ಕಾನೂನು ಬದ್ದವಾದ್ ನಿಗದಿ ಮಲ್ತಿನ MSPದ ಮಿತ್ತ್ ಕೊರ್ನ ಭರವಸೆನ್ ಜಾರಿಗ್ ಕನವಂದಿನ ಬೊಕ್ಕ ಬೇತೆ ಬೇತೆ ಬೇಡಿಕೆಲೆನ್ ಈಡೇರಿಸಾವಂದಿನ ಬಗೆಟ್ಟ್ ಕೇಂದ್ರದ ಮಿತ್ತ್ ನ.26 ಕ್ಕ್ ರಾಷ್ಟ್ರ ಇಡೀ ಪ್ರತಿಭಟನೆ ನಡಪರೆ ಉಂಡು.
ಸಂಘಟಿತ ಕಾರ್ಮಿಕೆರೆಗ್ ತಿಂಗೊಲ್ದ ಸಂಬಳ 26000 ರೂ. ನಿಗದಿ ಮಲ್ಪೊಡು. ಪ್ರಧಾನಮಂತ್ರಿ ಫಸಲ್ ಬಿಮಾ ಯೋಜನೆನ್ ಬದಲ್ ಮಲ್ಪುನೇ ಬೊಕ್ಕ ಬೇತೆ ಬೇತೆ ಬೇಡಿಕೆನ್ ಈಡೇರಿಸಾಯೆರೆ ಸುಮಾರ್ ರೈತೆರ್ ಬೊಕ್ಕ ಕಾರ್ಮಿಕ ಸಂಘಟನೆಲು ಆನಿ ದೇಶ ಇಡೀ ಪೊರ್ಂಬಾಟ ಮಲ್ತೊಂದುಂಡು.
ಇಂದ್ರಾಳಿ ರೈಲ್ವೆ ಸಂಕ ಕಾಮಗಾರಿದ ಭಾಗವಾದ್ ಧಾರವಾಡದ ಪದ್ಮಜಾ ಇಂಡಸ್ಟ್ರೀಸ್ ಡ್ ತಯಾರಾವೊಂದು ಇಪ್ಪುನ ಸ್ಟೀಲ್ ಬ್ರಿಡ್ಜ್ ನಿರ್ಮಾಣ ಘಟಕಗ್ ಕೇಂದ್ರ ಸಚಿವೆ ಶೋಭಾ ಕರಂದ್ಲಾಜೆ ಮೆರೆನ ಸೂಚನೆದಂಚೆನೆ ಒಡಿಪು ಶಾಸಕೆರ್ ಯಶ್ ಪಾಲ್ ಸುವರ್ಣ ಭೇಟಿ ಕೊರ್ದು, ಅಧಿಕಾರಿಲೆನೊಟ್ಟಿಗೆ ಸ್ಟೀಲ್ ಬ್ರಿಡ್ಜ್ ನಿರ್ಮಾಣದ ಬಗೆಟ್ಟ್ ಸಮಾಲೋಚನೆ ನಡಪಾದ್ ಬೇಗನೇ ಕೊರ್ಪುಲೆಕ್ಕ ಮಲ್ಪುವೆ ಪಂದ್ ಅಧಿಕಾರಿಲೆಗ್ ಸೂಚನೆ ಕೊರ್ತೆರ್.
ಸುಮಾರ್ 5.20 ಕೋಟಿ ರೂಪಾಯಿಡ್ 54 ಮೀಟರ್ ಉದ್ದ ಬೊಕ್ಕ 12.5 ಮೀಟರ್ ಅಗಲದ 385 ಟನ್ ಸಾಮರ್ಥ್ಯದ ಸ್ಟೀಲ್ ಬ್ರಿಡ್ಜ್ ದ 60% ಕಾಮಗಾರಿ ಮುಗಿವುಂಡು. ಪದಿನೈನ್ ದಿನಟ್ಟ್ 80% ಮುಗಿನ ಬೊಕ್ಕ ರೈಲ್ವೇ ಇಲಾಖೆದ ತಾಂತ್ರಿಕ ವಿಭಾಗ ಪರಿಶೀಲನೆ ನಡಪಾದ್ ವರದಿ ಸಂದಾಯಿನ ಬೊಕ್ಕ ಡಿಸೆಂಬರ್ ಸುರುತ್ತ ವಾರಡ್ ಇಂದ್ರಾಳಿಡ್ ಸ್ಟೀಲ್ ಬ್ರಿಡ್ಜ್ ಅಳವಡಿಕೆ ಪ್ರಕ್ರಿಯೆ ನಡಪರೆ ಉಂಡು. ಆವೆರ್ದ್ ಬೊಕ್ಕ ಸ್ಟೀಲ್ ಬ್ರಿಡ್ಜ್ ಮಿತ್ತ್ 200 ಎಂ. ಎಂ. ಕಾಂಕ್ರಿಟೀಕರಣ ನಡಪರೆ ಉಂಡು.
