ಎಕ್ಲೆನ ಬೇತೆ ಬೇತೆ ಬೇಡಿಕೆನ್ ರಾಜ್ಯ ಸರ್ಕಾರ ನ.15 ತ್ತೊಲಯಿ ಈಡೇರಿಸಾಯಿಜಿಂಡ ನ.16 ರ್ದ್ ಬಿಸಿಯೂಟ ತಯಾರಿ ಮಲ್ಪುನೆನ್ ಉಂತಾವ ಪಂದ್ ಅಕ್ಷರ ದಾಸೋಹ ಯೋಜನೆದ ಬಿಸಿಯೂಟ ತಯಾರಕೆರೆನ ಸಂಘ ಎಚ್ಚರಿಕೆ ಕೊರ್ತುಂಡು.
ಕರಿನ ಅ.30 ರ್ದ್ ಬೆಂಗ್ಲೂರ್ ದ ಸ್ವಾತಂತ್ರ್ಯ ಉದ್ಯಾನಡ್ ಪ್ರತಿಭಟನೆ ಮಲ್ತೊಂದು ಇಪ್ಪುನ ನೌಕರೆರ್, ನ.12 ರ್ದ್ ತುಡರ್ ಪರ್ಬ ಇಪ್ಪುರ್ನೆದಾವೆರ ನ.10 ಮುಟ್ಟ ಧರಣಿ ನಡಪಾದ್, ಆವೆರ್ದ್ ಬೊಕ್ಕ ಊರುಗು ಪೋಪೆರ್ ಪಂದ್ ವರದಿ ಆತ್ಂಡ್.
ಬೆಂಗ್ಲೂರ್ SMS ಫ್ಯಾಮಿಲಿ ಅಟ್ಟಣೆ ಮಲ್ತಿನ SMS TROP HY-2023ದ ಲೆಕ್ಕೊಡು ವಾಲಿಬಾಲ್ ಬೊಕ್ಕ ತ್ರೋಬಾಲ್ ಮ್ಯಾಚ್ ಡ್ ಬಡಪತ್ತ್ ದ ಕ್ರೀಡಾಪಟುಲೆಗ್ ಉತ್ತೇಜನ ಕೊರ್ಪುನ ದಿಟ್ಟಿಡ್ ಸ್ಪಂದನ ಚಾರಿಟೇಬಲ್ ಟ್ರಸ್ಟ್ ದ ವಾಲಿಬಾಲ್ ಕೂಟ ಪಾಲ್ ಪಡೆತ್ಂಡ್.
ಬೆಂಗ್ಲೂರ್ ಸ್ಪಂದನ ಚಾರಿಟೇಬಲ್ ಟ್ರಸ್ಟ್ (ರಿ.) ಕರಿನ 5 ವರ್ಷೊದಿಂಚ ಪ್ರತಿ ಮೂಜಿ ತಿಂಗೊಲ್ ಗೊರ ಒಂಜೊಂಜೇ ಯೋಜನೆನ್ ದಕ್ಷಿಣ ಕನ್ನಡ ಬೊಕ್ಕ ಒಡಿಪು ಜಿಲ್ಲೆದ ಬಡಪತ್ತ್ ಜನಕ್ಲೆನ ಏಳಿಗೆಗಾದ್ ಎಡ್ಡೆ ಮನಸ್ಸ್ ರ್ದ್ ಬೆನೊಂದು ಉಂಡು.
ನೇಜಾರು ಶ್ರೀ ಭಗವತೀ ತೀಯಾ ಮಹಿಳಾ ಸಂಘದ ದಶಮಾನೋತ್ಸವದ ಲೆಕ್ಕೊಡು ಸಸಿಹಿತ್ಲು ಶ್ರೀ ಭಗವತೀ ಪ್ರಸಾದಿತ ದಶಾವತಾರ ಯಕ್ಷಗಾನ ಮಂಡಳಿದಕ್ಲೆರ್ದ್ ಶ್ರೀ ಭಗವತೀ ಮಹಾತ್ಮೆ ಆಟ ನ.26 ಐತಾರ ರಾತ್ರೆ ತೋನ್ಸೆ ಗುಡ್ಯಾಂ ಶ್ರೀ ಭದ್ರಕಾಳಿ ಮಹಾ ಮಾರಿಕಾಂಬಾ ದೇವಲ್ಯದ ಚಾವಡಿಡ್ ನಡಪರೆ ಉಂಡು.
