ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News

ಎಕ್ಸೆಲ್ ಕಾಲೇಜ್ ದ ಸುಮಂತ್ ಕುಮಾರ್ ಜೈನ್ ಮೇರೆಗ್ “ಬೆಹರಿನ್ ಇಂಡಿಯಾ ಇಂಟರ್‌ನ್ಯಾಷನಲ್ ಅವಾರ್ಡ್ಸ್-2024”

ಬೊಲ್ತೇರ್: ನಾಡ್ ದ ಶ್ರೇಷ್ಠ ಸಾಧಕೆರೆಗ್ ಕೊರ್ಪುನ “ಬೆಹರಿನ್ ಇಂಡಿಯಾ ಇಂಟರ್‌ನ್ಯಾಷನಲ್ ಅವಾರ್ಡ್ಸ್-2024” ಪ್ರಶಸ್ತಿಗ್ ಗುರುವಾಯನಕೆರೆ ಎಕ್ಸೆಲ್ ಸಂಸ್ಥೆದ ಗುರ್ಕಾರೆ ಸುಮಂತ್ ಕುಮಾರ್ ಜೈನ್.ಬಿ ಆಯ್ಕೆ ಆತೆರ್.

ಕರ್ನಾಟಕದ ಪುಗರ್ತೆದ ದಿನಪತ್ರಿಕೆ ಕನ್ನಡಪ್ರಭ ಬೊಕ್ಕ ಸುದ್ದಿವಾಹಿನಿ ಏಷ್ಯಾನೆಟ್ ಸುವರ್ಣನ್ಯೂಸ್ ಸಂಸ್ಥೆದ ಪ್ರಾಯೋಜಕತ್ವಡ್, ಸಾಧನೆನ್ ಗುರುತಿಸಾದ್ “ಬೆಹರಿನ್ ಇಂಡಿಯಾ ಇಂಟರ್ ನ್ಯಾಷನಲ್ ಅವಾರ್ಡ್ಸ್ 2024” ಪುರಸ್ಕಾರ ಕೊರ್ದು ಮಾನಾದಿಗೆ ಮಲ್ಪೆರೆ ಉಂಡು. ಈ ಪ್ರಶಸ್ತಿ ಪ್ರದಾನ ಲೇಸ್ ಜ.19 ಕ್ಕ್ ಬೆಹರಿನ್ ದೇಶಡ್ ನಡಪರೆ ಉಂಡು.

ಜ.21-26: ಅತ್ತೂರು ಸಂತ ಲಾರೆನ್ಸ್‌ ಬಸಿಲಿಕಾದ ವಾರ್ಷಿಕ ಉಚ್ಚಯ

ಕಾರ್ಲ: ಕ್ರೈಸ್ತ ಶ್ರದ್ಧಾ ಕೇಂದ್ರ ಅತ್ತೂರು ಸಂತ ಲಾರೆನ್ಸ್‌ ಬಸಿಲಿಕಾದ ವಾರ್ಷಿಕ ಉಚ್ಚಯ ಜ.21-26 ಮುಟ್ಟ ನಡಪರೆ ಉಂಡು.

ಜ.21 ಕ್ಕ್ ಬಯ್ಯಗ್ ಕುಡ್ಲದ ನಿವೃತ್ತ ಧರ್ಮಾಧ್ಯಕ್ಷೆರ್ ಅಲೋಶಿಯಸ್ ಪ್ಲಾವ್ ಡಿಸೋಜಾ ಮೇರ್ ಪವಿತ್ರ ಗ್ರಂಥ ಅರ್ಥ ಮಲ್ಪುಲೆಕ್ಕ ಆರೆನ ಬುದ್ಧಿನ್ ವಿಕಾಸ ಮಲ್ತೆರ್ (ಕೊಂಕಣಿ) ಪನ್ಪುನ ಇಸಯದ ಬಗೆಟ್ಟ್ ಸಂದೇಶ ಕೊರಿಯೆರೆ ಉಲ್ಲೆರ್.

ಜ.22 ಕ್ಕ್ ಬಯ್ಯಗ್ ಶಿವಮೊಗ್ಗದ ಧರ್ಮಾಧ್ಯಕ್ಷೆರ್ ಫ್ರಾನ್ಸಿಸ್ ಸೆರಾವೋ ಮೇರ್ ಒರಲ ಬಿಡುವು ಇಜ್ಜಂದ ಪ್ರಾರ್ಥನೆ ಮಲ್ಪುಗ ಇಸಯದ (ಕನ್ನಡ) ಬಗೆಟ್ಟ್ ಸಂದೇಶ ಕೊರಿಯೆರೆ ಉಲ್ಲೆರ್.