ಡಿಸೆಂಬರ್ ಅಕೇರಿದ ವಾರಡ್ ಇಂದ್ರಾಳಿ ರೈಲ್ವೇ ಸಂಕ ಕಾಮಗಾರಿ ಮುಗಿವುಂಡು. ಜನವರಿಡ್ ಸಾರ್ವಜನಿಕೆರೆನ ಸೇವೆಗ್ ಲಭ್ಯ ಆಪುಂಡು ಪಂದ್ ಶಾಸಕೆರ್ ಯಶ್ ಪಾಲ್ ಸುವರ್ಣ ತೆರಿಪಾದೆರ್.
ಈ ಪೊರ್ತುಡು ಸುಗ್ಗಿ ಸುಧಾಕರ ಶೆಟ್ಟಿ, ಮಹೇಶ್ ಶೆಟ್ಟಿ ಪಾಲ್ ಪಡೆದಿತ್ತೆರ್.
ಆರೋಗ್ಯಗ್ ಎಡ್ಡೆ ಪಂದ್ ಎಚ್ಚಾದ್ ಪಚ್ಚೆ ಸೊಪ್ಪು ತಿಂದ್ಂಡ ಅನಾರೋಗ್ಯ ಬರ್ಪುಂಡು ಪಂದ್ ಬೆಂಗ್ಲೂರ್ ದ ವಿಜ್ಞಾನಿಲು ಎಚ್ಚರಿಕೆ ಕೊರ್ತೆರ್.
ಇಂಚಿಪ್ಪ ಸುಮಾರ್ ರೀತಿದ ಪಚ್ಚೆ ಸೊಪ್ಪುನ್ ಪರೀಕ್ಷೆ ಮಲ್ಪುನಗ, ಸೊಪ್ಪುಡು ಲೋಹದ ಸಾಂದ್ರತೆ ಎಚ್ಚ ಇಪ್ಪುನವು ಗೊತ್ತಾತ್ತ್ಂಡ್. ಸಾಮಾನ್ಯವಾದ್ KG ಸೊಪ್ಪುಡು 425.5mg ಲೋಹ ಇಪ್ಪುಂಡು. ಆಂಡ ಇಂಚಿಪ್ಪದ ಸೊಪ್ಪುಡು 514.05mg ಲೋಹ ಪತ್ತೆ ಆತ್ಂಡ್. ಅಂಚಾದ್ ಸಾವಯವ ಕೃಷಿ ಪದ್ದತಿಡ್ ಬುಲೆಪಾಯಿನ ಸೊಪ್ಪುನ್ ತಿನಿಯೆರೆ ಸಲಹೆ ಕೊರ್ತೆರ್.
ಕ್ರಿಕೆಟ್ ವಿಶ್ವಕಪ್ 2023ದ 39ನೇ ಪಂತೊ ಆಸ್ಟ್ರೇಲಿಯಾ ಬೊಕ್ಕ ಅಫ್ಘಾನಿಸ್ತಾನೊದ ನಡುಟು ನವೆಂಬರ್ 7ತಾನಿ ನಡತ್‌ದಿತ್ತ್ಂಡ್. ಈ ಗೊಬ್ಬುಡು ಗ್ಲೆನ್ ಮ್ಯಾಕ್ಸ್‌ವೆಲ್‌ನ ಚಾತುರ್ಪುರ್ದಾವರ ಆಸ್ಟ್ರೇಲಿಯಾ ಸೋಪುನ ಗೊಬ್ಬುನು ಗೆಂದ್ಂಡ್. ಮ್ಯಾಕ್ಸ್ವೆಲ್ 150 ರನ್ ಮಲ್ತ್ ಗೊಬ್ಬೊಂದುಪ್ಪುನಗ ತಡೆಯೆರಾವಂದಿ ಕಾರ್‌ಬೇನೆರ್ದಾವರ ಗ್ರೌಂಡ್‌ದ ನಡುಟೇ ಮಲಂಕನೆ ಜೆಪ್ಪೊಡಾದ್ ಬತ್ತ್ಂಡ್.
