್ಗಾಪರಮೇಶ್ವರೀ ಅಪ್ಪೆನ ತುಳು ಭಕ್ತಿಸುಗಿಪು ಜುಲೈ 7 ಸುಕ್ರಾರ ಬಯ್ಯಗ್ 6 ಗಂಟೆಗ್ ಶ್ರೀ ಕ್ಷೇತ್ರ ಕಟೀಲ್ ಡ್ ಗಣ್ಯೆರೆನ ಉಪಸ್ಥಿತಿಡ್ ಬಿಡುಗಡೆ ಆಂಡ್.
ಈ ಭಕ್ತಿ ಸುಗಿಪುನ್ ಶ್ರೀ ಲಕ್ಷ್ಮೀ ನಾರಾಯಣ ಅಸ್ರಣ್ಣೆರ್ ಬುಡುಗಡೆ ಮಲ್ತ್‌ದ್ ಆಶೀರ್ವಾದ ಮಲ್ತೆರ್. ಮಲ್ಲ ಬಿನ್ನೆರಾದ್ ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿದ ನಿಕಟ ಪೂರ್ವ ಅಧ್ಯಕ್ಷೆರ್ ದಯಾನಂದ ಜಿ ಕತ್ತಲ್‌ಸಾರ್ ಪಾಲ್ ಪಡೆದಿತ್ತೆರ್. ಈ ಪೊರ್ತುಡು ದಯಾನಂದ ಅಮೀನ್ ಬಾಯಾರ್, ಗಾಯಕಿ ಪ್ರಸಿದ್ಧ ರಾವ್ ಧರ್ಮಸ್ಥಳ, ಕಿಶೋರ್ ಬೆಳ್ತಂಗಡಿ, ಗಣೇಶ್ ಬೊಂಡಾಲ, ರಮಾನಂದ ಪೂಜಾರಿ ಕಟೀಲ್, ಗಣೇಶ್ ಪೆರ್ಮುದೆ ಇತ್ತೆರ್.
ಪ್ರಸಿದಾ ರಾವ್ ಧರ್ಮಸ್ಥಳ ಗಾಯನ, ಅಭಿನಯಡ್, ಕಿಶೋರ್ ಬೊಲ್ತೇರ್ ಛಾಯಾಗ್ರಹಣ ಬೊಕ್ಕ ಸಂಕಲನಡ್, ದಯಾನಂದ ಅಮೀನ್ ಬಾಯಾರು ಸಮಗ್ರ ನಿರ್ವಹಣೆಡ್ ಈ ತುಳು ಭಕ್ತಿಸುಗಿಪು ದಯಾ ಕ್ರಿಯೇಷನ್ ಯೂಟ್ಯೂಬ್ ಚಾನೆಲ್ ಡ್ ಬುಡುಗಡೆ ಆತ್ಂಡ್.
ಕುಡ್ಲ : ಶ್ರೀ ನಾರಾಯಣ ಗುರು ಯುವ ವೇದಿಕೆ (ರಿ.) ದ 24ನೇ ವರ್ಷದ ಬ್ರಹ್ಮಶ್ರೀ ಬಂಗಾರದ ಪದಕ ಪ್ರದಾನ, ಕಲ್ಪಾರ್ಥಿ ವೇತನ, ಸಾಧಕೆರೆಗ್ ಮಾನಾದಿಗೆದ ಲೇಸ್ (ಜು.7) ಇನಿ ಬೊಲ್ಪುಗು ಕುಡ್ಲ ಪುರಭವನಡ್ ನಡಪರೆ ಉಂಡು.