ಜ.23 ಕ್ಕ್ ಬಯ್ಯಗ್ ಪುತ್ತೂರು ಧರ್ಮಾಧ್ಯಕ್ಷೆರ್ ಜೀವರ್ಗಿಸ್ ಮಾರ್ ಮಕಾರಿಯೊಸ್ ಮೇರ್ ಪ್ರಚೋಧನೆಗ್ ಸೇರಂದೆ ಪ್ರಾರ್ತನೆ ಮಲ್ಪುಗ (ಕನ್ನಡ) ಇಸಯದ ಬಗೆಟ್ಟ್ ಸಂದೇಶ ಕೊರಿಯೆರೆ ಉಲ್ಲೆರ್.

ಜ.24 ಕ್ಕ್ ಬೊಲ್ಪುಗು ಒಡಿಪು ಧರ್ಮಾಧ್ಯಕ್ಷೆರ್ ಜೆರಾಲ್ಡ್ ಐಸಾಕ್ ಲೋಬೋ ಮೇರ್ ಕೇನುನ ಪ್ರತಿಯೊರಿಗ್ಲಾ ತಿಕ್ಕುಂಡು (ಕೊಂಕಣಿ) ಇಸಯದ ಬಗೆಟ್ಟ್ ಸಂದೇಶ ಕೊರಿಯೆರೆ ಉಲ್ಲೆರ್.

ಜ.25 ಕ್ಕ್ ಬೊಲ್ಪುಗು ಕುಡ್ಲ ಧರ್ಮಾಧ್ಯಕ್ಷೆರ್ ಪೀಟರ್ ಪಾವ್ಲ್ ಸಲ್ಡಾನ್ಹಾ ಮೇರ್ ವಿನಮ್ರರಾದ್ ಪ್ರಾರ್ತನೆ ಮಲ್ಪುಗ (ಕೊಂಕಣಿ) ಇಸಯದ ಬಗೆಟ್ಟ್ ಸಂದೇಶ ಕೊರಿಯೆರೆ ಉಲ್ಲೆರ್.

ಜ.26 ಕ್ಕ್ ಬೊಲ್ಪುಗು ಬೊಲ್ತೇರ್ ಧರ್ಮಾಧ್ಯಕ್ಷೆರ್ ಲೊರೆನ್ಸ್ ಮಕ್ಕುಝಿ ಮೇರ್ ವಿಶ್ವಾಸ ಇಪ್ಪುನ ಪ್ರಾರ್ಥನೆ ರೋಗಿನ್ ಗುಣ ಮಲ್ಪುಂಡು (ಕನ್ನಡ) ಪನ್ಪುನ ಇಸಯದ ಬಗೆಟ್ಟ್ ಸಂದೇಶ ಕೊರಿಯೆರೆ ಉಲ್ಲೆರ್ ಪಂದ್ ಸಂತ ಲಾರೆನ್ಸ್ ಬಸಿಲಿಕದ ಆಡಳಿತ ಸಮಿತಿ ಪ್ರಕಟಣೆಡ್ ತೆರಿಪಾದ್ಂಡ್.

ಕೊಕ್ಕಡ ಸಮುದಾಯ ಆರೋಗ್ಯ ಕೇಂದ್ರಡ್ ಡಾ| ದೀಪ್ತಿ ಮೆರೆಗ್ ಮಾನಾದಿಗೆ

ಜೆಸಿಐ ಕಪಿಲಾ ಘಟಕದ ಮುತಾಲಿಕೆಡ್ ಕೊಕ್ಕಡ ಪ್ರಾಥಮಿಕ ಆರೋಗ್ಯ ಕೇಂದ್ರಡ್ ಡಾ/ ತುಷಾರಾಕುಮಾರಿ ಮೆರೆನ ಸಮ್ಮುಖಡ್ ಪೊಸತಾದ್ ಕೆಲಸಗ್ ಹಾಜರಾಯಿನ ಡಾ| ದೀಪ್ತಿ ಮೆರೆಗ್ ಮಾನಾದಿಗೆ ಮಲ್ತೆರ್.