ಆಂಡಲಾ ಕೈಪೆದ ಕೋರಿಲೆಕ ಕುಡ ಕುಡ್ತ್ ಲಕ್ಕ್‌ದ್ ಐತಿಹಾಸಿಕ ಬ್ಯಾಟಿಂಗ್ ಮಲ್ತ್‌ದ್ ಆಸ್ಟ್ರೇಲಿಯಾನ್ ಗೆಲ್ಮೆದ ಕರೆ ಸೇರಾದಿತ್ತೆರ್. ಉಂದು ಒಂಜಿ ಮರ್ಗಿಲ್‌ದ ಕತೆ. ಈತೇ ಆತ್ಂಡ ಎಡ್ಡೆ ಇತ್ತ್ಂಡ್. ಆಂಡ, ದೈವಾರಾಧನೆನ್ ಲೋಕೊರ್ಮೆ ತೋಜಾವ ಪಂದ್ ದೈವಾರಾಧನೆನ್ ಪತೊಂದು ಮನೋರಂಜನೆಗ್ ತಿರ್ಗಾದ್ ಕಾಸ್ ಮನ್ಪರೆ ಪಿದಡಿನಕಲೆನ ವಿಕೃತ ಮನಸ್ಥಿತಿತ ಒಂಜಿ ಬೇಲೆ ತುಳುನಾಡ ಆಚರಣೆನ್ ಕುಡೊರ ನಡುಸಾದಿಗ್ ಕೊನತ್ ಪಾಡ್ದ್ಂಡ್. ಗ್ರೌಂಡ್‌ಡ್ ದೂರೊದ ಆಸ್ಟ್ರೇಲಿಯಾ ದೇಶೊದ ಬ್ಯಾಟ್ಸ್‌ಮನ್ ಗ್ಲೆನ್ ಮ್ಯಾಕ್ಸ್ವೆಲ್ ಜೆತ್ತ್‌ದುಪ್ಪುನ ಫೋಟೋದ ಬರಿಟ್ ‘ಹೊಂಬಾಳೆ ಫಿಲಂಸ್’ ದ ದೈವೊಲೆನ ಆಧಾರಿತ ಪಿಚ್ಚರ್ ಕಾಂತಾರಾದ ದೈವೊದ ಒಂಜಿ ಫೋಟೋನ್ ಗೋಡ್ಯಾದ್ ತರೆಮುದೆಲ್‌ದಾಂತಿನ ಎಡಿಟ್‌ನ್ ‘ಹೊಂಬಾಳೆ ಫಿಲಂಸ್’ ತನ್ಕುಲೆ ಅಫೀಷಿಯಲ್ ವಾಟ್ಸಾಪ್ ಚಾನೆಲ್‌ಡ್ ಪಟ್ಟೊಂದೆರ್.
ನಿಜವಾದ್ ದೈವೊಲೆನ ಮಿತ್ತ್ ಪೋಡಿಗೆ, ನಂಬಿಕೆ ಇತ್ತಿನಕುಲು ಮನ್ಪಿನ ಬೇಲೆ ಉಂದತ್ತ್. ತುಳುವೆರ್ ಪೋಡಿದ್ ಪತ್ತ್ ಬಿರೆಲ್ ಒಪ್ಪ ಮಲ್ತ್‌ದ್ ಕೈ ಮುಗಿಯುನ ದೈವೊಲೆನ್ ಇನಿಕಾನಗ ಕಾಸ್ ಮನ್ಪೆರೆ ಬೋಡಾದ್ ತಾಟಿ ಬೊಟ್ಟುದು, ವಿಶಿಲ್ ಪಾಡೊಂದು ತೂಪುಲೆಕ ಮಲ್ತಿನ ಮೊಕುಲು ಕುಡೊರ ಕಾಂತಾರಾ-2 ಮಲ್ತ್‌ದ್ ದೈವಾರಾಧನೆಗ್ ನನ ಏತ್ ಕೋಂಗಿ ಕಟ್ಟಾವೆರಾ??? ಮುಲ್ಪ ತಪ್ಪು ಕಾಲಿ ರಿಷಭ್‌ನ, ಕಾಲಿ ಹೊಂಬಾಳೆ ಫಿಲಂಸ್‌ದ ಅತ್ತ್. ನಮ ತುಳುವೆರೆನಲಾ ಆತೇ ಪಾಲ್ ಉಂಡು. ಆಂಡ ಗಟ್ಟದ ಆಮೆಯಿತ ನಾಲ್ ಜನ ಮಕ್ಕರ್ ಮನ್ಪೆದಿನ ನಮ್ಮ ಸಂಸ್ಕೃತಿ ಇನಿ ದೇಶೊಡೊರ್ಮೆ, ಲೋಕೊರ್ಮೆ ಜನೊಕುಲೆಗ್ ಮನೋರಂಜನೆದ ಮೀಮ್ ಮೆಟೀರಿಯಲ್ ಆತ್ಂಡ್ ಪಂಡ ಕಾಂತಾರಾ ಸಿನೆಮಾನೇ ನೆವನ ಪಂದ್ ಜನಕುಲು ಬೆಚ್ಚ ಆತೆರ್.