ಕರ್ನಾಟಕ ವಿಧಾನಸಭೆತ್ತ ಸಭಾಧ್ಯಕ್ಷೆರ್ ಯು.ಟಿ ಖಾದರ್ ಫರೀದ್ ಈ ಲೇಸ್ ಉದಿಪನ ಮಲ್ಪುವೆರ್. ನೆತ್ತ ಗುರ್ಕಾರ್ಮೆನ್ ನಾರಾಯಣ ಗುರು ಯುವ ವೇದಿಕೆದ ಅಧ್ಯಕ್ಷೆರ್ ಬೃಜೇಶ್ ಅಂಚನ್ ಒಯಿಸೊನ್ವೆರ್. ವಿಧಾನ ಪರಿಷತ್ ಸದಸ್ಯೆರ್ ಬಿ.ಕೆ ಹರಿಪ್ರಸಾದ್ ಬ್ರಹ್ಮಶ್ರೀ ಬಂಗಾರದ ಪದಕ ಪ್ರದಾನ ಮಲ್ಪರೆ ಉಲ್ಲೆರ್. ಕುಡ್ಲ ಶಿರ್ಡಿ ಬಾಬಾ ರಿಯಲ್ ಎಸ್ಟೇಟ್ ದ ಧಣಿ ರತೀಂದ್ರನಾಥ ಹೆಚ್ ಈ ಪದಕದ ಪ್ರಾಯೋಜಕೆರಾತೆರ್. ಶಾಸಕೆರ್ ವೇದವ್ಯಾಸ ಕಾಮತ್, ಮಾಜಿ ಸಚಿವೆರ್ ವಿನಯ ಕುಮಾರ್ ಸೊರಕೆ ಕಲ್ಪಾರ್ಥಿ ವೇತನನ್ ಪಟ್ಟುವೆರ್. ಆತ್ಮಶಕ್ತಿ ಪ್ರಧಾನ ಸಂಪಾದಕೆರ್, ಶಿಕ್ಷಣ ತಜ್ಞೆರ್ ವಾಮನ ಕೆ ಮೆರೆಗ್ ತಮ್ಮನ ಮಲ್ಪರೆ ಉಲ್ಲೆರ್.
ಮಲ್ಲ ಬಿನ್ನೆರಾದ್ ಮಾಜಿ ಸಚಿವೆರ್ ಕೃಷ್ಣ ಜೆ.ಪಾಲೆಮಾರ್, ಪನಾಮ ಕಾರ್ಪೊರೇಷನ್ ಸಿಇಒ ವಿವೇಕ್ ರಾಜ್ ಪೂಜಾರಿ, ಎಸಿಪಿ ಮಹೇಶ ಕುಮಾರ್, ಅಖಿಲ ಭಾರತ ಬಿಲ್ಲವರ ಮಹಿಳಾ ಸಂಘದ ಅಧ್ಯಕ್ಷೆರ್ ಸುಮಲತಾ ಯನ್ ಸುವರ್ಣ, ಕುದ್ರೋಳಿ ಶ್ರೀ ಗೋಕರ್ಣನಾಥ ಕ್ಷೇತ್ರದ ಕೋಶಾಧಿಕಾರಿ, ಗುರುಬೆಳದಿಂಗಳು ಚೇರ್ ಮೆನ್ ಪದ್ಮರಾಜ್ ಆರ್, ದಿವ್ಯದೀಪ ಕನ್ಸ್ ಟ್ರಕ್ಸನ್ಸ್ ದ ಧಣಿ ಯಾದವ್ ಕೋಟ್ಯಾನ್, ರಾಣಿ ಅಬ್ಬಕ್ಕ ಅಕಾಡೆಮಿದ ತರಬೇತಿ ಅಧಿಕಾರಿ ಕ್ಯಾಪ್ಟನ್ ದಾಸಪ್ಪ ಪೂಜಾರಿ ನೆಕ್ಕಿಲಾರ್ ಪಾಲ್ ಪಡೆಯೆರೆ ಉಲ್ಲೆರ್. ಅಂಚೆನೆ 9 ಗಂಟೆರ್ದ ಮರಿಯಲದ ಮಿನದನ ಸಾಂಸ್ಕೃತಿಕ ಲೇಸ್ ನಡಪರೆ ಉಂಡು. ಮಧ್ಯಾಹ್ನ ವನಸ್ ದ ವ್ಯವಸ್ಥೆ ಉಂಡು ಪಂದ್ ಲೆಪ್ಪೋಲೆಡ್ ತೆರಿಪಾದೆರ್.