ಈ ಪೊರ್ತುಡು ಜೆಸಿಐ ಕೊಕ್ಕಡ ಕಪಿಲಾ ಘಟಕದ ಗುರ್ಕಾರೆ ಜೆಸಿ ಎಚ್ ಜಿಎಫ್ ಸಂತೋಷ್ ಜೈನ್, ಕಾರ್ಯದರ್ಶಿ ಜೆಸಿ ಅಕ್ಷತ್ ರೈ, ಎಚ್ ಜಿಎಫ್ ಜೋಸೆಫ್ ಪಿರೇರಾ, ಜೆಸಿ ಎಚ್ ಜಿಎಫ್ ಜೆಸಿಂತಾ ಡಿಸೋಜ, ಗ್ರಾಮಾಭ್ಯುದಯ ಕಾರ್ಯಕ್ರಮ ಅನುಷ್ಠಾನ ಸಮಿತಿದ ಗುರ್ಕಾರೆ ಜೆಸಿ ಪಿಟಿ ಸಭಸ್ಟೀನ್, ಕಳೆಂಜ ಶ್ರೀ ಸದಾಶೀವೇಶ್ವರ ದೇವಲ್ಯದ ಆಡಳಿತ ಮೊಕ್ತೇಸರೆರ್ ಜೆಸಿ ಕೆ ಶ್ರೀಧರ್ ರಾವ್ ಬೊಕ್ಕ ಸಿಬ್ಬಂದಿ ಪ್ರವೀಣ್ ಪಾಲ್ ಪಡೆದಿತ್ತೆರ್.

ರೇಡಿಯೊ ಮಣಿಪಾಲಡ್ ಮಧುರಗಾನ ಸರಣಿ ಲೇಸ್

ಮಣಿಪಾಲ: ರೇಡಿಯೊ ಮಣಿಪಾಲ್ 90.4 Mhz ಡ್ ಮಧುರಗಾನ ಸರಣಿ ಲೇಸ್ ಜ.18 ಗುರುವಾರ ಬಯ್ಯಗ್ 6.30 ಕ್ಕ್ ಪ್ರಸಾರ ಆಪುಂಡು.

ಈ ಲೇಸ್ ಡ್ ಉದಯವಾಣಿ ಉಪಸಂಪಾದಕೆರ್ ಅನಿಲ್ ಕುಮಾರ್ ಕೈರಂಗಳ ಪಾಲ್ ಪಡೆಯೆರೆ ಉಲ್ಲೆರ್. ಜ.19 ಕ್ಕ್ ಮಧ್ಯಾಹ್ನ 2.30 ಕ್ಕ್ ಕುಡೊರ ಪ್ರಸಾರ ಆಪುಂಡು.

ಈ ಲೇಸ್ ನ್ ರೇಡಿಯೊ ಮಾತ್ರ ಅತ್ತಂದೆ ಆಂಡ್ರಾಯ್ಡ್ ಫೋನ್ ಬೊಕ್ಕ ಐಫೋನ್ ಡ್ ರೇಡಿಯೋ ಮಣಿಪಾಲ್ ಆಫ್ ಡೌನ್‌ಲೋಡ್ ಮಲ್ತ್ ದ್ ಕೇನೊಲಿ ಪಂದ್ ರೇಡಿಯೊ ಮಣಿಪಾಲ್ ಸಮುದಾಯ ಬಾನುಲಿ ಕೇಂದ್ರದ ಪ್ರಕಟಣೆ ತೆರಿಪಾದ್ಂಡ್.

ಕುಕ್ಕೆ ಸುಬ್ರಹ್ಮಣ್ಯ ದೇವಲ್ಯದ ಕಿರುಷಷ್ಠಿ, ಧಾರ್ಮಿಕ ಸಭೆ

ನಮ್ಮ ದೇಶ ಮೂಢನಂಬಿಕೆ ಕೇಂದ್ರ ಅತ್ತ್, ದೇವಲ್ಯಗ್ ಇಪ್ಪುನ ಮೂಲ ನಂಬಿಕೆದ ಕೇಂದ್ರಲು: ಮನೋಹರ್ ಮಠದ್

ದೇವಲ್ಯಲು ಧಾರ್ಮಿಕ, ಸಾಮಾಜಿಕ, ಶೈಕ್ಷಣಿಕ, ಸಾಂಸ್ಕೃತಿಕ, ಸೇವಾ ಕೇಂದ್ರ ಅವಡ್, ದೇವಲ್ಯ ಪೂಜೆಗ್ ಮಾತ್ರ ಸೀಮಿತ ಅವಂದೆ ನಮ್ಮ ದೇಶ ಮೂಢನಂಬಿಕೆ ಕೇಂದ್ರ ಅತ್ತ್, ಮೂಲ ನಂಬಿಕೆದ ಕೇಂದ್ರಲು ಪಂದ್ ಕರ್ನಾಟಕ ರಾಜ್ಯ ದೇವಲ್ಯ‌ ಸಂವರ್ಧನಾ ಸಮಿತಿ ಸಂಯೋಜಕೆರ್ ಮನೋಹರ್ ಮಠದ್ ಪಂಡೆರ್.