ಸುಬ್ರಹ್ಮಣ್ಯದ ಆಂಜನೇಯ ಗುಡಿಟ್ ನ.9 ರಾತ್ರೆ ಕಲ್ವೆ ಒರಿ ಕಂಡರೆ ಬೈದಿನ ನಡಕೆ ನಡತ್ಂಡ್. ಈ ಬಗ್ಗೆ ಕುಕ್ಕೆ ಸುಬ್ರಹ್ಮಣ್ಯ ದೇವಸ್ಥಾನದ ವತಿರ್ದ್ ಕಾರ್ಯನಿರ್ವಾಹಣಾಧಿಕಾರಿ ಸುಬ್ರಹ್ಮಣ್ಯ ಠಾಣೆಗ್ ದೂರು ಕೊರ್ತೆರ್ ಪಂದ್ ತೆರಿದ್‌ ಬೈದ್‌ಂಡ್.
ದೇವಸ್ಥಾನದ ಆಂಜನೇಯನ ಗುಡಿತ್ತ ಕೈತಲ್ ಪಾಡ್ದಿ ತ್ತಿನ ಸಿ.ಸಿ ಕ್ಯಾಮರಲೆನ್‌ ತೂದು ಕಲ್ವೆ ಒರಿ ಗೇಟ್‌ ದಾಟ್‌ದ್ ಕಂಡಿನ ದೃಶ್ಯ ತೋಜಿದ್ ಬೈದ್‌ಂದ್. ಸುಬ್ರಹ್ಮಣ್ಯ ಪೊಲೀಸೆರ್‌ ಕೇಸ್ ದಾಖಲೆ ಮಲ್ತ್‌ದ್ ತನಿಖೆ ಮಲ್ತೊಂದು ಉಲ್ಲೆರ್.
ವಾರಣಾಸಿದ ಲಲ್ಲಾಪುರತ ಮುಸ್ಲಿಂ ಪೊಂಜೊವು ನಜ್ಮಾ ಪರ್ವೀನ್ ಮೇರ್ ಪ್ರಧಾನಮಂತ್ರಿ ಮೋದಿಯೆರೆನ ಬಗೆಟ್ ಸಂಶೋಧನೆ ಮಲ್ತ್ ಪಿಎಚ್‌ಡಿ ಪ್ರಬಂಧ ಮಂಡನೆ ಮಲ್ದೆರ್. ಬನರಾಸ್ ಹಿಂದೂ ವಿಶ್ವವಿದ್ಯಾಲಯದ ರಾಜ್ಯಶಾಸ್ತ್ರ ವಿಭಾಗೊಡು “ನರೇಂದ್ರ ಮೋದಿಯೆರೆನ ರಾಜಕೀಯ ನಾಯಕತ್ವ – ಒಂಜಿ ವಿಶ್ಲೇಷನಾತ್ಮಕ ಅಧ್ಯಯನ” ಪನ್ಪಿನ ವಿಷಯೊಡು ಪಿಎಚ್‌ಡಿ ಮಲ್ದೆರ್.
ಕೌಟುಂಬಿಕ ಸಮಸ್ಯೆಲೆನ ನಡುಟುಲಾ ಸಂಶೋಧನೆ ಪೂರ್ಣ ಮಲ್ತ್ ಪಿಎಚ್‌ಡಿ ದೆತೊಂಡೆರ್. 2014ಟ್ಟ್ ಸಂಶೋಧನೆ ಸುರು ಮಲ್ತ್, ಪ್ರೊ.ಸಂಜಯ್ ಮೆರೆನ ಗೈಡೆನ್ಸ್ ಡ್ ಸಂಶೋಧನೆ ಮಲ್ದೆರ್.