ಅಂಚೆನೆ ಆಟದ ಲೆಕ್ಕೊಡು ರಾತ್ರೆ ನುಪ್ಪು ಪ್ರಸಾದ ಸೇವೆ ಉಂಡು. ಕಲಾಭಿಮಾನಿಲು ಮಾತೆರ್ಲಾ ಬತ್ತ್ ದ್, ಈ ಆಟನ್ ಪೊರ್ಲು ಮಲ್ತ್ ದ್ ಕೊರೊಡು, ಬೊಕ್ಕ ಶ್ರೀ ಭಗವತೀ ಅಪ್ಪೆನ ಕೃಪೆಗ್ ಪಾತ್ರರಾವೊಡು ಪಂದ್ ನೇಜಾರು ಭಗವತೀ ತೀಯಾ ಮಹಿಳಾ ಸಂಘದ ಗುರ್ಕಾರೆ, ಒತ್ತು ಗುರ್ಕಾರೆ, ಸರ್ವಸದಸ್ಯೆರ್ ಬೊಕ್ಕ ಸಸಿಹಿತ್ಲು ಶ್ರೀ ಭಗವತೀ ದೇವಲ್ಯದ ಆಡಳಿತ ಮೊಕ್ತೇಸರೆರ್ ರಾಮಣ್ಣ ಮಾಸ್ತರ್ ಬೊಕ್ಕ ತರ್ಪಿದ ಗುರಿಕಾರೆರ್ ಲೆಪ್ಪೋಲೆಡ್ ತೆರಿಪಾದೆರ್.
ಡೆಲ್ಲಿ ಹೈಕೋರ್ಟುಗು ಸಿಜೆ ಸತೀಶ್ ಚಂದ್ರ ಶರ್ಮಾ, ರಾಜಸ್ಥಾನಗ್ ಸಿಜೆ ಆಗಸ್ಟಿಸ್ ಬೊಕ್ಕ ಗುವಾಹಟಿಗ್ ಸಿಜೆ ಸಂದೀಪ್ ಮೊಕ್ಲೆನ್ ಜಡ್ಜ್ ಆದ್ ನೇಮಕ ಮಲ್ಪೊಡು ಪಂದ್ ಕೊಲಿಜಿಯಂ ಶಿಫಾರಸು ಮಲ್ದ್ಂಡ್. ಮೊಕ್ಲೆನ ನೇಮಕಕಗ್ ಕೇಂದ್ರ ಒಪ್ಪಿಗೆ ಕೊರ್ಂಡ ಸುಪ್ರೀಂ ಕೋರ್ಟುಡ್ ಜಡ್ಜ್ ಲೆನ ಸಂಖ್ಯೆ 34 ಆಪುಂಡು.
ಕುಡ್ಲ: ತುಳು ಪಿಕ್ಚರ್ ದ ನಿರ್ಮಾಪಕೆರೆನ ಸಂಘದ ಪೊಸ ಗುರ್ಕಾರೆಯಾದ್ ನಿರ್ಮಾಪಕೆರ್ ಡಾ| ಆರ್. ಧನರಾಜ್ ಅವಿರೋಧವಾದ್ ಆಯ್ಕೆ ಆತೆರ್.
ಕುಡ್ಲಡ್ ಆಯೋಜನೆ ಮಲ್ತಿನ ತುಳು ಚಲನಚಿತ್ರ ನಿರ್ಮಾಪಕೆರೆನ ಸಂಘದ ಸಭೆಟ್ಟ್ ಈ ಆಯ್ಕೆ ಪ್ರಕ್ರಿಯೆ ನಡತ್ಂಡ್.
ಒತ್ತು ಗುರ್ಕಾರೆಯಾದ್ ಪ್ರವೀಣ್ ಕೊಂಚಾಡಿ, ಪ್ರಧಾನ ಕಾರ್ಯದರ್ಶಿಯಾದ್ ಕಿಶೋರ್ ಡಿ. ಶೆಟ್ಟಿ, ಕೋಶಾಧಿಕಾರಿಯಾದ್ ಪ್ರಕಾಶ್ ಪಾಂಡೇಶ್ವರ್, ಜತೆ ಕಾರ್ಯದರ್ಶಿಯಾದ್ ಸಚಿನ್ ಎ. ಎಸ್‌. ಉಬಾರ್ ಆಯ್ಕೆ ಆಯೆರ್. ಬೊಕ್ಕ ಕಾರ್ಯಕಾರಿ ಸಮಿತಿದ ಸದಸ್ಯೆರಾದ್ ವಿಜಯಕುಮಾರ್ ಕೊಡಿಯಾಲ್ ಬೈಲ್, ದೇವದಾಸ್ ಕಾಪಿಕಾಡ್, ಸವಿತಾ ಚೌಟ, ಕೃಷ್ಣಪ್ಪ ಉಳ್ಳೂರು, ಪಮ್ಮಿ ಕೊಡಿಯಾಲ್ ಬೈಲ್, ಬಾಳ ಜಗನ್ನಾಥ ಶೆಟ್ಟಿ, ಪ್ರೀತಮ್ ಸಾಗರ್ ಆಯ್ಕೆ ಆಯೆರ್.