ಬೊಲ್ತೇರ್: ಶ್ರೀಕ್ಷೇತ್ರ ಧರ್ಮಸ್ಥಳಗ್ ದಕ್ಷಿಣ ಕನ್ನಡ ಜಿಲ್ಲಾ ಉಸ್ತುವಾರಿ ಸಚಿವೆರ್, ಆರೋಗ್ಯ ಸಚಿವೆರ್ ದಿನೇಶ್ ಗುಂಡೂರಾವ್ ಭೇಟಿ ಕೊರ್ತೆರ್.
ಕೋಡೆ ರಾತ್ರೆನೇ ಧರ್ಮಸ್ಥಳಗ್ ಬತ್ತ್ ದ್ ವಾಸ ಇತ್ತಿನ ಮೇರ್ ಇನಿ ಬೊಲ್ಪುಗು ಧರ್ಮಸ್ಥಳದ ಧರ್ಮಾಧಿಕಾರಿ ಡಾ. ವೀರೇಂದ್ರ ಹೆಗ್ಗಡೆರೆನ್ ಭೇಟಿ ಮಲ್ತ್ ದ್ ದೇವೆರೆನ ದರ್ಶನ ಪಡೆತೆರ್.
ಈ ಪೊರ್ತುಡು ಮೆರೆನೊಟ್ಟಿಗೆ ವಿಧಾನ ಪರಿಷತ್ ಸದಸ್ಯೆರ್ ಹರೀಶ್ ಕುಮಾರ್ ಬೊಕ್ಕ ಕಾಂಗ್ರೆಸ್ ಮುಖಂಡೆರ್ ರಕ್ಷಿತ್ ಶಿವರಾಂ ಇತ್ತೆರ್.
ಕುಡ್ಲ: ದಕ್ಷಿಣ ಕನ್ನಡ ಜಿಲ್ಲಾ ಅಪರ ಜಿಲ್ಲಾಧಿಕಾರಿಯಾದ್ ಡಾ.ಸಂತೋಷ ಕುಮಾರ್ ಮೇರ್ ನೇಮಕ ಆತೆರ್.
ದ.ಕ.ಜಿಲ್ಲಾ ಅಪರ ಜಿಲ್ಲಾಧಿಕಾರಿ ಆದಿತ್ತಿನ ಎಚ್.ಕೃಷ್ಣಮೂರ್ತಿ ವರ್ಗಾವಣೆ ಆಯಿನ ಕಾರಣ ಮೆರೆನ ಜಾಗೆಗ್ ಚಿಕ್ಕಬಳ್ಳಾಪುರದ ಉಪವಿಭಾಗಾಧಿಕಾರಿ ಆದಿತ್ತಿನ ಸಂತೋಷ್ ಮೆರೆನ್ ನೇಮಕ ಮಲ್ಪರೆ ಸರಕಾರ ಸುಕ್ರಾರ ಆದೇಶ ಕೊರ್ತುಂಡು.
ಬೆಂಗ್ಲೂರ್: ಗೃಹ ಲಕ್ಷ್ಮೀ ಯೋಜನೆಗ್ ಅರ್ಜಿ ಸಂದಾವುನ ಪ್ರಕ್ರಿಯೆ ಜುಲೈ 16 ರ್ದ್ ಸುರು ಆಪುಂಡು.
ಆಗಸ್ಟ್‌ 15 ಅತ್ತಂಡ 16 ಕ್ಕ್ ನಿಕ್ಲೆನ ಎಕೌಂಟ್ ಗ್ ಕಾಸ್ ಬರ್ಪುಂಡು ಪಂದ್ ಸಿಎಂ ಸಿದ್ದರಾಮಯ್ಯೆರ್ ತೆರಿಪಾದೆರ್.
ಮೇರ್ ಸುಕ್ರಾರ ಬಜೆಟ್‌ ಮಂಡನೆದ ಬೊಕ್ಕ ಪಾತೆರ್ದ್, ಈ ಬಜೆಟ್‌ ಐನ್ ಗ್ಯಾರಂಟಿಲು ಬೊಕ್ಕ ಎಂಕ್ಲೆನ ವೋಟುದ ಪ್ರಣಾಳಿಕೆಡ್ ತೆರಿಪಾಯಿನ ಭರವಸೆಲು ಉಂಡು. ಉಂದು ಗ್ಯಾರಂಟಿ ಬಜೆಟ್‌ ಆತ್ಂಡ್ ಪಂದ್ ಪಂಡೆರ್.