ಪುತ್ತೂರು: ಹಿಂದೂ ಸಂಘಟನೆದ ಮುಖಂಡೆರ್ ಅರುಣ್ ಕುಮಾರ್ ಪುತ್ತಿಲ ಮೆರೆನ ಮುಕ್ರಂಪಾಡಿ ಪುತ್ತಿಲ ಪರಿವಾರದ ಕಚೇರಿದ ಎದುರುಡು ಜವನೆ ಒರಿ ನಾಲ್ ಜನತ್ತ ಒಟ್ಟು ಗು ಬತ್ತ್ ದ್ ತಲ್ವಾರ್ ಪತೊಂದು ಬೊಬ್ಬೆ ಪಾಡೊಂದು ಇತ್ತಿನ ಘಟನೆ ಆನಗನೆ ಪುತ್ತೂರು ನಗರ ಠಾಣಾ ಪೊಲೀಸೆರ್‌ ಜಾಗೆಗ್‌ ಬತ್ತ್‌ದೆರ್.
ಅರುಣ್ ಪುತ್ತಿಲ ಬೆಂಬಲಿಗೆರ್ ಮನೀಶ್ ಕುಲಾಲ್ ಬನ್ನೂರು ಅರೆನ್ ಗುರಿಯಾದ್‌ ದೀದ್ ದಿನೇಶ್ ಪಂಜಿಗ ಪನ್ಪುನಾಯೆ ನಾಲ್ ಜವನೆರ್ನ ಒಟ್ಟಿಗೆ ತಲ್ವಾರ್ ಪತೊಂದು ಬತಿತ್ತೆ. ಮನೀಶ್ ಕುಲಾಲ್ ಕಚೇರಿಡ್‌ ಇಜ್ಜಾಂಡ್. ಮಾಹಿತಿ ತೆರಿನ ಮನೀಶ್ ಕುಲಾಲ್ ಪೊಲೀಸೆರೆಗ್ ಮಾಹಿತಿ ಕೊರಿಯೆರ್. ಅಪಗನೆ ಪೊಲೀಸ್‌ ಬತ್ತ್‌ದ್ ಜವನೆರೆನ್‌ ಅರೆಸ್ಟ್ ಮಲ್ದೆರ್. ವಾಟ್ಸಾಪ್ ಗ್ರೂಪ್‌ಡ್ ನಡತ್ತಿನ ಚರ್ಚೆದ ಕೋಪಡ್ ಈ ಕೃತ್ಯ ನಡತ್ಂಡ್. ಬೊಲ್ಪುಗೆ ತಲ್ವಾರ್ ಪತ್ತೊಂದು ಇಪ್ಪುನ ಮಾತ ತೂದು ಜನಕ್ಲೆಡ ಆಕ್ರೋಶ ಬೊಕ್ಕ ಆತಂಕ ಎದುರಾತ್‌ಂಡ್.
ಬೆಂಗಳೂರು: ಭಾರತೀಯ ಮೂಲದ ನ್ಯೂಜಿಲ್ಯಾಂಡ್ ಕ್ರಿಕೆಟಿಗೆ ರಚಿನ್ ರವೀಂದ್ರ ಈ ಸರ್ತಿದ ವಿಶ್ವಕಪ್‌ಡ್ ಎಡ್ಡೆ ಫಾರ್ಮ್‌ಡ್‌ ಉಲ್ಲೆರ್. ಗುರುವಾರ ನ್ಯೂಜಿಲ್ಯಾಂಡ್ ಬೆಂಗಳೂರು ಚಿನ್ನಸ್ವಾಮಿ ಕ್ರೀಡಾಂಗಣಡ್ ಶ್ರೀಲಂಕಾ ವಿರುದ್ಧ ಗೊಬ್ಬುದು ಇತ್ತ್ಂಡ್.
ಇತ್ತೆ ಬೆಂಗಳೂರುಡು ಇಪ್ಪುನ ಅಜ್ಜಿ ಇಲ್ಲಗ್ ರಚಿನ್ ರವೀಂದ್ರ ಭೇಟಿ ಕೊರ್ತೆರ್. ರಚಿನ್ ಅರೆನ ಅಜ್ಜಿ ಪುಳ್ಳಿನ ದೃಷ್ಟಿ ದೆಪ್ಪುನ ವಿಡಿಯೋ ವೈರಲ್ ಆತ್ಂಡ್. ನ್ಯೂಜಿಲ್ಯಾಂಡ್‌ದ ಯುವ ಆಲ್‌ರೌಂಡರ್ ತನ್ನ ಭಾರತೀಯ ಆಚರಣೆನ್ ತೂದು ಅಭಿಮಾನಿಲು ಖುಷಿ ಆತೆರ್.