ವಕೀಲೆ ಮೋಹನ್‌ ದಾಸ್ ಮೇರ್ ಆಯ್ಕೆ ಪ್ರಕ್ರಿಯೆ ನಡಪಾಯೆರ್. ಬೊಕ್ಕ ಚರ್ಚೆ ಸಭೆಟ್ಟ್ ತುಳು ಪಿಕ್ಚರ್ ದ ಚಿತ್ರ ನಿರ್ಮಾಪಕೆರೆಗ್ ಬೋಡಾಯಿನ ಸವಲತ್ತುದ ಬಗೆಟ್ಟ್ ಚರ್ಚೆ ನಡತ್ಂಡ್. ಅವೆರ್ದ್ ಬೊಕ್ಕ ಮಲ್ಟಿಪ್ಲೆಕ್ಸ್‌ಡ್ ತುಳು ಪಿಕ್ಚರ್ ಗ್ ಕೊರ್ಪುನ ಶೇಕಡಾವಾರು ಬೊಕ್ಕ ಸಬ್ಸಿಡಿದ ಬಗೆಟ್ಟ್ ನಿರ್ಮಾಪಕೆರ್ ಅಭಿಪ್ರಾಯ ತೆರಿಪಾಯೆರ್. ಈ ಪೊರ್ತುಡು ತಮ್ಮ ಲಕ್ಷ್ಮಣ್, ಗಂಗಾಧರ ಶೆಟ್ಟಿ ಅಳಕೆ, ಶರ್ಮಿಳಾ ಕಾಪಿಕಾಡ್, ಅಶ್ವಿನಿ ಪ್ರಕಾಶ್, ಮುಕೇಶ್ ಹೆಗ್ಡೆ, ಅಶ್ವಿತ್ ಕೊಟ್ಟಾರಿ, ಸಂದೇಶ್ ಬಂಗೇರ, ಭರತ್ ಭಂಡಾರಿ ಬಾರ್ಕೂರ್ ಸತೀಶ್ ಪೂಜಾರಿ ಪಾಲ್ ಪಡೆದಿತ್ತೆರ್.
ಕಾರ್ಲ: ನಂದಳಿಕೆ ಇಂಚರ ಸೇವಾ ಬಳಗ (ರಿ.) ದ ಮುತಾಲಿಕೆಡ್ ಒಂಜಿ ಬಡಪತ್ತ್ ಕುಟುಂಬಗ್ ಪನವುದ ಸಕಾಯನ್ ಮಲ್ತೆರ್.
ಮಲ್ಪೆ ಬೆಂಗ್ರೆ ನಿವಾಸಿ ವಿತೇಶ್ ಮೇರ್ ರಡ್ಡ್ ಕಿಡ್ನಿ ಸಮಸ್ಯೆರ್ದ್ ಇತ್ತೆ ಬೆಂಗ್ಲೂರ್ ದ ಫೋರಿಸ್ಟ್ ಆಸ್ಪತ್ರೆಡ್ ಚಿಕಿತ್ಸೆ ಪಡೆವೊಂದು ಉಲ್ಲೆರ್. ಮೆರೆನ ಚಿಕಿತ್ಸೆಗ್ 16 ಲಕ್ಷದ ಅವಶ್ಯಕತೆ ಉಂಡು ಪಂದ್ ವೈದ್ಯೆರ್ ತೆರಿಪಾದೆರ್. ಅಂಚಾದ್ ಈ ಕುಟುಂಬ ನಂದಳಿಕೆ ಇಂಚರ ಸೇವಾ ಬಳಗಗ್ ಬಿನ್ನಾಪು ಮಲ್ದ್ಂಡ್. ಈ ಬಿನ್ನಾಪುಗ್ ಸ್ಪಂದಿಸಾಯಿನ ಈ ಕೂಟ 15,000/- ರೂ.ದ ಚೆಕ್ಕ್ ನ್ ಅಕ್ಷತಾ ದಿನೇಶ್ ಮೆರೆನ ಮುಖೇನ ಕೊರ್ತುಂಡು.