ವಿಟ್ಲ: ಜವನೆಯೊರಿ ಬಲ್ಲ್ ಪಾಡೊಂದು ತೀರ್ ಪೋಯಿನ ಘಟನೆ ವಿಟ್ಲಡ್ ನಡತ್ಂಡ್.
ಪ್ರಶಾಂತ್ ಮೇಗಿನಪೇಟೆ (30) ತೀರ್ ಪೋಯಿನಾರ್. ಮೇರ್ ಸರಕಾರಿ ಆಸ್ಪತ್ರೆಡ್ ಡಿ ಗ್ರೂಪ್ ಡ್ ಬೇಲೆ ಮಲ್ತೊಂದು ಇತ್ತೆರ್. ಮೆರೆಗ್ ಬೊಡೆದಿ ಬೊಕ್ಕ ಬಾಲೆ ಉಲ್ಲೆರ್.
ಟ್ವಿಟರ್ ಡ್ ನಕಲಿ ಎಕೌಂಟ್ ಡ್ ತುಳುನಾಡ್ ದ ದೈವಾರಾಧನೆನ್ ನಿಂದನೆ ಬೊಕ್ಕ ಪೊಂಜೋವ್ ನಕ್ಲೆನ ಬಗ್ಗೆ ಬೊರ್ಚಂದಿನ ಪೋಟೋನ್ ಪೋಸ್ಟ್ ಮಲ್ತಿನ ಕೇಸ್ ದ ಆರೋಪಿನ್ ಸೆನ್ ಕ್ರೈಮ್ ಪೊಲೀಸೆರ್ ಅರೆಸ್ಟ್ ಮಲ್ದೆರ್.
ಬೆಂಗಳೂರು ಉತ್ತರ ತಾಲೂಕು ಅಮೃತಹಳ್ಳಿ ನಿವಾಸಿ ಶಿವರಾಜ್ ಎಚ್. ಕೆ (37) ಆರೋಪಿ.
ಈ ಬಗೆಟ್ಟ್ ತುಳುನಾಡ್ ದ ದೈವಾರಾಧನೆ ಸಂರಕ್ಷಣಾ ಯುವ ವೇದಿಕೆ (ರಿ.) ದಕುಲು ಸೆನ್ ಕ್ರೈಮ್ ಪೊಲೀಸೆರೆಗ್ ದೂರು ಕೊರ್ದಿತ್ತೆರ್. ಅಂಚನೆ ಪೊಲೀಸೆರ್ ಕ್ರೈಮ್ ಪೊಲೀಸ್ ಠಾಣೆಡ್ ಕೇಸ್ ದಾಖಲ್ ಮಲ್ತ್ ಇತ್ತೆರ್.
ಆರೋಪಿನ್ ಕುಡ್ಲದ 7ನೇ ಜೆ.ಎಂ.ಎಫ್.ಸಿ ಕೋರ್ಟ್ ಹಾಜರ್ ಮಲ್ದೆರ್.
ಈ ಕೇಸ್ ದ ಆರೋಪಿನ್ ಪತ್ತುನ ಬೇಲೆಡ್ ಕುಡ್ಲ ಪೇಂಟೆದ ಪೊಲೀಸ್ ಆಯುಕ್ತೆರ್ ಕುಲದೀಪ್ ಕುಮಾರ್ ಆರ್ ಜೈನ್, ಸಿಸಿಬಿ ಘಟಕದ ಎಸಿಪಿ ಆಯಿನ ಪಿಎ ಹೆಗ್ಡೆ, ಕುಡ್ಲ ಪೇಂಟೆದ ಸೆನ್ ಕ್ರೈಮ್ ಪೊಲೀಸ್ ಠಾಣೆದ ಪೊಲೀಸ್ ಇನ್ಸ್ ಪೆಕ್ಟರ್ ಸತೀಶ್ ಎಂಪಿ ಬೊಕ್ಕ ಸಿಬ್ಬಂದಿಲು ಇತ್ತೆರ್.