ಒಡಿಪು: ಹಿರಿಯ ಪತ್ರಕರ್ತೆರ್ ಶಶಿಧರ ಹೆಮ್ಮಣ್ಣ (57) ತಿಗಲೆ ಬೇನೆ ಬತ್ತ್ ದ್ ತೀರ್ ಪೋಯೆರ್.
ಒಡಿಪುದ ಇಲ್ಲಲ್ ಗುರುವಾರ ಕಾಂಡೆ
ತಿಗಲೆಬೇನೆ ತೋಜಿದ್ ಬತ್ತ್ಂಡ್. ಪೇಂಟೆದ ಆಸ್ಪತ್ರೆಡ್ ತೋಜಾನಗ ಹಾರ್ಟ್ ಆಟ್ಯಾಕ್ ಆತ್ಂಡ್ ಪಂದ್ ಪಂಡೆರ್.
ಎಚ್ಚದ ಚಿಕಿತ್ಸೆಗಾದ್ ಮಣಿಪಾಲದ ಆಸ್ಪತ್ರೆಗ್ ಲೆತೊಂದು ಪೋದಿತ್ತೆರ್. ಐಸಿಯು ಡ್ ಇತ್ತಿನ ಮೇರ್ ರಾತ್ರೆ ತೀರ್ ಪೋತೆರ್.
1981 ಡ್ ಕುಂದ ಪ್ರಭ ಪತ್ರಿಕೆದ ಮುಖೆನ ವೃತ್ತಿ ಜೀವನನ್ ಸುರು ಮಲ್ತಿನ ಮೇರ್ ಕ್ಷಿತಿಜ ಪನ್ಪಿನ ಸ್ವಂತ ಪತ್ರಿಕೆನ್ ಸುರು ಮಲ್ತ್ ದ್ ಮುಖ್ಯ ಸಂಪಾದಕೆರ್ ಆದಿತ್ತೆರ್.
ಬೊಕ್ಕ ಈ ಟಿವಿ ಕನ್ನಡ, ಡಿಡಿ ನ್ಯೂಸ್ ಡ್ ಜಿಲ್ಲಾ ವರದಿಗಾರೆಯಾದ್ ಬೇಲೆ ಮಲ್ತೊಂದು ಇತ್ತೆರ್. ಮೇರ್ ಕೃಷಿಕ್ ಸಂಬಂಧಪಟ್ಟಿನಂಚಿನ ಲೇಖನನ್ ಬರೆದ್ ಸರಕಾರದ ಗಮನ ಸೆಳೆದಿತ್ತೆರ್. ಅಂಚನೆ ಕೆನೆಕ್ಟ್ ಸಂಸ್ಥೆನ್ ಪುಟ್ಟಾದ್ ಮಸ್ತ್ ಯೋಜಲೆನ್ ರಾಜ್ಯದಾದ್ಯಂತ ಸುರು ಮಲ್ಪೆರೆ ತಯಾರ್ ಆದಿತ್ತೆರ್.
ಮೇರೆಗ್ ಪೊಪ್ಪ, ಅಮ್ಮ, ಬುಡೆದಿ, ಮಗೆ, ನಾಲ್ ಜನ ಅಣ್ಣನಕುಲು, ಅಕ್ಕನಕುಲು ಉಲ್ಲೆರ್.
ರಾಜ್ಯದ ಮಾಜಿ ಮುಖ್ಯಮಂತ್ರಿ ವೀರಪ್ಪ ಮೊಯ್ಲಿ ಮೇರೆಗ್ ಬೆಂಗಳೂರು ಕಂಬುಲ ಸಮಿತಿ (ರಿ), ಬೆಂಗಳೂರು ಸಮಿತಿದ ಪದಾಧಿಕಾರಿಲು ಭೇಟಿ ಕೊರ್ದು”ಬೆಂಗಳೂರು ಕಂಬುಲ – ನಮ್ಮ ಕಂಬುಲಗ್ ” ಲೆಪ್ಪೋಲೆನ್ ಕೊರಿಯೆರ್.
ಈ ಪೊರ್ತುಡು ಕಂಬುಲ ಸಮಿತಿದ ಪದಾಧಿಕಾರಿಲು ಇತ್ತೆರ್.