ಈ ಪೊರ್ತುಡು ಕೂಟದ ಗುರ್ಕಾರೆ ದೀಕ್ಷಿತ್ ದೇವಾಡಿಗ ನಂದಳಿಕೆ, ಒತ್ತು ಗುರ್ಕಾರ್ದಿ ಸಂಯುಕ್ತ ಬಿ. ಪರ್ಕಳ, ಕೈತಲ್ ದಕುಲಾಯಿನ ಕೀರ್ತಿ ಕುಮಾರ್ ಇತ್ತೆರ್.
ಉಪ್ಪು ಜಾಸ್ತಿ ತಿನ್ಪುನೆರ್ದ್ ಟೈಪ್-1 ಮಧುಮೇಹ ಬರ್ಪುಂಡು ಪಂದ್ ಅಮೆರಿಕದ ಲಾಸ್ ಏಂಜಲೀಸ್ ದ ಟುಲೇನ್ ವಿಶ್ವವಿದ್ಯಾಲಯ ನಡಪಾಯಿನ ಸಂಶೋಧನೆ ತೆರಿಪಾದ್ಂಡ್.
ಸುಮಾರ್ ವರ್ಷೊ ಮುಟ್ಟ ಬೇತೆ ಬೇತೆ ದೇಶದ 4 ಲಕ್ಷ ಜನನ್ ಸಮೀಕ್ಷೆ ಮಲ್ಪುನಗ ಉಂದು ಗೊತ್ತಾತ್ಂಡ್. ಉಪ್ಪು ತಿನ್ಪುನೆರ್ದ್ ಎಂಚ ಸಕ್ಕರೆ ಕಾಯಿಲೆ ಬರ್ಪುಂಡು ಪನ್ಪುನ ಬಗೆಟ್ಟ್ ಒವ್ವೇ ಸರಿಯಾಯಿನ ಕಾರಣ ಇಜ್ಜಿ. ಆಂಡ ಉಪ್ಪುರ್ದ್ ಬೊಜ್ಜು ಬೊಕ್ಕ ಚರ್ಬಿ ಎಚ್ಚಾಪುನವು ಸಕ್ಕರೆ ಸೀಕ್ ಬರಿಯೆರೆ ಕಾರಣ ಆದಿಪ್ಪು ಪಂದ್ ವರದಿ ಆತ್ಂಡ್.
ಉಬಾರ್: ಕಲ್ಪಾರ್ಥಿ ಒರಿ ಹಾರ್ಟ್‌ ಆಟ್ಯಾಕ್‌ಡ್‌ ತೀರ್‌ಪೋಯಿನ ಘಟನೆ ಉಬಾರ್ ಕೈತಲ್‌ದ ನೆಲ್ಯಾಡಿದ ಕೌಕ್ರಾಡಿದಲ್ಪ ನಡತ್ಂಡ್. ತೀರ್‌ಪೋಯಿನ ಕಲ್ಪಾರ್ಥಿ ಕೌಕ್ರಾಡಿ ಶಾಂತಿ ಬೆಟ್ಟು ನಿವಾಸಿ ಯೂಸುಫ್ ಅರೆನ ಮಗೆ ಮಹಮ್ಮದ್ ಇರ್ಫಾನ್ (18) ಪಂದ್ ತೆರಿದ್‌ ಬೈದ್‌ಂಡ್.
ಇರ್ಫಾನ್ ಎ.ಸಿ ಮೆಕ್ಯಾನಿಕ್ ಕಲ್ತೊಂದು ಇತ್ತ್‌ದ್‌, ಮೇರೆಗ್‌ ಪೊಪ್ಪ, ಅಮ್ಮ, ಅಣ್ಣೆ, ಬೊಕ್ಕ ಮೂಜಿ ಜನ ಅಕ್ಕನಕುಲು ಉಲ್ಲೆರ್.
ಒಡಿಪು ಜಿಲ್ಲೆಡ್ ಅಂಗಾರೆ ಬೊಕ್ಕ ಬುದಾರ ಅಕ್ಷರದಾಸೋಹ ಬೇಲೆದಕುಲು ಸುಮಾರ್ ಬೇಡಿಕೆಲೆನ್ ದೀವೊಂದು ಅವೆನ್ ಈಡೇರಿಪೊಡು ಪನ್ದ್ ಬಂದ್‌ಗ್ ಲೆಪ್ಪು ಕೊರ್ತೆರ್.