ಮೇರ್ ಕಿರು ಷಷ್ಠಿ ನಿಲೆಟ್ಟ್ ದೇವಲ್ಯದ ಆಡಳಿತ ಧರ್ಮದರ್ಶಿಲೆನ ಚಿಂತನಾ ಸಭೆ “ಗುಡಿ- ಜನರ ಜೀವನಾಡಿ” ಧಾರ್ಮಿಕ ಲೇಸ್ ಡ್ ಉಪನ್ಯಾಸ ಕೊರಿಯೆರ್.

ದೇವಲ್ಯ ನ್ಯಾಯಸ್ಥಾನಡ್ ನ್ಯಾಯ ಕೊರ್ಪುನ ಜಾಗೆ ಆತ್ಂಡ್. ನ್ಯಾಯಾಧೀಶೆರ್ ಕೊರ್ಪುನ ತೀರ್ಪುರ್ದ್ ಎಡ್ಡೆ ತೀರ್ಪು ದೇವಲ್ಯರ್ದ್ ತಿಕ್ಕುಂಡು. ಆಂಚಾದ್ ಸುಬ್ರಹ್ಮಣ್ಯ ಕ್ಷೇತ್ರಡ್ ಏರ್ಲಾ ಮೋಸ ಮಲ್ಪೊರ್ಚಿ. ಮೋಸ ಮಲ್ತ್ಂಡ ಅವೆರ್ದ್ ಎರೆಗ್ಲಾ ಎಡ್ಡೆ ಆಯೆರೆ ಸಾಧ್ಯ ಇಜ್ಜಿ ಪಂದ್ ಪಂಡೆರ್.

ಕುಕ್ಕೆ ಸುಬ್ರಹ್ಮಣ್ಯ ದೇವಲ್ಯ ಸುಮಾರ್ ಜೋಕುಲೆಗ್ ಅನ್ನದಾನ ಮಲ್ಪುಂಡು, ಶಿಕ್ಷಣ ಕೊರ್ಪುಂಡು. ಮಾಸ್ಟರ್ ಪ್ಲಾನ್ ಮುಕೇನ ಕಾಮಗಾರಿ ಮಲ್ತ್ ದ್ ಅಭಿವೃದ್ಧಿ ಮಲ್ಪುಂಡು. ನೂದೆರ್ದ್ ಎಚ್ಚ ದೈ ನಡ್ ದ್ ಬುಲೆಪಾವೊಂಡು ಉಂಡು ದೇವಲ್ಯಲು ಮಲ್ಪೊಡಾಯಿನ ಕೆಲಸ, ಅವು ಮುಲ್ಪ ನಡತೊಂದು ಉಂಡು ಪಂದ್ ಪಂಡೆರ್.

ಕರ್ನಾಟಕಡ್ ಒಟ್ಟು 34,563 ಸರ್ಕಾರ ವ್ಯವಸ್ಥೆಗ್ ಸೇರಿನ ದೇವಲ್ಯಲು ಉಂಡು. ಉಂದು ಅತ್ತಂದೆ ಬೇತೆ ದೇವಲ್ಯಲು ಸೇರ್ದ್ ಒಟ್ಟಾದ್ 2,84,563 ದೇವಲ್ಯಲು ಉಂಡು ಪಂದ್ ಪೊಲುಬು ಕೊರಿಯೆರ್.

ಸಭೆತ್ತ ಗುರ್ಕಾರ್ಮೆನ್ ಸುಳ್ಯ ವಿಧಾನ ಸಭಾ ‌ಕ್ಷೇತ್ರದ ಶಾಸಕಿ ಕು.ಭಾಗೀರಥಿ ಮುರುಳ್ಯ ಒಯಿಸ್ ದಿತ್ತೆರ್.

ಚಾವಡಿಡ್ ವ್ಯವಸ್ಥಾಪನಾ ಸಮಿತಿ ಗುರ್ಕಾರೆ ಮೋಹನ್ ರಾಂ ಸುಳ್ಳಿ, ವ್ಯವಸ್ಥಾಪನಾ ಸಮಿತಿ ಸದಸ್ಯೆರ್ ಮನೋಹರ ರೈ, ಪಿ.ಜಿ.ಎಸ್.ಎನ್ ಪ್ರಸಾದ್, ಪ್ರಸನ್ನ ದರ್ಬೆ, ಶ್ರೀವತ್ಸಾ ಬೆಂಗ್ಲೂರು, ಲೊಕೇಶ್ ಮುಂಡೊಕಜೆ, ಶೋಬಾ ಗಿರಿಧರ್, ವನಜಾ ಭಟ್, ಕಾರ್ಯನಿರ್ವಾಹಣಾಧಿಕಾರಿ ಡಾl ನಿಂಗಯ್ಯ ಇತ್ತೆರ್.