ಉಂದೆರ್ದಾವರ ಕೆಲವು ಶಾಲೆಲೆಡ್ ಮದ್ಯಾನದ ವನಸ್‌ಗ್ ತಾಪತ್ರ ಬರು. ಅಕ್ಷರದಾಸೋಹ ಬೇಲೆದಕುಲು ಸ್ಟ್ರೈಕ್ ಮಲ್ತ್ಂಡಲಾ ಜೋಕುಲೆಗ್ ತೊಂದರೆ ಆವಂದಿಲೆಕ್ಕ ಮದ್ಯಾಹ್ನದ ವನಸ್ ರೆಡಿ ಮಲ್ಪೊಡು ಪನ್ದೇ ಶಾಲೆಲೆಗ್ ಆದೇಶ ಕೊರ್ತುಂಡು ಪನ್ದ್ ಅಧಿಕಾರಿ ಒರಿ ತೆರಿಪಾದೆರ್.
ಸಂಬಲ ಎಚ್ಚ ಮಲ್ಪೊಡು ಅಂಚೆನೆ ಬೇತೆ ಬೇತೆ ಸೌಲಭ್ಯ ಕೊರೊಡು ಪನ್ದ್ ಪ್ರತಿಭಟನೆ ಮಲ್ಪರೆ ಅಕ್ಷರ ದಾಸೋಹ ಬೇಲೆದಕುಲು ದುಂಬು ಬೈದೆರ್.
ಪುತ್ತೂರು : ಪುತ್ತೂರು ಪೇಂಟೆಡ್‌ ಸೋಮವಾರ ನಡುರಾತ್ರೆ ನಡತ್ತಿನ ಪುಗರ್ತೆದ ಕಲ್ಲೇಗ ಟೈಗರ್ಸ್‌ ಕೂಟದ ಮುಖ್ಯಸ್ಥೆ ಅಕ್ಷಯ್ ಕಲ್ಲೇಗ ಮರ್ಡರ್‌ ಕೇಸ್‌ದ ಮೂಜಿನೇ ಆರೋಪಿನ್‌ ಪೊಲೀಸೆರ್‌ ಅರೆಸ್ಟ್ ಮಲ್ತ್ದೆರ್.
ಮಂಜುನಾಥ್‌ ಅರೆಸ್ಟ್ ಆಯಿನ ಮೂಜಿನೇ ಆರೋಪಿ, ಚೇತನ್‌ ಬೊಕ್ಕ ಮನೀಶ್‌ ಇನಿ ಕಾಂಡೆನೆ ಪೋದು ಸರೆಂಡರ್‌ ಆದಿತ್ತೆರ್ ಸೋಮವಾರ ಬಯ್ಯಗ್‌ ಆಯಿನ ಒಂಜಿ ಆಕ್ಸಿಡೆಂಟ್‌ದ ವಿಚಾರವಾದ್ ಅಕ್ಷಯ್ ಬೊಕ್ಕ ಆರೋಪಿಲೆನ ನಡುಟ್ಟು ಪಾತೆರಕತೆ ಆದಿತ್‌ಂಡ್.
ಆಕ್ಸಿಡೆಂಟ್‌ಡ್‌ ಆಯಿನ ನಷ್ಟದ ಕಾಸ್‌ದ ಬಗೆಟ್‌ ಪಾತೆರಿಯರೆ ಪಂದ್ ಆರೋಪಿಲು ಅಕ್ಷಯ್‌ನ್ ರಾತ್ರೆ 11.30 ಗಂಟೆಗ್ ಕುಡೊರ ಲೆತ್ತ್‌ದ್‌ ಇತ್ತೆರ್ ಪಂದ್ ತೆರಿದ್‌ ಬೈದ್‌ಂಡ್. ಪಾತೆರಕತೆ ಜೋರ್‌ ಜೋರ್‌ ಆದ್ ಆ ಪೊರ್ತುಡು ಅಕುಲ್‌ ಮರ್ಡರ್‌ ಮಲ್ತ್ದೆರ್ ಪಂದ್ ತೆರಿದ್‌ ಬೈದ್‌ಂಡ್.
ಉಂದುವೇ ಅಕ್ಷಯ್ ಕಲ್ಲೇಗ ಕೂಟದಕುಲ್‌ ಬಿಗ್ ಬಾಸ್‌ ಸೀಸನ್‌ 9 ಡ್ ಪಿಲಿಯೇಸ್‌ನ್‌ ನಲ್ತ್‌ದ್‌ ಪುಗರ್ತೆನ್‌ ಪಡೆದಿತ್ತೆರ್.