ಪಿ.ಜಿ.ಎಸ್.ಎನ್ ಪ್ರಸಾದ್ ಎದ್ಕೊನಿಯೆರ್. ಪ್ರಸನ್ನ ದರ್ಬೆ ಸೊಲ್ಮೆ ಸಂದಾಯೆರ್. ವಿನ್ಯಾಸ್ ಹೊಸೋಳಿಕೆ, ಕೃತಿಕಾ ಪಿ.ಎಸ್, ಅಶ್ವಿನಿ ಎಸ್.ಎನ್, ಕೀರ್ತಿ ಲೇಸ್ ನ್ ಸುಧಾರಿಕೆ ಮಲ್ತೆರ್.

ಅಯೋಧ್ಯೆಗ್ ಧರ್ಮಸ್ಥಳರ್ದ್ ಪೂಜೆದ ಸೊತ್ತು

ಅಯೋಧ್ಯೆಡ್ ಜ.22 ಕ್ಕ್ ಶ್ರೀ ರಾಮನ ಮೂರ್ತಿ ಪ್ರಾಣಪ್ರತಿಷ್ಠಾಪನೆ ನಡಪರೆ ಉಂಡು.

ಈ ದಿಟ್ಟಿಡ್ ದಕ್ಷಿಣ ಕನ್ನಡ ಜಿಲ್ಲೆದ ಶ್ರೀ ಕ್ಷೇತ್ರ ಧರ್ಮಸ್ಥಳರ್ದ್ ಬೊಳ್ಳಿದ ಪೂಜೆದ ಸೊತ್ತುಲೆನ್ ಅಯೋಧ್ಯೆಗ್ ಕಡಪಾದೆರ್.

ಸೊತ್ತುಲಾಯಿನ ನೆಲಾರತಿ, ಆರತಿ ಬಟ್ಟಲ್, ಶಂಖ, ನಾಗಾರತಿ, ಘಂಟೆ, ಚಾಮರ, ಕುಂಬನ್ ಕೊರ್ತೆರ್. ಅಂಚೆನೆ ರಾಮಮಂದಿರದ ಉದಿಪನ ಲೇಸ್ ಗ್ ಧರ್ಮಸ್ಥಳದ ಧರ್ಮಾಧಿಕಾರಿ ವೀರೇಂದ್ರ ಹೆಗ್ಗಡೆರೆಗ್ ಲೆಪ್ಪೋಲೆನ್ ಕೊರ್ತುಂಡು.

ಜ.22: ರಾಜ್ಯಡ್ ಶಾಲೆ ಕಾಲೇಜ್ ಗ್ ರಜೆ!?

ಅಯೋಧ್ಯೆಡ್ ಜ.22 ಕ್ಕ್ ನಡಪರೆ ಇಪ್ಪುನ ರಾಮಮಂದಿರದ ಪ್ರಾಣ ಪ್ರತಿಷ್ಠೆ ದಿನತಾನಿ ರಾಜ್ಯಡ್ ಶಾಲೆ ಕಾಲೇಜ್ ಗ್ ರಜೆ ಕೊರೊಡು ಪಂದ್ ಹಿಂದೂಪರ ಸಂಘಟನೆಲು ಸರ್ಕಾರಗ್ ಪತ್ರ ಬರೆತ್ಂಡ್.

ಇತ್ತೆ ಉತ್ತರ ಪ್ರದೇಶ ಸೇರಿನಂಚೆನೆ ಸುಮಾರ್ ರಾಜ್ಯಡ್ ಶಾಲೆಗ್ ರಜೆ ಘೋಷಣೆ ಮಲ್ದೆರ್. ರಾಜ್ಯಡ್ ರಜೆ ಕೊರ್ಪುನ ಬದಲ್ ಶಾಲೆ ಕಾಲೇಜ್ ಡ್ ಲೇಸ್ ದ ನೇರ ಪ್ರಸಾರಗ್ ವ್ಯವಸ್ಥೆ ಮಲ್ಪುನೇ ಎಡ್ಡೆ ಪಂದ್ ಕರ್ನಾಟಕ ಪ್ರಾಥಮಿಕ ಬೊಕ್ಕ ಪ್ರೌಢಶಾಲಾ ಮಂಡಳಿಲೆನ ಒಕ್ಕೂಟ ಸಲಹೆ ಕೊರ್ತುಂಡು.